ME OR MY VIRGINITY (KEI NGE KA VIRGINITY)

Story tawi te te emaw luanliamna emaw post na
Anne gottahide
Posts: 155
Joined: September 10th, 2017, 5:46 pm

ME OR MY VIRGINITY (KEI NGE KA VIRGINITY)

Unread post by Anne gottahide » November 29th, 2017, 5:32 pm

"Ngatinge i hmelṭhat em em bik le" Jenny ka duati hmai chu ka piai zauh a, lai fahran hian a mit meng lian kelkawl chuan min rawn en chho ha a, hetia a awm hi chuan a hmui chunglam lian zawk hi a lian tih a hriat ṭhin a, a laih loh chuan heng a hmui cute tak te hi a thup bo daih zel a, chuvang chuan ka ti lai fo ṭhin a ni.

A ni anga nula fel leh thianghlim, kohhrana in hmang leh Pathian ṭih hi chu an vang ve pharh ang, a hmel chu a vantlang a mahse ka tan chuan angel ang mai a duhawm a ni. Ka suangtuah ṭhin nula a ni a, a engmah hi sawi sel tur ka hre lo, ka tan chuan a ṭha famkim a ni. Hmeichhe dang angin mipa hip tumin a in ti no in a che uchuak ve ngai lo a, heng zawng zawng te avang hian ka hmangaih hliah hliah a ni.

Hmeichhe dang angin a ka atangin mi chanchin chhia a chhuak ngai lo a, inkhawm a ṭhulh ngai lo va, a dam loh pawn khum betin a na a nih loh chuan a inkhawm hram hram zel a ni. Mahse inkhawm zawng zawng kai kim a tum erawh ka lung a awi chiah lo ṭhin chu a ni, tlangval bialnu nei ve ta chu lenna tur te pawh kan nei ve a, a ni ve chu an in a leng thei lo in min siam a, a inkhawm reng mai a, thinrim in ang dawn ila thil tih chi a ni bawk si lo, thinrim ṭeuh chung hian kan in sawh lungawi vel ta mai mai ṭhin a ni.


Chhia leh ṭha thiang ka neih ve aṭanga ka duhthusam ni ta chu nupui virgin ngei neih a ni, he ka thil tum avang hian kei pawh ka in uluk in ka in vawng ve em em, nula ka la khawih bik lo a ni. Bialnu te neiin ka ngaihzawng te ka thlak kual ve duah tawh a, mahse a tu amah in ka nupui ni turin ka lung an la dum meuh lo chu a mi, mahse Jenny zawng a dang chiang e, ka nupui, ka fate nu leh ka damchhung kawppui atan ka duh ve thung a ni.


Ka hmuh hmasak ber ni kha ka la hre reng mai, biakinah tlar hma takah a ṭhu a, a ṭhu ngil at a, khawdang hawi miah lo chuan thusawi tu pa chu a en kar a, a mit lian tha kel kawl chu tlemin a chei ve a, a hnar ngul chu a tawi ve hle a, zum pawh a zum hran lo, a hmui chu a lian pawrh tarh a, a lawmawm hle, a biang chu a tai deuh tak a, a khat tawka a thlan a rawmawla a hru tih loh chu a che eih lo emaw tih mai tur a ni. Thusawi tu pa chu a star emaw tih theih turin a awm a, ka thik lek lek ringawt nghal mai a ni.


Ka ṭhianpa ka bula muthlu lap lap, a khat tawka bu leh zauh ṭhin chu ka va nghawk zauh zauh a, a rawn harh chu, "saw nu saw tunge?" tih pah chuan Jenny lam chu ka melh zauh zauh a. Phak chel chual chuan, "I la hre ve nange? Chhingchhipa aṭanga rawn pem kha, inkhawm a taimak mak nen, thla khat vel chu hetah an awm tawh, Jenny an tiin ka hria" a ti nghal barh barh a, engtin nge maw ka lo hriat loh bik ṭhin ni, mahse a awm tho mai, ka in khawm khat em alawm.


Chuta ṭang chuan inkhawm chu ka taima ta sawt hle a, engtin tin emaw Jenny number te chu neiin ka be ta zauh zauh a.


