IN LOVING MEMORY BY Tluangpuia hilthang

Story tawi te te emaw luanliamna emaw post na
Ngaia
Site Admin
Posts: 25813
Joined: April 30th, 2016, 4:07 pm

IN LOVING MEMORY BY Tluangpuia hilthang

Unread post by Ngaia » July 7th, 2018, 7:24 pm

IN LOVING MEMORY 1
REMRUAT SANGTEA A LOKAL
Tluangpuia hilthang


Nimin zing ka tho ka thu hriat chuan min barakhaih chiang kher mai. Naupan lai a ka lo kawm ve thin Sangtea boral thu kan hria a. Kan naupan lai ka ngaihtuah chuak a, ka rilru a vak thui hle mai. CP road ah kapi te in bul ah an awm thin a, Kapi thawnthu sawi ngaithla tur hian sikul chawlh ah ka riak thla thin a, chuta tang a in hria chu kan ni a. Electric veng atangin Remruata hi a pi te in ah a lo riak phei ve thin bawk a. Thildang han in hriatna em em kan nei hlawm lo.
Sikul chawlh lai a ni a Kapi te in ah ka riak thla a, Sangtea a lo leng a. Tlang ah buk lem sak kan lo rawt mek a, tlang kan tih hi tun a home mission school an sakna hi a ni a. Kapi in darnam tuikhur vawikhat zuk chawi la i leng dawn nia min ti a. Chutih lai tak chuan Remruata hi a lokal phei a, a pi te in ah a riak dawn a nih ka ring nghal a. Sangtea nen hian in rual vel in, Ka chhang rual ve ve an ni a.
Sangtea nen chuan min rawn kawm tum in min rawn zawng a nih ka ring nghal a. Rang takin ka lo ko nghal a 'Remruat Sangtea a lokal' kan lo ti a. Tlang ah buk lem sak kan lo tum a, lo han kal hmasa ula tuichawi zawh ah kei pawh ka lo kal ve ang ka ti a. An lo han chho dun ta a tuichawi zawh chuan ka han kal ve nghal a.
Buk lem chu kan han sa ta a, a chhuat ah lehkha khawng kan hmang a. A kawngkhar leh bang ah buara kan hmang thung a. Naupang ta chu kan sa der thawng khawp mai a. Zan ah kan riak dawn a nia kan ti a, kan phur khawp mai. Kan haw a chhungte kan han dil chu an lo phal lo nasa mai. Sihal in a la ang che u min han ti chu, Phal ta pawh nise kan riak lo chiang ngawt in ka ring.
Hun a lokal zel a veng in ang ta lo chu kan inkawm chhunzawm ngai ta lo a. Remruata te veng hi Irrigation complex Electric veng a ni a. Vawi hnih vel chu kan va leng in ka hria. Tlangval hriat tawh hnu a kan han inhmuh pawh hian kan in be ngai lem lo a, kan inhmel hriat loh pelh mai mai thin. An ni pahnih kha inkhelh an thiam chho hle a. Remruata kha Striker tha tak a ni chho a, Sangtea pawh Defender tha ber pawl a ni bawk a. An hunlai kha chuan an position ah Kolasib ah pawh a tha ber pawl an ni. Kan inkawm chhung kha thla hnih khat bak a nih ka ring lo. Naupan lai thil hriat kha a lo chiang a, rei tak ni mai in ka hria. Tlem a rei ve deuh tawh ah khan Remruata boral thu ka hria a, Sangtea boral thu kan hre ve leh ta chu a ni a.
Kan naupan lai ka ngaihtuah chhuak uai uai a, Sangtea a lo len lai a Remruata ka lo auh na chu ka ngaihtuah a. Mut pah a thawnthu min hrilh thin tu Kapi in nikum lawk ah min boral san a. Remruata a boral tawh bawk a, tun ah Sangtea an kal ve leh ta chu a ni a, kei mah chiah ka bang ta chu a ni. Remruat Sangtea a lokal, kei pawh ka lokal ve ang, ka tuichawi zawh ah ni tawh lo in, Pathianin a hnen a kal ve tur a min duh hun ah, Chu hun ah chuan tlang a kan buk lem sak na ai a sang van khawpui ah, Rinawm lo tak kan sak ang ni lo lei leh van lalber in chatuan daih tur a a sak ah kan cheng tawh ang a. Lehkha khawng chhuat ni tawh lo in rangkachak tual ah kan leng tawh ang a. Buara kawngkhar a lut thin kha lunghlu kawngkhar ah kan lut tawh ang. Kan chhungte phal na lak ngai tawh lo in, Isua Krista thisen chu kan permit a ni tawh ang a. Zankhat chauh riak tur ni lo in chatuan in kan cheng tawh ang, Remruat Sangtea a lokal ka ti leh ta a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 7th, 2018, 7:24 pm

