HNAMCHAWM PASALȚHA KAPHLEIA BY Nghaka Chelsea (Completed)

Mizo pipu te chanchin, zo nunze mawi, tlawmngaihna, ai upa zahna lam lantir thei thawnthu....
Ngaia
Site Admin
Posts: 25813
Joined: April 30th, 2016, 4:07 pm

Re: HNAMCHAWM PASALȚHA KAPHLEIA BY Nghaka Chelsea 1 - 35

Unread post by Ngaia » April 4th, 2018, 8:37 pm

HNAMCHAWM PASALṬHA KAPHLEIA
By. Nghaka Chelsea.

EPISODE - 37

"Aw lo chhuahna lamah chuan Bawmzo pasalṭhate chu an hawi rual ṭhup a. Chu aw lo hre phaka awm ve Zopui val rualte chu an hawi phâwk nasa mai a, chu aw chu an vawi khat hriatna a ni tlat lo. Vawi tam tak an lo hriat tawh ṭhin an khaw pasalṭha tuaitir Kaphleia aw ngei a ni tlat mai. Mahse, an kut hnungkhirh a nih avang leh an pasalṭha lo chhawn thei tur khawpa chakna nei an awm tawh lo a ni.
.
Bawmzo pasalṭhate chuan an hmaa tlangval hmelṭha tak chu engvanga an buainaa rawn inrawlh ve ngawt nge a nih chu an hrethiam lo hle mai a, " an val upa chu a hmel hriat a nih an ring hauh si lo. " hriat ngai loh putar pakhat chhan tura an pasalṭha râlhrat a rawn váu ngam chu mak tiin an meng phar awn awn hlawm a.
.
Pasalṭha Tlanzoa chu a thinrim kher mai le. A thil tum tawh dang ngam hi tumah an la awm ngai lo a. An mite khati zat zingah pawh khan an awm lo a ni. Chutia tlangval a hmel hriat ngai pawh ni hlei loin a rawn ṭawngkhum ngam chu a ngai thiam lo nasa kher mai, thinrim zet a tlangval chu va melhin, " tu phiangsen chu i han ni maw? " nung damin ka chhuah hauh lo ang che, " tiin tlangvalin silai-a a lo tinna chu a ngai pawimawh lo nasa kher mai a.
.
Chuveleh, Bawmzo pasalṭhate zing aṭang chuan, " Liansangi pa, " ani hi kan mi sawi mêk Zopui pasalṭha chu a ni e " tiin a rawn âu ta làr lár mai a. Kaphleia pawh chuan chu'ng mite chu tunge an nih? " tih chu a va hre nghal thuai a. A thil va hmuh chuan a barakhaih ve chiang kher mai. Ngaihtuahna fîm hmang loin thil a lo ti a ni tih chu a hre chhuak chiah a, a hmaa pasalṭha rual a hmachhawn mêk chu Bawmzo pasalṭha râlhrat rual an lo ni tlat mai le.
.
Bawmzo pasalṭhate chuan an tih tur an hai bik tlat lo. Chu tlangval chu eng ang a huaisen leh midik pawh ni se, an hmelma pasalṭha a ni miau si a le. Bawmzo pasalṭha rual chu an lo inkau ve ṭhâm ṭhâm hlawm a, Mahse, a tak ram an la thleng lo mai chauh a ni. Kaphleia paw'n a beisei loh thil lutuk a nih avang chuan a inkhâp buai ve nasa kher mai. A mi va hmuhte chu Bawmzo lal in chhunga val upa bula ding ve kha an ni tlat. Bawmzo pasalṭhate hi helai hmunah hian a hmu ang tih rin ngaihna reng a hre lo a ni.
.
Kaphleia chu hmelmate antam avang ringawt chuan a zâm hauh lo a. Pasalṭha Tlanzoa'n a bân a tansak tak val upa chuan a kut leh lam chuan a thisen chhuak nasa lutuk chu a theih ang ang chuan a lo hup a, a mah rawn chhantu tlangval chu a rawn en ang ṭawk ṭawk bawk a. Kaphleia chuan thil thlen dan tur ang chu a ngaih ruat thiam ta thuai a. " Bawmzo pasalṭhate beisei angin thil a kal lo a ni tih chu. Mahse, hmelma chuti zat chu a tan hneh ngaihna a awm lo a ni tih a hre chiang kher mai.
.
Chutah, Kaphleia chuan a silai chu hum nghet sauhin, pasalṭha Tlanzoa chaldarah tak chuan a silai kaw hmawr chuan a han tin kawh vah mai a, " kha putar kha i khawih leh a nih vaih chuan i lû bûr kha ka thlawh darh nghal a ni mai, " pawisawilote nun laksak tura an hruaitupa chu nang hi i ni ang maw? " i fanu chuan a pa chu a chhûn hle a nih hi " tiin pasalṭha Tlanzoa chu a han melh tur khui mai a.
.
