SUDDEN - IN THE RANGE ROBBER (Completed)

[ngaia]

SUDDEN - IN THE RANGE ROBBER
AUTHOR : OLIVER STRANGE (1930)
Chapter 17
Rozami Pachuau

Rei fe chhung chu lungin tanga chu chechang lovin a ţhu a. A dinhmun chu a han ngaihtuah ţhin a, beisei bo hle hian a hria a. A nihna dik tak an lo hriatchhuah phei chuan amah man nan hian lawmman tam tham tak tak an lo phal tawh si a. Hetia an lo man hi an lo hriat chuan Hatchett khuaah ngei pawh mipui thinrimin an khaihlum duh mai ang tih pawh a rinawm viau mai. Mahse, Green-a zawng bei han ti dawng mai mai chi a ni lova. Chutia a ngaihtuah pah chuan a ban phuarna chu tih phelh tumin a han tal sauh sauh a, a hlawhtling hlei lova. A tan in chu a han enchiang a, a ban phuar chu lo phelh thei tehreng pawh ni se, han chhuah ngaihna chu awmin a lang lo. A tukverh awm chhun feet khat bial aţang chuan pawn lam chu a va enchhin a, a thim mup mai a, zanlai vel niawm in a hria a.

Vawilehkhatah chuan thawm ri a hre ta a. A ruk te hian a lo ri phei ţhem ţhem a, kawngkhar kalhna Tala chu a rawn inhawng ri rak a, Noreen-i chu chemte keng hian a lo lut ta hlawl mai a. "Rang deuhin an phuarna che" tih pah chuan a han zai chhum a. "Larry a'n cedar thing bulah khan sakawr nen a lo nghak che ania, kal thuai rawh" a rawn ti a. Green-a chuan, "Ngawi teh, i pa'n a ngaithiam lo ange" tiin a lo hnial a. Noreen-i chuan, "A thin phei zawng a rim anga, mahse ka ti lungawi thei mai ang" a ti mai a. Zawi muang hian Green-a chuan, "Hei, ka nunna i chhanhim a ni ngawt a, i hnenah lawmthu sawi dan pawh ka thiam lo ka ti" a han ti leh a. Noreen-i chuan, "Ţha zawkin hmang tawh ang che" a ti a, a kal ta a.

Green-a chuan Red Indian hnuchhui ang maia thawm nei lo chuan a chhuak ta a. Ranch hungchhung Hatchett khaw kawngin a rawn luhna chiah cedar thing bul a va thlen chuan a ţhianpa, Larry-a chu thimthamah chuan a lo awm a. Larry a'n ani chu a lo hmuh veleh chuan a lawm lutuk chu thawm nei hlek lo hian a lo lam der vel a. "Engmah inzawh inzawh a hun lo, i sakawrah khan chuang la, i kal nghal ang" a lo ti a. Green-a chu a han chuang a, ama sakawr Bullet-a ngei kha a lo ni a. "Tukin khan sakawr huang bulah a lo awm reng a, an vuak thlakna che aţang khan amahin alo haw ni ngei tur a ni. Hei, i silai, Ratler a'n a kawl a, a la kawl reng emaw a ti nghe nghe ang chu" Larry-a vek chuan a han ti leh a.

Green-a chuan lawmthu sawi mawlh mawlh chung chuan a silai te chu a han pai vel a. Larry-a chuan, "Mai mai a, kei te chuan engmah tih ka nei ve hlei nem, hmelţha-i vek alawm. Ama ngaihtuah chhuah vek a ni a, khawilam nge kan pan dawn?" a han ti a. Green-a chuan, "Kan a?" tiin a han zawt a. Larry-a chuan, "Ni e, ka lo kal ve dawn. Hmelţha-i nen kan sawi dun vek a, nangmah maia thlah che chu ţha kan ti lo a ni. Khatin min hnar tum mai mai suh" a lo ti a. "Leh ta mai mai ţhin a! I thiltih tur chu i hre lo a nih chu. Kei chu bawng rukhmang ka ni a, min man dun vaih chuan..." Green-a chuan a han ti dek dek a, "Pahnih khaihlum tur an nei anga tiraw? Chuti hrim hrim chu min man lo tawp anga ni mai lawm. Khai, khawilam chu nge kan pan dawn?" Larry-a chuan a lo ti thuai a.