Kei hmel pangai ve tak, MCS ni bawk, nupui nei rual ni tawh bawk chu tlangval to ve pawl chu ka ni ve mai a, nu leh pa te pawn an makpa atan min iai lo hlawm hle, hmeichhia te lah hi an han hman hlawm khawp a, an rawn leng awt awt reng mai a ni, ka duh duh thing ve thei dinhmunah chuan ka ding chu a ni mai, mahse ka lung ti awi tu tumah ka la tawng lo chu a nih hi, mahse Jenny chu dang tak a ni, ka bem ngial pawn min duh thei thlawt lo, ka zei na zawng zawng nen a ka ṭan chung pawh chuan min la 'YES' ta chuang lo, mahse min hnawl na zawng zawng te chu amah min duh zual tir tu an ni vek bawk si, mi dang aia a danglamna te chuan a ni min hip ni, mahse ka beidawng thei ngawt lo ka dictioneryah beidawnna thumal hi a awm ve lo tlat, ka duh chu ka nei ngei ngei ṭhin, thlaruk vel zen zawn chutia ngawrh tak te a ka sawm hnu chuan a tawp a tawpah chuan kan in ngaizawng ve ta a, min duh ve thu min hrilh zan phei chuan chhin khat te pawh ka chhing lo. Mak tak hi a ni, ka tleirawl ṭha leh ni ber hian ka hria.


A thawhna school aṭanga a haw tur te chu ka nghak ṭhin a, mahse a duh lo thei le, min hmu chiah hi, "tlan vat vat rawh, miin min hmu ange"a ti a min kalsan nghal nul nul zel, ka bialnu ka duh em em chu in ti thei takin ka bike khalhah ka phur ve chak tih te hi a hre lo nge ni, mahse a ni zawng midang ang hek lo. A hnungah ka bike chu nawrin ka kal zel a, a tawp a tawpah a hmai hup chawn chawnin kan in phur haw leh nge nge ṭhin, a thinrim hi an in kan thlen velah hian rang fahran hian a chhuk a, kawngkhar min kalh hnan a, nui ruh ruh in ka thlem leh hauh hauh ṭhin.


Kei Mizoah chuan a te lo pawl ka ni ve a, Ft 5'11 laia sang ka ni ve, mahse a ni zawng ka duh chuan ka zakzeh pil bo daih thei ang, hei vang pawh hi a ni mahna min bazar pui a duh ngai miah lo, mite hian a rilru ṭhatna ka hmuh fuh ang hian han hmufuh ve se zawng heti mai mai hian an en liam tawp lo ang, mahse an en liam mai mai hi ka tan chuan malsawmna a ni leh tlat, lungaihna tur a awm loh phah.


An in a ka len ve te hian sana hi a melh ang zek zek a, dar kua (9) a rik hnaih tawh hi chuan, mi hmuh loh hian min signal zauh zauh a, "i la haw dawn nange? Dar kua a rik tawh dawn hi, haw rawh" hi a ti ziah, mi dang chu nise zawng an inah ka leng leh tawh ngai lo anga, biak pawh ka be tawh kher lo ang, mahse a ni chu a mah a ni miau sia, mi ngaihdan leh a zahawmna a ngaih pawimawh zia ka hrechiang, heng zawng zawngte hian ka fa te nu atana a tlak zia a ti lang ṭhin.


Mi an awm loh ve thung erawh chuan a hawi kual zuk zuk a, ka biangah a rawn chuk zeuh a, "ka ngai tawh lutuk che a" tih pahin ka ban hi a kuah hlun anga, ka darah a lu a nghat a, min ngheng nulh nulh zel. Sawiin tilang thiam lo mahse min thlahlel hle tih ka hria a, ka lawm tawk em em a ni.


Kumkhat chuang kan in zui ve ta maw tihah chuan in neih lam ka sawi ri ve ta a, a ni pawh kum 26 a ni tawh a, kei pawh kum 31 a upa ka ni tawh bawk a, inneih lam sawi chu a hun ve tawh a ni. Mahse hetiang ka sawi apiang hian fanu neichhun a nih vang nge chu ka hre lo, a aw, e ngai miah lo a, a nui liam tawp zel a, mahse ṭumkhat ka sawi leh chu ni dang ang lo deuhin a awm ve tawh a.


Hnuailam chu a bih ngar ngar a, a kuttin chu a sik neuh neuh a, a thaw hak a, a rawn hawi chhuak a, "tunah chuan i in peih tawh in ka hria" a ti a, min bia pawh a ang chiah lo, amah leh amah a in bia a ang zawk mah.


"Min hmangaih em?" chu te chu chiang lutuk, vawi tam ka hrilh a, ka ti lang bawk, "ka hmangaih che tih i hria alawm" tih pah chuan a chal chu ka fawp zauh a, "Kei nge ka virginity i hmangaih?" eng ang zawhna nge ni ngai, tu hmeichhe virgine mahin hetiang hi an bialpa te an zawt ngai lo ang, amah hi a ni ka hmangaih, a virginity pawh a maha bet tho a nia, a nihna leh amah nih tir tu tho a ni.

