MADIRINE KA VALENTINE

Story tawi te te emaw luanliamna emaw post na
Ngaia
Site Admin
Posts: 25813
Joined: April 30th, 2016, 4:07 pm

MADIRINE KA VALENTINE

Unread post by Ngaia » February 18th, 2018, 1:23 pm

V.day pual a tih ka duh leh deuh vang in, story pangai ang a, ka ziah sa zawng zawng ka ti bo palh a, ka ui khawp mai, hun a awm tawh lo nen ti zawng hian ka lo ti ve leh hram ni e.

MADIRINE KA VALENTINE
Keimah peki ralte

Duhtak,

Valentine's day kan lo thleng leh ta, i dam ṭha ang chu tiraw? Natna te paw'n an tlakbuak loh hram che ka beisei tlat a ni. I nitin hun hman dan te kha ala pangngai reng em le? Kei chu ala pangngai vek asin.

Kum 9 lai a lo liam leh ta, i la hria em? Ka nuna i lo luh ni kha, kha tleirawl thinlung hmangaihna awmzia hre lo kha - a vawikhat nan hmangaihna awmzia min hriattir anih kha. Khatiang khawp khan mihring nunah hian hlimna leh lawmna kha a lo piang chhuak thei ang tih ka ngaihtuah pha ngai lo.

Ka mi rin ber leh ka innghah ngamna awm chhun, keimah ai pawha ka rin zawk i lo ni ta hial a nih kha. Nu in a fa hmangaih tak leh duat taka a enkawl ang maiin kha tleirawl eng ram mah la dai ngai lo kha duat tak leh hmangaih takin i enkawl chho a nih kha tiraw? Engtin nge i lo peih zawk ṭhin le?

Kan nitin hun kha hlimna hlirin a khat a, tawn hriat sa nei a, puitling tak a inkawm ni si lo khan, uite in ball a chhawnchhaih ang mai kan nih ṭhin kha. Nangmah chauh ka en ṭhin che a, ka hnunglamah ka hmu che a, chutiang bawkin ka hmalamah ka hmu bawk che a, tichuan nangin engkimah min dawm chho zel ṭhin anih kha.

Zantin i hmel ka hmu a, phone aṭangin kan in be awl lova, mahse ka ngai zual deuh deuh ṭhin che a nih kha, he khawvelah hian kei aia hlim tur kha an awm bik chuangin ka ring lo.

Khatih hunlai khan e, chawr chhuak zo tawh lo tur khawpa natna min pek ka lo ring ngai lo asin, tun huna ka nun thlenga natna min petu i nih ka ring ngai lo. Ka thinlunga sernung awm tlat avanga ka nun hrehawm taka ka hman mek hi nang chuan i hmu ve tawh si lo.

"Morning Mate, tho tawh rawh" tih chhiar tur awm ta lo in zing ka tho a, i hun hman dan hre pha lovin chhun ni ka hmang liam ta a, "Mate, muttui aw, ka ngai che" tih chhiar tur awm tawh lovin zan mu ka tuah mai ta te hi ka va kim lo in ngaia neih a va har tak em!

Nangmah vang hian i mipatpui te ka ring thei tawh ngai lo a, nangmah vang bawk hian hmangaihna zir ṭhat leh ka ngam tawh hek lo. Nangmah vang tho hian kha hmeichhe pakhat hlim thei tak ni ṭhin kha a nun zawng zawng thlak danglam vekin, a thinlung chu huatna leh rinhlelhnain a khat tawh asin. Nangmahina thinlung keh sawm min siamsak ang tho a na tawn leh ka hlau em em a, rinngam reng nei tawh lo in, pen khat pawh ka pen chhuak ve thei ta lo a nih hi.

I kiangah chuan ka thla a muang em em ṭhin a nih kha...

A changin ka ṭap a...
A changin ka hlim a..
A changin ka na a..
Mahse nang chuan... min ning ngai hauh lo in, thu te ber aṭang a lian ber thlengin min tuipui em em ṭhin a, ka natnaah te pawh min thawi dam zel ṭhin anih kha tiraw?

Duhtak, ka khawvel mal ngawih ngawih leh hrehawm tak ka pal tlang mek hi i tel lo chuan a va harsa ṭhin tak em, ka ngai che a, ka kianga awm leh turin ka mamawh che asin.

Ka hlim niin ka ngaizual che a, ka lungngaih mangan niin i hlimthla chu ka kiangah a awm reng ṭhin, ka taksa peng khat ang mai i ni si a.

Kan thlalak dun te kha ila kawl ve em? Kei chuan zingah ka thawhpui a, zanah ka mutpui bawk a, ka hlimpui ber a la ni ṭhin a sin, chutih rualin ka natpui tam ber leh ka ṭahpui tam ber a la ni fan bawk a.

Valentine's day hi kei atan chuan nangmah min hriatchhuah tirtu leh min tina tu mai a ni a, kan nunhlui leh sulhnu te ka dawn kir vawng vawng a, ka biang a mittui tla erawh min hruk saktu nang i awm ta si lo.

In tawng leh tawh ngai lo turin, mahni khawvel hran ve veah cheng tawh mah ila he ka thinlung chhungrilah hian i awm reng ang a, i awm reng fo bawk ang. Ka nawh reh duh ber ni mahse, ka nawt reh phal ngai loh a ni tlat bawk si.

Huat che ka duh a..
Theihngilh che ka duh a..
Mahse vawitam ka hlawhchham ṭhin si.

Duhtak, hmalam pan ka tum a, nang ka thinlungah i la awm tlat avang hian alawm ka hlawhchham ṭhin ni.

A pawi ka tih ber chu maw, keimah ai pawha ka lo ring che leh tawp chin nei lo a ka lo hmangaih che kha...A vuak let hi ka la tuar reng chu a ni si a.

Hei erawh hi chu i hnenah zawt thei tawh lo che mah ila, ka hriat chak em em, chhanna ka in pek theih ngai loh a ni si...

'Ka hmangaih che, ka tina ngai lovang che, ka kalsan ngai lo ang che,' titu khan engtin nge heng thil te hi ka chungah i tih theih zawk le? Vawikhat pawh min dan i tum lo kha, i hmangaihna khan awlsam takin min kal tir thei si a maw? Chhanna ka hmuh ngai loh tur, ka in zawh nawn fo tur a ni reng dawn si a.

Nangmah ang ka la tawng ve ngai te anih chuan ka hlimna te kha ka la nei let ve mahna, awmdun ngai tawh lo tura kan lo intawng leh hlimdun ngai lo tur kha kan lo hlim ṭhin si a nih kha.

Kha thinlung nasa taka hliama awm kha kum tam a vei hnuah pawh a la dam lo chu a nih hi. Kha thinlung a nat hlau bertu chuan na thei ang berin i siam ta si a, kha thinlung nangmah ngai a, hmangaih a, thlahlel ngawih ngawihtu kha nang chuan dinhmun hrehawm berah i dah ta si.

Aw le, lo hlim zel ang che, lo na ngai hauh lo la, ka ta ni thei ngai lo tur tih hre mah ila ka thinlunga beiseina tlem te ka la neih ve hi mit lo turin ka lo chhem alh zel ang e.

He ka khawvel khawhar takah hian nang ang ka hmuh leh hma loh zawng, 'i tan chauh...' ti chung zelin - mangṭha le...

HAPPY VALENTINE'S DAY DUHTAK



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)