TE DOY 15K BY Abbra Reo Ririni Khiangte (Pitartei) (Completed)

[ngaia]

Zawitein a taksa chu ka chawi kang a, Ka taksa chungah ka nghah fel rual chuan ka hahdam huai huai thei! Hmeichhe chaklo zawk taksa ah hahdamna ka hmu tlat hi kei ngei pawhin ka inhrethiam ţhin lo.

Ka hun tawn in a zir miau loh vang in ka mizia a bul thar a, ka theihtawp a inthunun ka tum ngial pawhin hlawhchham lek chang ka nei fo ţhin! Bawihi lakah pawh inthiamlo viau ţhin mahila ka inven hmain bul zet a lo biak mawl tawp chang ka nei fo a, Mahse min dawh zel a.. Tunhnai lehlekah phei hi chuan min hnial kalh zawng a awm a tum chhin miah lo a, chuthil ka hmuh rual erawh chuan hrehawm ka ti viau thung!

Mit ka meng zawk a! Bawihi kuah mai tum in ka che a! Mahse a lo awm hauh lo! Ka tho chhuak vut tur chu kut vawt thler in ka biang a rawn si a! Ka harh chiang ve ta chiah bawk!
Sam la hnawm chhap chung a a lo nui hak mai ka hmuh rual chuan ka thawchhuak hawk a! Lukham ah lu ka nghat tla leh rih a. Bathrobe senno a ha a. Khumah rawn lawn ve pah chuan puan sin chu a rawn thlep țha nghal zung zung a,.

" I mutui lutuk a, ka kaitho duh lo che anih kha.." min melh zawk pah in a rawn phun sep a. Ka harh hmasa ziah a, ka taksa chungah a lo la muhil sek sek ţhin.. Tukin zing kha a vawikhatnan keiaiin a harh hmasa a, ka taksa in a taksa a lo si ta silo kha ka mangang nghal der ringawt bawk!

"Khawnge Jayden?"
"School a kal tawh.." a ti sam et!
"Eng a?" Ti hlut pahin ka țhu chhuak hlawl a, dar 9 a pelfel der tawh.

" I mu tam ngailo lutuk a, ka ti harh duh lo che anih kha. Mami a free tho a, Jerry nen an drop anih kha.." zawi sep in a rawn ti leh a, a kut la vawt thler chuan ka pang a rawn dek zui nghal zat bawk!
"Vawiin chu hahdam rawh aw.. i damlo mai ang.."
"Come here." A banrek ah ka man a, ka awm ah ka kuah bet nghal hmiah a! A rawn dah chhuah rual chuan ka hrawkbawk zawnah a rawn nui lum hak a! A taksa ka sik hlek rual te... A thaw lum ham ham ka hriat rual te hian awlsam zet in ka danglam ţhin.
" I țha em?"
"Min kuah let la.." a darah khabe ka nghat a, a nghawng nem laiah ka hmaiin ka nawr vang vang a, a ban ka nghawngah a rawn suih ve thek rual chuan ka nui suk a!
"I damlo tak tak a mawnile?" Bawihi vek chuan a rawn ti leh sep a, ka tukhum lamah a kut nem thep chuan a rawn tuai zui hauh hauh bawk!
"A fel ţep tawh.."
"Oh.."
"Mahse.. Reilote nghah leh ala ngai dawn.." ka ti sup a. Tunge ka rinhlelh te hi a bulah hian ka sawi chhuak thei lo! Lisa thah anih thu ka sawi ţum ringawt pawh khan a chiai a, thil danglam deuh a thlen in a hmehbel tel tlat a, Chutiang anih lai karin ka mi rinhlelh te chungchang chu a bulah hian ka sawi chhuak thei lo hrim hrim!
"I hre chhuak tawh a mi?"
"Ka thur chhuak thei ţep tawh.."
"Ok.. Puih theihna ka neih che chuan min hrilh ve dawn nia.." ka beng bulah zawite in a rawn phun sep a.. ka inveng hman lo chu ka nui chhuak hawk bawk!
"Engnge?" Ti hlak chungin a tal aih a! Ka man bet nghet sauh thung!
"I va sual tak. Ka thusawi a eng khan nge i nuih tiza," a ti hlar a, hmeichhe zaidam tak a ni hlawl lo.. mahse ka atchilh viau lawi!
" Nilengin kan pindan chhungah hian awm ila min pui ani mai!" Ka ti a, na zet in ka sam a rawn țham chawt a! A huat belhchhah tur tak in ka rum chhuak hawk a!
"I va chimawm e aw.. Tho la thil zuk ei ang.." a ti nang nang a, Ka pawmbehna ka thlah thawl rual chuan a tal hrang hlek a.
"Engmah ila ei lo a maw?"
"Umm.. ka nghak che.. Zuk ei ang.."
"Ok.. Bawihi. Ka phone kha min rawn pe lawk la.." khum aţang a chhuk a, a mal te thleng a thil hak chuan a khuh a, a rilțam laia hmangaihna chenpui mai lo turin ka rilru chu ka hrilh ru nghal mawlh mawlh bawk! Ka zep lo.. Engtik lai pawhin ka mamawh ti ila ka sawi suallo ang.. hun kan hman dun reng rengin chintawk tih ka nei ngailo a.. Ka duh belh zel ani ber!

