MAPUII BY Tluangpuia hilthang

[Ngaia]

MAPUII
Tluangpuia hilthang

Zai thiam lo mah ila zai ngaina tak chu ka ni ang lawi a. Zaithiam te pawh hi ka ngai sang in, zaithiam hmel hriat han neih te pawh a nuam ka ti hle thin. Chung avang chuan zaithiam te ka theihna zawn a han puih pawh ka hreh lem lo a. Sum lam nei ta lo chu han puih vak ngaihna pawh a awm chuang lo a.
Kum 2003 YMA day chu kum dang ang bawk in khua a nuam leh vak lo a. Section Secretary ka nih avang in peih vak lo chung pawh a kal hram chu ka tum a. Ka bike silfai hlim chuan khaw diak kar ah kan in khalh chhuak ve leh ta nge nge a.
Programme kan han tan a, kan veng zaithiam hrang hrang te chuan kal khawm te chu zai in min han awi a. Section pakhat atang chuan nula pakhat ka hriat ngai pawh ni lo hi a rawn ding chhuak ta. A hmel kan hmu chiah chu a zai hma hauh atang in ka mit a la nghal chat a. Eng hla nge a sak tih lam pawh ngaihtuah loh chuan ka lo thlir ngawih ngawih mai a.
YMA day kan han zo chu an Section chu pakhat na an ni a. An pakhatna nih chu an lawm dawn a. A lawmna ah chuan kan section OB te pawh min sawm ve a. Hmui hmer ka lawm vang pawh ni lo in, chu nula hmuh beisei chuan kal ngei tum chuan ka in buatsaih a. Phur tawk chuan ka va kal ta ngei a. Ka piah deuh ah hian a thu a, biak pawh chu ka be ngam ta chuang hlei lo a. A hming Mapuii tih leh deptt pakhat ah MR in a thawk ve tih erawh ka hre ta hram a.
Kolasib District Solo Competition 2003 chu parish hall ah an nei dawn a. Kan thenawm a lo awm thar tlangval pakhat hian tel ve a tum a. Tluangpui min va kalpui teh nang bike nei ah a ti a. Ka theihna ang kawng a lo puih ve chu tha ka ti a. An competition tihna lam tur ah chuan kan in phur chhuak dun ta a. Chu tlangval chu tun hnu a 'Sum loh vang a di ka chan' tih satu Hrila hi a ni a. Kolasib zaithiam ho pawh an kim hle mai a. Competition a pakhat na hian State level Competition ah district ai an awh dawn vang a ni mai thei.
Ka thianpa chuan zai turin stage lam min pan san tawh a. Chutih lai tak chuan Mapuii leh mi pakhat ka hmel hriat hian min rawn pan ta tlat mai. Ka bul an lo thleng chu ka hmel hriat pa chuan "Tluangpui Mapuii hi Sound tract va lam pui lawk teh a, hei zai turin kan sawm chawp chilh leh thut sia"a ti a. Ka phur lutuk chu ka thlawk lo chauh a ni.Kal ila ni mai a lawm ti in ka bike lam chu kan pan dun ta a. Ka hnung ah chuan an chuang ta vang mai a. Diakkawn phei ka tlan lai a nuam ka tih em em zia kha. Ka hmelhriat leh thianten min lo hmu se la, lo in hrilh pung ru tih tak mai kha ka nap a.
Tluang takin sound tract chu kan va lam a kan let leh nghal vat a. A kal dawn chuan kalpui i nei em, I neih loh chuan ban ah i rual in ka lo haw ang a ti a. Ka thianpa nen kan nia ka han thlah zuai ang a, min lo nghak la ka ti a. Aw le ka va han lawm em a ti a. Ban ah ka thianpa chu ka han thlah hmasa a, a ni pawh chuan min lo nghak a ka thlah haw ta a ni. Chu chu Mapuii nen a kan in tawn chhoh dan chu a ni.
Kan han in zui chho ta a, ni hnih khat lek chhung in mi zia kan in hre chho ta zel a. Ka thu hriat chuan ka hlimna leh lawmna zawng zawng chawp leh chilh in min lak sak a. Zahna thinrimna leh natna in a luah khat zo ta. Chunu ka rilru zawng zawng awmna chu zu pawh in thei, Tlangval pawh a rem rem kawp thei mai chi a lo ni a. Chu thu ka hriat chuan ka bansan dawn nge ka kuang kuah zui zel ang tih ka in ngaihtuah nasa hle a.
A tawp ah chuan amah zawh chian hmasak chu ka tum ta phawt a. A awmna te in ah chuan ka va leng a, amah chiah in a lo awm a. Kan han in hmu chu a rui tih ka hre nghal a. Mapuii a va lo mak em, hetiang mi ni tur ah ka lo ngai lo che a ka ti a. Tluangpui i hre dawn tih ka hriat vang a nia tun ah pawh rui chung a ka lo awm, Nangni ang mifel hruai sual che u hi ka duh bik lo a sin. Chuvang chuan kan inthen a ngai, then tur che in ka lo awm a nih hi a ti a.
Chu thu kan hria chu ka na leh nghal vawng vawng mai a. Mapui i sual bik lo a sin, kei pawh misual tho a lawm ka nih, Isua Krista thisen avangin chung kan sual zawng zawng te chu silfai a ni tawh a sin. I thil chin than bansan la, nun thar in nung leh la nun bul kan tan dun dawn nia kan ti a. Tluangpui ka sual nasa tawh lutuk, ngaihdam theih ka ni tawh lo, ka nih nih ka ni ang a ka thlen thlen ka tleng dawn a ti a
Nimahsela, he hla i hriat chhuah chang apiang chuan min han hre chhuak thin ang che a ti. Chu hla chu mittui tla chungin an sa a. An sa zo chu haw tawh rawh ka chhungte an lo haw tep ang a ti a. Tih ngaihna ka hriat tak loh avang chuan ka haw san ta nghal a.
Chu ta tang chuan kan in be ngai ta miah lo a. Vawihnih khat mi bike hnung a rui meng mang lo a a chuang ka hmu tih loh chu, a hmuh pawh ka hmu ta lo. A hnu ah phei chuan a hna a bang nge, kan khua kha a chhuahsan ta a.
He hla ka hriat chhuah chang apiang hian Mapuii kha engtin nge a awm tak ang. A boral tawh nge Pathian chhanchhuahna chang in chhungkaw tha tak an din tawh zawk ang tih ka ngaihtuah fo thin. Chu hla mittui nen a min sak sak, a hnu ah kei pawn mittui nen a ka ngaihthlak fo thin chu..

Ka dawn thin a rairah kan nun
Tuar thiam a har a na lua e
Mim ang kan lo piang ve na a
Chun leh zua lu ti hai tu mai an

Muantu kan ngai puitu kan ngai
Chhantu kan ngai an awm si lo
Mifel rual awm khawm ho te zing ah hian
Kan tan hmun a awm ve si lo.