THLIAH LOH TLEITIRI BY Tuangpuia hilthang

Story tawi te te emaw luanliamna emaw post na
Ngaia
Site Admin
Posts: 25813
Joined: April 30th, 2016, 4:07 pm

THLIAH LOH TLEITIRI BY Tuangpuia hilthang

Unread post by Ngaia » July 7th, 2018, 7:17 pm

THLIAH LOH TLEITIRI 1
NGHILH LOH 'D'
Tuangpuia hilthang

Hmel lam in a zir miau loh chuan ngaihzawng han neih te chak ve viau mah ila, hmuh zawh loh chhuan lam ah ngaihsak lo awm tak a han awm a ngaih chang a tam khawp mai. Tleirawl ngaihzawng tak ngial pawh nei lo in kum sawmhnih ka tling chho ta der mai. Thiante ngaihzawng rimpui chu kan tih ve theih tawk leh kan thlen san ber a ni ve mai a.
Kum 2002 kum tawp ah Splendor bike dum kan nei ve tan a. Han luck phah em em lo mah ila ka bial chu ka zauh ve hrim hrim a. Sunday chawhnu Inkhawm ban tawh hi chuan kan khaw bul lawk Bilkhawthlir chu kan thleng thla leh nge nge thin. Petrol man tur cheng sawmthum kan neih kha chuan pawisa dang nei miah loh pawn thlen thlak tho kan tum thin.
Chawhnu inkhawm kal dawn vel ah kan han chhuak a. Kolasib Zaithiam leh hlaphuah thiam ni bawk John Hnamte in Silchar Road petrol pump ah min lo nghak ngei a. Kolasib Rapper Tetea Square buddy nen keini kan han in phur a. Petrol kan thun zo chiah chu amah John Hnamte hla ' A pawi lo e lungrun ka liam mai ta nge, I sang ta lua kei zawng ka phu tawh lo che. Phu tawk lengdang chhai zai ka rel mai na nge" kan tih vang pawh ni chuang lo in, Bilkhawthlir lam pan chuan kan han in um thla ta thin a.
Bilkhawthlir kan han thleng thla a, kan lenna tur lam chu hmun dang pan lo in kan han pan ding nghal a. An in kan hnaih telh telh a lut hmasa tur in kan in phut nasa tulh tulh thung a. Kan kal na a hla ve tham tawh sia lut ngam lo a haw leh ngawt chi kha ni bik hek suh. Zak ang reng tak chuan kan han lut ta rawih a. Kan lenna turte chu an unau in an lo awm a, kan kal thlawn lo tih chu a chiang ta phawt mai a.
A nau zawk chu nu lian tak vai hmel rat mai hi a ni a. A hang lutuk lo bawk a, a hunlai kha chuan khaw khat tleirawl hmeltha a sawi kha a phu hliah hliah mai a ni. A hunlai a Kolasib zaithiam leh rapper lar te nen kan ni bawk a, ka chan chuan ka rin loh avang khan an pahnih chuan ka pa pek tawp mai a. An ni pawh khan ka lo beisei ve kha chu an ring bik lo ni in ka hria.
A u tleirawl thung erawh chu a hang deuh hlek zawk a a nu te deuh zawk bawk a, ka thiante mit ah chuan a tla na vak lo ni in ka hria. A hmel erawh chu a vai hmel ve rat tho a. A nuih zawng a a ha in to thuah lo lang leh a biang sum khuar kalh erawh chu a nalh em em ringawt thung mai a. Ka thiante pahnih chuan chu chu an hmuh hmaih nge ni, a nau zawk ah chuan chungnun in chuh in thian dun an in el mek a ni si a.
Kan leng zing ve telh telh a kan in nel ve ta telh telh a. A chang chuan chawhmeh han lei a chaw han ei mai chang te pawh kan nei a. Chawlhni ni vat vat se Billkhawthlir kal leh vat vat ila tih chu kan tum leh thlakhlelh ber a ni thin.
Fur khua a lo ni a Rengte tlang hnuai kawng an min a, Kan kal lam a nuam taka a kal kha, kan haw lam hi chuan chirh diak kar ah bike han nawr chang lah kan ngah. A chang chuan kan berh hlau hi kan kawr te kan phelh a. Chuti chung chuan kal lam a nula rim tur a nalh tak a kal chirhdiak kai liai luai a haw chang a tam khawp mai. A chang chuan bike han chhiat chang te a lo awm a, chhungten Bilkhawthlir ah kan leng tih an hria ang tih kan hlau si. Kan mangan theih thin zia kha aw.
Mahse chung zawng zawng pawh pawisak lo chhan kan nei a. Chung harsatna te pawh nuam ti tak a min paltlang tir thei tu chu Bilkhaw tleitir dawntawi D hlui unau pahnih te chu an ni tlat si. Khiangawi in mual liam dun tawh mahse keini thian thum tan chuan nghilh an har dawn a lo ni. Tetea Square buddy hriat loh hian Maengi feat Square buddy hla ngei mai hian kan thlah nang che u.