"A low anih hi... hmang zo la i connect nghal dawn nia.." a ti sep a. Ka hmai zawnah phone a rawn lek va rual chuan thawk la hawk chung in ka lo ban a!
"Zingkar ațang i thil ngaihtuah chu leh.." Ka hawi dawrh mai! A mit in ka taksa hnuailam a melh rual chuan ka rum hawk a!
"I hlauhawm pah tlat, ka lo zuk chhuk ang.." chimawm lutuk a meng kual ralh chung in a kal chhuak ta nal nal a! Kawngkhar a rawn nemphui rual chuan mit ka chhing sawk thung!
"Bawiha. A hunlo lutuk tih i hria em?"

Phone ring chu ka ngaithla ran a!
"Hello.. Min va rawn be khat ve.." a rawn ti nghal zung zung a..
"Khawnge i awm?" Thil dang sawi kual vak ka chak lem lo.
"Oh. Hetah in pui ah.." rang zetin a rawn ti a.. mahse screen a thil rawn lang va ka hmuh rual chuan ka ner nawk thung!
"A țha e.."
"Lawk.. Zothan, i nu leh pa hi rawn buaipui i tum miah lo ami a.. ?"
"Ka buai rih.." phone ka hmet tawp zui nghal hmak a.

☆ ☆ ☆ ☆ ☆ ☆ ☆ ☆ ☆ ☆ ☆ Zodinpuii's pov..

Ka kawchhung rawn inlet but vang chuan ka uak țhawt a! Khum aţang ka tho chhuak hmanlo teuh kher mai! Washroom chhungah chuan nasa lutuk in ka uak tuar tuar a! Ka kawchhunga thil awm zawng zawng hi an rawn chhuak vek mai dawnin ka hria.
Zothana chu rang zetin a rawn lut a, Chhuatah țhusawp hnawk chungin bang ka ngheng hle hle mai!
"I țha em?" Dimte in ka sam a rawn chul a, mit ka chhing a, Luak leh mai tur ang hian ka pum chu a rawn in let kual bulh bulh a.
"Ih.. Zothan.. Ka.. ka rai ani mai thei.."
"Maw?" A rawn ti hluai a! Chau zet in ka thusawi vanga a hmel landan dang hlawk chu ka melh a.
"Ka raiin ka hria.."
"Pathian..!" A nui chhuak hawk a! "I chiang em?" A hamhaih hmel lutuk bawk si chuan mipa naupang a ti ang zual vek!
"Pregnancy test kit ka thuamhnaw bawmah sawn ka dah.." ka ti leh sep a. Ka țhutna aţang min kai tho a, "Va la la..!"

"Ok.." Chiang lutuk in min en leh phawt a, Tunah hian Zothanmawia hi a zam ru ve anih chu!

Test kit nen a rawn let leh rual chuan ka lo ban vat a, Doctor meuh ani a, hamhaih lutuk tur anilo asin le..
"Lo va chhuak la.." ka ti sep a, thawk la hawk chung in ka kawngah a kut pahnih in a rawn chelh a. A hmuiin ka chal a rawn nawr leh vang vang hnuah chuan min chhuahsan a.

