☆TE DOY 15K☆ Ch-25 by Abbra Reo Rirni Khiangte(Pitartei)

[Abbra Reo Ririni]

Ka meng siar siar a; pawnlam ațang eng rawn lut chuan bang lehlam chu a rawn chhun a, chhuat a eng tel raih bawk a, Jayden ka kuah behna ka phelh rual chuan ka hnunglam hi a rawn za zawk a, bang lam hawi ka nih vang in rang lutuk in ka in her vat a, kan nufa mutna pindan kawngkhar ri zui dawp mai ka hriat rual chuan ka phu dawrh thei!

Khum ah chuan ka țhu chhuak záwk a, ka hawi kual thuak a, khum bul a table lamp chu ka hmet eng zui nghal zat a! Ka thawk a rang in ka thin zawn hi a ri nghal dup dup bawk.
He spa ah hian ni thum chhung ka thawk ve tawh a, beisei loh tawp in ka tluang ve phian bawk, mahse tuna thil thleng vang khan ka himlo nia ka hriatna reh deuh tawh kha a rawn zual a.
Khum ațang ka tho chhuak a, ka chappal chu ka inthawlh sawk sawk a, kawngkhar lam chu ka pan a! Ka ngaihbel vang nge pawh ka hrelo, Rose pasal perfume hman ţhin rim chu kawngkhar bul velah chuan ka hre ta tlat a!
Nichin khan a thim lutuk a, ka harh chiang bawk silo nen engmah ka hmu chiang der bawk silo.
Kawngkhar handle chu ka herh a, ka pawt hawng a, dawr chhung lam chu rapawm khawp in a thim a, a reh duk mai bawk!
Ka thinphu ri dawt dawt leh inchunga fan inkhai vir ri mûai mûai bak thawm dang a awm lo a.
Thawk la hawk chung in kawngkhar chu ka kharphui a, lock chhiat thu hi ka sawi tawh a, mahse Rose'in khami ni khan min hauh phah nek thung! Kan nufa chiah in he dawr chhungah hian kan riak a, hlauthawn a ngaih loh thu min hrilh hrep bawk.
Khum lamah bawk ka let leh a, khum lu ah lukham dahthuah in ka țhu awñ ta reng a, a tir a ka hreh ang aiin tunah hi chuan ka hna pawh harsa ka ti lutuk tawh lo, ka customer ten min force lo bawk a, a him chin chiah ah kan tawp ţhin!
Mit ka chhing vang vang a, Rose pasal hian ka hnathawk che vel hi min lo thlir vung vung a ching țhin a, ka ngaihbel mai mai ani em tih ka hrelo, mahse mit la sawn miah lo a min lo en vung vung tawh hi chuan Zico kha ka ngaihtuah chhuak tlat zel a, nuam ka tilo a, ka boss te an ni a, ka sawisel ngawt thiang ngai bawk silo a.
Zanina thil thleng nen phei kha chuan a hma zawng aia ka fimkhur zual a ngai tawh ang.

"Jay, tv hi lo en leh la, tah hian chips leh juice ka dah aw.." kan form ka inthawlh mawlh mawlh a, a nur nang a chu engmah a sawisel zawm ta lo a.
Tv ka on sak a.
"Mum, Apa kha long time ka hmu tawh lo.." a channel en duh ka zawn kual lai chu ka tawp zui ta chawt a.
"Apa khan min ngai tawh ngawt ang.." a ti leh reuh a, ka inher a, khum ah a țhu ve ran a, tv pawh en lo in tukverh a coconut kung rawn ding chho vuah lam chu alo en ve daih a.
"Apa chu a buai alawm.." ka ti sep a, Mizoram ah Nunhlimi nen khan an let daih tawh hial ang! Ka hmuh hnuhnun ber ni te lah kha..!
" Apa bulah kan kal thei lo mi?" Rawn hawi let vat chung hian min rawn melh ve ta ran mai!
"Thei lo.."
"Mamma chu.." țah tum in a meng leh ta nui a, "Apa ka ngai tawh alawm.." zawi si, lainatawm deuh te hian a rawn ti leh tung a.
"Jay, apa chu a buai ka tih tawh kha, apa sawi ziah tawh loh tur.."
"Mamma chu i sual e.." min ti anih chu!