"Ele! Chung te chu chhan a awmlsam emai, nangmah leh i thianghlimna zawng zawng nen" nui sang chuan ka ti a, a kut chu ka la a, ka hum vang vang a.

Min rawn nuih sen sen a, "thawnthu ka hrilh ang che aw" a ti a, a in siam rem tha a, ka lu chu ka lo bu nghauh nghauh a, hnuailam a bih leh ngar ngar a, a rawn hawi chhuak leh chu thil thui tak a ngaihtuah tih ka hre thei mai a.


"Hmeichhe pakhat kum 16 a upa hi a awm a,Pathian a ṭih em em a, Pathian duh loh zawng tih chu a hlauh ber a ni a, a nun chu a hlim em em a, engkimah a lungawi a, a puitlin huna missionary nih a tum nghe nghe. Pathian hnenah chuan thu a tiam a chu chu pasal a neih hma chu a thianghlim reng dawn tih hi a ni, theihtawpin a in vawng a, Pathian laka a thu tiam chu a dah pawimawh em em a hlen ngei pawh a tum bawk a. Mahse a hmalam hun a thil lo thleng tur chu a hre lo a, a nun dan thianghlim tak chu a duh tawk em em a ni, Pathian laka a thutiam chu a bawhchhiat a in ring lo a, bawhchhiat pawh a tum hek lo a"


A ngawi dat a, a chil chu a lem ri khawlh a, a hmui hnuailam chu a lei in a hawl zauh a, "Bialpa, a duh thusam, a thinlung zawng zawng nei tu, Pathian tih lohah a mi ngaihpawimawh ber mai chu a tawng ve ta a, a lawm em em a, a hma aiin a hlim daih zawk bawk a, thil engkim chu a hlimpui em em vek mai a, khawvel chu a mawi thar em em a atan chuan, a ṭawngṭai tam phah em em a, a pasal tur atana ruat ngei niin a hria a ni. A mipa pawh chuan a hmangaih em em, hmeichhe tan chuan ui a nei lo a, a duh in a nat a phal lo, a thil chin ṭha lo tam tak te chu a sim phah ve bawk a, an in hmangaihna chu thianghlim taka par tir an duh a" a chawl leh dat a, min rawn en a, nui lui tih hriat tak mai hian a rawn khi sak a, a mit chu a khap sak sak, a mit chu a de va a, mahse a thim ngat bawk a, sawi hreawm a ti tih a hriat mahse sawi chhunzawm lo tura ka tih pawh chuan a sawi zel tho a.


"Kumkhat aia rei an in ngaihzawn hnu chuan an in nel tawh hle a, a hmeichhe nu leh pa leh nau te an awm loh hlan te chuan khumah an muhil dun mai zel a, thil dang engmah an ti lem lo bawk a, pawiah an ngai lo a ni, mahse ṭumkhat chu a mipa chu a insum thei lo tlat mai a, hmeichhia chu a khawih chheta a, hmeichhia chu a rilru a na em em a, Pathian a hlau em em a, a keh chhe tak meuh meuh a ni, mahse mipa chuan a duh vang renga chutia ti chu a ni bik lo a, a in chhir em em a, a hmangaih rilru na a hmuh chuan hreawm a ti em em a, Pathian hnenah ṭhingṭhi in kut suihin ngaihdam an dil dun a, mahse mihring zawng mihring an ni a, vawikhat chuan vawihnih a hring a, vawihnih chuan vawithum a hring a, an duh vanga chutia awm ta chu an ni bik hauh lo, mahse a nawmna an lo tem tawh avangin hun remchang an hmuh chuan insum zo lo in chuti chuan an awm leh ta zel si a"



Hmeichhia chu a beidawng em em a, Pathian chu a au ngam lo a, a ṭawngṭai ngam bawk hek lo, mi hlim thei tak kha a nui ri hriat tur a vang ta a, a nun chu a ngui em em a, a bialpa in a hmangaih chutia awm ta mai a hmuh chuan a in chhir em em a, a bialnu kha hlim taka a awm leh theih na tur a nih phawt chuan engkim tih a huam a, a bialnu tan tiin hmun danga awm chu a ti thlu ta a. An in hmangaih loh leh an in duh loh vang leh an in thlakhleh loh vang ni lo in an tana ṭha ni a an hriat avang chuan awm hran chu an ti thlu a, in ngai tak chung si chuanin an in thlah liam a.


