in chhiar that peih leh si loh vaih ...han chhiar teh le; coment-ah i rilrua a thawh dan min hrilh ve thung dawn nia...]PARADISE LODGE
Author: Chhantea Pautu, Paradise Lodge
©
Bung 10 Na
Ngaihtei zing tho chu a meng phak chuap a, mut hmu tha lo hmel pawr chap mai nen eirawng a bâwl a, zâna tap thawm a hriat kha a ngaihtuah zui neuh neuh bawk. Zan hnih a hriatna a ni ta, a hun pawh a inang vel viau lehnghal! In hnunglam thlanmûal kha ni ngeiin a hria a; mahse, finfiah turin a huaisennain a daih lova, a pindan lamah pheiin a va mu leh ta zâwk kha a ni. Zing khawvar dâwn têpa reilotê takmeuh a chhîng sek tih loh kha chu a muhil leh tawh miah lo thung a!
Tukthuan ei a hun a, ngawi rengin chawei a siam a, ngawi rengin a ei a, midang pawhin ngawi rengin an rawn kil ve mai bawk! Mahse, heti ang nunphung zet chu Ngaihtei hian a ngaithei lo; a dawhtheihna a tlahniam sawt hle mai! Chu chu atakin a lantir zui ta nghal a!
Zakzum leh inthlahrung hmel a pu duh tawh bîk lova, tawng erawh a la tawng chhuak duh bîk lo! Anmahni a râwn thlip thlep duh tawh lova, a duh ang leh tha a tih ang angin a tih turin a huamchinah chuan a che a, a awmnate an tawng tam lo bawk a, khaktu emaw, sawiseltu emaw phei chu an awm lo. Ani zâwk hian an chhungkaw nunphung tehhrep dik loh zia hi a la hrilh dawn khawp mai!
Chawei khamah, a tih tur hmasa langsar zual a chinfel zawhah pi Nguri bulah a va kal a, "Nu Ngur, khuaah ka kal dawn" a ti mawl tawp a!
"Eng'e i tih dawn Ngaihte?" pi nguri'n a lo tih chuan...
"Net-pack leh Top-up ka thun dawn" tih leh kal a rual a, Pi Nguri chuan a kal chu a enzui vang vang a.
Ngaihtei chuan rei tak thang pawh a tum lem lo; dawr atangin a lêt leh thuai a, a haw lama Pu Ramtinsangate In a pelh lai chuan, an In bula Pu Ramtinsanga hnathawk chu a han hmu a, Ngaihtei chu a piah lawka Putar lutuak var vo tawh a han hmuh chuan a ner nang nang a, "Saw Putar chu..." tiin a han phun leh hram bawk.
"Ka pu, min lo hrethiam lawk teh..."
Putar chu muangchanga rawn hawichhuakin, ngawi rengin a rawn en a...
Ngaihtei chuan, "Hmanni khan Pa Mawiate Inah sawn i rawn kal ti raw...ninga ni khan...?" a han ti leh a.
Pu Ramtinsanga chuan a mit a la sawn a, a thiltih lai tih chhunzawm pahin, "Mami, i hnathawhna chu a nuam bawk em?" tiin a han zawt daih a.
Ngaihtei chu a thaw hak a; a run zawng hlira he Putar a awm chu a ning hle ni hian a lang a..."Chhungkaw mak tak an ni!" a han ti ringawt a.
"An fapa chu a dang khawp a sin...tlangval fel leh tunlai tak a..." Pu Ramtinsanga chuan a lo ti a, sawi zawm duh lovin kawngpui lam chu a han melh a...
"Eng maw, ka pu?"
Ngaihtei chuan sawizawm se a duh hle; mahse, Pu Ramtinsanga chuan kawngpui lam chu a la melh reng a...
"Mami, tawng duh vak loh hi ka duh; chu chu i Pa Mawia duhzawng tak saw a ni ngei ang..." tih pahin Pu Ramtinsanga chu a han rûm nghut a.
