KA THU TAWI LAWRKHAWM – 1 BY Jona Fanai Jr.

Story tawi te te emaw luanliamna emaw post na
Ngaia
Site Admin
Posts: 25813
Joined: April 30th, 2016, 4:07 pm

KA THU TAWI LAWRKHAWM – 1 BY Jona Fanai Jr.

Unread post by Ngaia » June 3rd, 2016, 12:43 am

KA THU TAWI LAWRKHAWM – 1

(a bul tan nan thawnthu pahnih chiah dah ila, chhiar tu azirin lo chhunzawm zel ka tum dawn nia)
KHAWNGE I AWM?
* * * * * * * * * * * * *

kan inneih ni kha ka hun tawn tawh zawngah chuan ka hlim ni ber a la ni. Nang ka nei tawh che a, eng dang nge ka ngaih tawh chuang ang le? Ka khawvel, ka ro hlu, ka neih hlu ber chu ka kiangah i awm tawh miau a lawm le.

Mizo nulaah chuan kan nu hi a hleitling pawl tak a ni ngei ang. A hmel that zia chu ka sawifiah kher ngai lovin a hmutu ten an hre mai, chhung kaw hung leh inenkawlna tha tak hnuai a seilian a ni bawka a rilru pawh a tluang khawp mai.

Khaw khat nula leh tlangval hmeltha leh dinhmun tha ve ve innei ta chu lawmpui tu kan ngah a, inhmeh min ti bawk a. Dik, a ni nen hì chuan kan inhmeh a sin. Min ti mawitu a ni tlat si a. Kan hlim dun zia chu thenawm rilru chhe deuhte tan chuan thik tham a tling ngei ang.

A chanchin bikah lut tawh ang aw. Kan inneih atangin Kum 3 a vei ve ta. Fapa duhawm tak mai min hrin sak ni a ka buai zia leh ka hlim si zia kha ka la hrereng mai. Mahse, matea a pian a tang a rei vak loah buaina kan nei tan ta tlat mai. Kan nu chu a chhul a chak ta lo hle a. Chhul lam natna a nei ta a. Damdawiin hrang hrangah kalpuiin a damna a nih dawn chuan engkim ka huam a ni ber e. Kan phak tawk Damdawiin hmun hrang hrang kan pan hnuin kan beidawng fai ta vek a.

A Â TAN TA:

Khawvel mawina tin rengin a thuam. Zawlaidi khim ang mai a zun pâr nei, khawvel finna ten duhsakna an burbun bik ni a mawi khawp a mi nun duhawm chu kar lovah a lo chuai ta. A va pawi tak em! A sam ngil sei tak te chu mam tak khan a khuih thin a, mahse, a ât hnu chuan a thur ta bem bum a. Ka theih ang angin ka suk sak a, ka oil a, ka khuih mam sak fo thin. Ka bual a, thuamhnaw thar nalh tak tak lei sakin ka thuam a. Ka tan chuan ka nupui a ni satliah mai lo a, ka khawvel a ni. Á mahse ka tan chuan a âtna te chuan ka hmangngaihna a ti pung zual a, min mamawh zia min hriat chhuah tir thin. A rilru a buai tan a, buai dan hrang hrangin a buai a ni ber e. A chang chuan khawlaiah a vak kual a, pathian thu te a sawi vak a, a chang leh awm ze nei lovin a rak tial riai ruai a. A chang chuan hmanrua thawhin mahni intih hlum a tum bawk a. A khawlai chhuak lam fo a ngai a, ven reng a ngai a ni ber e.

A VA PAWI TAK EM

Boihi, a va pawi tak em tì bak sawitur a vang a ni ti raw.

Vawikhat chu a buai a zual a, a bul a chemte chuan min vit ta thut mai a, ka vannei a siamin ka nak nemah a vit pial ta hlauh a, chu ta ka thisen chhuak a hmuh chuan a harh chhuak thut a ni ngei ang min kuah thlawp a, a tap ta chiam a. Zual zelin tih ang maiin kan buai a zual ta zel a. A mah enkawl chu ka hna a nih tawh ber a vangin office pawh ka kal mumal thei ta reng reng lo a. Ka kal ve tum te hian innu chumi khamiah chuan a awm a, lo hruai rawh tiin phone a lo kal fo a, hmanhmawh takin ka lam vat thin. Chutiang vang chuan office ka kal tlem a, pu te hriatthiamna pawh chuan a tlin ta lo a ni ang ka hna atang chuan suspend ka ni ta.