"Apa pawn hla deuh ah kal loh tur a ti a, mahse Jayden kha hla deuh ah min hruai daih a, apa bulah ka awm duh alawm.." khum ah a ke pahnih leng chung chuan a rawn ti ve ta tan tan a! Ka thinrim lo a, ka nâ thung!
Vawikhat pawh Zico chanchin a sawi ngailo a, Zothana zawk hi a nun a bet tel tlat ah angai hmiah a, chuan.. Zanah a țawngvaih pawh 'apa' tih hi a rawn sawi ţhin.
Chhan na pek tur ka neih miau loh vang in CN channel ka hmet chhuak a, khum lam ah chuan let in a sam ka tuai sak zauh a, min en duh lo ve tlat bawk.
"Jay, Mamma leh Jay chiah hi an nih a ngai alawm, Apa chu a buai a, Jay leh Mamma ta ani lo a, khitah Api Liani bulah khan a haw tawh bawk a, chuvang chuan a chanchin sawi tawh lo ang aw.."
" Nangman hla deuh ah min hruai anih kha.." rum deuh hian min rawn melh ve a, ka nui chhuak ta hak a! Chutia ka nuih rual chuan ni thum chhunga ka nuih na hmasa ber tih ka hre chhuak bawk.
"Ka naute chuan Mamma melh rum dan te a thiam tawh ani maw?" A sam ka chul leh chu a duh lo ve a ni ngei ang, ka kut a lo pawt thla ve vat a.
"Jay, ka kal angai tawh a, tv hi lo en la, Mamma khan free time a neih veleh tuipui kam ah kan kal dawn nia aw..."
Min chhang duh miah lo!
Hna kan țan tawh dawn vang in ka kal chhuahsan ta tho a.
Customer kan neih tam tak tak hma chu Rose ang thawm a awm reng a, sawisel tur a hria in a neitu ani tih lantir reng hi a tum a ni tawp mai!
"Zo, Boss in a ko che." Hnathawk pakhat in a rawn ti a. Rose chuan min rawn en nghal ta kâl a! A mitmeng a lian bawk si. A hlauhawm tak zet!
"Engvang in nge a koh a?" Vin hlarin min rawn au tu nu chu a melh leh a. Kal mai tur ani em pawh ka hrethiam lo!
"Ka hrelo.."
"Va kal rawh." Vin hlak a rawn tiin darthlalang hma ah a ding zawm zat a, a sam hraw pui pui a kir chu a chul zui thuak thuak a.
Min rawn ko tu chuan private room lam min kawh hmuh a.
Ka pensawn hma chuan thawk ka la zui ham ham a, nizan thil thleng vang ngawt pawh khan hmuh tam loh hram hram ka duh.
"Hei kan customer hlun a nia, vawiin chu nangman i enkawl ang." Pindan chhung ka luh rual chuan alo ti vat a! Sofa a sap pahrawl zet lo țhu ve run chu ka melh zawk a, ka taksa ațang a mit a la sawn miah lo.
"Aw le.."
A rum nghut a.
"Boss.." ka ti leh sep a. Boss ti a koh hi ka hreh tlat vang hian ka lo sawi tello leh ţhin.
" Sir, ani hian a enkawl țha ang che tih ka tiam e.." Sap pa melh pah chuan a ti a. Ka hma lamah kut ka suih zawm a, nghet zet hian ka kut chu ka hmer kawp a!
"I thusawi ah chuan i chiang a ngem?"
"Tehreng mai, fapa a nei a, a fapa enkawlnan sum a mamawh a lawm." Min rawn en kher pah chuan kan Boss chuan a chhang a, ka sa ve zak a chu a sawi dik miau tlat!
"A țha alawm,.." sap pa chuan a ti sup a, ka awmbawr ațang ka taksa hnuailam a melh thla dan dan a. "Sum chu i mamawh zah zah ka pe ang che..Miss?"
"Zo." Kan Boss in rang zet in a lo chhang a.
"Miss Zo.. Tunah kan țan nghal mai dawn mi niang.." sap pa vek chuan a rawn ti leh sup a. Ka tiril a khur dar dar mai.
Kan Boss chu a tho chhuak țuah țuah a, sap pa en chung chuan mit a siai zui zauh a, min rawn kalpel tur chu nui suk pahin ka dar ah a rawn hmer zui leh a!
