KAN TIAM TAWH SI (COMPETITION)

Ngaia
Site Admin
Posts: 25813
Joined: April 30th, 2016, 4:07 pm

Re: KAN TIAM TAWH SI (COMPETITION)

Unread post by Ngaia » November 12th, 2017, 2:10 pm

KAN TIAM TAWH SI...
Chapter - 7


Zan ka mut țhat vak loh avang chuan ka mit te chu a kham ur mai a, zing ka harh a, ka intihfai hnu chuan inhnuaiah ka chhuk a, ka nu leh ka pa chu kal mai inpeih atin an lo awm tawh a.

"Bawihi chu ilo tho ve ta maw? I thawh hmaa kalsan che kan hreh deuh a, kaihthawh che kan tum a, i mutui lutuk a, kan kaitho duh ta lo che anih kha, kha thingpui leh a hmeh kha dawhkanah ka dah kha aw," ka nu chuan alo ti vat a.

"Ka nu hi chu i van fel tak," tih pahin ka kuah a, "Ka ngai ngawt ang che u," ka mittui a tling piau a.

"Naupang chhia pawh i nih tawh loh hi, kan lo haw leh vat dawn alawm, kan awm loh chhungin chaw ei loh mai mai te kha i lo ching ange, lo inenkawl țha ang che aw," ka pa chuan alo ti ve vat bawk a.

"Awle, ka lo inenkawl țha viau ang, min ngaihtuah reng reng suh u, tluang takin in kal dawn nia," ka han ti a.

"Awle, bye..."

An kal liam ta, inchhungah chuan keimah chauhvin ka lut a, ka lung a leng nghal ringawt. Nula ve lem si, nu leh pa tellova awm theilo nih chu ka zak ve deuh e a.

Rawng ka bawl sawk sawk a, ka hna ka kal hunah zana mahnia riah ka hreh viau tak leh Rpi riak turin ka sawm mai ang. A hreh lem lovang chu maw!

Chaw ka ei kham a, ka tihfel vek hnu chuan inchungah chhovin ka insiam a, puanfen nena scooty khalh a rem loh em avangin kekawr deuh hlir ka ha a, nuam pawh ka ti zawk daih. Helmet khum a ngaih avangin ka sam ka thlah leh tawp a, ka thlen hunah ka țawn leh mai ang.

Ka insiam zawh chuan ka bag ka ak a, ka chhuak ta nghal a, ka thawhna hi private hospital a ni a, thawktu pawh kan țhahnem khawp mai. A neitupa chu Pu Hmingliana a ni a, fapa hmelțha tak neiin ka thawhnaah doctor hna a thawk ve tih an sawi ka hre nangin amah chu ka la hmu ve miah lo. An sawi dan hmangah mi inla ngeng tak anih ka ring deuh ringawt a. Hmeichhe hovin an bawr nasa thei lutuk a tih te hi an sawi dan ani.

Hospital ka thlen chuan inthlakna roomah ka lut nghal a, ka inthlak zo țep tihah Rpi alo thleng ve chiah a, a rawn țawng lut nghal bawrh bawrh a, a thawveng lutuk hi a bula awm te hi chu a nuam țhin ania. A bulah hi chuan mood off te hi a reh vek zel țhin.

"Rp, ka pa hna avangin karkhat thang turin ka nu nen an kal a, keimahin ka awm a, an zin chhung chu lo riak mai ta che, scooty a awm thova, kan kal rual thei dawn bawk asin," tiin ka han sawm a.

"Ka chhungte ka dil phawt loh te chuan.....phal chu an phal thovang," Rpi chuan a han ti ve a.

"Kan haw tlan theih leh in inah kan kual nghal hlauh anga, kan inah zanriah i ei nghal law law bawk anga..." ka tih mek lai chuan Doctor Maruata chu a lo lut hlawl mai a.

Min rawn melh ran mai a, "I duty hmain ka be duh lawk che ania, ka roomah rawn kal ang che," a rawn ti hmuk a, a chhuak leh nghal daih a.

Rpi nen chuan kan inmelh zawk a, "Khai a, enge thleng ta hi, va kal vat rawh, alo thinrim hmain," a ti hluai a.

"Ni e, ka va kal ange, enge maw a hriat ni?"

Doctor Maruata room ka va thlen chuan kawngka pawh kik lovin ka lut nghal a, "Enge ni?" Ka va ti nghal thawr a.

"Lo lut rawh, ka ngai tawh che a," alo ti lek fang a.

Ka thinrim ve ta phat a, "Eng ang mi ah nge min ngaih a, i duh hun huna i koh phar theih tur ka ni em ni? Chutiang tur chu an tam ang chu, ko mai ta che, min tibuai tawh suh," ka ti ve ta hmak a.

"I thinrim hian i hmelțha zual sawt mai," alo ti duh lek a.

Ka thinrim lutuk chuan, "Min mamawh loh chuan duty tur ka nei a, ka kal mai ange," ka ti ve ngat a. Ka kal mai loh chuan ka insum thei lo palh ang tih ka hlau a ni.

Kawngka hawnna ka vuan hman chiah tihah ka banrekah min rawn man hman a, "Kal mai teh suh, engtinmah ka ti dawn lo che, zanin chu min lenchhuahpui la, kan in date vawikhatna tur a nih hi," a ti leh a.

"Ka theilo ang, ka pate an zin a, Rpi min riahpui turin ka sawm a, ban veleh an inah kalin a nute dil turin kan kal nghal dawn, chulovah nang nena indate ka duh lo," ka ti ve hmak a.

Min thlah riai riai a, chuveleh kei chu ka chhuak ta vat a. Kawngka phenah chuan bang nghengin ka thaw hle hle a, ka țang lutuk chu ka lo inhum ruh hle tih ka inhre chiah.

Hepa hian tinge min zar reng ni? Hmeichhe dang a hmu țeuh awm si a, kei kher tinge min duh le? A chanchin lah ka hrechiang lo hle mai si a. Keimah leh keimah chu ka inhlauthawng a ni. Ka nuna lo lut tur hian ka duh chiah em? Min fiam mai mai anih teh chuan a chak lo viau ang, ka insehruh nasa khawp.

Vawiin chu nidang zawng aiin kan buai a, ka phe nileng țhak ani mai e. Damlo serious deuh an rawn dah a, zai a ngai dawn a, an zai laia pui turin Rpi nen min ruat a, ka huphurh ngei mai, hospitala thawk ni mahila, damlo serious deuh hi ka la buaipui vak lo nen. Mahse Rpi a awm thova, ka thlamuang deuh huai.

Damlo zai tu tur chu Doctor Maruata a ni a, ani nena inhmuh leh pawh ka chak lem lo hle mai. Mahse ka duty a ni a, ani avang ngawtin ka tihtur ka hlen loh phah lo ang. Ka ti thei ngei tur a ni.

Damlo zaina roomah chuan kan lut a, kan inpeih țhep țhawp khawp mai. A zai chhunga a mamawh tur a lam apiang ka lo pe nghal zat zat a, Dr Maruata chuan a mi zai laiah chiah a rilru a dah ani tih hriat taka uluk tak leh zei fahrana a khawih vel ka hmuh chuan ka ngaisang ru ang reng hle.

A zai zo ta, a zai hlawhtling khawp mai, ka lo thaw ve huai mai.

Ward a dah turin kan nawr chhuak a, Dr Maruata chu ka en a, "I ti țha khawp mai," ka ti sap a.

"Ka lawm e, nangpawh i țangkai khawp mai," a ti zui ve nghal zat bawk.

Thudang kan sawi leh hmain a kal nghal hmiah a, ka thlir zui reng a, 'a lung ala awi lo reng anih dawn hi' ka ti mai a.

Ka chau nghulh mai, ka ril a țam hle nain, engmah ei chak pawh ka nei lo, mahse Rpi chuan, "Chawlh i duh em? Kei chu ka ril a țam lutuk ringawt," a rawn ti a.

"Pawi lo, engmah ei pawh ka chak lo nain ka ril chu a țam khawp mai," ka han ti ve a.

Hospital hian canteen kan nei a, tahchuan kan chawl mai țhin a, hmundang chu duh aiin a hla deuh hlek a, kan pan peih lo țhin, hetah pawh an nei tui lo chuang lo a.

Canteen a kan chawlh lai chuan Rpi chuan min rawn kheuh zeuh a, ka hawi chhuah chuan kan piah lawkah hian Dr Maruata leh hmeichhe pakhat ka la hmuh ngai loh hi an lo țhu dun ve reng a, ka en lai tak chuan min rawn melh ve chiah a, kan mit chu a intawng zawk a, ka țek chuaiin ka hria. Ka hawisawn vat a, tunge a hmeichhe hruai saw ni ang aw tiin ka ngaihtuahnaah alo lut vat a.

Huh! engvangin nge chutiangte ka ngaihtuah, ka hnar tawh a, min tihbuai a tum tawh lo ani ngei ang, lâwm tur ka ni zawk daih alawm, mahse ka lawm hauh silo. Engemaw ka ngaihtuahna a tihbuai em em le! Ka in thing nawk a, ka ngaihtuah tawh tur ani lo, ka tan engmah a ni hleinem. A duh duh kawp ang hmiang, ka ti chung hian midang nena ka hmuh dun chuan ka chhungah hian nâ a awm tlat si.

Ka ei zo vat a, "Rp, kal tawh ila," ka ti a.

"Hmm, kal ang, duty ila nei em? Kei chu ka nei tawh lova," Rp chuan a ti a.

"Neih pawh ka hre tawh lo,"

"Chuti chu inthlak ila kan haw thei anih chu," a ti leh a.

"Nia, haw ang, in inah kalkawi kan ngaih kha," ka han ti ve leh a.

Kan duty kan zo tawh tih leh kan haw thei tawh em tia kan in report hnu chuan inthlakna roomah kan lut a, kan inthlak zawh hnu chuan pawnah kan chhuak a, ka scooty ka la chhuak a, Rpi nen chuan kan inphur a, an in lampan chuan kan tlan dun ta a.

"Tinge car lei lova scooty i lei zawk a, sum i ngah tehlul nen," Rpi chuan a han ti a.

"Scooty hi a awlsam zawk alawm, khawi ilo a tlan a awlsam ber alawm, engtikah emaw chuan lei pawh ka la lei mahna le," nui var var chungin ka lo ti ve mai a.

Ka phone a lo ri a, ka scooty chu kawngsirah ka dintir a, kan en chuan ka nu alo ni a, "Bawihi, kan thleng chiah e," a rawn ti a.

"In van thleng hma ve a, tluang taka in thleng chu ka lawm ngei mai, ka ngaihtuah lutuk che u a, ka pa chu a chau em? Kawngtluanin motor a khalh si a," ka han ti ve a.

"Aw, a țha khawp mai, rin aiin a chau lo zawk a, a lawmawm khawp mai, anih ka dah phawt ange aw, zanlamah kan inbe dawn nia," tiin phone a dah nghal a.

Ka thaw huai a, "I nute chu an thleng tawh ani maw? Rin aiin an thleng hma, tluang taka an thleng chu a lawmawm hle mai," Rpi chuan a ti a.

"Ni e," tih pahin ka scooty chu ka tinung a, kan tlan leh ta nghal a.

Rpi te in kan thlen chuan a nu leh a pa an lo awm hlauh va, ka kalchhan ka han sawi chuan an lo hrethiam khawp mai.

"Ni e, duh leh riak rawh se, nangmah chauhva awm chu tunlaiah a hlauhawm tlat tawh, nula te in ni si a, fimkhur takin in awm dawn nia," Rpi nu chuan a ti a.

"Ni e, tunlaiah chuan mi hi an rinawm tawh loh hlawm si a, chuvang ania Rpi pawh riak tura ka sawm," ka han ti ve a.


Rpi chuan a inthlakna tur tlem a zawng a bag ah a khung a, kan chhuak ta nghal a.

In kan thlen chuan ka scooty ka hung țha a, inchhungah kan lut dun ta nghal a. Ka roomah kan chho nghal a, "Khatah khan inbual la, kei chu bathroom dang a awm thova, tah chuan ka inbual mai ang," tih pah chuan inhnuai bathroom pan chuan ka chhuk thla ve nghal a.

Ka inbual zawh hnu chuan ala hma bawk a, t.v kan en mai mai a, kan titi pah bawk a.

"Arem, kan Doctor khan a duh che in ka hria," a rawn ti chhuak phawng a.

Ka lo phu zawk a, "A teuh lo mai a, kha bialnu a neih reng kha, dawrah pawh an rawn chawl dun reng alawm," ka han ti ve a.

"Ni lo, kan chawlh lai khan a rawn en reng che tih ka hmu reng alawm," a ti leh zat zat a.

"Ka lo hmu ve miah hleinem,"

"Nangtê hi i zep chiang mai, nang pawhin i duh ve tho kha aw," a ti leh chiam a.

"Ka duh teuh lo mai, ka duh zawng a ni lo," ka lo ti ve pang pang a.

"A van pawi ve aw.....min duh ve se chu ka chhuah hauh lovang mawle, mahse kei te chu min duh dawn lo chiang si a," tih pahin a nui hawk hawk a.

Kei pawh chu ka lo nui ve ringawt.

Kan pahnih chauhva eitûr kan ni bawk a, bawl hma a ngai lova, rawngbawl pawh a hautak lo khawp mai. Kan pahnihin kan bawl dun a, kan zo thuai a, kan ei nghal mai bawk.

Zanriah kan ei kham hnua kan tihfel vek hnu chuan sitting roomah kan țhu dun leh a, chutia kan țhut lai chuan doorbell a lo ri a, kan in en ha a, tu tak ni maw, ti pah chung chuan kawngka ka va hawn nak chuan pawnah Dr Maruata chu alo ding reng mai a.

"Enge ilo tih dawn?" Ka han ti hmak a.

"I chhungte an awm silova, ka lo leng dawn?"

Hepa han luhlul zia hi aw....

"Pawnah hian min dintir reng dawn nge min luhtir dawn?" a ti nghut a.

Kawngka chu ka hawng zau hret a, kawng ka kian ve nghal a, alo lut ve nghal mai bawk a.Rpi chuan mak a ti khawp ang le! A bulah khan ka țang ve nasa hle si a, dawt ka hrilh ah a ngai ngei ang le!

Sitting rooma kan inzui lut min hmuh chuan ka rin ang ngeiin Rpi chuan mak ti hmel zet hian min lo melh a, kei lah chu ka lu ka thing ringawt.

"Ehe, Doctor enge ilo tih dawn a?" Rpi chuan alo ti vat a.

"Ka rawn rim dawn che u,"

"Awihawm loh loh, kei chu ka tel ve lo e aw," Rpi chuan a lo ti leh mai a. Min la rawn siai zauh zui.

"Nang hi enge hetah i tih ve zawk a?" Maruata chuan a ti leh a.

"Hei, a nu leh a pa an zin a, karkhat lai thang an tum si a, an awmloh chhung ka awmpui dawn anih hi, nula te a ni ve si a, ven a ngai deuh țhin a," Rpi chuan nui hawk hawk chung hian a han ti ve leh a.

"Anih tak chu, i va tițha ve a, țhian neih man a awm hle mai," Maruata bawk chuan a ti leh a.

"Kha, thingpui in rawh, ilo kal vawikhatna te a ni si a, thingpui tal i hlawh loh te chuan tuemaw kan ngam lo lutuk palh ange," nui var var chung hian ka han ti ve ngial a.

"Tihtur ka nei a, roomah ka chhohsan mai ang che, tikhan lo inkawm rawh u," tih pah chuan ka chhanna pawh nghak lo chuan Rp chu room lam panin a chho ta nghal a. Kei pawh chu Maruata ep ah chuan ka țhu ve ta than a.Maruata lah chu a neitu zawk ang mai hian a khawsa a, keilah chu in neitu zawk si, ka tîm duk mai.

Ka bulah alo insawn phei a, "Min pehhel tum reng suh, min pehhel thei chuang lovang," a ti nghut a. A lamah min pawt hnai dawrh a, engang pawhin țang sateh ila thaah ka hneh ngang silova, a awmah chuan min pawm bet tlat a. Ka nun hi chu a van tibuai hneh tak em! Ka thaw hawk a, min kuahna tlemin a tithawl hret a, chumi denchhen chuan a kuahna ata chu ka talchhuak vat a, min thlah ve mai bawk a.

"Ka duh che ka tih tawh kha,"

"Induhna ringawt hi a tawk ka ti ve lo, i bialnu kha nei mai ta che." ka ti ve ngat a.

"Tumaw ka bialnu chu ni a," thinrim zetin a rawn ti tuar a.

Ka phu zawk a, "Vawiinah pawh hospital canteen ah i hruai reng kha!"

"I thik elo!"

"Teuh lo mai," uar zet hian ka han ti ve ngial a.

"I thik anih kha, i awmdan kha ka hai ring reng reng suh, min duhna i tilang ngam lo mai mai a nih kha," a ti hrawk a.

"Teuh lo mai, nang hi ka duh che anga maw? Ka pasal tur chu ka hmangaih tak leh min hmangaih tak tu ani tur a ni, nang chu i ni lo tlat," ka ti hmak a.

"Anih ka hmangaih che ti ta ila, min nei duh dawn em ni?"