IN LOVING MEMORY 2
EBENEZER
Tluangpuia hilthang


Nula Senior kum sawmthum chuang niin kum 2009 ah pasal a nei a. Kohhran leh YMA lam a lo in hman ve na chuan pasal lam pawh ngaihtuah hlei thei lo in a hun neih chhun a laksak zo a. A ai a naupang daih a chhang chhang leh rual ka nau nen an innei ta a. Kan inchhung khur ah lo lawi in kanu te chuan fanu thar an hrin hah ni hauh lo in an neih belh ta. Ka nau lah chu ruihthei thil lam ah a lo fihlim bik bawk si lo.
An fa hmasa ber tur a pai chho a harsatna em em awm lo in a pai chho zel a. Kum 2010 may thla ah an awh em em mai fapa an nei ta a, an pa pawh a lawm ngei mai. A fapa avang chuan a hlim em em a, an pa pawh la fihlim chiah lo mahse a zia ve hret hret bawk a. Hmakhua eng tak nei in Kristian chhungkua tha tak din te pawh chu a mitthla chho ve tawh a. Hlim pawh a hlim tawh khawp mai.
A fapa pawh chu kum hnih a pum chho ve leh tawh a, a nau tur an pai leh tan mek a. Pasal nei har a lo ni nen fa an pai leh vat pawh chu an lawm hle a. Mahse fa tir pai ang ngawt a ni ta lo, a luak reng mai a a chau ngawih ngawih bawk a. Hetiang ang hian a ni maw naupai hi a lo hreawm a ti ta hial thin. Naute pawh thla nga lai a pai ve ta a luak chhuak a reh thei bawk si lo a, Damdawiin lam pan mai an rawt ta a.
2013 January thla ah Durtlang Damdawi In an pan ta nge nge a. Tlem a an that deuh hnu chuan in lam a in enkawl turin Kolasib lam an haw thla ta a. In lam ah pawh chuan a tha tak tak thei chuang lo a, Aizawl hospital lam an pan leh ta. Investigation te an han tih chuan a lung Valve a thawl tih hmuhchhuah a ni a. Naute pawh a pai zel chuan a tan pawh a hlauhawm thei tih an han hre leh ta zel a. Amah an han rawn a thlasarih zet a lo pai hah tawh han paih chu a phal thei lo a. Chhungkua han in rawn tlang in nu nunna nge nge chu a hlu a lawm, Naute chu paih mai nise kan ti ta a. A chhungte thu hnial a hreh em avang chuan a aw ve ta hram a.
Naute paih a zai theih a ni dawn em tih an han en a. A taksa a chaklo nen a nu boral mai hlauh thawn na nen zai hrih lo mai nise an ti a. Lo zuk haw thla phawt ula, I taksa a that deuh ah kan zai dawn nia an ti ta a. An haw thla chu that lam ai in chhiat lam a pan zel a. Kolasib Damdawiin pawh an lut khat tawk ta reng mai. May thla a lo nih chuan Naute neih pawh a hun dawn hnaih ta, a mah lah chu a chak lo chho tial tial a han zai chi a ni tawh lo hrim hrim a. A na a rawn zual zel a Kolasib damdawiin an panpui leh ta a. An nin Aizawl lam pan pui tur in an lo ti a, a rang a rangin Aizawl lam ah an chho ta a.
