My Destiny 6

[Lin kholhring88]

An in kawt thleng chu mikhual pa chuan a thlah ta a. Light alo thim vek tawh avang chuan Julie i chu a lawm rilru hle a, zawi sap hian," Engkim ah khan ka lawm em2 ania,"a ti a.

"Lut rawh le," zaidam takin alo ti thung a.

An in mangtha hnu chuan a luhsan ta a. A room a thlen chuan a han in enchianga kha mikhual pa coat kha alo la bat reng chu niin, rang takin a tlanchhuak leh nghala, mahse alo kalbo hman tawh a. Naktuk ah ka pe mai ang a ti ta ringawt a. Mahse a han ngaihtuah chianga, a hming emaw address emaw pawh a hre hauh lo mai,a lu chu a beng dat a, mawl lutuk! I tan khatiang zawng2 kha a ti a, a hming tal te chu zawt ve ta che tiin amah leh amah chu a inhau ta mawlh2 a. Engpawhnise, tiin a inthlak ta ringawt a.

A thawmhnaw tet pheng phung chu anu in a hmuh a hlauh avangin, polythene ah a thun a, almirah kil khatah chuan a thukru ta a. Mark a tihdan zawng2 chu a han ngaihtuah let a, a ngei lutuk chu a luak te hi a chhuak ut2 thei hial a. Engtinnge khatiang mihring kha alo duh theih a, a engkim alo hlan theih zawk le? Hmuh leh pawh a duh tawh lo a ni....

A tukah chuan rilru thar a nei ta a, he hotel a hian ka thawk reng tur ani lo, a tul anih chuan ram dangah pawh ka thawk mai tur alawm. Agency ka be kual anga, hei aia hna tha ka hmuh theihna ah chuan ka kal hmak ang a ti rilru ta a. Eliana i chu a tum dan a hrilh a, ani pawh chuan," ka kal ve ang i bulah chuan," alo ti var a.

Eliana i chu ka thian tih tur a neihchhun a ni a, a ni lah alo fel ve bawk nen, awmdun thei sela Julie i pawh chuan ati hle a.

Chumi ni vek chuan agency hrang2 chu Julie i chuan a be kual ta a, hnaruak an neih chuan an rawn hrilh leh tur thu tiamin an thlah tlangpui hlawm a. Eliana i chu phur tak chuan a hrilh sarh2 a," Kan vanneih chuan thawhna tur kan hmu maithei ania,"

"Kan hmu em2 ang, ka ring tlat!" tiin alo chhang ve thuai a.

Mahse chumi ni chuan khawi agency mahin an rawn phone lova, naktukah min lo phone mai ang tiin an hawtur chu an in thlah ta a.

Zana a mut hma chuan thil a ngaihtuah kual mai2 a, Eliana in nizanah khawnge a awm tih a zawt lo te kha a lawm em2 a. Chumi piah lamah chuan, amah rawn chhan tu kha tunge ni ang? A hmel leh a incheina en kha chuan mi mai2 chu anih a ring hauh lova. Hotel dincham hmang tur chauhvin alo kal anga a haw leh nghal anih a ring ta ringawt a, a coat pawh chu a sufai vek tawh nain pektur emaw thawn natur a hriat loh avangin, a dah ta tawp a. A mamawh anih chuan arawn lam mai ang chu te a ti ta ngawt a.

A tuka mikhual an room tura a hruai fel hnu chuan, room ruak chu enfel turin a kal ta a. Room hi tupawn an chhuahsan chuan, hnathawk ten an tih fai leh fai lohte en tur chuan Julie i chuan room ho chu a fang kual dan2 thin a. A list a room ruak chu a en kim deuh vek tawh a, sawisel tur a nei zeuh2 bawk a. A tawp ber enfel tur a neih entur chuan kawngka chu a hawng ta a. Mipa towel nen chauhva whiskey dawma lo teikual thauh2 chu a hmu ta thut a, chupa pawh chuan kawngka inhawng ri chu hria in arawn hawi phei ve nghal vat bawk a. Ka duh thei lo....hepa hi nizana min rawn chhan tu ngei kha a ni! Mahse he room hi ruak tawh tura ziah ani si a, a list chu an en nawn leh pawh chuan a ruak tura tih ala ni thova. Phawk hra chuan an inmelh dun a, "Oops! Ka tihpalh lutuk sir, ih....englo ania....he room hi tun ang hunah chuan ruak tawh tura ngaih ani si a...chuvang.....,"

"Ka chhuak leh dawn lo alawm, tun lawk ah khan reception ka hrilh chauhva, an la rawn hrilh hman lo che anih ngei dawn chu," nui ruh2 pah chuan a ti a.