Mahse, ka hna chan mah ila boihi nang ka la nei che a lawm. Buaipui tura ila awm hi ka lawm a, ka hlim lutuk a sin.

PAWNGSUAL A TAWK

Ka sawi tawh angin kan nu chu duhawm leh hleitling zet mai a ni a, a hmel a tha em em bawk a. A vun a mam nalhin a vunrawng a mawi bawk a, a at hnu pawh hian a hmel thatna chu a la chuai reng reng lo a, ka tan phei chuan a mawi tulh2 a ni. Ni khat chu a leng chhuak a, khaw dai velah a teikual a, chumi ni a ka zawng hmu chu a thuamhnaw te chu a lo thler hniang a, a kareh velah te chuan thisen a lo chhuak a, ka va lainat tak em. Doctor te test result ah chuan pawngsual ngei tì anhmu a.

Boihi, ka thiamloh a ni, lo chhuah tir loh tur che a nia leh. In a awm reng i theih loh vangin ka khawngaih che a ka chhuah tir che a nia. Ka lo tisual a ni. Mahse, ka tan chuan mithianghlim, ka khawvel i la ni reng a, ka hmangaih zual sauh sauh che a sin.

LUNGPUK HRÂNG

A ãt a zual zel a, kei lah ka hnathawhna a min suspend avangin kan ei tur dap a ka inhlawh a ngai ta fo mai si a. A va buaithlak thin tak êm. A ni chu ramhnuai lam a kal bo a ching tan ta a, a hmel te pawh a tla kiam a, chaw a ei mumal thei ta hek lo. Ni 3 laite a thang bo a, khawtlangin min buaipui a kan zawng ta fo mai. A chin tak fo avangin khawtlang pun buai chu ka hreh a ram pilril tak takah chuan ka rin zawn chiam thin. Kan khaw ramah chuan tû'ma tlawh pawh ngai loh ram pilril tak, ngaw daur dup awmna ah chuan lungpuk a awm a, tahchuan thawm an hre thin a, tumahin fiah pah an fiah ngam lo a, naupang sawi thaih na'n lungpuk huai anti a, tuman an pawh ngam ngai lo. Chumi tum chuan kar 2 lai a bo tawh a. Chu puk ansawi lamah chuan ka va kal ta a.

Chu hmun ka va thlen chuan Lungpuk huai chu karei! Ka hmangaih leh ka nupui duhtak ngei chu a lo ni si. Min hre tawh miah lo chuan ka rilru natna a ti zual a, ka lainat zual a ni. A cher em em a, a bal rimchhe em em bawk a, lainat takin a puan ka ken sak chuan ka tuam a.

Ka chawfun chu ka han thet a, a ril a tam tawh ngang a ni ang a ei ta bawrh bawrh a. Lainatna leh hmangaihna nen a chevel chu ka en reng a, ka mittui chu dan rual lohin a lo dir zung zung a, a ni lah chuan engmah a hrethiam tawh si lo a, engtikah mah a hrethiam pha ve tawh dawn lo a ni.
Mahse, bawihte, lungngai suh. Naupang hlauhah leh mite mit hmuh a tihbaiawm chauh ni mahla Khawvel a ka awm ve chhung chu i tan ka awm reng dawn a ni. I ãtna ka hmuh kân a, i hmel bumro tawhtak leh i taksa cher chhe tawh tak te kha kanin tawn tan tirh a ka hmangaih a ka thlahlel ang khan tunah pawh ka la thlahlel reng a. Ka hmangaihna hi tin ther tiat pawhin a sawhsawn tir lo a sin.
Mahse maw, ka rilru tina ber tu zawk chu hei hi a ni- ka hmangaih em em che a, i tan eng tik hunah pawh ka awm a, i tan engkim ka huam a ni tih i hre ve tawhlo hian ka mittui a kai chhuak leh thin a sin. A hma te kha chu nise min duat let ve ang a, i tan thil ka tih reng reng kha i lawm thiam leh em em dawn si a.
Bawihte, a pawi a ni tiraw. . Engatinge i lo ât kher kher le? A chang chuan Pathian pawh ka dem dawn hial thin a sin. Hmangaih ten a kan hmangaihna min hriat sak duh loh a min chhan let loh chuan hrehawm kanti thin. Chu chiah chu ka dinhmun a ni.

