Shino hnim buk phen ah chuan a biru kak a, a en hnaih na chuan a nau te che vel chu a en reng a, "Ehe thil te a lei vel a thlem tan a ni Chiang lutuk, tenawmpa chu amah si chet a an kal le, han Khawih vaih teh se, a chak lo ang chu aw" ati nuah nuah a, "Johna chu alo zei hle mai a" tih ri ah chuan aphu zawk a, a hnung lam ah chuan a let thla tawp a, "Hi Prez, I tha em?" tih pah a Sharon an a rawn chhuk en ah chuan a tho zawt a, "Nang Milawilo pa" ati thawt a, "Prez an rawn en che nia" tih pah chuan Johna leh Zorini lam chu a melh zawk a, "Hrep chuan, nangmah vang vek, lo kal nghal rawh" tih pah chuan a kai lawk a, chak zet in a tlan pui nghal a, hla tak an thlen chuan "Eng ah nge I lo kal ve a, Mawla, mi zui ruk ching ami inih a, ilo lang ve hman ziah ringawt mai" an ding chiah chu Shino chuan a vin leh nghal hlawih hlawih a, "Kei chuan ka zui ru lo che a, nang erawh chuan I naute I zui ru thung a, kei chuan enge itih ka rawn en mai nia" alo ti mual mual a, "Hmh, chu pawh nise ka nau ka ven him a ngai lawm, haw rawh ka phei leh dawn" Shino chuan alo ti hmuk hmuk a, "Awm tir mai mai rawh, Shino, Johna chuan thil tha lo a ti lo ang tih I hriat kha" Sharon chuan a ban ah a vuan chawt a, Shino chuan a en ha a, Shino tih hian a ko ngai lo a vawi hnih kohna chiah ala ni, mahse a hming a lam hian amah enge maw riau hian nghawng a nei tlat in a hre lawi si, Sharona chuan Chiang deuh in a lo en reng, Shino chu a harh chhuak zawk a, "Ka hria, ka bike saw tah sawn a awm a, ka la anga ka haw dawn" awm ze nei lo zet chuan a au khum chiam ringawt a, a kal nghal hmuk hmuk a, Sharon chuan a en zui reng a, "A vawi khatna" a ti chhuak sap a, anui zui suk a.
Zorini chuan "Senior tun ami kha, Shino ani tiraw" ati a, "Haw a hun tawh anga min rawn ko dawn ani ang a" ati zui neuh neuh a, Johna chuan "Ah, aih, ni lo, President chu ani lo" a ti chiam ringawt a, "Ani lo maw, Senior alo ti sap a, " Ah, ih aw, aw, ani lo, Zorin in buk I duh em?" Ati teh nuaih a, "Aw duh e" Zorini chuan alo ti sap a, 'Zorini hi, Robot ani tak tak amawn le, anui ngai bawk si lo, sawi ang a piang in a awm tawp a, lehkha a thiam thei em em bawk si' Johna chuan a ti rilru neuh neuh a, 'Eng mi pawh ni rawhse a pawi lo, ka duh zel dawn, a tar ve thei lo nih pawn ka tar thleng in ka duh tho tho ang' tih rilruk pah chuan a in seh ruh a, Zorini a hma a akal thla thlep thlep chu a en reng a, "Zorin engpawh ni la, ka en kawl ang che I kiang ah ka awm reng ang" ati vak a, Zorini chu muang chang in a ding a, a rawn in her a, "Senior" ati sap a, "Awle, Senior kei pawn ka en kawl ang che" a ti let ve vak a, Johna chu lawm zet in a tlan tla a, a kuah chawt a, "Ka lawm e, Zorin, ka lawm e" a ti mawlh mawlh a, a kuah na chu a tlah a, lawm luat avang a, mittui parawl teuh chuan a en a, Zorini chuan "Kei pawh le, Senior" alo ti fel than a, Johna chu a hlim ngawih ngawih hle mai, kal pah chuan a ti ti a, anui hak hak a, Zorini chuan a en reng a, 'Senior hi a fel tak zet ani, a tan ka awm reng a, ka puih a ngaih chuan ka pui ziah bawk ang' a ding reng a, johna chuan a kiang ah Zorini a kal tawh lo tih a hriat chuan a ding chawt a, a hawi let vat a, "Zo" ati hman tawk a, "Senior ka lawm e aw, puih ve theihna che ka neih phawt chuan kei pawh nang enkawl let tur che in theih tawp ka chhuah ang" Zorini chuan alo ti malh malh a, Johna chu a ding khawng luh a, "Zorin, engmah I hre thiam lo tiraw" a ti chhuak sap a, a ngui nghal nghiai a, "Senior enge ka hriat thiam tur chu awm a?" Alo ti ha a, "engmah ni lo e" ati sap a, "Tirawh, haw tawh ang le" a ti zui nghal zat a. "Awle Senior" Zorini chuan alo ti nghal vat a, an kal dun hnak hnak a.