"Oh....anih chu. Ka tihbuai che avangin min ngaidam dawn nia," hnuailam melh pah chuan a ti a.

"A pawi hleinem....i tha zel maw?" pangngai tak hian arawn ti a.

"Ka tha alawm....ih....i coat kha ka rawn dah kir dawn nia...," a ti ta a.

"A ngai chuang hleinem, mahse i tih tlat chuan a pawi chuang lova....," nui deuh suk pah chuan a ti a.

"Hun nuam deuh i hmang dawn nia, ka kalsan phawt ang che....,"

"Awle...in enkawl tha la aw....,"

A chhuah dawn a kawngka a khar hma chuan nui ri hawk chu a hre zui a, a zak lutuk chu a sen chhuak vek a. Mahse kha pa kha a hmeltha thlawt a ni tih erawh a hai hauh lo. A pian lah chu a mawii in model te pawh a ang hial hian Julie i chuan a hria a. A nuih zawnga a biangsum rawn lang kalh thin te lah chuan a ti hmeltha zual em2 bawk a. A sam chu a dum hlap a, a vun pawh ni em than tih a hriat hle bawk a, tin a mitmeng mawlh mai kha a ni nalh chu tiin kal pah chuan a ngaihtuah zui neuh2 a. Mahse i chesual zo chauhva, mipa dang chu ngaihtuah duh tawh suh, i vawikhat ngaihzawng neih avanga i tuarna kha i hre tawh nange...tiin aw sin te hian a bengah chuan arawn ti sar2 a. Hreawm tihna hian Julie i chu a khat nghal a, mipa hi ka hnaih tawh tur ani lo, tiin a inzilh nghal mawlh2 a.

Counter a thlen thlak chuan Eliana i chuan,"Enteh Julie, kan Hotel ah hian tunge thleng mek i hria em?" alo ti ruai a.

"I sawi duh chu sawi mai teh!" a ti hmak a. A chhan chu a thiannu chuan mi hausa deuh2 an Hotel a thleng hi a sawi chak zawng leh sawi nuam a tihzawng anih avangin a ning deuh hlek thin a.

"Robb Marshall a, hi i hre ve ngai em?" a ti sarh2 a.

Ngaihtuah lem lo chuan, "Hre ngai e...... ," a ti a, mahse a harh chhuak thut a," Engmaw i sawi kha?" phawk tawka a thiannu en pah chuan a ti ve ta a.

"Kha maw....ka thil sawi hi i ngai pawimawh ngai lova...," tiin a hmui chu alo tisawi zauhva.

Nui ar2 pah chuan," Ava ropui ve ani ang milian te kan hotel a arawn thleng chu....kha billionaire pa magazine a pawh a thlalak kan en tawh kha ani lawm ni i sawi mek hi?" a ti hau a.

"Ni e mawle....kan pu ber chu a inti thei leh ngawt ang chu....," alo ti hlak a.

"Awle...awle...nia a ropui em bawk alawm, ani ang mi hausa leh thil tithei alo thleng duh chu...,"

"Nupui ala neilo an ti lehnghal ania...,"

"Chu2 enge kan tana a tangkai na," nui hak2 pah chuan Julie i chuan a lo ti a.

"Theihngilh teh! Room service i tihthat hle angai ania tih ka hrilh duh mai che ania,"

"Awle....khawi room ah nge a thlen a?"

"No 566 ah,"

"Maw? Chuta tang chuan ka rawn chhuk chiah alawm," a ti ta hau a. Nizana amah rawn chhanchhuak tu kha Robb Marshall a maw lo ni a? Engtinnge a hriat loh theih zawk? Mahse ani ang mai2 chhanchhuak tura arawn kal te chu tunge ring bik ang? A thiannu chuan hre ta sela zawhna hlirin a khat nileng ani mai.

"I hmu tawh amaw? Tinge i sawi si loh?" meng phawk hra pah hian a ti a.