Chutia hmun khata an awm lo chung pawh chuan an in ngaihtuah reng a, a in bia in an in hmangaih zual deuh deuh a, ni a ral a, zan a rala, thla a liam meuh pawh chuan an in thlak hlelh tawnna chu a ral ve chuang lo a, rinawmna thu tiamin an la in nghak fan fan a, nupui pasal nei rual an nih huna in hmuh leh a inneih chu an tum bur a.


Mahse tumah hian hmalam hun kan hre lo ang bawkin an ni pawh chu an beisei angin thil a awm bik hauh lo, mipa chu a buai ta reng a, hmeichhe call pick up loh chang a ngah a, an in biak chhunah pawh a buai thu chu a hrilh ta reng a, hmeichhe rilru chu a hah thei em em a, buaina a tawk aniang a tiin zan mut chhin loh a ngah em em a, a cher in a dawldang em em a, Pathian hnenah chuanin ṭap chungin a bialpa veng turin a dil ṭhin a mahse a bialpa chuanin engmah a rawn sawiin a rawn be ta ngai lo a, a hre thiam lo in a rilru chu a kehsawm a, a na ngawih ngawih a, mahse Pathian chu a hnaih phah sauh sauh a, ti chuanin hma lam pan zai chu a rel ve ta a"


A chawl leh vang vang a, tun ṭum chu a nui hmel chu a ti lui lo, hmeichhia chu a hmelhriat a ni chiang lutuk, chu vang chu aniang rilru pe taka hetia a sawi, chu mipa chu ka haw tak zet zet, engtin nge hmeichhia a zahawmna a ti bawrhban sak a chu chutia a kal tir mai theih, mipa a ni hrep lo ang, ka rilru chu ka lo vah kual tir ve nasa mai a.


Min rawn en kar a, a mit chu tlemin beisena nei mitmeng hian a rawn de sat sat a, "Kum tam tak a ral a, hmeichhia pawhin hna a neih ve hnu chuanin mipa amah duh der ve tu chu a tawng leh a, mipa dang ang tho a nih ringin a hnawl a, mahse chu pa chu a mah rawn beisei der ve ṭhin tu te ang kha a ni ve tlat lo, a beidawng duh miah lo a, a felin a tlawmngai em em a, hmeichhia pawh chuan a duh ve ngei alawm mahse a nunhlui chu a han chhut a chupa chuan a pawm theih a rin thlawt loh avang chuan a hnawl a, a hnawl zel bawk a, mahse chu mipa luhlul tak chuan engah mah a ngai duh si lo, chunu chuan in thiam lo tak chung leh Pathian hnena ngaihdam dil mawlh mawlh chung chuan a tawp a tawpah chuan a pawm ve ta nge nge a. Mahse chu nu chu a hlauthawng ṭhin a ni, tu mihring mahin a rilru hahna te chu an hriat thiam pui ve si lo a, Pathian hnenah chuan a in nghat tawp mai a ni." Chutia thil a sawi nuah nuah lai chuan a chal chu ka va fawh sak kurh a, " kei ang em em a chupa chu a thawhrim ka ring lo e a" nui huah huah pah chuan ka va ti a, mahse a nui ve hauh lo.



"ka hmangaih zia che hi i hria em" tih pah chuan ka khuah vawng vawng a, mahse ka ngaihbel nge ni a taksa chu a vawt riauin ka hria a.


"U Maruat, chu hmeichhia chu i hria asin, tlangval luhlul tak pawh chu i hria asin" a ti a, hnuailam a bih a, a kuttin chu a khal leh niap niap a, ka kuahna ka kut chu a dawm a, a dah thla riai riai bawk a.


"A ni maw! Tu te nge an nih a? I phal chuan min lo hrilh ve" tih pah chuan a bulah chuan a mah hnaih leh zual tur chuan ka tawlh phei hrut hrut a, mahse a kut a khalh niap niapah chuan a mittui chu a rawn far fap a, amah chu ka kuai dak a, chutia a awm chu mak ka ti a ni, a ṭap lai ka hmu ngai si lo a, ka hamhaih tak zet zet a ni. A mit chu a sen hlar a, a hnar te tak te chu a sen hlar a, a ṭah chhuah palh loh nan a hmui hnuailam chu a pet fan fan a.



"Chu hmeichhia chu maw keimah, chu mipa luhlul vanduai tak chu maw nangmah hi asin" ṭap aw ṭuau chuan min ti mai, ka nuih chu a za lek lek zawk,


"i a thei emai, chutiangah fiamthu thawh loh tur" ka ti a ka kuah hle hle a, a ṭap char char a.

