THE SICILIAN (Book I &II) By Mario Puzo (Completed)

[Loma hmar]

Chapter 3(a)
Montelepre khua chu mi 7000 awmna khua a ni a, Cammarata tlangin a siam ruam, a mi chengte retheihna tluk zeta thuk mawnga innghat a ni.
September ni 2, 1943 a ni a, khaw mipuite chu a tuk lawka ni li chhung awh tur kut (festa- kut ni turah ka ngai tawp mai!) awm tur atan chuan an inbuatsaih mup mup a, he festa hi kum khat chhunga an ngaih ropui ber a ni a, Krismas emaw easter emaw New year emaw ai pawha ropui zawk, indo tawp lawmna leh miropui piancham lawmna ai daiha ropui zawk a ni.
Festa chu an khawchhuak saint an ngainat ber tan an hlan thin a. Mussolini-a fascist sorkar pawh khan he thilah hi chuan a inrawlh ngam lo a ni.
Festa buaipui tur hian mi pathum awmna committee siam a ni kum tin a, he tat el tur hian khawchhunga mi zahawm ber berte an thlang thin. Committee hian pawisa khawn leh thilpek te dawngsawnga buaipui tur atan puitu an ruat leh thin. Chhungkaw tinin an thawhchhuah mil tawk zelin an thawh khawm thin. Chu bakah puitu atana ruat te chuan khawlaiah vehbur an khawn thin bawk. (kal kan ang, thunawi pawimawh lo)
Montelepre festa ni hmasa berah chuan, Turi Guilianno kut hawnna atana pawimawh tak, sakawr leh sabengtung thlahpawlh (Mule) leh khawchhunga sabengtung lian ber inpawltirnaa tel tura thlan a ni a. Mule nu rai thei hi thil vang tak a ni a, chi thlah thei lova ngaih a, sakawr nu leh sabengtung thlahpawlh a ni tlat a. Mahse chutiang Mule chu Montelepre-ah hian a awm tlat a ni. Kum hnih hmalamah khan no a lo nei tawh a ni.
Kum sawmhnih mi a nih chuan Turi Guilianno chu huaisen leh chak ber, mi zahawm tak leh mite pawhin an zah a ni der tawh a. ‘man of honor’ tia hriat a ni, chumi awm zia chu, fel fail eh dik taka a mihringpuite en thin, mahse diriam leh hmuhsit theih miah si loh a ni.
Buhseng hun hnuhnung berah khan, hnathawktu hlawh tlem a tih avangin buhsenga thawh a duh lo va, midangte pawh hnathawk lo turin a tur a, duh leh thlai te chu rawih ral mai rawhse; khaw hotu pakhat-in a laka charge a siam avangin carabinieri ten an man a, midang ho chuan hna chu an thawk leh tho a ni. Guilianno chuan midangho leh carabinieri lakah chuan a thinrimna a tilang chuang lem lo va, Hector Adonis-a tanpuina avanga tannin atanga a chhuah hnuah pawh huatthuah a la zui lem lo. A dinna ngaiah a mah chu a ding tlat tho a, a tan chuan a tawk em em a ni.
Vawikhat dang leh chu, Aspanu Pisciotta leh tleirawl pakhat, chemte hmanga an insual chu hmanrua engmah keng lovin an inkarah dingin a thelh a, fiamthu hlimawm tak nen an thinurna a tudai thei a ni.
Heng thil a tih te hi midang tih ni se chuan an dawihzep zia lannaah pawh a ngaih theih awm e, mahse Guilianno-ah chuan a ni tlat lo, dangtu awm ang mai a ni.
He mi ni September ni hnih ni hian Salvatore Guilianno, a thian te leh a chhung tena Turi tia an koh chu a nihna dik tak, mipa diktak a nih na chu a lo keu ta a ni.
Thil tereuhte phei chu a ni. Montelepre hian movie theatre a nei lo a, community Hall a nei hek lo. café tereuhte Billiard khelhna hmun awm tel hi a awm a, a hma zanah Guilianno-a Coucin Gaspare ‘Aspanu’ Pisciotta leh tleirawl dangte chuan Billiard an khel a; Pa upa lam ho chuan wine in pahin an inkhel chu an lo thlir a, an zinga pakhat Guido Quintana chu a rui deuh hle. Amah chu mi lar tak niin, Mafia member zinga mia ngaiin Mussolini khan a lo tan tir tawh nghe nghe. America-in Sicily ram an lak khan fascist tuartu anga ngaiin an chhuah a, tlangkamah chuan Montelepre mayor nih tum a ni awm e.
Sicilian dang ang bawkin Guilianno chuan Mafia thuneih thin dan chu a hre chiang hle. Huan enkawltu te, mi tha ho leh huan neitu hnena hlawh lak tum an thih bo nasat dan te, Mussolini-an a tih darh hmaa rul tur neiin a aia chaklo zawk rannung a chuk ang mai a Sicily an control nasat ziate chu. Guilianno chuan hlauhawm lo thleng mai tura hriatna a nei ta tlat.
Tunah chuan Quitanna chuan Guilianno leh a thiante chua ngaihsak ta hle, hmusit mitmeng tak hian a rawn thlir ta deuh reng a; an thawm bengchheng chuan a tibuai a ni mai thei. Amah chu inhmuam up tak, a nun bul tan thar leh tur chan chang kha a ni deuh a. tannin atangin tunah a pianna khuaa lo kir leh a ni bawk a, a tum ber chu thla rei lo te chhunga khaw mipuite zah hlawh chu a ni miau va.