Bawmzo pasalṭha râlhrat Tlanzoa meuh pawh a fanu hming lamrik a han ni chuan a ti harh zawk a, " nau chahai, ka fanu chungah khan eng thil pawh i ti a nih chuan i lû vun kha ka hîk dawn khawp mai " tiin a rawn âng ta tun tun a, " a fanu chungah chuan Kaphleia hian engthil emaw tak a ti ngeiin a ring a, Bawmzo lamkalte lah kha Kaphleiate chhuah hnu lawk a khua chhuahsan an nih ve avang khan engthil nge thleng zel an hre tawh si lo a ni.
.
Kaphleia hian a hmaa pasalṭha chu Bawmzo pasalṭhate rawn hruaitu a ni tih hriain, " a fanu hming chawia koh a nihna chu hre rânin, remchangah a hmang mai zawk hi a lo ni a, a duhthusam ang ngei thil a thleng ta reng a ni. Pasalṭha râlhrat Tlanzoa chuan a hmaa tlangval chu han vàu zam mai mai chi a ni lo tih a hre chiang ta kher mai. " a fanu chu chu tlangval kutah chuan a awm ngei niin a rin phah ta chiah a, An khaw tlangval tam tak that a an lal leh upate pawh man theitu pasalṭha chu mi satliah ani tlat lo a ni. " chu tlangval chuan a mi mante chu khawiah nge a dah ang ? " tiin an kiang velah chuan an mit chu an han lên vel ruai a.
.
Mahse, Bawmzo pasalṭhate chuan engmah han hmuh erawh an nei lo thung. Tháng vawi hnih lai lo chhuah tawhtu leh râl lû sawm hnih chuang khai hawng tawhtu pasalṭha Tlanzoa ngaihdan a pel takzet ta! A thinrim na ngiang mai a, an mite tam tak thattu leh a unaupa ngei thattu chu a hmaah a ding tlangval chu a ni si a le.
.
Mahse, a hmaa tlangval zâmna chhete mah nei lo leh a mitmeng nelawm lo fahrana lo melhtu thusawi chuan a ti mai mai lo hle a ni tih hria a, a ti lui a nih chuan tlangval silai chu a puak ngei dawn tih chu a hre chiang hle bawk a, chet lak zui ngamna chi a ni bik rih tlat lo. Bawmzo pasalṭha za rual teh meuh mai chu an hotupa silai kaw hmawra tin a nih avang chuan chet han la zui ngam an awm bik lo a ni.
.
Kaphleia chuan a dinhmun hlauhawm zia chu hre chiang hle a, " zawhna hlirin a khat a ni ber mai. An mite chu an thi nge an dam tih a hre lova, a thil hriat chian em em erawh chu, Zopui khawchhungah chuan an mite chu la dam pawh ni se, Bawmzo pasalṭhate awmhmun khuarna avang chuan tuihâl dáng charin an awm mêk a ni tih chu; " Bawmzo pasalṭhate kiangah chuan midang han hmuh a neih mai loh avang chuan a lawm rilru hle a, Mahse, a ngaihtuahna erawh a vak thui hle mai.
.
Chutah, pasalṭha râlhrat Tlanzoa chuan, " nau a, i huaisen hle mai maw, Mahse, tuna i hmachhawn mekte hi tute nge kan nih i hre lo a ni. " he putar chunga ka tih ang chiah hian i chungah pawh ka thlentir ve ang. " kan mite inring lo lai tam tak i that a, kan lal leh upate manin ka fanu ngei pawh i hruai ve a ni tiraw, Mahse, hei hi lo hre rawh! " pasalṭha Tlanzoa pawi i sawi a ni tih hi, " khatia silai-a min tin reng lo khan pasalṭha chu i han inbei ang hmiang? " pasalṭha i nih takzet chuan min han hmachhawn ta che le " tiin a rawn âu ta lûng lûng mai a.
.
Chu thil chu Kaphleia lo beisei phakbak thil a ni ta tlat mai. Pasalṭha Tlanzoa chu a fanu hmanga chet la lo tura a tih theih mai kha a ring a ni a, Mahse, a lo rindan angin thil a kal dawh ta hauh si lo a le, Bawmzo pasalṭha ṭhenkhat silai kaw hmawr chu a hmachhawn ve reng tawh a ni " tih lah chu a hmuh hmaih lo nasa mai bawk si.
.
Chutia beisei anga thil a kal tak si loah chuan, Kaphleia tan pawh duhthlan tur a awm bik tlat lo. " pu a, pasalṭha heti zat hmachhawn tura mi huaisen chu ka ni love. " vawiin hian in mite thihna chauh chu em ni i hmuh..? " pawisawi lo thisen engzat chiah nge in lo chhuah tawh le? " ka silai chu i duh ang ngeiin ka dah ang e. " in lal leh upate erawh dik lo taka ro an rêl avangin an thiltih man chu hmu mawlh rawhse. " ka khua leh tuite chungah chuan eng thil nge thleng ka hre hauh lo a, mahse engti tura helai hmun rawn pan hi nge in nih erawh ka hria e, inbeihna chu kan pahnih inkarah chauh a ni thei ang em? " tiin a silai tin kawhvah chung chuan pasalṭha Tlanzoa awmna lam chu a rawn hnaih ve ta chhat chhat mai le.
