SUDDEN - IN THE RANGE ROBBER (Completed)

[ngaia]

SUDDEN - IN THE RANGE ROBBER
AUTHOR : OLIVER STRANGE (1930)
Chapter 16
Rozami Pachuau

Cross Dumb-bell a mi thar chu hmai khem niau nuai hian Ranch chu West-a nen chuan an thleng a. An thlen hmain sawi dan tur an ruahman diam a. 'A suala hming chu sawi lovin an insual dan erawh chu sawi ni se' tiin. West-a lahin kim chang zet maiin nuamti fahran hian a hrilh par par mai a. Ngaihnawm an ti hle hlawm mai a. Pa pakhat tawi zet mai, a taksa erawh chu hrawl fu si, khup thleng deuh thaw ban sei tak nei, a ke erawh chu tawi lutuk tak mai, a taksa nena in phu lo zet hian ngaihnawm a lo ti chuang bik a. A hming chu Gorilla a ni. West an a sawi zawh chuan Green-a chu a en ang ren rawn a, "Ngawi teh, mikhual, kei aia cowboy te zawk hi i hmu tawh reng reng em?" a lo ti a.

A han ţawng danah chuan a tih dan pangngai, a tawi avanga hmusit hlau a, cho ang lawi si a ni tih chu West-a chuan a lo hre thei mai a. Green-a chu a lo mitmei ralh a. Nui chung hian Green-a chuan, "Texas a kan Ranch-ah chuan pa te tak te hi a awm a. A hming pawh Tiny (Te reuh te tihna) a ni a. I bulah chuan naupang chhia ang a ni ang. Mahse, bawng enkawl lam chu a tlin zia mai chu awihawm loh khawp zuk nia. Amaherawhchu, a te khawp a, na a han neih pawh hian a ban nge na a, a ke pawh a hre hrang hlek lo thung" a lo ti a.

Ngaithlatute chu an nui ham ham hlawm a. Tichuan, Gorilla pawh chu a lawm hle mai a. Mahse, a tet avanga zuam mai chi a nih loh zia entir nan tunhma a mi pakhat nen an inbeih thu leh a hnek chauh der thu te a sawi tel ta zel a. Chumi ţum chuan a sualpui pa chu a ţhingţhi a, ani ding chung nen chuan an inbei hi a lo ni awm a. Tah chuan, chutiang anga sual ve ngam chu an awm ve meuh em ni tiin Cowboy ho chu a cho kual ta a.

Green-a chuan, "E khai, kei chu ka duhtawk. Nizan lam khan duhtawk ka lo ngah tawh a, ka ngam teuh lo mai" a lo ti ţha mai a. Tahchuan, Foreman Jeff-a chu a lo ţawng ve ta a. "Gorilla, khatin pawt suh. Tunhnaiah hna, kan vaia thawh tur kan nei a ni" a lo ti a. Gorilla chuan, "A.. Jeff, engmah buaina a wm lovang. Tumahin min beih ngam loh tawp hi" a la tinta fo va. Jeff-a thin a lo thawk ta ni ngei tur a ni, a silai a phawi lawk a, "Han iak leh teh vaih, i iak tawpna a ni ang" a lo ti ta mai a. Tah zet chuan a reh ta vang vang mai a. Jeff-a pawh chu a chhuak ta.

A tukah chuan hna pangngai thawkin an nileng a. Jeff-a hna sawi pawh chu engmah sawi zuina a awm leh ta lem lova. A tuk lehah erawh chuan sakawr an khalh khawm a, ngun takin an en vel a. Silai an hrufai a, Jeff-a chuan Green-a chu a ko hrang ta a. "Zanin chu YZ bawng ruk kan tum a, phuba lakna hun i nei thei dawn anih chu. I kal ve dawn avangin" a han ti a. Green-a chuan, "Engahnge ka han kal ve loh reng ang? I tan ka thawk tawh a, YZ lakah hian demna chauh lo chu bat ka nei hrep lo ve." a lo ti ve a. Jeff-a chuan, "A ţha alawm. Hun remchang i nei dawn anih chu. Chawhnuah hian kan chhuak mai ang" a ti leh mai a.