Rema chuan a phone ri chu hman hmawh zet in a chhang vat a, Tei chuan "Rema" tih leh ring zet a tah a rual a, Rema thin chu a phu nghal hlawp hlawp a, Tei tap vawikhat pawh ala hre lo, a thawng ngawih ngawih, 'Tei a tap,Tei a tap, enge thleng, engtin nge ka tih dawn' a ti rilru mawlh mawlh a, a mah chu a vei nghal chung a, "Tei, tei, enge thleng, enge thleng" ati mawlh mawlh a, "Ka Barbie lu a bung" tih pah chuan Tei chu uar zet chuan a tap zui leh nghal a, Rema chuan "Ehhh" tih pah in a thu thla hnawk a, "Tei" ati chhuak leh sap a, "Eih ah, Rema, ka Barbie duh lai kha" a rawn la ti tiau a, "Bang tawh rawh le, khawi hmun ah emaw ka hruai che I duh em?" Ati dam diai a, "Khawi ah" a ti tiau a, "Hmun nuam deuh ah" alo ti sap a, "Ani tah chuan kan in do thei dawn mi?"in sut fuih fuih pah chuan Tei chuan a ti a, " Aw teh reng mai" alo ti vat a, "Anih chu ka commando suit nen ka rawn kal dawn, ka in siam nghal" phur zet chuan a ti a, "Awle ka lo lam ang che" Rema chuan ati zat a, anui suk a, "Awle, nang pawh I army full uniform nen khan lo kal rawh, ka dah nia, ka in siam" tih pah chuan a dah zui nghal a, Rema chu anui sak a, "Awle, Tei" ama hriat tur lek chuan a phun sap a, a in siam zui ve nghal a, a kal tur chu, Anu in alo hmuh chuan "Awiii, Rema, engthil nge I tih a" ati thawt a, a fapa chu a en tlawk tlawk a, "Ka chhuak lawk dawn nia aw nu" Rema chuan alo ti liam puat a, "Rema I hriat na I hlauh ami, kha tiang kha engtin nge tlangval pui tawh dawn si in a I hak theih" Anu chuan alo ti leh chiam a, "Ka kal ania" tih leh kal a rual daih a, Anu chuan "Pa a, Rema kha" ati hram a, Rema pa chuan "An in fiam dawn aniang chu, buai viau thin suh" alo tih san mai a, Rema chu a tlan chhuak zui nghal a, Tei te in a thlen chuan alo in peih nasa tawh mai a, Rema chuan a hmuh chuan anui sak a, "hma kan sawn ve thei ngai dawn lo nih hi tiraw" tiin a ma hriat tham lek chuan a phun sap a, Tein a rawn hmuh chuan phur zet in Rema lam pan chuan a tlan phei vawn vawn a, "Kal ang kal vat vat a, ka chak tawh lutuk" bike a rang zet a lawn pah chuan a ti nghal tawt tawt a, "Awle,Madam" alo ti vat a, Tei a phur zual sawt a, an tlan chhuak zui nghal a.