Mahse a ding leh thut a "thudik a ni ka sawi ni, fiamthu ka thawh lo" a ka chu a hup a, hnunglam chu a hawi nghal a.


Ka nghing lawihin ka hria, ka thin chu ana ngawt ngawt a, ka hrawk chu a eng emawni hian a hnawh a, ka mit te chu a vai ruai hian ka hria a.


"min kalsan la, kei aia ṭha leh fel leh thianghlim zawk nupuiah i nei dawn nia" a ti sap a, aw chu a ri chang chang chauh, in hnit hlap hlap riin a zui bawk a. Ka awih thei lo a ni, ka hmeichhe ngaihsan leh ka hmeichhe hmangaih em em hian mipa a lo mutpui tawh a maw? Amak ka ti a ni. Ka thin chu vih sawk sawk ang maiin a na a, ka tha te kha an bo zo ta vek emaw ni tih tur hialin ka chau a.


"U Maruat, ka nunhlui avang khan ka in chhir lo asin, Pathian laka ka thu tiam ka bawhchhiat avang leh sual ka tih avang erawh chuan kum khuaiin ka in chhir reng tawh ang, ka thil tih sual avang khan pasal fanau nei thei dawn lo pawh ni ila Pathian vang chauh lo chuan ka in chhir chuang lo ang, ka tih sual kha ka pawm thlap, i rawn lang a, i felin i zahawm em em a, ka duh em em che a mahse i tan tiin ka hnial che mahse a tawp thleng ka hnawl thei lo che a chhan chu i bula ka awm khan ka him ṭhin a ni, hlimna ka neih tawh ngai loh te kha min rawn thlen leh a mahse he ni hi a la thleng dawn tih ka hre reng ṭhin, ka hma ka sial avangin min ngaidam la, i rilru ka tihnat avangin min ngaidam la, in laichinna ka siampui che avangin min ngaidam dawn nia, mahse hei hi chu hria la ka duh Pathianin ka nihna ang ang a min hmangaih tu, ka nunhlui pawisa lo mifel min la pe dawn tih hi, ka hmangaih lutuk che, chuanin ka thianghlimna kha khapa hnena ka hlan kha ka in chhir lo bawk, a chhan chu kha tih lai khan a ni pawn ka hmangaih ang chiahin min hmangaih ve miau a, a duh vanga khatia awm kha a ni lo a, ka duh vanga hetiang thleng hi ka ni bik lo, kha kan thil tih sual avang khan pasal ka hmu ve dawn lo a nih pawn ka pawi ti chuang lo a chhan chu thil hlu tak, mi dang hriat thiamna ka neih phah si a, suma lei theih loh finna ka chhar phah a, engkim hi ka tan a ṭha tur vek zawk a lo ni, khawngaihin min kal san la, mi thar ṭha tak i tawn theih nan Pathian ka lo dil ṭhin ang" ṭap chung chuan a ti a, a khur hlak hlak a.


Kei hian enge maw ka hriat le, mipa chu ka ni ve si a maw, amah ni lo in a thianghlimna chauh a mi ka lo hmangaih. Mipa dik tak chuan a hmangaih chu eng ang din hmunah pawh a hmangaih tur a ni dawn lawm ni, engtin nge kha rilru kha ka lo put theih, amah a ni ka hmangaih ni, amah.


A rilru lo hah theih zia tur che chu ka ngaihtuah a ka in haw tak zet zet, ka duh thu sam hmasial zet avangin a mit a natna te chu ka lo hmu thei lo a.


Mipa hmeichhia a thatna hmuh kanna a chhiatna lai chiah hmuhsak tu chu mipa a ni tawp lo ang, tu pawn thil kan ti sual vek tawh mahse midang thil tih sual kan en liam sak ve thei lo anih chuan keini pawh kan thil tih sual tawhah ngaihdam kan phu bik lo ang.


Ka ṭhutna aṭang chuan ka tho a, ka lam hawi zawngin ka kuai hera, ka kuah vawng vawng a, ka awmah chuan a lu a phum a, a ṭap hawm hawm a, a hnungah chuan duat taka chulin, "Jenny ka duat, bang tawh rawh le, ka hmangaih che ka tih kha, engtin pawn lo awm la, engthil pawh ti la ka hmangaih tho tho che, nangmah alawm ka hmangaih, i thianghlimna ni lo in, nang lo chu tumah nupuiah ka nei dawn lo"ka ti sap sap a.


(ka thiannu nun tlem azawng beh chhanin thiam lo takin hei hi ka rawn ziak ve rawih a, hlawkna eng emaw ni tal in lo chhar ka beisei, ka lawm e)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)