THE SICILIAN (Book I &II) By Mario Puzo (Completed)

[Loma hmar]

Chapter 3b

Town square-ah chuan dawhsan, feet li-a sang chu a awm a, tlang atanga lak lung lian pui hmanga siam a ni. Guilianno leh Pisciotta chuan sabengtung chu dawhsan chhawrdawhah chuan an nawr kai a, hruiin thir kham lo awmah chuan an thlung bet a. Naupang ho chu dawhsan bulah chuan rawn kal khawmin, an lo nuihzatin an elsen vel a. naupang pakhat chuan, “Tu ber kha nge sabengtung ni che u?” a rawn ti a, naupangho chu an nui dar dar a.

Turi Guilianno chuan, chu mi ni chu thingtlang naupang satliah anga a hun hman hnuhnun ber tur tih hre miah lovin, lungawinaa khat chungin mipui ho chu a thlir a, he leia hmun tereuhte, a pianna leh a nun a lo hmanna hmunah a awm mek a ni a, khawvel dang mi ten an tina thei ngai lovang. Turi hian an khuaa in zawng zawng, huan zawng zawng, hnathawktu zawng zawng leh Normans leh Moors hovin an hnutchhiah kulh chhe tawh te chu a hrechiang em em a, Greek hovin an hnutchhiah ruh ang tak temple mawi tak takte pawh chu.

Town square luhna hmun dang atang chuan loneitu pakhat, Mule dangdai tak kai chu a lo lang ta a, he pa hi anmahni chhawrtu chu a ni. A hming chu Papera a ni a, Montelepre mipuite chuan a thenawm pa laka hlawhtling taka phuba a lak avangin an zah hle. A thenawmte nena an inkar ram tereuhte inchuhin an intibuai a, he buaina hian kum 10 zet a awh a ni. Allied Army hoin Sicily la a democracy sorkar an din hnu lawkah zan khat chu, a thenawmpa chu lupara-a kahna avanga taksa bung tepin hmuh a ni ta mai a. lupara chu Shotgun tanbun, Sicily rama an hman lar tak a ni. Chu thilah chuan Papera chu rinhlelh nghal a ni a, mahse inthahna thlen zan chuan Bellampo Barrack taninah, carabinieri tihbuai avangin him takin a tang bawk si. Tlangkamah chuan hei hi Mafia tih dan hlui lo lan leh hmasak ber a niin, Papera, Guido Quintana nupuia chhung hnai tak chuan Friends of friends (Mafia sawina tho) a ruai tih a ni.

Papera-an dawhsan hmaa mule a rawn kaih phei chuan, naupang ho chuan an lo bawr lat lat a, Papera chuan lo hnawt darhin, a tihthaih nan nui huah huah chungin naupang ho luchungah chuan a whip ken chu a vai fua fua a.

Mule nu rim a hriat chuan, Dawhsana Sabengtung an dah chu a lo tal aih aih a, Guilianno leh Pisciotta chuan an sabengtung chu an chawikang a, naupang ho chu lawmin an lo au dar dar a; chutihlai chuan Papera chuan Mule chu uluk takin dawhsan sir kilah chuan a mawng lamchhawn tirin a rawn hung rem bawk a.

Chutih lai chuan Frisella, lumettu chu chulai hlimna chhim ve tur chuan a dawr atangin a lo chhuak a, a hnungah chuan Maresciallo, inngai ropui leh inti pawimawh taka a hmai sen tul mai zut hauh hauh chungin a rawn zui bawk a. Amah chauh hi Montelepre-ah chuan nitina hmul met thin awmchhun a ni. Dawhsan atang pawh chuan Guilianno chuan hmulmehnaa lumettuin a hman rimtui rim chu a hre pha hial a ni.

Maresciallo rocofino chuan chulai town square-a mipui lo pungkhawm ho chu uluk takin a thlir kual a, Local national police, mi swmpahnih awmna-a Commander a nihna angin; khawchhung dan leh hrai kenkawh kawngah mawh a phur lian hle. Festa-ah hian a chang chuan buaina a chhuak thin a, a mite pali chu town square-ah hian patrol turin a tir tawh a, mahse an hmel a la rawn lang lo a ni. Papera leh a Mule pawh chu a hmu a, Papera chuan a thenawmpa thahna thupek kha a pe tih a hrechiang hle. Heng Sicilian mimawlho hian an zalenna an hmang thiam lo mah mah a ni, Mussolini an hloh kha chu pawi an la ti khawp ang, tiin a ngaihtuah a, Friends of friends ho lakah hi chuan Dictator kha chu mithianghlim Francis of Asissi dang ni maiah a ngai.

