RINPUII !! BY Toni DA Ralte Ahmangaihi

[Ngaia]

RINPUII !!





"In nu hi i then dawn lo a nih chuan min hmuh tum buai tawh suh" a ti hlak hlak a. Chu hmeichhia la naupang ve tak chu ka han nuih saih a, "Bawihi, lutuk tlat, mahse lo nghak hram hram rawh, RINPUII chu ka petchhuak dawn khawp," tiin ka inhrosa ti tih a. Zu ka in avangin ka thin lah a rim chawpchilh nghal mai bawk a, ka bialnu Sawmi chuan ner nawng pahin, “I ngam lo, i then ngam lo" a ti leh a, vin awrawl a ni."I hre mai ang, ka then ang, mipa ka nih hi, chuan zanin chu hotel-ah chuan riak leh phawt mai ang umm, ka duat," ka han ti tham kual vel a. Ani nula sihhnip ta na na na chuan a hnar phal bik lo, kan inkhalh chhuak leh ta poh a.Kum 5 chhung pasal dinhmun ka lo luah ve ta a, ka nupui nen hian kum khat zet kan inngaihzawn hnua dan khatna ngata "tiam tlat e" ti kan ni. Kan inneih tirh atanga rei fe thleng chu kan hlim dun a; ni e, ka nupui chuan ka duhthu a sam hliah hliah a ni ber e. Ka hna avangin Aizawlah kan rawn chuangchhuak a, in fal reih rawih, fel etah chuan honeymoon kan hmang nitin ta thin a. Kei aiin kum nga-in a naupang zawk a, a pangchang thiam ang bawkin min duat pawh a thiam tho. Nu te lam, ngo vir ver, sam kir lek lek, hnarngul sang vah leh invuah dik zet mai, heh sen hiam leh mitmeng nung sar reng a ni a. A thianghlim bik hian a hriat thin, englai pawha hlim hmel pu reng mai a ni a, ka hnathawk haw ka chauh deuh te hian duat taka min lo chul paha a nuih sen sen hi chuan hah ka hre tawh ngai lo.Mahse hun a liam a, nupa a insiamte beisei ber FA kan la nei thei si lo; kan inentir ve ve tawh a, dik lohna lah kan nei mang si lo, kan mangang tan ta riau a; Rinpuii pawh ngui taka fa a awh thu a sawi lai ka hmu ta zauh zauh. Amah chu a inthiam lo thin a, a dik loh leh a thiam loh angah a ngai fo thin, mahse ka hmangaih em avangin beiseina nei turin ka fuih a; a thiam loh a nih loh zia ka hrilh bawk thin. Dik tak chuan nupa reka kan in khawhar taka han awm rek rek chu hlim chang ni awm mahse fa te nena han infiam a, naupang tap ri leh nui ri hriat kan chak ve na chuan kan hlimna chu a hneh lak fo thin.Zan hnih lai ka riah bosan tawh a, ka bialnu Sawmi hi naupang te a nuthlawi a ni a, fa erawh a nei hman lo a ni awm e. A hmeltha reuh a, mi tihlawm a thiam zek bawk. Zu ka in atanga inchhar kan ni a; Doctor hnen atanga Rinpui'n fa a nei thei lo tih ka hriat ni atang khan ka rilru na beidawng chu zu hmanga in tihdam ka tum a, mahse a chhawk lem lo. A dang duh belh zelna-ah ka pakai a, nupui nei chungin tunlai pa tam tak ngawlvei "ngaihzawng neih" chu ka ching chho ve ta a ni. Rinpuii paw’n fa a nei thei lo tih a hriat chuan na a tiin Pathian pawh a dem lek lek hial a ni. A tawrhna belhchhah turin kei a pasal lah ka lo khawsa chhap nen, a hlim hmel hmuh tur a vang ta hle. Chu chuan kan nupa inkar a ti hla zual a; kan inthlakhlelhna chuan pun lam aiin kian lam a pan ta zel zawk a nih hi..Ka phone ri dut dut chu ka han en a, Rinpuii.."U pui, zanin chu lo haw tawh ta che, eitur tui deuh ka siamsak che a""Aw, mahse ka tlai