HMEICHHIATE HI AN***...! BY Jona Fanai Jr.

Story tawi te te emaw luanliamna emaw post na
Ngaia
Site Admin
Posts: 25813
Joined: April 30th, 2016, 4:07 pm

HMEICHHIATE HI AN***...! BY Jona Fanai Jr.

Unread post by Ngaia » June 3rd, 2016, 12:37 am

HMEICHHIATE HI AN***...!
.
(Jona Fanai Zawlbuk Tlangval)
.
Ka tawng tu huatthu suhah amah kha mi ang chiah lo hi a ni a, "Utluang, i virgin" han ti ila rang zetin, "I thawve a nih chu, ka virgin ngawt ngawt lo" a lo ti thuai a, a haw ve hle thin. Virgin lo kha thianghlimah a ngai ve tlat.
.
Hmeichhia hi chu an mak a sin, an dinhmun azirin an insiam rem thuai thiam a! Zu zuar pasala an neih leh zu zuar nupui ni awm takin an awm thiam a, officer nupui an nih pawhin a inhmeh ber an ni leh a, Pastor nupui an nihin an Pastor nupui leh hliah hliah mai a ni. An pasal te Lal fapa anga an en leh Lal fapa nupui an ni mai a, chhiahhlawh anga an en leh chhiahhlawh nupui an ni leh mai! Hmeichhe rilru sukthlek hi a lo pawimawh tak meuh meuh a ni. I awih loh chuan ka han sawi a nge aw...
.
KEKAWR ZUIH
.
Kan Urina kekawr zuih lutuk pawh a thut zawngin a khup hnuai deuh zawnah a bung hmawk mai a sin le! Tawm chho ve thei tawh hek lo.
.
Thil reng reng hian hunlai a nei a, kan thil uar hi western lam atanga kan lak a ni tlangpui bawk a. Fashion leh life style kan chin uar hunlai réng rêngah hmeichhe nalh tih leh ngaihsan zawng hi a lâr thuai thin a ni. A hunlai kha chuan lubuk, Kamis hmalam kawnga suiha kekawr zuih taka ha trat thin kha hmeichhia khan mawi an ti tlat a, khatianga inchei kha chu an luck deuh nge ni; ngaihzawng pawh an hmu thei riau va. Chuvang chuan khawpui tlangvalte chu an kekawr a zuih a, thingtlang lamin khawpui mite tihdan entawnin an uar tawh loh lamah hlih leh dawna chhungte leh thiante puih ngai khawpin an ti zuih ve leh a, mizo tlangvalte chu an kal zuih ta trawt trawt vek mai a ni. Chu chu Mizo nula tan a mawi si.
.
Mizo nulate khan khati ang fashion kha mawi ti lo tlat se emaw, khatianga inchei kha nuihzat ta se chu Mizo tlangvalte kekawr kha a zuih hauh lovang.
.
KEKAWR ARH
.
"Tin, a arh lutuka a hmalam tlangah chuan an inchhuih thlu khut khut a." Luka Bung chuti khati zatah a awm lo.
.
Hun a lo kal a, thil tih ngai ti rei peih lo, rilru ngelnghet put harsa ti, Vai khuang ben ruala su ve tluk tluk ringaw Mizo sukthlek a lo lamdang leh a, thingtlang tlangval ten hlih harsa khawpa an inthui zuih ve mek laiin khawpui lamah chuan nula lam chuan a zuih aiin a arh an duh leh tak si avangin tlangvalte chuan an kekawr tlang chu an ti arh ta hluai a, puan dang tein an zawm arh chawp a, chutianga kekawr ha arh thei ho chu an luck leh ta riauva, nula mit an la bik a, tichuan, Mizo mipate chu an kal arh leh ta hluai hluai mai a ni.
.
Thangkhat êm pawh a vei hman lo. Khawthlang lam life style, eng eng rock band emaw style an hmuh chuan kan nulate chu mawi an ti a, kekawr zuih leh arh ringawt chu mawi an ti tawh lo va, nula bém na'n a tlak leh tawh lo, a arh chu an thiat leh a. Nulain pa, mawi leh nalh an tih zawngtak angin an kekawr tha lai chu an ziat pawp/hniar a, an zai thlera an bel leh a. Nulaten mawi an tih avangin pâ ta riauah an ingai a, kekawr tha nei lo tân pawh he thil hi chu a zia ta phian mai, a uar uarah an tang.