" Țha deuhin a thu zawm ang che.." ti leh kher pah chuan a kal chhuak a, kawngkhar chu a rawn pawt phui a, ka hma a sap pa țhu run chuan min nuih zui suk bawk.
Dawhkan a glass no chu a ban a, karei leh! A tir khan zu a in tih ka hre lo reng reng, ka luh tirh khan ka hmu miah lo bawk!
Whiskey no a awm zawng chu a tlak pap a. Dawhkan a no a nghah thlak leh rual te chuan ka taksa chhunglam hi a lo che zawk a!
"Kan hna tur chu țan tawh ila.." a shirt hak lai chu țhu reng chung chuan a hlip a, ka hawi kual hrek hrek a, kawngkhar lam chu ka melh leh zawk a.
" Chawhnu lam ah meeting ka nei ania.." a kawr phelh tawh chu a bul sofa zawk ah a theh kai nawlh a.
"Aaa.. Hmanrua vel ka va la nge.." ka ti a, min chhan let hma in kawngkhar lam chu ka pan sawk sawk a, Boss khan a lock loh hram ka beisei!
Ka vanneihna a kal tluan vang nge a lo in lock lo hlauh a, rang lutuk in ka pawt hawng a, pawn ka chhuah rual chuan ka thaw zui kawk kawk a, ka hna pangngai ang mai mai nilo min khawih tel tir a tum tlat a ka hriatna chuan ka awm a ti nuam theilo.
Hmanrua chu inchhungah khan a awm kim vek a, mahse khatia ka tih ngawt loh chuan buaina lian zawkah ka inbarh luh ka hlau tak zet!
Hall lam pan chuan ka pen hlawk hlawk a, Boss leh Rose in min lo hmuh chuan an țhutna ațang an lo ding vat a, Rose phei chu a lawmloh hmel tak zet!
"Ka ti thei lo ang.."
"Engvang in?" A rawn ti tuar a, customer awm loh lai ani chu ka lawm tak zet!
"Ka thei lo a ni tawp."
"Oh.. i duh duh sawi thei ah i inngai ami a?" A rawn ti zui hlak a, lu ka thing zauh a.
"Va lut leh nghal rawh." A rawn ti a.
"Ka thei lo.. a dang min tih tir mai rawh.."
"Tunge i nih tih leh tunge ka nih tih i hrelo ami? I hna thawk tura ka hrilh che chu sawisello in zawm mai rawh." A rawn ti a. Chu tih mek lai chuan ka mitsirin kawngkhar rawn inhawng zau chu ka hmu a!
"Va lut vat rawh, mahni dinhmun pawh hrelo.." Rose vek chuan a ti leh sep a. Chutah customer rawn lut te chu zangkhai zet hian a welcome zawm ta zat a. Ka ngaihtuahna a buai tak zet.
"Min rawn zui rawh.." hnuailam bih a ka ding reng chu Boss chuan ka banrek ah a rawn hmer ta chawt a, rang lutuk in a kut ka thing thla nghal nawlh a, Kawngkhar bul mai ațanga mipa min lo en reng tu ka hmuh rual chuan ka pen hnung ta dat a! Ka lungphu hi a rang nghal dawt dawt bawk.
" I hna ah let rawh ka tih chu!" Rose zawk chuan vin hlar hian a rawn ti leh țhat a! Ka din mekna chhuat hi rawn chim in min dawlh bo daih thei se ka duh dan chu pui tak ani.

Nunhlimi'n Zothana ban ah a kuah țai a, Zothana chuan min melh ngur a, a bula ding hmeichhia erawh in min nuihsawh hmel zet in min en thung!

Khawvel ah hian ka lungphu ri dup dup thawm chiah mai hi a awm tawh in ka hria a, ka thawk lak a sak vek bawk.
"A pawi ka ti lutuk, kan hnathawk tu thar hian nungchang mawi a hrelo deuh hlek a, lo kal ru, i treatment ngai tho kha mi?" Rose chuan zah hmel zet in Nunhlimi chu a be zui ta sawk sawk a! Nunhlimi hmel a min nuihsawhna lang chhuak chu mi â ber pawh in an hmu thiam ang.
"A pawilo, Zirtirna pe țha deuh la, a danglam thuai mai ang.." Nunhlimi chuan a ti let a, ka dinhmun chu min hmusit in ka chanchin sawi vel chu nuam a ti hluah hluah tih lah a aw ri zang vah leh min deuhsawh zet ah chuan a lang chiang ngang mai.