Lumettu Frisella chu pa ho ve tak hi a ni a, mi thatchhia, thawh tur hre lo ho chu a fiamthu thawh leh a khabe liam changin a dawrah chuan an kal khawm awl lo thin. A dawrtu te aia mahni inmet uluk zawk mi a ni a, a hmuihmul chu uluk leh nalh takin a tan a, a sam chu uluk zeta khuih a ni bawk. Hnar lian zet, Kareh zau tak mai, khabeh ruh kual lian tak, khabe alawi nei si lo a ni.

“Turi, In ramsate kha ka dawrah lo hruai la, perfume ka lo chulh ang e, sabengtung khan lal nupui a mutpui emaw a ti mai ang” tiin a rawn au lung lung a.

Turi chuan a hre lo der tlat a, a naupan lain Frisella hian a lu a meh sak tawh a, a nalh loh em avangin a lumeh hna chu a nuin a chang ta zawk a ni. Mahse Guilianno-a pa erawh chu frisella dawrah hian titi phungleng sawi tur leh America-a a awm lai chanchin sawi turin a la kal fo thin a ni. Turi Guilianno chuan frisella chu a ngaina tehchiam lo, a chhan chu frisella chu fascist rinawm tak a ni bakah tlangkamah chuan ‘Friends of triends’ thian tha tak a ni an ti bawk.

Maresciallo chuan sikret zu chungin Via Bella-ah chuan a kal kual vel a, Guilianno chu a awm ve tih pawh a hre lo – chu chu a thil hmu thelh pawi tak, kar lo awm leh mai tura a inchhirna thlentu tur chu.

Sabengtung chu dawhsan atanga zuanthlak a tum uaih uaih reng a, Guilianno chuan a thlunna hrui chu a thlah dul deuh a, Pisciotta chuan a sir kil, mule awmna lamah chuan a hruai ta a, mule mawng lam chuan dawhsan chu a chhawn a, Guilianno chuan hrui chu a thlah dul leh hret a, mule chuan hnar tum dutin a mawng lam chu a rawn dawh rem sut sut a, chumi rual chuan sabengtung pawh chuan a ke hmalam chu mule mawng lamah chuan nghatin a su ta auh auh a, chutah nuihzatthlak khawpa a hmela nawmna vawrtawp pu chungin a awm ngai chuan a awm ta reng a. Guilianno-an thir khama thlun let leh tuma a pawh sawk sawk lai chuan Pisciotta leh Papera chuan an lo nuih chiam a. Mipui chu lawmin an au dar dar a, naupang ho chu hmuhnawm dang zawngin an lo kal darh hman reng tawh thung a.

Papera chuan la nui reng chungin, “Sabengtung nun ang vek nei thei la, eh.. nun nuam tak a va ni rua em!” a ti a.
Pisciotta chuan zahpah lo zetin, “Signor Papera, I hnungah khan mau leh Olive bawm ka dah han phal la, nikhatah darkar riat chhung tehmeuh tlang kar kawngah khian vaw chungin ka khalh che ang a, chu chu Sabengtung nun chu a ni,” a lo ti pek a.

Loneitupa chuan thinrim zetin a melh a, Pisciotta chuan he hnaah hian hlawh min pe tlem tia dem hmel zetin a lo melh let thung a. Pisciotta hi chu a ngaina ngai lo reng a, dik tak chuan tuna an hnathawh pawh hi Guilianno a pek a ni nghe nghe. Montelepre-a mi zawng zawng hian Guilianno chu an ngaina vek alawm, mahse Pisciotta hi chu a dang daih, a tawngkam hriam lutuk leh a nungchang nguai lutuk bakah a thatchhe lutuk hi; a awm chhung lamah harsatna a neih hi chuanlam a tling lo, sikret a zu reng a, Palermo nula dukdak lo a rim peih rengin, a inchei nalh teh zawr reng bawk a. A hmuihmul, French style-a a zuah te pawh chu. A khuh nasa vang hian a la thi vat anga, a hrisel lohna nen ramhuai ho hnenah a la kal ang chu, tiin Papera chuan a ngaihtuah a. An hlawh, lire zahnih chu a pe a, a mule nen chuan a farm lam chu a pan ta a. Tleirawl pahnihte pawh chuan sabengtung chu phelhin Guilianno-te in lam chu an pan a, Sabengtung zinkawng chua intan ta chiah a ni.

Guilianno-a nuin hma taka a siam chawchhun chuan a lo nghak reng tawh a, Guilianno farnute pahnih, Mariannina leh Giuseppina chuan a nu chu zanriah tur Pasta an siam pui a. Turi-a pa thung chuan lovah hna a thawk a, chawhma a thawk zawk anga chawhnu lamah chuan festa chhim ve a tum a ni. A tuk chu Mariannina chu a pasal tur nena an inhual ni tur a ni a, Guilianno-te inah hian Special party a awm bawk dawn a ni.