Aizawl Civil Hospital an han thleng chu nau a vei a lo ni a, May ni 31 chuan hah tak a a lo pai fanu duhawm tak chu a nei ta a. Amah thisen chaw deuh chauh ring a ni bawk a, a fanu lo piang pawh Kg 1. 200 chauh a rit a ni a. ICU ah dah luh nghal ni in a fanu hmel pawh chu a hmu ta chuang lo a. Fa ber an neih tak ah chuan amah pawh chu tha chho zel tur a beisei a ni a. A fanu erawh ICU ah thla thum vel tal a awm a ngai dawn a ni.
Amah pawh chuan that lam a pan hlei thei ta chuang lo a. A pasal nu bul ah chuan kal tawh mai a duh thu leh natna awm tawh lohna ram thlen tawh a chak thu a sawi fo a. A lokal ta a nih pawn a fapa damdawiin a awm lai a kumthum lo tling chho ta, Kum chanve zet kuah pawh a kuah hleih theih tawh loh, a hmuh pawh a hmuh khat em em leh a fanu harsa tak a a pai, Hmuh pawh a la hmuh loh chu tha tak a lo enkawl sak turin a ngen a. A nu pawh chuan i dam leh dawn a lawm, I fate chu nangmah ngei in i la enkawl ang chu tiin a tawng thlamuan ve reng a.
June Ni 21 a lo thleng ve ta reng mai a. An pa chuan chaw ei teuh teuh rawh, I ei teuh teuh loh chuan i ka ah ka hnawh ang a ti a. An in fiam a an nui dun har har a, chaw pawh chu a ei ve ta tauh mai a. A pasal a nu chuan i that deuh hi I ni te in ah ka va in bual teh ang tiin a chhuahsan a.
Tlai dar hnih vel chuan Mazai a zual thut mai lo phei nghal rawh tiin an rawn phone a. Damdawiin a thleng phei fel chiah tih chuan a monu a fate pahnih enkawl tura titu chuan Natna awm tawh lohna rama awm turin a hring nun zin kawng chu a lo zawh zo ta a ni.
Ka nau fanu a Pu in Lalchhandami ti a a phuah, Kei in Shillong tlang atanga mihring hming ka phuah hmasak ber ni tur a, Sap hming neih tul lo ti ber thin in 'EBENEZER' ka tih Ebenezer Lalchhandami chuan kum li a lo tling ve ta reng mai. A nu boral hnu thlakhat ah ICU atang a han la chhuak in Khuangpuilam naute a ni chho a. Tun ah chuan naute nih duh tawh lo in a u Samson Lallawmpuia in fiam lai a ti buai ta reng mai.
Pian hlim a Kg 1.200 lek ni a a thawmhnaw tur ringawt pawh buaithlak khawp a te kha, inchei ringawt a at chilh cho a. A nu damna tur a peih mai kan tum khan Chhungkua min va ti hlim thin tak em. A nu zai theih lo a an awm kha a fanu tan a nun a hlan na tur a Chunglam ruahman sak na a lo ni reng si.
A nu khan hmu hman lo mahse Pathian in nu tha tak an pe thar leh zel a. Lalnu nei em em a te unau an ni ta ngawt ! An thil tih theih ve reng pawh Lal a nu tih vek a ni ta. A u Samsona leh a pa phei chu kumthum lai Sunday School an kal kim dun ta. Kumin pawh an la kal kim dun zel chu a ni a. Lungaihna kar ah malsawmna an dawng pafa niin kan hria a, kan chhungkua kan va hlim tak em.
Khua hi a thim reng lo a khawvar lo awm theihna tur a thim pawh a ni thei. He lei ah zawng lo var ta lo pawh ni se, a mah ringtute tan chuan in..

Zan hi a ral ang a
Chatuan in khua a var ang
Hnehna puanvar sin in
Lal Isua a lokal dawn e