.
Chutah, Bawmzo pasalṭhate'na bûk an sakna piah lawk aṭang Kaphleia ṭhianpa Ramzaua chuan, " ṭhianpa Kaphlei, i lo let leh a ni maw, " kha pasalṭha lakah khan fimkhur hle ang che aw! " Lawmsanga, harh teh, " ani chu a lo thleng tawh asin! " Kaphleia hmu lo chuan ka thi lovang i tih kha! Pasalṭha huaisen i ni lawm ni " tiin a rawn áu ta rawih rawih a. Aw chu ring tak ni lo mah se, Kaphleia tan chuan nghin lawihna tham a va tling chiang em!
.
Kaphleia ke pen chu a tawp nghal chawt a, " a ṭhiante chu he'ng mite kutah hian an lo awm reng a ni tih a hriat avang leh, Ramzaua thusawi chuan a va deng na teh lul em! Mahse, engmah tih theih a nei bik si lo a le, " a ṭhianpa auhna aw hre lo ang mai chuan a awm a, a chhungril nun erawh a rum vawng vawng lawi si.
.
Bawmzo pasalṭha râlhrat Tlanzoa chuan a naute chet thawh tum a hmuh chu khapin, " tuma'n in thalfang kha thlah hlek suh u. " mipa fa chu mipa takin kan inbei ang chu le, ka unaupa leh kan mite phuba chu ka kutah awm rawhse. " tupawh thalfang thlah in awm a nih vaih chuan chumi chuan kei hi min hmachhawn a ngai ang " a han ti vin tuarh a. " Laltinkhara pasalṭha Tlanzoa ka ni ngai e, ka hmaah hian in mi sawi chu eng nge a nih chiah chu kan fiah ang chu, " nau a, i silai kha dah thla rawh. " Tlanzoa hian ka tiam a che, inbeih laiin kan mite aṭang tuma'n hriam a chelek lovang " tiin a lo ding kak hah mai a.
.
Bawmzo pasalṭhate zingah chuan an hruaitupa thu han awih lo ngam an awm lova, chet thawh tum tumah an awm lo a ni. " val upate leh pasalṭha ṭhenkhatte chuan an val upa ' an an pasalṭha-in a bân leh lam a tansak tak chu an rawn bawihsawm ve thuai a. Kaphleia pawh chuan a hmaa pasalṭha chu a namai lo hle a ni tih a hre chiang hle a, a fanu man ang a a awmna chuan a tibuai lova, an lal leh upate man an ni chung pawha a danglam eih lo leh, zâm hmel apu miah lo chu a hmuh hmaih lo nasa kher mai. " Tlanzoa chuan a mi lû lak chem thisen kai niaih chu a han vilik thauh thauh mai a.
.
Kaphleia pawh chuan a silai ken chu a dah ve bawk a, " a thih hma ngeiin a hmangaih em em a nu chu hmuh duh hle mah se, a fimkhur tawk loh rah a seng ve ngei a ngai ta si a. A hmachhawn mêk pasalṭha chu lo hneh thei ta teh reng pawh ni se, Bawmzo pasalṭha za rual chuan a thil lo tih tawh avang chuan an thlir liam mai maiin a ring si lo a, " a putea chu a nu pui thei tura a innghahna awm chhun chu a ni ta ringawt a, " putar chhan tura a lo va inrawlh ta kher kher chu pawi a ti rilru hle a, Mahse, chhantu nei lo mangang âurâwl chu a hawisan thei bawk si lo a ni.
.
" Ka pa, i fapa hi min ngaidam ang che aw, " ka nu pawh ka venghim zo ta si lo, " ka tan hian thil hi a harsa em a tin a ni. " ka nu, i sawi ṭhin ka putea kha lal ropui tak niin tunah hian a mite chu kan lam panin an lo kal mêk asin! Ani chuan a venghim thei ngei ang che " tiin a han phun deuh sep a. A mahah chuan thil thleng engmah awm lo ang mai chuan a awm a. A iptepui-a a mi lû lak chem hriam zet chu a han phawrh ve ta zàl zál a. A khua leh tuite hreawm tak a awm tir tura an mahni rawn hruaitupa lam hawi chuan a ding kak ve ta hah mai le.
.
Bawmzo pasalṭhate chuan an hmelma pasalṭha che vel chu an hmu duh kher mai, " mahni chauh a a khua leh tui chhanhim nan in zali khua luhchhuah ngam pasalṭha chu eng ang chiah a che rang leh chak nge a nih chu an hmuh chak ber a ni a, lamkalte thusawi an hriat aṭang phei kha chuan an hmelma mah nise, a thusawi duh dan leh hmelhriat ngai loh putar a rawn chhan duh mai dan aṭang kha chuan, misual tak chu a nih an ring lova. Mahse, an pasalṭha chhuanvawr han hmachhawn em tura tan chuan a hmel chu a la nau lu deuh a ni anti a, " an pasalṭha Tlanzoa kiangah râl vawi tam tak lo do tawh ṭhin an nih avangin, an pasalṭha chu ani han hneh tur em chuan an dah phal lo a ni.