Ka nghak deuh vang vang a! A tawp a tawpah chuan line sen pahnih hi a rawn lang ta va a! Ka mittui a rawn hnam nghal sawk thei!
"Zothan.." kawngkhar ka hawn rual rual chuan min rawn pan vat a, ka kuah thlawp a, "Ih.. Ih ka rai.."
"Lalpa kan lawm e.." Zawi sup tak takin a rawn phun a, ka nghawng ah a hmaiin a rawn nawr leh a.. A lungphu ri dawt dawt mai chuan min nghawr che ve dat dat a!

"Hetah hian ka fa ngei chu a insiam țan mek a maw?" Ka kawr a rawn nawr tawm chho tawk a, ka dulah a fawp leh a, ka dul a khabe nghat reng chung chuan min rawn en a! He zawhna hi darkar khat chhung in vawi za chuang min zawt nawn hman hial in ka hria!
" Mumang a ang lutuk!" Nui suk chungin ka dul bawk chu a rawn fawp leh a! A chetdan naupangchhia ru zet chu ka en ngawih ngawih tawp! Kum 40 a hnaih ve tawh a, a fa hmasa ber tur ka paisak ve chiah a! A tan a hlimawm dan tur chu ka hriatthiampui seng lo.
" Engtinnge i awm?" A rawn ti sup a.
"I hmuhnawm ka ti.." a nui huk a, mahse a awmdan ngai bawk in a awm zawm leh zat thung! Ka tehkhin tak ber chu mipa naupang a thil duh ngawih ngawih nei ta in, kalsan phallo a a ţhutchilh reng hi ang ka ti ta ber!

Tukhnih ngawt chu luak chhuak lutuk in ka tho ta der mai! Hmeichhe zaidam tak ka nihloh sa tehreng nen, ka thinchhe zual em em a, Jayden ka pai lai ai khan tiang tak hian ka la na lo hrim hrim! Tun ţum chu a dan a dang ani tawp mai!

Ka luakchhuak hlek in Zothana a lo talbuai ve vek a, Ka chalah dawm in a reh hma chu ka hnungah a chul hauh hauh zel, ka pum chhungah thisen hlawm tereuhte ang lekin a la awm a, mahse ka kawrhak hlim in a be reng a, Jayden nen an kawm hi ni tawp, khumah ka mu a, an ni pahnih in ka dul hmuhnawm thlir tak te in an thlir a, a chang leh hmeichhe naupang ang hrim in an bia a.. Kei a thinin a lo tuar leh tawh silo hi ka kawr pawt thla in ka kal tauhsan nghawng nghawng zel! Ka mei ang chiah in min umzui zel a. Nu Liani leh Mami'n keini pathum in chhaih thinrim kual ţhin chu min lo hlimpui phian hlauh a!

Zan rei tawh lamah thil thlum ka ei chak leh tlat a! Zothana chu khum lu lamah lukham dahthuah in hna pawimawh a la khawih mawlh mawlh a, A buai lutuk hi mutnan hun a nei mang ţhin lo.
Tunah nau ka pai leh ta bawk si.. ka intihpalh leh tluksual palh a hlau em em reng a.. che hlek ila min enzui nghal zel bawk!

"Zothan..!" Tim daiin ka au a, a laptop chu a khup vat a.
"I muhil theilo ami?" Rang zet hian a rawn ti vut bawk.
"Engemaw ka ei chak.." ka ti a, a nui suk a, chumi pah chuan a mutna lama bowl ruak chu a melh zawk a.. Darkar khat pawh a liam hma khan saw mi bowl khat grapes saw ka ei zo vek tawh bawk.

" Engnge i ei duh sawi la.."
"Thil thlum deuh ani mai.." ka ti halh a, Zanlaiah ka tibuai reng hi hrehawm ka ti ve tak zet tho!
"Ka zuk la ang.. chumi i eizawh hnu chuan mut i tum tawh dawn nia.. dar 2 a ri der tawh.." ti sup pahin alarm chu a kawk zauh a. Ka bu ve nghat a hmuh rual chuan a nui leh suk a! Ei thei min ti pawh nise tihvak ngaihna a awm lo.. Ka pum chhunga mi hian ka kawchhung a thlen thlak rualin a lo ei zo nghal vek hi ani ber mai!
"Naute.. apa i ti hah lutuk aw.." ka ti sep a.. ka ngaihtuahna ah eng eitur ber nge a rawn ken luh ang tih chu a rawn ri tluk tluk mai hian ka hria.. Choka a eitur awm ho ka ngaihtuah kual ruai a! Ka chak huam huam vek hi ani tawp mai!
☆ ☆ ☆ ☆ ☆

Zothana hna bang rawn haw chu a hma zawng aiin a phur sarh mai hian ka hria a, Ka naupai pawh kar 2 a tling ve chiah bawk!

