"MOM, IS SANTA REALLY EXIST?"

Story tawi te te emaw luanliamna emaw post na
jenniferadyshadow
Posts: 25
Joined: January 13th, 2017, 10:36 pm

"MOM, IS SANTA REALLY EXIST?"

Unread post by jenniferadyshadow » November 27th, 2017, 9:17 pm

Mom, is santa really exist?

("Nu, mas putar hi a awm tak tak em?")
Jennifer Chhangte

"He naupang hian engmaw a tihsual chiah a?"

"Dawr ami toys cheng 1000 man a ru a lawm, naupang zaktheilo tak a ni. Hetiang rual lekah pawh thil a ru duh ania!"

U ama a hnai tawh bawk a, bazar chu a tawt țha tawh khawp mai. Mitin mai chu 'mahni seh seh mualah' ti ang maiin an mamawh lamin an phe suau suau a. A țhen chu rethei bakberh ve tê tê an neihin a a tlin tawk in a lei theih tur awm ang melh a an tei kual laiin a țhen erawh an neih hman ngaihna hre loa leng vel an ni thung. Chu'ng dinhmun inthlau zet zet te chu chu bazarah chuan an insul pêl zut a. A tu amah an in ngaihsak tawn hman lo. Ni e, Mizoram mai ni lo, khawvela Kristian tawh phawtin a an ngaihhlut leh nghahhlelh Christmas a nih dawn țep avangin chumi hunpui lo thleng tur chu âm leh ropui thei ang bera lo hmuak turin mitin mai chu an hmanhlel êm a ni.


Thawmhnaw dawr mai pawh ni lo, chawhmeh zawrhna thleng chuan a lun êm êm vek mai a ni. Sumdawng ho lah chuan an chance țha ber mai chu bawhpelh tum lêk loin mamawh lamtute sum chu atam thei ang ber hai luh an lo tum ve bawk a.


Mipa naupang kum 8 âwm vel chuan kil khatah hian sunhlu, balhla leh serțawk tlem a zawng hi a lo țhutpui ve a. Ni e, mite anga hmun ual au deuhah chuan țhut ve theih a duh lutuk. Mahse, duhâmna khawvelah hian miretheite chuan hmunțha an chang ve thei lo a, nek chep leh nek chhuahin an awm zel si a ni. Chutiang ni lo se chu ai chuan minten an rawn pan duhin a thei zawrhte chu a hralh thei zawk mahna.

Chu mipa naupang berh ve tak chuan kekawr dâ leh chul rap tawh mai, rei a peihpui tawh awm lo mange tih tur hi a ha a, a kawrlum polar te lah chu a lumna a bo vek tawh ang tih tur khawpa bêk tlul mai hi a ni a, a silipar bun pawh chu a lêm chuang lo, hmakhawsang hun a mi an laih chhuah leh ni âwma mawi hian a ke artui te chu a pawp lek lek tawh a. Khur beuh beuh chung hian a thil zawrh chu an leisak beiseiin mite chu a thlir kual vel a. Mahse kumtluana chu hun atana lo inbuatsaih a, an sum peipun sa khawhralna tur zawng mekte chuan hei hi an hmuh hmaih leh si a ni. Chu mipa naupang, Christmas-ah enge kan ei anga, enge ka farnu leh nute tan hian ka tihsak ve thei ang tih ngaihtuah mek chu an rilruah reng a lang pha ve mawlh lo.

In lama a haw hun nghakhlel taka lo thlirtu a nu, a inhliam tawh avanga bawksawp reng mai leh a nau kum 3 mi lek chu a ngaihtuahnaah chuan an lo lang uai uai a. In a thlen huna an lo dawnsawn dan tur te chu mitthlain, an tan a theih tawp a chhuah angai tih a inhria a. A thei zawrhte chu țhutpui satliah mai loin nasa lehzual chuan a aupui ta a.