"Amah ani tih ka hre hleinem. Bakah a room kha ruak tawh tura tih ania, mahse alo dil belh chu niin, ka lut sual alawm,"

"A hmeltha em? Alo fel em?"

"Ngawi lawks! Zawhna kha maw i duhtawk thei ang. Ka hmeltha tihzawng ani ve lo...,"

"I mit hi dik hek lo le...," a lo ti hlar a.

Nui hawk2 pah chuan," I hmuh chak viau chuan ka room fan ai han kal la ti nia,"

"Mahse incharge ka ni si lova...," hmel ngui bar chuan a ti a.

"Awle...a kalchhuak tur te pawh hmuhtur ala awm mahna, tunah chuan hei ziahfel tur ka ngah ania...," tiin register chu a ensan ta daih a.

"I va han sual tak e aw....heta ka awmlai a alo kal loh chuan ka hmu ve top nang," a ti nang2 a.

Register a en fela, ziahfel tur te a tihzawh chuan," Hawh lunch ei ve lawk ila?" tiin a thiannu chu a nghawk zeuhva.

"Kan awmloh hlanin lokal ta se," ala ti hram a.

"Awle...tikhan lo nghak la, ka va ei mai ang," kal tum deuh anga awm pah chuan a ti a.

"Nilo....niloo...ka lokal ve ang, ka ril a tam tawh lutuk," tiin Julie i kaltur chu a zui ve ta a.

Canteen a thua thil an ei mawlh2 lai chuan, an canteen chu a phun ri hian a thum deuh hak a. Enge thil awmzia tih hriat tuma Julie i an hawi chhuak chu, Robb Marshall a ngei mai chu canteen chhungah chuan alo lut mek lai hi ava hmu ta a. Arawn hmuh hlau chuan a kun nghal hmak a, engemaw hetah te arawn tih ve dawn le? A room ah a tui2 order in a ei thei reng awmsia,tiin a ngaihtuah rauh2 a. A zawn a rawn thlen chuan arawn hriat lohnan lehlam a hawi lui daih a, Eliana i lah chu ring tawk hian alo thaw hak a.

"Julie, a rimtui inhnawih kha ilo hria em? Kha ringawt pawh khan min ti a lo chauh ania, amah phei saw chuan min han attchilh mai sela.....,"

"Ei mai2 teh. Ka kalsan i duh loh chuan," tiim alo zilh hlak a.

A thil eilai ei chhunzawm pah chuan a phun zui nauh2 a," Nang hi chu i mawl chiang alawm, sawtiang mipa pawh hmeltha tih nachang i hrelo ania,"

"Nia ka mit hi a chhe lutuk aniang," nui hak pah chuan a tihsan mai2 a.

Robb a chu an manager pakhat nen an thudun a, canteen thil arawn enfiah em niang aw, mahse ani in engatan nge arawn enfiah ang? He hotel ah te chuan mikhual mai ania, helaia tihtur a neih awm ang chu Julie i chuan a ngaihtuah chhuak zo hauh lova. A thiannu in, "Kal ila, i hmanhmawh chincheng bawk a,"a tih chuan an tho duna, canteen chu an chhuahsan ta nghal a. An counter an thlen chuan Julie i chu a thawveng huai a, mahse kha pa kha hmeltha a ti ve chiang alawm. Naktuk ah a coat kha ka pe kir ngei tur a ni, mi zingah te min dil anih vaih chuan a zahthlak dawn si a, a ti rilru nauh2 a.

A tukah chuan Robb a coat chu a pack thlapin a keng ta ngei a. Room vel enfel tura a kal kual paha pek nge tha anga, hotel reception vela a kal kual lai a hmuh huna pek chu tih a ngaihtuah a. Mahse hotel reception vela a pe anih chuan Eliana i chauh nilo midang te pawh chuan zawhtur an ngah dawn em avangin a room a dah chu tha in a hre ta zawk a.

A room zawn a thlen chuan alo in kalh thap a, a chhuak anih ngei dawn hi a ti a. Mahse a chahbi spare neih chu hmangin a lut ta thova. Dawhkan awm hmasa berah chuan hmuh awlsam turah chuan a dah ta a. Paper ah chuan,' Ka lawm e,' tih hi a ziaka a pawtthla a, coat chungah chuan a dah nghala, midangin an hmuh hlau tak chuan a chhuak ta a.