Di hlui then tawh hnu chang tawh mah la
Lairil an maw a cham reng thin i zunzam
I par rimtui leng vel reng hi a cham reng si
Thamral lo i zun ka phur reng si
Nghilh loh D



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 7th, 2018, 7:19 pm

THLIAH LOH TLEITIRI 2
ANGELA
Tluangpuia hilthang

Sap hming neih tul ti lo in rak rak thin mah ila, Angela tih hming hi nalh ka ti riau mai a. A chhan chu a hming putu te hi an hmeltha thei riau a ka hriat vang a ni. Angela tih hmingpu thian erawh ka nei leh ang lawi lo a.
Facebook kal tlang in ka wall ah leh Group thenkhat ah thu fahrah tete kan ziak ve thin a. Thu thiam ka ni hran lo nen comment saktu pawh ka nei mang thin lo a, mahni tui tui a tui chho in ka ziak chho ve zel tho a.
Zankhat chu a pangai te bawk in ka thuziah pakhat chu ka wall ah kan pho chhuak ve leh a. Min Like sak tu tlem chu ka nei ve a, darkar khat hnu vel chuan ka notification lam ah comment awm thu kan hmu a. Sap hming mawi ka tih em em mai Angela tih hmingpu a lo ni a, lawmna a thuah hnih ngei mai.
Hre chiang chak tak chuan a profile chu kan check a, thlalak panga vel chauh hi a lo dah a. Han hmeltha lutuk a ni lo a, hmelchhia a han sawi tur a ni hran lo bawk. Kan khua Kolasib tih loh a ka khaw ngainat ber Shillong khawpui a College a zir tawh a nih thu te ka zuk hmu leh zel a, ka lung a ti leng nghal ngei mai. Reality Show a judge ni ta ila, ka mi zawn i ni e ka ti ngei ang.
Nula dang min hre ngai miah lo pawh inbox hmasa thin kha, a hma ah chuan dawl zawr in ka zawr hi a ni ringawt a. A online hmu kur mah ila ka be ngam lo hrim hrim a. A online chhung zawng meng ve in, a hrin tawh loh hnu ah ngaih tha tak in kan mu ve chauh thin.
Pathianni Sunday School bang Fb kan lut chu inbox pakhat hi a lo awm reng mai a. Kan en chu ka biak chak em em Angela ngei mai chu a lo ni a. I inkhawm bik na nge hi a lo ti a, Phur em em chuan kan reply nghal a. Inkhawm ve hram e ka lo logout theihnghilh a nih hi kan ti a. Chuchu kan in biak chhoh tan dan a ni.
Thawhlehni zan a ni a YMA branch Committee kan nei a. Branch in kaihhruaina kan ennawn avangin zan dar hnih pelh hret ah kan bang chauh a. Ka mut pah a Fb kan lut zuai chu Angela chu a lo la hring tlat mai a. I va mengrei ve tih hi kan va thawn hram a, ka zun chhuak a ka zung a kan lut leh zuai a nih hi a ti a. Kan inbe chho ta char char mai a, zan a lo rei tawh bawk a kan in be romantic chho ta viau mai a. Nuthlawi a nih thu te min hrilh chho a, a pasal in ngaihzawng dang a neih avanga an in then thu te, mipa a rin loh zia te zawng zawng min hrilh chho ta mai a. Mipa pakhat rinawm lo i tawn avang in, mipa zawng zawng hi kan rinawm lo tihna a ni lo a sin ka ti a.