Hringnun hi a fair lo a ni tiraw chhiartu duhtakte u. Ani ang rual lek chuan thil zuar loin a rualpui te anga infiam a lenkual a, nute eirawng bawlsa eia hlim taka engmah dawn loa tualchai te a châk ve asin. A chunga engkim tla tur chuan a la naupang lu deuh a ni. Chuti chung chuan a vui ngai lo ni mai loin a nu leh farnu te hlimna a duh êm avang chuan a theihtawp chhuahin a tih theih tawk chu hlim takin a ti asin. A vui ngai lo a, a thinrim ngai lo a, a neih phak loh chu a awt ngai hek lo. A duh ber chu a nu leh farnute tana a theih tawka țha thil tihsak a ni. Chu zawng chu a duh ber chu a ni.


Khua a thim lek lek tawh a, rilțam leh dangchar pawh pawisa loa a thawhchhuah a pawisa chu a'n chhiara cheng 80 chauh a la ni. Mahse a thil zawrhte chu hralh ngaihna a awm tawh lo. Mihring pawh an khât ta pharh mai. A nuin a ngaihtuah lutuk a hlauh avang chuan lung si lo zet chuan a thei hralhban te chu khawmin a haw ta hnâ hnâ a. A haw'n kawngah chuan naupang khalh chi(toys) dawra teddy bear lianțha ve tak var nalh zet mai chu a thlir leh vang vang tawh. He teddybear hi kar khat chhung chu tlaitin a haw pahin engemawchena rei chu a lo thlir țhin tawh a ni. A nau bazara a hruai ve țuma tihtakzeta a ngen kha a mitthlaah a la cham renga, hetianga thil a zawrh ziah nachhan pawh Christmas present atana a nau leisakna tur sum a intuak a ni. A nau tana a leisak hmaa midangin an lo lei khalh chu a hlauh ber a ni bawk.


An in kawt chul rap tawh mai a thlen chuan a tawi khawmuang dat a. Apa damlai kha chuan tiang êm hian an in pawh hi a la chul bik lo asin. Nei lua lo mahse midang an awt ngai bik lo a, hlim leh thlamuang takin chu inah chuan an khawsa ho ve țhin a. Pathian hian duhsak bik a nei ta emaw tih mai turin a țhen eiru lian tak tak ten an nawm amak a In țha tak piah lama an kal ngai zen zen lohna tur an thlâm thleng a concrete a in an sak theih laiin an ni ve zawng an innghahna ber 'an pa' ber chu laksak a ni zawk si a.


Huphurh ru zet chuan kawngkhar chu a hawng a. Vawiin chu nidang aia a inhralh chhiat bakah a hralh bangte chu hawn a ngaih tak avangin a inthlahrung ve em a ni. A nu chuan dam dapin "bawiha, i va ngui ve, thil dik lo thleng a awm em ni?" a lo ti vat a.

Chu mipa naupang chuan hnuai lam a melh ngar a, "Nu mas putar hi a awm tak tak em?" Zawi sap chuan a ti ta. A zawhna avang chuan a nu chu a hamhaih lek lek.

A pasal thihna pawh kum 3 zet a lo ni ve ta. A fanu pawh hmu hman loin thihna kut vawtin a man ta si a. Chumi hnu lawkah ani chu a hnathawhnaah inhliamin a bawksawp zui nghal deuh mai si a, a fapa la naupang tê kum 8 pawh la tling lo kutah chuan engkim a tlak a lo ngai a. Chutiang dinhmuna a fapa naupangtê chu a din a lo ngaih tâk avang chuan a rilru a nâin a mittui a tla fo țhin reng a ni.

Inchhung khur chu enkawl thei țawk țawk mahse eizawng tura chhuah em chu atan a harsa si a, an chhungkua an lo bul bawk nen khawtlangin an chawm a ni thawthâng a.

A ngaihtuahna ram ata harchhuakin a fapa pawisawi lo zet chu a en a,

"Ngati nge chu zawhna chu min zawh a?"

"Ih ka zawt mai mai che, mas putar hi awm tak tak se ka ti em a"

A nu chu a thaw hak a, a fapa chu a lainat takzet. Mahse dawtthu hrilhin 'mas putar hi a awm tak tak e' a ti ngawt thei si lo a. A farnu chuan "a u enge min lo hawn a?" A lo ti ve chhen bawk a. A iptea jelly cheng 5 man a lo ah ve țât chu a pe vat a. A nau pawh chu hlim fê chuan a khek raih raih a.