Green-a chuan, "I tan chuan mi â dahkhawmna hnai ber a ni mai alawm. Mahse, a hlat deuh dawn avangin Frying Pan lam i pan mai ang" a ti ta a. Larry-a chuan, "Mi â dahkhawmna i han sawi chu i tan a ţha ngawt ang, mimawl pa! I tunhma chanchin hmingthang tak chu an la hriat loh em ni i rin? Pu Dawhtheilova khi Simon-a ţhianpa a ni tih leh humsual pakhat aţangin i chhuak chauh a, a dangah i zuang lut leh a ni chauh ang tih te pawh hi i hre ve bawk lawm ni?" a lo ti a. Geeen-a chuan a sakawr chu a kaltir mai a, "Eng eng emaw chu kan huam mai loh nakah!" tiin a chhang mai a.

"Huam tih leh ngawt ţhin. Nang hi Dodge khuaa ka mi hmuh pakhat Lukin-a ka chan deuh che ka ti. Chu pa pawh chu miin sakei an rawn man a, bawmah an dah a. 'A lu-ah hian ka khawih ngam e, hengte chu zawhte ang mai bawk alawm' a ti teh tlat a. A khawih ta tak tak a, a ban chu a seh chhum sak ta asin" Larry-a chuan a ti a. "Leeming-a te chu ramsa a ni hleinem. A dik takin a tam zawkin in rin aiin a fingin dikna a ngaina ang. Tin, thil pakhat i hriat tur a awm" Green-a chuan a han ti. Larry-a chuan, "Engtinnge ka koh ang che tih maw? Don-a nge, Green-a nge, Sudden-a tih maw?" a lo ti vat a.

Green-a chuan mak a ti hle a. "Tunge hrilh che? Miss Norry maw?" a han ti a. "Ni suh e, Snap a'n. Engemaw chen chu a lo hre ve tawh nghe nghe alawm maw le. Snub-a meizial i kah sak vel aţang khan i silai chelek danah a lo ring tawh a ni awm e. Hre ve se min ti a, mahse ka sawi chhawn chuan ka thin khei chhuahah a ni min vau thung ni" Larry-a chuan a ti a. "Engtikah nge a hrilh che?" tiin Green-a chuan a han zawt leh a. "Nachin lawk, hetiangin ka lo kal ve dawn tih a hriat hnu-ah. Amah lo kal a duh deuh a, mahse YZ lama amah a lo awm in ţangkai thei zawkin a inring leh ta zawk a. Tin, a tawp thleng ţhakin i lamah a ţang a ni tih han hrilh tur che in min chah bawk asin" a ti ta zel a.

"Snap-a nge nge" Green-a chuan a ti sap a. A thu hriat chuan a tilawm kher mai. A nun hi hahdam a ni hranpa lova, hei leh chen hi a lo vak mai mai tawh a. Nakin lam han thlir tur em em, phuba lakna mai lo chu a nei hek lo. A kalna apiangah laina hmel han hmuh tur lah a nei hek lova. Tin, za zela sawmkua pakua in an lo hawisan tawha a rin lai kher kher leh nghal a ţhian thar a han chhar chu a lawm hle a, thim thamah chuan a han nui var var a. "Ni e, Sudden-a an tih chu ka ni alawm. Min man nan hian dollar singkhat lai lawmman pawh an phal asin. A it awm viau lo maw Larry?" a ti ta a.

Larry-a chuan a sakawr chu a ti chak sauh a, "Enge maw ni a min rin reng reng le?" a ti mai a. Green-a chuan "Pianphung renga mi â i nih chu. Chumi avang chuan kei pawhin ka lo ngaina ve ang lawi si che a, kei pawh ka â ve zawng a ni ang" a lo ti a. Larry-a chuan, "Huh, kei zawng, Foreman nih kha ka la tum fan fan zel ania. Kei te hi zawng mahni tlei tleia tlei ve mai mai ka ni a" a tihsan ta a. Frying Pan thlen hma chu an ngawi dun ta a. "I hel kual deuh teh ang, Leeming-a amah chauha a awm lai biak ka duh a nia" Green-a chuan a ti a, Frying Pan Bunkhouse chu an pan ta a.