Ngaihtei chuan a melhna lam chu a han en a, Pu Mawia chu an In lam panin a rawn kal mek a lo ni a, a rawn hmuh veleh, "Ngaihte, hetah eng'e i tih a...?" a rawn tinghal a.
"Khuaah Top-up leh Net-pack ka thun..." a lo ti tha ve mai a.
"Ti rawh...i phei teh ang..."
"Aw le...lo va kal rawh, ka rawn zui ang che..." tih pahin Pu Ramtinsanga lam chu a han hawi a, ani chu Inchhûngah a lo lût leh daih tawh a.
Pu Mawia chuan Ngaihtei chu reilotè a han en vung vung a; an In lam panin a kalsan ta a, 'Kan chhawrfuh ang em awww' tiin a ngaihtuahte pawh a ni mahna!
Ngaihtei chu a han ding vang vang a; Pu Ramtinsanga hnen atanga hriat duh tam tak nei chungin PARADISE LODGE lam chu a pan ve ta a ni. Nilengin a tawng meuh lova, midangin an biak lumlam vak lem loh bawk avangin tawngna chhan tur lah a awm hek lo; a ngaihtuahna khawvelah chengin he chhungkaw khawsak phung mak zet hi a ngaihtuah a! Zanriah an ei lai chuan a thil ngaihtuah chu Ngaihtei chuan a sawichhuak ta nge nge a...
"Ka Pa Mawi..."
"Eng'e ni ta...?"
"'Ngati nge in chhungkua hi in inbiak tlema in inpawh loh em em a...?"
Pa Mawia chu a ngawi reng a; Pi Ngaihsaki thung chuan, hlauhthawnpui hmel tak hian Ngaihtei chu a rawn en hau mai a...
"In tawng tlem si, in mûk si...a hahthlak...midang hriat ve atana in duh loh chhungkaw thuruk a awm a nih pawhin inchhungkhurah tal hi chuan inpawh taka awm ve tur a lawm...mihrang tan phei chuan awm nawm lohna tham a ni...!" Ngaihtei chuan a han ti leh a; amah dik tak a lo lang ta e!
Pu Mawia chu makti hmel lek lek hian a han awm a, tawng tuma a ka a àn zuau lai chuan, Ngaihtei bawk chuan, "Kan chhungkaw chin dan thar tha lo tak ang chiah kha...in bula chawei pawh a nuam ka ti love..." tiin chawei dawhkan chu a thawh tauhsan ta daih a!
Pi Nguri chuan Ngaihtei tho tau ta daih mai chu mak ti zetin a en zui a. Pi Ngaihsaki thung chuan Pu Mawia chu a va en a, thinur lovin a hrilhhai hmel zawk a ni tih a va hmuh chuan a rûkin a nui a. Ani hi chuan, Ngaihtei mak danglam riauna leh a duhawm rûk riauna hi a hmu tlat a, he inchhungkhur boruak, a tha zawnga tihdanglam a nih a beiseina pawh a tithar riau bawk; nula 'innocent' tak a ni reng a ni!
Ngaihtei hian lemchan nun a kham a, a rilru a ipik phah thin. He Inah hian thil maksak a tawngin a hre fo bawk nen...
PARADISE LODGE!
©
Bung 11 Na
Thlarau Nge Ramhuai!
Ngaihtei chu a pindanah a chho nghal a, khumah thuin In kawt lam chu tukverh darthlalang chhanah a thlir a, a mit a la sawn lova, en lam bik pawh a nei hran chuang hek lo!
A thil hriat, he In leh a hual veltu boruak hriatthiam har tak sawifiah tura a finfiah ngam si loh, tun ni hnih ni thum chhung leka a hriat leh hmuh hian a ngaihtuahna a luh fova; chu chu thuhran, he inchhungkhur khawsak phung hrim hrim pawh hi a dik a ti lo! Inkharkhip, ipik, ûpchurh, zalên lo leh thawveng lo zet hi a fuh lo vel vek; chutih laiin a kal chhan ber, a mamawh sum an tawktarh erawh a thawh tur ngaihtuahin tenawm zawk khawpa îtawm a ni si! 'Tenawm' kan han hmanna chhan pawh, lehlam atanga thlîrin he In leh a vêla boruak thleng hi sum tamin a manin a hriat chuang miah si lo hi a ni ber!