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 7th, 2018, 7:24 pm

IN LOVING MEMORY 3
PANLAI THIAN TAWIA LEH RINA
Tluangpuia Hilthang

Ka pian hnu lawk ah ka nu leh pa te hian mi in luah hawh in in hrang an chang ve a. Hmeithai chhungkaw pakhat nen hian in pakhat luah ho in kan in phel a. Fapa pakhat ka rualpui vel hi an nei a a hming chu Rina a ni a.. Kan thenawm chiah ah hian kei a te, kei ai a ni khat upa Tawia hi a awm bawk a. Chu mi chang chawi chuan a in ti u em em mai thin a. Thenawm mai a naupang in rual khat awm ta chu kan in kawm ngeih hle thin.
School kan la kal loh avang in in hnuai vel a motor lem khalh kha kan hna a ni ber a. Kan motor khalh pawh kan pa ten thing min tuk sak ke pawh nei lo kha a ni a. Chem kawi leh tuthlawh hmang khan a kawng kan siam a. In hnuai chu kan lai phut derh dur mai thin. Chutiang hlir chuan ni kha kan tum tla ve thin a.
Hun an kal deuh a Rina te chu Diakkawn lam ah an in sawn ta daih a. Keini pawh Khuangpuilam a kan huan ah kan in sawn ta bawk a. Veng hran theuh a awm ta chu kan in hmu khat ta khawp mai.
School te kan lut chho ve a Kolasib PS VIII ah lut in, an ni PS IV ah an lut thung a. Tumkhat PS Sport Hmarveng a a awm tum in kan in hmu ta hlawm a. Inrinni ah Challui lam ah hnim bawh eng ho turin kan in thlah ta hlawm a.
Inrinni a lo ni a ka nu te hnen ah Tawia te in ah ka leng dawn ka ti a. Tawia te in ka zuk thleng chu Rina te in ah kan leng dawn kan ti leh a. Chutiang a in sawm kual chuan kan hnim bawh en na tur Challui lam chu kan pan ta a.
Tlem a tlangsam buk leh Japan hlo hmun lo tha deuh kan hmuh kha chuan kan han bawh eng nghal zel a. Chutiang chuan kan nghahhlelh em em mai chu thian za ho chuan kan han bei ta a. A hlim lam kan hlim, a buk sang deuh bawhen te kha kan in chuh a kan nui uar uar mai a.
Naupang a ruk a hnim bawh eng tur a kal ta chu eitur engmah kan keng lo a. Kan ril a lo tam ta tih chuan kan piah a Thingfanghma huan chu kan pan a. A neitu te an kal lo ni a kan hriat hnu chuan kan lo ru ta a. Pathum vel kan lo hman tih chuan nutling pakhat kan hmu ta thut mai. Kan fanghma lawh sa pawh la lo chuan kan tlan chhe ta a.
Mahni theih dan dan a tlanchhia kha kan ni bawk a. Tumah chu kan in ngaihsak tawh lem lo a. A hran theuh chuan in hmu tawh lo in mahni in kan thleng vek a. Kei kha chu ka tlanchhia kha a him deuh ni a ka hriat hnu khan, ka tuihal lutuk kha challui tuikhur ah tui ka in phawt a. Rilru nuam teuh lo chuan kan haw ta a. Nuam taka kan hun hman chu kan thil ruk avang chuan thlabar tak in kan haw ta hlawm a ni.
Middle School te kan han kal chho ve a, Tawia nen chuan School thuhmun Diakkawn Middle School ah chuan kan kal dun ta khiah mai a. In kawm ngeih viau e ti lo khan kan in ti buai reng mai a. A ni kha lehkha kha a thiam viau a, kei kha chuan ka harsat hle thung a.
An buh her khawl rik dan zir khan kan chhaih a. A nin kan Bawngvulh hre ran khan Ral leh lam a Bawng chaw te chu lak loh in an vuai ta mai mai a an ti a. Kei in Lallianmawia Pachuau hla Duatlai Ate tih thluk khan an chhungkaw hming kha hla in kan sa ve nghal zat a. A nin kanu MKI tih hre reng khan Ramnghinglova hla Sawi nin loh MK tih khan min han chhawn leh hram a. Thu leh hla in a daih loh chin ah chuan kan in bakaih leh chawt chawt mai thin.