"Â u 'titibiar' kha min lo hawn lo a mi?" A u chu beisei nei tak chuan a en kar a. A u in "pawisa ka neih veleh ka lei sak ang che aw." A tih chuan chu naupang kum 3 lek harsatna engmah la hrethiam ve lo, a u leh nutea innghat em em, engkim ti thei a ringtu chu a țap nghal hlap hlap a. "Min lo hawn har emai, ka duh tawh asin" a ti zui leh a. A nu leh u te chuan an lainatin an lung ava zîng tehreng em!! Teddybear chu sawi loh naupang lawm chi hrim hrim hi an unau chuan an nei ngai meuh lo a ni. "Mami, ka la leisak ngei ngei ang che, ka tiam a che." A nau thil ngen chu a u chuan leisak theih ngei a tum ruh zual a.

A nu in "bawiha, i rilțam tawh awm sia chaw ei tawh ang aw?" A tih chuan a lu a lo bu ve nghat a.

Chaw chu a bar malh malh a, nilenga engmah a ei mumal loh avang chuan a ril pawh a țamin a chaw ei pawh a tui phian mai. Mi anga hmeh țha hmeh tur nei ni lo mahse an neih chhunah chuan a lungawi thei zel tho. Chumi avang chuan a rualawt lo tihna chu a ni hauh lo. Anu leh a nau te chuan thil engemaw țha tak an awh zawng takte chu nei se a ti ve em em a. Amaherawh chu an awh leh mamawh ang pe turin a theihna leh finnain a la pha mawlh si lo. Chu mipa naupang rilru thianghlim tak tan chuan an mamawh ang pe theitu tura a beisei neih chhun chu 'Mas putar' chauh chu a ni. Mas putar chu awm tak tak niin an tana malsawmna thlentu nise a ti ngawih ngawih a ni.

"Nu Mas putar hi a awm tak tak em?"

A vawi hnihna'n a nu chu beisei zet hian a zawt leh a.Mas putar chu a la hmu ngai hauh lo, mite'na an sawi a lo hrefuh palh ve chauh a ni. A nu chuan chiang tak hian a en a, a fapa hmela beiseina lo lang chu a hmuh hmaih hauh lo, chu chuan a thinlung chu a tina em em bawk a ni.

Anu tan chuan Christmas hi hun lungngaihthlak leh hreawm ber a ni awm e. Mi fate hlim taka an thilneih tharte nen tual an chai a, thawmhnaw thar nalh tak takte nena an inkhawm theih laiin a fate tana engmah tihsak thei loa aa awm chu hreawm a ti ngawih ngawih a, tin, a pasal fam changta chu a ngaih zual phah em em țhin bawk a ni. Tunah phei chuan a fapa chuan atana zawhna chhan harsa tak chu a zawt ta chiah reng a. Engtin nge a chhan tak ang?. Y.M.A leh tlawmngaiten an chhawmdawlna a zar liau liauah nungdamin an awm ve țawk țawk a ni a. Christmas leh kumthar vuakvetah te pawh țanpui fo mahse anmahni ang bawk a țanpui ngai an lo awm ve zel avangin chu'ng țanpuinate chuan an mamawh a phuhru zo mawlh si lo. Mas putar chu awm tak tak se a țanpui ve duh mial te a beisei a, mahse tun thlengin a hnen ațang chuan eng țanpuinamah a la hmu hauh lo thung. A nu tan chuan a fapa beiseina tihchhiatsak chu thil harsa tak a ni a, chu aia harsa lehzual chu dawt hmanga bum chu a ni. A thei lo, a thei ngang lo.


"Bawiha, mas putar hi a awm tak tak em tih hre turin ka dam chhung hian ka la hmu bik lo a ni. Mahse kan rin Isua Krista a awm a, a ni chuan min thlir renga, a hnena kan dil chu a ngaithla renga, kan tana țha tur chu min tihsak mai dawn alawm" a ti dam dap a.