.
Pasalṭha mi lû sawm hnih chuang zet lo khai hawng tawhtu chuan a hmaa pasalṭha chu tham lo zet a nuihin, inbeihna-a hnehna a lo chan tawhna chu hmachhuanin, a ṭawngkam chu a chapo hle mai a, a changin a inhrosa vei kûk kûk bawk a, a hmaa pasalṭha thusawi chu a dik leh dik loh pawh thlu loin, an mahni lam tawrhna chiah chu a ngaihtuah a, a unaupa that a, a fanu hreawm tak a a awm ni a a hriatna chiah chu pasalṭha Tlanzoa ngaihtuahnaa thil awm chhun a ni.
.
Tichuan le, thu-a sawi fel theih ni tawh hek lo le, pasalṭha pahnihte chu an inveh ta thauh thauh a, mihrâng pasalṭhate inbeihnaah chuan thisen a luang ngei dawn a ni tih hria ni ve âwm fahran chuan thli chu a rawn thaw heuh heuh mai a, khawdur inṭham awm hmasa hauh si loin, ruah phingphisiau chu a rawn tla seng seng mai bawk a, chu lai hmun a awmte chuan thil thleng mêk chu mak ti takin an thlir ṭhap a.
.
Bawmzo pasalṭhate rawn hruaitupa Tlanzoa meuh paw'n chu thil chu mak a ti kher mai! " a hmaa tlangval tuaitir zâmna chhete pawh nei lo chu mi eng emaw tak chu a nih ngei a ring ve ta hial a. " ani hi lasi zawl a ni mai lo maw? " tiin a ngaihtuahnaah chuan a lo lang nghal a ni. Mahse, chutiang mi pawh chu lo niraw sek sek, pasalṭha Tlanzoa ka ni alawm " tih leh Kaphleia lamah chuan a dawk phei ta zawk mai a, Kaphleia bul a thlen hma deuh a lei lama inbin phei chu a rual nghal a.
.
Chutah, a inbin phei chu rang lutuk a insiam rem pah chuan Kaphleia khup zawnah chuan a chem chu a han vai phei nghal fúa a, englai maha a hmelmate laka a fimkhurna hlauh ngai lo Kaphleia meuh pawh a chesual teuh kher mai! " lo inring viau e ti lo chuan, beisei loh dan daih a hmelmapa'n chet a rawn lak tak thut a vang chuan a inthiar fihlim fel hman ta tlat lo. Kaphleia khup chung deuh hrat chu chem hriam tak ahna avang chuan a kak hlawk mai a, thisen chu a rawn hnâm chhuak nghal ṭuam ṭuam a.
.
Kaphleia chu a che ve hman lo chu a ni ber e, Bawmzo pasalṭhate chu an lo hmuh fo ṭhin tawh angin an pasalṭha chu chak leh ngei dawn niin an hria a, pasalṭha Tlanzoa pawh Kaphleia thisen chhuak a hmuh avang chuan a khi deuh vur vur a, " nau a, ṭang ta che le bul kan ṭan dawn chauh alawm, " sa leh râl hmaa tlawm ngai lo Tlanzoa ka ni ngai e, i lû kha ka la ang a, kan mi mante pawh nangmah ka tih ang chiah hian an chungah ka rawn ti ve ang " tiin chapo zet chuan inhrosa tun tun a.
.
Chutah, Kaphleia chuan, " pu a, ka lû i lak hunah chauh chu thil chu i ti thei ang. Mahse, hnamchawm val Kaphleia hian a chem a la hum ve tih hre ta che le, " pawisawi lo nunna chu i chem khan i laksak tawh ngai dawn hlei nêm! " pasalṭha râlhrat ve meuh i ni a, inbeihnaa a ka thisen i tih chhuah ve loh zawngin, pialrâla kan mihrâng kal tate khan an nuihzat lutuk dawn che asin! " i hmeichhe thah tak zawng zawngte kha an theihnghilh sak theih nan che a tihtir che ka nih kha! " a lo ti let ve sak a.
.
" Kha, keimah hnamchawm val Kaphleia chu lo dang rawh le " ti a zuan paha Tlanzoa lû sahphel phawk tum chuan an chhipthlak ngheng mai a, Mahse, Kaphleia chuan a tha zawng zawng a pe duh lo a, a chhan chu a mi beih hi a hriat chian em vang a ni.
.