Leeming-a in an han thlen chuan khawnvar lo la eng hi an han hmu a. Sakawr aţangin an chhuk a, an relhru ta a. Leeming-a chu amah chauha awmin tukverh aţang chuan an han hmu a. Kawngkhar chubzawite hian an kik a, rang zet hian a silai chu a chuh vat a, "Tunge ni?" a lo ti a. "Larry Burton-a ka nia, YZ ami kha, han biak lawk che ka duh a ni" ti a Larry a'n a lo chhanna a han hriat chuan Leeming-a chu a pilbo zauh a, kawngka a rawn hawng ta a. A inlengte chu an lo put zal zal a, Leeming-a chu kawngkhar veilamah chuan a silai keng chuan a lo ding a, thil sual tih tum an nih pawha kap hmasa thei tur dinhmunah ngei chuan a lo tin reng a. Mahse, Larry-a a han hmuh chuan a silai chu a paiah a khung ta a. "E, Larry, tunlai zawng fimkhur a ţul ania, enge i duh le?" a lo ti a.

Mahse Green-a a han hmuh veleh chuan a hmel chu a lo dur leh ta a, a silai chu a han chuh leh a, "Nang hmuh che ka tum hleinem, Green-a, bawng rukhmang lo khawngaih viau turah min ngai chu a ni lovang maw?" a han ti a. "Ngai awzawng lo mai Ka pu, ka chanchin chu i lo hre tawh maw? Thil han than chak zia hi a mak teh e ti rawh!" Green-a chuan a lo ti mai a. Leeming-a chuan, "Ka mite zinga pakhatin YZ cowboy ho a lo zuk hmu a, YZ bawng a ru lai an man che tiin a lo hrilh a. Chu mai chu ka hriat phei zawng a ni a, mahse thudik a nih chuan a namen lo hle a ni lawm ni?" a ti leh a. Green-a chuan, "Nih pawh a ni ang. Mahse, sawi belh hlek tur a la awm a, zaninah hian min la ngaihthlak sak duh takah tiin thil engkim rawn hrilh tur che in ka lo kal a, i ngaihthlak duh loh chuan ka kal leh mai ang" tiin a lo chhang let a.

Leeming-a chuan "Chuti ngawt chu a ni bik lovang" tiin Bunkhouse lam chu a thlir vang vang a, vawi khat lek pawh a silai a tih rik chuan a cowboy chhawr ho zawng zawng chu a ranga rangin an lo kal mai dawn si a. A in leng pa chuan a lu a lo thing a, a thil ngaihtuah chu a hmel aţangin a lo chhiar vek niawm tak hian, "Chutiang thil zawng ngaihtuah duh suh, ka pu. Nang emaw, i mite emaw hi zawng huatna ka nei lo ania. khai! Chutiang zawnga thu ka sawi zawngin engmah kan nih phah dawn chuang lo. Engtin nge i ngaih dawn?" a ti a. Tah zawng, Leeming-a chu ţhutthlengah chuan a ţhu ta a. Chu a inleng pa hmaah chuan eng dang vak han ti thei a ni lo tih chu a hre ta a. A ho te chu han ko tehreng mah se, an lo thlen hmain a thi hman emaw a ni anga, an pahnih chuan lo man pawh ni se, nunna tam tak chan a ngai dawn tih chu a hria a, "Han sawi ta che" a ti ta a. Green-a chuan ama nihna leh Spider-a chu tunge a nih tih bak chu kim takin a hrilh ta a.

Leeming-a chuan lo pawtchat miah lovin a ngaithla a. A han sawi zawh pawhin a thu hriatte chu buk tawnin engemaw chen chu a han ţhu vang vang a. "Blaynes-a hi ka ringhlel ţhin reng a ni. Mahse nangma pawlte ngeiin an lo vuak thu che chu ka hrethiam lo a ni. I va enthla mai mai ni a an rin nghal loh chuan" a ti ta a. "Tarman-a hi Spider-a chu a ni tih han hrilh che ila, chian pawh i chiang deuh mai thei e" Green-a chuan a lo ti a. Leeming-a chu a tho zawk mai a. "Engtin a? I hrechiang em ni?" a han ti a. Green-a chuan, "Ama mi ngeiin min hrilh chu ania lawm. Mahse fiahna chu ka nei lem lo. Simon-a lahin ka han hrilh lahin min nuihsan mai si a, YZ khu a lei dawn a, a fanu Norry-i a nei leh nghal dawn a, tichuan ama bawng tur ngei ngei ruk chu thil tih awm em ni tiin min zawt lehling a. Thil tih awm phei chu a ang lo viau a, a hnena ka sawi tawh angin an zingah hlawkna tel tum amah chauh hi a ni lova, chulovah Tarman-a chuan pawisa pawh a la pe hek lo" a ti ta duah a.