MIDANGTE CHUAN

Midangte chuan hetiang khawp a i bawraw ta hi bawlhhlawh angmaiin tenawm leh hnawksak an ti che a. Ka tan i hlut zia an hre pha ve si lo. Tlangval hmeltha ve tak ka nih thin a vangin tunhma a min lo ngaizawng ve thin tu te khan minlo hnaih a. 'Innu hi neih tlak a awm tawh lo, a nu te hnenah dah let tawh mai rawh' tiin ka tan a thiltha ti niawm takin min veh thlem thin. Mahse, ka tan a i hlut zia anhre lova, i tan a ka hlut zia anhre hek lo. I chhungte mawlh mai hi engtinnge ka hrilh fiah ang le aw.? I â ta hi keimah ang thovin pawi anti a. Ka buaipui nasat zia che an hria a, an inthlahrung lutuk hi a buaithlak zawk a ni. 'mami hi neih tlak a ni tawh love, kan in lamah kan lo enkawl chhawk tawh ang che' an ti thin.
Mahse, an hre sual a ni. I awm ve hrim hrim pawh hian min ti hlim a, nangber enkawl tur i awm loh chuan khawhar lutuk hian ka thi thei hial ang tih hi an ngaihtuah thleng pha lo a ni. Aw. . Enkawl tur a ka bul a ila awm thei hi ka van lawm tak em.

Nakinah chuan; i thih hunah chuan i chet dan mak pui pui te, mite hriatthiam loh, mahse hmangaihtu tan a hlimawm tak si te kha ka ngaihtuah ang a. A tak ka zawng ang a, mahse, a tawpna chu bei ti dawngtu leh tahna min thlen tu mai a ni dawn si a. Awm lo ngenin ka van ruai ang a, hmuh theih loh hmuh tumin ka zawng che ang a, mahse, nangchu hmuhtur i awm tawh dawn si lo. Ka bul a pangdam a i la awm hrim hrim pawh hi ka tan rangkachak leh lunghlu ang i la ni a sin. Miten an hmu thiam si lo.

MATE TAP TAWH SUH

He thu zet hi chu sawichhuah ka van hreh tak em!

Matea pawh kum1 lai a lo ni ve ta. Nu hmangaihna dawng thei lovin, a nu meuh pawhin a fa a nitih hre thei tawh lovin matea chu a lo tlei ve telh telh a. Naupangin a nu tih a hre lo ang maiin anu lahin a fa tih reng a hre si lo. A va lungchhiat thlak thin tak em.

Khua a thim tan a, matea chuan chaw hraitu tur nu a nei lo a, zan a lo ni a, a riltram chu a tap hawm hawm a, a nu lah chuan engmah reng a hre tawh si lo. Hnute siamchawp chu ka rin tir mai a. Ti chuan ka awi mu a, a mutthilh hnuah matea nu chu ka silfai a, a mutthilh thleng ka nghak a, a mutthilh hnuah kan chhungkaw khumah chuan ka suan phei a, ka bulah ka muttir thin. Chu chu kan zantin awm dan a ni ta si a. Khawvel ì chu a lo va mak tak em!

Matea leh a nu muhil siai siai lai chu ka en dun vang vang thin a. Ka rilruah thil tamtak a lo lut zut zut a, ka van lainat dun thin tak em. Ka mittui hi ka dang thei lo fo thin.

KHAWNGE I AWM ?

Kum 3 zet liam tawh mahse ka rilruah a la thar reng mai. Nikhat chu matea nu chu a leng chhuak a. Tum dang ang lo takin chiang em emin a lo tawng chhuak a 'ka leng lawk dawn' tiin.
Chu chu kan inbiak hnuhnun ber leh ka hmuh hnuhnun ber a lo ni ta. A chhuak ta chu a rei ta em em a, ka ngaìh tha lovin matea paw pahin ka zawng kual a. Ka hmu ta mai lo chuan matea chu a pi te bulah dahin, a pu te leh thenrual thate nen kan zawng ta chiam a, mahse hmuhtur reng a awm ta si lo. Mizo dan a ni sarih kan zawn hnu paw'n hmuh tur a awm ta lo a ni.!