A nu thusawi chu a pawm thlap a, mahse mite sawi anga 'Mas putar' hi a awm tak tak a nih chuan anni aia țanpui âwm an awm a ring chuang lo a, a beiseina pawh a la sang em em tho a ni.


Hun leh nite a in her liam zel a, mitin nghahhlelh 'Christmas' pawh chu a hnai ta hle mai. Mitin mai chu an mamawh lamkim hman loh hlauin an phe dawr dawr a, chu mipa naupang pawh chu a nu leh nau tan a intuak ngah hman lo ang tih hlau takin nitin mai chuan Bazar-ah chuan an thei neih ang angte chu a zuar ve zel a. Hlim takin in a thlen chuan a khawlbawm neih ve chhun thingbung vuak pum satliahah chuan a thawh chhuah chhun te chu a thlak ve țhin. A thinlunga beiseina nung reng avang chuan A nu leh naute tan engemaw leisak theih a in ring tlat a ni.


Christmas pawh a hnai ta takzet mai. Tlaikhat a leng haw chu hlim zet hian a nu bulah chuan "Nu, mas putar hi a awm tak tak.. Ka țhiante T.V ah ka hmu a, putar sam leh khabehmul var vô mai hi ania, kawrlum sen lianpui a ha bawk a. Ani chuan mirethei leh naupangte hnenah pawh thil tam tak a sem asin.. Ka ring dik tiraw? Mas putar hi a awm tak tak chiang alawm, keini pawh kan rethei sia min la pui ve hrim hrim!" A ti bawrh bawrh a. A hmelah chuan beiseina leh hlimna chiah a lang. A nu chuan lainat tak hian a en vang vang a, "Bawiha, Mas putar chu awm tak tak se ka va'n ti em!! Nangmah vang chauh tal pawh hian" a ti halh a, a nui lui hram hram bawk a.


Urlawk ni a lo thlen chuan chu mipa naupang pawh chuan Bazar ni hnuhnung ber a ni tawh tih hriain phur zet chian a khawlbawm chu a hawng ve ta a. A chhunga pawisa darh nuaih mai a han hmuh chuan tam a tih em avang chuan a phurin a hlim hle a. A nu chu a au nghal chul a, "Nu hei pawisa hi ka khawl hnem tiraw? Hawh i chhiar dun ang" phur sarh chuan a ti nghal var a.


Pawisa awmzat an han chhiar zawh chuan cheng za nga (500) lai a lo tlingkhawm ve a. Chutianga tam pawisa la hmu ve ngai lo chu mipa naupang chu hlim avang chuan a zuang tawr tawr a.

"Nu ava tam em!! He'ng zat pawisa hi chuan kan duh duh kan lei thei ang tiraw?" A ti siam siam a. A Nu chuan "engte nge i lei ang?" A lo ti var a.

"Ih, mami ta tur teddybear lian leh nalh deuh mai ka hual tawh a, chuan nangma ta tur kawrlum mawi deuh ka lei bawk anga, chuan a bang a la awm leh silai lem ka lei ve ang" nui sang chuan a nu chu a en a.

A nu erawh a mittui dan tumin a lo insum țang țang thung. A fapa naupangtê a rinphak baka rilru puitling a hmuh chuan a lawm em a ni. Chutih rualin amah pawh inngaihtuah hauh lo a, a chan ai a nu leh anau tana engkim a hlan mai chuan a nu rilru chu a khawih takzet a, a fapa a lainat mai piah lama, a fate tana engmah a tihsak thei lo chu na a van ti em!! A fapa sum khawlte chu an tan chuan tam tham mahse Bazar thil lei nan chuan engmah tham a ni dawn lo tih chu a hrechiang hle a, mahse tih theih a nei ngang si lo. Theih nise a fate mamawh khawp pek theih a va chak tehlul em!!

"Nu mi'n ka nau teddybear tur kha an lo lei palh ang, ka kal dawn aw" tih pah chuan phur zetin a chhuak nghal a. A nu in 'va fimkhur la, i lo haw leh vat dawn nia' a tih pawh chu a hre mumal hman tawh lo. A hlim em a ni.