Lehlam takah chuan a tho chu a veng hawk a, a chhan chu mi thil kawl reng kha a inthiam chiah loh mai bakah a nu in a hmuh a hlau em2 bawk a. Tunlai chu a nu pawh a buai em avangin zanah pawh hian an in hmu tha hman ngai lova. Chaw eilai lahin ti ti na hun a awm ngailo nen, thu pangngai sawi phei chuan an inbe hman mang lo hi ani ber a. A naute pawh an zirlai an chhunzawm leh tawh avangin an chhungkua chu mahni buai buaiin an buai theuh hi a ni ber a. Mahse hmasawn an duh anih si chuan angai ve bawk si a.

Chutiang vel a ngaihtuah lai chuan a phone chu arawn ri ta ral2 a. Rang takin a en thuai a, agency khawi emaw ber number ani tih chu a hre mai a," Hello.... Julie i ka nia," a ti ta thuai a.

"Hna chu a ruak a, mahse London ah ania. Hlawh tur pawh a tha phian ania," hmeichhe pakhat chuan arawn ti zarh2 a.

"Awle...ka lawm lutuk e. Engtik atanga tan tur nge niang? Chuan hlawh te engzat nge ni dawn?" tiin phur tak hian a zawt a.

"Hlawh chu Dollar sangnga ania, mahse in thawh that dan a zirin bonus pawh a awm thei ang. Chuan thla thar atanga tan tur ania,"

"Leh lawks aw...eng hna ber nge ni kan thawh tur chu?"

"Office ah ania, chuan in hna ber chu in thawh tan hunah in hotu ten an hrilh ang che u...,"

"Awle...awle....ka lawm lutuk e. Ka rawn be leh thuai dawn che nia,"

Inhnuai lamah chuan hmanhmawh takin a tlan thla a, Eliana i chu a zawng nghal ruai a. Chutia a hawi kual na lamah chuan bang hi a tauh ta chawrh a. A lu chu a nat em avangin a tuai nauh2 a, mahse an enchian chuan bang alo ni awzawng lo, Robb Marshall a khawimaw lai berah emaw hian alo intuah chu niin. "Ka....ka....tihpalh Mr. Marshall...."

"Hmm....chetsual hi i tih than ve reng em ni?" alo tiril ruih a.

"Aih....ni hauh lo mai. Englo ania....ka thiannu ka zawng a...," a chal la tuai vat2 pah chuan a ti niah2 a.

Nui hawk2 pah hian," Awle....i chesual ka hmu leh vaih che anih chuan min treat i ba tawh ang," fiam deuh pah hian a ti a.

"Ka tihpalh takzet....ka kal tawh mai ange,"tiin a kalsan ta nghal a. Engemaw kha pa kher2 chu ka va hmuh lehpek chu le....ka kalna apiang ah hian alo awm ve zel tihna em ni le tiin a phun phei mawlh2 a. Eliana i chuan,"Nangmah leh nangmah i inbia ania? Mak tih hmel zet hian alo ti a.

"Nangmah vang vek! Khawnge ilo awm leh hman pek a...," a ti hlar a.

"Maw....? Hetah hian ka awm reng alawm. E nilo....manager in min tir lawk a...enge ni ta?"

"Agency khan min rawn bia a, London ah thawh natur chu a awm a," tiin a hrilhfiah ta zung2 a.

"Awle...ka duh e, mahse chu aia hlawh thatna chu ala awm angem?"

"Ka hre hauh lo mai, mahse thla thar atanga tan tur ani thova, duhleh agency dangte min rawn phone hun pawh kan la ngaichang thei alawm,"

"Ni e, thu titluk ringawt pawh kha a finthlak ber lovang, mahse Landon ah chuan Robb Marshall a pawh a awm ania,"

Meng dur deuh khap pah chuan," Ngawi mak rawh!" a ti hlak a.

"Enge ka sawi ve chak alawm, a hmeltha em ani,"

"Anih chuan ka biak sak dawn che nia,"

An manager alo kal avang chuan an thusawi lai chu an duhtawk ta a. Tihtur vel chu a rawn hrilh zung2 a, a sawi zawh chuan kal leh mai hi a tum a. Chutih lai tak chuan Eliana i lah pek chuan,"Sir, enteh vawiin khan Mr. Marshall a kha enga tan nge canteen ah khan alo kal a?" a ti ta a.