Amaha a awm tak hnuin Green-a chuan a ngaihtuah a. Jeff-a chuan Tarman-a hnen aţangin thupek a hmu a ni phawt ang a, mahse, engatinge nakin lawka neih a tum Ranch bawng kher kher chu lak an tum? Tunah an ruk chuan an ruk ang ang chu an pawl ho sum tur a ni mai dawn si a. Nakina amaha pumbilh tur Ranch bawng tikiam mai mai tur a ruk chu mak a tiin a hrethiam lo hle mai a. Tin, Jeff-a chuan a han hrilhfiah danah a lo va hrilhlawk niin a ring a. Ţhian a a han neih ve ber West-a lah chuan "Kei chu, in ka lo nghak dawn a ni awm e" a rawn ti a. "Ka hre chiah lo na a, engemaw tum chu an nei a ni awm ania. Fimkhur hle ang che" a rawn ti vei nen, Green-a rilru chu a hah viau mai a.

Tichuan, sawm lai chu YZ bawng ru tur chuan an chhuak ta a. Ruamah hian buk hi an va thleng a, chutah chuan an han chawl a. Chhuat chu an han kai phawk a, a hnuaia Red Indian incheina chu an la chhuak a, an inbel ta hlawm a. Engemaw chen phei chu Red Indian lam in an han lam kual vel a. Mahse, Jeff an thu a pek hnu erawh chuan an chhuak ta a. Green-a leh Gorilla chu an kal dun zel a. YZ Ranch an han thlen hnu chuan thawm an dim lo viau hlawm mai a, mak a tih chu Green an a han sawi chuan Gorilla chuan "Min beisei teuh lo emai," a lo ti a. "Min lo beisei i tihna ni maw? A ni tiraw? A nih, tutenge kan beih lai tur bukah lo awm dawn?" a han ti a. Ngaihtuah mang hlei lovin Gorilla chuan, "Bent-a leh Nigger-a" a han ti zauh a, a in hrechhuak leh thut a. "Mi te ka dawp e i ti vel elo? Engtinnge keiin chuta lo awm tur te ka hriat ang?" a han ti zui leh vat a.

Ruam deuh hi an va thleng ta a, tahchuan, an ding ta a. Pakhat, a sakawr ata chhukin enthla turin a kal ta a. A lo kir leh hun tur chu ngawi ţhapin an nghak ta a. Chutihlai chuan Green-a chuan a ruk te in a silai te chu phawi mai awlsam a ni em tih te a lo en thlithlai a. A sakawr chu a khup chuan a chep hret hret a, a rukin a tawlh hla tial tial a. Mahse, Gorilla chuan a rawn zui ve zel a, "Awmdun zel tur kan ni alawm, thianpa," a rawn ti a. Chuta ţang chuan Green-a chuan a thil duh chu a hre ta - an la ring tawk lo tih chu. Mahse a rilruin, a awm ve bawk alawm, tun hi amah an fiahna a ni phawt anga, amah lo ruaitu YZ bawng chu thatho tak a a ruk ngat chuan an ring ve tawh anga, an zinga mi pangngai angin an en ve tawh ang tih te pawh chu a ring lawi a. Engpawh ni se, ani zawng, a thil tum ang te han ti puitling turin a lo tiam ve lova, chu lovah Tarman-a dinhmun chiah hi a la hrechiang hek lo.