Bazar a thlen meuh chuan a hah chu a thaw a hip seng lo lek lek zawk a ni. Mahse a hlimna chuan a hahna te chu a hliahkhuh hneh hle thung si.

A nau leisak atana a lo hual lawk teddybear var awmna lam chu a pan vat a, vanneihthlak takin a lo la awm hlauh. Lawm avang chuan 'yes' tih pahin a zuang zawk a, a hlimna chu tehkhin phak rual a ni lo. Dawrah chuan phur takin a lut a, a nghaktu niawm tak nu uaithla lam tawh hnenah chuan,

"ka pi helai teddybear hi engzat man nge?" Tiin phur fe chuan a zawt a. Chu pitar(pitar ti tawh mai ang a awlsam zawk nan) chuan a tarmit kar ațang chuan rin vak hmel loh hian chu naupang chu a'n en ang he haw a, "cheng 1000 man a nih kha" ti liam puat chungin dawrtu dang chu a chhawn san a.

Chu naupang hmela beseina thamral mek chu a hmu hman lo hlauh. A pawisa ken tam ve viau a a lo hriat chu a'n chhiar nawn leh a, mahse a pun belh phah chuang si lo. Teddybear chu a thlir nawn a, midang ta ni tur chuan a phal mawlh lo a ni. Chu dawrah chuan teddy bear leh toys dang tam tak a to deuh chite, a tlawm deuh chite pawh a tam nangiang mai, mahse a duh chu a nau in a a ngen leh awh em em chu teddy bear var chauh chu a ni si.


A vawi nga na'n apawisa chu a'n chhiar nawn leh a mahse a kuta pawisa chu a pun belh chuang hauh si lo. A hlim hmel chu lungngaihna in a rawn lân a, a beiseina neih ve zawng zawngte pawh vawmbo ang duak an ni ta. A tawp na'n zah pawh dawn loin dawr ngahktunu hnenah chuan "ka pi 500 chauh ka nei a, khawngaihin 500 hian min leitir thei mai em?" Aw khur dar dar chuan a ti thlawt a. Dawr nghaktu lah chuan '500 chuan kan lakna pawh a phalo' a lo tihsak hmiah mai bawk si.

A beidawng ta takzet ta. Aw a nu leh farnute chuan nghakhlel takin an lo thlir awm si a. Dawr bulah chuan a țhu hnawk a, a thawhrim ve tehreng nen a nu kawrlum leisak chu sawi loh nitina hah taka bazara thei a zawrh ziah nachhan a farnu teddybear tur takngial pawh chu a lei zo chuang si lo a, hreawm ava ti tehreng em!! Tinge sumdawng/ dawrkaite pawh hi an duham em em mai le? Tu emaw harsa tak an mamawh leh awh ngawih ngawih tan engemaw an tihsak hian an heu phah awm miah si loa, thil man phailam let letin an chhiara chuti chung chuan an uikawmin an duhâm em em tho si. Țhenkhat fel tak tak, mite tana luang chhuak nasa em em pawh awm țeuh mahse he mipa naupang rethei tak hi chuan a tawng vanduai lehzual êm a ni.



A beidawnna chuan ti kulchoin, a biangah chuan mittui a luang ngiai ngiai a, che sawn tur pawn chakna reng a nei tawh lo. A chhuah dawna a phur tehreng nen tunah chuan anu leh farnu te chu a hmachhawn ngam tawh lo. An awh ang engmah a tihsak theih loh avang chuan hrehawm ati em em a ni.



Engtianga rei nge chulai hmunah chuan a țhut pawh a hre tawh lo. A ngaihtuahna chau tak ațanga a harhchhuah meuh chuan a lo chawhnu her viau tawh mai.

Christmas inrinni anih avangin bazar chu a la tawt reng tho a. Chu mipa naupang rilruah chuan eng rau sual ber nge lo lut ni. Ngaihdan thar a nei ta tlat chu chuan a ti phur hle a ni. Chu dawrah chuan toys tam tak a awm bawk a, a awh em em pakhat chu la mahse an hriat a rin hauh loh bakah an tan a pawi tham em em a ring lo bawk a ni. A nau a tih beidawn loh nan chu teddybear chu a hawn anga, zanah mas putar a dil leh mai anga, ani'n apek hlauh chuan a tharin a rul leh mai ang. Chu a ngaihdan thar chu țha a tiin a phur em em bawk a ni.