Ka thin a phu nghal hlawp hlawp a, "Infiam nan min hmang reng reng suh aw, ka duh hauh lo ania,"

"Ka fiam lo che, ka ti tak tak, puitling kan ni tawh, nupui a neih che ka duh tak zet a ni," ka kuta vuan chung hian a ti a. A mitah tak ka en kar a, a mitmengah chuan fiamthu hmel reng a lang lo.

Min pawt hnai sauh sauhva, ka hmui nel thep mai pawrh deuh tarhah chuan min han fawp ta vawng vawng a, kei pawh chuan ka lo chhanglet rang kher mai, ka taksa a chul kual ruai a, ka kawrhak chhanah chuan ka hnute khawihin ka hnute hmur chu a hmet hrual nak nak a, ka lo rum hak mai. ka dul lamah a kut kal thlak tir zelin ka mal chhunglam a khawih tur chiah chu ka harh chhuak zawk mai a.

"Duhtawk rawh," ka ti tham chhal a, ka aw te chu a diklo zo vek, ka awmdan pawh. Ka zak kher mai, Nula awlsam lutukah min ngai ngei ang le.

Min thlah ve mai bawk a, ani pawh a insum nasa khawp mai, boruak a khamlo emaw tih mai turin a hip kawk kawk a. Reiloteah a inthunun leh thuai a, "Ka tihpalh lutuk, mahse nang nen hian kan inhip tawn hle a ni tih chu i hai bik ka ring lo. Ka hmangaih che ka tih kha ka sawi mai maiah ilo ngai ange. Ka ti mai mai lo ania, nangmah lo hi hmeichhe dang hetiang ema duh leh hmangaih hi ka la tawng ngai lo.I nu leh i pa lo haw hunah nupui a neih che ka dil ang," a ti duah a.

"A la hma lutuk, hriat pawh kan la inhre chiang silova..." ka ti bah nak a.

"Min la hrechiang chho zel mai ang, ka hmangaih che a, chu chu ka tan chuan a tawk. Zanin atan chuan ka haw phawt ange, naktuk zanah ka lo kal leh ang, chutah chuan i chhanna ka hriat ngei ka beisei," a ti leh a.

Kawngka thleng ka thlah a, a chhuah hma chuan min kuah pahin min han fawp leh vang vang a, "Tui takin mu ang che," tih pahin a chhuak ta nghal a.

A chhuak ta chu ka ruak nghal huaiin ka hria, Rp in min rawn hmuh chuan kawngka biang nghengin ka lo la ding reng chu niin, "I lungleng nghal ringawt elo!" tih pah chuan a nui hak hak a.

"Teuh lo mai," ka lo ti vat a.

"I hmelah a lang reng alawm, min han hrilh ve teh, enge thleng a? A duh che tih ka hria ania, chuan nang pawhin i duh ve thova, i pawm duh lo mai mai anih kha," a ti leh a.

"Ka hrethiam lo, ka duh tih chu ka pha lo alawm, mahse min fiam mai mai anih chuan nakinah keimah zawk ka la na dawn si a, ka inhlauthawng alawm," ka han ti veleh a.

"Nia, ka hrethiam lutuk che. Mahse a bum che ka ring lo, mi rilru nghet tak a niin ka hria,"

"Mu tawh phawt ang, naktuk zanah lo len leh a tum thu a sawi a, ka chhanna hriat a duh thu a sawi bawk a, ka rilru a buai anih hi," ka ti leh vat a.

"Hmm, nia, mu phawt ang, naktuk khua lo var se, a chhanna i hmu mahna le!"



*****************



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 2:11 pm

KAN TIAM TAWH SI...
Chapter - 8



Tunah chuan Maruata nen chuan kan inzui ve tak tak ta. Min ngaihsak em em a, a tello hian ka awm thei tawh lo ang tih tur hial khawpin ka thinlung hian a mamawh tawh ani. Kan thawhna a inang bawk a, nitin kan inhmuh bakah zanlamah kan inah a lo kal fo bawk a, ka nu leh ka pa awm lo mahse, Rpi nen ka khawhar hlauin min ngaihtuah dun reng țhin.

Vawiin hi ka nu leh ka pa te an lo haw ni a ni a, zantin phone a min rawn biak mai bakah an hman remchan apiangin min rawn be reng zel bawk a, ka nu nen phei chuan kan inngai em em a, ka pa aimah pawhin ka ngai tawh zawk. Maruata nena kan chanchinte chu ka nu ka hrilh a, min lawmpui rual rualin fimkhur taka kawm turin min fuih reng țhin.

"Bawihi, Dr Maruata chu ka hmu ve chak hle mai, nang meuh a hmangaih che chu!" ka nu chuan a rawn ti a.

"In lo haw hunah i la hmu dawn chauh alawm, lungngai suh," ka ti let ve nghal zat a.

Kan nui dun hawk hawk a, "Lo thleng vat vat mai rawh u, ka ngai tawh che u ania, dar engzatah nge in lo thlen ang?" Ka tih zawm leh a.

"Ka hre lo le, kawng te hi a chhe lutuk a, kan lo thlen har chu ka ring lo, anih ka dah phawt ange aw, kawngah chanchin kan rawn hrilh zel dawn che nia," tih pah chuan phone chu a dah ta a.

Keimahin ka nui ver ver a, ka nunah hian buaina lutuk ka la tawk ngai lova, ka nu'n min kalsan kha ka nuna buaina ka tawh chu a ni mai a, mahse ka pa ala awm tho a, ka la na lo mai pawh a, chubakah mi luhlul ngang hi ka lo ni ve bawk nen.

Ka duty zo duty rooma inthlak tura Rpi nen kan kal lai chuan ka phone alo ri ral ral a, ka han la vat a, ka nu phone a ni tih ka hriat chuan phur zetin ka han la a, "Hello," ka han ti a, mahse ka nu alo ni hauh lo mai, midangin min lo chhang a, "Ka biak mek hi tunge ni aw? He phone neitu hi i hria em ni?" Hlauhthawnna in ka khat nghal a.

"Aw, ka nu ania, ka pa nen an ni a, an țha em?" ka ti thei hram a.

"He phone neitu te hian accident an tawk a, i pa nen a hmunah an boral nghal ani, tunah damdawiinah postmortem turin an kalpui chiah e," tih pah chuan an kalpuina damdawiin hmingte min hrilh hnu chuan phone chu a dah ta a.

Ka phone ka thlauh tawp a, ka țhu hnawk a, Rpi chuan mangan hmel deuh hian, "Enge ni a?" a rawn ti vat a.

"Ka.....nu......leh......ka.....pa an......accident, a hmunah an boral nghal anih chu," tih pahin ka țap nghal hawm hawm a.

Rp chuan min rawn kuah nghal vat a, keilah chu ka insum thei tawh lo, ka â vek maiin ka hria. Ka hamhaih a, awmngaihna reng ka hre lo, ka nu(tak tak) boral pawhin hetiang em hian ka la awm ngai lo, a ruala nu leh pa chân chu ka tan vanpui a chim a ni ringawt mai. Kan thawm hriain an lo tlan khawm a, Dr Maruata pawh a rawn thleng ve vat a, kal dan tur rem a ruat zung zung a, a awm lovang tih ka va han hlau tehreng em!

Maruata car ah chuan Rp nen kan chuang dun a, midang chuan min zui ve an duh hle nain, duty an țhulh thei silova, tuarpuina mij hlan mawlh mawlh hlawm nain a engamah pawh chiangkuangin ka hre hlawm lo, ka thluak a mang vekin ka hria, chutia kan tlan lai chuan ka phone a lo ri leh a, ka phu zawk a, kan en chuan ka nutei a lo ni a, "Mambawih, i nu leh i pa chanchin ka lo hria a, hei, kan chhungin kan lo kal ania, lo lungngai reng reng suh aw," tiin min rawn hnem a tum ve nasa mai. Mahse kei lah chuan ka lo țahkhum nasa sauhva, Rp chuan min kuah chawt a, 'ka nu, ka pa' tiin ka thinlung hi a țap vawng vawng mai a ni.

Damdawiin min hrilhna hmun kan thlen chuan ka patea te ho pawh an lo kim țhap tawh a, kan han inhmu chu ka țap hawm hawm mai a, "Pate, nâ ka van ti tak em! Ka nu leh ka pa hian min kalsan thei lovang, ka phal lo, an hmel hmuh chakin ka lo nghakhlel ve em em a, engatinge....an chungah hetiang hi a thlen? A ni thei lo.....! Ka țap vawng vawng mai.

Ka patea te pawh chuan sawi tur reng an hre lo, an ngui nghiai a, min en reng ringawt a, " Khawiahnge ka nu leh ka pa chu an awm? Ka hmu duh ania.

Ka patea chuan, "An zo țep ang, hetah hian kan lo nghak anih hi, engmah tihtheih kan nei tawh lo ani," tih pah chuan a mittui a hru zauh a. A inti pachang hram hram ani.

Ka bulah Maruata leh Rp in min awmpui reng bawk a, ka nu leh ka pa ruang chu an rawn nawr chhuak ta a, ka hmuh veleh chuan an chungah ka bawh thlawp a, "Ka nu, ka pa, engatinge in fanu hi keimah chauhva awm tura min kalsan? Tinge min lo hruai ve mai loh? Min kalsan hi ka phal lo asin....." ka mittui a luang zawih zawih a, midang lo awm ve te pawh ka zah zo tawh lo. Ambulance ah ka nu leh ka pa ruang chu an dah a, an kianga awm ka duh tlat vangin ka chhungte ho leh Rpi nen kan chuang a, kawng tluanin ka țap a ni ringawt mai, ka taksa pawh chau vek tawh. Maruata erawh chu a motor khalh a ngaih avangin kan bulah a lo chuang ve thei lova, min ngaihtuah hle nain, Rpi a awm tho bawk a, a ngaih pawh a țha deuh hlek.

In kan thlen chuan ka taksa chau lutuk chu min pawm lut ringawt a, ka țap bang thei lo. Paukhauh ka lo intih ve na te pawh vawilehkhatah tihchhiatin a awm ta vek niin ka hria, tun ang renga hetianga natna ka tawrh hi ala awm ngai lo. Ka taksaa chakna awm ve zawng zawng te kha khawiahnge an awm zawh tak ni tih tur khawpin ka nâ ani. Ka kehchhe vek ni berin ka hria.

Ka nu leh ka pa chu he leia an taksa hmu leh tawh ngailo turin kan thlahliam ta, ka țap nasa lutuk, mittui tla tur ka neih tawh loh thlengin ka țap a, a tawpah phei chuan țah pawh ka țap thei tawh lo. Ngawi rengin ka awm a, ka en ngai ka en tlawk tlawk a, mi â ang maiin ka awm a, min biak pawhin chhanna chang reng pawh ka hre tawh lo. Min kuah ang angin ka awm a, ka zawi ngawih ngawih a, Rp leh Maruata ngaih a țha thei lo, englai pawhin ka kiangah an awm a, an pahniha an theih loh pawhin pakhat talin min awmpui chawt. Ka patea te pawhin min ngaihtuah em em a, ka nutei te chhungkua lo kal pawh ka ngaihsak thei lo, lo ngaihsak a, lo buaipui tu tur zawk si kha, ngaihtuah ngai zawk leh buaipui ngai zawkin ka awm ta miau si a.

Chutianga buaipui ngaia ka awm hun chhung chu kei chuan engmah ka hre lo, ka han harh chhuah meuh chuan ka nu leh ka pa vui zan ațang khan tho miah lo leh chaw leh tui pawh in miah lovin nithum chhung ngawt mai nikhaw hre lovin khumah ka lo mu chu niin, ka hawi kual chuan drip khaina ka hmu bawk a, mak ka ti ngei mai. Kei hi engtinnge ka awm le?

Ni thum ngawt nikhaw hre lova ka mut lai khan ka lo tal buai hle aniang, a hnu a min hrilh leh danin, ka nu leh ka pa ka lo au vak vak a, a chang leh ka lo nui vak vak bawk a, ka nuih vak vak hnuah ka lo țap leh vak vak a, min chelhbeh zawh loh khawpin ka lo tal chiam ani awm a, min lo buaipui hle a lo ni.

Tunah chuan ka harh ta hle mai, mahse ka nun hi a ruak ngawih ngawihin ka hria. Tun ațang chuan keimaha ka khawsak a ngai dawn ta si a, ka patea te, ka nutei(ka nu nau) te chuan min ngaihtuah em em a, Ka thawhna hospitalah chawlh min lo dilsak tawp a, ka nutei phei chuan an hnena reilote awm lawk tura min hruai a duh hial a, kei pawhin ka hnial lem lo, intihharh ka mamawh tih ka hria a ni. Ka nu leh ka pa boral chuan ka nun an thlak hlawk ni mai awm hian a hmaa ka nundan kha ka pha ta hauh lo mai. Ka nun ngaia let leh tur chuan hun ka mamawh rei ngei ang le, nula harh veh vawh ni țhin kha tunah chuan nula zawiawi lutuk tak mai ka ni ta ringawt.

Ka nutei te awmna hmunah chuan reilote awm turin an rualin ka kal ve ta a, min ngaihsak em em a, Dr Maruata pawhin ka tana țha tur leh ka nunin ngai a awh leh theih na anih phawt chuan inngaizawngin min enkawl inhuam hle mahse mite hmuha a mawi dawn loh avangin ka kal chu a remti ve tho mai.

Ka nutei chuan fapa keimah ang rual vel hi a nei a, a hming chu Lalthanpuia a ni a, 'Mapui' tiin an ko țhin. Kei aiin kum hnihin a upa zawk a, ka hrehawm a hlau in min ngaihsak em em a, keipawhin nuam ka tih phahin ka lunglen hnemtu ber ani reng bawk a. Khawi hmunah pawh kal ila kan inzui a, ka tellova khawi ilo chhuah vah a duh lo tawp, min hruai ve theih lohna hmunah chuan a thiltih tur pawh a țhulh hmiah mai zel. A chang chuan ka hau ve fo țhin. "Nang leh kei hi chuan unau pianpui kan nei lova, chuvangin ka unau neihchhun leh ka venhim tur i ni, i rilru tinatu apiang chu ka hmachhawn zel ang," a ti tawp.

Kei pawhin ngawi rengin a thu zawmin ka awm phah țhin. Amah avang liau liau hian ngai ka awh leh phah. A chungah pawh ka lawm hle a ni.

Tunah chuan ka nun pawh a hlim veleh tawh takzet. Maruata pawhin nitin min rawn phone a, min ngaihthu a rawn sawi reng mai a. Kei pawhin zep lovah chuan ka ngai takzet ani. Ka hmu chak em em a, mahse ani lah a hnaah a buai em em si a, keilah haw an la phal bawk si lo nen, haw ka chak rual rualin ka huphurh hle bawk a, kan chhungkuaa kan chen hona, keimaha kan awm tur chu min ngaihtuah em em si a.

"Bawihi, i hna hi bansan mai rawh, i pa pension i patea ten an buaipui bawk a, i nu lahin a hnutchhiah hnem tho si che a, hnathawh pawh i ngaih tawh loh hi," ka nutei chuan a han ti a.

"Nute, i sawi dik khawp mai, mahse hna ka thawh hian ka rilru kalding lutuk tur hi a veng alawm," ka han ti ve a.

"Nurse kher thawk lo hian hna te chu a awm reng alawm," ka nutei chuan a han ti leh hram a.

"Eng hna maw? Ka tuina ber ani bawk si a." Ka han ti ve leh a.

"Ni khawp mai, mahni tuina zawng thawh hi chu a nuam alawm, mahse i hah lutuk anga, kan ngaihtuah che alawm, pasal neih hi ngaihtuah mai rawh." A ti leh a.

"Nute.... ka nu leh ka pa boralna pawh a la rei lova, pasal neih lam chu sawi ri tawh suh, ka la duh lo," ka ti hmak a.

Ka nute lo haw hunah Maruata nena inhmelhriattir ka tum te kha ka hrechhuak uar uar a, ka mittui a rawn tla ta zawih zawih a.

Chuveleh ka nutei chuan min rawn kuah vat a, "Bawihi, pawi ka ti lutuk, min ngaidam rawh, i rilru natna turin ka sawi lo asin, nangmah hmangaih taka enkawltu tur che neila ka duh alawm," a han ti vat a.

"Nute, ka tihpalh, ka nu leh ka pa ka ngaihtuah chhuak thut alawm le, an lo haw dawn khan kan inbia a, kan inbiakna ka ngaihtuah chhuah vang ania, ka mittui hi ka dang zolo leh țhin a," ka nutei inthiamlo hmel ka hmuh chuan ka han ti vat a.

"Nute, hmangaih deuh mai ka nei a, ani pawhin min hmangaih lutuk, amah pawh i hria ang, ka nu leh ka pa boral laia min buaipui em em tu doctor kha a nia, a hming pawh i hre hial ang chu, ani nen khan thu 'Kan tiam tawh' a, ka nu te lo haw hunah inhmelhriattir ka tum a, mahse an inhriat hmain an boral ta mai si a," tiin ka nutei chu engkim ka hrilh ve ta vek a.