Tei chu thing phen ah chuan ding in a biak khatna lem hman chuan thu thawn ni awm tak in "Tango, siara, tango siara, hei hi, tiger ani, tun ah hian kan hmelma te nen kan in nuai mek a, Kawng lak ah lam bun kan ni a, mi pawh kan in chan chual tawh, tun ah hian kan din hmun a der thawng hle ani, mi in rawn tirh belh theih chuan kan lawm ngawt ang, over" ati mawlh mawlh a, Rema chuan a chhak lawk a tang chuan a thlir reng a, a nui vur vur a, "Hmeichhia a zawng a tha leh rilru thiang hlim ber ini" ati sup a, Tei chuan aveh nasa hle mai, Reman a thlir reng tih hre hek lo, "Tango siara, Tango Siara, hei hi tiger ani, kan mi te a chan ve aia tam kan chan tawh a, mi dang in rawn tirh vat loh chuan kan in chan zo mai ang, over, aw, sir an lo thlen hma chu kan lo chelh thei ang, Over" a ti leh lauh lauh a, "Awii tu nge a,a mawl ami a, mi ang lo ani mawn le" hmeichhe pathum leh mipa pahnih te chuan Tei chu an nuih zat vel a, Rema chu a ding chhuak zat a, a tum thla chhak a, "Ding rawh" ati that a, Tei chu a ding chawt a, "I hman rua dah thla la in pe rawh" A ti that a, hmeichhe leh mipa pahnih te chu an lo hawi ho a, "Tei chu a in her a,nang ni ram phatsan tu kut a thih ai chuan ka kut zal ngei a thih ka thlang e, Ringer Squad dam reng rawhse" ati that a, a silai chuan a in kap zui nghal a, Rema chu anui sak a, Tei kaih thawh pah chuan "Chawl tawh ang le, I ril a tam em" ati dam diai a, "Awi tam" tei chuan thut thlak hnak pah chuan a ti a, a helmet chu ala tla a, "Alum lutuk" tih pah chuan a kawr chu a phelh sat sat a, Rema chuan a kekawr ipte tang chuan coke Cain pahnih a phawrh a, pakhat chu Tei a pe a, a kawr chu a hlip ve nghal a, "ah, kha kawr kha a hnuai ah I lo ha ve tho law?" Tei chuan a ti chhuak hluai a, Rema chuan "Aw, a in ang in kan lo ha law" tih pah in a kawr ip te chu a zen rak rak a, Sandwich pahnih a rawn phawrh a, pakhat chu Tei chuan alo la vat a, "Ei tur a vang in ka lawm e" tih pah chuan a ei zui mial mial a, Rema chuan alo nuih var var a.
An nghah hleh em em chu an thleng ta, Shino chu a buai hle mai, an cafe siam ah chuan ava en fel pui ngai bawk, Sportna lam a en ve reng ngai bawk nen, a buai ve hle mai, a tlan kual deuh chhen ani ber e, Zorini chu a kal hnek hnek a, a hriat thiam miah lo thil kha ala ngaihtuah char char, Joi amah chauh a lo thu kak a, volley ball beng lo thlir dauh dauh bul ah chuan ava thu a, "Joi" ati sap a, Joi chuan "Aw Zorin, enge ni ta" alo ti vat a, "Ih maw, miin ka en kawl ang che I kiang ah ka awm reng ang an tih hian eng an sawi na nge?" A ti neuh neuh a, "Chu chu maw Nupui a in sawm na nih chu" Tei chuan rawn thur ve pah in, in ti hre zet in a rawn ti a, "Ani maw, anih chuan ka ngaihtuah ngun hle a ngai anih chu" Zorini chuan alo ti sap a, Joi chuan "Ah, zo, Zorin, ani lo" alo ti bah nawk a, "Ka lawm e, ka kal ange" tih pah chuan a kal zui leh mai a, "Senior hnen ah ka in ngaih tuah phawt ang tih hrilh ila a tha ang" ati leh sep sep a, Johna chu a zawng zui nghal det det a, Johna basketball khel zo chau zet a rawn kal nen chuan an in tawk chawt a, "Senior" ati sap a, "Zorin, khawnge I kal dawn a" Johna chuan alo ti sap a, "Ka lo zawng che a, Senior nimin a I thu sawi kha ka hre thiam tawh e, in neih chung chang chu ka lo la ngaihtuah ngai miah lo a, ka lo in ngaihtuah phawt ange aw" a ti fel thlep a, Johna chu a bek dawrh a, "Eh eng,Engmaw?" A ti tial ruan a, "In ngaihtuah na hun min pe rawh Senior" tih pah chuan alo bu darh a, "Zoh, zawh, ah, zozzorin" Johna chuan a ti chhuak thei tawk a, Zorini chu a in her a a kal zui daih mai bawk si a, Zorini chuan "Engtin nge ka tih ang le, in neih tur in ka la naupang viau angem le, Senior hian min nei duh si a, kei pawn ka en kawl ang che ka ti tawh bawk si a" ati sep sep a, a phone chu a la kang a, a pa a call vat a, a pa chuan "Aw enge ni, ka naute duat" a rawn ti vat a, "Pa, pasal neih I phal angem le, pasal neih ka ngai a" ati chu thawm engmah a awm lo hrim hrim, Zorini chuan "Aphal anih dawn kha" tih pah chuan a dah mai a, a pa chu phone ri tawt tawt chu angai thla reng a, a mittui a luang nghal zawih zawih a, "Zorini pa, enge thleng a" anupui chuan a rawn ti vat a, "Shinoi nu, Ka fanu Zorini, Zorini khan pasal neih min dil ani" tih pah chuan a mittui chu a sur zui leh zung zung a, nupui chu alo tlu nghal tawp bawk a.