Guilianno hmelthatna chuan a tibuai a ni mai thei bawk, amah chu hmelchhe tak a ni bawk si a. emaw misual tura piang rengin a changtupa dodal a chak tlat vangte pawh a ni ang e.
Quitanna chu a tho thut a, billiard sir lehlama kal pah chuan Guilianno chu a nawk lui sawk a, aia upa zah mi tak a nih avangin guilianno chuan ngaihdam a dil nghal var a. Quitanna chuan hmusit taka en kual vel chungin, “Engvangin nge muhil leh naktuka eitur thawk thei tura chawl hah dam tura I haw mai loh? Ka thiante hian billiard khel turin darkar khat lai an nghak tawh asin” tih pahin Guilianno kut atanga Billiard ball chu laksakin amah chu a nawr kiang nghal a.
Chuta awm zawngte mit chu an chungah a fu thup a, inhmuhsitna namai lo tak a ni. Quitanna chu naupang zawk ni se emaw hmuhsitna awmze nei deuh ni se chuan, Guilianno chuan mipa a nih zia tihlan nan insual puiah a cho ngei ang. Aspanu Pisciotta chuan chemte a pair eng thin a, Quitana thiante lo inrawlh an awm thulhah tiin a lo inring nghal hle. Pisciotta hi chuan aia upa zahna a nei tehchiam lo va, a cousin chuan chu an inhnialna chu a tharuna a chhan ngei a beisei a.
Mahse Guilianno chuan nuam lo tihna riau a nei ta tlat. A khingpuipa chu tihbaihawm tak a niin eng thil pawh ti tura inpeih at a ni a. Upa lam awm hote lah chu engpawh thleng se an buai loh hmel khawp, pa khat phei chuan rifle a keng bawk a, Guilianno chuan ralthuam engmah a pai lo. A vawikhatna atan, hlauhna a nei ve ta tlat. Tihnat leh vuak emaw, chak zawk zawn lam chu a hlau a ni lo. Heng mite hian an thil tih an hrechiang a, thil awm dan an thunun tlat a ni. A haw kawngah kawtthler thim laiah an kap hlum der amg a, a tukah mi a pakhat a thi a ni mai. Sipai that akin tawlhkir hun a hriaa a tawlhkir angin tun hi tawlhkir hun a ni.
Tichuan Guilianno chuan a cousin banah kaiin café atang chuan a chhuahpui ta a, Pisciotta pawh chuan that akin a zui ve mai a, chute maia a thianpa a tlawm chu mak a tihle, hlau hmel erawh a pu hauh si lo. Turi chu rilru tha tak a nih avangin chutiang thil te thama intih buai chu a duh lo niin a ngai mai a.
Chumi zan zankhua chuan Guilianno chu a muhil thei lo va, kha pa kha a hlau tak take m ni? Hmeichhia ang main a khur vel maw? An nuihzat hlawm viau ang em? A cousin, Aspanu khan engtinnge a ngaih ang? Dawihzep a ti ang em le? Montelepre-a thalaiho kaihruaitu, an zah ber leh hlau nei lo leh chak ber nia an hriat thin chuan mipa laka buaina a tawh hmasak berah a hmachhawn ngam lo maw? ‘Mahse khatiang thil ho lutuk, aia upa thinram vang mai maiah engvanginnge a nunna a thap kher ang?’ tiin a mah leh amah a inhnem a. tleirawl dangte nena buaina neih nen a inang tlat lo, tuna mi hi chu a serious viau thei tlat. Khang mite kha ‘friends of friends’ an tih zing amite an ni a, chu chuan a tihlau a ni.
Zanah chuan a mu tlem hle, zingah nguai burin a tho va, chu chu mipa tan chuan tha lo tak a ni. Rawlthar dang ang thovin hero nih a duh a, Italy ram bung danga cheng ni seng chuan sipaia a luhna pawh rei tawh tak tur a ni. Sicilian dik tak a nih angin inpek chu a tum lem lo, sipaia an koh lohna turin a godfather, Hector Adoniis chuan ruahmanna a siam vek bawk a. Italy-in sicily hi a awp nachungin, Sicilian dik tak hi chuan Italian-ah an inngai lem lo.
Pawna a chhuah chuan, ni eng mawi tak leh olive leh lemon rim nam cham chamte chuan a nun nguai tak pawh a tiharhin a reh chhawm ve mai a. Via Bella kawtthler tawp hla deuh takah chuan, Turi chuan a cousin leh a thian ni bawk, Aspanu Pisciotta sabengtung tereuhte khalh lai chu a va hmu thei a, a rilruah nizan thil thleng kha lo lut zawkin, aspanu chuan engtinnge a ngaih ang, a hmuhsit zia a lo tilang mai ang em? Guilianno chuan a thinurna chuan a nawr tet tetin a hria a, khatiang mai maia inring lo khan a awm leh tawh ngai loving. A hnu leh tur ngaihtuah si se a ngai tawh lo, midawihzep a nih loh zia a lantir tawh ang.
Aspanu chuan lo nuih sawng chungin, “Turi, he sabengtung hian a mah mai chuan a ti hleithei der lo, kan puih a ngai a ni.”
Turi chuan a chhang buai duh lem lo, nizan thil thleng lam hawi pawh a lo sawi miah lo chu a thaw huai a. Sabengtung kai chung chuan town square lam panin an kal ta a.