ang"Kan zanriah chu ka duh zawng hlir ni mahse Sawmi hnena ka lo tiam tawh ang khan ka nupui lakah chuan thinrimna tur hlir ka zawng a, ka rilruin "ka nupui hi ka thlak dawn" ka ti sauh sauh a. Mak pawh min tiin hmangaihna nei lo ang hial pawn min ngai maithei, mahse fa awt ngawih ngawih fa nei lo kumkhua tura han inneih chu a tu ve ve tan pawh a hahdamthlak hlawl loh a ni. Kha lehchen kha duat takin ka lo enkawl ve tawh bawk alawm, ka then a nih pawn ka ngaihthah dawn tihna pawh a ni lova..ka han inthiam chawp a nih chu, rilru erawh a nuam famkim chuang hauh si lo."Enge zanin a taka hetianga i tih a?" chang angreng fa hian ka han ti a."Ihna vangin inah pawh i lo haw thei si lova, i hah dawn em a, i tan ka siam a ni" nui chungin a ti dam diai a."Rinpui, ngaihzawng ka nei tih i hria em?" ka ti ta khawl mai."Aih, ka awih lo, min phatsan hi ka ring ngai lo hrim hrim, chutiang fiamthu chu ka ngaina lo tih i hriat kha," awki zang vah hian a ti a, ka ka ho mai. Ka lo rindan chuan min hau hrep anga emaw, a tap ang a, min ankhum ang a, chu chu remchanga hmangin chhuak turin ka ti ang tiin ka lo in kau ru ve tawh a nia, mahse a ti ta si lo; sawi tur reng ka hre ta lo mai.Kan nupa khum zau takah chuan inhlat takin kan mu a, Sawmi ka ngai reuh hle mai, nizan kan chet dan hlimawm leh nuam lutuk te kha ka ngaihtuah veng veng a, mipa na na na chu thisen a lum rang leh kher mai; ka zauthau tan der ringawt, mahse ka bula mu chu ka nupui a ni si a..!!Chakna hrikthlak loh a awm hrehawm zia chu mihring tawh phawt chuan kan hre awm e. Enge mawle, chawbel bula patling riltam reng thu awm suh tiin ka nupui chu ka va ban de de a. A lo in let a, min hmachhawn zawngin, kan inmelh ta ran mai. A nulat lai pawha nungchang tha leh zawi awi tak a nih avangin khumlaizawlah hian a che zei tehchiam lo va; a hma kha chuan pawi ka ti hran lo, mahse nawhchizuar ang maia min tiphur thiam bialnu ka neih atang khan ka nupui chu ka hmu tlawin ka hmu thing ngawih ngawih ta mai a ni. Zei leh zei lo inkar a hla ve det..Mahse Rinpuii chuan min rawn fawp a; nghet zetin min kuah a, ka beng bulah a thaw lum hiam hiam a; ka sam chu a tham a, kawr ka hak loh avangin ka awm leh dar te chu a fawp kual dan dan a. Ka hamhaih nge ka mu tlawn zur ringawt. A thiam ang tawk leh a lehpek awm leh thei lo khawpa uar si hian ka nupui chuan min sawngbawl a, a kawr chu muangchangin a phelh a; a hnute bial mawi zet chuan min rawn nawk sek sek a, ka nupui a ni ta lo em ni tih mai tur hian kan khumlaizawl chu nawhchizawrhna khumah a siam a ni ringawt; a pasal ka ni miau a, tichuan kei hi mipa ka lo ni.Zingah chuan coffee nen min lo hmuak zat a; a chetdan chu mak ka ti tawlh tawlh,, a nui sang reng a, min thlahlel em em hmel a pu a, ka lungnih loh hlau niawm takin min ngaichang reng bawk; ka ngaihte pawh a ti tha lo letling zawk e. Ka nupui erawh ka la nih tir ta phawt chu a nia. Sawmi chuan min ankhum leh nasa ang chu..Zu rim nam hum humin kawngka chu ka han chhir hawng bur a, a lehkhabu chhiar lai chu dahin hlim hmel puin, "Ka lo nghak che a, tui ka lum