Khatiang chung khan kan in ngai em em mai a. Kan in tih thinrim tam po leh kan in ngai ni mai khan ka hria. Lehkha bu chhiar hi nuam kan ti dun em em a, Lehkhabu chhiar tur khan Sub Division Library, tun a District Library ni ta hi kan kan dun fo thin.
Kan han tlangval chho a kan in kawm tam ta lo. Zankhat chu kan veng ah mitthi lumen na ah kan in hmu nawlh mai a. Naktuk Aizawl ka ka chho dawn a ka tlaivar lo mai ang ka ti a. Chuti chu i Jacket kha min lo hak tir teh tih leh min pawh thlaksak a rual a. A tuk lam Aizawl ka chhoh nghal avang in a lam pawh chu ka lam leh ta lem lo a.
Chu mi hnu kar khat vel ah Kolasib haw thlak zawk ka tum a. Bawngkawn ah ka thianpa te hostel ah ka chawl phei a. Tawia thih thu kha i hria em. YMA Group Conference an kal haw lam an chuanna Autorickshaw leh motor an in su a ni awm a an ti chu ka phu zawk mai a. A chhan pawh awm lutuk lo a, Exam dawn a ruai a Kolasib kan haw thla thut pawh chu a he tih vang hi a lo nih dawn hi ka ti a.
Chhechhawnga te vai dawr tih ang mai Kolasib kan thleng chu ka mit a na ta tlat mai a. Ka mit ui hlit tur lo ni in zan lumen na ah pawh ka kal peih ta lo a. Zing chaw ei hma in ka mit romol a hup tat chung in ka va kal hram a. A ruang kil nghal in a sam chu kan chul hauh hauh a, Tawia mangtha mai le ti in ka thlah ta a. A thih atang a thlakhat vel ah ka jacket kan va lam pawh chu ka mittui hi a hnam nghal sawk sawk mai a.
Thianpa Rina nen kha chuan kan in kawm chho lutuk ta lo a. An tlangval chhuak kha zu lam a lo khawih ve nasa a lo ni a. Motor Mechanic ni in hna pawh a thawk hlei thei lo fo a. Khawlai han in hmuh ni khua te hian khawi maw cheng sawm chiah min lo pe hi a ti deuh reng mai a. Han in hmuh kha chuan ka sum tlang hi a hek ve deuh reng mai a ni.
Chutih rual chuan motor mechanic a nihna kha ka chhawr ang reng phian a. Bike kan nei a a chhiat hlek a, a ruih loh lai a nih chuan a mah kha ka khawih tir hram thin. Taxi kan nei chho leh a chutah pawh siam a tul chuan thianpa Rina tho ka pan leh hram thin. Lirthei lam pang avang pawh chuan kan in kawm leh zeuh zeuh a. Veng in an loh chu thu hran, kei KTP lam ah kan in hmang chho a. A ni nuthlawi zu zuar in lam khan a lunglen bawk si a, kan in kawm tam ta lutuk lo a.
Shillong lam ah kan awm a, tuk khat ka chhungte kan bia chu i thianpa Rina kha a boral a sin an rawn ti a. Kan naupan lai ka ngaihtuah chhuak a, kan in hnuai a motor lem thing a tuk kan khalh lai a lo lang a. Chhungte hriat loh a Challui a hnim kan bawh en lai a lo lang zut zut bawk a. Kan riltam mi thingfanghma kan lo ru, a neitu te kan hmu kan tlanchhiat nasat zia te ka ngaihtuah zel a.
Tawia Autorickshaw Accident vang in a boral tawh a, tun ah Rina an kal ve leh ta chu a ni a. Shillong khawpui hill station nuam ve a an sawi, mi tamtak in in tih hlim nan leh hahchawlh nan a an hman thin ah chuan, ka naupan lai thiante pahnih ngai chuan lungleng tak in ka awm ta a.
Kum naupangte in thisen sang leh zunthlum natna kan nei a. Chu natna chu hneh lo in ka taksa hian engtik ah emaw chuan lei dai a la bel ve ngei ang a. Chung hun ah chuan ka thiante pahnih leh ka hmangaih kal ta te nen inthen tawh lo turin Beramno eng ah kan cheng ho tawh dawn si a ka ti a. Ka rilru ah he hla hi a lo lut a