Enthlatu kha a lo haw leh ta a. Bawng rual tla khawm chu an hual ta a. Gorilla chu a bul chenah zel chuan a awm zel a. An dinhual fel ta tih chuan sihal hramin pakhat chu a'n hram raih a. Chuveleh bawngrual chu an khalh khawm ta a, kar lovah an khalhkhawm fel titih deuh mai a. Jeff-a chuan hawpui turin thu a han pe a, an hawn kawng lam pan tir tur chuan an han bei leh hlawm a. Green-a pawhin a theih tawpin a bei ve a, mahse a ruk te hian a kalpui pa chuan a hnunglam aţangin a rawn hnaih a, a puakruk kawmin a tukkhumah chuan a rawn vaw ta vak mai a. Green-a chu a sakawr ata a tla thla nghal tawp mai a, a sakawr pawh chu a tlanchhe nal nal mai a. Patawia chuan a mi vuaka chu a en reng mai a, "I thluak a chemte ka phum zawk lo chu i vannei hle alawm. Mahse, chutiang chu Jeff a'n a phal tlat si lova, ka thah palh hlauh che chuan Jeff a'n min that ve ngei awm si a" a ti a, a ţhiante chu a um ve ta a.

A tuk zingah chuan Cowboy pakhat hian YZ bawngrual awm khawmna kha a rawn fang a. Bawngrual an lo awm tak loh danah chuan, "An va ru hnem awm em!" a ti rilru a. A han hawi zau deuh a, Red Indian archang lukhum niawm tak hi a va hmu a, a va hnaih chuan Green-a a ni tih a hre ta. A nui var var a, "A... an lo that ta nge nge che maw?" a ti a. Chu pa chu Durran-a a ni. Buk lam an chuan a tlan ta a. A han thlen chuan Bent-a leh Nigger-a chu phuar hlawm reng a lo phun nuah nuah hian a han hmu a. An phuarna te chu a han zai chat a, "Green-a pawh sawlaiah saw a awm, a thi a ni nghe nghe awm e" a han ti a. "Thi teuh nang mawle, min rawn beih tirhin keima vuak anih kha" Bent-a chuan a lo ti a. "I vuak maw" a han ti hluai dawn a, Durran-a chuan a hrethiam leh ta a. "A ni dawn tak e, in pahnih tu zawk zawk vuak emaw ni tur a ni tak ang chu mawle. Ratler-a chu a va lawm dawn em!" a han ti leh a.

Green-a chuan nikhua a la hre lo fo a, mahse an han sil vel hnu chuan a lo harh deuh a. A awhna tura thang an kam thiam zia te chu a hrechhuak ta uar uar a. A han ngaihtuah vang vang a, a tana dam a beisei awm loh zia te chu a hre ta a. Dan pangngaiin bawng ruk hmang man an nih reng rengin thing hnaivai apianga khaihlum a nih ber ţhin avangin Ratler-a lo thlen hunah chuan chu chu a chan tur ni mai dawnin a ring a. Mahse, beisei pakhat erawh chu a nei deuh a. Helai hmuna an khaihlum mai loh hlauh a Simon-a be thei a Ranch an thlenpui chuan Simon-a chu ti ti pui a chhuah theih mial te pawh a beisei deuh a.

Durran-a chu Ranch lam panin a haw leh ta a. Chutihlai chuan Green-a chu an lo phuar hlawm tlat tawh a, a awmna atanga hla vak lovah chuan Bent-a leh Nigger-a chu an lo ti ti mawlh mawlh a. An sawi ring tawlh tawlh a, Green-a pawhin an thusawi chu a lo hre thawi thei ta nual a. "A hmasa in YZ, chutah Fring Pan. Spider-a hi ngaihtuah thui lo zawk zawk chu a ni lo ve" Pakhat chuan a ti a. "He pa hi a thih phei chuan thil a awlsam sawt teh ang chu. Kei, ka ringhlel reng a" Nigger-a chuan a lo ti a. "Kei pawh. Mahse, min tibuai leh tawh lovang. Mahse, kut lawnga Spider-a hneh thei han thah mai chu a uihawm ang reng teh e" Bent-a chuan a lo ti leh a. Nigger-a chuan, "Mai mai a, a vannei mai mai a ni lek ang chu mawle" a ti a. "Nih pawh a ni ta ve ang. Mahse, Ratler-a a hnek lai ka hmu alawm, chumi ţum chuan a vanneih vang mai a ni lo" Bent-a chuan a lo ti ţalh a. "Ni ang, Ratler-a pawhin, chu chu a theihnghilh lo reng a ni. Ti rawh, an hnu te pawh lo chhui ve ila a ţha ang" Nigger-a chuan a ti a, an nui vak vak a, an kal ta a.