Mipa hi chu ka hre chiang ve lutuk, kumin January thla khan thil pawimawh tiin kapa thianpa kum 50 vel nen hian Guwahati ah kan kal dun a. A mah chu kohhran ah pawh mi in hmang tak, nupui fanau nei a ni a. Kapa thianpa a nih chu thuhran chutiang lai a nih avang chuan ka ring em em a. Thlen man a to nen room khat ah pafa ang in kan thleng dun a. Engmah buaina leh harsatna pawh nei lo in kan awm dun a. Kan haw hma zan chuan zu hi a rawn phawrh ta mai a. Kan hah bawk a tlem in ang zan in chu a ti ta a. Kohhran hruaitu ni si amak ka ti lutuk a, ka duh lo kei chu ka ti a. A ruih tak tak theih loh a tih avang leh min tur lui tlat avang chuan ka in ve ta a. Darkar khat hnu vel chuan ka rui lutuk chu ka mu tawp a. Chu chu min sual a, ka hneh si lo a kan chesual ta a. Mizoram kan haw hnu pawn min rawn beisei fo a, hun remchang ka siam sak duh ta miah lo a a ti a.
Thla ruk kal ta mai atang khan kan Kohhran thalai hruaitu pakhat hian min duhthu min hrilh a. Nuthlawi fa nei hman lo a kir leh ka nih pawh a hre vek a. A pawi lo hun kal tawh zawng zawng theihnghilh in nun bul kan tan dawn nia a ti a. College a thawk mi puitling tak a ni bawk a, amah chu ring in kan in ngaizawng chho ta a. Kan in ngaihzawn atang a rei vak lo ah sex hman dun a chak thu min hrilh ta reng mai a. Thalai hruaitu i nih hi kan tih pawn, kan innei nghal mai dawn a lawm a ti zel a. Chung vang leh min tur reng avang chuan kan chesual ta a. Chuta tang chuan min nei duh si lo in min chetsual pui reng mai a. Kan inneih hma chu sex hman ka duh tawh loh thu kan hrilh chu a thinrim lutuk a min then ta a. Ka rilru hi a na lutuk a mipa zawng zawng chu an lo in ang vek a nih hi ka ti a.
Mipa huatna hi ka nei nasa em em a, patling leh tlangval hur tak tak an serh thlalak min lo thawn te hi ka reply zat zat a. Mi panga vel ngawt sex chat ka hmanpui tawh a ka phone number erawh ka hrilh duh ngai lo a. A chhan chu a tak ah min beisei ang tih ka hlau a. An zing ah chuan nupui nei lai leh kohhran a in hmang tak tak pawh an awm a. Vawi thum vawi li vel ka hmanpui hnu, keimah min ngaih viau hnu ah ka account ka ti thi thin a. Chutiang chuan mipa sex chak a tuihal ho lak ah phuba ka la ta thin a ni a ti a.
