ZORAM THEIHNGHILH TAWHLOH TUR KHA LEIMIN KHA BY K Lalrengpuii

[Ngaia]

ZORAM THEIHNGHILH TAWHLOH TUR KHA LEIMIN KHA
(Remember 11/5)
H. Lalnunmawia Leimin a boral tel ve hriatreng nan.

✍K Lalrengpuii
Arpy Khawlhring
...
May ni 10 zan, ruahsur cherh cherh reng hnuaiah chuan, mahni inlum nuam takah chuan zan dang ang bawkin kan chhungkua chuan hlim takin kan awm leh ral ral a.
Ka nawmsam loh deuh avang chuan khumah chuan keichu ka mu zal a. Ka Pasal, pawh chu chhun lamah an hna lamah an buai deuh avangin a chau deuh nge ni, ka bulah chuan a rawn mu zal ve leh ta a.
.
Nupa inngeih tak leh hlim thei tak kan ni. Chumi zan pawh chuan nuamsamlo deuh mah ila, fiamthu te thawh in khumah chuan kan nui dun bawk bawk a.
.
Zan alo rei ta deuh ta bawk a, ka pasal chuan min mutthluksan ta a. A rawn harh chang chang erawh chuan ka khawsik chu min rawn buaipui ziah a.
.
Ka damloh chu thuhran, eng emaw takin min mawlh avang khan Zing lam Dar 2:30 velah pawh khan pawnah ka la ding leh veng2 a.
Kawl lah chu a phe zuai zuai a, khawpui te lah chu a ri dur dur mai bawk si nen zan kha rei ka ti khawp mai.
.
Tichuan, mut tum chuan inchhung ah chuan ka lut ta a, muthilh ka tum a, ka sana ka en khan May ni 11,2013 zing lam dar 2:45 a ri chiah a ni.
.
Chutia ka mu chu ka muhil ve ţep tih ah a rawn ri ta tuar mai a, a ruala in 8 lai chim ta thut mai leh in dang 3 lai hnawl tel ve ţep bawk chu a thawm a ring ngei mai..!
.
Mu leh mal pawh ka nei thei ta lo nghal a, ka kawng a chin hnuailam kha thil rit tak maiin a delh a ni tih kha chu ka mumang ang mai hian ka hre thei ruai ruai thung a.
Ka vai ruai tawh lai chuan, ka piah mai ah hian ka fapa upa chu a awm a ni tih ka va hmu thei a, mahse maw.. a nu na tuar chu chhan turin a ni pawh chu a che thei der silo. Na tuar chung khan min en ţawk ţawk a, ka rilru leh ka taksa kha a van na tehreng em...!
.
Baihvai taka ka awm lai khan ka pasal kha kan bul velah a awm ve miahlo tih ka hrechhuak.. ka van mangang tak em!
A tello a ni 1 lek pawh ka awm theihloh nak alaiin ka pasal kha, kha in chim karah khan ka hmuhphak chin chin ah reng khan a awm silo.
Nilo, ka taksa leh ka thinlung a van na vawng vawng tak em..!
.
Min pui tura mipui lo kalkhawm nghah mai loh chu tihtheih ka nei ta silo, zing lam Dar 2:45 vela in chim chu dar 6 ah ka taksa chu hmuh chauh a ni.
Ka chau in, a na ka ti hle a.. ka na ber chu sawi ngaihna ka hre silo.
.
Mu leh mal pawh nei hleilo chuan ka awm a, ka harhchhuah leh meuh chuan Ka hmangaih, ka pasal kha thihna kutvawt in a man tih ka hre tawh a, Dar 11 pelh ah lakchhuah ve chauh a ni tih te pawh ka hre ve leh zel a, a van na tak em..!
Ka taksa na ai khan maw, thihna avang khan ka na takzet a ni.
.
Ka khawvel chuan min kalsan a, kei lah na tak tuarin mahni pasal ruang pawh kil theilo khan ka awm chu a ni si a.
Vawi 1 tal, vawi 1 chauh tal a hliam te kha enkawl ve ila chuan vawiin hian ka thinlung a dam deuh tur.
.
Ka hmangaih min kalsan dan kha a na ka ti em mai..!
Natna tuar ni la, ka enkawlna leh hmangaihna zawng zawng dawng la, tichuan min kalsan la ka dam deuh zawk ang.
Mahse Duhtak, thihna a zawnga miten tawng ve lo se ka duh ber mai khan engatinge kan chhungkua ah bu a khuar le?
I thihna in Zoram a dengchhuak a, i herliam ta luai luai si a maw....
.
Theih ni se chuan maw, i lei taksa ka hmuh hnuhnun ber ni leh khang midang 16 ruala i boral ni khan maw.. kuah vawng vawng che a țah kha ka chak asin.
Duhtak, i nupui hian ka khamlo takzet che asin..! I lei taksa vuiliam anih khan maw, miten min hnem ve mahse maw..
A rei poh leh nang ngaih che a zual tulh tulh zawk tih min hriatpui mawlh lo asin.
.
Theih ni se chuan maw duhtak, ni 1 lek ka bulah awm leh la,
He hringnun buaina ngaihtuah lek lo hian hlim taka awmdun leh a, hringnun hlimna zawng zawng hi kan 2 chauha pumbilh vek mai ka chak asin..! Mahse chu zawng, kan tan chuan Vana arsi lak tum ang mai a ni tawh si.
.
I awmna ah khan i hlim tiro?
Leia i natna kha a na em a, min hnuchhawn ta a ni tiro??
Vanram chu hmun hnai tak a ni a, i awmna kha a hla lo a ni tiro?
Kan la inhmu leh em em ang tih ka ring tlat a ni.
.
Duhtak i tello chuan maw, ka mangan chang te pawh hian harsa ka ti a, vawiin ni thleng pawh hian na ka la ti ngawih2 asin.

Ka tan hian khuarei a thleng ve thei lova, ka thinlung hian a hlat ve thei heklo che.

Duhtak, ka ngai che. Min lo nghak reng la, i thlan khawhar taka i hlimthla zui vawng vawng ţhin hian maw....
Ka hmangaih che..

(Based On TRUE STORY)