Leeming-a chu chhuatah chuan a vei a vei mai a, "Khai aw! Simon-a chu a â anih chu. Chutia mikhual chin hriat loh te a fanu neih tir han tum reng reng. Tarman-a chu cho nghal mai teh ania ka duh ni" a han ti a. Green-a chuan a lu a lo thing a, "Chutiang zawngin sawtna a nei lovang. Hatchett khaw mi â ho zawng zawng khu a zu lei în an nih khu. La thlah leh deuh rih ila min rawn pui duh angem tih hi a ni" a ti a. Job Leeming-a chuan "Enge tih in tum?" a han ti a. "Hei, Larry-a nen hian kan han en thlithlai vel anga, Tarman-a chu Cross Dumb-bell Ranch a a kal kan hmuh chuan a tawk a ni mai lawm ni? Tin, thildang pakhat i hriat leh tur a awm. Mi pakhat, Sudden-a an tih, mi in a man chak lutuk a an zawn a awm a, chu mi chu ka ni tih an la rawn hrilh ang chî a, dik pawh a dik a ni" Green-a chuan a han ti leh a.

A thil han sawiin a khawih dan chu Leeming-a hmelah chuan a lang reng mai a. A han sawitu chu mak ti zet hian a en reng mai a. A beng dik loh em ni aw ti te in a ngaihtuah rum rum a. A thil hriat awmzia chu a han hriatfiah chuan a silai bawk chu a chuh leh ta a. Mahse, Green-a chuan a lo tin reng tawh tih chu a hmu ta a. Green-a chuan a kut veilam chu a phar a, inrem a duh tih entir nan. "Insum teh Leeming, buaina siam tura lo kal ka ni lo na a, a peih chu ka inpeih reng ania. Ka sawi tawh ang khan Sudden-a chu ka ni ngei a, sual min bur bun zawng zawng hi ka tih vek a ni lo tih ka hrilh che hi awih mai rawh. Tun chawlhkar thum vel tawhah pawh khan heta ţanga mel zali vel, Lilyville khuaah pawh Bank a rawk e min ti a, mahse chutihlai chuan YZ Ranch-ah ka awm si a. Chu phei zawng engmah a ni lem lo ve, i thluakah khan thun la ka tih zawk chu he bawng ruk chungchangah hian i chungah ka rinawm a ni tih hi" Sudden-a chuan a ti a.

Leeming-a chuan, "A nih, heng lai ramah eng ti tura lo kal nge i nih?" a han ti a. Green-a chuan, "Bawng ru tura rawn kal ka ni lo. Bawng ruk hmang ka ni lova, mi rawk hmang ka ni hek lo. Tin, a loh theih loh-ah lo chuan mi pawh hi ka kap mai mai ngai lo. Helaia ka lo kal chhan chu mi pahnih ka zawng a ni. Chu chu ka hna chu a ni mai a. Mahse, chaw te ka ei ve duh tho avangin YZ ah khan ka inhlawh a, chu chu thudik a ni. Min ţanpui thei la chu ka duh a, mahse min ţanpui la, ţanpui suh la, helai rukhmang ho hi chu ka thianfai tho tho dawn" a ti ta a. Larry-a chuan, "Chutah chuan a malţan dawn hek lo, Leeming. Kei leh Snap-a leh Dirty leh Simple-a leh Ginger-a'n kan ţanpui dawn a ni" a lo ti ve a.

Leeming-a chuan a han ngaihtuah vang vang a. Green-a chu ngun takin a han en a, thudik a sawi niin a ring ta a. Mahse, Outlaw-ah pawh a hlauhawm ber a ni tih chu amah ngei chuan a inpuang lawi si. Yz cowboy ho, amah lo puitu ni a a han sawi lah an zinga a ţha ţha ni a a lo ngaih ţhin, chhan ţha fe lo chuan a ruaitupa han do mai awm lo vek ni a a hriatte an lo ni hlauh bawk nen, chu chuan a rilru a kuai hle mai a. Blaynes-a kher phei zawng a duh ngailo reng a ni. Tarman-a thung chu... A tho thut a, chibai an inbuk ta a, "In lamah ka ţang e, enge ti se min tih?" a ti ta a. "Ei tur leh silaimu min han pe la, tin, kan rawn pun hunah che lo kal vat turin lo inpeih bawk ang che u. Amaherawhchu, kan inhmuh hi chu tuma'n hre suh se" Green-a chuan a ti a.