Chuti anga engemaw chen a awm hnu chuan Inhnuai lamah a chhukthla leh ta a. Chaweina hnuhmâ vêl chu Pi Ngaihsaki'n a lo tifel mêk a, Pi Rosangi'n thleng a lo sil mék bawk. A inthiam lo chu a han nui ringawt a, "Khawi keiman ka lo sil ang" tiin thleng chu a han sil nghal a. A tih tur a tih zawhah a pindanah a chho zui lehnghal mai a. Phone khawihin pindanah a mu zal a, a thiante nawi peih lutuk chu a nuih pui a nuih pui a. Dar 10:00pm vel a rawn rîk chuan muthil tumin a data a off a; mahse, muthilh tuma a han maimitchhing ngial pawh chuan a mut a chhuak hlawl lova, a muhil thei thlâwt lo a ni.
A muhil thei lo ning lutuk chu a han thaw hawk a, khumtlângah thuin light a han on a, lehkhabu chhiar tumin a khum bul dawhkana lehkhabu pakhat chu a han ban zet a; mahse, Bible chuan a mit a lâk leh zâwk si avangin a han ban leh ta zâwk a! Lungngaihna leh harsatna nei ten an chhiar fo thin Sam Bu chu a han kêu a, a han chhiar dawn ngial thin; mahse, a rilruah a lut tak tak thei chuang lo. Bible chu a khup thak a, a malchungah dah a, a kut suihin Bible chungah chuan a han nghat a, a thaw ham ham a.
Zanlam hi chu ngaihthat lohna riau a neih tawh avangin a pangngai thei meuh lo! Engemaw thleng dawn tlata hriatna hi a nei a!
Khua a tha a, boruak a thîang a, pawn lamah chiapcha an hram chiah chiah a. Chutih lai chuan, a chhan a hriat chiah si loh hian a hmulthi a ding sung sung a, chhungrilah a tim er er a, a awmdan pawh chu a hrethiam chiah lo! Current erawh a la awm reng a, chuti chung chuan a bul vêl enin a hawikual ruai a, engemaw tak hmuh a inringte pawh a ni mahna! Tukverh Parda chu a inzar phui lo tih a han hmu a, zar phui pah chuan pawn lam a han en hram a; mahse, eng thil danglam mah a hmu lo! Amah hual veltu engemaw awm hian a hre tlat a; amah vil tlatu, ûap tlattu chu awm ngeiin a hria a ni; mahse eng'e a nih a hre si lo! Bible a keng tih a han inhrechhuak a, chhiar tumin a han kêu a, awmzia a nei lo. A khum bulah chuan a han thingthi a, a tawngtai ta ringawt a!
Tihtakzeta tawngtai tur hian kan infuih thin; mahse, duh avang ngawta tih takzeta tawngtai chu a har duh phian. A huntawngin a zir chuan tihtakzet loh pawh tum ila a tihtakzet loh theih loh! Ngaihtei pawh chu tihtakzetin a tawngtai a, chumi tum aia tihtakzet chu a la nei lo hial ang; mahse, chuti ang taka a tawngtai chung pawh chuan, amah hual veltu boruak danglam tak chu a la reh thei chuang lo!
Ramhuai hnathawh an sawite, thlahrâng hràn dan an sawite a hre ve fo tawh a, Bible chhiar emaw, tawngtai emawa a reh mai thin thu an sawi pawh a hre thin. Tuna thil danglam tak lo thleng hi ramhuai hnathawh a ni ang em? Nge, thlahrâng zâwk?