"Anih chu mawle, amah chu ka hria alawm, nikhaw hre lova i awm chhung khan a buaipui char char che alawm, i țhiannu Rp nen khan, an hnaa an kal zawh veleh an lo kal nghal a, zankhuain an awmchilh che alawm, anmahni avanga hetianga awm leh thei hi ini asin, an chungah pawh ka lawm lutuk. Kha doctor khan amah a inhmangaih ai pawhin a hmangaih zawk che in ka hria, a lakah khan bat kan ngah khawp mai,"a ti duah mai a.

"Ka lo hre hauh hleinem, kan inbiak leh veleh lawmthu chu ka lo sawi ange," ka han ti ve a.

Ka nutei nen chuan kan inkuah vawng vawng a, tunah chuan ka hlim leh tawh viau, mal em em turah ka inngaih laiin ka mal loh zia ka hre leh uai uai a.

Ka pate an min rawn bia a, ka pa pension pawh an tihfel tawh thu min rawn hrilh a. "Bawihi, i țha maw? Lo haw ve tawh la, kan ngai ve tawh che alawm," min rawn ti a," a rawn ti a.

Ka patea hi ka pa u chiah a ni a, an unau rau rauvah ani hian mi duat leh zual a, ka tet zual lai ațangin fanu an neih loh vangin a fanu ang chiaha min en tu a ni bawk a. Kei pawhin ka pa tih lovah chuan ka ngaina ber.

"Kei pawhin ka ngai tawh lutuk che, ka lo haw thuai ang, tunah chuan ka țha tawh lutuk e, min ngaihtuah suh aw..." ka han ti ve a.


Thlakhat lai ka nutei te bula ka awm hnu chuan kan chenna lam pana haw ka tum ve ta a. Ka u Mapuia'n min thlah paha ka bula reilote awm a tum ve a, ka lawm kher mai.

Ka nutei nen chuan kan inkuah vawng vawng a, "Bawihi, inenkawl țha ang che aw, chanchin min rawn hrilh zel ang che," a ti a, ka hmuh loh turin a mittui a hru zauh zauh a.

"Tehreng mai, ka ngai ngawt ang che, heta ka lo kal hi ka lawm lutuk ringawt, ngai ka awh leh phah si a," ka han ti ve a.


"Kan kal tawh dawn em ni? Motor pawh alo thleng e," Mapuia chuan a ti a.

"Awle," tih pah chuan motor ah chuan kan lawn a, mittui nen ka nutei nen chuan kan inthlahliam ta a.


Tunah chuan ka nu leh ka pa te nena kan chenhona kan thleng leh ta, ka mittui chu dan kir ka tum hram hram a, ka haw tur thu ka patea te, Rpi leh Maruata ka hrilh vek a, min lo chang țhap mai, kan thleng chu min lo lawmin min lo kuah chung chung hlawm a, inchhungah kan lut ho ta a.

Kan thleng dawn tih ka hrilh lawk avangin chaw eikhawm nghal an lo rawt alo ni a, rawng te an lo bawl vek a, ka han hawi vel a, ka nu leh ka pa sulhnu a tam mai, ka mittui tla tur ka dang hram hram a, ka roomah chhovin Maruata leh Rpi chuan min zui chhova, khumah ka țhu hnawk a, Maruata chuan min rawn kuah vat a, Rpi chuan, "Inhnuaiah ka lo zuk chhuk ange," tih pah chuan kawngka khar in a chhuak ta nghal a.

"Ka ngai lutuk che, ka hmangaih bawk che, i tello chuan ni a rei lutuk," tih pahin min han fawp vang vang a.

Kei pawh chuan ka lo chhang țha kher mai, "Kei pawhin ka ngai lutuk che, ka hmangaih che," ka han ti ve a.

"Anih tunah hian thu tiam dun ang, tunah chuan i nu leh pa boralna ala rei loh em avangin ka nghak rih ang che, mahse min nghah rei tir suh ang che aw, i tellova awm chu ka zuam lo ania, min tiam rawh," a han ti a.

"Ka tiam a che, ka nu leh ka pa lung ka phun zawh hunah pasal ah ka nei ang che, thihna in min țhente anih loh chuan," ka han ti ve sap a.

Kan pahnih chuan thu kan tiam dun a, kan infawp leh vang vang a.

"Inbual phawt la, i inbual laiin hetah ka lo nghak ang che, chuan inhnuaiah kan chhuk nghal dawn nia, engemaw sawi ka duh dawn a," a ti leh a.

"Awle, kan inbual ange," tih pah chuan bathroomah ka lut a, ka inbual zawha ka chhuah chuan tukverh lam hawia alo ding vang vang chu ka hmu a.

"Enge i ngaihtuah a?" Ka han tih chuan alo hawi vat a, a hmelah chuan engmah a lang lo nain a rilru tibuaitu a awm ani tih ka hmu thiam mai. "Lehlam hawi lawk ta che, kan inthlak lawk ange," ka tih chuan a hawi ve mai bawk a, ka inthlak ta sawk sawk a.

Ka inpeih hnu chuan, "Chhuk ang hmiang," tih pah chuan kawngka lam chu ka pan nghal a, Maruata pawh chuan ngawi rengin min zui ve mai bawk a.


*********************

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 2:11 pm

KAN TIAM TAWH SI...
Chapter - 9



Inhnuai lamah chuan Maruata nen chuan kan chhuk dun a, sitting roomah an lo țhu țhap hlawm a, Maruata chuan engemaw sawi tur a neih thu alo hrilh tawh hlawm a ni ngei ang, kan thlen chuan min lo en deuh țhap hlawm mai.

Maruata chuan, "Aremi nen hian in neih kan duh a, kei chuan a ranglama inneih mai hi ka duh a, mahse Aremi hian a nu leh a pa lungphun zawhah a ti ve tlat si a, kan lo tiam dun tawh bawk si a, ka nghak leh mai aniang chu," a han ti a.

"Ni e, tunah chuan thla khat emaw chauh ala ni a, ala hma ve deuh em anih chu, hunte chu a liam ve zung zung zel alawm," Ka patea chuan a han ti ve a.

Min lawmpui rual rualin ka nu leh ka pa kan ngaihtuah chhuak hlawm lo thei lova, hmeichhe ho chuan kan mittui an hru leh sap sap țhin a.

Ka patea chuan, "A zuau zawnga thil hi lak loh hram a țha, inti pachang hram hram ang u, hlim taka awm turin Aremi hi ka naute nupa hian an duh ngei ang, chuvangin a hlimlo zawng chuan engmah i ngaihtuah tawh lo teh ang u, kan tana Pathian ruat hi pawm thiam i tum hram hram ang u," a han ti leh a.

Chawhlui kil ho tur kan ni bawk a, chhungkuain Pathian hnena inhlanna te kan neih hnu chuan hlim takin chawhlui kan kil ho ta hlawm a, kei pawhin ka patea sawi kha a dik ka ti khawp mai, lungngaia indawm kun reng hian engmah min thlen lo, chuvangin a nih tur ang ani vek tawh a, ka tuar lo ani lo, mahse pawnlama ka tihlan chiam khan awmzia a neilo a ni.

Ka intih paukhauh loh chuan engtikahmah hmalam ka pan thei ngai lovang.

Ka hna pawh ka chhunzawm leh thei tawh a, Mapuia chuan min la awmpui zel pahin nitin chhuakin hnathawh turte a dap ve reng a, a tawpah chuan a thawh tur tak niawm hna a hmu ve ta hlauh mai a. Ka bulah a la chen ve reng theih dawn avangin ka lawm kher mai.

Tunah chuan ka țha tawh takzet, ka nu leh ka pa boral hi engang pawhin tuar mahila, keimah bak ka inti chhe dawn lo tih ka hrechhuak a, ka hna hian kawng engkimah min pui em em a, hunawl ka nei vak lo bawk nen a chang chuan lunglen pawh hriatloh chang ka ngah tawh ani.

Maruata nen pawh buaina awm lovin kan inkawp ve zel a, min hmangaih ang bawkin kei pawhin ka hmangaih a, zantin kan inah lo lengin ka hlim loh a hlau hle țhin, hetiang ang em em a min ngaihtuahtu ka nei hi ka lawm hle rualin ka nu leh pa min hriatchhuahtirtu a ni fo țhin. Tunah phei chuan ka ngaiin ka thlahlel ngawih ngawih tawh a, min phatsan ta se engtinnge ka awm ang le? Ngaihtuah pawh ka ngaihtuah ngam lo zawk.

Nitin hnaah kalin Maruata nen chuan kan inhmu ziah a, kan inhmuh tawh phawt chuan Rp lah hi a lo inthiarfihlim nghal vat zel.

"Ka nu leh ka pain hmuh che an duh a, tlaiah chaw ei nghal turin lo hruai ang che min ti a, i hman angem?" Maruata chuan a han ti a.

"A va zahthlak awm ve a, i nu leh i pa chuan min hmuh hunah min lo duh lo ta se....."

"An duh em em ang che, lungngai reng reng suh, ka awm alawm, min ring mai rawh," a ti leh a.

"Chuti anih chuan ka la hmuh a ngai dawn tho tho si a, hmu vat ila a țhat zawk dawn chu. Mapuia phone a ka hrilh a ngai ang," ka han ti let ve a.

Ka hnial a lo beisei deuh a ni ngei ang, ka lo hnial ta silo a hlim lutuk chu min pawm thut a, min kuah vang vang a, a hmuiin ka hmui a rawn chuktuah nghal chawt a, phur takin ka lo chhanglet nghal vat a, thawchham lek lek in kan infawp mawlh mawlh a, kan infawp zo chu kan thaw a rang dunin kan thaw dun halh halh mai a, a chalin ka chal a siktir a, "Arem, innei tawh mai ang hmiang, ka insum nasa lutuk hi ka na vek tawhin ka hria," a ti ta mai a. Hnuailam kan bih chu a kap zawn chu alo kawh lah mai a, ka sa pup pupin ka hria.

"Hengte chu nupa kar chauhva hman tur a ni a, chuvangin inneih hunah chauh kan hmang ang," ka ti tham chhal a.

A khi suk a, "Engtia rei nge min tawrhtir i tum a?"

"Lo nghak hram hram phawt teh, a hun chu alo thleng ve em em ang," ka ti ve leh a. Ka tawlhsawn nghal a, ani pawhin min thlah ve mai bawk.

"Tlai banah min lo nghak ang che," tih pahin a chhuak ta daih a.

Maruata nu leh pa hmuh chu ka hreh ngang mai a, mahse Maruata ka hmangaih a nih si chuan ka hmuh ngei chu a ngai bawk si a. Thawk kan la ham ham a, chutihlai chuan Rp chu alo lut a, "Țhiannu, engkim a țha maw?"

"Aw, țha ani mai, Maruatan a nu leh a pain min hmuh duh thu a sawi a, ka huphurh lutuk alawm mawle," ka han ti a.

"Maruata pa chu pa țha lutuk a ni tia an sawi chu ka hria a, anu erawh hi chu a khirh ve deuh a, bakah an zawlpui lo chu mo atan a duh lo an ti a, mahse mi sawi mai ania ka hriat, ka hrechiang bik lo ania," Rp chuan a han ti ve a.

Ka hlauhthawnna hi a thleng dik ang tih ka hlau kher mai. Rp thu min hrilh hnu ațang phei chuan a nute hmuh chu ka huphurh leh zual. Ni e, kei chu tunah chuan fahrah mai ka ni tawh a, anni chuan mo atan min duh hauh lovang le! Sum chu ka ngah ve tawk nain anni lakah chuan engmah ka ni chuang lo.

Mapuia ka phone a, tlaia ina chaw ka eiloh tur thu leh ka scooty hospital kawta ka dah chu min hawnsak mi turin ka hrilh a, a lo hrethiam ve mai bawk a.

Tlai banah chuan Maruata nen chuan an in lam panin kan tlan ta nghal a, ka hmelah ka huphurhna a lang ani ngei ang, ka kut la in min humsak vang vang a, "I huphurh ani tiraw, i huphurh ang em em chu a ni lovang," tiin min hnem ve mawlh mawlh nain, kan thleng anga, ka hre mai dawn si a.

Maruata te in kan thlen chuan an in chu a ropui ngei mai, ka phu loh zia ka hrechiang kher mai, a nu pawhin an zawlpui mo atan a lo duh pawh chu a awm ka ti hluah hluah, ka thawhna hospital neitu an ni bawk a.

Gate kan tlanluh chuan kawtah a motor a dintir a, inchhungah chuan ka kawnga kuah chungin kan inzui lut a. A nu leh a pa chu inkawmhona roomah an lo awm a, ka zam lutuk chu ka khur der der mai. A pa chuan min lo lawm thiam hle mai a, chibai te min buk a, a nu erawh chuan min hmu chu a lawm vak lo a ni ngei ang, țha tak chuan min chibai ve nain, a mitmengah chuan lawmlo hmel hi a pu a, nuam lo ka ti kher mai.

"In lo thleng ta maw? Lo țhu rawh u, chaw ei nan ala hma bawk a, kan inkawm rih aniang chu," Maruata pa chuan a lo ti bawrh bawrh a. Ka nêl zawng tak a ni.

"Aremi maw i hming ni a?" Maruata nu chuan alo ti vat a.

"Aw ni e," ka lo ti ve a.

"I nu leh i pa boral thu kha kan lo hre ve a, pawi ka tihpui khawp mai che," a ti nain a țawngkam chuan a mitmeng a thleng phak lo kher mai.

"Mama, Mawitei lo thlen kha i hria em?" ka hriat loh a hlau hle a niang.

"Hre nang, engtikah nge alo thlen a?" Maruata chuan a han ti let ve a.

"Vawiinah alo thleng a, tlaiah chaw ei tura rawn kal ve a tum a, ka lo 'aw' mai asin." Anu chuan a ti leh a.

Maruata chuan ka kutah a hmer nghet sauhva, enge thleng ta hi le?

"Engvanginnge 'aw' ilo pawh ringawt a, 'Aremi' ka rawn hruai dawn tih pawh i hre reng si a, Aremi hi nupuiah ka nei dawn ani." thinrim takin a nu hnenah chuan a han ti a.

"Aremi i tawn hmain Mawitei hi i nupui turin kan sawifel vek tawh kha, engmah sawi tur a awm tawh lo, hetiang nu leh pa pawh neilo hi mo atan ka duh lo, chuan kan hospital ațang hian ban tir ang che," a ti ta hmiah mai a.

Maruata pa chuan, "Nu i, insum deuh teh, Aremi tan a nuam lo ange," a han ti ve a.

"Lo inrawlh ve lo mai rawh, ka fapa hian kan thu a zawm tur ani ringawt, i thu i tih tlang ngam țhin loh vang hian alawm i fate pawhin i thu an zawm ngai loh ni," a ti hmarh hmarh a, Maruata pa chu a ngawi hmak mai.

Ka zak lutuk hi khuk ral theih nise chuan ka khu ral daih tawh ngei ang. Ka kun tlawk tlawk a, thawh lawka chu in ațanga tlanchhuah daih mai chu ka duh hial a, ka rilru hria niawm takin Maruata lah chuan ka kutah min chelhbet tlat mai si a. Nu leh pa ka neih loh hi ka thiamloh ani em ni? Hetiang ema inhmuhsitna hi ka la dawng ngai lo.

"Ka fapa hi pasala neih beisei suh ang che, a nupui tur kan hual vek tawh," min han tihkhum leh chiah chuan ka zak lutuk chu Maruata lam pawh ka ngaihtuah thei tawh lo, ka tho vat a, in ațang chuan ka tlanchhuak nghal a, ka theihtawpa chakin ka tlan a, ka mittui a tla zawih zawih bawk.

Maruata min umzui pawh ka ngaihsak thei tawh lo, ka bulah chuan taxi a lo tlan hlauh a, ka lo phar a, rang lutukin ka țhu lut nghal a, taxi driver chuan mak tih hmel deuhin min en hau a, "Tlan vat rawh," ka ti a. Taxi driver pawh chu a tlan ve mai bawk a, ka mittui tla chu ka hru seng thlawt lo, khatiang em ema ka zahna kha min hmuhsitna ang kha ka damchhungin ka tawng leh tawh lovang.

Mi vanduai tak chu ka va ni em! Ka thinlung hi a rum vawng vawng mai ani.

Driver in kan in awmna min zawh chuan ka hrilh ve mai a, min biak lumlam pawh a tum bik lem lo, ngawi rengin a khalh ve mawp mawp mai a ni.

Kan in ka thlen chuan driver hnenah chuan ka chuan man ka pe a, a tlanliam leh ta nghal mai a. Inchhunga ka luh chuan Mapuia chuan maktih hmel zet hian min lo en a, ka hmelah chuan engmah zawh chi ka nilo tih a hre nghal mai a, ka roomah lutin khumah ka bawk thlawp a, ka insum thei tawh lo, ka țap nghal zawih zawih a.

Kawngka inhawng ri ka hriat chuan ka hawichhuak vat a, Mapuia chu kawngka biang nghengin alo ding reng a, engtia rei nge a din a, ka țap chu min lo thlir tawh ang tih pawh ka ngaihtuah peih lo.

"Tinge Arem, iva lo haw hma ve a, thil diklo thleng a awm ani tiraw? Engkim zep lovin min hrilh vek rawh," tiin chik zetin min han en a.

Kuah thlawp pahin Maruata nu min tihdan chu ka hrilh ta vek a. A ngawi reng a, a inhumruh danah chuan a thinrim a insum hle tih a hriat mai. Ka hnungzanga min chul heuh heuh chungin min hnem malh malh a.