A va pawi tak em! Matea nu i va lenglawk rei tawh ve, kum 3 lai a liam tawh hi, lo haw tawh ta che, ka ngai lutuk che a 'khawnge i awm' tiin ka zawng thin che a sin. Matea pawh kum 4 a ni tawh a, minti hlim lutuk a sin, nakin lawkah skul te kalin a uniform tunge nawh sak ang a, nungchang mawi tunge zirtir ang? I tel lo chuan engmah ka ni dawn si lo. Nang i awmloh chuan kan lawm a kim si lo. Khawngaih takin lo kir hram rawh aw. . Boihi, khawnge i awm.? Matea nen hian kan thinlung zawng2in kan mgai che a, kan hmangaih che a sin.

* * * * * * * * * * * **

KA HMANGAIH RENG CHE

Tunah chuan ka khum riang takah ka thihna darkar ka nghak a, second tinin ka hnuk chahna turin hun a her pui zel si. Mami, he ka thu ziak i hmuh hi chuan ka dam lai i hmu tawh kher lo maithei. I hnenah ngaihdam ka dil a, dawt ka hrilh vang chein min ngaidam ang che aw. Kei chu leidaiah ka ruang zalhin a awm tep tawh a. Nakin lawkah nge, naktukah nge mual ka liam dawn ka hre lo. Mahse, ka taksa awmdan atang hian ka daih rei tawh dawn lo tih ka hria, chuvang chuan he thu hnuhnung hi itan ka ziak a ni.
Kan intawn ni kha ka la hre reng mai. Skul form hain nangmahin i kal hnak hnak a. Hmeltha ka tih em vang chein ka tlan pel mai thei lo che a. I hming ka zawt ta ngawt che a, 'enga tan' iti a, i hmeltha em a ka ti a, 'i zak lo' iti a. I hming tal chu ka ti nawn leh a, 'i zak thei lo, i lerh' iti a, i kal ta daih a. Khami ni, ka hmuh hmasak ber ni a tang che khan i hmel kha ka thinlungah a cham reng a. Tu tân mah hliah khuh theih a ni tawh ngai lovang. Ka vawi1 hmuhna atang che a ka hmangaih nghal mai che kha a mak ka ti thin.

Ka hmu tam telh telh che a, ka hmangaihna che a zual telh telh a. I û kha ka thian nu a lo ni kher bawk si a, ka hriat chian phah ta che a. A tawpah chuan i tleirawl hmangaihna tuai tir duhawm tak chu min hlan ve ta a. Khatih lai a ka hlim zia kha aw. . Hmangaihna dik leh thianghlimin kan in hmangaih a, sualna tel lovin chu hmangaihna ang chungah chuan kan tla pil dun a. Kumkhua a inthen tawh lo turin kan intiam dun a nih kha. Nang nen chuan kan inzui chawt a, kan nu leh pa te ve ve paw'n min hriat pui a, inpawh takin chaw eiah hial kan insawm thin a nih kha tiraw? Ngaihzawng vawi1 kan neihna ve ve a nih vangin kan la na dûn a, kan inhmangaihna pawh engmahin a tih chhiat kan ring pha lo.

Mahni inhriat chian nan tiin kan thian hovin thisen kan test tir a. Ruih hlo engmah ka ti ngai lo a, zuk leh hmuam ka ti hek lo. Nula mutpui chu sawiloh nang hi ka tawn hmasak ber i ni a. Ka tân chuan engmah hlauhthawn tur a awm lo. Ka thisen result ka hriat zan a ka rilru nat dan kha engtinnge ka sawi fiah ang le! Ka mumang lamah pawh kha tiang thil rapthlak kha ka la mang ngailo a sin le. Nikhua ka hriat leh hnu a ka thu dawn ka chhungte ka hrilh a an hrilh hai leh rilru na hmel kha ka theihnghilh thei tawh lovang. Ka Aids vei chhan ka pain a chhui chian chuan thla 6 kal ta a thisen min pekna ah thisen thianghlim lo ka dawn vang a lo ni a. A va rapthlak em, tih theih kan nei tawh si lo.