A awmna In bul lawkah thlanmûal a awm a, he Inchhûng amite lah mak danglam taka thi an nih thin thu an sawi a hre tawh bawk si. A hlau a, a tiril a fan a, he boruak danglam hian a thinlungah danglamna a thlen a, a ngainat loh zawng tak a ni! A meng kual ralh ralh a, a khum lu lamah a thu tung tawm cháih a, au vak mai a han duh rum rum a; mahse, chu em chu ni theiin a hre si lo, hlauh zawng a hlau a ni!
Chutia hlau em em a a awm lai chuan, khum mawng lama dressing table-a inhûng, hmeichhe incheina tlemte awm chu a rawn tlu ri ta ram ram a, Ngaihtei chu a te thawt a, a phu zawk bawk! Khum atangin a tho ngam hlawl lova, thil tlûkna khum mawng lam chu a melh tlawk tlawk a; mahse engmah hmuh tur a awm si lo!
Inah hian zawhte an vulh loh avangin sazu an tam hle a, chu chu a ni thei ang tiin a han ngaihtuah a; mahse, zânina a awm dan chu a va mak si ve! A hmulthi ding sung sungte, a tim ru er er te, amah ûapa vil tlattu awma a hriatnate hi eng'e a awmzia ni ta ang le!?
Thâwklehkhatah chuti anga a hriatthiam loh a awmdan mak tak chu a reh thut a, chumi rual chuan a pindan pâwn lamah thil tla ri niàwm tak hi a ri bur a, a phu leh zawk a; mahse, a taksaa a awmdan mak tak hriatna kha chu a reh tawh thung. Hlauh erawh a la hlau deuh tho mai!
A pindan kawngkhar chu an rawn kik ta dawt dawt a, Ngaihtei chu a phu leh zawk a, a va hawng a, Pu Mawia a lo ni a, "Eng'e ni leh ta, Ngaihte...i te ri niawm tak i nu Nguri hian a hria a..."
"Aaaa...khum mawnga ka thil dah kha a tla ri thut a...sazu a nih ka ring"
"A nih tak chu...a nih, tun maia thil ridawp thawm kha i pindan a ni lo em ni?"
"Aw ni lo...ka pindan pâwn lam a nih kha...kei pawhin eng'e a nih ka hre bîk lo..."
"I muhil tha thei reng reng em, Ngaihte?"
"Muthilh a har thin khawp mai..."
"A ni maw...a pawi hle mai; muthilh tum leh tawh rawh..." tiin Pu Mawiate chuan an chhuahsan ta a.
Ngaihtei chuan a Phone sana a han en a, dar 11:27pm a ni.
Muthilh a han tum ngial pawh chuan a muhil hlei thei chuang lova, khumah chuan a tal a tal a, zanlai pelin dar 3:00am a lo hnai leh thuak tawh, zan danga a hriat thin tap thawm kha a han ngai châng leh ngawt a; chumi hnu chuan a hriat loh kârin a lo muhil ta a ni ang, a han harh leh chuan Nî a lo chhuak iar tawh a.
Hmanhmawh takin a tho a, Inhnuaiah chhukin eirawng a bawl ta sawk sawk a. A thusawiin awmzia a neite pawh a ni ang, hemi tûk hi chuan, Pi Ngaihsaki chauh lo pawh chuan an lo be lumlam ve ngial a, an tukthuan ei pawh nidang ai chuan an mûk ruih lo deuhin a hriat bawk! Ngaihtei chu a thawh tlai deuh avangin a thawh hlim atang khán chêt loh lai a la nei lova, a la awl hman meuh lo.
Chawei lai chuan, "Nu Sangte, 'ngati nge pasal nei lova i awm a? I hmeltha ropui sia..." tiin Pi Rosangi chu a han zawt phawng a.
Pi Rosangi chu tlêmin a han chîai deuh a; chutah, "Aaaa...Ngaihte, mipa hi ka ngaina lem lo a ni..." a han ti ta a.