A chhuah theih loh zia chu anni pawh chuan an hria a ni phawt mai a, chutia an han kalsan tak daih chu. A ni tak a, a sakawr pawh awm lo na pui chuan han tlanchhuah theih ngaihna lah a awm lo reng a. Tichuan, thil lo thleng tur nghak chuan Green-a chu a lo awm ta chawt mai a. Ratler-a ho te lo thlen lai tak phei chuan a lo muhil sek nghe nghe a. An lo thlen chuan lungawi fahran mai hian Ratler-a chuan, "Ka rin ang reng i lo nih hi. Tunah zet chuan fiah leh hranpa ngai hlek lovin ka man ta che a ni a, hun khawhral tur kan nei lo. Han hruai ula, hruizen ţha deuh kha han keng rawh u" a rawn ti nghal mai reng a.

Mahse, a rawn kalpui zingah khan Snap-a te, Larry-a te, Dirty te, leh Simple-a te an lo tel ve si a, Ratler-a chu a lo ţawng hma deuh a ni maithei. An ding ho ţalh mai chu a han hmuh chuan Green-a chuan an thil tih tum dan a lo hrilh vek lo chu a inchhir rum rum a. Ratler-a thupek chungchangah chuan a ngaih lo tih ţhat loh hranpa pawh ngai lovin, Snap-a chu a lo pen chhuak a, "Ngawi rawh Blaynes, inkhaihlumna a awm lovang." a rawn ti ta sap mai a.

Thinrim em em hian Blaynes-a chu a han lehhawi a, Snap-a lah chuan a mitah chiah chuan hmusit tih hriat fe hian a lo en kal si a. A kut zungpui ve ve chuan a kawnghren chu a kawm a, a awm ho te chuan a inpeih hle a ni tih leh Blaynes-a chu a chet zeuh chuan a chet tawpna a ni dawn tih chu an hre kiau mai. Amah Blaynes-a pawh chuan a hre tho a, mahse, kawng dangin a han hnial ta zawk a. "Engtik aţang khan nge hotu i nih a? Eng thuneihna in nge ka thupek i lo hnial?" a han ti a. Snap-a chuan, "I zawhna chu a indawtin ka'n chhang ang chî a, ka rawn zawm aţang khan hotu chu ka ni reng tawh a. Thuneihna thu-ah chuan hei hi... " a ti mai a, a silai chu a beng thek thek mai a.

Chutihlai tak chuan Blaynes-a chuan a la dam zel tur kum sawma lei theih pawh ni se, a silai han phawi a, chu pa te tak te han kah hlum der na chu a lei duh hial awm e. Mahse, a ngam mawlh si lo. Midang zawng ni se, a tu a te mah hi a hlau bik lovang a, ani kher hi zawng tih mai mai chi mawlh hek lo. Han che zauh se, kahhlum tum ngeiin a kap mai dawn emaw a ni awm si a. Chu a chhapah châk takin a kap hlum dawn a ni awm bawk si. "Ngawi teh Snap, eng i ti nge maw ni le? He mihring hi bawng ruk hmang a ni a, a ru lai ngei kan man a, chubakah enthlatu a ni vei nen. Engtizia a lo ţan teh tlat nge maw i nih le?" a ti ta zawk a.