Midangin an lo en leh en loh chu a'n thlithlai kual vel a, tuma'n an lo en lo hlauh. Dawr pawnlang lama teddybear chu a pawtthla ta zauh a. Tuman an hmuh loh vanga thaw huai chungin chak zet chuan a tlanpui nghal a.


"Rukru! Kha naupang khan kan thil a ru ania.. lo man ruuu..!!"

Chu au ri a hriat chuan a ding chat a. 'RUKRU MAW?!!' Chutiang chuan tuman an la ko ngai lo, chutianga sawi tur chuan a awm ngai hek lo. Chu țawngkam a hriat chuan a tha a khur nghal a, a teddybear ken chu a en vang vang a. Heng te hi a nau tana a tih a ni. Zanin urlawk zan hian dawhthlak atan a nau chu he teddybear hi a pek ngei a ngai a ni. Christmas tuk a hlim taka a thawh hun a a hmuh atan. Tunah chuan a kutah a awm tawh a, a dah kir leh thei tawh lo.


A kal leh tur chu tuemaw hian a rawn kuai her sawk a. A hawi let chiah chu Police a ni!! A hlauh em avang chuan a khur nghal dar dar a. A kha te chu a chihin che châng tur pawh a awm tawh lo.

"Nau chahai min va ti hah teh hrep ve"

Chu police hmel țawk leh meng tur khui mai, zahngaihna reng reng nei hmel pawh pu lo aw pawr chang fak mai chuan chu naupang chu a ti zâm a ni. A hlauh em avang chuan pen tur pawn chakna a nei tawh lo. Chu Police zu rim nam hiam mai chuan a luhlul vangah ngaiin a hnuk ta dawr dawr a. Chu mipa naupang pawh chu a hnuhkawi ang ang chuan a kal pai chan chan bawk a. Mite chuan hmuhnawm thlir taka thlirin an en țhup mai a. A va'n zak kher em!!


Dawr an thlen chuan "he pa hi a ni em?" A ti nghal tawng a. Dawr nghaktunu chuan anih zia thu sawiin a lo ang nghal tawn tawn a. Chu police chuan "naupang zakthei lo" tih pahin a beng thlu țhuai a, ani hlauhlawp leh inring hman lo chu step kotlangah chuan hmai vaw chawrhin a tlu nghal a.


An boruak rawn hre thawi hman OC chuan rang zetin a rawn pawh ve nghal vat bawk a. Thil awmzia chu a zawt nghal vat a

"He naupang hian engmaw a tihsual chiah a?" constable chu a chhanna beiseiin a en ngal a.

"Dawr ami toys cheng 1000 man a ru alawm, naupang zakthei lo tak a ni. Tun ațangin thil a ru duh ania" tih fuh intih hmel zet chuan a ti nghal var a. Naupang hnenah chuan, "nang naupang zakthei lo kha i thil ruk kha i la pe dawn nange, jail-ah kan tan tir mai tur che asin" tiin a vau nghal khur khur bawk a.


Mahse, chu officer chuan, chu naupang berh ve tak teddybear var kuah chunga țhu kawm ngal mai chu naupang sual leh pawisawi hmel puin a hre ve tlat lo. Kaihthawh tum a naupang lama a kut a phar veleh chu naupang chu hlauh vangin a tawlh hrat a.


"Ka pu khawngaihin min ngaidam ru, jail-a tan ka duh lo. Mahse he teddybear hi chu ka nauin a duh alawm. Khawngaihin min hawn tur ula, nakinah a man tur ka neih veleh ka rul leh ang che u. Hei chu ka nauin a ngenna a rei tawh lutuk asin" beidawng tak chuan a ti chuai raih a.