Lei hringnun hi ka pelh hun ah chuan
Lungduh te nen hlim in kan in tawk ang
Lei hringnun ngai lo in lungduh te nen
Kan leng za ang Beramno eng ah chuan

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 7th, 2018, 7:25 pm

IN LOVING MEMORY 4
NULA RIM LEH CHAKAI MEICHHER CHHIT
Tluangpuia hilthang

Hringnun ah hi chuan thil in per san pawh a awm thei lo a nih hi ! Ran thleng leh kraws avangin Pathian nen a hrang tawh kan in zawm leh thei a. Ka sawi tur ka thianpa nen pawh hian nula rim leh Chakai meichher chhit avang in kan in zawm tlat si.
Kan veng ah hian hmeithai chhungkaw pakhat hi an lo awm thar a, a fate pahnih mipa leh hmeichhia a awmpui a. A nau zawk mipa nen chuan an lo awm tirh atang in kan inkawm ngeih nghal hle a. Ka thianpa thar chuan Sikul hi a kal tawh lo a, Nula rim na chang pawh a kum phu lo in a hre hma hle mai a. Kei ai in naupang hret mah se a nula rim tur ka zui nasa hle thin.
Nula rim tur a kan kal kawng ah hian kan han zai ngei a, Peter C Lalrinmawia leh K Lalchamliana hla te hi kan sak uar pawl a ni. Gun N Roses hla te pawh a awmzia hre lem lo mah ila han sak ve chang kan nei ve thin a. Kan thianpa chuan Sweet Child O mine kha an uar thei khawp a, Lehkha zir sang bik lo tih tak ah a lam fuh chiah bik lo a. Gee lai zum-i tih kha a hriat dan a niang chu chutiang hlir chuan a sa thin a. Keini khan chu mi a lam hre chak khan Gee lai zum-i sa ang u kan lo ti kher thin bawk a. Pawisa a nei thei deuh bawk a naupang zawk mahse ka boss en zawk mah thin. Nula kan han rim a kan lo muhil thin a, Haw dawn ah min han kai tho a, phak deuh chual khan kan han haw a. Thil min leisak thin avang khan a tuk zan ah chuan kan zui leh tho thin.
Vawikhat chu chakai meichher chhit turin min sawm a, Chakai meichher hi vawikhat mah ka la chit ngai lo a. Ram kal zei lo chi ka lo ni nen ka peih lo viau mai a. Min sawm ngawrh bawk si a peih lo tak chung chuan ka aw ta ringawt a. Buhfai a kan hmui zawh tlai dar nga vel ah kan veng lui pakhat chhit tur chuan kan chhuak ta a.
Lui kan zawh thla a a buhfai kan hmui chu kan chiah thla zel a. Lengkir te a lo awm leh thin a hel an ngai nen ka hah hle mai a. A ni chu ram kal thang tih tak ah hah pawh a hre mang lo ni mai hian ka hria a. Kan kal thui ta viau maw tih chuan duh tawk tawh ang a ti ta a. Rawtuai an khawrh a maubur ah nghathu leh hmarcha nen chuan mei ah an rawh a. Kan chawfun pai nen chuan kan han ei ta a. Ka hah nen ril a tam bawk a ka kham lo kher mai. Khua a lo thim ta bawk a chakai man tur chuan lui chu kan zawh let chho leh ta a. Kei in meichher ka keng a ka lo en zel a. A nin lo man zel in ka ip ken ah chuan a rawn khung zel a. Kan man hnem ve ta viau mai a.