Kaphleia lei a ṭum chiah tihah chuan pasalṭha Tlanzoa chem chu Kaphleia rin ang ngeiin a lû zawnah chuan a rawn thlawk phei zawr mai a, Kaphleia lo rin lawk dan ang a thil a kal avang chuan chem rawn thlawk chhuak chu lei-a a ṭum ruala hnung lamah chuan a eu nghal zeuh a, pasalṭha râlhrat Tlanzoa chuan hrethiam ve hek lo le, a hmaa tlangval chu a nghawnga sah chhum hmawk tum chuan a tha tawp chuan a sat ngheng mai a, a sah fuh loh reng a ring tawh lo a ni.
.
Mahse, a hmaa pasalṭha chu a lo ngaih ang ngawta beih awlsam a lo ni ve ta si lo. A tha tawpa a chem rawn vai a nih avang leh, a tum a ṭhelh tak a vang chuan a tha pe-na tawh chu a chem vai tlang chu a pai phei chawn chawn mai a, Kaphleia chu rang lutuk a insiam rem nghal thuaiin, a mi lû lak chem chu Bawmzo pasalṭha râlhrat Tlanzoa lamah chuan a thlawk chuak ta nghal a.
.
Bawmzo pasalṭha Tlanzoa chu a hnungzâng chem hriam takin a sah thler duaina avang chuan a ṭe ṭhat mai a, mahse Kaphleia tan pawh han sah rem lutuk leh duh ang thâla sat a nih bik loh avang chuan a duh ang tak a na chuan a sat fuh bik lova.
.
Bawmzo pasalṭha za rual zet chuan an ṭhianpa chu pui tang e " pawh an ti lova, an hmaa pasalṭha pahnihte inbei chu mikhap lek lo chuan an lo thlir reng a. Tlanzoa chu an mite hmuh a tlawm nih chu a tum lo kher mai, a hliam chu a sârhu lai ni lo se'ng chuan tluk pui tham a ni tawh a, Mahse, sa leh râl hmaa zâm ngai lo pasalṭha huaisen kha a ni miau a ni.
.
Tunah chuan han nui tur bik an awm ta lo! Chutah, Kaphleia chuan, " pu a, hmeichhia leh pawisawi lo i beih ṭhinte nen chuan kan danglam ta deuh em ni? " khatia i âu tak ruai ruai mai le " a han ti zeuh a. Chu kher chu Tlanzoa pai daih theih lo thil a ni chiang kher mai, a bul lawk a lungtum kuttum tiat vel chu chhar a Kaphleia lama rawn vawm phei chu a rual nghal a, Kaphleia chuan hmelmapa chet lakdan tur chu uluk takin lo en lo ni ngat sela chuan a lû khawi lai emaw ber chuan lung rang zeta rawn thlawk chhuak chu a lo hmachhawn ngei ang le.
.
Mahse, mibîk ni tura khuanu duhsakna dawngtu kha a ni miau a, a lo bum fel hman chiah tih chuan pasalṭha Tlanzoa chu a rawn dawk phei zui nghal a, a nunna thâp tak meuh a rawn thawk phei a ni bawk a Kaphleia paw'n a tum a lo ṭhelh lo chiang kher mai, Mahse, chem rawn vai chhuak hmasa zawktu Tlanzoa chem chuan, mihrâng pasalṭha Kaphleia malpui chu a vunpui chhat hlawk khawp chuan a rawn hliam hman ve ta tlat mai.
.
Râl lû sawm hnih chuang zet lo khai hawng tawhtu leh, khualthang hat pasalṭha mite hlauh rawn erawh a dinna hmunah chuan lû nei tawh lo chuan a tlu sawp nuaih a, a lû chu a taksa bul maiah chuan a lir thla nghal tawp bawk a.
.
Kaphleia pawh a thisen a chhuah hnem em avang leh, a hma lama a lo chauh tawh em avang chuan a dinna hmunah chuan a ṭhingṭhi ve hnawk a, thei leh thei loa Bawmzo pasalṭhate awmna lam chu va en ṭawk ṭawkin, " pute u, tunah chuan in mite phuba chu in la thei tawh e, Mahse, thil pakhat chiah ka ngen duh che u a ni. Pawisawi lote chungah chuan inhriam lek tawh lo hram ang che u, in duh ang ngei chuan ka lû chu han la rawh u le " tiin a chem ken lai chu a han thlak thla nghal a.

Chhiar edit lawk mai rawh u. Ka edit hman ta ngang lo a ni e



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2018, 8:38 pm

HNAMCHAWM PASALṬHA KAPHLEIA
By. Nghaka Chelsea.

EPISODE - 38
.
" Ka pa, min lo thlir reng a ni tiraw, " i fapa hian i thisen phuba chu ka la thei dawn ta lo! "engtin nge ni ta ang le, " ka nu, dam takin i awm ngei a ni tih hre lova mitthi khuaa ka pa hnen thlen chu ka chak lo asin. " ka khua leh tuite u, kan venhim zawh loh che u avangin min ngaidam hram dawn nia aw? " a han ti chuai raih a.
.