a, inbual phawt rawh aw," a ti sar sar a. Han hauh hrepna chhan tur chu vang ve tak a ni. Bathroom-ah min kuah lut a, ka thawmhnaw a hlip, duat takin min bual ta seuh seuh a. Ka phun nuah nuah a, ka che hleithei si lo. Min hru hul leh vek a, thawmhnaw min hak tirin khumah chuan min mut that tir a. Zanlai a ka pentawng tuhal harh chu ka han tho chhuak a, ka nupui chu a lo la mu awzawng lo mai. Eheee, ngaihzawng a nei a mi le tiin rinhlelhnain ka han khat nghal a, ka rinawm bik tawp si lo."Rinpui" ka han ti a, a reh vung vung mai si. Sitting room leh choka ka en, a awm si lo, bathroom ka han hawng a, a ruak. Pawn ka chhuak turin pheikhawk ka bun lai chuan kawngka a ri rak a, ka nupui chu a lo lut ta zan zan a.“Khawiah phiangsen nge i kal a?" ka lo ti vin tuar a. Ka nupui a la nih miau avangin thik thu chu ka thup seng bik lo."Ka vak harh lawk a lawm mawle". Ka ngaihbel nge ni a tawng zawng chuan a khur tlat hian ka hria a, inthiam lo leh kimki hmel a pu deuh niin ka hre bawk."Ngaihzawng i nei tiraw? I bialpa i va hmu tiraw? a ni em? tenawmnu..," tih leh a chhipsama va tham ka rual nghal a. A ngik feih a, a ngawi ta reng a."Tawng ta che, engmah sawi tur i hre na nge?""Ngaihzawng ka nei lo, u Pui, ""A nih eng nge i tih?""ka ipik em a, pawn boruak ka va dawng harh lawk a ni""Dawt sawi suh, ka duh miah lo, chhuak la a tha ang," ka in rin hma in ka ti ta a. Chiang zet hian min rawn en a, a mitmeng hlim thei leh nung sar thinah chuan mittui a tling pam a, a khap per sak sak a. A heh a pet fan fan a, chutah,"U Pui, min hnawhbo hi duh hle mahla chhuahsan che hi ka tum lo a ni" Henu tak hi chu aw, a pumhlum hian haw thei i la ka ti,,"Fa min hrin sak thei lotu chu ka chen pui reng thei lo." Ka la ruih deuh chhu vanga sawi ka ni, nidanga kan in hauh paw’n he thu hi chu ka sawi ngai lo.A mittui chu a dangbet zo ta lo, a biangah chuan a luang ngiai ngiai a; zawitein a hnungtawlh a, ka mitah tak min en chung hian.."Pathian hmaah khan thihna chauh lo chuan min then thei lo vang tiin kan in tiam a ni lawm ni? Fa loh vangin kan in then ang, tiin ka hriat loh hlanin i lo intiam bik a ni maw, U Pui?" a ti chuai raih a, sawi tur ka hre tawh lo, ka ngawi ngal mai. Ka khawngaih ve tho, mahse ka bialnu nawrna avangte, fa ka awhna te avang chuan ka nupui mittui chuan ka thinlung a thleng phak tawh lo va, a tawngkam te chuan ka tuihalna a phuhru zo hek lo. Mahse tharum hmanga ka nawr chhuak a nih si loh chuan min chhuahsan a tum lo."Hetiang ringawt hi chuan ka peih tawh lo, min hruai haw mai rawh, chuan a chhuak em em ang," tiin Sawmi chu a ang hlawih hlawih a, ka ngam lo nasa si. Ani hi chuan fa min hrinsak ngei ka ring. Zana ka haw chu zanriah tuihnai takin min lo hmuak leh a, ka nupui chu inbualzo hlim tih hriat takin a fai sar a; ka rilru hi a phir tlat, Sawmi bula ka awmin kan nu ka theihnghilh a, kan nu bula ka awm n Sawmi ka hrechang chuang hek lo, ka va tlaktlai lo ber em! Min tihlawm tum ve ve te indona muala a lai han din chu thil nuam fahran erawh a ni lo; a tu zawkin nge ka thinlung luah thuk tih erawh ka