Lengkir sang ve tak pakhat hi kan pel chho a, a chhak chu lungpher hmun hi a ni a. Ka tawlh thlu ta mai, lungpher ah chuan ka tawlh ta per per mai a. A thlang lengkir kha a ni si a, ka thi ngei dawn a nih hi ka ti a ka mangang hle mai a. Lengkir thlen thlak hma chuan li te reuh te hi a lo awm a, Tah chuan ka tla lut ta hlauh mai a. A meichher kengtu zawk ka ni si a ka tawlh thlukna lam ah meichher lah chu a thi daih leh nghal a. Meichher erawh chu ka thlauh lo hlauh a. Min rawn au a, lengkir thlen thlak hma li ah ka tang ka ti a. A lighter nen muang te te in a lo chhuk a, mau ka rawn pe ang che nga. A hmawr ah lo vuan la, ka kai chhuak dawn che nia a ti a. A thim ropui bawk si a lighter eng chauh chu kan eng neih chhun a ni bawk si a, ka duh lo khawvar nghak mai ang ka ti ta a. A nin a la rei dawn lutuk, mau kha vuan la a hlauhawm loh a ti a. Kan in hnial buai lai tak chuan kha rul a lo tleng lut an ti zui a, Mau chu rang tawkin ka vuan a kan in hnuk chhuak ta a. Ka tawlh thluk na ah khan ka khabe hi ka sawh kak a, a bak chu na em em ka nei hran lo a.
Meichher te chu kan han chhi alh leh a, Buaina dang em em tawk lo in kan chhit chho leh ta zel a. Dar kua vel ah in kan thleng a. Kan chakai man te chu kan han in sem a a nuam ve khawp mai. Ka chakai meichher chhit vawikhatna leh awm chhun chu thi lo a ruang in kan hlen ve ta chu a ni.
Zokhaw lam tleirawl nun a bet ve tlat pakhat chu nula rim leh chakai meichher chhit hi a ni awm e. Chung ka tih tan ve na leh min kai hruaitu ber ka thianpa chuan nikum mai khan min boral san a. Kan tlangval chhoh hnu ah kan inkawm tam ta lo, a nin nupui nei vat in kan in bul ah an awm ta lo bawk a. Han in hmuh chang pawh hian kan in nuih liam mai mai thin. Nimahsela tleirawl hun lai a ka kawm ber pakhat a ni a. A tel lo chuan ka hringnun chanchin ah hian kim lo awm in ka hre thin.
Kum lam ah kei ai in upa lo mahse hringnun zin kawng a kan hun nuam ber pakhat, Rawlthar nun min zirtir a min kai hruaitu ber a ni a. Khang hun te kha kum za tam pawh ral mahse kohkir leh rual a ni tawh si lo. Lu leh khabe hmul tuak khawp in he hringnun hi lo zawh chho pawh ni ila, Ka Chakai meichher chhit awm chhun leh nula rim min kai hruaitu ka thianpa zet hi chu nghilh ni a awm thei dawn lo a nih hi !