Turi Guilianno chu Maria Lombardo Guilianno-in a fate zinga a duhsak ber a ni fo thin. A farnute chuan nausen a nih laiin a nuin nit n a bawlh thin kha an la hrereng mai, thir chawhtawlha uluk taka tui chhuan sovah, a nuin a kiuin tui sat dan tawk a en thlap a, Palermo a lei sahbon tha chiin a bual thin. A tirah chuan an han thik dawn viau a, mahse a nuin a bual mek naute chuan a aikaih ta tlat thin, nausen dang angin a tap ve ngai lo va, a nuin hla a han sak sak chuan hlim takin a nui har har thin. Unau zinga naupang ber a ni chungin a chakberah a lo thanglian a ni. An ni lakah chuan a danglam bik viau a, lehkhabute a chhiarin ram inrelbawlna chungchang pawh a sawi thin. A dung sanna leh a chak bikna chu a nuin a pai laia Americaa an awm vang niin an sawi fo thin. A felna leh mahni hma a sial loh avang chuan an hmangaih em em tho a ni.

Hemi tuk, chhang leh kel hnute atanga siam cheese te, olive leh Coffee a eia a in lai chuan hmeichhe ho chuan an ngaihtuah deuh hle a, a hma ngai tak chungin an lo thlir a. Chawchhun a ei zawh veleh hian Aspanu nen sabengtungin Castellammare lam kawng zawhin, cheese te, sabawp te leh sa thithunte tawlaiin an phur let leh dawn a ni. A nu tihlawm a duh avang leh a farnute inhualna party chu hlawhtling taka neih a nih theih nan festa ni khat chu a tel thei dawn ta lo a ni. An chhungkaw robawm a mi turin an bungraw ken thenkhat an hralh bawk dawn a ni.

Hmeichhe pathumte chuan chu tleirawl pahnihte hmuh dun chu nuam an ti hle. Naupang tet atanga inkawm tawh an ni a, inang lo viau mahse unau aiin an inhnaih zawk a ni. Pisciotta leh maria Lombardo an inkawm chhungin Guilianno chu a roomah chhovin a lo han inbuatsaih a, Pistol a thuhruk la tura kal a ni mah zawk. A hma zana buaina a tawh kha hrerengin, vawiina an thil tih turah hi chuan ralthuam ken ngei a duh a ni. A pain sapela a hruai fo avangin a hman dan lah a thiam sa a ni a.

Chokaah chuan a nu chuan thlahna thu sawi turin amah chauha lo nghakin, Guilianno chu a han kuah a, a kawnga Pistol a pai chu a hre ta a; phawk deuh takin, “Turi, fimkhur hle ang che. Carabinieri nen buaina nei suh angche, an lo tih din che u chuan an duh ang in pe mai dawn a nia,” a ti a.

Turi chuan thlamuanin, “Bungrua chu an la thei ang chu, mahse ka invuak tir emaw taninah emaw chuan min dah hauh lovang.”
Guilianno-a nu chuan chu chu a hrethiam hle, a Sicilian chapona atang chuan a fapa chu a chhuang hle bawk. Kum tam liam tawhah khan chu a chapona leh retheihna laka a thinurna chuan a pasal chu America-a pem a nun thar tan thei turin a hmin a; chu a chapona bawk chuan Sicily-a let leh a, lalnu ang maia khawsa turin a siam leh a ni. Mahse thil a inher danglam a, indo lai chuan pawisain hlutna a hloh a, a lo rethei leh ta a ni. A chanvoah chuan a lungawi a, mahse a fate tan beiseina a nei ta thung a ni. Amah lo khalh kaltu rilru ang Turi-an a pu ve tih a tilang chu a lawm hle a ni.

Via Bella atanga khawchhung chhuahsanna kawng zawha castellammare lam an pan mek chu a thlir reng a, a fapa, Turi Guilianno leh a unaunu fapa Gaspare Pisciotta te chu. Kum 20 pawh tling thathum lo ve ve niin an kum aiin an lang naupang zawk leh nghal, a hmangaih ve ve a, an zinkawngah chuan a hlauhthawn pui hle bawk.

A tawpah chuan chumite pahnih leh an sabengtung chu kawtthlerah chuan an lang thei ta lo va, a la thlir reng tho va, lo lang lehin montelepre khaw chung, khaw hualtu tlangah chuan an lut chho mek a. Hmu leh ngai tawh lo tur ni awm fahranin, tlang chhipa tiauchhum kara an pil bo thleng chuan a la thlir reng a. An zinkawng khawhar tak zawh tur chuan an pil bo ta a.