Ka harhfim leh hnu a ka rilru a lolang hmasa ber chu Mami nangmah i ni. I hmangaih chuan Aids a vei a sin! A va na tak em. Mami, hria la engtinnge min ngaih ang? Aids ka vei tih i hriat rual a i rilru nat dan tûr hi ka ngaihtuah ngam mawlh lo a ni. Ka bul a thil awm reng rengah chuan AIDS tih hi a inziak kulh vek maiin ka hria. Min va râp em. Khawlaiah chhuak i la mite hian Aids vei melhin min melh niin ka hria a, eng tih mah hi nuam ka ti tawh lo a, khawiah mah hlimna ka hmu tawh hek lo. Mami, dawt ka hrilh chhan che pawh kha hei vang hi a ni a sin. Aids vei ka ni tih ka hriat khan i lak a tanga inthiar fihlim ka duh a, ka chhungte paw'n min rem tih pui a ni. Mahse, kum 3 lai kan lo inzui tawh vangin a va'n harsa tak em.

Khami ni atang khan ka awmdân pawh a danglam tih i hriat kha. Ni e, ka thil tawn kha a rapthlak em a ni. Ka hmabak chu a thim a, damna dawi reng a awm tawh si lo. Chu chuan ka nun chu a ti chau a, i kiangah pawh ka hlim tak tak thei tawh lo a ni. Ka chanchin hrilh che nge tha ang hrilh loh che tih ngaihtuahin zan tam ka tlaivar a sin. A tawpah hrilh tur chein ka lo leng a, ka lo lên khat tawh vangin hlim takin min lo chhawn a, min thahlel ngawih ngawih tih i mitmeng leh che zia a tang khân ka hria a sin. Tuma dipdal lohin in inchung zawl thla eng no ruih hnuaiah ka thu dun a, kan inpawm chial a, kan hma hun turte hlim takin i sawi siam siam a, khatih lai khan ka thinlung hi a tap vawng vawng a sin.

Mami, i hlim hmel kha hmuhnawm ka ti a, ka Aids vei thu i hriat hun a i hlim hmel danglam tur zia ka ngaihtuah a, i tap hmel hmuh kha ka ngaingam mawlh lo a, ka hrilh ngam ta ngang lo che a ni. A ruk a bansan mai che ka tum avangin ka be duh lo che a, ka lo leng duh hek lo. Ka roomah chuan ka tawm chawt a, Lehkhabu te chu khawvel a ka thian neih chhun an ni ta. Tlai khat chu i lo leng a, ka hmel danglam i hmuhin ka kiangah i lo thu a. Ka biak loh che vâng a i vui thu i sawi siam siam a, i titau bâr a. Mami, thinrim si lova i titau hmel te kha ava hmuhnawm tak êm. Ka insum theilo in kuah che a fawh vawng vawng che ka tum a, mahse, ka inngaihtuah fim thut a. Nia, a theih loh, nang kuah a fawp leh tur che hian k tling tawh lo a ni. Aids vei mai ka ni tawh si. Mami, a va pawi tak em. Khami tlai khan 'ngaihzawng dang ka nei a, min kalsan rawh' ka ti che a. I rilru na lutuk chu i insum zo lova, i tap a, ka awmah min chumin "misual pa, min lo bum reng a nimaw? I nun a va rawng ve" tiin i tap hawm hram a. Lungchhe tak a tap chungin i chhuak a nih kha.

Mami, dawt ka hrilh che kha hrehawm ka ti lutuk a sin, i rilru na hmel kha hlim tak a ka thlir che i ring bik a mi? Aids ka vei vang hian ka hmangaihna hi a tlakhniam phah lo a sin. Mahse, nunrawng leh bumhmang dinhmun a ka din a ngai ta si. I chhuak tur kha ka thlir vawng vawng che a. I liam hnu khân k tap nasa lutuk a sin. Mami, ka chan hi min hriatthiam pui si lo. Rilru natak a i chhuah a tang khan keipawh ka natna chuan min hneh zual a, ka chau ngawih ngawih a, chaw ka ei thei hek lo. Tunah chuan k taksa mam nalh tak te kha a chêr kiam a, hnemtu a ngai ngawih ngawih a sin. Ka thihna mai lo chu engmah nghah ka nei tawh lo.