"Chungte chu tih a harsa hlei nem" tih pahin Leeming-a chu a tho a, a store room lam chu a pan a, an thil ken tur engkim chu a va buatsaih ta a. Silaimu pawh tam fe a ken tir a. Kawngkaah chuan a va bih dek dek a, lo hmu thei tur an awm nge awm lo en in. "Thil pakhat leh, i hnena thu rawn thlen thei lo pawhin min siam maithei a, Big Chief tlang velah sawn kan awm anga, meikhu signal lo en deuh la, bial thum, hnih, thum a ni ang. Chawlhkar hnih chhung emaw kan chanchin in hriat hlek loh chuan min that tihna a ni anga, Cross Dumb-bell kalkawng kha ka hrilh tawh che kha. I lo va tlawh dawn nia. Tin, Tarman-a chu lo enthla reng ula, a hotu ber a nih chu" Green-a chuan a han ti leh a.

Hnunglam kawngkharah chuan an putchhuak a, tu ma hmuh loh chuan an tawlh bo leh ta daih a. Leeming-a chu a ţhutna pangngaiah chuan a ţhu leh a, "Sudden-a maw? Nih pawh ni awm reng a ni e. A mi zawn pahnihte chu ni lo mah ila ka pawi tih loh lampang a ni ang le. Pa dik tak a nih ka ring e, ka ti dik ang chu maw? YZ a a ţhiante lah chu a ţha ţha te an ni bawk a, naktuk lamah chuan Simon-a chu zuk tlawh ila a ţha ang" a ti rilru a.

Leeming a'n YZ a zuk thlen chuan a la zing fu a, an lo buai hle mai a. Simon-a awmdan chu a hrethiam mang lova. A han thinrim dan te em em chu hlauh pawh a hlau dawn dawn a. Norry ve thung chu a lo ngui hle mai a, zilhhau nan a kut zungţang a han thin khum ngawt a. A pa chu a mi tang va kan tura zinga a va kal chuan tan in ruak chauh a va hmu ta a. Green-a lainattu te tih anih ringin phuba lak tumin a in hrosa kuk kuk mai a. Chutih lai chuan Norry chuan zam hlek lo hian ama chhuah a ni tih chu a lo hrilh ta hi a lo ni awm a. "I chhuah a maw? Engah kher kher nge i lo chhuah?" Simon-a chuan a han ti a. Norry chuan, "Ka leiba ka rul a ni. Vawi hnih ngawt min ţanpui tawh asin" a ti a. Green a'n a ţanpui hnuhnun thu kha a hrilh ta a.

Simon-a chuan a ngaithla vung vung a, a'n rum nghut a. A'n ngaihtuah chian chuan a fanu chuan a tidik chuan a hria, a fanu tih atana a duh zawng tak a lo ti a ni tih zawng phat rual niin a hre lo. Mahse Sudden-a kher kher a lo chhuah erawh chu hriatthiam har a ti a. Mipa tih dan pangngaiin ama ţanna lam chauh ngaihtuah luiin a fanu thiam loh chantir chu a tum tho a. "I â ta emaw ni le? Tualthah hmang leh rukru te lo chhuah hrim hrim che in. A lo ţanpui na che chu ama hmakhua a ngaih vang mai mai a ni ang, nang leh kei min bumna turin. I pindanah kal la, lo inrawlh ve tawh reng reng suh. Mr. Sudden-a chu ka zawng anga, ka khaihlum dawn a ni" a han ti leh a.

A hnunglam aţanga "Simon, min kawp ngun lutuk ta a ni ang, i thin te hial i tih rim ve tak!" tih thawm hi a hre ta a. A han hawi chuan Frying Pan neitu pa chu a lo ni a, "Norry, eng thil nge maw heti taka a thinrimna tur i lo tih le" a han ti leh a. Simon-a chuan thil awmdan chu a hrilh ve ta vek a. Ani lo ang takin Job Leeming-a chuan dam zet hian thil a lo ngai tlat mai a, a ţhianpa pawh chu thinrim hlur lo se zawng chuti taka Leeming-a lo zaidam ta teh thut chu mak tiin rinhlelhna te hial pawh nei awm tak hi a ni a. "Khai, Simon, enge maw chutia thinrim pawh chu a sawtna le? A bawnghnute ber, baw zo tawh chu engtin nge kan tih chuan ang? Norry chuan a lo chhuah awm loh tak zawng a ni a, mahse a tihtur niin a hria a ni ve mai a, kei chu ka ngainat phah riau mai ka ti. An sawi ang teh hluai chuan chu mi pawh chu a lo sual kher lo mai thei asin" a lo ti a.