"An hospitala thawk tawh lo turin min ti bawk a, ka nu leh pa kha ka duh vanga chan pawh ka ni lo asin, khatiang em ema min hmusit kha nâ ka tiin ka zak ngawih ngawih a ni." Ka han ti ve leh sap a.

"Chutia an ban che chuan i thawk tawh lovanga a ni mai alawm, i duh chuan hna pawh thawk lovin i awm thei lutuk alawm, mahse nangmahin hnathawh i duh tlat avangin kan remti lo chung i thawk a, i hlimna tihchhiat sak che hi kan duh si lo a ni."

"Mapui, kan venga awm reng pawh ka chak tawh lo. I nu bulah awm ila, hnathawh tur ka zawng leh mai ang, anih loh pawhin ka nu in kha ka luah mai ang, heta chen hi chu ka zuam tawh hlawl lo a ni e." ka han ti veleh a.

"Ka nu kan be dawn nia, a remti lutuk ang," Mapuia chuan a ti leh a.

"Nia, ka patea te pawh ka'n hrilh ve ange," tih pahin ka phone chu ka bag ațang chuan ka phawrh chhuak nghal a.

"Pate, zanah in hman chuan lo leng phei lawk teh u aw," ka va ti a, mak pawh an ti mai thei, mahse pawi pawh ka ti tawh lo.Ka nutei pawh ka'n hrilh nghal bawk a, ani pawh chuan tihvak ngaihna a hre rih lo, ka thu thu-ah a dah tawp.

Tlai chaw ei hman lo a tlan haw ka ni bawk a, Mapuia nen chuan chaw kan ei dun a, ka rilru nat em avangin ei pawh ka ei tam lo, mahse chaw ei loh ka nu leh ka pa in an phalloh avangin tlemte chauh ka ei a, ka lem thei thlawt lo.

Ka kham vat a, chutihlai tak chuan kan doorbell lo ri ral ral ah chuan ka patea te an nih beiseiin kawngka chu ka va hawng a, ka beisei loh deuhvin Maruata alo ni a, kawngka khar leh mai ka tum chuan alo pawt vat a, a kalna tur ka kian ve mai bawk a.

"Enge ilo tih dawn?" Ka ti hmak a.

"Arem, ka tihpalh lutuk, ka nu kha khatiangin a awm ang tihngaihna ka hre bik lo a ni. Ka nu avangin min ngaidam dawn nia aw,"

"Ni love, khatianga inhmuhsitna kha chu ka tuar thei lo ani, A reng rengah nupui hual nei siin engvangin nge min neih i tum a, kal la, i nu duhthusam leh in zawlpui chu nupuiah nei ang la, Min tibuai tawh suh ang che." Kha zetin ka han ti ve a.

A hmela rilru natna lo lang chu hmu duh lovin lehlam ka hawisan hmak a.

"Arem, ani kha ka hmangaih lo a, ka hmangaih ngai bawk hek lovang, nangmah chauh hi ani ka hmangaih chu."

"I hmangaih emaw hmangaih lo emaw ka pawisa tawh lo, nang nena inneih hi ka duh lo, min hmusittu te bulah chuan engtikahmah ka cheng thei lovang, chubakah lo innei pawh ni ila kan hlim chuang lovang, chuvangin ka hmel hmuh pawh tum leh tawh ngai suh ang che, kei paw'n he khua hi ka chhuahsan dawn," ka ti leh hmak a.

"Arem, hetianga rilru na hian min kalsan i tum amaw? Kei chuan ka hmangaih che asin."

"Kei pawhin ka hmangaih che alawm, mahse ka nu leh ka pa boral kha ka duh vang ani em ni? I nu khan khatianga min hmusit tur khan a lakah enge ka tih a, i nu min hmuhsit chhung chuan nang nen hi engtikahmah ka nei ngai lovang che. Chuan ka hna ațanga bang turin min ti bawk a, bânna pawh ka thehluh hran a ngai lovang chu tiraw!" Ti el zet hian ka tih khum a.

Ka rilru a nâ a, Maruata pawh a rilru a na tih ka hria, mahse a nu min hmuhsit theih lohna turin ka dinhmun ka siam phawt ang, chumi hunah chuan he khuaah hian ka kir leh ang. An ni chuan hospital an nei a, anmahni an hausa hrim hrim bawk a, an el phak lohin ka awm thei, ka tum bawk ang. Sum ka ngah ve tawk alawm, ka nu in min hnutchhiah kha pakhatmah khawih lohvin bank ah a la awm a, ka pa pension pawh a tam thawkhat ve alawm le, ka chapo pawh in ti mai thei. Mahse mi hmuhsit nih hi ka duh ngai lo. Mi sehhel tak ka nih kha.

Maruata chuan rilru nat hmel zet hian min en tlawk tlawk a, luhlul min tih hmel tak zet. Pawi pawh ka ti lo, "Khawngaihin min chhuahsan mai ta che," tih pah chuan kawngka ka hawng a, reife min en leh vang vang hnu chuan a chhuak ta a.

Kawngka ka khar a, kawngka ngheng chuan mitchhing chungin ka ding vang vang a, ka mittui a tla zawih zawih a, khatianga na khan țawngkhum ka duh bik lo, mahse kei min kalsan theih nan leh a nu duh ang nupui a neih theih nan na taka ka țawngkhum a ngai si a.

Ka darah chuan Mapuia chuan min lo vuan a, ka han men chuan mittui tla chung hian ka melh a, min khawngaih hmel ka hmuh chuan ka insum zo lo, ka țap chhuak hawk mai a, "In sum reng reng suh, țap bawrh bawrh rawh," min ti a. A awm ah beiin ka țap a, ka thawl hawkin ka hria.

Choka ah ka lut a, Mapuia chuan alo ti fel vek tawh alo ni a, ka tan hi chuan a va han fel tak em! Ka û a lo ni hi chu ka vannei hle ani. Ani hi awm lo se chu ka tawrh theih ka ring lo.

Zan dar 7 vela ka patea te an lo thlen chuan, sitting roomah kan țhu khawm a, ka patea chuan, "Bawihi, enge min koh nachhan ni a?" a han ti a.

Kei chuan thil awmdan ka hrilh vek a, inneih kan tum pawh ka duh loh thu hrilhin hmundanga kal bo lawk ka duh thu ka han sawi chuan min hrethiam takin, "I thu thu alawm, mahse in in hmangaih tawna Pathian ruat in nih chuan in la intawng leh ang, keini chuan i thutlukna apiang kan pawm a, mahse thutlukna i siam hmain inngaihtuah fim hmasa țhin ang che," min duhsak takin a han ti a.

"Ka awmloh chhungin in hi Mapuian min lo nghahsak pahin min lo enkawl sak dawn a, naktukah kal mai ka tum si a, ka kal hma leh ka tan a țha a ni mai," ka han ti leh a.

Ka patea te chuan ka thutlûkna ang ang chu hnial lovin an pawm vek mai a, ka duh chuan an hriatloh pawhin ka kal thei reng, mahse ka chhungte tia sawi tur ka neihte an ni a, ka thu an hnial dawn lo tih hre mahila hrilh hriat ve hrim hrim ka duh ani, hrilh lo pawh ni ila, min hrethiam tho ang, ka hrilh avangin lawm pawh an lawm, min ngaihtuah tih pawh ka hre reng, nula ka ni a, ka luhlul zia pawh an hria. Mahse a sual zawngin ka awm ngai lo bawk a, min ring em em bawk a ni. Engmah thilțhalo ka ngaihtuah lovang tih an hre bawk.

"Anih leh Bawihi kan va haw tawh ange aw, tluang takin i kal dawn nia,"tih pahin ka chalah mi fawp zauh va. A mittui tla sawk pawh ka hmu hman.

Zan ka mu chu ka rilru a vak kual nasa ngei mai, he ka thiltum hi ka puitlin thei angem aw? tih ka ngaihtuah neuh neuh a, ka nu leh ka pa chu la dam se chuan hetiang ema hmuhsit hi ka tawng lo tur. Ka hmangaih ber pawh ka kalsan a țul phah si a.

Tun ațang chuan mipa reng reng ka inhnaih tir tawh lovang, Maruata nen kan innei theilo anih pawhin ka thutiam ka vawng reng mai aniang chu. Ani chuan nupui a nei mai anga, helaia ka awm reng chuan kan inhmu leh fo awm si a, ka hmu ngam dawn lo tih ka chiang sa reng mai.


*****************

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 2:11 pm

KAN TIAM TAWH SI...
Chapter 10


Mizoram chhuahsanin Delhi ah kum nga lai mai ka awm ve ta reng mai a, ka phone number ka thlak hmak a, ka chhungte bak tumah ka number ka pe lo. Chanchin ka hrilh khât khawp mai, ka bia a nih loh chuan min be fo lo turin ka hrilh a.

Delhi ka thlen tirh chuan ka buai khawp mai a, mahse rei ka buai lo, English leh Hindi ka thiam bawk a, harsatna nei miah lovin mahni ka inhai kaw ve thei zel a, vaiho zingah chuan awmdan thiam har ka ti khawp mai. Karkhat chhung nurse hna ka thawhna tur ka zawng a, Hospital pakhatah nurse hna a dil theih tih ka hriat veleh ka dil ve nghal chawt a, diltu an awm ve nual mai a, ka huphurh ang reng khawp mai.

Mahse ka rinloh leh ka beisei loh deuhin interview naah ka tling ve hlauh mai a, ka lawm ngei mai. Ka tlin ațanga ni thum hnuah hna ka zawm nghal thei dawn bawk a, a hlawh pawh a țha khawp mai. In ka thlen chuan ka chhungte ho bia in chanchin chu ka han hrilh ve hlawm a, an lawm ve kher mai.

Mapuia ka be leh a, min lawmpui thu min rawn hrilh ve nghal bawk a, kan nui dun hawk hawk mai.

Tunah chuan Aruna Asaf Hospitalah nurse hna ka thawhna pawh kum nga alo ni ve ta reng a, ka thawhna hospital neitu Mr Chowdhuri te nupa chuan fapa pakhat an nei a, a hming chu Hasan Chowdhuri a ni a, mahse an fapa chu car accident in a boral tawh a, ka hmel leh nungchang min han hmu chu min ngaina nghal nupa khawp mai a, an fa aiawhtuah min ngai nghal hmiah a, an nupain an office a min koh luhin min hrilh nghe nghe, keilah chuan nu leh pa ka lo chan ve tawh avangin pawi ka lo ti lem bik lova, kei pawhin hnamdang mah nise ka ngaina dun ve em em a, ka vanneih zia ka hrechhuak fo țhin.

An hospital bulah chuan chenna tur nuam deuh mai hi a awm a, a bulah swimming pool a awm bawk a, a nalh kher mai. Mr. Chowdhuri te nupa chu hospital bulah tho, building lianpui mai ah hian an cheng bawk a, a hmun a remin a fai nuam em em mai a, an ina dinner ei tur te hian min sawm fo țhin.

Ka chenna hmun ațang chuan ka thawhna hospital chu a hla vak lo nain, taxi in ka kal mai țhin a, traffic a tawt deuh țhin avangin kea kal hi ka thlang zawk a, Nuam pawh ka ti zawk daih a ni.

Chutia kea ka kal țhin chu Mr Chowdhuri te nupa in min hmuh chuan min lo lainat khawp mai a, an hospital bula chenna ruakah chuan insawn turin min ti a.

"Miss Remi(Arem tia min koh thiamloh avangin tihian min ko) kan thu awih mai rawh, kan ngaina che a, kan fanu ang chiahin kan en che ania, kan inah lo awm rawh tih leh i duh bawk silo a, chenna kan pe ang che, kan fanu tan chuan engpawh kan ti zel ang, i duh leh i hmingin kan dah anga," an han ti chu hnam dang ni mahse, hnam dang kara hmangaihtu ka han tawng chu ka lawmin ka thinlung an khawih takzet a ni.

An thu zawm mai chu ka mizo nihna ațangin harsa ka ti khawp mai. Hnamdang thuhnuai nih hi ka duh ngai lo. Mahse an mi duhsakna leh hmangaihna ka dawn avang chuan hnial ka duh ta bik lova.

"Awle," tiin ka chhang ta ringawt a. An lawm kher mai.

Tunah chuan mahni in leh hna ka nei leh tawh bawk a, ka rilru pawh a hlimin nuam ka ti khawp mai. Mahse ka ngaihtuahnaah chuan Mizoram lam a rawn lang leh țhin. Ka chhungten min han hmu ve se, min va lawmpui dawn em! tih te ka ngaihtuah ve țhin.

Țumkhat chu Mr Chowdhuri chuan an inah min kova, an nupa in an lo awm a, Mr Chowdhuri chuan, "Remi, kan fanu ang chiahin kan ngai che a, Mizorama i chhungte i hmu chak tawh ani tiraw? Chuan i bialpa pawh i ngai tawh viau ang tiraw?" tiin min zawt phawng mai a.

Makti takin ka en a, "Chak ve tawh tho ve, engtinnge i hriat a?" tiin ka han zawt let ha a.

"Ka chîk reng țhin che alawm, i bialpa nen chuan buaina in tawk ani ngei ang, i pa aiawhin ka zawt che anih hi, min hrilh ve duh angem?" a han ti leh a.

Engtinnge ka awmdanah ka bialpa nen kan buai tih te a hriat zawk ni? Mak ka ti kher mai.

"A dik alawm, kan ințhen vang ania, Delhi a ka rawn kal." tiin kan chanchin chu ka hrilh ve ta vek a, a lu a bu nghut nghut a.

"Anih chuan thil pakhat ka tihsak che min phalsak rawh aw, in ramah hospital din ka tum a, chu chu nang hian i enkawl dawn nia, i hmingin kan dah anga, nangma pual liau liau a ni ang, doctor pawh a țha țha ka pe dawn che nia," a han ti chu ka lawm hle mai.

Ka tan kawng a inhawng ve dawn ta, Mr Chowdhuri te zarah ka tum ka tihlawhtling dawn ta. Ka hlim lutuk chuan ka kuah thawk a, ani pawh a lawm ve kher mai.

"Min pawmsak tihna ami?" A han ti a.

"Pawm e, ka lawm lutuk ringawt, in nupa hian ka tan in țha lutuk a ni," nui var var chung hian ka han ti a.

"I hlim chuan kan hlim a ni mai, keini pawhin kan tawng che hi kan lawm lutuk." A han ti ve leh a. Ka hlim lutuk chu ka nui reng mai. An nupa pawh chuan ka hlim hmel an hmuh chuan an hlim ve khawp mai. Ka nu leh pa pawh kha la dam se chuan ka hlim hmel an hmuha an hlim ang kha Mr Chowdhuri te nupa pawh hian min hlimpui lo chuang bikin ka ring lo. Ka tan chuan ka nu leh ka pa aiawhtu an ni ringawt mai a ni.

"Anih leh engtikah nge Mizoram pan chuan ka kal ang?" Ka han ti ve leh a.

"Naktuk tuk lehah flight ah i kal dawn nia, Guwahati thleng kan thlah dawn che nia, mahse kan ngai hle dawn che a nih hi, Mizoram i thlen hunah pawh i nu leh pa ang chiahin min ngaih zui zel kan duh dawn ania, harsatna i tawh chuan min rawn hrilh hreh reng reng suh ang che," a ti leh a.

"Tehreng mai, ka theihnghilh ngai lovang che u, nangni hi awm lo ula chuan hetiang dinhmun hi ka thleng phak lawk lovang, ka tum aia hmain ka hlawhtling a, chu chu nangmahni vang liau liau a ni," ka han ti ve leh a.

"Naktuk tlaiah kan inah zanriah kan kil ho dawn nia, inthlahna ani pah anga," Mrs Chowdhuri chuan alo ti ve vat a.

"Tehreng mai, ka lawm lutuk e," ka ti let ve a. "Anih ka phei phawt ange," tih pah chuan ka chenna lamah chuan ka phei ta a.

Ka chenna ka thleng phei chu ka hlim lutuk hi awmngaihna ka hre lo țep zawk a ni.

Ka phone ka la chhuak a, ka chhungte ka'n hrilh chuan an lawm khawp mai. Mapuia ka phone leh chuan a lawm lutuk chu a au chiam lo chauh a, Kan nui dun hawk hawk mai. Reife chu kan inbia a, engeng emaw thil kal tawh hnu te kan sawi hlut a, chuta a thu min hrilh chuan ka thinlung a vit sawk maiin ka hria.

"Arem, Maruata chanchin kha i hria em?" a rawn ti a.

"Hre nang, kan inbe ngai hleinem, engatinge a?" ka han ti let ve a.

"In ințhen ațang khan a nundan a danglam vek a, zu a in nasa in doctor hna pawh a bansan daih. A nupui hual an tih pawh kha a nu dawtsawi vek alawm lo ni, nupui a neilo, rawn biak che a tum nasa lutuk a, i phalna lo chuan i number ka pe ngam silova, hrehawm a ti khawp mai, i inah rawn kal a tum țhin a, mahse inchhungah pawh a rawn lut ngam lo, kawng ațangin a rawn thlir reng zel a, chutiang hlir chuan a awm țhin a, vawikhat ka hmu fuh a, inchhunga hruailuh ka tum a, a duh lo bur mai a, a â ang tih hlauhawm khawpin a awm tawh. Tunlai phei chu a chhuak tawh ngai lo, inah a inkhung tawp tawh mai. A nu pawh a inchhir hle asin," a rawn ti duah a.