chenpui tam zawk ka nupui chu a ni lo thei bik lovang."Rinpui, i nute i ngai em? Va zin i chak em?" ka han ti khawmawi a."Ka bula i awm chuan tumah ka ngai lo," leh tlat mai a..Zanah chuan thawm dim taka pawna a chhuak chu ka hria, a thil tihsual phawk ngei tumin ka zui ru ta ngei a. Ka man chhuak hlauh a nih chuan amah leh amah a inhnawtchhuak tihna a ni mai a, ka tan lah hmingchhiat pumpelhna a ni mai. Shawl chuan a intuam hlun a, kan in hi a fal deuh ka tih tawh kha, kan in sir dinglamah chuan thingkung pali vel a ding a, a thawvengin a hmun a zawl nuam bawk a, kan inneih tirh pawn kut insuih rialin kan leng dun thin a ni. Thing pakhat ngheng chuan a ding a, thla eng chu lungchim zetin a thlir a, a thaw hawk a, chauh hmel zet hian thing rinchhan chuan a thu hnawk a."Nu, ka van ngai tak che em! Ka awmdan hi hriain hmu la chuan min khawngaih vang chauh paw’n i bula awm tir min duh ngei awm si a. Engmah ka hrilh thei bawk si lo che u a, helaia thing dingte hi ka inhrikthlakna awmchhun an ni, an hlu a sin. Ka nun chhungril zawng zawng hi anni chuan an hria a, dawhthei takin min ngaithla thin. Nu, ka pasal chuan ka thusawi ngaithla tur paw’n hun tlem pawh min pe phal tawh lo a sin, a mak tiraw? Mihring nun hi a lo inthlak danglam thei khawp mai, mahse ka chhuahsan thei si lo, a tel lo chuan rei ka dam thei dawn si lova, ka bula a mu reng chungte hian ka ngai ngawih ngawih thin a sin" tiin a phun sep sep a, a mittui luang chu thla eng chuan a chhun tle niar niar a.Ka ke chu ka pen thei tawh lo va, ka hnungtawlh thei hek lo, ka nupui chu ka melh tlawk tlawk a; khatihlaia ka inhuatna aia nasa huatna kha a awm leh thei angem aw ka ti hial. Ka nupui, ka duat em em thin, kumtluang runlumpui atana ka thlan, ka tana nupui duhthusam ni thin, nupuiin a pasal tana a tih theih zawng zawng min tihsak thintu kha ka lo va nghaisa rei em!! Ngaihdam tlak pawh ka ni tawh dawn em ni le?Ka bula mu ka nupui chu duat taka kuah a, "Engkim a tawp tawh e, thlamuang takin ka nupui ni reng ang che aw," tih ka chak em em a, mahse ka tana vantirhkoh ni thin chu ka khawih ngam lo va, a mitah ka en ngam hek lo. Fa ka awh vang ringawtin fa min pe thei lotu ka nupui chu khawhara hnutchhiah ka lo tum a maw? Fa min hrinsak te chu a chak ve ngawih ngawih a sin, fa a nei thei dawn lo tih a hriat zan te kha ka ngaihtuah kir a,"U Pui, keichu hmangaihtlak pawh ka ni ta lo; i tan hnawksak mai ka ni, pasalte awh em em fa pawh pe thei lo nupui maw ka lo nih le? Ti nge hetiang hi ka chungah a thlen bik? Hmeichhe thenkhatin khawlai fa an pai mai mai theih laiin nupui ni chung in ka raipuar ve thei dawn ta lo a ni. U Pui, min then mai ta che? Nupui, fa tha tak tak hrin sak theitu che nei la, hlim reng rawh," tiin a inthlahrunna leh hrehawm tihna chuan inthen a rawt hial a nih kha le.Khatah khan eng nge ka sawi kha; "Duat, fa vanga innei kan ni lo, nupui dang ka duh lo, nang hi ka damchhung kawppui tur i ni, chutiang sawi tawh suh," tiin ka khawngaihna leh hmangaihna chak tak avangin ka nupui chu ka chelh a nih kha. Hun a kal a, ka zu in