Snap-a chu a han kiai sak a, Ratler-a han sawi tak zawng zawng chu amah hnialna ni lovin a lamţang te rilru hmin tumna a ni tih hre rengin, "I han puh ang zawng zawng pawh chu a ni mai thei, a ni lo maithei bawk. Mahse, putara rel turin Ranch-ah a haw phawt dawn a ni. Bawng bo pawh chu i ta pawh a ni reng reng si lo. Chutianga ngai chu hei, pali kan awm a, midang ho hian min hnial duh anih chuan in inpeih hunah che rawh u," a lo ti leh mai si a.

Foreman chu tih ngaihna hre lo chuan a ding reng mai a. An inbeih chuan an vaiin an thi dawn emaw a ni hial anga, chu achhapah amah chu Snap-a chuan a kahhlum hmasak ber tur a ni dawn bawk si. Chu lo rengah a thupek hmuh dan pawh Gorilla thupek hmuh ang tho a ni a, ama phuba lak chakin hun remchang chuh a, tihhlum a tum mai a ni. Durran-a chu a han en a, fuihna hmel a hmu bawk si lo. Duap a kaih a ţul ta a, "In kah chu ka duh lo ve, mahse ka theihnghilh dawn lo ania. YZ thlenna hun zawng kan pe a ni ang chu. Putar a'n khaihlum tur thu a lo pe thovang. Durran, Nigger-a nen khan lo va haw pui rawh u" a ti ta a. Snap-a chu a sakawr chungah chuan a zuangkai thuai a, "Kei pawh ka lo kal ve ang, mi hlauhawm a nih hi. Ratler, bawng rutu te chu tlanbo hma se i ti anih loh chuan va um vat rawh u" a lo ti hlauh a.

Ratler-a chuan a ha chang a han ţhial rap rap mai a, chuti hrep a a ho te hma a han awmtirtu chu a haw kher mai. Bawng rutute a man duh hleih loh, um der velte chu thil a zawnga a hreh ber a ni si. A duhthusam chuan Ranch a kir leh a, an mi man chu a thih ngei nana lo va fuih vel a ni a, kawng dang a ngaihtuah chhuak leh ta a. "A nih leh, kan vaiin kan kir vek ang. Simon-a chuan bawng te chu chhuhsak leh a duh anih chuan ka thu awih tur tal ho min pek a ngai ang" a ti ta a. Tichuan, Green-a chu Durran-a leh Bent a'n an kar cheh a, a hnung chiahah Blaynes an a zui a, Ranch lam pan chuan an haw ta a. Snap Lunt-a te hovin thiam loh an la chantir mai rih lo tih a hriat chuan Green-a chu a lawm hle a.

Thim thut thutah Ranch chu an va thleng ta a. Blaynes-a chuan a han au va. Simon-a chu a lo chhuak thuai a, a thim deuh tawh bawk a, Green-a chu a hmu mai lova, "In lo va haw hma ve, engatinge Blaynes" a lo ti a. Blaynes-a chuan a han hrilh ta a. Bawng rutute an umzui loh na chhan chu Snap-a chungah a burbun vek bawk a. A sawi zawhin thinrim deuh mai hian Simon-a chuan, "Engatinge bawng rukhmang ţan in kei mi do? Enge i hriat?" tiin Snap-a chu a han zawt a. "Chutiang pawh a ni chiah lo. Simon, chutiangin ani hi ţan ila ka chhuah daih ang chu, duh ila chuan kan chhuah thei chiang si a. Ratler-a leh an mi man hi englai maha inţhian ngailo an ni a, chuvangin an mimal inhuatna phuba lak tumna ang riau in ka hria a ni. A reng reng thu-ah, tupawh an thiam thu sawi chu a thiang a, ani pawh hian a sawi dawn chiang a ni" Snap-a chuan a lo ti a.

