Ka hmachhawn tawh asin BY Signor Dexter Dimebag Zadeng

Story tawi te te emaw luanliamna emaw post na
Ngaia
Site Admin
Posts: 25813
Joined: April 30th, 2016, 4:07 pm

Ka hmachhawn tawh asin BY Signor Dexter Dimebag Zadeng

Unread post by Ngaia » June 3rd, 2016, 4:09 pm

Ka hmachhawn tawh asin !
(Dedicated to all who "wear white.")
By- signor dex
.
Nausen a hringtu a nu in a boralsan, khawsik natna in a tlakbuak, a natna te engmah la sawithiam ve silo, kan hmuh veloh a nu boralta thlarau kha a hmu ami aw tihmai tura a hma zawn boruak lo ban ngat ngat mai pindan zimte thim leh reh riai maia lo mu, chhuak fahrana tap ngak ngak, thlamuan leh duat mamawh em em mai awmna room-ah i penlutin i hmachhawn ve ngai tawh em ? Kei chuan ka hmachhawn tawh asin!
.
Emergency room ah patling natuar rum ngal ngal ri te, an fanu neihchhun boral avanga pitar leh putar lungchhe taka tap hliam hliam chunga inkuah te, dam la thlakhlelh hmel taka rawlthar oxygen mask hnuaia awm insep dawrh dawrh chunga thaw la kawk kawk mai, mahse a dam dawnlo tih i hriatsak si te.. Chutiang room-ah chuan i awmin beidawnna zanthim hnuaiah i tlaivar ve tawh ngai em ? Kei chuan chungthil chu ka hmachhawn tawh asin !
.
Mi hausa te rethei lai i hmu tawh em ? Nu hausa mahse sum leh pai ah thlamuanna hmulo i hmachhawn tawh em ? Putar pui lu a kelsam to var vo tawh, mangang leh lungngai em ema boral mek i thlir ve tawh em ? Chutiang cabin chhungah chuan nuihmel pu chunga awm a theih i ring em ? Kei chuan ka thei a, kei chuan chutiang mite chu ka hmachhawn tawh asin !
.
Chhung leh khat pawh neilo pitar riangvai tak mai chu a boral hmain a Bible chang duh ber mai chhiarsakin zan khawhar tak hnuaiah Pathian in au dun tawh ngai em ? Chutiang ang pitar chu a khualzin kawng a zawh tawp laiin a kiangah thuin i dawmhlum ve tawh em ? A tan fanu ah i tang ve tawh ngai em ? Chutiang ang dinhmunah chuan ka ding tawh a, chutiang pitar khawngaihtlak chu ka hmachhawn tawh asin !
.
Zanlaiah inzaina room vawt tak ata chhuakin corridor reh riai maia chhungkaw lo thu ngui lap mai chu va finin, an kiangah i va thu ve tawh em ? Mangang taka lo inkuah bialin an hmangaih chu a dam leh theihnana an tawngtai lai i ngaithla tawh em ? An 'amen' fel hnu lawka awka dam taka an hmangaih chu a boral tak thu hrilh hi a harsatzia i hre ve tawh em ? Kei chuan ka hria a, ka hmachhawn tawh asin !
.
Highschool hmeichhe tleirawlte mai, a bialpa fa a pai avanga rilru buai tak mai, a nu leh pate pawh hrilhngamlova rilru hah em em mai kut chu vawnsakin, he khawvelah hian nunna thar a thlen dawn nge, a hmalam hun ngaihtuahin a fa chu a titla mai dawn tih thuthlukna harsa hi i sawipui ve tawh ngai em ? Chutiang mi chu councelling i pe tawh em ? Kei chuan chung thil chu ka hmachhawn tawh asin !
.
Tlangval chaktha rual lek mai, engnge a hlauh pawh hrelova meng â ruai mai i thlamuan ve tawh em ? A ruihhlo tih thinte sim tuma hrehawm a tuarlai hmel i hmu tawh ngai em ? Thlasik khawvawh vanglaia tlangval cher leh dawldang zet mai thlantla hluama a khur zawih zawih lai i hmu tawh em ? Amah hringtu a nu leh pa te pawhin an enkawl thiamloh hi enkawlin kohhran Upa leh Pastor thuhrilin a siamthat theihloh mihring hi beiseina nen thiamlo tak chungin Pathianthu i hrilh ve tawh ngai em ? Vengkhat tlangval sual leh ngawhngawl nisi kha i tawngtai laiin lungchhe taka tapin Isua hnena a inhlan lai thawmri ngaihnawm tak chu i hre ve tawh ngai em ? Kei chuan ka ngaithla tawh a, chutiang mi khirh chu ka hmachhawn tawh asin !
.
Chapel tereuhte ah mittui nen ka tlanlut fova, a chang chuan hun rei tak ka lo enkawl tawhte an boral avangin ka biangah hian mittui a luang a, a chang chuan beiseina ka tlakchham fe tawh hnuah Pathian hnathawh mak a lo lan avangin lawmna mittui ka biangah hian a luang thin...
.
Do you know how if feels to put on a starched white uniform and go to work "just one more day"... because by doing so, you know you make a difference...
.
I do all of these things and more... for I am the NURSE behind that door.
.
Ps. Nurse zirlai zan rei taktak thlenga Sr vela ka nawipui thinte, khawvar dawn hnaiha ka thuziah rawn comment hlawl thinte. Vawiina zirchhuak tate leh la zir mekte tan ka hlan e.. Happy Nurses Week..



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)