Mak ti deuh maiin Simon-a chuan a ţhianpa chu a han en a, "Engtizia nge ni, Leeming-a meuhin a bawng rukhmang a lo chhan tak chu le?" a ti hial a. Leeming-a chuan, "Mr. Green-a hi bawng rukhmang a nih ka la hre hleinem" a lo ti leh mai a. "Hriat pawh chu i va hre har em em ve mawle Mr Leeming" rawn ti hi hnunglamah chuan a lo awm a. Tarman-a chu an hnunglam aţang chuan a lo kal a, an lo hmu lo mai mai hi a ni a. Noreen-i lam hawiin a lukhum a phawk a, a han kun zawh chuan, "I la vawng him phawt ang chu maw, Peter?" a han ti a. "Him e mawle, mahse zanah Norry hian a lo zuk chhuah a nih chu, a lakah bat neiin a lo inhria a," Simon-a chuan a lo ti a. "Engtin a?" tiin Tarman-a chuan Norry chu a melh ta kul mai a. "I â ta em ni? A aia... " a han ti chauh a, a in hrechhuak thut a, a lo thinrim mualpho der a ni tih chu hriain a insum leh ta a.

Mahse Norry chuan a thinrim hmel chu a lo hmu hman tawh tho mai. Zam lo tak hian, "Mister Tarman, a aiah khaihlum tur i ni tih i tum deuh a ni maw?" a lo ti ve ta sak a. Tarman-a chu a lo in bengdai tawh a, zaidam tak hian nui chungin, "Lo ti pawh ni ila i phu alawm. I hriat phak loh thilah i lo inrawlh ve a nih hi. Midangin an tuar phah dawn anih hi. Ngaihtuah teh, sakawr lak aţanga a chhan che avangin a lei ba in i inhria a, tuna i lo chhuah chuan rul ta-ah i inngai a ni ang. Nangma ngaih chuan dik pawh i ti hle a ni thei e. Mahse tuna chin a he mihring thil tihsual apiang chu i thiam loh a ni vek tawh dawn a ni tih hi i ngaihtuah ngai em? Mimal thil mai mai te hi chu hnam pum thil turah chuan theihnghilh tur asin, a ni lawm ni?" a lo ti ta a.

A han sawi thiam zuah zuah em kher bawk a, a thusawi hrim hrim phei zawng awihawm tak a ni. Mahse Norry khan Tarman-a thinrim hmel kha a lo hmu hman si a, "Khatiang mi khan ama mimal thil chu hnam tan tiin a theihnghilh fo angem aw" tiin a ngaihtuah a, a tih ziah chu a ring lo. A hmelah chuan chhan ngai deuhin Leeming-a chuan a lo hria a ni ang, "Tih-ah chuan Tarman, hmeichhia te chu an thin han thawk thut ang hian thil an ti fo reng ania. Norry, kal daih mai la, i rilru pawh tihah duh suh" a lo ti a. "Chu phei zawng a dik maithei a, mahse a kal hma in thil hriat tur a la nei a ni. Chu chu he Green-a hi mi pakhat thah tuma lo kal a ni a, chu chu khata ding kha a nih kha" Tarman-a chuan a lo ti a, Simon-a chu a kawk a.

Norry mak ti lutuk chu a ka ho mai a. "Ka pa, chutiang zawng a ni thei lovang" a han ti zet a, mahse Green-a thu hrilh te kha a han hrechhuak a, ţhutthlengah chuan a ţhu hnawk a, a hmai a hup ta tlat a. "A dik tih chu keimah ang bawkin i hria alawm. Mahse, han sawi vek dawn ila a sei lutuk a, putara lo enkawltu khan Simon-a hian a chungah thilsual tiin a hria a, tih phei chu ti lo mahse, he uisathiam hi a hnu chhui tura rawn tirh a nih hi." Tarman-a chuan a han ti zui leh a.