Simon-a chuan, "Chu, min vau tihna em ni?" a lo ti a. "Vauna ni lovin ka hrilh che anih chu" Snap-a chuan a lo ti chhum hmak mai a. Chutah zawng Simon-a meuh pawh a dawl ta deuh a, "Anih, Green-a, i ţhiante hlirin thu an sawi a, enge sawi tur i neih?" a ti ta a. "Ka sawi tur chu nangma hriat chauh tur a ni. I hriat hnu a min khaihlum i la duh cheu anih chuan min khaihlum dawn nia. He, i Foreman uicho hian i hnena thu ka sawi a hlauh avangin bawng rutute pawh um lovin a lo kir leh a, a ni lo berah pawh chu chu a lo kir chhan chu a ni. I thu a nih chu" Green-a chuan a lo ti a. Blaynes-a chuan, "Mi dawheh lutuk a nih hi" a lo ti chiam a. Green-a chuan, "Mi phuarhlawm, chutia lo tih ngam mai chu a awl hle ang maw? Min han phelh teh u, sihal chuan a kua a zawng ruai mai emaw chu" a lo ti chheu chheu a.

Durran-a chuan, "Rukru khaihlum chungchang mai mai chuti taka buai mai, thing a awm lo emaw kan ti emaw ni le?" a lo ti ve a. "Lo ngawi chip cham rawh nang kha! Chuti lo zawng ka ngawih hlen tir palh ang che" Larry-a chuan a lo ti ve ta a. Simon-a mangang chuan, "In vaiin ngawi rawh u. Mi â ho" a han ti a. A bula a fanu awm ve reng hnenah chuan "Enge ni i duh a Nula? I lo tel ve na chi a ni lo viau mai" a han ti a. "Ka pa, Green-a thusawi chu ngaithla mai la ti nia, enge pawi vak awm?" Noreen-i chuan a lo ti let a. Putara chu a ngawi vung vung a, a fanu hnenah chuan, "I tidik mai thei e" a ti ta a.

A mite hnenah chuan, "Nangni kha, in vaiin kalbo vek rawh u. Green-a, nang, ka office-ah lo kal la" a ti ta a. Blaynes-a chu a sakawr aţanga a lo chhuk tur hi a hmu a, "Nang pawh, Ratler, ka duh lo che" a han ti a. "Mahse Simon, he pa hian eng eng emaw ah min puh dawn anih chuan ka awm ve tur a ni" Blaynes-a chuan a lo ti a. Simon-a chuan, "Tunge a puh dawn che ti a?" a ti a. Blaynes-a chuan, "A tum hmel em alawm. A ni lawm ni?" a ti ve leh a. "A nih tak chu. A lo puh che anih pawhin i thiamthu sawina hun pe lo che chuan ka khaihlum lovang che. Kal vat rawh" Simon-a chuan a ti ta a.

Office-ah chuan an va lut a. Noreen-i chu a tel ve zel a. A fanu chu a han en a, "Nang pawh hi ka fanu, lo tel tura ka sawm lai che ka va hre lo em" a han ti a. "Min sawm lo, mahse ka awm ve dawn ka pa" tumruh tih hriat fahran hian Noreen-i chuan a ti ta tlat mai a. Simon-a chuan "Nula hriat ve chi a ni lo" a han ti leh a. "I hriat chi anih chuan ka hriat chi pawh a ni. Chu achhapah, he pa lei hi ka la ba reng reng a, ka theihnghilh dawn lo" Noreen-i chuan a la ti deuh deuh mai a. "Huh, chung te chu ka bawng rualin a inrul zo vek tawh ang chu. Mahse le, i thu a ni ang chu. Khai le, Green, i thiamthu ka ngaihthlak lai hian i sawi tur neih zawng zawng chu sawi rawh" Simon-a chuan a ti ta a.