Joi chuan "Zorin" tih pah in Zorin chu a zu vuan chawt a, "Joi, buaina I tawk em ni?" Alo ti nghal vat a, "Ani lo, eng lo, ah ka tih palh eng lo, na, nachin ami kha, a dik lo" ati nuaih a, "Enge dik lo" Zorini chuan alo ti vat a, "Eng lo, kha tiang kha mipa in a hrilh che chuan a ngaihzawn ni tur in a asawm che tihna ania, chuan nang pawn ka en kawl ang che ti a I chhan let chuan I pawm tihna ania, engmah I sawi loh chuan" atih malh malh lai chuan Zorini chuan "Senior ka hrilh leh vat angai anih chu" alo ti daih a, a kal zui nghal mai a, a zawng kual nasa ang reng hle mai, hmeichhe pakhat in class room a tang a, "Senior John" tih ri a hriat chuan a pan nghal vat a, chu nu chuan "John,ah Senior, kei hian ka duh lutuk che a, khawngaih in min chhuah pui rawh" ati a, Johna chu alo ding khawng reng ringawt a, "Aaa, ih ka, ka thei lo" ati bah nawk a, "A thei lo, kei mah hi angaihzawng ka ni tawh, chuan ka ngaihzawng ani tawh bawk, in en kawl kan tiam tawh" Zorini chuan kal phei pah chuan a ti zet zet a, Johna chuan a en ho a, "Zorin, I hre thiam ve tawh maw?" Ati lawi rat a, "Aw Senior" alo ti vat a, lawm zet in anui chhuak hawk a, "Ni e, ani hi ka bialnu ani, ka tih palh ani e, ka chhuah pui thei lo che" Johna chuan Zorini chu a ban leh lam a kuah pah in a bul ah chuan a pawt hnai a, chu nu hnar na thu chu a sawi zui nghal bawk a, "Senior, I nun a rawng hle mai" tih pah chuan chu nu chu a tlan chhuak chawn chawn a, Zorini chuan "Senior in ngaihzawn na chung chang engmah hriat ka nei lo a, ka lo zir Chiang anga theih tawp ka chhuah dawn nia" alo ti zat a, "Awle, Zorin ka lawm e, I hriat thiam a vang in ka lawm e" tih pah chuan a kuah vawng vawng a.
Kimkimi chu Philipa tih luihna ang in cafe ah chuan a phe buai ve hle mai, a thin a rim ru teuh tawh a, mi tam lutuk te chuan a lu an ti na ngawih ngawih in a hria a, "Kimkim, lo kal teh" ti tu lam chu a hawi vat a, Philipa chu a in khelh kawr nen chuan alo ding ran a, Kimkimi chu a ding awt a, a hmeltha lutuk a hmeltha tak zet, a hmu tha mah mah ani, "Esther Kimkimi hi kan hruai hrang lawk ange aw" ati a, Esther-i chuan "Awle, Vice president" alo ti vat a, a hna thawh chu nuam a tih hmel phian leh nghal a, Philipa chuan Kimkimi chu a kai chhak zui nghal a, library ah chuan a kal pui a, "I chau em, ka chhang che nia aw" ati sup a, "Chhuan pawh ka ngai lo" Kimkimi thut thlak hnawk pah chuan alo ti a, a maimi chhing zui nghal a, a hmui ah Philipan a rawn fawh chuan a meng kawk a, "Enge min fawh ringawt zel a" ati hlar a, "Lawmman anih kha" Philipa chuan alo ti sup a, "Kha tiang lawmman eng tin nge anih theih anga" alo ti hlar a,Philipa chuan a rawn fawp leh a, " Eng ti chuan" Kimkimi chuan ati hlak a, "Kha chu chakna anih kha" Philipa chuan alo ti leh sup a, "Nang, mi, mi" Kimkimi chu zak zet in a sen zui awp awp a, Philipa chuan alo en reng a, "Muhil rawh le" ati sup a, Kimkimi chuan dawhkan chu a bawh thawp a, Philipan a san arawn chul chuan a "Ah" ati sap a, mahse nuam ati a thla ati muang a, chuan a hma a ala awm dan ngaimiah loh in a thinhi a phu dat dat bawk in a hria a, thla muang zet chuan a muhil zui siai siai a.