I thu ziah hi ka lo chhiar ve thin a, ngaihnawm ka ti thei lutuk a. Inbox a rawn hrilh che ka tum thin a ka ngam chiah thin lo a, Like leh comment chu ka lo pe ngam hram thin a ti a. Sunday khan i inkhawm lo a nih ring in ka rawn be ve ta tawp che a nih kha, kei chu misual biak tlak loh ka ni a ti a. Angela kei pawh misual tho a lawm ka nih, kan sualte kan sim phawt chuan misualte thian hian kan hmangaih ai a nasa in min hmangaih a sin. Mipa hmangaihtu la tawng lo mah la, lei leh van lalber hian a hmangaih che a, I tan ran thleng leh Kross a rawn thlang a sin. I thil chin thin hi sim tawh la, nangmah hmangaihtu dik hnen ah kir leh rawh ka ti a.
A ni chuan ka tum thin a lawm, mipa hur tak tak in min rawn biak hi chuan ka thinrim hi a lo chhuak leh thin a. A duh dan ngei a han biak a, a ngawl an vei hnu a tawpsan hi a nuam ka ti riau tawh a. Chhun lam ah hi chuan zan in chu ka be tawh miah lo ang tiin rilru ka siam fo thin a ti a. Reply lo la i be lo a ni mai a lawm kan ti leh a. Hei khua a var tawh mut ka duh ka chanchin ka hrilh ta vek mai che ka zak e a ti a. Ka account hi ka ti thi nghal dawn, engemaw min biak duhna i neih chuan hei ka number a ti a, a number chu min rawn pe nghal a. I chanchin hi fb ah i hming lang lo in ka ziak dawn kan ti leh hram a. Ka hming lang pawn ziak rawh, Angela tih ringawt chuan tuman min hre dawn chuang lo a, a pawi lo a ti a. Sana kan en chu zing dar ruk lai a lo ni tawh a kan in mangtha ta a.
Zing dar 8: 30 vel ah ka harh a, ka rilru ah Angela a lo lut nghal a. Nizan kan in biakna kan en chu a lo bo vek mai a, a account a ti thi a nih ka ring nghal a. Zan lam kan in biak dan ka ngaihtuah a, kan tlaivar dun zak mai kha a ni a, mak ka ti hle mai. Chhungte hnen ah nizan phone ka khawih tlaivar a tih chi si lo a, ka hnathawk pawh Angela ngaihtuahna nen ka zawi khawp mai.
Zan lam ah chuan a number min pek kha tiin Whatsapp lam ah biak kan tum a. Angela ka be duh che kan ti a min rawn reply lawk lo a. A hnu fe ah chuan khawngaih in min rawn be tawh suh, Envangnge maw ka lo rin che a ka chanchin ka lo hrilh che. Ka number pawh hi khawngaih in delete rawh, Min rawn chhui chhuah te kha i tum ang e, min chhui chhuak chuang lo ang. Min lo chhui chhuak a nih pawn ka in awkhlum nghal a ni mai a ti a.
Angela ka be tawh lo ang che, i number pawh ka delete nghal e. Nimahsela hei hi lo hre reng ang che, Pathian in a hmangaih che, Kei pawh in ka hmangaih che, nula tlangval in hmangaihna ang ni lo, ka farnu fel leh thianghlim vantirhkoh ang in ka hmu che. Angela ka hmangaih che ka ti a. A number min pek chu ui tak in, a duh dan ang chuan ka delete ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 7th, 2018, 7:20 pm