vawi leh khatah chuan Green-a chuan a sawi mai lem lo. A ban phuar tlat leh hmuihmul pawh meh mumal hleih lovin, a lu a thi luang deuh hneng hnuang, ţawp zet a tuam ang tet tut chung chuan a ding a. Mahse Noreen-i chuan tunhmaa a lo ţanpuina avanga a lawmna entir mai mai mah ni se, chutia a chungchang thu a lo ngaihven ve reng pawh chu a lawm hle a. A thil hmuh leh hriat tum te chu duhthusamin la hre kim mah suh se, a thu sawi lai chuan Noreen-i chu lo awm kher lo se a duh zawk mah mah a. Chuti chu ni se Simon-a chu a hmin theiin a inring deuh a.

"YZ ka chhuahsan dawn khan ka thil hriat leh hmuh ang pawh ka la sawi thei rih lo ve kha ka ti a, tunah pawh hian ka la tiam chiah lo na a, inkhaihlum a, invauna te hial a lo awm takah chuan tum ang loh deuh te pawhin awm a lo ţul dawn ta a nih hi" Green-a chuan a han ti phawt a. "Sawi zel rawh" Simon-a chuan a lo ti a. Green-a chuan, "Bawng ruk thu-ah kha chuan mingo, Red Indian anga inchei ho tih hi a ni ka tih kha a dik a" a han ti a. Putara chuan, "Chu ngawt chu hriat a har hlei nem" a lo ti a. Green-a Red Indian lukhum, Blaynes an a lo pek tawh chu a han melh a. Green-a chuan, "Ni e, a langsar ta reng a. Mahse, la langsar ve lo chu pawl lian tham takin an rawk mek che a, chu pawlah chuan i foreman leh i mi rawih te zatve aia tam hi an tel tih hi a ni" a han ti leh a. Simon-a chuan, "Chu erawh chu a chianglo anih chu" a lo ti a.

Green-a chuan a sawi zawm zel a, "Duhthusam a ka inpeih fel hmain ka hrilh ta che a ni tih ka hrilh tawh che a. Ka duh angin a fiahna ka la khawn khawm lo na in tuna ka han sawi te hi chu ka hria a ni. Double X leh Cross Dumb-bell inkawp hi nangma mite ngei ţhenkhat nen hian an thawk hova, i bawng leh Frying Pan bawng hi an ru ţhin a. Chu pawl pumpui hotu chu 'Spider' an ti a. Nizana i bawng rawn rutute pawh kha Cross Dumb-bell ho an ni a, kei pawh ka lo tel ve nghe nghe a. Tin, i lo hriat angin kei pawh hi Bent-a min vuak ka ni lova, ka rawn kalpui te zinga pakhat vuak ka ni zawk" a ti ta a. Simon-a chuan, "Engatinge chutia an vuak che?" a lo ti thuai a. Green-a chuan, "Min ringhlel emaw, mimal phuba lak tumna emaw a ni thei e. Engpawhnise, i mite vuak chu ka ni lo. Anni chu lan pawh an lo lang lo reng reng" a ti a. Simon-a chuan, "An hotupa Spider-a chu i hmu tawh em?" tiin a han zawt leh a. Green-a chuan, "Hmu tawh e. Hatchett khuaah chuan Tarman-a tiin a hming a invuah a ni." tiin a chhang a.

Chu a chhanna chuan a rin angin a khawih lo tawp mai a. Noreen-i erawh chu a lo meng phawk hra a. Simon-a chu a nui ta chiam mai a. Noreen-i nen chuan makti tak hian an en reng mai a. "A ni maw? Chu zawng ka nau, i tihfuh lohna tak a nih chu. Ti teh, Ranch atana hman tur hian ka fanu hi a neih hunah Dollar singnga a rawn thawh dawn tih te chu i la hre awm lo a le. Chu, i hre ta a, engtinnge i ngaih?" Simon-a chuan a ti ta a. Green-a chuan, "E le, i bawng a ruk a ruk chuan, a tan chuan chu pawisa thawh pawh chu a awlsam sawt ang chu. Tarman-a hian he Ranch leh Frying Pan khi chu engti kawng pawha neih a tum reng reng" a lo ti a. Simon-a chuan, "Chu, a la lei ngei tur leh a nupui tura a lo beisei nula pa Ranch chu a rawk tluk tluk mai a ni anga maw? A awm viau alawm tiraw?" a lo ti el a.