.
Tichuan, Mizo tlangval kekawr chuan bel a kai ta suau suau mai a ni. (Sipai chu ni se an lal hlawm ngawtin ka ring a, a nei tha lo lo an lal duh hmel.) Hêng thil zawng zawng hi an duh avang leh mawi an tih avanga uar ta thut an ni bik lo va, mawi titu leh pâ titute kan Mizo nulate hmuha mawi an tum vang leh ngaihsan hlawh an duh váng a ni ber. Hmeichhiate hi in lo va pawimawh ta si em!
.
SIPAI LEH DRIVER
.
A hunlaia hmeichhe tána ngaihsanawm leh luck berte chu Sipai leh diriver te an ni. Sipai kekawrbul uk, arh hliai hluai ang te kha chu a mawi hlawl lo va, kekawrte hak loh phei chuan thut sual a awl bawk si. Mahse, an thuamhna chhuan ber a nih avangin khatiang ha thei chin kha chu nula ngaihsan an ni tlat, chuvang chuan an mawi a ni.
.
Mizo tlangval; awm âwl satliah, civil zuirui ai chuan a senchi sawh keh thei ngat kha chu luck tak an ni a, chuvang chuan mizo tlangval tam tak sipaiah an tan phah leh ta sung sung mai a ni.
.
Chutih rualin Mizo tlangval oil rim nam pha chin kha chuan nulate biak tlawn an hlawh a, nu leh pate thleng thlenga biak that an hlawh a, naupang tan hero an ni bawk si. An kal ngai lohna khuaah pawh kal se an tuitla nghâl em em a, nulaten an ngaihsan miau avangin tlangval tam tak ten chutiang mi nih ve chu an châk a, nauam dawn bik riauvin an hria a, driver an pung ta hluai a.
.
KARIZMA BIKE TE
.
Hun a lo inher a, changkanna chuan zoram khawvel a tuam hlup hlup a, thil thar a lo chhuak zut zut a, rilru sukthlek a danglam angin nula te ngaihsan zawng pawh a danglam chho va. 'Bike nei ngat lo ch' an ti deuh tlat tawh. Bike nei ngat tan chuan ngaihzawng zawn buai a ngai lo va, hmelthat teh chiam a ngai tawh hek lo. Hmeichhia te lek lek chu kawi tinah an hmu zel zul a, nula te ngaihsan leh ngaihzawn rawn an hlawh.
.
Chuth ang a lo nih leh tak si-ah chuan Mizo tlangvalten an thawh chhuah ni miah si lovin Bike neih an intihhmuh chho va, nula ngaihsan nih an chak ta zek zek a. Petrol thunna tak ngial pawh chhungte dil ngai ni siin khawlaiah chak zet zetin an lím ziai ziai a. Ngaizelah petrol thunin; Bawnkawn thleng an tlan a, an va zung a, an let leh mai a. Cht chu nula te pâ an ti a, an lo ngaisang ta em em a.
.
LUCK CHHAN
.
Tun hma, pi leh pute hunlai kha chuan nulate ngaihsan zawng chu tlangval chak leh huaisen, mi tlamngai leh mi taima an ni a, chuti ang mi nih chu tlangvalte chak leh tum ber pawh a ni. Nulate ngaihsan loh hlauvin tlangvalte chuan hna an thawk suau suau va, hrehawm tuar chungin nupui man anmahni ngatin an tuak a, awm mai mai chu zahthlakah an ngai a, an intodelh em em mai a ni.
.
Tunah chuan a dan a dang zo ta a, tlangval hnathawk chuan ngaihsan an hlawh hran tawh lo va, inhlawhfa chu chhungkaw harsa tih turah kan ngaihsak hmiah a, intodelh a; mahni mamawh thawh chhuah tum tlangval chu nulaten an hmu hniam ta tlat a, nulate hmuh hniam nih hlauh avangin tlangvalin hnathawh chu zah-ah an nei a, an rilru a piangsual zo ta a. Thawh tur hre lo leh thawk peih lovin an tei ta suau suau mai a ni.