Noreen-i chu a lo dakchhuak leh a, "A nih, engatinge a thil tih tum chu a tih si loh? Tihna hun lah a ngah si a.?" a han ti a. Tarman-a chuan, "A mi zawn chu i pa a ni tih la hre hek lo. A hriat hunah zawng engmahin a chhan hlek lovang" a lo ti a. Noreen-i hmai chu a dang lawp lawp mai a. A mangang lutuk chuan, "Pawi ka ti emai ka pa," a ti a, a pindan lamah a kal ta a. A khumah a va tlu thlawp a. A han ngaihtuah ţhin a, a hrethiam thei mawlh lo. An sawi ang tak chu a lo nih chuan Green-a chezia chu a lo va tenawm em em ve aw. Mahse, Outlaw pawh ni se, chuti em em chu a nih a ring hlei thei si lo. Chutihlai chuan a sawi laia Green-a hmel te kha a hrechhuak leh a.

A kal tak hnu chuan Tarman-a chuan intithei takin a ţhiante pahnih chu a en a. "A inrawlh tawh lo ta ve ang" a han ti a. "Chu, thudik nge i sawiţhaihna mai mai" Leeming-a chuan a han ti a. "Dik e, Job-a, he pa hi min thah tuma lo kal a ni. Mahse Joe-a hian min hrilh hma chu ka lo hre lova. Engpawh chu ni se, engtinnge maw kan tih dawn le?" Simon-a chuan a lo ti a. Tarman-a chuan, "Helai ramah zawng han in um vak ngaihna lah a awm si lova, thang kan kam mai ang chu. Ka kutah dah mai rawh" a lo ti a. Chutih lai chuan Blaynes-a chu a lo kal ve a, "Larry Burton-a a bo daih mai. A thuamhnaw te nen vek a bo bawk a, a lo haw leh dawn lo anih ka ring. Kan bawng rukhmang pa pawh kha ama chhuah a ni ta ve ang, an in kawmngeih riau si" a rawn ti a.

A fanu thiltih chu han puanzar vak a duh lo bawk a, "Tih pawh i tidik ang" Simon-a chuan a lo ti a. "Engtinnge i tih dawn hotupa? Kan unaute ho lah chuan a sarhu lai chuan um nghal mai ila an ti deuh a, enge ka hrilh dawn?" Blaynes-a chuan a han ti leh a. Chutia a rawn ti hlauh chu Simon-a chuan a thinrim hrik thlak nan a lo hmang a, "Tlanbo phiar turin hrilh rawh. Ka mawhphurhna chungchangah anni ngaihdan ka duh chuan ka zawt mai ang. Nang pawh hi kal vat la, thatchhe ho chu an hna ţheuh chu thawk turin tlan hmanhmawh hlawm rawh se" a lo ti phiar phiar mai a.

Leeming-a chuan Blaynes-a chu a lo en kiau a, a han inhum sek deuh te, Tarman-a nena an in en laia Tarman-a lu lo thing deuh hlek ni awm tak te chu a hmu kiau a. Tichuan, Simon-a te pahnih chu a kalsan a, Bunkhouse-ah a zuk kal ta a. Snap Lunt-a chauh a lo awm a. "Kan putara hnen aţang chuan Ratler-a chuan lawmna a hmu chau deuh a ni maw? A lo kir leh rang emai" a lo ti a. Leeming-a chuan, "A... Simon-a khan a Ranch hi nangni ho hian rorel sak tum deuh awm in a hria a nih ber awm kha maw. A mi tang chhuah thu-ah a thinrim em bawk a ni" a ti a. Snap-a chuan "A ţha lo hle mai. Tunge maw lo chhuah ni dawn le?" a lo ti leh a. Leeming-a chuan, "A ţha e. Ka dawp che a ni law.. Snap, Sudden-a, Outlaw an tih hi i hriat zawng a ni em?" a han ti leh a.

Snap-a chuan a han en thuai a, "Mi hriat bak chu hre lo. Mi mak tak zawng a ni ang. Hman deuhah khan hmuh phei chu ka hmu tawh a, silai chelek velah na na na chuan a mak e tih mai loh chu han sawi ngaihna a awm em em lo a ni. Mahse, an puhna nazawng hi chu a tih a nih ka ring thei lo. Misual pahnih khat te han thah hi chuan thil sual awm zawng zawng hi in burbun vek hi kan tum tawh hlawm ţhin" tiin a chhang a. Leeming-a chuan Snap-a tunhma chanchin te a lo hre nual bawk a, han zawh zel chi a ni lo tih a hre mai a. "Green-a khan khawi lam nge pana i rin?" a han ti leh a. Snap-a chuan, "Ring pawh ka ring chhin lo" a lo ti chhum hmak a. Tah zawng han tih chi a ni lo tih Job-a chuan a hria a, a kalsan ta a.