Reubena leh Rema chu chau leh riltam zet in cafe ah chuan an lut a, "Lo leng rawh u, Pute u" Esther-i chuan alo chhawn vat a, Reubena chu a mak ti deuh in a lo en a, "Pu te u, he ti lam ah thutna chu a awm e" Esther-i chuan a ti leh a, Rema chuan "Khai a, Cafe tak tak ang mai lawm" a ti chhuak phawng a, Reubena chuan sawi tur pawh hre lo in Esther-i en ho chung chuan a kal a, an thut fel hnu chuan Esther-i chuan "Pu te u, hei hi kan menu chu ania, enge in ei duh ang le" a ti leh zat a, "Ice coffee leh chicken wings ka lo ei nge" alo ti vat a, "awle, nang ve le ka pu" Esther-i chuan alo ti leh a, Reubena chu a in thing harh nawk a, "Coke leh beef Burger" ati sup a, "Awle sir, in order chu alo thleng thuai a, a ngah nan tui vawt ka rawn lak ang che u aw" tih pah chuan phur zet in a kal nghal a, "Kha Alien khan a Zia a thlak thei ani Chiang lutuk" Reubena chuan a ti chhuak phawng a, "Eng maw, tu maw?" Rema chuan alo ti ha a, "Tumah mawle" Reubena chuan alo ti vat a. A phone chu a Khawih zui nghal daih a, Esther-i chuan tui chu a rawn dah a, hlim zet chuan mi lo kal chu ava chhawn zui leh nghal a, Reubena chuan a mitsir chuan ava melh leh hram a, "Alien cute tak ani" ati chhuak hawk a, Rema chuan "Tu maw Alien itih reng chu" a rawn ti vat a, "Tumah, tumah" alo ti hmuk hmuk a, a phone chu a kheuh zui mial mial a, Rema chuan Estheri chu a en a, a thianpa chu a en leh a, anui sak a.
Joi chuan mi dang in a, an thil Elina kawr an paih vel chu a chhar mawlh mawlh a, Malvin chuan a en reng a, "Hei" ava ti sup a, Joi chu alo phu zawk a, hlauh hmel zet chuan a en chho da a, "Ka lo pui ang che" tih leh a bawlh hlawh chharna tiang leh a garbage bag chu ala hlawk a, Joi chuan "Ah, ih, a...aih, a ngai lo, I bal ang" alo ti nuaih a, "Nang pawh I bal bik hlei nem" Malvin chuan alo ti hmuk a, Joi chuan "Kah, mahse, kah, ka tih palh" tih leh tlan a rual zui leh daih a, Malvin chuan a ngaihna hre lo zet chuan a en zui reng a, "Enge a tlan chhiat reng a, puih ka tum mai ani sia, enge hlauh vak tur awm a" ati mual mual a, a chhar zui mual mual a, "Malvin, ah, Se, Senior, ni leh lo" Joi a kiang a rawn din pah a a tih nawk nawk ah chuan Malvin chuan alo en reng a, "Ka lawm e, ih, kha, hei in rawh" tih pah chuan a tui bottle chu a pe a, Malvin chuan a beisei loh lutuk thil a tawn a vang chuan a en deuh ho a, chu tah anui suk a, "Ka lawm e, Joi" ati zui sup a, Tui bur chu ala a, a in zui khawlh khawlh a.