.
Zêp thu a chêng lo, nula zawng zawng chu ka huap lo ve. Atlangpui thu-ah chuan kan Mizo hmeichhiate ngaihsan zawng leh ngaihzawn duhzawng ni ta chu nu leh pate thawh chhuaha nalh tak taka inchei a, a thra thra nei a, a tui tui ei a, a chhuak thar apiang nei thei, mahse, mahni thawh chhuah tel hauh si lote hi an nih avangin Mizo tlangvalte chuan chuti ang chu an intihhmuh lo thei lo va, mahni intodelh lai ai chuan thawk lo va nuamsa taka awm chu 'ni ve' riauvah kan inngai a, kan thatchhe zo ta a ni.
.
Chuti ang thil chuan thingtlang lam pawh a tuam zo vek a, thingtlang nula leh tlangval, khawpui lama awm sil ve deuh te chuan hnathawh an hreh a, an thiam duh ta lo va, hnathawh chu zahah an la a, nu leh pate tana chhawr ngaihna réng an awm tawh lo! Khawpui return an nih miau avangin an tih dan phung leh khawsaziate chu thingtlang mite chuan changkang ta riauvah an ngai lo thei ta lo va, an entawn lo thei lo va. Mizo nula leh tlangvalte chu kan thatchhe zo ta a, changkan intihhmuhin changkanna bul kan hlamchhiah a, thawh tur hre lovin leh thawk peih lovin kan inpel ta suau suau mai a ni.
.
A tlangpui thuin tlangval inchei changkang deuh, lem ve zeuh zeuh thei te chu Biak In lam ngaina mi ai chuan an luck zawk! Tlangval zuiin hi kan Mizo nula tam zawk hian an thinhrik lo va, an hmumawh lo va, an ngaisang ta zawk a. Chumi avang chuan Mizo tlangval ten zu chu an pawisa ta lo va, kan rui ta bùr bùr a. Kan nulate hian tlangval zuin hi hmu hniam hle se la chuan tlangval zu in mi an tlem phah hle ang. Mahse, zu in mi chu a hmu zo zo, a luck luck an nih tak si avangin tlangval rilru chu a nh lo lamah a pêng sual ta a ni.
.
BONUS
.
Intodelhna tha ber chu mamawh tih tlem tih thupui ang te hi chu tuman kan ngaihsak peih lo va, thu fahrah lutukah kan ngai hmiah mai! Intodelh tur chuan sum lak luh tam a ngai tih chu kan thupui a ni ta zawk a. Mihring khawsak a sang zel a, nu ker lahin chhungkaw hma ngaiin mite aia hnufûm bik, changkang lo bik nih an hlau va, pasalteh hlawh lah a pung nghal truk truk lem si lo va. Thil dang atanga sum hmuh a lo ngai ta a, a eiru thei chinte chuan an eiru ta hum hum a. A mawi zawnga sawiin 'BONUS' an lo ti ta a. Nu ber pawnfen a puar a, an pasalte an duat thar zual a. Eirukna tam ber pawh hi an nupuite vang an tih tlat chu!
.
NGAIHSAN TUR DIK
.
Kan sawi tak zawng zawng ang khian society siam that na'n hmehchhia hi an pawimawh. Awm ve satliah mai maia i inngaih lai khan mipate rilru i ti danglam vek thei. Khawvela miropui tak takte tlukchhiatna chu hmeichhia an ni a, mi rorum ber berte thinlung ti nemtu pawh hmeichhia tho an ni. Chuvangin Mizo hmeichhiate hian ngaihsan tur dik kan hriat a kan ngaihsan miau chuan mipate chu inngaihsan nih chakin kan insiam tha leh suau suau mai dawn a ni.
.
Hmeichhiate hi an lo va pawimawh tak em!!!
.
A chunga kan thu sawi takte khi a tha lai a awm a nih chu; a thu kan tih rik tak te ‪#‎Duhawma‬ Kawlniin malsawm rawh se. . . Amen.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)