"Awm phei zawng a awm vak lo zawng a ni. He thil hi hriat chiah loh ka la nei ka tih reng kha. Chu lo rengah an thiltih tumah chuan amah chauh hi hlawkna neih tum a ni bik lo tih hi hriat a ţha ang. Poker Pete-a te, Dexter-a te leh i Foreman ngei pawh hi hlawh lova thawk turah chuan ngaih tur a ni lovang" Green-a chuan a han ti leh a. Simon-a chu a nui suk a, "Nang chu hlawh lova rawih leh thawk chi i ni maw? I lo kal tirh khan thla khata sawmli hlawh lek kha i duh tawk a, chutah pawh i duh duha vakvel theiin i ţhiante ho nena thawk hova ka bawng rukna hun remchang i han nei leh nghal a. Khaw hmu hlei lovin i thu te kha ka lo awih a, mahse tunah zawng Mister Bawng rukhmang, i dawt hi ka awih dawn tawh lo" a ti ta mai a. Amah leh amah chu a insawi thinrim pah bawk a, a aw pawh chu a vin hle mai. Noreen-i chuan, "Ka pa" a lo ti a.

Simon-a chuan "Lo ngawi mai mai rawh. He pa hian i mit a lo la deuh ţhin anih pawhin tunah zawng chutiang a ni dawn tawh lo a ni" a fanu hnenah chuan a han ti te te a. Green-a lam chu a han hawi leh a, "Hei leh chen hi min lo nuihzatbur tawh a. Naktuk zingah Marshal hnena ka hlan hun che a 'Sudeen-a, Outlaw kha a nih hi' ka tih hunah chuan i nuih a za ngut ang emaw chu? E, i phu zawk mai maw?" a han ti leh a. Inthup thei hle ţhin mahse a beisei loh ang tak maia chutia a han ti thut mai chu mak ti hmel deuhin a lo awm deuh bawk a, chu chu Simon-a chuan a lo hmu kiau a. Simon-a bawk chuan, "Chu pawh chu i la pha duh cheu ange" a han ti leh a. Green-a chu a nui sak a, a dar a han san ak a, "Mai mai a, tun ţum zawng i chan a ţha a ni ange, mahse i rin aia dinhmun rapthlakah ania i awm ni. Ka hrilh che chu awih hram rawh" a han ti ve leh hram a. "A... I ngaih lo ti ţha lo duh suh, I tih tur chu i ti tawh a. Lo kal rawh, hmun himah ka dah ang che" Simon-a chuan a ti ta a.

Noreen-i chu a lo ţhu kun ngaih mai a. Green an a kal pelh lai chuan "A pawi ka ti em mai" a lo ti sap hi a han hria a. Chu chuan chakna damdawi ang maiin a tichak sauh a. Ngawi reng chuan a lo ruai thartu chu a zui a, pindan pakhat, a bang thingtum rem khawmah chuan a hruai lut ta a. A kawngkhar chu Tala leh thinga rawlh kalh a ni a. "Kha, Percel thingrem pawh ţhutna tur a awm kha. Kawmawl leh chaw ka la rawn pe ang che" a ti a, Simon-a chuan a kalsan ta a. Darkar chanve hnuah chuan Simon-a chu khawnvar nen, kawmawl leh chaw nen a lo kal leh ta a. Lungin tang kut phuar chu a chaw ei chhung chu a phelh sak a, kawngkharah silaia tinin a lo ding reng a. Chaw a eikham chuan a phuar a, a kalsan ta a.