Bawmzo mihrâng val rual ṭhenkhatte chuan an hmaa rawlṭhar thusawi chu an hre chiang kher mai, Mahse, tu mai pawh chuan eng thil mah an ti lo. Chutah, " Ramzaua chuan, " ṭhianpa Kaphlei, " tiin a rawn au lawm lawm a, chulai hmunah chuan ri dang han hriat tur reng reng a awm lo a ni. Ruah chu a la tla deuh cherh cherh reng a, khua pawh a thim dawn ruai chu a ni tawh a, Bawmzo mihrâng pasalṭha rual erawh an la reh ṭhap mai! Hmuh thiang lo hmu ang mai chuan an meng bial kawk kawk hlawm a.
.
Kaphleia pawh hliam na tak a tawrh avang leh, a thisen chhuah nasat em avang chuan a meng â ruai tawh a. Chutah, Kaphleia bawk chuan, " pute u, pasalṭha thih dan tal chuan min han thih tir hram ta che u? " tiin a rawn ngen leh a. " Ramzaua chuan a ṭhianpa ngenna aw chu mittui tla ṭeuh chung chuan a lo ngaithla a. Beisei tur awmin a hre tawh lo a ni. Bawmzo pasalṭha rual pawh chu aw chuan rawn ti harh vein, an zinga pa upa lam hmel deuh chuan Kaphleia lam chu a rawn pan ve ta chhat chhat mai a. Mi dang ho paw'n a mi lû lak chem an lo phawrh ve bawk a.
.
Chutah, hmelmapa chu Kaphleia hmazawn takah chuan rawn dingin, Kaphleia chem thlauh thisen kai nuaih chu a rawn chhar a, Kaphleia'n thisen chhuak nasa lutuk tur lo hup ṭawk ṭawk chu chiang fahrana en in, " Tlangval, " Kaphleia maw i hming kha! " a han ti thâwp sat a. Bawmzo pasalṭha rual chuan an val upa-in an hmelma pasalṭha lû a lak hun nghakin an lo thlir ṭhap a.
.
Mahse, chu val upa chu Kaphleia chuan ṭawngkam khat mahin a chhâng lo a, " val upa chuan chem-a thisen kai chu a han thlêk vang vang hnu chuan, " Kaphlei, " i putar rawn chhan tum kha i tân eng nge a nih a? " i hriat mi a ni em ni? Engvanga kan val upa kha rawn chhan tum nge i nih le? " a rawn ti a.
.
Chuveleh Kaphleia chuan a hmaa patling chu thei leh thei lo a rawn en hram hramin, " pu a, ani khan puih a ngai a ni lawm ni? " mangangin a âu lawm lawm a, nangni'n in bêng in chhu ngawng tlat si a nih kha! A tha chakna hmanga mi hnuaichhiah ṭhin pasalṭha zinkawng chu a tawp tawh. " Indona hi bansan hram rawh u, he'ng thil zawng zawng lo thlen chhan chu inhriat kha! In lalpa Tinkhara leh a fapa mizia hretute in ni a, Hmeichhe pakhat avanga thisen luang zo zai hi in hmu thiam lo em ni? " tiin Kaphleia chuan a hmaa val upa hnenah chuan a lo ti a.
.
Bawmzo pasalṭhate'n Kaphleia chhânna an hriat meuh chuan an thûm ta mam mam a, an lo rin ruk ang ngeiin an val upa leh Kaphleia chuan inkungkaihna pakhat mah an lo nei lo a, chutiang a ni chunga an pasalṭha râlhrat a rawn la hmachhawn che'u duh chu mak an ti hle a ni.
.
An hmelmapa Kaphleia chu naupang tê mah ni se, khatiang khawpa mihring cherang leh tha hrui ngah kha la hmu ngai hek lo le? An pasalṭha chhuanvawr hneh theitu leh, a khua leh tui tâna a inpêk zawh zia an hmuh chuan Kaphleia chu an ngaisang hle a, " ani ngei hi pasalṭha dik tak chu a ni e, pasalṭha chuan a khua leh tui a thlamuan ṭhin a, zah an ngaih hunah zah a ngai bawk ṭhin a ni. Dik ni-a an hriatah chuan thih an hlau ngai lo a ni " tih chu an hmaa rawlthar ṭhingṭhi deuh ràp mai anhmuh chuan a ti chiang hle a ni.

Bawmzo val upa Kaphleia'n a chhan tak kha tlangval pahnih hian an lo kuah a, an ni chuan Kaphleia awmna lam chu an rawn pan pui a, Kaphleia chuan amah rawn pan mêktute awmna lam chu va melh ṭawk ṭawk a. Chu val upa pawh chuan Kaphleia mit takah chuan a rawn en ve bawk a.
.
He val upa hi Bawmzo khaw mite zah leh thurâwn lakna ve ber a lo a nih piah lamah, tlangval rual hui khawma, thu ṭha tinrenga lo fuih ṭhintu a nih ve avang hian, tlangvalte pawh hian an zah êm êm ṭhin a, Mahse, pawisak nei lo an pasalṭha lak aṭang kha chuan tuma'n an lo hum ngam lo mai chauh a ni.
