CHHANNA HAUTAK BY Jona Fanai Jr.

Story tawi te te emaw luanliamna emaw post na
Ngaia
Site Admin
Posts: 25813
Joined: April 30th, 2016, 4:07 pm

CHHANNA HAUTAK BY Jona Fanai Jr.

Unread post by Ngaia » June 4th, 2016, 8:54 pm

CHHANNA HAUTAK
.
By- Jona Fanai Zawlbuk Tlangval
.
THUHMA : He thu hi kum rei tak chhung chu ka lo zep ve tawh a, thian te'n an sawi chhuah chang pawh hian ka duh vak thin lo va. Nikhua te a lo rei ve ta bawk a, tuma'n min chhaih peih tawh loh bakah huat enah ka en tawh lem loh avangin a hlimawm lamah a kal ta zawk a nih hi! Kha tihlaia kan sir pawh khan tun hnua kan inhmuh leh chang hian a la sawi chhuak fo va, kan innêl phah ta viau mai. Tin, zahmawh lam ngawr ngawrah min lo ngaihsak lo hrâm ang che u. Tihpalh ve liau liau a ni e.
.
KAN ZIRTIRTU PA
.
Thingtlang naupang tih takah kan sikul luh tanna pawh sawrkar sikul pangngai kha a ni mai a, naupang bâl zual luhna ni âwma mawiin fai ni kan nei ngai lo hrim hrim a, kan zirtirtute kha an lo felin engtin nge tlin pawh an lo tlin zawk aw? tiin tun hnu hian ka ngaihtuah fo thin. Mahse, balh hi lehkha thiam lohna em em a lo ni hran lo a ni ang a ti thra pawlah chuan kan awm chho ve ta zel a.
.
Pawl 5 kan zir kum hi a ni a. Mizo subject a kan zirtirtu hi khawthlir zau leh fing fel tak, zirlai piah baka kan hriattur pawimawh min zirtir tel fotu a ni a, a hunlai kha chuan haw ru viau mah i la ka tangkai pui khawp thin mai. Amah kha hmel rorum lam, mi melh na em em a ni a, tiang; Sairil tiang hnum hlarh hi a keng a, a vuak a na thei si a kan hlau thei hle thin.
.
ZAWHNA MAKSAK
.
Second term exam a ni a, Mizo subject hi ka tet lai atanga nuam ka tih thin a ni a, tih pawh ka ti tha thei réng a. Mizo kan exam ni chuan kan zawhna lo kal chu chhan harsa hi ka ti khawp mai a. Zawhna pakhatah chuan- an opposite gender ziak rawh? Tih a ni a, sub number (c) ah chuan 'NUTA' tih a awm a. Ka ngaihtuah ngial pawhin ka hre thei ngang si lo va, atawp a chhanah ka khek ta phawt a. Zawhna dang pakhatah chuan- "Mizo pi-pute serh chi hrang hrang zinga mi pahnih ziak la, entirna pe nghal rawh" tih a ni leh a. Hei pawh hi ka thiam chuang lo va, atawpa tihah ka khek leh bawk a.
.
CHHANNA HAUTAK
.
Kan zawhna dang chu ka thiam vek a, ka chhang zo vek tawh a, atawpa chhan tura ka dah âwl chiah an awm ta. Chutih laiin ka thiante ho chhang zo chuan an chhanna an dah tran a, chu chuan mawng hawlh ang zek zekin min siam a, chhuah ve theih thuai thuai chu ka chak tawh a, mahse, ka la chhang zo tlat lo. Ka pa'n, "Exam-naah chuan chhan zawh vek tur, thiam chian loh pawh risk hrim hrim tur" min tih avangin a thu ka awih a ngai. Ka bula thute chhanna en ruk ka tum lahin kan zirtirtupa chuan min lo melh run zel mai si a, hawi chhuah ngam lah a ni si lo. Zawhna lah ka zawt chiang ngam tawh bik si lo a.
.
Atawp atawpah chuan ka risk ve ta a lawm le! Zawhna pakhat NUTA tih hi chu a harsa teh chiam lo, 'NU' opposite chu 'PA' a ni mai. Harsa lutuk lovin ka chhang mai a. A dawt leh Pipute serh chi hrang hrang pahnih tal ziaka entirna pek leh a ngai.
.
Ka inngaihtuah nasa mai a, pawl 5 zirlai lek ni mah ila mi pangngai nih chuan tu min hrilhfiah hran ngai lovin serh te chu kan hre vek. Chutih laiin keini naupangin angial angan lutuka serh hming lo ziah ve kulh te chu ka zak ngawih ngawih a, harsa pawh ka ti. Ka ziah dawn apiangin Sunde Sikula kan zirtitu ten, "Naupangin zahmawh sawi loh tur" an tih te, Sikulah ngei ngei, 'Zahmawh sawi loh tur' ti a kan sawi rual dual dual lai te chu ka mitthla te, ka bengthlaah te lo langin a thangkhawk te pawh ka hre deuhin ka hria.
.
Eng pawh chu nise chhan ngei ngei a ngai; risk tal pawn. Mahse, a ngial a ngan lutuka zahmawh sawi chu ka duh bik lo. Chuvang chuan mihring ai chuan pipute ran vulh atanga ziah a chi zawkin ka ring, ran vulhte nena inkungkaihna thuk tak an neih avangin a sual viau ka ring lo, chubakah, a zahmawh ngial ngan lo deuh zawkin ka ring bawk a. Huphurh luat avanga thlan hluam chung leh kut khur dar dar chungin ka ziak zo ta hram a, ka thawl hawk a, ka thaw huai mai. Ka chhanna pawh tha ka ti. Ka lungawi, atawp lamah ka dah ve ta a.
.
RESULT DENGKHAWNG
.
Third term-na tur sikul kan tan niin second term result an puang nghal a, result puan zawhah sikul ti faiin room pin that leh dawhkan rem felte kan tih zawhah kan bang leh ta phawt a. Exam-ah chuan pathumna ka ni a, ka lawm hle. Mizoah erawh nidang aiin ka ti chhia.
.
A tukah chuan kan zir tha pangngai a, Mizo kan hun leh ta, ka huphurh ru khawp mai. Kan sir chu a tiang hnum hlarh nen chuan a lo lut a, min melh nghal chat mai le! Ka khur der der a. Min din tir a, "LAL Jona te mai mai hi. NUTA opposite chu Laizawn tih tur; PATA a ni lo. Pipute serh lah chu- Ui chhu, Bawng zang te i ti mai mai. Mawlah hian mawl chintawk a awm. An hun serh a lawm ziah tur" min ti ta piap piap mai a. Min nuih dar dar a, khatih lai kha chuan khuk chem chema khuk ral mai kha ka duh hial a ni.
.
P.S : Kha lai hunah khan type writer hman a ni a, vnt font la awm ve hek lo, 'tri' kha 't' ang vek a ni a, hriat sual awl ve tak chu a ni. Pipute hun serh ti lo va, pipute serh tih ringawt pawh hi zawhna a siam fuh bik lo tih tun hnuah hian ka tran chhan ve ta tlat, ti sual lutukah ka inngai bik lo.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)