Kailawnah ka chhuk thla a, Mahse Zothana taksa hrawlpui phen a ka mihring hmuh te vang chuan ka tawp chawt a!
"Bawihi.." a laptop bag chu couch ah a dah tawp a, kailawnah chuan a rawn pen chho pawk pawk a, Nunhlimi leh Zothana nu chuan mit lasawn hlek lo hian min rawn en ve reng a.
"I țha em?" Ka bul a rawn thlen rual chuan a rawn ti sup a.. ka bu nghat a! An ni pahnih khuan eng thil nge an duh?
"Ka nu khuan hmuh che a duh a..." ka chalah a rawn fawp vang vang a! "Nau i pai tih ka hrilh a.. " a rawn ti leh sup bawk.

"Nau i pai tak ah chuan inneihna chu kan kaltlangpui mai angai ang.." Zothana nu in a rawn tih rual chuan kut ka hum ruh nghek a! A mitmeng lian kel kawl ah chuan ka melh a, inneihna chu a sawi ve mai mai hian ka hria!
"Mahse kar 2 chhung thang in Mumbai ah kan kal a ngai dawn a, chhungkaw thil leh lehkha pawimawh chinfel tur a awm nual dawn a, ka rawn let hunah inneihna chu kan sawi ţha leh dawn nia.."

"Kar hnih hnuah nilo in kar thar ah hian inneihna chu kan kal tlangpui dawn.. chu chu a hma aţang inbulah pawh ka sawi dan a ni bawk.'' Zothana chuan a rawn ti ve ta nghut a! Anu lakah hian tawlh let chhin a tum bau lo tih ka hrechiang tawh a! Lo khap in awmzia a neilo tih ka hriat ang bawk in ka tum buai peih lo! Zothana talin ka thlavang a hauh zel loh chuan he hmeichhia hian min kawk kual in thu min pek reng a tum mai ang!

"Kar khat a hnung tawlh pawh chu a sual viau a mi?" Nui lui hakin Zothana chu a melh a, Nunhlimi erawh vawikhat pawh a țawng ve lo thung!

"Kan inneihna i ngaipawimawh tak tak anih chuan karleh a ni kan ruat diktak ah khan kan inhmu dawn nia.." nghet zet hian a ri sup a.Chumi pah chuan ka kut a rawn hum hmiah bawk.

"A țha mai e.. Chuan he in ațang hian i chhuak..."
"Ka nu.." Zothana rawn au deuh țhawt vang chuan anu chu a ner nawk a!

"He in hi Bawihi in a ni tawh.. keimah zawk hi a inchhungah ka cheng ve mai zawk..."

"Oh.. Takzet hian....!" Ner nawk chung in min rawn melh a! A hma ang bawk khan min lawmna pakhatmah ka hmu lo!

" Engtinnge ka fapa rilru hi i dawi at bik chu ka hrelo.." Zothana țawng leh tur chu a banrek ah ka vuan salh a. " Tunah hian a atchilh viau che pawh ani thei, mahse tiang hian a mizia hi a ni reng lo thei ania.." a ti hlak a, inneih a pawm thu sawi tura rawn kal nge maw anih a, Zothana nen kan inkar tihchhiat tum rilru ran a rawn thawk chhuak anih pawh ka hrethiam teh nuaih lo e. Tiang tak a midang a chaldelh ran mai hi Mizo diktak anih loh vang ani pakhat mai thei bawk.

"Mumbai ah i pa nen kan chamchhung in Nunhlimi hi in inah hian lo cheng ve rih mai se.. kan rawn let hunah erawh kan in ah a khawsa tawh thung ang.." ka mit ah tak rawn en kher pah chuan a ti leh sak a!