Ka phone chu ka dah thla riai riai a, Maruata ka thinlung ațanga ka la paih bo loh zia chu ka hrechhuak uar uar a. Ngaihzawng chu nei duh ni ila chuan neih tur ka hmu lo pawh a ni lo, ka thawhna ah pawh mizo mipa thawk ve an awm a, chu'ng te pawh chuan min kherh ve nasa, mahse ka hnar hmak zel. Hmangaih pakhat ka nei a, ka thihni thlengin ka hmangaih bawk ang. Ka tan a rinawm emaw rinawm lo emaw pawh nise, thu ka tiam tawh a, chu ka thutiam chu kei chuan ka damchhungin ka vawng reng anga, thlanah pawh ka liam pui mai ang.

Delhi ka awm chhung hian ka rilru natna tihreh nan ka thawk nasa em em a, ka ngaihtuahna kal ding lutuk tur lakah ka hna hian min chhan hlauh zawk a, chuti ni lo se chuan ka â thei hial ang. Rim tak leh taima taka ka thawh țauh țauh na leh Mr Chowdhuri te nupa ka tawn azarah hetiang dinhmun hi thleng thei ka ni a, ka dinhmun min hriatthiampui avang leh an fa ang chiaha min ngaih avangin Mizorama ka awm theihna tur min ngaihtuah sak a ni a, an ni nupa hi tawng lo ila chuan Mizoram chhuak thei tur chuan kum engemaw zat ala ngai dawn a ni. Anni nupa vang liau liau a ni a, kei pawhin hnamdang ni mahse ka nu leh ka pa aiawhtuah ka ngai hmak a ni.

Mahse tunah hian hlimna ka tawng mêk a, chu ka hlimna chu tuma min tihchhiatsak ka phallo, ka tum ka hlen theih tawh dawn avangin ka hlim em em zawk a ni.

Mizorama Mr Chowdhuri te puihna zara hospital ka din theih chuan Maruata nu pawhin min hmusit thei tawh bik lovang. Maruata'n nupui a la nei lo chu mak ka ti zawk hle a, mahse kan thutiam a theihnghilh lo leh kan thutiam a bawhchhe lo chu ka lawm a ni. Thu tiam mai mai ngai lo, mahse a thutiam tawh sut leh duh tawh lo mi, mi nun nghet tak a ni miau a, mahse keimah avanga a nun a chhiat phah chu pawi ka ti a ni. Keimah vang ka han ti nain, a nu vang a ni zawk reng si a, min hmusit viau lo khan kan inneih te kha phal se chuan hetiang hian a awm hauh lovang le!

Naktuk tuk leh lawka Mizorama ka haw tawh dawn avangin ka thawmhnaw te siam ka ngai a, phur tawkin ka insiam sauh sauh mai.

Zan ka han mu chu muthilh har ka ti ngei mai, ka helhhawlh nge pawh ka hre lo e a. Ka ngaihtuahna a vak kual nasa in ka hun lo hman tawh dan zawng zawng te ka ngaihtuah kual chiam a, a sawt lo kher mai. Zan a rei tulh tulh a, ka harh tulh tulh bawk si a, ka tlaivar dawn chiang hle mai. Engemaw ti ti in ka lo muhil ve sek ani ngei ang, ka han harh chuan zinglam dar sawm alo ri der tawh mai. Ka tho vat a, ka ril a țam ngei mai. Fridge ah eitur ka dah tawh mang lova, eitur bar pawh a awm tawh lo.

'Mr Chowdhuri te inah eitur ka va dap teh mai ang' tiin ka phei a. Mrs Chowdhuri alo awm a, " Ka haw dawn tawh avangin ka fridge ah eitur a awm tawh mang silova, ka ril a țam lutuk," ka ti lut bawrh bawrh a.

Mrs Chowdhuri chuan, "En rawh, eitur chu a awm kha, i duh duh kha ei rawh," a han tih chuan Fridge awmna lam chu ka pan vat a, eitur awm ang ang leh thei chu ka la chhuak a, ka ei ta mawlh mawlh a, ka ei tam ngei mai.

"Zanriah kha i theihnghilh ange aw, dar riatah kan ei dawn nia," Mrs Chowdhuri chuan a ti a.

"Ka hria alawm, ka la insiam zo lo deuhva, ka zawh veleh ka rawn phei ang, nizan ka muhil thei lova," ka tih chuan Mrs Chowdhuri nuih chu a za em em mai a.

"I haw chak lutuk tawh i muhil thei lo a ni maw?" A han tih chuan ka lo nui ve ringawt.

Ka chennaah ka phei leh vat a, ka thawmhnaw a kim nge kimlo ka en fel leh vek a, a kim veka ka hriat hnu chuan ka haw hlen dawn tawh avangin ka theih ang angin in chhung chu ka tifai a, ka zawh hnu ah ka inbual fai ser sawr a, Mr Chowdhuri te in ka pan ta a.

Mr Chowdhuri te nena zanriah kan han kil chu a nuamin eitur a tam bawk a, ka ei hnem ngei mai.


Zanriah kan ei kham hnu chuan Mr Chowdhuri chuan, "Remi, harsatna i neih chuan min hrilh zel turin ka phût che ania," a ti a.

Kei chuan, "Awle, ka hrilh em em ang che, engtinnge ka hrilh loh theih ang che ni?" Ka han ti let ve a.

"Hetah riak ve mai rawh, naktuk dar 9 flight anih kha aw, kan nupa in Guwahati thleng kan thlah dawn che nia," Mr Chowdhuri chuan a ti leh a.

"Pawi lo, ka insiam zo vek tawh bawk a, naktukah ka thawmhnaw chu kan la mai dawn nia," ka han ti ve a.

Kan inkawm tui lutukin dar zat lam reng reng ka lo ngaihtuah miah lo mai a, kan en chu alo tlai tawh ang reng hle mai a, kalkawngah kan chauh lutuk ka hlauh avangin mut ka rawt ta vat a. Anni nupa pawh chuan remti ve in ka mutna room min kawhhmuh pahin kan in mangțha ta a.

Zanah chuan zan hmasaa ka muthilh tlem em avang chuan ka mut a chhuak hle mai a, zing thawh hai ka hlauh avangin ka intihfai zawh hnu chuan ka mu vat a, ka rin aiin ka mutui bawk a, zing ka thawh chuan ka harh vêk vâwk khawp mai.

Ka phur tawh bawk a, hun te hi kal muang riau hian ka hre mai. Dar kua nang tur chuan kan kal a hun ta der mai, ka thawmhnaw vel motora kan dah fel hnu chuan kan tlanchhuak ta nghal a.

Airport kan thlen a, kan ticket te min enfel sak hnu chuan thlawhna ah chuan kan lut ta nghal a, kan țhutna tura kan țhutfel hnu reiloteah kan thlawk chhuak chu a ni ta mai.

Kolkata airport ațangin Guwahati airport kan pan lehnghal a, chuta țang chuan keimahin Mizoram ka pan tawh dawn a ni.

Kan ințhen tur chu kan ngui nghiai mai a, kha leh chen kha kan lo inhrawn tawh a, min ui lutuk chu an mittui a tling piau mai a, Mrs Chowdhuri phei chu a țap lo chauh a ni. Kei pawh ka insum ve hram hram a, kha leh chen min enkawl tu an ni a, ka tana an thiltih zozai te ka ngaihtuah phei chuan kalsan harsa ka ti ve takzet a ni.

Mr Chowdhuri chuan, "Engkim ka tifel vek tawh a, Bank a i account ah pawisa pawh ka transfer vek tawh kha, i kal chuan an lo buaipui vek mai ang che, tluang takin i thleng dawn nia, i thlen hunah chanchin min lo hrilh ve zel dawn nia," tia min han kuah pah chuan ka hnungah a beng thak thak a. Mrs Chowdhuri nen pawh kan inkuah vawng vawng a, "In enkawl țha hle ang che aw, ka ngai ngawt ang che, ka fanu," mittui tling piau chung hian a han ti ve a.

Kan inthlah zawh hnu chuan Mizoram pan tur thlawhna ah pan chuan ka kal ta a, ka hawi let chuan an nupain min lo la thlir reng a, ka bye bye a, ka luhsan ta, an nupa chu ka hmu thei ta lo. An nupa chuan an chenna hmun panin an thlawk haw veleh nghal dawn a, ka ngai viau ang, an nupa hian hnamdang kan nihna lang miah lo khawpin ka tan an țha em em si a.

Thlawhna chhungah chuan tumah pawh be peih lovin maimitchhing chung hian ka țhu ngawi reng a, ka ngaihtuahna a vak kual nasa ngei mai. Kan in ka thlen huna ka tum ang ngeia ka awm thei tawh tur chu ka lawm veng veng a ni.

"Ka lo țhu ve ang chu," tih ri ah chuan ka han meng a, ka'n en chuan Mipa pakhat hi ka bulah min en reng chung hian alo ding a, a hmelțha kher mai, pian nalh zet, sang țha zet mai hi a ni a, a hmel en chuan hnamdang emaw tih mai tur hi a ni.

"Lo țhu ta che," ka lo ti ve mai a.

"Ka lawm e," tih pah chuan a rawn țhu ve nghal a.

"Ka hming chu Lalnunsanga a ni a, 'Sanga' tiin min ko țhin."

Ka be châk vak lo nain kawngtluana kan țhutdun dawn chuan han biak loh tehngawt pawh chu niin ka hre si lova, "Lalremruati ka nia, 'Arem' tiin min ko țhin a" ka han ti ve a.

Ka țhutpui huphurh ang aiin a lo fel daih mai a, kan titi dun thei ta phian a, kei pawhin mahnia rilru kawm reng ai chuan chutia titi pui tur ka nei chu ka lawm hnuhnawh kher mai.

"Chhungte hmuaktu tur i nei em?" tia min zawh chuan ka neih thu in ka lo chhang vat a.

Mapuia ka biak khan min lo hmuah a tum thu min hrilh tawh a, Mapuia pawhin bialnu a nei ve tawh a, inneih an tum nghe nghe a, ka haw dawn tih an hriat avangin palai an lo tir vat a, ka haw veleha innei turin an lo inbe fel vek tawh a lo ni a. A taima bawk a, motor pawh a lo lei ve tawh a, a motor thar chuan a nupui hual nen inhmelhriattir na ni pah fawmin min lo hruai dun dawn a, ka hmu châk tawh kher mai.

"Nang i chhungten ami rawn hruai ve dawn che a?" Ka'n ti ve a.

"Aw ni e," a ti ve mai a.

"Nupui i nei tawh em?" Ka zawt hman tawh si a, ka zak kher mai.

"Nei love, nupui neih lam ka la ngaihtuah lova," a ti awlsam mai bawk a, ka zawhna chu mak a lo ti viau anih pawhin makti ang pawhin a awm lo.

"Anih nangin i nei tawh ami?" Chu zawhna chu ka chhang châk lo kher mai. Mahse amah ka zawh hmasak miau avanga min zâwt ve ah ngaiin, "Nei bik nang!" tiin ka chhang ve ta thova.

"Anih tunah khan khawi ațangin nge i lo kal a?" a han ti leh a.

"Delhi ațangin ka lo haw, anih Guwahati ah hian enge i tih a?" ka ti leh a.

"Hna vang ania....." a ti mai a.


Chutih lai tak chuan Air hostess chuan, "Kan thleng tawh dawn a, inhreng nghet vek rawh u," tiin a rawn puang lauh lauh mai a.

Tunah chuan Mizoram lei ka rap leh dawn ta, ka phur rual rualin ka huphurh kher mai.

Thlawhna chu a thlawk hniam ta ruai ruai mai, a han țum fel chuan chhuk tumin kan inbuatsaih ta sung sung a.

Thlawhna ațang chuan ka chhuk a, ka han hawi kual chuan Mapuia chuan min lo vai lauh lauh mai a, a kiangah chuan hmeichhe pakhat hmelțha zet mai hi alo ding ve a, ka han hmuh chuan Mapuia nupui hual a ni tih ka hre nghal mai a. A fel hmelin Mapuia a en danah pawh a hmangaih hmel khawp mai. Sanga chhungte nen chuan an lo ding tlang a, kan pan phei a, kan inhmu chu kan hlim ngei mai, kan inkuah chung chung mai.

Mapuia chuan a nupui hual nen chuan min han inhmelhriatir a, "Arem, hei hi Hlutei ka nupui tur chu anih hi, Hlute hei hi ka nau duhtak, Aremi anih hi," a tih lai chuan kan inchibai a. Mapuia motor lam chu kan pan ta a.

Mizoram leilung ka rap leh thei chu ka hlim kher mai. Mapuia chuan ka thawmhnaw chu a motorah a dah fel nghal a, a seat hnungah țhu lutin Sanga nen chuan kan in mangțha a, kan tlan liam ta a.


****************

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 2:12 pm

KAN TIAM TAWH SI...
Chapter - 11



Tunah chuan ka in ngei ka thleng leh ta.

Ka han hawi vel a, engkim mai chu ala danglam lo nain, Mapuian a lo enkawl ngun bawk a, a fai reng mai a ni. Hlutei chu reilote alo pengkawi ve nain, inlam an buai ve deuh avangin Mapuian a thlah haw lehnghal a.

Ka roomah ka chhova, mahni room ngeia han luh leh chu a van nuam danglam tak em! Ka inbual hma chuan Pu Chowdhuri te nupa chu ka phone hmasa phawt a, tluang taka ka thlen thu te ka hrilh hnu chuan ka phone dahin bathroomah chuan inbual turin ka lut ta nghal a.

Ka inbual zawh hnu chuan ka inthlak a, thlawhna ah eitur ei mahila, ka eina a rei leh deuh tawh avang leh ka ril a țam avang chuan inhnuai lam chu ka pan a, fridge ka han hawn chuan eitur a lo awm nual a, plate ah la chhuakin ka ei țeuh mai.

Ka patea te leh ka nutei te ka phone a, a tlai tawh em avangin ka patea te chu a tuk zan lama lo len phei an tum a, ka nutei pawh chuan naktuka lo kal a tum thu a rawn sawi a, ka lawm kher mai.

Mapuia lo haw lai chuan choka ah ka lo la awm a, "Ila mu nange a, ila mut loh chuan engemaw hrilh tur che ka nei ania," a rawn ti a. Sitting roomah kan inzui phei a.

"Eng thu nge ni a?" Ka han ti sap a.

"Maruata chungchang......" a han tih chuan, "Ani chanchin ka ngaihtuah lo, in inneih tur chungchang hi sawi zawk ang," ka tih san hmiah a.

"Keini chu kan inpeih fel tawh alawm, engkim kan tifel vek tawh a, a ni chiah kan la ruat lova, lo haw i tum thu kha i rawn sawi avangin kan ko nghak che a, naktukah ka nu leh ka pa pawh an lo thleng ang, nang ilo thleng tawh bawk nen a ni tur kan ruat thei tawh dawn anih hi."

"Ka lawmpui lutuk che, innei vat vat rawh u, a ni tur ruat chauh ka hmabak a nih tawh tho tho chuan karleh lehpek khi ruat ila a țha mai lawm ni?" Ka han ti ve a.

"Ni e, ka nu leh ka pa te lo thleng phawt sela, kan rêl dawn nia, tunah chuan i chau awm si a, mu phawt ang,"

Kan room ve veah mu turin kan kal a, ka rooma ka luh chuan ka hmai ka inti fai leh lawk a, mutkawr ha in khumah chuan ka inthawlh ta kak mai a, ka chau bawk aniang, zing thleng harh miah lova kan muthilh chu le!

Delhi a kum nga lai ka awm avang khan hun awmdan ka hai lek lek mai. Chaw ei lai chuan Mapuia hnenah chuan, "Chawhma ah bank a kal ka tum a, Delhi a Pu Chowdhuri khan hospital dinna tur sum ka account ah min dahsak a, chu chu buaipui ka ngai dawn a," ka han tih chuan Mapuia chuan, "Vawiin chu ka kalpui dawn che em ni? E, taka, Maruata te hospital kha an mualpho khawp mai, hralh mai an duh a, i leichhawng duh mai lo em ni? Private hospital din tur chuan a hautak hle ania aw, in hmun rem deuh lei tur a vang si a," a han ti a.

"Ka hrethiam bik lo le, inngaihtuah phawt ka duh," ka han ti ve a.

Ni e, ka lo ngaihtuah thleng phak lo a ni, Maruata te hospital pawh chu a pawina a awm chuang dawn ami le, an mualpho tawh si chuan le!

"Mapuia ka biak tir mai ang," tiin ka ngaihtuah a, tlaiah ka patea an rawn kal dawn thova, lo rawn ve phawt ila, mahnia thu tihtluk chu ka ngam mai bik lo a ni.

Pu Chowdhuri han biak leh pawh chu ka inthlahrung ang reng khawp mai, mahse ka buaina ka hrilh loh chuan a hre leh dawn tho si a, a lungawi loh mai bakah lawm nachang hre lovah min ngaih palh ka hlau bawk si a, ka phone ta nge nge a.