"Kha naupang khân a man a neih zawh loh avangin a ru anih kha, ruk a tum sa ve reng aniang chawhma lam ațang khan helai hmunah hian a awm tawh alawm, khawi ațangin nge khatiang naupang khân min rulh reng reng ang" a lo ti vin ve hlawih hlawih a.


"Ni lo, thil ruk hi ka tum miah lo, thil ka ru ngai lo.. ka ti tak tak. Hei hi chu ka nau hnenah leisak turin ka lo intiam tawh si a, a man ka nei daih si lo a, khawngaihin nakinah ka rul leh ngei ngei ang che u. Jail ka tang duh lo." Țap zawih zawih chung chuan a ngen a theih tawk chuan a ngen ve a.

Officer chuan constable hnenah chuan hrilhru zauhin Thana lama lo han hruai chho rih tur chuan a hrilh ta a. Naupang chuan Jail-ah an dah ngei dawn a a hriat avang chuan a țap nasa leh zual a, chu constable lah chuan dim baksak loin a hnuk hawn hawn bawk a.

Khua a thim țan tawh chu mipa naupang chu thutna an kawhhmuhah chuan chechang loin a țhu ngawi rân a.A mangangin a hlau lehzual a. Police lo awm ho lah chuan an en duhin a hriatthiam loh zawhna maksak tak tak chu an zawt sek bawk nen a thla a muang hlawl lo. Jail-ah tang ta se engtin nge a chhungte an lo awm tak ang? Chumi a ngaihtuah phei chuan a insut faih faih a. Ina haw vat vat theih a va châk em!

Rei fe a țhut hnu leh jail-a tang ngei tawh tura a inngaih lai chuan Police a hmaa lainat hmel deuh tu kha a lo lang hlawl mai. Tlem chuan a thlamuan phah ve deuh. Chu mipa naupang hnenah chuan dam dap hian,

"Mama tunge i hming"

"Lalrosanga"

"I nu leh i pa hming le?"

"Ih.. âpa chu a thi tawh a, Lallawmsanga ania, Ânu chu Hmangaihzuali"

"Engvanga kha teddybear kha ru nge i nih le?"

"Ka pu, ruk ka tum miah lo. Kha teddybear lei nan khan thil ka zuar țhin a, ka nau in a awt lutuk a. A dawh thlak atan ka tia leisak ka tum a, mahse a lo to lutuk a. Dawr nghaktu khân 1000 man a ti a, a man ka nei daih si lo a, chuvang chuan ka la ta mai a ni. A dang an ngah tho sia, pawi an tih ka ring lo a, ka tihpalh a ni. khawngaihin Jail-ah chuan min tan tir suh aw" ti chungin a inhnit hlap hlap a.

OC thinlungah chuan lainatna a lo lut a. An fapa kha la dam ta se he mipa naupang rual vel chiah hi a ni ngei ang. A fapa chanah a'n dah chhin a.. a mit a chhing vang vang a.

"Aw le, ka hrethiam e.. i haw dawn nia, ka naute hian an thlah haw dawn che ania."


Chu mipa naupang hmelah chuan lawmna a lo lang chhuak nghal. Engmah hrethiam lo mahse Jail-a a tân a ngaih loh vang ringawt pawh chuan a lawm a ni. Chutih rual erawh chuan a nau duh ber a hawnsak thei lo tur chu hreawm a ti em em a ni.


In a thlen chuan a lungngai hle mai a. Inthlahrung takin kawngka chu a'n hawng a, a nu chuan rang zet a rawn panin a lo kuah nghal thlawp a. Engmah an sawi thei lo. An nufa chuan an țap dun nghal zawih zawih a.

"Bawiha, i hmai hi a vung anih hi" Lalrosanga chuan a hmai chu a khawih nghal a. A hlauh em avang leh a mangan em avangin a na tawrh pawh chu a lo hrechang lo a ni.

"Nu, ih.."


"I ril a țam tawh em?, zanin chu artui ka lo chhum sak che a ei țeuh rawh aw". A lo ti nghal vat a, rosanga chuan a nu in engmah a zawt loh leh a hau miah lo chu mak a ti hle.

"Nu, ka hmai nat chhan hi min zawt dawn lo a mi?"