Nunhlimi a rawn insuan lut a, Zothana nu leh pa pawh a sawi ang in Mumbai lamah an let thla leh rih a, A nu chapo lah mai landan ah kha chuan Lisa thih dan diktak a hre velo tih a lang reng bawk!

Khu lam ațang hna khawih tur ang ang Nunhlimi kut ah a nu zawkin a rawn thawn a, direct in Zothana kut ah a thawn nghal theih reng tih ka hre ve reng a, Nunhlimi kut ațang Zothana a hlanchhawn tir kher zel chu ka lawm tehchiam lo.. Mahse hna lam ani a, lo sawisel vak lah ka tan a țha ber lo bawk!

Jayden a muhil tawh a, Zothana lah hna pawimawh khawihin a buai em em reng a, ka zan rilțam leh chu inhnuai lamah ka chhuk thla a, tun țum ka rai hi thei lam chak lo in thil thlum lam hlir ka chak a! Eitur pawh a thlum lam vek ka store ţun mai!
Jelebi fridge chhunga ka dah luh chu ka la chhuak a, a vaiin ka ei sen dawn loh vangin bowl ah țhen hrang in ka chawi chho a, Zothana lehkha chhiarna room ka kalpel tir chu ka tawi hrat a, a zawh tawh leh tawh loh tal ka check lawk thei a lawm.
Kawngka kik keuh pah chuan awlsam zet in ka nem hawng zui mai a! A chhunga mite pahnih chu an rawn hawi nghal dawrh bawk!
Nunhlimi a chhungah a awm ve tih pawh ka hrelo!
Harsa zet in chil ka lem dawk a, Zothana chu a chairah a țhu a, Nunhlimi erawh a bul maiah a ding thung!
"Aa.. I zo dawn tawh em?" Ka aw ro halh mai chu thunun tumin chil ka lem dawk a! Chhan hriat siloh in ka kawchhung lam a rawn ni nghulh a. Ka bowl ken lai chu ka hum nghet ta vak bawk.
"Ka zo țep, i rilţam leh tawh elaw..?" Nui suk chung in Zothana chuan min rawn chhang a, za lo zet in ka nui lui ve ta hram bawk!
"Bawihi, hei ka nu in khawihfel tur pawimawh a rawn thawn hnuhnawh a, lo va mu la, ka rawn mu ve vat ang .. ka zo ţep tak tak aw.." amahah danglamna pakhatmah a awm lo, a mit ah tak ka en lui ve tlat a!
"Ka rei tawh lo ang.." a mit a rawn siai zauh a, Zico ang mai mai khan a khawsa ve ngai dawn lo tiin ka inhrilh mawlh mawlh a, room chhung ka luh hnu chuan ka thil ei chakna zawng zawng a lo bo duak tawh!
Zothana nu thil sawi kha ţullo zet in ka ngaihtuah chhuak zawk a! Nunhlimi leh Zothana ka inneih tir dawn tih kha min sawi khum a, tunah hna vel zan rei tak takah a rawn thawn chhan hi Zothana leh Nunhlimi awmdun tam se a tih vang ani thei angem?

Thawk ka la hawk a!
Tuna ka rai no țan tirh vang hian kei lah dimdawi ka ngaih hun lai tak ani a.. Chu thil chu anu leh Nunhlimi hian hmanrua ah hman an tum ru ran zawk anih te ka ring rum rum a. Ngaihtuahna buai zet in khumah ka mu kai a, ka muhil zui lawk thei bawk silo chu ka let tawn sek a!

"I eitur lak i ei leh bawk silo a.." ka hriat țhan zet pangtilum in a taksa ah min pawm beh lai chu ka mang hriat ruai ruai a. A tih fo danin ka chhipah a hmuiin a rawn nawr a, thawk ala zui ham ham a!

Ni a liam leh tawh a, Nunhlimi pawh pangngai takin kan zingah a khawsa ve tawp a, Chhun lamah erawh a kal chhuak a, eng nge a tih ka hriatpui lem lo a, Zothana leh Jayden-a'n hunawl an neih phawt chuan ka pum chhung a naute bia in khumah kan awm chawt reng a! Zothana hian kan fa lo piang tur hi a atchilh dawn lutuk tih ka hriatna chuan naute chu rawn piang thuai thuai se ka tihna a lian a, Jayden pawh hian nau a awt em em a, nau han nei vaih se zawng a rilru pawh a kang awk in ka ring!