THLIAH LOH TLEITIRI 4
KHA BUNGKAWN NULA KHA !
Tluangpuia hilthang

Kum 2011 June thla ah thiante zar ah FB Account ka nei ve tan a. Min hre chuang lo bawk a ti khan a lo hring deuh samsei kha chu kan han inbox chawt zel a. Tha tak a min rawn chhang an awm rual in min rawn chhang let lo te pawh an awm a. Biak tur an van deuh ah kha chuan a hring dang kha kan va inbox leh nghal mai thin. Chutiang reng reng chuan kan FB lut kha chu samsei biak tur kan zawng kha a ni mai a. Hmel lam in puak ti ta lo chu min be rei peih pawh kha an awm hran lo a.
Zankhat chu biak tur pawh hre mang lo in mi thu post ka chhiar kual mai mai a. Ka nin deuh hnu chuan chat list chu kan en a. Samsei pakhat chu Ralte tih a lo dah ve avang chuan kan inbox ve leh chawt a. Min chhang dawn tawh lo a maw ka tih hnu chuan min rawn chhang ta khiah mai. Rin ai in biak kha a lo nuam a kan in be ve ta nual mai a.
Aizawl khua Kolasib a hnathawk a lo awm a lo ni a, zirna lam ah MSW lai ni in MSACS hnuai project pakhat ah a thawk a. Kan level tawk a min kawm a thiam bawk a, hmel hmu hauh lo khan ka ngai nghal veng veng mai a. A ruk khan ka star ta khawp a, a rawn online tawh kha chuan kan hlim thei em em mai a. Va biak hmasak kha chu ka ngam bik chiah thin lo a, a out leh mai ang tih hlau bawk si kha, a awp a tawp ah chuan zak chung chung khan ka va be leh nge nge thin. Min rawn reply kha chuan ka hlim leh nghal veng veng mai a. Hmangaihna lam rim nam kha chu ka sawipui ngam lo hrim hrim a. An hnathawh na lam kha tui ti awm tak khan ka sawi a. Thildang han sawi kha chuan min biak duh loh kha ka hlau bawk si a. An hnathawh na chanchin sawipui reng tur reng ka hre si lo a. Zahzel a han biakna tur thudang ka hriat tak loh ah chuan ka be tlem tial tial a. Vawikhat khat pawh hmu lo khan ka biak thin chu ka tawp san ta a.
Kum te a lo vei chho zel a, Nula lam inbox chu a saseh ngam lo nen ka ti tlem tial tial a. Zankhat chu engemaw ka hriat ni nula pakhat rawn online chu kan va be ve le ta chawt a. Min chhang nge chhang lo ang ti a ka in ngaihtuah lai chuan, I dam maw in biak loh na a va rei ta ve a rawn ti ta mai a. Tunge i nih kan ti chu, hman ah Kolasib a hnathawk a ka lo awm lai in kan in biak thin kha. Chumi kha mi chu ka ni a ka hming pangai a ka in dah tawh avangin min hre lo a ni maw an ti a.
Kum engemaw zat kal ta a, aruk a ka lo arsi em em thin Bungkawn nula kha a lo ni a. Kan in biak tawh loh hnu a ka harsatna tawh te kan hrilh a. Ka harsatna tawh te chu min hnem mawlh mawlh mai a. Pathian nen a khawvel hmachhawn turin chakna min siam sak a. Nulat tlangval kawng ah in hnaih ta lem lo mah ila, a mi fuihna leh tanpuina zar ah khawvel thar ah min chen tir a. Thu leh hla pawh thiam lo kha, a zar ah FB lam ah thute kan ziah chhoh theih phah a.
Mi dangte hi kan hriat lem loh pawn an harsatna tawh atang a tanpui tu kan ni thei a. Kan nun dan leh tawngkam hman hian midang te damna a thlen thei a. An tan khawvel thar siam saktu kan ni thei tih a chiang hle mai.
A hmel vawikhat pawh ka la hmuh loh khan Fb kal tlang a kan in biakna atang in, ka nun ah tumruhna leh huaisenna min siam sak a. Khawvel thar min hmachhawn tir in mi pangai nun min zawh tirtu a lo ni si.
A hmel vawikhat pawh ka la hmuh loh, kha Bungkawn Nula kha ka ti reng tawh mai dawn a ni.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 7th, 2018, 7:20 pm