.
Khatia an pasalṭha thah a ni ta kha ṭhenkhat chu an lo thawveng huai a, an pasalṭha râlhrat Tlanzoa ngaih dan kha an mite tam tak chuan duh lo ṭhin sateh mah se, an lalpa laka a tlaktlum tlat avangin a thu han hnial ngam a ni bawk si lo. Bawmzo pasalṭhate pawh hian an lalpa leh a fapa Kharchina thil tih dik loh a nih chu an hre vek tawh a ni.
.
Mahse, an hmaa pasalṭha chu an unaupa leh an pate thata, an fapate thattu a nihna chu a bo thei tawh tlat lo. Val upa pakhat, Kaphleia hmaa lo ding zawk chuan an thurâwn lak ṭhinna ber val upa thu tlûkna chu a lo nghak ta tawp mai a, chu val upa chu a bân tansak a nih avang chuan a chau tawh khawp mai, Mahse, an mite chuan a thu an ngaichâng reng a ni tih an hriat avang leh, diknaa rorêl a nih theih tawhna tur chuan, a theihna zawng zawng sawm khawmin a mah rawn chhantu rawlthar lam pan chuan an rawn inkuah phei lawp lawp a.
.
Val upa'n Kaphleia kiang a lo thlen chuan, " Kaphlei, ka nunna min chhansak avangin ka lawm e, " ani kha tuma'n an la hneh ngai lo asin. " I thu leh hla zawng zawng kha lamkalte aṭang hian kan lo hre vek tawh a. Tunah chuan a tu lam mah mah thisen hi a chhuak tawh tur a ni lo. " Nang pawh tuma'n an ti na tawh lo ang che, pasalṭha-in a tih tur dik tak i ti a ni. Kan mite tam tak i that a, kan hmelma chu i ni ngei e, Mahse, a thiam lo hmasa zawk chu keini hi kan ni e, " a rawn ti a. Val upa chuan an indona chhan chu an pasalṭhate hnenah chuan engkim chu a hrilh ta vek a.
.
Bawmzo pasalṭhate lo hriat ve dan chuan, Hrangkai nula hmelṭha hi Zopui khuaah zinin, chu chu an lal fapa leh an pasalṭhate chuan an lal fapa nupui ni tawh mai tur chu an zui ve ni maiin an lo hriaa, an rawn hawn theih mai tak si lohah chuan, lal leh upate chuan Hrangkai khaw mite thusawi aṭang khan rin dan neiin, chu an rin dan chu a dik chiah reng a ni. Chuti a nih chuan " tiin an pasalṭhate hnenah chuan thu dik ziktluak lo chu an hrilh ta a, an lal fapa leh an pasalṭhate Zopui khuaa an kal chu an la hawn loh thu leh, Lal Dokulha chu mikhualte chunga zahngaihna nei lo lal a ni a, chuvangin kan lal fapate va zin chu lo ngaithei loin, a lo that a ni ngei ang " tiin an pasalṭhate chu an hrilh a.
.
Anni engmah hre ve lem lo chuan, an lalpa leh upate thusawi chu awihin, râl lak sum leh an sal mante chu Lal Tinkhara chuan a mantu kuta pêk a tiam vang khan, hneh theih loh ni-a inngai pasalṭha rual thisen lum chuan ngaihtuahna fim a put tir lote pawh a ni mahna le, Zopui khua rûn tura thawh chhuah chu an chak zek zek a, an lal fapate'n pawi nasa tak an va khawih ang " tih pawh ngaihtuah loa chhuak ta kha anni a, Mahse, an beisei ang ngawtin Zopui khua chu an va hneh ta mai si loa, an mite tam tak chânin, an khua leh tui ngei pawh dinhmun hlauhawm takah a dingin, tun dinhmun hi an thleng a ni a.
.
Chung thil zawng zawng an hriat meuh chuan an lal leh upa ṭhenkhatte chungah chuan an thinrim em em a, lal khawnbawl tam tak awm mah se, lalpa thu han hnial ngam pakhat mah an awm lo a ni tih an hriatna chuan an rilru a ti na hle a ni.
.
Bawmzo pasalṭha râlhrat rual chuan eng dang mah an ngaihtuah thei tawh lo. Pawisawi lo nunna an lo lak hnem tawhzia chu ngaihtuah chhuak uarh uarhin, chung zawng zawng chu an lal upate vang a ni tih an hriaa, an mi thah takte chu mitthlain, an hmangaihte chungah a han thlen ve meuh chuan an rilru pawh a dang kher mai. Tunah ngat phei chuan an ṭhenawm khuate chu an tân hmelma lo abar an awm tawh lo a ni.
.