Jayden chu school ah kan drop a, in lamah Zothana'n min dah let leh thlap a, Ka pum a puar hma hauh aţang fimkhur turin min chah uluk em em a, Ka rai tih kan hriat ni la la khan hmeichhe doctor min panpui nghal ruai bawk! Khami țum phei kha chuan Doctor in Zothana zawk kha a lo nuih nghek a! Doctor ve tho ani mahse mihring anih ve zia khami ni khan ka hriatthar phah a, a hlim hmel mawlh mai kha ka damchhung in ka theihnghilh thei tawh lo ang.

Chawhnu lamah ka phone a rawn ri ral ral a. Nunhlimi hi chhun lamah a kal chhuak daih zel a, kei leh Nu Liani kan ni leh deuh tawp tawh a, Mami pawh thil zirin Jayden school rawn ban hma hi chu a kal chhuak ve ţhin.
"Hello.."
"Dindin, i buai em?" Ka doctor in a rawn ti lang lang a.
"Aih, Damdawi chu a rawn thleng tawh ami?" Ka ti vat a, ka damdawi ei tur min chahsak a, chu thil chu a rawn thleng tawh anih ka ring!
"Aw.. Zothana ka call mai dawn nge.. Ka rawn hrilh hmasa che a.."
"A.. keiman ka rawn lam mai ang.. " ka ti vat a.

Kan inbiak zawh hnu chuan Nu Liani bulah ka kalna tur leh damdawi lam tur ka nih thu ka hrilh a, taxi chang pahin Zothana ka call zui nghal zat a, ka kal chhuak tur tih a tir ațang a hrelo anih chuan nakinah a rawn buai leh ruai mai ka hlau ru tlat!

Call a chhang mai thei silo a, Damlo en lai a nei anih ring in ka doctor in damdawi min chahsak a rawn thlen thu te chu ka hrilh ka tum ania, Taxi rawn tlan lai chu ka lo phar ding vat a.

Taxi chhungah chuan vawikhat dang ka call leh a, mahse a chhang thei chuang lo. Message talin ka hrilh tho ang tiin ka inhnem zui ta mawlh mawlh a!
Ka doctor cabin bik lam pan chuan ka kal zui nghal vat a, a cabin ațang kal chhuak a, corridor lehlam a kal mek te ka hmuh rual chuan ka ke pen ka tawp chawt a! Hetah Zothana leh Nunhlimi maw?

Muangchang in clinic chhungah chuan ka pen lut a, Ka doctor chu a lo awm mai lo a, washroom lamah thawm a awm sar sar tak ah chuan a damlote țhut ţhinn a chair lam chu ka pan ve vat a, Zothana leh Nunhlimi te khan he laiah eng thil nge an tih ang? Dawhkan chunga lehkha a thil inziak chuan ka mit a la nghal chat mai!

Washroom lam chu ka melh leh zawk a, a rawn chhuah mai ka rin loh vang chuan lehkha phek chu la kang tawp lo in ka kutțang in ka chhiar theihna turin ka her rem a!

Nunhlimi .. Thlakhat. Ka meng kawk a, Nunhlimi pawh a rai ve a maw? Mahse engmah a sawi lang silo a.
Naute pa hming a, hming inziak phei ka hmuh rual chuan ka taksa chhung hi a nghing dawt thei!
Zothanmawia tih a inziak phei a.. Ka thawchhuak hawk a! Ka hrawk ațang engemaw hi a rawn ri zui hawk bawk!
Nunhlimi fapaina pa chu Zothana hi maw?
Lehkha phek chu a awmdan ngaiin ka dah țha sawk sawk a, ka taksa chhung chu natna in a rawn țham kual nawk nawk a, ka thawchhuak hlei thei dawn lo in ka inhre hial mai!

A fapai tu ani tih a lo hriatreng vang a mi inah a nuin awm tir tur a tih lai khan a hnial chhin miah loh! Hah! Hrep tak chuan! Tun mai pawn a in check up a hruai thlap bawk a!
Ka biang rawn lum thla pap chu rang zet in ka tuai hul sawk sawk a!
Dimte in ka dul la thep thlep chu ka khawih a! Kei leh ka naute hi bum kan ni!