Simon-a te bul a han thlen leh chuan Tarman-a chuan haw a lo tum mek a, Leeming-a chuan kal ve a tum ta a. A kal hmain Noreen-i chu a va tlawk lawk a, a lungngai hmel a va hmuh chuan a khawngaih hle a. "Awi, enge ni a awmzia uncle Job?" a lo ti a. "Khai, vei tehchiam duh mah ta che ka nau, a la fel duak mai ang. Keipawh an sawi ang kha chu ka awih bik hleinem. Mahse, i pa chu hrilh lul suh aw." a ti a. An kal dawn chuan Simon-a hnenah chuan "Min duhna te i neih chuan min rawn chah dawn nia. Tin, tumah hi rin lutuk tur a ni alaw" a han ti a. Simon-a chuan "Cowboy hna zawng lai ngawt chu ka ring tawh hlek lovang" a lo ti a. Chuti lam chu Leeminga-a tum phei zawng a ni hauh lova, mahse Tarman-a lo awm ve reng si nen, han sawi chian chi lah a ni si lo.

Hatchett pan a an kal lai chuan Leeming-a chuan Tarman-a tum dan chu hriat tum hian Green-a an man tum dan chu a han zawt a. Mahse Tarman-a chuan a lo hrilh mai duh bik lo. An ti ti zel a, Leeming-a chuan engemaw a zawt a zawt a, mahse Tarman-a chuan a chhang ţha duh em em lo. YZ Ranch lei a tum thu leh Noreen-i neih a tum thu te zawng a hrilh a. Frying Pan pawh lei a duh thu thlengin a hrilh ta a. Mahse Leeming-a chuan hralh a tum loh thu a hrilh ve mai a.

Hatchett khua an zuk thlen chuan mi chu an lo phawklek hle mai a. Silas chuan, "Green-a inti kha a chanchin in hre lo maw? Sudden-a, Outlaw a ni zuk ti hlawm a" a lo ti a. Tarman-a chuan, "Khai! Tu in emaw an tihder che a nih lek chu" a han ti a. Silas chuan, "Teuh lo mai. A hmel hretu in an sawi alawm. Tunah hian Simon an a man e an ti nghe nghe asin. Tonk-a pawh midang punin han la tura kal a tum kha." a han ti leh a. Tarman-a chuan, "Chuti chu Tonk-a chu inti hah duh lo mai rawh se. Hei, YZ aţangin kan lo kal a, a awm lo" a ti leh mai a. "A awm lo a?" Marshal lo lut ve chuan a rawn ti a. Tarman-a chuan thil awmzia chu a hrilhfiah ta a. "A lo chhuah a? Kan mihur nu chu, han kal a, amah chu lungin a han khung teh a ni ka duh a" Marshal chuan a han ti a.

Leeming-a thin chu a lo thawk a. "I ti lutuk palh ange aw Marshal. Green-a chu nanga man pawh a ni lova, Norry lo man ngawt theihna pawh i nei lo. A reng thu-ah, chu nula hming chu i lam dawn anih chuan zah takin lam fo rawh. Chuti lo zawng ka pawt ţet mai ang che" a lo ti ta mai a. "Kei pawh" Tarman-a chuan a lo ti leh nghal a. Marshal Tonk-a chuan a hnar a hmu rauh rauh mai a. "Ka han ang ve mai mai a, ka ti tak tak pawh a ni chiah lo asin mawle. Chu mihring pa lo chhuak leh chu dollar singkhat lai kan chan phah e tih thu-ah ka ui thu ka'n sawi mai ania. Ka bial chhung ngeiah lo awm reng leh nghalin. Lo hria ila chu aw" a ti ta. Tarman-a chuan, "I lo hre lo chu i nihlawh ngawt alawm. Tlaktlailo pa, man te ka tum e lo ti vaih la zawng i silai pawh i phawi hma in hremhmun kawng chanve ania i thlen daih mai ang ni." a lo ti leh nghal a. Silas-a chuan, "Ni e, Snub-a a han tih dan aţang khan cowboy satliah ngawt chu a nih ka ring lo reng a ni" a lo ti ve a.