"Chu Hospital chu i duh anih chuan ka lo tifel vek mai ang," tiin min rawn hnem a. Ka lawm kher mai.

Nilengin bank ah pawh kal ta lo chuan inah ka awm ta ringawt a, zanriah ei khamah ka patea te nupa lo kal an tum bawk a.

Tlaiah chuan rawng ka bawl a, ka nutei te an lo thleng dawn bawk nen, an lo thlen hmaa lo intihfel hman vek ka duh a, ka buai ve char char mai. Tlai chaw ei hma deuh hlekin ka nutei te nupa pawh chu an lo thleng ve ta mai a, Mapuia office bang pawh alo thleng ve chiah bawk a.

Chaw te kan han ei kham a, ka tihfel meuh chuan dar sarih alo ti țep tawh mai a, ka patea te nupa pawh an lo thleng ve nghal bawk a, Sitting roomah kan han țhu khawm a, Mapuia te inneih ni tur kan han rel nak nak a, kei chuan, "Karleh lehpek nilaini khi a țha mai lovem ni?" Ka han tih chuan an lo pawm ve tliar tliar hlawm a, November ni 7 chu kan ti tlu ta nge nge a.

Kei chuan kan awmkim lai chuh ve in Hospital chungchang chu ka han sawi ve a, "Pu Chowdhuri an ka rawn tifel vek ang a ti a, naktukah chanchin ka ngaichang leh phawt ang, Maruata te hospital kha a hmun a rem bawk a, leisak mai ka duh a, Pu Chowdhuri pawhin min remtihpui ve tho bawk a," ka han tih chuan an lu an bu nghut nghut a.

"Bawihi, i thu thu alawm, mahse nangma thu a tihtlang duh lova min râwn ve avangin kan lawm lutuk ania," ka patea chuan a han ti ve a.

"Keima thu ringawt te chuan a tihchi bik loh alawm, chhungte neilo ka ni hleinem," ka han ti veleh a.

"Pu Chowdhuri hnenah pawh chuan lawmthu sawi kan ba a nih chu, anni vanga hetiang dinhmun thleng thei i ni bawk a, naktukah a hmun vel kan va enfiah dawn nia, ka kalpui dawn che nia, thuneitu lam pawhin an phal lutuk ang," tiin ka Patea bawk chuan a ti leh a.

"Ka pate, ka lawm lutuk e," ka han ti a.

Ka patea chuan, "Bawihi lawmthu sawi a ngai hleinem, i patea ka ni a, ka tihtur a ni ve tho alawm," a ti leh mai a.

Thingpui kan in a, eng engemaw sawia kan ti ti chhung chuan alo tlai leh ta hle mai a, kan in mangțha hnu chuan ka nutei te nupa chu ka nu leh ka pa roomah an mu mai a, kei pawh chu ka room lam panin ka kal ta a. Ka room ka luh chuan ka phone hi alo ri ral ral a, kan en chuan number ka save loh ațang hian a lo ni a, "Hello,"

"U Aremi a ni em?" lehlam ațang chuan hmeichhe aw hian a rawn ti a.

"Aw ni e, tunge ni aw?" Ka han ti ve a.

"Maruata nau 'Partei' ka nia," ka phu zawk mai, Maruata lam reng ka lo hrechang tawh lo. Mak pawh ka inti zawk hle mai.

"Aw, enge ni ta a?"

"U Arem, u Maruata hi a dam țha lova, khawngaihin vawikhat tal han hmu leh teh, i hming a lam reng mai a, a hmangaih thu che a sawi mawlh mawlh reng mai, ka nu pawhin i hnena ngaihdam dil a duh lutuk asin, ani pawh i hmuh theih chuan ka lawm ngawt ang," a rawn ti a.

Ka phone ken chu ka hum ngawt ngawt a, chhan mai ngaihna pawh ka hre lo. Keimah avangin chutiang khawpa nâ chuan a awm tih pawh ka hre miah lo.

"Awle, ka lo tum dawn nia," ka ti ta tawp ringawt.

"Khawngaihin, naktukah i hman ang em? Nangmaha rawn kal i hreh awm si a, ka rawn hruai dawn che nia," Partei chuan a rawn ti leh a.

"Naktuk chu ka hman dawn lo tlat, a tuklehah ni mai rawh se aw, hruai ka ngai lovang, ka rawn kal mai dawn nia," ka tih chuan,

"Ka lawm lutuk, ka nuin a tihdan che kha pawi ka ti lutuk a, ka lo awm lo kha a pawi khawp mai," a ti leh a.

"A ho em mai, hun kal tawh anih kha," ka ti veleh a.

"Anih ka dah ange aw, lo kal ngei ngei ang che," tih pah chuan phone chu a dah ri rak a.

Ka phone ken lai chu ka dahthla riai riai a, engtinnge ka tih tak ang le? Maruata te ina kal chu thih hrehin ka hreh a, mahse min hruai tur em chuan ka duh bawk silo. Ka lo tiam ve laklawh tawh nen, ka thei ngei ang. Engtikah emaw ka la hmachhawn a ngai dawn tho tho a, tuna tlâk vat hi a țha zawk.

Bathroomah lutin ka inphihfai a, ka mutkawr ha in khumah ka mu ta ran a, Hun kal tawh ka mitthlaah alo lang uai uai mai a. Maruata chu chutiang em chuan a lo nâ a ni maw! Ka inthiam lo ve tho bawk, mahse a nu min tihdan kha ka nâ em mai a, tihnat kha ka châk ve em a ni. Ka tina ta reng bawk a, kei pawh ka na lo bik lo. Hrehawm ka tiin ka tuar ve khawp mai, mahse ka tum ka tih ruh em avanga hetiang dinhmun hi thleng thei chauh ka ni reng a ni. A chanchin ka hriat lehna hian ka thinlung muhnu a rawn kaitho leh ta a ni.

Zanlama ka muthilh theih lawk loh avang chuan zing thawh ka hai chiang kher mai. Ka thawh chuan sana kan en chu dar kua alo ri der tawh mai.

"Ehe, thawh ka va han hai chiang vele!" tih pah chuan ka tho zawk a, bathroomah ka inphihfai nghal a. Inhnuaiah ka chhuk a, chokaah ka lut a, ka nutei ka au a, alo awm silo, khawnge maw an kal le tia ka ngaihtuah mek lai chuan ka nutei chu alo lut a.

"Nizan i muthei nange a, zing thawh i hai tak hial mai," a ti a.

"Nia mawle, ka hospital tur ka ngaihtuah nasa lutuk a, ka muhil lawk theilo alawm," ka han ti ve nghal vat a.

Chutihlai tak chuan ka phone alo ri a, kan en chuan Pu Chowdhuri a lo ni a, "Hello!" ka ti zang vah a.

"Remi, thuneitute ka be tawh a, hospital chu i ta a ni tawh e aw," a rawn tih chuan ka lawm lutuk chu ka khi sang mai.

"Uncle, ka lawm lutuk, ka lawm lutuk, rawn zin ula, min rawn hmuhpui vat dawn nia," ka han tih chuan, "Awle, kan lo zin vat ang, a hawnna i neih hma ngeiin kan lo kal ang," tih pah chuan phone chu a dah a. Ka lawm lutuk chuan ka nutei chu ka virpui chawi chawi mai.

"Engemaw i hriat a, khati vak vaka min virpui le, ka lu i tihai vek dawn alawm," a han ti a.

"Nute, Pu Chowdhuri ania, engmah kan buaipui ngai lovin a rawn tifel vek tawh, vawiinah ka patea hovin va en ang u hmiang," ka han tih chuan ka nutei pawh a lawm ngei mai.

Ka patea ka phone a, ka han hrilh chuan a lawm ve kher mai, "Bawihi, ka lawmpui lutuk che, uncle fel tak i chhar a nih hi," a rawn ti ve a.

"Eng thu lawmawm nge thleng a?" rawn tih pah chuan Mapuia chu a rawn lit ve nghal a, Mapuia kuah pah chuan thil awmdan chu ka han hrilh ve a, kan lawm lutuk hi kan lam kual chiam mai a, nutei lah chuan min lo nuih tlawrh tlawrh mai.

Chaw ka eikham hnu chuan kan insiam a, Mapuia motor in kan kal ta a, ka lo thawh ve tawh na a ni bawk a, a hmun kan va thlen chuan a lo reh ruih mai a, thawktu mi engemaw zat Pu Chowdhuri an min hmuhsak bawk a, kan chhunzawm leh thuai thei ang chu, luahlohna a la rei vak lo bawk a, siam em em a ngai lo nangin rawng hnawih thar deuh a ngai a, chumi thawk thiam rawih tur pawh kan hmu tawh bawk a, hna an țan thuai ang. An siam zawh huna hawnna kan neih hma ngeiin Pu Chowdhuri te nupa pawhin lo kal an tum bawk a, Mapuia te inneih zawh hnuah chuan a hawnna pawh kan neih theih ka beisei a ni.

In lam pana kan haw chu kan hlim hlawm kher mai.

"Arem, motor lei ve tawh teh, ka motor hlir kan hmang a, i mamawh ve tawh tho ania," Mapuia chuan nui vur vur chung hian a han ti a.

"I motor i ui deuh tawh a ni maw? Ka lei em em ang, tunah en nghal ila," ka han tih chuan an phur hlawm khawp a. In pawh thleng lo chuan motor en tur chuan kan kal leh ta hlawm a.

Car nalh zet mai ka duhzawng tak ka han hmuh chuan, "Hei hi ka duh e," ka han ti a. Tihfel ngai zawng zawng kan tifel a, in lam panin kan haw ta hlawm a.

Ka car thar chu khalh a nuamin ka hlim kher mai. "Tlailam chu chaw ei khawm ang u, eng sa nge kan lei ang? Ka rawn haw hnuah chhunkuain chaw kan la ei khawm miah lo ania," Ka han tih chuan an phur hlawm khawp a. Naupang thil lawm ang mai hian kan phûl hlut hlawm mai.

In kan thleng chu chhungte ka neih ve chhun ka han biak kual chuan lo kal an tum thu min rawn hrilh vek a, ka hlim ngei mai.

Tlai chaw kan han ei chu kan hlim bawk a, kan ei hnem hlawm kher mai.

"Ka pate, hospital kan hawn hma in nge hawn hnuah ka nu leh ka pa lung hi kan phun ang?" Ka han tih chuan an lawm khawp mai a.

"Bawihi chu i ngaihtuah kim hle mai, hospital hawn hnuah chuan i buai tawh awm si a, Mapuia te inneih zawhah kan ti mai dawn ami?" ka patea chuan a han ti a.

"Ni e, a pawi lo zawk mai thei a ni," ka han tih chuan Mapuia te inneih zawh a karlehah lungphun chu ka titlu ta a.


Zan ka han mu chu ka hlim vang nge ka muhil thei leh der lo mai, ka phone alo ri a, ka han en a, number hriatloh bawk, ka number ka thlak avangin tuma number ka lo nei tawh lo bawk nen, "Hello! Tunge aw?" Ka han tih chuan, "Hmeli, min hre tawh nange a, i hausa tawh lutuk a, min theinghilh ta a ni maw?" A han tih chuan Rpi a lo ni reng mai a.

"Engtinnge ka number i neih a?" Ka han tih chuan, "I u Mapuia ka dil mawle, nang chuan min biak i tum si lova," thinrim tak hian a rawn ti a.

Ka inthiamlo kher mai, ka țhianțha ber leh kawng engkima min puitu a ni asin mawle, "Ka tihpalh lutuk, naktukah lo leng ta che, khawiah emaw min kalpui turin ka duh che," ka han ti nghal zat a.

"I phakar em mai a, rawn be lo che ila chuan min be hmasa tawp nang, lo len pawh ka duh lo e a,"

"Ka tihpalh ka tih chu," ka han tih leh chuan, "Awle, awle," a rawn ti ta a.

Phone ka dah rual chuan a rawn rik chhunzawm leh nghal zat a, tunge maw ni le? tia kan en chuan Guwahati ațanga thlawhna a ka țhutpui kha a ni tih ka hre nghal mai a, "Hello! ka han ti a.

"Min hre tawh nange a?" A rawn ti țalh țalh a.

Han fiam hlak ka châk avang chuan ka hre lo der a, "Tunge aw?" Ka han tih chuan a lungawiloh hmel khawp mai.

"Hmm, min hre duh tawh lo pawh a awm alawm, ka biak chak tehreng che nen," a rawn ti barh barh a.

"Oh, ka tihpalh, ka han fiam mai mai che nih kha, i dam maw?"

"Dam ang chu mawle, ka hmu leh chak che a, ka rawn phone tawp che."

"Engvanginnge min hmuh chak a?"

"Ka hmu châk che ani tawp mai, thlawhnaa kan inhmuh ațang khan ka ngaihtuahnaah i awm reng a."

"A va mak awm ve a!"

"I awih lo ani maw? Ka hmuh che chu i duh lo a ni mi?" A rawn ti leh a.

"Ka duh loh pawh ka sawi loh chu," ka han ti veleh a.

"Anih chuan engtikah nge ka hmuh theih ang che?"

"Ka hre lo, tunlai chu ka buai ve riauva....,"

"Anih i hman hunah min lo hrilh dawn nia aw..."

"Awle..." tiin ka phone ka dah a, reiloteah chuan mutchhuakin min rawn zem chiai chiai a, ka muhil ta bawrh bawrh a.

***************


Dar sawm velah Rpi chu alo thleng a, kan han inhmu chu kan hlim dun kher mai, mahse ka biak ngailoh avang chuan a han titau țha leh rih a, a tawpa tawpah chuan a nui leh thei ta. "Lo kal ka tum miah lova, mahse ka hmuh châk em che avangin ka lo kal leh ta hram anih hi," nui hawk hawk chung hian a han ti a.

Kei pawh ka lo nui ve hawk hawk a.

"Taka, Maruata te hospital kha i lei tih ka lo hria a, min chhawr veleh la," a han ti a.

"Ka lo ngaihtuah reng alawm, i thawh duh phawt te chuan a lawmawm khawp ang chu, chutia sawi chhuah takah chuan a farnu in min rawn phone a, an ina kal a, Maruata hmu turin min rawn ngen a, ka lo kal dawn nia ka lo ti tawh si a, kal ka hreh lutuk a, min kalpui tura sawm che ka lo rilruk a,"

"Nia, i hreh viau ang, ka kalpui dawn che nia,"

"Anih chuan kan insiam ve ange, kal vat ila, kan haw leh hma dawn nia," ka han ti ve a.

"Han insiam rawh, hetah ka lo nghak ang che, rei lo la,"

"Ka rei lovang," tih pah chuan insiam turin ka roomah ka tlan chho nghal a.

T shirt ka ha a, jean kekawr ka ha leh tawp a, pheikhawk flat ka bun bawk a, ka hmai ka hnawih leh thuak thuak a, ka inchei vak peih lo, ka bag la in inhnuai lamah ka tlanthla leh nghal thuai a.

"I va inpeih leh hma si ve, kal nghal ila," a tih chuan ka car ka la a, kan tlan chhuak ta nghal a.

Maruata te in kan thlen chuan pawnah nula pakhat hi alo awm a, Maruata farnu hi ka la hmu hauh lo nain, a hmelah chuan ka ring nghal mai a, an gate chhunga kan tlanlut chu min lo en reng a, ka hmel a hmuh chuan min lo hre nghal ani ngei ang, min rawn pan pahin, "Partei, Maruata farnu ka nia, U Aremi i ni tiraw?" alo ti sawk sawk a.

"Aw ni e, hei hi ka țhiannu Rpi a nia," ka han ti ve a.

"I lo kal loh ka hlau lutuk a, rawn hruai lah i duh si lova, tiru, lut ang u hmiang, u Maruata roomah kan chho nghal mai dawn nia," a lo ti zung zung a, a fel hmelin a nu nen an inang lo kher mai.

Inchhungah chuan kan inzui lut ta țham țham a, inchunga lama kan chhoh dawn mek lai chuan inchung lam ațang hian Maruata nu(pi Hmingi) rawn chhuk thla mek nen kan intawk ta chiah a, a hmel chu ka hmuh hmasak ber nen khan a danglam tawh hle mai, a hma kha chuan chapo hmel zet hi a ni a, tunah chuan kha chapo hmel zet kha hmuh tur reng a awm tawh lo.

Min hmuh chuan min lo be vat a, "Arem, in lo kal a ni maw? In va fel ve a, i chunga ka thiltih avang khan min ngaidam ang che aw, kha ka thiltih avang khan hei tunah ka fapa pawh ka chan lo chauh tawh a nih hi. I tan chuan min ngaihdam mai chu a harsa ang tih ka hria alawm, mahse ka fapa hi min chhansak hram ang che aw.." tiin ka kuta vuan chungin min ngen ngawih ngawih mai. A hmel tlâwm tak mai ka hmuh chuan ka khawngaih letling kher mai.

Inchunga Maruata roomah chuan Partei chuan min hruai lut a, khumah chuan Maruata chu alo muhil bam mai a, a chêr em em mai a, chutia alo muhil bam mai ka hmuh chuan ka thinlung hi hlinga chhun ang mai hian a na zawk mai, ka thlir ngawih ngawih a, a nu vanga ka huatna te kha khawiahnge an awm zawh tih pawh ka ngaihtuah hman lo. Ka mittui a luang nghal zawih zawih a, a biang leh a hmui sen sar mai te kha an awm tawh lo, a dâng del mai. Partei leh Rpi chuan min chhuahsan leh vat a.