Julie i chuan a hnungah chuan alo sik a, mahse a ngawi duh chuang der si lova, a sawitur chu a sawi zo ta tho chu ania.

Manager chuan," Oh, kha2 maw...nia an company siamchhuah package food tam tak hi kan hotel ah hian kan hmang a, alo kal takah chuan enge a an hriat a duh mai ania," a ti a.

"Anih chu, mak ka lo ti mai2 ania. Ka lo hriat loh em avang anih chu, Sir," nui var2 pah hian Eliana i chuan a ti a.

Manager a kal hnu chuan," Kha i hriat hauh loh ka zarah i hriat leh phah kha i hria em?" inti thei taka hawisang vah pah chuan a ti a.

"Ka tlawm e..... Ka pi," thaw hak pah chuan Julie i chuan a lo ti a.

Chawhnu lamah chuan an buai2 in an buai leh mawp2 a, inbiak na hun pangngai pawh an nei leh tawh lem lova. Chutih karah chuan Julie i chuan a rilru te te in Robb Marshall a chu a ngaihtuah zui reng thova, enge a chhan pawh a hrelo, a nui hmel kha a chhelo em bawk a ni. Mahse mipa hlat tur tiin a infuih ru leh sauh2 a.

A tukah chuan an hna chu angai te bawkin an thiandun chuan an ta leh ta mawlh2 a. Julie i pawh room fang tur chuan a kal leh ta ngei a, Robb Marshall a room zawn a thlen chuan kawngka chu arawn inhawng ta thut a. A phu nasa lutuk chu Robb a chuan alo nuih chiam a,"Miss, ka tihlau che chu pawi ka ti hle mai,"

""Aih, engmah ani love,"

"I lehkha leh coat kha ka hmu a...,"

"I ta ania ka rawn dahkir leh ngei tur alawm,"

"Miss enteh, hman zana thilthleng kha ka sawipung dawn hauh lo ania, khatianga min hmuh hleka hlauh kha sim teh!" a ti dam dup a.

"ka hlau hauh lo che,"

"Anih chuan zanin ah dinner min eipui duh angem?

"Ka theih ka ringlo,"

"Awle...ka tibuai che a min ngaidam dawn nia," tiin a kalsan ta nghal a.

Eliana i chu nise a aw ngei ang, mahse kei atan chuan mipa hlat hi ka tihtur hmasa ber ani fo tur ani. A hmeltha alawm, mahse Mark a pawh kha dinner ei atanga engkim kha intan anih kha! Eliana i chuan hria se mawl min ti ngei ang, mahse ka mawl love, mawl pawh min ti se enge pawi? Ka chunga thilthleng tuma bula ka sawichhuah ngam ngailoh tur hi tunge hre ve chuang? Mikhual ania, a haw leh mai anga, lo hnimhnaih kha engmah sawtna a neihloh mai bakah mipa hi a awmfal pui tawh tur ani lo. Mahse dinner ei te chuan i awmfal pui ani dawn hleinem, aw sin te chuan arawn ti a. Ani tho mai, mahse dinner zawhna khan min pawngsual ta sela tiin amah leh amah chu a inhnial a. Julie tia ko ri a hriat takah chuan a lu chu a thing nawk2 a, aw lo chhuahna lam pan chuan a kal ta zawk a.

Room tifai tu pakhat hian room a thil siamthat ngaite chu a hrilh zung2 a, Julie i pawh chuan a thil chhinchhiahna ah chuan alo ziak ve zel bawk a. An zawh fel hnu chuan,"Awle manager ka lo hrilh dawn nia,"tiin inhnuai lam pan chuan a kal thla ta nghal a.

A tihtur a zawhfel meuh chuan an ban pawh alo hun veleh reng tawh a. Chau deuh hnawk hian a inhria a, nidang aiin ka thawk nasa pawh ani lova, engemaw a awmzia le...tiin a ngaihtuah rauh2 a, a chhanna chu a hre rang khawp mai, Robb Marshall a vang vek ani tiin hotel chhuahna lam pan chuan a pen ta sawk2 a.