"Ni e, zirna sang tak tak nei hnathawk turin kan hmu zo lo tih chu i hriat kha." Nunhlimi chhang let pah chuan a ti a. "Nang kha engnge i la tih reng, i hna thawk tur a ka tih che kha va ti vat rawh.." ka lam rawn hawi leh pah chuan a rawn ti leh chiam a,

Zawite in thawk ka la a, Zothana ding ngawi ngul mai pawh chuan min hmusit hlauh hluah in ka hria.
Kan Boss zawk in ka ban bulah a rawn hmer ta chawt a, private room lam pan chuan min kai phei ta dawr dawr a! Țang tur pawh ka awm lo, an ni hma a zak tak a awm reng ngailo a min kai hrang ta dawr dawr chu a lawmawm zawk daih bawk.
Nunhlimi pawh hmeichhe nalh tak a lo ni tawh a, tuna a landan ah leh lek phei kha chuan a lang class in Rose ngei pawn a zah em em a, a lo treat dan ah lah khan customer dang ai daihin an inpawh hmel zawk daih!
Zothana tan pawh lo chhan hlum loh chauh awm reng ani!
"I zawh hma chu rawn chhuak tawh lo ang che." Kawngkhar pawt hawng bawrh pah chuan min paih lut dawrh a! Bang ah ka in tauh zui chawrh lo chauh!
Kawngkhar a khar phui leh chawrh rual chuan pawnlamah chuan engemaw hi a ri zui ta dawp a! Mipa na tuar rum ri dawt hian a zawm zat bawk.
Kawngkhar chu pawnlam aţang a rawn in pawt hawng pawp a, thinrim tih hriat lutuk a Zothana rawn pen lut zui pawk pawk mai chu tawlh hnung dat dat pah hian ka lo en a, a rawn hnai zel a, a hmai a sen țawn țawn a, ka hma ah tak a rawn din chut rual chuan ka ip zui ta chawih a!
Engmah sawi lo in a taksa hrawlpui mai che awk awk khawp chuan thawk a la a, a kut chu nghet takin a hum ruh tlat bawk!
" Min zui rawh.." a aw rum zet vang chuan ka mur uaih thei!
"Buaina a awm em?" Ka customer tur sap pa chuan boxer chiah ha chung hian a rawn ti a, a awm ve tih pawh ka lo hre leh tawh lo!
Sap pa lam chu Zothana chuan a hawi vut a; a hma zawng aiin a hmel landan a hlauhawm zual ta sauh bawk! Min rawn en leh a.. Ngaihtuahna bawlhhlawh tak nei zui pawh nise ka dem lo!
"Hetiang hna thawk hian maw i fapa enkawl i tum a?" Mit ka chhing sawk mai! Nunhlimi min deuh sawhna kha chu nep tak ani ringawt!
"Hetiang hna țawp lutuk i thawh chak vang hian maw he khawpui hi i pan ?" A rawn ti leh țhawt a, ka melh a, min pawh darh vek mai hi a chak hmel hluah hlauh!
"Hetiang hna bawlhhlawh lutuk i thawk duh anih te chuan tinge min hrilh mai loh a, kei min khawih in sum ka pe thei reng che asin.."
A ri sawk a, ka kut zawk pawh a nâ chhah nghal tup tup mai!
A kutphah hrawl zet in a biang chu a tuai zauh a, min ten hmel zet hian a nui zui ta suk bawk! Engtin khatiang khan min țawngkhum theih zawk! Engmah ka sawi thei biklo, ka thinrim lutuk leh ka nâ lutuk chu ka thaw khur dar dar a!
"Sawi dikloh ka nei em?" Sehchilh zet hian a rawn phun sup a, ka beng bulah a rawn kun hniam a." Nge keimah ah khan i lungawi zo lo?" A aw a khur ru dur dur a, ka puak darh vek maiin ka hria! Zawi muang a ding mar in ka hmai zawnah tak a rawn nui leh suk kher a! Ka hrawk hi tha chak tak a reh beh tlat ang mai hian a na sa huam huam a, Zothana hmel chu ka hmu phe ruai bawk!
Min rindan khawlo lutuk chuan min ti nâ a, inhum ruh tlat chung in ka ding khur ngawt ngawt ringawt!