A bulah chuan ka va țhu vat a, a kut chêr țhiak mai chu ka hum sak a, "Maruat, heti em hian a ni maw ilo nat le? Min ngaidam rawh aw," tiin ka be mawlh mawlh a. Ka aw a hria tih hriat tak hian a rawn che zauh a, a mit a rawn meng diar diar a, min rawn hmuh chuan a rawn phun sap a, "Arem....?"

"Aw enge ni, i bulah ka awm tawh alawm, lungngai suh aw, ka enkawl ang che, chuan min ngaidam ang che aw, ka tihpalh a ni," ka han ti sap a.

A rawn nui sak a, "Ka ngaidam daih tawh che alawm, i tihsual a ni hleinem, ka nu khan khatiang khan țawngkhum lo tur che ani asin, min ngaidam ang che, ka nu pawh ngaidam ang che aw, tunah chuan a inchhir lutuk asin." a mittui a tla ve zawih zawih mai. Mahni tawka inla pâ ve tak kha a nih țhin nen.

"Tunah hian enge i an reng reng a? Damdawi te i ei țha em?"

"Ka hmu che a, ka dam sawng sawngin ka hria," tiin a nui sak a.

Heti khawpa a na chung pawh hian a la nui thei reng mai chu a nia, a tuarchhel takzet a ni.

"Arem, min kalsan tawh suh aw, min kalsan leh chuan ka dam zo tawh lovang, ka la hmangaih reng che ania, ka thawk tawp thleng pawhin. Mahse tunah chuan ka hmu tawh che a, ka rilru a dam huai mai, pasal țha tak nei ang che aw...! Kei chu neih tlak pawh ka nih tawh loh hi."

"Chutiang sawi suh, ka enkawl che anga, i dam vat ang chu!"

"Ka lawm e, ka bulah awm tlat ang che aw..."

"Tehreng mai, I kiangah ka awm tlat tawh dawn alawm, tunah chuan muhil tawh phawt la, i țawng nasat chuan i chau lutuk ange," ka han ti a.

Engtia awm tur nge ni ang aw? Ka hmangaih ber thichhawngin khumah a awm a, enkawl ka duh bawk si, ka rilru a buai ngei mai.

Maruata hmel thlamuang taka a muhil chu ka en vawng vawng a, ka khawngaih kher mai. A chanchin hriat ka lo duh loh avang te khan ka inthiam lo hnuhnawh hle mai a, chuti nilo se chuan tun aia hma hian ka enkawl tur a nia.

Chutia ngawi renga ka rilru kawma ka țhut lai chuan Pi Hmingi a lo lut a, ka bula a rawn țhu chu ka lo en vat a, ka kuta min hmer chung hian, "Arem, i ngaihdamna dil ngam tur pawh ka ni lo, keimah avanga ka fapa hi hetianga awm hi a ni, a rilru na lutukin a theihnghilh theih nan che leh ka chunga a thinrim em avangin zu alo in ve a, a taksain a tawrh bak bakin a in a, hetiang hian a awm phah ta a nih hi, ka fapa chunga thuneih ka tum lutuk avanga kan dinhmun chu heti hi a nih tak hi, kan hospital lah kan chân der tawh si, i lei tih ka lo hriat khan ka lo lawm ve lutuk asin, ka fapa nena in in tawnna a nih avangin ka fapa pawh hian a ngaihlu em em a, i kalbo ațang khan hospital saw tlawh pawh a tlawh duh lawk lova, mahse saw hospital sawn nangmah a hriatchhuah tir țhin avangin a kal leh nge nge țhin," mittui tling piau chunga a han tih chuan ka khawngaih hle mai. Keimah chiahin kan ințhen kha ka lo tuar emaw ka ti a, kei ai pawhin Maruata chuan a lo tuar zawk hle a ni.

A nu pawh hi ka ngaidam hmiah tawh, a fapa hi ka la hmangaih zel anih chuan ka ngaihdam ngei a ngai a ni, amah ka hmuh chiah hian ka haw tawh miah lo tih pawh ka in hria. A dinhmun ațanga ka thlir chuan kei pawhin khatiang ang kha ka ti ve lovang tih ka sawi thei bik lo, mahse khatiang khan tumah ka țawngkhum ve lovang tih chu ka thinlungah a chiang khawp mai.

"Engtinnge awm i tum ang?" Pi Hmingi chuan a han ti a.

"Ka hrethiam lo, Ka u Mapuian nupui a nei dawn a, hospital chei țhat ngai nen, ka buai ve lutuk a, ka theih hram chuan nitin lo kal ka tum dawn nia, mahse ka tiam fak thei lo tlat, ka dinhmun chu ka sawi tawh kha," ka han ti ve a.

"Ka hrethiam lutuk che, tuna ilo kal pawh hi ka lawm lutuk ringawt."

"Anih kan haw phawt ange, hei a mutui khawp mai, a zia chho ve zel ang chu," tih pah chuan kawngka lam ka pan a, pi Hmingi chuan min rawn zui vat a, inhnuai panin kan chhukthla dun a, "Thingpui in ve rih phawt ula, in in zawhah in haw dawn nia," a tih chuan inlama kan buai thu chhuanlama hmangin Rpi nen chuan kan inzui chhuak ta a.

Kan haw kawngah chuan Rp chuan, "Maruata chu ka beisei aiin ka hmu țha zawk," a han tih chuan, "Khatiang em em khan a na ang tih ngaihna reng ka hre lova, a nu khan ngaihdam min dil nasa lutuk a, ka khawngaih letling zawk. Maruata pawh khan a nu kha ngaidam turin min ti a. Ka thinlung hian a ngaidam fel vek tawh ani ngei ang, a nu hmel ka hmuh khan huatna ka nei tawh lo reng reng." ka han ti ve a.

Thudang sawiin kan ti ti a, "Tlai chu chaw ei ve nghal mai la, i riak nghal bawk dawn nia, i chhungte ka be mai ang," ka han ti a.

"Aw, ka tih chuan thlemsam min ti țhin awm bawk si a, ka hnial dawn che leh țhiante inah pawh riak duh lo leh chaw ei duh lova min chhuah loh hram ka beisei," nui țha chung hian a han ti a.

"Ngeiawm țhin viau teh suh," tih pah chuan ka motor khalhna kutin steering ka vawn lohna lam chuan a malpuiah ka chum awk mai.

In kan thlen chuan a lo tlai tawh hle mai. Ka nutei chuan rawng a lo bawl zo vek tawh a, "Nute, Rp hian chaw a ei ve nghal dawn ania aw, Rp, kan inthlak lawk ange aw, ka thawmhnaw ha hawh lawk la, in thlak ve rawh," ka han ti a.

"Ka inthlak lo mai ange, a buaithlak, zan chu ka riak lo mai ang, nidangah ka lo riak zawk dawn nia," Rp chuan a ti a.

Inchungah tlan chhovin ka inthlak sawk sawk a, ka inthlak zawh chuan ka chhukthla leh nghal vat a.

"Bawihi, chaw ei nghal mai ang u hmiang, a tlai mai dawn," ka nutei chuan a ti a.

"Khawiahnge Mapuia hi?"

"A puzawn turten chaw eiah an sawm a, a ei ta nghal mai anih kha,"

"Nghal pang chuan â," ka han tih chuan Rp nen chuan in enin kan nui ta vak a. Ka nutei pawh a nui ve hawk hawk mai.

******************

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 2:12 pm

KAN TIAM TAWH SI...
Chapter - 12 (Last Chapter)



Hospital siam țhat hna chu an thawk mawlh mawlh a, kei pawhin ka va enpui ve zauh țhin nain, ka Patea kutah ka dah hmiah a, thawh pawh an thawk sawt khawp mai.

Mapuia te inneihni thlen nan ni hnih a la awm a, kan buai mam mam khawp mai. Maruata pawh nitin ka tlawh a, tunah chuan a dam ve tawhin a room pawh a chhuahsan ve thei tawh a, mahse a taksa chak tur chuan hun a la duh rei deuh ang. A chhungte pawh ka lakah an lawm hle nghe nghe.

Țumkhat pawh an inah Rp nen kan kal dun leh a, an chhungin an lo awm a, Maruata pawh a lo țhu chhuak ve peih a, a hma ai chuan tuna a hmel chu zia tawh tak a ni. Hlim takin kan ti ti hlawm a, chutia kan ti ti mêk lai chuan, "Arem, kan fapa nunna min chhanchhuah sak a ni ringawt alawm," tiin lawm hmel tak hian Maruata pa(pu muana) chuan a ti ve siam siam mai.

Rp lah chuan, "Aw, a damdawi mum lian ber a lo thleng tawh a, dam chak awm reng pawh a nia lawm," nui țha chunga a han tih chuan Maruata nu leh pa, a farnu te chu an nui ham ham a, Maruata pawh alo khi ve suk suk a, kei lah ka zak chu ka sen awp awp a. Rp chu ka chûm zawt a, ani lah chu a nui nasa sauh lehnghal a, ka ngei kher mai.

Maruata chuan, "Ka chau tawh em mai, ka rooma kal mai ka duh tawh a ni, 'Arem', min lo kalpui ta che," a han ti dêk dêk a, Rp lah chuan, "Ni e, han kal pui rawh, kha chance a zawng ve a nih kha, kan hrethiam lutuk che u alawm," a lo ti leh zawrh zawrh a, ka zak lutuk chuan, "I chhe zawt zawt, ila châk lovang aw," ka han ti ve a, midang ho lah chu an nuih alo za em em mai thung a.

Maruata chu a room pan chuan ka hruai ta a, a room kan thlen chuan, "Arem, i lakah hian bat ka va ngah tak em! Kan hospital ilo lei chu ka lawm khawp mai, tunah meuh zawng i hlawhtling ta hle mai, ka lawmpui lutuk che ania aw," a han ti a.

"Hetianga hmalam pan thei tura min siamtu chu i nu hi a ni alawm, khatiang khan min țawngkhum lo se chuan hmasawn tumna ka nei tawp nang, i nu min tihdan kha a tir chuan nâ ti hle mahila, tunah chuan khatianga min lo țawngkhum kha ka tan a lo țha daih zawk tih ka hmu thiam tawh."

"Anih min la hmangaih reng reng em?"

A zawhna avang chuan ka phu zawk a, mahse ka hre lo der tlat a. "Ka va haw tawh ange, Mapuia te inneihna turah hian ka buai lutuk a, ka rawn kal lawk hman lo a nih pawhin ilo hrethiam dawn nia, Hospital an siam țhat va en zawk zawk a ngai bawk si a, a ranglama lo kal leh vat chu ka tum ang, tunah chuan muhil tawh la, lo in enkawl țha ang che," tih pah chuan ka chhuahsan ta a.


Rp chu kan inah a awm ve chawt a, Mapuia te innei tur nen, Hospital nen, chuta karah Maruata damlo enkawl lo ngai bawk nen, a țul țul min buaipui turin a chhungte ka dil tawp a, min hrethiam khawp mai. Ka tan țhianțha a tling thlawt, țhianțha mai pawh nilovin ka unaunu a ni ringawt.

Mapuia nupui neihni a thleng ta der mai, ka lawmpui rualin ka tana unaupa țha ber mai chân tur ang mai hian ka lungngai lâwk hle.

Chawhnu dar hnihah inneih inkhawmna neih tur a ni a, chumi zawhah inneihnaa rawn kalte tan ruai buatsaih a ni a, fatu tura kan sawm te pawh an buai map map khawp mai.

Inneih hunserh chu țan a ni ta a, ka rin aiin inneihna hun min hmanpuitu an tam a, ka lawm kher mai.

Tunah chuan Mapuia pawh nupui nei a ni ve ta. Kan inah a nupui a rawn luhpui phawt anga, chumi hnuah a nu leh a pa awmna anmahni in ngeiah a hruai leh phawt dawn a ni.

Mapuia te inneih kan hman zawh tuk thumnaah Mapuia te chhungkua chu anmahni in lamah an haw ta a, a reh ruih mai, an awm lai kha chuan kan ri le lu a, tunah chuan keimah chauhvin ka awm leh ta.

Tunah chuan Hospital pawh zawhfel a ni tawh a, mahse hospital hawn hmaa ka nu leh ka pa lungphun kan tum kha sawn leh țha in ka hria a, hun a tepter lutuk a, Mapuia te inneih kan buai zo chiah a, nghah leh deuh hlek chu a pawi pawh ka ring lo. Ka patea ka han biak râwn lah chuan ka tih ang ang a pawm thu bak a sawi leh chuang bawk silo. Thutlûkna ka siam fel ta a, Hospital chu damlo ten damna an beiseina hmun a nih avangin hawn hmasak ka tum fel ta a ni. Pu Chowdhuri ka phone nghal vat a, "Uncle, Hospital chu kan peih fel tawh a, in lo kal thei dawn em?"

"I pi a dam țha vak lova, kan lo kal thei lo mai thei a ni."

"A va pawi ve aw....lo kal ngei ula ka ti asin mawle, ka pi chu lo dam vat rawh se aw...ka tan in țhat tehlul nen keilah chuan engmah tihsak theih che u ka nei silova," ka han ti a.

"Engmah tihsak a ngai reng reng lo, i hmangaih tih a hriat hian a rilru a dam a, kan lawmawm lutuk zawk, chuan i hospital chungchangah chuan ka lawmpui lutuk che, nang pawh lo inenkawl țha ang che, anih phone ka dah ania," tih pah chuan phone chu a dah ta a.

Pi Chowdhuri chu ka van khawngaih tak em! Ka tan an țha in thil min tihsak nasat tehlul nen kei lahin engmah tihsak theih ka nei silova.

Hospital hawn hma ni chiah chuan Maruata chu ka va tlawh leh hram a, tunah chuan a hmel pawh a pangngai tawh viau mai a, a nu leh a pa pawh an lawmin ka chungah pawh an țha tawh mah mah a ni.

A roomah kan inkawm dun a, "Hospital chu engtikah maw hawn i tum a?" a han ti a.

"Karleh lamah a niang, i lo kal ve thei tawh ang chu," ka han ti ve a.

"Han telpui che a châkawm khawp mai, ka thei tawh em ang chu maw!

"Nia, ka phût lui lo che ania," nui var var chung hian ka han ti ve a.

"Anih leh Arem, kan pahnih chungchang hi i ngaihtuah ngai em?" a han ti leh a.

Chhân mai ngaihna ka hre lawk lova, "Ka buai em a, hetiang lam hi chu ka rilruah pawh a lut hman lo..." ka han tih chuan a rilru a nat hmel kher mai.

"Ka hrethiam e, i lakah beiseina ka lo siam thui lutuk a ka tihpalh ani e, beisei ngam tur che ka ni tawh lo tih ka lo theihnghilh a ni, min ngaidam dawn nia, min enkawl tawhnaah ka lawm lutuk e," a ti zawi sap a.

"Maruat....."

"Engmah sawi a ngai tawh lo, tunah chuan ka dam ve tawh alawm, min rawn ngaihtuah a ngai tawh lovang,"

"Maruat, ka tihpalh, tunah mai chuan ka la inpeih rih lo ani, buaina ka la ngah lutuk a, rilru kan intihnat sak nasat tawh em avangin hetiang lam hi ka ngaihtuah duh tawh rih lo mai zawk a ni."

"Kei chuan ka la hmangaih reng che a, ka thih thlengin ka hmangaih dawn che a ni. Ka hmangaih vang che a ka tawrh a ngai dawn a nih pawhin ka tuar mai ang,"

Sawi tur reng ka hre lo, hnuailam ka bih tlat a, keimah avangin heti khawp hian thih ngamin a nâ a ni a, a rilru tihnat sak leh chu ka duh tawh bik lo.

Ka han dâkchhuak a, beisei nei zet hian min lo melh ran mai a, a mitmeng ka hmuh meuh chuan ka tuiral nghal a ni ringawt mai.

"Maruat, kei pawhin ka la hmangaih reng che alawm, ka thinrim em em lai pawhin ka hmangaihna che hi a reh ngai lo," ka han ti ve sap a.

Min kuah thlawp a, ka hmui nel thiap mai chu a hmui chuan a rawn bawhthuah nghal chat mai, ka hmui ka lo kau tiar tiar a, duhthawh lutuk hian kan infawp mawlh mawlh. Kan thaw dun halh halh a, ka khur der der mai. A kut chuan ka hnute a țham nawk nawk a, a hmurte chu a nuai ner ner mai a, ka kawr leh ka bra hak lai chu a ti tawm chhova, a kâ lum hiam maiin ka hnute a han hmuam a, a leiin a han hawl kual vel chuan nuam ti lutuk hian ka lo er tawn tawn a, ka rum hak hak a. Hnuailamah a kut chuan a dap thlang zel a, ka point tak mai a han khawih chiah chuan ka harh chhuak zawk a, ka awmdan hriain min en vat a, thaw halh halh chung hian, "Duhtawk ang," ka han ti a, ka chung ațang chuan a tho ve mai a, ka kawr hâk chu ka siamțha mawlh mawlh a, ka tho ve nghal bawk a.