Tui bur chu a pe let a, "Malvin, kei man ka lo ti ang, kha kha ka tih theih tawk ani si" Joi chuan a ti sap a, Malvina chuan "tih theih tawk a?" Alo ti hu a, "Aw, ke, kei chu tangkai na leh lak tlak na nei miah lo ka nia, hei hi ka tih theih ve chhun an nia" Joi chuan alo ti neuh neuh a, Malvina chuan "Ani maw?" Alo ti hu a, 'Eng ang mi nge anih le, engtin nge thil tih fai ah chiah lak tlak anih theih bik le' Joi en reng chung chuan a ti rilru neuh neuh a, "Aw ni e, khawi ka lo ti ang" tih leh ban a rual zui nghal a, "A ngai lo, ka ti thei" Malvin chuan alo ti hluk a, "Ah, ka kah, eng lo, aaa, ka tih palh" tih leh in her a rual leh nghal a, Malvin chuan "Tlan chhe tawh suh" a ti thawt a, Joi pen chiah chu, a khawng awt a, a hawi let vut a, a balance a hlauh Chiang, a te that a, a bawk thla zui thlawrh a, Malvina chuan "Ah, Jo, joi, ina em, I tha em" tih pah chuan a va vuan vat a a tung tho a, Joi chuan a en zawk a, "Tih palh" tih leh tlan a rual zui nghal daih a, "Eh a tlan, a tlan leh daih" Malvin chuan a ti hu a, ngaihna hre lo zet chuan a en reng a, Joi chu washroom ah chuan a tlan lut a, "Ka van zak tak, ka tlu a, ka zak lutuk, awi ka zak, avan zah thlak tak" tih pah chuan a, zuang kual vak vak ringawt a, "Malvin khan min nuih zat angem le" a ti leh a, zak zet chuan a in hup zui ringawt a.
Shino chu aurinna hmang chuan "In ril te a tam a,thil vawt tak, in taksa ti dai sawng sawng thei te in in duh chu Cafe pan rawh u, chhawng hnuai ber ah Room 2 na ah khan, in zuk chawlh hah dam pah in, in in ei puar dawn nia" Ati lauh lauh a, Sharon chuan a en reng a, a kal phei a, "Prez, chawl tawh rawh" a bul a va din pah chuan ava ti sup a, "hei min hlat fe ah khan ding rawh, min lo ti buai hlek suh, Mi lawilopa" Shino chuan alo ti hlur a, a thlan chu a hui zui phak a, "Prez lo chawl tawh rawh" tih leh pah chuan Sharon chuan Shino chu a chawi lawk a, a thut tir a, "Hei, nang" Shino chuan a ti hman tawk a, Sharon chuan a au rinna chu a lak sak a, "Kha lai a nula hmeltha tak te kha in chau tawh ange, in chauh chuan in chhe vek palh ang, Cafe ah zu kal in zuk in hnawh puar ula, lo hmel tha sawt sawt rawh u" ati lauh lauh a, Hmeichhia ho chuan "Sharona" ati tuarh a, an tlan nghal hlawk hlawk hlawm a, "Mipa ho kha chhun chawlh lai anih hi, in hmeichhe ho kha in zui dawn nange" ati zui leh a, "Kan zui dawn e, Sharon" an lo ti vak hlawm a, an tlan zui ve nghal hlawp hlawp a, Shino chuan mak ti zet in Sharon chu a en reng a, 'Eng tin nge a kal nghal tir theih vek zawk a, engtin nge a tih bik a, dawi thiam ani aniang, a dawi a ni hrim hrim ang, a pangai lo in ka hre reng ah' ati rilru mawlh mawlh a, 'Ti kha chuan kan in hralh tha ngawt ang, ah cafe an buai dawn lutuk ' a harh chhuak phut a, a ding hluai a, "Cafe" tih leh tlan a rual zui nghal a, Sharon chuan "Ahhh" tih pah in a en zui ho a, "In puih na tha lo tak ani" a ti zui sup a, a in her a a kal zui ve nghal a, Shino chu a thleng a, a rin ang ngei in an lo buai kher mai, Apron chu a hreng vat a, a pui ve nghal mawlh mawlh a, an chhuak thawl deuh ta hram e, an hah tlang aniang, an ding tang tang hlawm a, Shino chuan "Esther dar eng zah nge?" Ati sap a, "Dar 2" alo ti vat a, "Hrep chuan " tih leh apron phelh a, tlan chhuah a rual zui leh nghal a, Sharon chuan a en zui reng a, "Shino, chawlh I mamawh tak zet" ati sup a, a tho ve leh zui nghal a.
Bee Da Shino