"I chhuak thei ang?" Sap pa lam hawi pah chuan a tih zawm ta hluk bawk! Ka mittui rawn luangthla pap mai chu ka hru hul tawk a! Awmdan ber tur pawh ka hrelo, ka thawk a pik ngawih ngawih!
"Kha hmeichhia kha ka hire anih kha, nang kha chhuak zawk rawh."
" Țawngthei lo a ka siam hma che in chhuak vat rawh." Zothana zawk chuan a ti țhawt a, Sap pa lam pan a a kal rual chuan ka theih anga rang in kawngkhar lam ka pan zui hlawk hlawk a, kawngkhar bulah Rose pasal lo let hlawm reng chu buaipui pawh buaipui lo in hall lam ah ka tlan tlang a, Rose leh Nunhlimi chuan mak tih hmel zet hian min lo melh kawk a,
"Hna thawk rawh ka tih kha." Rose'in a rawn tih vin hlar rual chuan nuam ti lutuk in Nunhlimi chu a lo nui sak thung! Chhan pawh chhang lo in ka room tura min pek lam chu ka pan zui hlawk hlawk a,
"Zothan?" Nunhlimi aw in a tih tak chul ah chuan ka tlan ta vak a, kawngkhar ka nem hawng a, ka kharphui leh dawn tih ah chuan tha chak zet hian pawnlam atang a rawn nem ve ta bawrh a, ka theih ang a na in ka taksa rihna nen ka nawr let țang tang a, mahse ka hneh lo lutuk, a rawn pen luh vut rual chuan kawngkhar phen bang lamah ka tawlh hnung zui ta vat a! A taksa lianpui mai chu thinrimna vang in a sen vek mai hian ka hria!
Ka lu zawn bang a rawn chum zui pawp a! Mit ka chhing zui sawk bawk!
"Apa ." Jayden aw ri a hriat rual chuan ramsa khawlh zet ang mai hian a rawn rum chhuak ta hrawih a!
"Apa.." Khum ațang a rawn țum thla tharh a, kan lam pan chuan a rawn tlan ve ta tarh tarh a! Ka awih lo zawk! Nithum chhung in a vawikhatna atan a hmel a eng nghal sar thei!
Jayden chu a pawm kang zui nawlh a, Jay lah chuan a nghawng ah a kuah bet ve ta țai a! Jayden kuah reng pah chuan thip zet hian Zothana chuan min rawn melh leh ta hram tho anih chu!
"Apa, min lo hruai dawn mi?"
"Aw.." a aw rik dan ah chuan a thinrim in control a tum nasa hle tih a lang reng.
"Mamma in api Liani bulah i haw daih a ti a.." Jayden bawk in a ti leh a, ka ngei ru kher mai!
" I Mamma chuan a thil hriatchian loh a sawi mai mai anih chu.. let ang aw.." a ti zui sup a, nichin a na zet zet a min țawngkhum tu kha chu mihran daih ani leh tawh!
"Jayden hi ka hruai let dawn.. i duh chuan min zui ve thei ang." Chhum bung zet hian a rawn ti hmuk a, ka melh zui nghek chu engahmah ngai duh lo in a kal chhuahpui zui ta vut a.
"Zothanmawi ka fapa anih kha, ka phalna lo in i hruai ngawt thei lo.." ka ti zui tuar a, a ding chawt a!
" I phalna ka lak kher a țul lem lo.. i duh chuan min zui ve thei ka tih kha.." a ti hluk a; ka fapa pawm chung chuan a pen zui ta pawk pawk a!
Hmela mai mai chu! Engang mihring ah nge min ngaih teh chai ni! A duhtawk in min țawngkhum a, chutah amah zui leh turin min ti maw? Huh.. zahna tlachham lutuk! Ka zui dawn lo hi a ni tawp mai!
Spa ațang an kal chhuak chu Nunhlimi zawk in a um chhuak dawr dawr a! Țullo zet in airport a Zico leh Lisa rawn inzui chhuak kan lo hmuah țum kha ka hre chhuak zawk a!
Khami ni pawh khan ka fapa pawm chung in mi â ang maiin min chhuah a, a bula hmeichhe kal zawk kha min venthawnna nei miah lo in a ngaihsak zawm ta hmak bawk anih kha!