HMACHHAWN RAWH BY Toni DA Ralte Ahmangaihi

Story tawi te te emaw luanliamna emaw post na
Ngaia
Site Admin
Posts: 25813
Joined: April 30th, 2016, 4:07 pm

HMACHHAWN RAWH BY Toni DA Ralte Ahmangaihi

Unread post by Ngaia » May 31st, 2016, 4:44 pm

HMACHHAWN RAWH





"In pa hi vengthlang nuthlawi nen an inngaizawng an ti nia aw," ti-a min hrilhtu chu ka cousin a ni. Chu thu chu ka vawi khat hriatna a ni reng reng lo, mahse ka la ngawi tlat si. Zan engzat nge ka tah mutthilh tak tih pawh ka hre seng zozai ta lo. Mite chuan ka pasal leplerhna avang chuan min en bik niin ka hria a, tlawm ngawih ngawih leh phatsan ni-a ka inhriatna chuan natna bakah thinurna min pek belhchhah thin. Tih kian dan ka hre lo va, tawrh tlawk tlawk lah chu ni theiin ka hre bawk si lo.



Hnawhchhuah leh luahlan thut theih dinhmuna din chu ngaia neih a har thlawt. Kan pa lah ti tipui hleihtheih pawh a ni lo, kan awmdun chuan inhauhnan kan hmang a ni mai si. Ka fate avangin chhuahsan lah ka hreh si.. broken family atanga ka fate seilentir ai chuan tiin ka tuar ta tlawk tlawk mai a ni.



Zan khat chu kan pa chu thinrim awrawl ni lovin a ngaihzawng neih chungchang ka sawipui a, eng danga min chhang ta lo chuan, "Inenlet rawh, ninawm," a ti hluk a. Ka thiam loh anga lantir talh a tum chu na ka ti ngei mai.



MAHSE, ni khat chu ka in ngaihtuah chhuak ta thut a! Engvangin nge ka pasal, min hmangaihtu ni thin khan ngaihzawng min neihsan tiin. Keimah chu ka han inenlet ve ta a.. ka tih dik loh leh ka tlin lohna ka hmuchhuak ta hlauh mai le! Chutah mahni infuih leh insehruh chungin kan chhungkaw hremhmun chu vanrama chantir turin huaisen taka hmachhawn ka tum ta a. Zanriah kan ei lai chuan, "Zanin chu leng chhuak lo hram ta che," tiin ka ngen a, mak tih hmel deuhin, "ngati maw?" a ti hu a.



"Kan nupa inkara khi siamtha turin zanin atang hian bul tan ka duh a ni," ka ti a; ka zakin nuam ka ti bik lo, mahse ka tih a ngai si. Ka ngenna ngaipawimawh lovin a leng ta tho a, mahse ka beidawng dawn lo. A lo haw hun ka nghak a, ka inbualfai sar a, rimtui ka in hnawih a, ka hmaite chu ka chei mawlh mawlh a; ka chhungrilah chuan phurna leh zahna a insual bur bur thung. A rawn mu a, a tihdan pangngaiin a ngawi reng a, ka va kuah a, ka khur ru der der tih a hre si lo.



"Kan inngaihzawn lai kha i ngaihtuah ngai em?" ka ti sa sa a. A lo hawi a, hrilhhai hmel a pu a, a mitmeng chu zawhnain a khat bawk. In thlahrung takin ka va fawp a.. min lo chhanglet ve mai. Nawhchizuar anga ka chet a ngai tih ka hria, ka chhungkua chhanhim nana rahbi hmasa ber ni-a ka hriat leh harsa ber chu zak leh tlawm em emin ka hlenchhuak ta a.. nupa nun rei tak kan hmandun tawh loh chu chumi zan chuan bultan nan ka pasal ka hmanpui leh ta a ni.



A tuk tlaiah chuan eisiam dan lehkhabu rawn chungin ka theihtawp chhuahin rawng ka bawl a,. kan pa lo haw chu fai sar leh hlim hmel pu chunga lo chhawn ka tum a,. ka awki pawh tih zangkhai hram hram hram ka tum a. Nui chungin, "I chau em? Thingpui i duh em?" tiin kan inneih tirh laia ka tih bak rei tak ka tih tawh loh hmang chuan ka lo dawngsawng a, tha tak chuan min chhang ve mai. A inbual chhungin a thawmhnaw hak tur ka lo dah chhuah sak thlap a.. sawisel lovin a ha ve mai.



Zanriah kan ei lai chuan ka mitmei pah reng a, "Ka eitui ngei mai, tiang hian bawl ziah tawh rawh," a ti nghut a, ka nui sak. Mak tak maiin a leng chhuak lo teh mial a, TV kan endun a, kan faten lehkha an zir thung.



"Pangngai taka thil sawipui che ka duh a," ka ti a..



"Ih, ngaihzawng ineih chungchangah hian nangmah chauh dem thei che ka ni bik lo tih ka hria, tlin lohna leh that tawk lohna tam tak ka nei ve. Ka ngaihsak zo lo fo che a, sex-ah pawh ka ti lungawi zo lo fo bawk che, bakah ka ringhlel reng che a, i duhdan sawina hun pawh ka pe tam tawk lo thin che. Engkim hi siamthat ka duh a ni... chuan min pui theitu chu nang chauh i ni bawk. I fate nu hi thlak i duh ka ring bik lo, i thlak lovang tiraw?" ka ti sep sep a; ka thawl hawk mai.



A ngawih vang vang hnu chuan, "I ti tak tak em?" a ti a.. ka bu nghat a, kan thutak dun kher mai. Ka kut a rawn vuan a, ka pasal dik tak mitmeng ka hmu leh ta. A pawimawh ber ka la sawi lo; inti huaisen luiin chiang takin ka melh a...



"Pa-a, ka hmangaih che, ka hmangaih reng ang che. Chuan maw, nang pawn min hmangaih tih ka hria, i ngaihzawng hi i hmangaih miah lo bawk.. ka tiam ang che.. pasal pakhat aia tam neih ka tum reng reng lo a nia aw," ka tih lai chuan min lo nuih a..



"Keipawn then che ka duh bik lo, ka fate tan nu dang neihtir ka duh bik lo; ka hmangaih che, ka tih nat tawhna-ah che min ngaidam rawh aw," a ti a.



Kan infawp a, chutihlai chuan, "Anu leh apa an infawp a nia," ti sar sar ri kan hria a, kan fapa naupangber a ni.. Kkan harsatna leh buaina te hi pumpelh tum lova huaisen taka kan hmachhawn chuan hnehtu kan ni thin tih hi ka chah ve duh che a ni.



(He thawnthu tawi hi phuahchawp a ni, ka chanchin emaw lo ti pawl in awm loh ka beisei. Chutihrual chuan tunlaia nupa tamtak inkara buaina neite'n tlem tala hlawkna an neih theih beisei chungin chhiartu te tan he thawnthu hi ka hlan e)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)