"Ni ve thei tho mai, kei paw'n mipa rinawm lo zet ka tawng tawh...mahse, nupui pasal innei tura Pathian siam kan ni sia...damchhunga pasal nei lova awmte chu a dik pawh ka ring lo...Nu Ngaih, eng'e i ngaihdan?" tiin hriatthiam loh hmel zet hian Pi Ngaihsaki chu a han zâwt leh hrâm a.
Pi Ngaihsaki chuan ngainat hmel zet hian Ngaihtei chu a han en a, a nui deuh bawk; chutah, "I sawi chu a dik khawp mai Ngaihte, mahse, Pathian hian duh thlang thei turin min siam a ni ang; chuvangin i nu Sangtei pawh hi ama duhdana a awm avangin dem ngawt theih a ni hleinem" tiin a han chhang a.
Ngaihtei chuan, "Englo...ihhh...ka dem pawh a ni chuang lo...a hmeltha sia, pasal nei lova awm atan chuan ka ui em a lawm...a nulât lâi phei chuan a hmeltha ngawt ang..." a han ti a; chutah, hrechhuak thut niàwm tak hian, "Ihhh...eng lo...ka tìh awmzia zâwk chu...a vanglaiin ka tihna a nia..." a han ti bah leh nak a!
Ni e, tunah pawh Pi Rosangi hi nula diktak a la ni tlat a ni!
Pi Rosangi chu a lo nui sak a, engmah phei chu a sawi tawh lèm lo. Hetih lai hian Pu Mawiate nupa khan Chawei dawhkan an thawhsan tawh a, Bawbawa erawh chuan an zîngah chaw a kil ve ngai lo! Ngaihtei chuan a hmu tam lo hle a, a hmuh chhunah erawh, a hmel chu a râp lutuk tawh bîk lo thung.
An titi mawlh mawlh lai chuan pawn lama inbe thawm hi an han hria a. Pakhat chu Pu Mawia aw ni ngeiin a lang a, pakhat aw erawh Ngaihtei chuan a la hre ngai lo. Pu Mawia aw ni ngeia lang chuan, "Hruaia, ka Inchhunga midang hruai lût tur i nih chuan, min râwn hmasa tur i ni a sin" a han ti a.
Pakhat chuan, "Ka Pu, ka tihpalh a ni...Muana hi ka thian tha a ni a, i duh loh zawng engmah a sawi lovang...a rinngam tih ka hria a ni" a han ti a.
Chu mipa aw a han hriat chuan pi Ngaihsaki chu a tho vat a, an inbiakna lam chu a pan nghal a; a fapa Hruaitluanga a lo haw a ni! Engmah a rawn hrilhlâwk lo chu mak a ti ang reng hle a!
Ngaihtei chuan han pawh phei ve pawh tum lem lo chuan thleng a seng zung zung a, dawnkan a tihfai zawhah thleng chu a sil zui leh ta nghal a. Pu Mawia tawng dan kî atang chuan a la lungawi vak lo hle niin a hriat; chutah, mipakhat hian dam thlap hian, "Pu Mawi, keima chungchangah hlauhthawn tur i nei lovang, zin harh paha Hruaia hi rawn zui mai ka ni, a tul phawt chuan ka kamtam lo ve thin khawp a sin" a han ti a. Chumi bâk chu Ngaihtei chuan an tawng a hrechiang zui tawh lo!
Muanawma chuan, chuti taka Hruaitluanga pu, pu Mawia'n mikhual a lawm lo chu mak a ti ang reng hle a, a chhan hre chiah lo mah se, khati khan a han tawng ve ta ngawt kha a ni a. A dik tak chuan, tih tur em em a neih loh avangin Hruaitluanga hi zui ve ta ngawt mai kha a ni ber; chu pawh, amah Hruaitluanga'n a sawm ngawrh em vang a ni a. Bawk ana.
Hruaitluanga hi an chhungkaw chanchin a zawt ngai lova; mahse, an inchhar atangin amah Hruaitluanga hian an inchhungkhur boruak maksak zet mai hi a hrilh leh zauh thin a, chung zingah chuan, a pi leh pu, pu Kawlsiamate nupa boral dan mak zet pawh kha a tel nghe nghe!