"Ka hre vek tawh alawm bawiha, i thiam loh engmah a awm lo, keima thiam loh zawk a ni. Tunah chuan chaw ei phawt rawh le" tih pahin a mittui a hru zauh a.


Thana-ah khân eitur chu pe mahse a hlauh em avangin engmah kha a ei țha ngam lo kha a ni a. Țawngțaina an hman zawh chuan chaw chu an ei ve ta a. Tunah chuan a beiseina te chu chhem bo ang duak an ni ta. Ngui nghiai chuan chaw chu a ei ve ta a. A nau a lo muhil tawh hlauh chu a lawm ru hle zawk. Chu zan hlimawm taka mite'n an hman lai chuan an ni chhungkua erawh chuan khawhar takin an hmang thung a ni.


"Ânuu... titibiar...sakawr lem pawh... nautelem... Ânu..."


Chu thâwm avang chuan Rosanga mu chu a tho vata hmanhmawh taka choka lama a luh chuan a ding nghal chawt.. chutiang reng reng a toys tam leh țha chu a la hmu ngai lo. An choka zimte khat tlat chuan thil lem chi hrang hrang, naute lem te, robot lemte, cycle te, chu mai bakah a mah leh a nu leh naute ta tur niawm tak kawrlum țha leh nalh zet zet te, eitur tui hmel zet zet te chu a lo awm țeuh mai a. Chu'ng zinga a mit la bertu chu a nau pawm mek teddybear var chu a ni. A mumang anih ringin a mitte chu a'n nuai a, a mumang a ni hauh lo. Chung thilte avang chuan a hamhaih chu țawng nachang pawh a hre lo, chu'ng thil zawng zawngte chu a mang ramah pawh a hmuh phak loh vekte an ni.


"Âu hei lo en teh, naute lem kan ngah tiraw? A vai hian kan ta vek tur a nu'n a ti" tih pah chuan a nau chu a tlankual chiam a. Rosanga chuan a nu chu a en vat a. A nu chuan hlim taka lo nuih pahin "Christmas Putar pek che u anih hi" a lo ti vat a.

"Mas Putar!... Mas putar a awm tak tak!!.. Nu hengte hi 'Mas Putar' min pek vek tiraw? Engtikah nge a lo kal? Ka hmu ve duh asin"

Kha OC khan Rosanga an hren chhung khân a naute chu tirin an background a lo va check tir a. A chhan chu kha mipa naupang pawisawi lo leh rinawm hmel tak kha misual anih a rin theih ngang loh vang a ni. Chuvang chiah chuan dawr neitu hnenah pawh kha teddybear man lêt kha pein atan thupha a lo chawisak anih kha. A rin ang chiahin an chhungkaw dinhmun a hriat chuan a lainat ta em em a zan rei pawh sawi loin a hmelhriat hnai dawr chu in hawn tirin tuna Lalrosanga te choka mawi mektute hi a leisak ta a. A zan a zanah Lalrosangate inah kalin a thil leisakte chu an nupa chuan an va pe ta a. Lalrosanga nu chuan lo chhâwnin an thilpekte an phawrh chuan lawm avangin a biangah chuan mittui a luang zawih zawih a. A rin phak loh malsawmna an dawn avang chuan lawmthu a sawi mawlh mawlh bawk a. Chu Police te nupa pawh chu, chu nu rethei tak hlim chen zet chuan an hlim ve bawk a. An țanpui chu an inchhir lo mai ni loin an tan chuan an fapa thih hnua Christmas hlim taka an hman hmasak berna a la ni hial awm e. Rosanga nu pawh chuan a fate chu kaihthawh châk hle maihse a zanrei tawh si a, a kaitho duh ta lo anih kha. Zing erawh a thawh hma phah viau.


"Mawh nu?" A fapain a tih ri-ah chuan a harh zawk a. Heti hian a fapa chu a chhang ta a.

"BAWIHA, MI TUPAWH AN THINLUNG TAKA ISUA KRISTA PIAN TIRA, MITE TANA LUANGCHHUAK ȚHINTE HI 'MAS PUTAR TAK TAKTE CHU AN NI" Tiin.

The end



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)