"Ka tihpalh lutuk, khatianga awm kha ka tum miah lo asin," inthiamlo hmel tak hian a han ti a.

"I thiamloh bik a ni hleinem, ka thiamloh a ni ve tho alawm," ka han ti ve a.

"Kan thutiam kha ka la hre reng asin, i nu leh i pa lung i phun zawhah inneih kan tum anih kha, mahse a thleng ta silova," a han ti leh a.

Ni e, kei pawhin ka la hre reng a ni. Ka la theihnghilh ngai reng reng lo. "Nupui hual i nei ang khan i nu khan a sawi si a.."

"Kha thil kha maw? Kan chhungkaw țhian an ni a, kan nu leh kan pate hian kan inzawm leh zual theih nan kan naupan laiin kan inneih theih nan rem an lo ruat vek a, mahse kan han puitling a, kan duhzawng kan tawng dun ta si a, keiin nang ka tawng che a, ani pawhin hmangaih a tawng a, khatihlai pawh khan an lo innei daih tawh tih pawh kan hre lova, i kalbo hnu khan kan hre leh ta si a, engmah min lo hrilh loh avang khan an inthiamlo khawp a, ka nu chungah ka țuan a, ka rilru natna tihreh nan tiin zu ka in ta nghek a, mahse rei ka in hman lo, chu ka thiltihsual avang chuan ka thi țep anih kha. Min kal bosan avang khan ka â țep asin, min kal bosan tawh suh ang che aw," a ti thawp sat a.

"Engtikahmah ka kal bosan tawh lovang che," ka han ti ve a.

Kan pahnih chuan kan inkuah a, duhthawh takin thawchham dâwnin kan infawp dun vawng vawng a, mahse infawh bak piahlam chu pelh kan tum lo.

-----------------------


Kan hospital hawnni chuan min lawmpuitu an tam ngei mai. Maruata te chhungkua pawh an lo kal ve a, an rilru tur ka hriatthiampui khawp mai. Kha chen kha an ta a niin an lo enkawl tawh si a.

Mahse an lawmna em em chu mihrang daihin lei lova, keiin ka lo leisak chu an lawm hle tih an hmelah pawh a lang a ni.Tunah ngat phei chuan ka lakah an inthlahrung em em tawh zawk a, ka khawngaih letling zawk. An fapa nen kan inhmangaih em avangin inthlahrung tak chungin min be ve hram zawk a ni.

Kan Hospital chu a tir ațangin kan changtlung nghal em em a, Pu Chowdhuri'an an rawn kal theih dawn loh thu a rawn sawi rualin pawisa engemaw zat ka account a a rawn transfer thu a rawn sawi a, "Uncle, thil min tihsak nasa lutuk tawh, engmah ka tihsak ve thei silo che u a, ka inthlahrung tawh ania," ka ti a.

"Ka fanu ah ka ngai tawh che a, kan laka i inthlahrung anih chuan i uncle ah min pawm lo tihna ani dawn asin," a ti ve tlat si a. Ka hnial duh ta lova.

"Anih ka pi chu a dam țha tawh em?" Ka han ti leh a.

"Tunah chuan a zia ve deuh tawh e, lo ngaihtuah reng reng suh, a țha ve zel mai ang, i pi hi be ve ta che, a ngai lutuk che a," a han ti a.

"Awle, ka lo be ve ang e,"


Pi Chowdhuri nen kan inbiak zawh hnu chuan phone chu ka dah ta a.

Kan Hospital chuan beisei aiin pan tu a ngah ve a, damlo inentir an awm ve reng a, Rp pawh a thawk veleh a, kei pawh a neitu ni mahila ka awm mai mai bik lo, nurse mai ni mahila a neitu ka nihna zawnah thawktute pawhin min zahthiam ve em em a, damlo te tana biak nuam lo leh hmel hlim lo pu lo hram hram turin ka fuih ve țhin a, duty tur reng rengin kan duty hmain țawngțaina kan nei hmasa ziah țhin a, chumi avang te pawh chu a ni ngei ang, kan Hospital chuan fak a hlawh ve hle a ni.

Hospital lama kan buai zual a reh deuh hlek lai chuhin ka nu leh ka pa lungphunna tur ka buaipui nghal a, ka patea te'n min buaipui em em bawk a, ka nu leh ka pa bakah ka nu(tak tak) lung pawh phun nghal ka duh a, thlanlung siamtute hnenah ka siam tir vek a. Ka nu(tak tak) lungphunna tur erawh chu ka nutei te pawisa ka thawn a, anni in an lo buaipui thung dawn a ni.

Keimah chauhva ka awm avangin awmpui ka la tawp a, nupa fa nei theilo hi an ni a, ka nu te rual awm vel hi an ni nangin min zahthiam em em. An harsa ve em a, mi in luaha khawsa an ni a, an pa zawk hi a hrisel loh em avangin min rawn dil tawp a, ka khawngaih em avangin ka inah awmtir nghalin an nupa a an thawh theih tur hna a awm bawk a, an fel dunin ka tan an rinawm hle bawk.

Ka buai țhin em avangin Maruata pawh ka tlawh hman lova, phone ah erawh chuan zantin kan inbe thung, tunah chuan Maruata pawh a dam țha tawh khawp mai.

Ka nu leh ka pa lung pawh an peih fel vek tawh a, an thlanah min siam fel sak vek nghal a, a phunni tak erawh chu naktip maiah a ni tawh. Ka nu leh ka pa lung ka phun thei tur chu ka lawm kher mai.

Maruata te chhungkua nen pawh a hma aiin kan intlawh pawh tawh a. Rilru sual pu duh chu ni ila, ka dinhmun țhat hnu a min be țha te hi min tlawn vangah ka ngai ngei ang, mahse chutiang rilru reng chu ka pu hauh silo.

Ka nu leh pa lung kan phun hma ni ah zanriah kan ei kham hnu reiloteah kan kawngkhar bell chu a rawn ri a, inleng tur kan neih awm ka hre silova, ka va hawn nak chuan kawngka ah hian Sanga hi alo ding reng mai a, makti zetin ka en a, "Ehe....Sanga nang maw? Lo lut rawh," tiin kawngka ka hawng zau deuhva, a lo lut ve mai a.

Sitting roomah chuan ngawi rengin min zui lut ve mai a, chutah, "Enge i lo tih dawn a?" Ka han ti a.

"Chanchinbuah in Hospital chanchin ka lo hria a, lawmpui tur che in ka lo kal," tih pah chuan a jacket ipte ațang chuan bawm nalh zeta tuam hi a rawn phawrh a, "Kha ka lawmpui ve na che ah min pawmsak ve aniang chu, min hrilh duh lo mahla, thilpek chu ka pe thovang che," nui suk chung hian a han ti a.

"Anih tak chu, ka lawm lutuk e," tih pah chuan a thil min pek ka han hawn nâk chuan țhi nalh deuh mai hi ka han la chhuak a, "A nalh kher mai, hetiang thil min pek kher a ngai hleinem," ka han ti a.

A thil min pek chu ka phu lo hle mai, Maruata takngial pawhin engmah min la pe lo ania, ka bialpa pawh ni lo lak ațangin thilpek ka dawng zawk chu a ni si a.

"Ka lawm e," ka ti sap a.

"Lawmthu sawi turin thilpek ka pe lo che," a ti leh hmiah a.

Eng eng emaw sawiin kan nui dun hak hak a. Chutah...

"Ka buai theihzia chu maw i hre lo zawk ang, naktuk tuklehah hian ka nu leh ka pa lungphun ka tum a, Ka u Mapuia te inneih kan hmang zo chiah a, chumi hnuah Hospital hawnna tur lamah ka buai leh char char a, tunah kan hawng fel a, buai a tlem deuh lai chuhin ka nu leh ka pa lungphun ka tum leh bawk si a. Delhi ah kum nga lai mai ka awm bo bawk nen, ka phun har zawk em asin. Chuan naktuk tukleh chu i lo kal ve ngei a ngai ang, sawm nawn ngai lovin ka sawm sa che anih chu," Ka han ti duah mai a.

"Anih chu, ilo buai em tak anih chu, umm, lo kal ka tum dawn nia, mahse nang chuan min hre miah lo a, tunah hei ka lo kal a, min hrechhuak leh chauh a nia, kei chuan Thlawhnaa kan inhmuh ațang khan ka la theihnghilh miah lo che asin," a han tih chuan ka phu zawk mai.

Sawi mai tur hre lo chuan ka ngawi ta reng a, ka ring thei lo, hepa hian min duh thei lovang, min duh tur a ni lo, engtinnge ka chhan tak ang le? Ka rilru a buai ngei mai.

Chutihlai tak chuan doorbell a rawn ri leh ta ral ral mai a, ka thaw huai mai, kawngka ka va hawn chuan ka rinloh lutukin Maruata a lo ding reng mai a, a lo nui sang mai a, "Min luhtir phal lo em ni?" A han tih chuan ka harh zawk a, kawng ka kian nghal a.

Sanga a han hmuh chuan, "Inleng i nei tih ka lo hre lova, ka tihpalh," a han tih chuan Sanga chu a lo inrawlh vat a, ka lawm kher mai.

"Haw ka lo tum chiah a, anih Arem ka kal phawt ange, kan la inhmu leh ang chu, anih mangțha phawt le," tih pah chuan a chhuak ta nghal a.

Maruata hmel ka en chuan a lungawi loh hmel kher mai, mahse tihsual ka nei hauh lo, "Khapa kha tunge?" A tih chuan ka phu zawk a.

"Guwahati ațanga thlawhnaa ka rawn haw lama ka hmelhriat a nih kha," ka han ti ve a.

"Hmelhriat satliah ngawt chu a ni lo aniang, in in nêl danah, khapa vang kha a ni lo maw, ka sawmna che i hnar zel ni," a ti hmak a.

"Teuh lo mai, zanin kha kan ina a rawn kal vawikhatna a nih kha, thlawhnaa kan inhmuh bak chu tun ami kha ani leh mai, min rinloh leh i thu thu, insawifiah ngai tur khawp hian ka nun ka thlahdah lo," ka ti ve ta hmak a.

"Ka tihpalh, zaninah hmuh che chak em em in ka lo kal ve a, kan ina lo kal hman lo khawpin i buai lutuk ani tih pawh ka hria, chuvanga lo kal ka ni a, ka beisei loh lutuk ka hmuh vang a ni," a ti sup a.

"Min hrechiang hle emaw ka lo ti asin, mipa buaipui hman pawh ka ni loh hi, chubakah mi pakhat hmangaih ka nei tawh a, a tan ka rinawm tlat dawn ani."

Min rawn kuah thlawp a, "Arem, min ngaidam rawh, ka tihpalh a ni, ka dam lohna hian min ti buai zo tawh a nih hi, nang hi ka chân ang che tih ka hlau em a ni."

"Ka hmangaihna che hi a rinhlelhawm viau em ni a?" Ka han ti nghat a.

"Chutiang lam pawh a ni lo, mipa dang bula ka hmuh thut vang che a ni."

"Sanga kha chu i thik a ngai lovang, kan Hospital hawn min rawn lawmpui ve mai anih kha."

A taksa rem thlap chuan min kuah bet a, ka lungphu chu a rang zaih zaih kher mai. Ani pawh a bang chuang lo. Ka khabe ah vuanin min han kuai dak a, ka hmui ah a rawn fawp ta chawt mai a, kan infawp ngawr ngawr a, kan inthlah hleithei dawn lo emaw tih tur khawpin kan infawp a.

A tawpah chuan min thlah ta hlawl mai a, thawk kan la dun vang vang. Sofa ah chuan kan pahnihin kan țhu dun rial a, "Arem, i nu leh i pa lungphun zawh chu kan ti ve tawh dawn em ni ang?"

"Kumin atan chuan hun pawh a awm tawh loh hi, lungphun zawhah chuan christmas a hnai nghal der tawh asin, Pathian zarah kan dam anga kumthar lamah kan sawi țha dawn nia,"

"Ni e, i ti dik khawp mai, mahse ka nghak hleithei tawh lo a ni,"

"Chhungkua te pawh kan lo inrawn ve ang chu, ka patea te pawh an awm a, i chhungte i biak hmasak a ngai tawh ang chu, a hma ang kha kan ni leh palh ange."

"Chuan, min tlanbosan leh anga maw, ni love, min tlanbosan leh chuan ka dam zo tawh lovang, i tellova damchhung hun hman leh chu ka zuam tawh lo ani. Ka chhungte pawhin ka thu chu an pawm tawh ngei ang. Anih zan a rei dawn, ka va haw phei tawh ange, naktuk chu i buai leh dawn si a, tui takin mu ang che," tih pah chuan a chhuak ta nghal a.

A kal chhuak lai chu ka thlir reng a, chumi hnuah kawngka ka kalh a, ka roomah mu turin ka chho ve ta a.

------------------------



Ka nu leh ka pa lung kan phun ni chuan ka beisei aiin kal an tam a, kan mi sawmte zawngte deuh thaw chu an rawn kal emaw tih tur khawpin an tam a, Hospital lam pawh a țhen a zar chu an rawn tel thei a, heti em a ka nu leh ka pa an lo ngaipawimawh chu ka lawm kher mai.

Zingkarah thlanah ka kal a, hmun khata phum an nih avangin an thlanlung pawh hmunkhatah kan siam tir a, kum a liam ve nual tawh bawk nen tunah chuan ka nu leh ka pa hi a hma ang em em a ngaihna kha ka nei tawh lo, Khuareiin a hnem an lo tih hi a dik tak zet a ni.

Chhunlamah hunserh te hmangin zaihona te kan nei a, an zaitui in, kei ngei pawh ka zai tui ve khawp mai. Ka patean ka nu leh ka pa chanchinte a sawi ve luam bawk.

Maruata te chhungkua pawh an rawn kal ve a, Sangtea pawh rawn kal ve in, a țul țul alo buaipui ve bawrh bawrh a, ka lawm khawp mai. Kan inhriatna ala rei loh tehlul nen, ka tan țhianțha nih a tlin khawp mai. Kan ina alo len zana a thusawi kha a hre leh tawh miah lo emaw ni tih tur khawpin a awm a, kei erawh ka lo inthlahrung deuh.

Tlailamah chuan ruai kilin kan ri mam mam hlawm a, eitu pawh an țhahnem khawp mai. Ei siam lamah fakna ri kan dawng mawlh mawlh bawk, theihtawpa chhungkua țangruala inbuatsaih kan ni ve bawk nen, sawiselna lam ai chuan fakna lam a ri nasa in kan lawm hle nghe nghe a ni.

Hun te a kal ve zel a, Christmas pawh a hnai ta hle mai a, tute chhungkua mai pawh kan phâk ang tâwkin kan inbuatsaih hlawm a, ka naupan lai ațanga nu tellova enkawl seilen ka nih avangin naupang nu leh pa neilo home a awmten hlim taka christmas an hman ve theih nan pawisa mai bakah thawmhnaw leh eitur te ka pe a, an lawm kher mai. Ka nu leh ka pa pawh hian min chhuang ve ngawt ang tih hi ka ring tlat a ni. Ka harsat mangan laia țanpuitu min pe țhintu leh midangte tana malsawmna ka nih let ve theih nan Pathian hnena ka dil țhin ang ngeiin midangte tan malsawmna nih ka tum ang ngeia ka duhthusam ka ti puitling thei hi ka lawm kher mai.

Hospital lamah pawh mi harsa zual tan inentirna a free in ka neih tir a, an lawm kher mai. Damdawi pawh a thlawnin ka pektir vek bawk a. Mahse hmingțhat duh vanga ti ah min ngai ang tih erawh chu ka hlau khawp mai. Kan Hospital pawhin Pathian malsawmna kan dawng nasa reng bawk. Hospital țha ber lawmman pawh kan dawng nghe nghe.

A neitu ber ni mahila ka tilang ngai chuang lo, Damlo te tlawhin hun ka hmang ve țhin a, nuam ka tiin ka nun pawh a hlim hle țhin a ni.

Maruata nen pawh kan in hmu deuh reng mai a, a dam țhat hnu ațang phei hi chuan zantin khellovin a lo lang ziah a, chhunlamah erawh ka buai țhin em avangin kan inhmu thei lo zawk a, kan hospitalah te a lo leng ve mai țhin a, ka haw hun min nghak a, kan haw rual leh mai țhin bawk. A buai ve deuha alo len hman loh chângte hian a theih dwn loh thute min rawn hrilh thlap thlap zel țhin. Tunah phei chuan min care in min ngaihtuah em em a, ka chauh ve deuh chang te hian inah lo kalin eitur te a rawn keng a, kan pahnihin kan eidun mai țhin.

"Kumthar veleh palai ka rawn tir tawh mai dawn ania?" a han ti thawp sat a.

"I thu thu le, 'KAN TIAM TAWH SI.....' a!" Ka han ti ve sap a.

"Ni e, 'KAN TIAM TAWH SI...' a rawn ti thawp ve sat a. In thlahlel em em hian kan infawp dun leh ta vawng vawng a.



A TAWP TA...

(Ka story min ngaihhlutsak tu zawng zawng te in zavaia chungah ka lawm a, in duh ang pawh a pha lovang, in mi hriatthiamna ka ngen bawk e. KA LAWM E.)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)