Muanawma chuan a lo ngaithla liam mai a, a hnenah amah ringngamin Hruaitluanga chu a inphawrh ve ni maiah a ngai.
Mahse, Hruaitluanga'n an chhungkaw chanchin mak tak Muanawma hnena a sawina chhan zawk chu, Muanawma'n a bialnu Rintei, misual kut tuara tualthi ta kha, a thattu a chhuichhuah dan a hriat avang leh, he an chhungkaw chunga thil thleng tawh mak tak leh la thleng zui fo mak tak a hriat leh hmuh thinte hi a ngaihna a hriat a beisei vang a ni! Chu erawh Muanawma hnenah a la hrilh tlang bîk lova. A pu Mawiate nupa hian an uipui vawih ngawihpui tlat a, a nute unau hnih lah hian an sawi tha duh hek lo!
Bung 12 Na
©
Thihna Rorel Zân Bawk!
An zanriah kil ho chu Ngaihtei ngaitheih loh zawng takin a rit leh pek hle mai; chhungkaw pa ber Pu Thanglianmawia a tawng miah loh bâkah, a hmel a nelawm loh em vang a ni!
A tupa, Hruaitlûanga chu rinlâwk lohin a rawn haw a, an beisei hauh lovin midang, an chhungkaw tawngkam taka 'pâwn lam mi' tia an sawi a la rawn hruai haw zui a. Mahni inchhungkhur boruak kharkhip tlat duh Pu Thanglianmawia tân chuan lawmawm loh tak mai a ni.
Muanawma pawh chuan, chu boruak chu a hmu thiamin a man thiam vek a, pu Thanglianamawia'n amah a ngaimawh hle mai chhan erawh a hrethiam lo hle a; a awm chhung chu reilote pawh ni se, mawlmang taka he In chhuahsan erawh a tum lo hle thung. Heti taka inkharkhip a duhna chhan hi Muanawmate ang chi tân chuan hriat châkawm tak mai a ni tlat!
A hun hmasa lama a thil tawn teh hrep khan a ti luhlulin a tipuitling lehzual hle tawh a, inrintâwkna nasa tak a nei tawh bawk! Ngawi rengin chaw a ei mial mial a, midang chawei chu a tui loh hmel hlawm hle mai thung!
Hruaitlûanga chuan a thianpa chu a chhungte bulah chuan a han inhmelhriat tir hlawm a; Ngaihtei chu a la hriat ve loh avangin a nu lam chu a han hawi a. A nu chuan, a rawn awm chhan leh a hming hrilhin a ngawi zui leh mai a. Pu Mawia leh Pi Nguri chuan vawikhatmah tawng lovin chawei dawhkan an thawhsan a, Pi Rosangi pawh a kham thuai a, a pindanah a kal zui nghal a ni ang, Ngaihtei chuan zan mut dawn thlengin a hmu leh tawh lo.
A dan pangngaitêin Ngaihtei chu tih tur a tih zawhah a pindanah mu turin a kal leh thuai a, Phone khawihin a online a, a chau tawngkhawng deuh tawh a ni ang, a online lai chu a lo muthilh san a.
Hruaitlûanga leh Muanawma chu ring vak loin zan rei tak thlengin an titi a, Muanawma chuan thil tam tak zawh duh a nei thar thut mai bawk..."Hruaia, i pute thih dan kha a mak viau khan i sawi ti raw?"
Hruaitluanga hi Muanawma aia naupang zawk a ni a..."Aw mak e...mak tak a ni! An pindanah eng'e an hlauh tih pawh hriat lohin, hlauh avanga thlabarin an thi tawp mai a ni!" tiin a han chhang a.
"Tuin nge hrilh che...i pu Mawia hi chuan a hrilh chein ka ring lo..."