THLIAH LOH TLEITIRI 5
A HUN LEH HMUN HRIAT
Tluangpuia hilthang

Tlangval han hriat tan tirh kha chuan vengchhung a nula rawn awm thar leh mikhual nula awmna kha chu kan hre thei phian zel a. Thian ho inthurual khan remchang hmasa ber ah kan rim ve ziah thin. Han leng ve bawk thin mah ila, hmel lam in puak tih loh chu thu hran, a sa seh tak tak kha kan ngam thin lo a. An haw dawn meuh hi chuan thian tha tak ah kan chhuah thei hram thin.
Kum 1998 St John HSS a Class XI ka zirlai hian tlai khat chu ka thianpa hi a lo leng a. March thla ah final exam kan nei tawh dawn avang in lehkha zir ngawrh a ngai tawh hle a. Tluangpui mikhual nula rim tur ka hria zan in chu rim ila a rawn ti a. A zei ber ang zia zang chuan a hmeltha em kan ti nghal a. Hmeltha lutuk matric rawn exam tur a nia, a chhungte in ah a rawn awm dawn a a ti a. Zan lam a leng tur chuan kan in thlah liam ta a.
Tlai chaw ei kham dar 7:00 vel chuan ka thianpa chu ka va sawm a. Kan thianpa pakhat hi a lo awm sa bawk a. Kan pathum chuan mikhual nula rim tur chuan engthawl tak in kan chhuak ta a. An in kan thlen hma hawt atang chuan nang lut hmasa rawh ti khan kan in hnawn nasa ta mai a. A tawp ah chuan in tih huai hmel tak khan, ka lut hmasa mai ang e ka ti ta a. An in chu kan thleng zui a ni ta mai a.
An kawng khar chu kan han kik karh karh a. An rawn hawng chiah tih chuan kawng khar phen ah chuan ka biru nghal a. Zan a ni bawk a thim nen min hmu thei lo a, ka thiante pahnih chu an lang ta uar mai a. Tih ngaihna awm tawh hek lo an pahnih chuan an lut ta ringawt a. Han luh zui ve nghal mai kha ka zak tawh si a, kan nghak leh rih deuh a.
Minute 15 vel a liam tawh ang a tih chuan kawng ka chu kan kik tha ve leh a. Ka huphurh lutuk kha an rual a ka lo lut ve lo kha ka inchhir kher mai. Kan lut ta chu an ni thiandun chuan nuam an lo ti nasa tawh mai a, an lo titi phar phar mai . Zah zel ah ngati nge min lo kal san daih a kan ti ta ringawt a. Chu chu kan in hriat tanna a lo ni ta a.
Zantin mai hian kan thian thum chuan kan leng ta mai a. A tumah lah chu han be fal ngam kan awm chuang lo a. Mikhual nula dang kan rim thin ang bawk in thian tha tak ah kan chhuah ti tih ta mai a. A awmna te chuan fa pathum in tiah rual mai hi an nei a. An fate pathum chu kan kan awm pui hi a ni ta ber a.
Naupang mut hnu hian Card hi kan deng thin a. Kan tui zual chang phei chuan zing dar hnih a han haw chang te kan nei a. Card kan deng tih hre lo kan leng tih hria te kha chuan changsang viau te pawn min ngai awm e. A nihna tak han hria se chuan an nuih kan ti za thin ngawt ang.
Matric te an han exam zo a kan nula rim ber chu an khaw lam ah a haw ta daih mai a. Kei pawh Class XI final chu exam kan zo ve ta a. Result a lo chhuah chuan zantin nula rim ta chu ka failed chiang kher mai. Nula rim tur hre tawh bawk si lo pawl sawn thei bawk si lo in ka awm ta a. Ka nula rim kut hmawr pawh a ka khawih loh kha, ka kumkhat hnathawh min tih thlawn tirtu a lo ni ta a.
Thil tamtak hi chu a that loh vang pawh ni lo in a hun leh hmun kan hriat loh avang a thil tha lo a maw tih a awl hle mai. A hun leh hmun hriat erawh chuan kan nun ti hahdamtu leh hun awl hnawh khahna tangkai tak a ni thung si. A hun leh hmun hria a, a hun tak a thil ti thin te hi pa fing leh fel an ni mai thin a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)