Aids ka vei tih hi hrilh ta che ila engtin nge min ngaih ang le? Nang chu nangmah ini miau a, khuavang lasi te ang mai a ngilnei leh hmangaihna ngah inih vangin min phatsan ka ring lo. Hei ai a nasa zawk vanduaina pawh tawk ila min phatsan lovang tih ka hria. Mahse.. Ni e, mahse tih a ngai tlat si. Nang chuan min pawmin min phatsan lo mahla ka awm ang a i awm a, ka natna ang i tawh ve hi ka phal lo a ni. Mi in hnung lam a tangin 'saw nu sawn Aids a vei' tiin ankawk che ang a, thian kawm tur tak ngial pawh i hmu lo ang. I mal ngawih ngawih ang a, mi hmusitna chuan i rilru a hliam ang a, i mittui a luang reng dawn si. Chutiang thil chu i tawrh ka phal lo a ni.

Kei chu reiloteah ka taksa hi vui liamin a awm ang a, Aids hrikte nen lam phum boin ka awm tawh ang. Chutih hunah chuan mite hmuhsit leh endawng phurin tlang rel i phur ang maw? Hnung lam a tangin an nuih ang che maw? Ni love, chutiang chu i tawn ka phal lo a, ka phal ngai lovang.

Mami, nang ngai a tah ringawt pawh hi ka tlin tawh lo a sin. Ka mittui tla ringawt te hian min ti chau ngawih ngawih si a. Mahse, Mami, ka thawk tek tek chhung chuan nang hmangaih che hi ka thlang ber fovang. Ka natna hi chu engah mah ka ngai tawh lo. Nâ ka tih zawk chu nang nen kan awm dun theilo tur hi a ni. Hetiang reng a dam ai chuan fam chan mai pawh hi a nuam tawh zawk ang. Mami, min hrethiam ang tiraw? Ka chanchin i hriat hnuah chuan min haw reng bik lo ang tiraw? Ka chan ang i chan ve a, ka tawrh ang i tawrh ve hi ka phal lo a ni. He ka natna tihbaiawm tak, ka taksa ralthuamte do tu hi keimah ngei a do hi ka tum ta zawk a ni. Chu chu nakin a i hlimna tur leh i nun khaw nawmna tur a ni dawn si. Aw. . Hmangaih ngawih ngawih kal san chu a va har tak em!

Vanduaina nunrawng, lungngaihna lung chhiat thlak, nunrawnna chimawm. . Engahnge inhmangaih takte pawt then tur a ka nunah hian ilo inlar bik kher le. Mite chuan anhmangaih luat vangin engkim huamin anbei a, an sual thin. Kei ve zawng hmangaih luat vang chein nang ka hlat che a ngai si. Mami, ka mittui hi i tan ka va seng hnem ta em! Mahse, ka hmangaih che a vang a ka taksa hi ral vek tur khawp a ka mittui hi sen ngai pawh nise pawi ka ti lo a sin. Ka thawk hi a sak a, thawk luih hram hram ka la tum a, ka awm hi a insep dawrh dawrh a. Mahse, ka hun hnuhnungah hian nang ka hmamgaihna che puang chhuak lova liam mai hi ka tum lo. Tunah chuan ka thaw a veng ta huai mai.

Mami, ka hmangaih zia che i hriat hunah chuan he khawvel hi ka lo chhuahsan tawh ngeiin ka ring. Chutih huanah chuan; thu dik i hriat hunah chuan min ngaidam thei ang tiraw? Min haw tawh lo ang tiraw? Min ngaihdam thu pawh hre hman tawh lo a ka awm tur hi na ka van ti tak em. Mami, min ngaidam thei a nih chuan ka thlan chhilh vum thur chungah chuan Rose par min lo hlan ve dawn ni aw. Mami, a hma kha chuan ka lungphu a tawp hma chuan ka hmangaih ang che ka ti tiraw. . Tunah chuan a ai a rei zawk chatuanin k hmangaih reng dawn che a sin. Chatuan ramah chuan ka aids vei te hi a kiang tawh ang a. AIDS vei awm tawh lohna hmunah chuan k lo nghak reng ang che aw.

Mami, ka thih dawn thleng pawhin ka hmangaih che a, ka hmangaih reng ang che tih hi min lo pawm sak hram ang che aw. Khawvel leh khawvel piahah pawh ka hmangaih ber i ni dawn si a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)