leh ka ngaihzawng neih te avangin ka thusawi te kha a thamral ta a ni lo’m ni? Keichu ngaihzawng leh zu leh sa nen nuam ka chen a, ani erawh chuan inah khawhar takin mahni inthiam lo chungin min lo nghak a, ka lungawi loh hlauin hlim luih a tum a, eitur hmanga min tihlawm duhtawk lo vin, nupa nunah zak em em chungin min chelh reng theihnan ka nawm nan a inhlan a, mi thianghlim kha min hmangaih vangin nawhchizuar chetin a che a, a duh ber chu kei a pasal kuta vawn reng theih nan a ni."Sawmi, ka nupui ka then dawn lo, nangnen engkim a tawp""Eng a? Bumhmangpa leh; thutiam hlen ngam lo khawpa mipa tling lo i lo nih hi""I laka ka thutiam ai chuan ka nupui laka ka thutiam kha hlenchhuah ka duh ta zawk a ni, min hrethiam ang che"Kan pu te inneih anniversary kan lawm tum chuan kan nu pawh hlim leh phur takin a kal ve a, zanriah eikham hlim chuan Sawmi leh tlangval pahnih hi an lo lang ve hlawl mai, a dik dawn hauh lo. Kan nu chu a rawn pan ta chheu chheu mai, kan nu chuan mit la lek lovin a lo en a."Nang mimawlnu hi, i pasal hi ka duh duha ka kawih her theih a nih hi aw, haha," elsen rawng kai zet hian a ti a. Thawm a reh duak, ka va zak ngawih ngawih em! Kan nu chu a kun a, muangchanga rawn dahchhuah pahin min rawn melh zawk a.."ka hre ngai lo che a, chuan ka pasal hi ka ring tawk a; i hriatsual palh hlauh a nih ka ring. Ka tan pasal tha tak leh rinawm a ni," a ti chang ta rat a. Ka phu chiang kher mai, chutiang chu ka beisei hauh lo, ka rindan chuan a an khum ve ang a, an inbakkaih hial ka ring a; mahse,..Hhmm, i lo mawl takzet a nih hi, hei vang hian a niang i pasal hian ngaihzawng a neih thin; mawl muk nu," a ti ta chiam a, hnek chawrh ka va chak tak."Ka mawl aia nasa hian ka pasal hi ka hmangaih tih i lo la hre lo a niang e. Engpawh thleng se ka hmangaihna hian a ko kir leh tho vang, a chhan chu ka pasal hi kei anga mawl a nih ve loh avangin ka hmangaihna nasat zia hi a hrethiam dawn tlat a," a ti sap a; a nui a, a nui mawi a sin. Ka chhuahpui ta nghal a, a ngawi reng a. Ka be ngam thlawt lo, ka zak em a ni, chutiang khawpa min ringtu nupui a nihna ai chuan nupui fing a nihna chuan min ti lawm veng veng mai. A fin zia chu khami hmuna mi te khan an hria ang chu. Tin, Sawmi khan ama mawng a hlim tih te nen lam an hria ang, keipawh misual simah ka sim chiang ber tih an hre bawk ang.Thla thum hnuah, kan chhungkaw member tipungtu tur naupang hmu turin kan kal ta a. Mipa naupang ngo ving veng, sam kir chiat, a phuang mai, chum buang mai chuan min hip ta ber a. Car hnungah chuan a nu ka nupui nen chuan an inchhaih nui iar iar a, zanriah tui tak kan kil ho hnuah kan fapa chu kan inkara mut tirin kan chul mu a."Bawiha hi a hming thar phuah la," tih pahin min rawn en a."Umm, tehreng, khawvela ka ngaihsan ber hming aw, RINPUIA ni rawh se" ka ti a.."I phakar, a ngai bik lo, ka ngaihsan ve tho leh ka bula cheng reng tura ka duh hming nen tal chawi ang, tihian...’RINPUIA" a ti a. Ka hmingah "Pui" a hmingah "Rin"."Ka nupui i nih avangin ka lawm e""Kei deuh"....a vanram mitmeng chuan min rawn melh sawr sawr a..