Mahse i vullai ni a tawi lua e
Tawnmang an chang zo ta
Hmanlai kan nun lokir lul rawh
A mi zaleng zawng lawm a kim ang

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 7th, 2018, 7:25 pm

IN LOVING MEMORY 5
SAP NULA THLA KA LAK PUI
Tluangpuia hilthang


Vawin ni chu tlan na a va han awm lo tak em, Diakkawn lam ah in sawn thlak mai tur a maw ni tiin ka rilru ka lo siam mek a. Ka din na thin State Bank kawt hi taxi ka khalh tirh atang a ka din ve tang tang na a ni a. Damdawiin leh Bank kal ho te hi kan phurh ber an ni thin. Chutia ka in sawn nge sawn lo ang ti a ka rilru a in sual buai viau lai chuan, ka bul ah chuan Sap nula pakhat leh Mizo nu hi an lo ding reng mai a. Mizo nu zawk chuan i hman theih em, ka thiannu hi han lenkual pui lawk ka duh a a rawn ti a.
Ka Mizo pui tamtak ang bawk a sap ngai sang chi ka lo ni chu thu hran, tlan na duh a in dawh ka nih miau a, theih lo ang han tih chi ni hek lo. Ka taxi ah chuan lo chuang lut in Hmarveng tlang lam ah kal ang an ti a. Thla te an lak zawh hnu chuan haw kan tum ta a. Chutia haw kan tum lai chuan ka rilru ah thildang a lo lut thut a. Sap nula phur a thla han lakpui loh chu ni thei ngang in ka hre ta lo a. A thiannu hnen ah chuan thla kan lakpui lawk, min lo hmeh lawh teh tiin ka phone chu kan pe a. Ka Taxi hma ah chuan kan han ding dun a, Taxi lang chuan thla chu kan han la dun ta a. Naupan lai a sap hmuh ringawt pawh in ti thei thin kha, Phak leh phak lo in a dar ah kan kuah hram a, Sap nula kuah tawh val chu ka ni ta phawt a, a rei lo lu lai deuh mai pawh a.
Ka thiante hmuh tur in facebook lam ah kan post thuai a. Sap nula thla han lakpui ta chu rilru hi a hlim veng veng mai a. Ka thiante chuan min va han awt dawn em ka ti a. Notification kan en chu comment pakhat hi a lo awm a. Kan veng nu lo ni ve thin Lawmtei(L) of Pu Lalhma-a a lo ni a. U Tluangpui, thlalak pui tur i va thlang thiam lo ve, i chhip a chhem mai dawn a lawm a rawn ti a. Sap nula lakpui thei lo intih ve nak lai in ka delete tep a ni.
Ka sap nula thlalak pui chu kan khua English Medium School pakhat Bright Faith Academy a thawk a lo ni a. Kan khaw tlangval pakhat in thla a lakpui fb lam ah kan hmu zui leh nghal a. Chu vun ngo nula chuanTlangval vannei awmna khua ah min lo siam hi a lo ni hawt a.
Lawmtei(L) kha Kolasib nu ah chuan hmeltha ka tih deuh ber thin a. Kan veng ah pasal nei a a lo awm ve chhung khan an pa Pedro a kha, Faith Promise ah ka bial thin a ni a. A nu Pi Sawmtei nen khan an harsatna te min hrilh ve thin a. An in kal dawn hi chuan hman deuh hlek a, thingpui in tur sa a kal a ngai thin. A chang chuan ka ning leh hmanhmawh deuh hi chhuan lam siam a han kal mai chang te pawh ka nei thin a.
Tun hnu a ka ngaihtuah let hian, an pawisa chauh kha a mi ka lo duh thin. An pa chanchin leh an harsatna sawi te kha beng rawng ah hian ka va lo thun ngai lo em. Mi in KTP hruaitu tiin an harsatna te ka bul ah an sawi ve ang tawk tawk a, An harsatna min hriltu leh hrilh ngam pawh ka neih loh teh reng nen, Hun ka neih loh thu sawi in an in chhuahsan vat kha ka lo duh thin a.
Lawmtei'n ka Sap nula thlalak pui a lo comment na zar ah, KTP te hian sum hi kan lo buaipui lutuk ang a, Kan memberte harsatna ngaithla hman lo hian kan awm palh ang tih ka hlau ta hle a. Midang te harsatna ngaihthlak a kan theih na ang kawng a Isua ke bul a hruai luh hi, Rawngbawl tura Chhandam kan thupui innghahna tih hlawhtlin na a lo nih dawn hi ka ti ta a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 7th, 2018, 7:25 pm

IN LOVING MEMORY 6
VANADUAI CHUANG
Tluangpuia hilthang


Kum 2008 ah kan Veng thalai te in pawh tlan nan Youth Club kan din ve a. Kan din atang a reilo te ah Mizoram Palian inchai Champion Amawitea kan nei nghal a. A hnu lawk ah National Integration Youth Camp ah Mizoram represent in kan tel bawk a. Kan din rei loh ngaihtuah in kan vannei chho hle mai a.
Kan veng mai ni lo kan khaw ti hming thatu te chawimawina neih tha in kan hria a. Kan veng inchai chak bak ah veng dang a mi kan khua tho Palaihawl Champion Sangzuala leh Inter University Solo a pakhatna Andrew Laltlankima te chawimawina leh chawhlui kil puina kan neih pui a.
Chung kan thil tih te chu Documentary in NRS picture in min siam sak a. Tah chuan Vanaduai chuang tih hla C Sanga hla hi an rawn dah tel ve ringawt a. Kan Documentary Ka en apiang chuan a satu C Sanga hi ka lo mitthla hmasa ziah a.
Kan Club min phurpui tu Pi Lianhmingi Pachuau MCS Director Rural Development an boral tawh a. Kan Adviser Pu Lalbiakthanga Khiangte IPS lah in kan khua a chhuahsan zui ve nghal a. Kan club chu kan vanduai chho hle mai a. Kan documentary a Vanaduai chuang tih an lo dah pawh chu kan inrem ta viau mai a.
Kan club documentary ka en apiang a ka hriat chhuah hmasak ber thin C Sanga an boral ve leh ta chu a ni a. Vanaduai chuang tih hla chu kan vanduai pui ta viau mai a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)