"Teh nang, Pu Ramtinsanga'n min hrilh a ni. Ka nu sawi dan chuan, tun hmaa kan huan enkawltu fapa a ni awm e. Tunah chuan a lu a tuak var vo tawh!"
"He tah a cheng ve lo em ni?"
"Khuaah sawn a cheng..." tiin Hruaitluanga chuan a han chhang a, "Muana, kan Ina thil thleng thin hi mak tih tak tak ka nei thin, a diktak chuan hemi hi min finfiah pui turin ka duh che a; chuvanga heta hruai che ka ni" a han tihzawm a.
"I pu leh i pi hming chu ka va hre duh em...?" tiin Muanawma chuan a han zawt tih tih a.
"Ka pu chu Kawlsiama, ka pi chu Rothangi a ni...thianpa, kan In hnunglam saw kan chhungkaw thlanmûal a ni a, saw'ng thlan dep ngaw chin leh chin lohah sawn hlimthla ka hmu fo thin, mit khap kar lekah an lo awm lo hman ziah bawk. Chu bâkah, zanah thawm ka hre fo a; ka chhungte bulah erawh ka sawichhuak ngai lem lo!" a han ti a.
Mut pawh tum lem lovin an titi zel a, zanlai a pelh tawh hnu pawhin mu lovin an la tawng sap sap a. A huntawn tawh thil thenkhatte avang khan Muanawma hi, 'thil mak' tia miten an sawi hian a hîp tlat tawh a.
An titi melh melh lai chuan hmeichhe na tuar rûm thawm hi an han hria a, anni thiandun chu an han tho kang a, thawm lo chhuahna lam chu an han ngaihven a. Hruaitlûanga nu Rosangi pindan lam a ni tih an han hriat chuan chulam pan chuan an kal ta vat a.
Pi Rosangi pindan an va luh chuan, na tuarin a khumah a lo vial a lo vial a, a thlanfim a tla bawrh bawrh mai. A mit a meng lova, a hmel han en reng reng pawhin a nâ chu a na hle a ni tih hai theih a ni lo! Reilotêah an thawm hriain Pu Mawiate nupa leh Hruaitluanga nu Pi Ngaihsaki chu an rawn kal ve thuai a; Pi Ngaihsaki chu a chhuak leh nghal a...
* * * * * * *
Ngaihtei chu a zi tiah tiah a, a han meng diar diar a, Pi Ngaihsaki chu a han hmu a-
"Nu Ngaih, eng'e a...!?" a han ti a.
"Ngaihte, i nu Rosangi a damlo thut mai, a na viau a ni...lo tho teh" pi Ngaihsaki'n a han tih chuan, a harh kâwk a, a tho thuai a Inhnuai lamah an chhukthla dun ta a.
"Ngaihte, tui leh puan ném rawn la ang che aw..."
Pi Rosang chu tuivawta chiah puan huha an deh pawh chuan awmzia a neih loh hmel kher mai; a thlanfim chu a bawl tak tak reng a.
Hruaitlûanga chu ngawi rengin hmanhmawh zetin a chhûak a, khuaah Health-worker ko turin a kal a; mahse, awmzia a nei dawn ta lo a ni!
Pi Rosangi chuan a âwm a sêp dâwrh dâwrh a, a mêl awrh awrh a, vawi leh khatah a zawi hnawk a; a che zui leh tawh lo! A chatthla ta! Mual a liam ta! A kal tawh!
Chu zan rei tawh tak leh reh takah chuan Pi Ngaihsaki tap ri chu a runthlâk hle!
Ngaihtei chu khum sirah a ding tlawn reng a! Muanawma paw'n awmdan vak a hre lo tawp! Pu Mawia chu a ding ngawi rûn a! Pi Nguri chuan Pi Ngaihsaki a kuah a!
Ralah Chinghnia ni ngei tur hi a û ruah ruah a! Chingpirinu a thizûn dût dût a!
Thihna chuan a rorelna tur zân a thlang fuh hle ni hian a hriat...