Kaphleia chu tuma'n tihnat enah an en tawh loa, mi bîk a nihzia chu an hmu chiang hle bawk. A thilhtih an hmuh avang chuan an chhuang em em zawk a ni. Kaphleia paw'n chu aw a han hria chu a lawm ve kher mai, " ka pu, ka chungah zah in ngai hle mai, " in mite chunga ka thiltih avang khan ngaihdam ka dil e, kan mite himna ka duh avangin kha thil kha ka tih aṭul miau si a ni. Ka vàu khânna che'u a nih kha! " Kei hi chuan ka khua leh tuite himna tur a nih dawn chuan thih hi ka hreh reng reng lo asin.
.
Mahse, dam min la phalsak a nih chuan ka va lawm dawn teh lul em! Khawchhungah sawn min thla hlel em emtu ka nu a awm ve asin, " ka nu tân a fapa neih chhun ka ni a, " Ka tel loin a nung zo loang. Tunah hian a thi nge a dam pawh ka hre loa, " nangni pawh kal tawh rawh u, kei ang hian in hmangaihte chhan turin in tlai lutuk ang e, in lal leh upate'n hmelma tam tak an siam tawh a, Bawmzo khaw tlukchhiat duhtute hlirin a hual vel che'u tih inhriat kha, tunah chuan nangni nen chuan hmelma kan ni tawh lo e, " in khua leh tui leh, in hmangaihte tâna inbeihna inzawh hunah damin kan la inhmu leh ngei dawn a nia, hun tam i nei lo a ni " a han ti a.
.
Chutah, Kaphleia bawk chuan, " ka pu, nang leh i ṭhian ṭhenkhat erawh in mite rûang senghawi tur leh, in lalpa kâ aṭang ngeia hriat belh duh inneih takin la awm thei ula ka duh a ni. " Bawmzo khua chu an hmelmate'n do turin an inbuatsaih mêk a nia, hman hmawh hle ang che u, " ti a a sawi zawh chuan a ṭhingṭhitna hmun aṭang chuan a tlu riai riai a. A khua leh tui tâna inpe zo tak pasalṭha taksa chuan a tlin ta bik lo.
.
Kaphleia a han tluk rual chiah chuan mak tak mai hian ruah tla cherh cherh reng chu a hân ta daih mai a, thli lah chu a ngawi ta hle hle mai bawk si, Bawmzo pasalṭhate'n chu chu an hmuhin mak tihna in an khat a, ṭhenkhat lo hlau tawk an awm bawk a. A ni lah taka, an pasalṭha chhuanvawr nen an inbeih ṭan dawn khan khawdur awm hmasa lawk miah loin ruah a lo sur tawh a, tunah hetiang thil a lo awm leh bawk nen, mak han tih lohna chi rual a ni lo ve bawk a ni.
.
Val upate leh pasalṭha ṭhenkhatte chuan Kaphleia chu an rawn bawihsawm ta vat a. Pasalṭha râlhrat Tlanzoa chu han ngaihsak reng reng an awm loa, " Kaphleia thusawi leh chulai hmuna thil thleng bak an ngaihtuah tawh lo a ni. Bawmzo pasalṭhate hian an hmaa pasalṭha chuan chu'ng thu chu khawi aṭang nge a hriat tih an ngaihtuah loa, an ngaihtuahnaa lo lang hmasa ber chu, an hmangaihte chu dinhmun hlauhawm takah an ding a ni tih chiah chu a ni.
.
Tunah chuan unau hmelhai an tih ang hun vel a ni tawh a, Tlanzoa'n a bân a tansak tak val upa leh tlangval dang pali tih loh chu, Bawmzo khaw lam pan tur chuan an insiam zui ta nghal mawp mawp a, Zopui tlangval an mante pawh chhuah vekin, mi sawm hnih vel lai anni a, Chu'ng zingah chuan Kaphleia ṭhiante pahnih, Ramzaua leh Lawmsanga pawh an tel ve nghe nghe a, Lawmsanga chuan a ṭhianpa lo kal hun nghakin a lo thlir reng a.
.
Mahse, ani chuan a lo nghak chhuak zo ve ta tlat lo. " Ramzaua chuan a ṭhianpa ruang chu nghet taka kuahin, " ṭhianpa, tunah chuan i la kal thei lo ang. " ṭhianpa Kaphlei, kan ṭhianpa hian i lo lan hun a nghak reng asin. " tiin a ṭap hawm hawm a, " Ramzaua chuan thichhawnga let reng a ṭhianpa Kaphleia leh Lawmsanga chu a han âu tawn ruai a, Mahse, tumah han chhàwntur an awm tawh lo. " Ramzaua pawh a chauh em avang chuan aw chhuak tur lawi pawh a nei tawh loa, Bawmzo pasalṭhate kal liam hnu chuan val upa leh tlangvalte chuan, Zopui tlangval hreawm taka an lo awm tir tawhte chu an buaipui let leh ta zawk a.
.
Bawmzo val upa leh tlangvalte tân chuan rorêl thiam a har kher mai, Kaphleia chu enkawl a nih thuai loh chuan a nunna a chân ve thei a ni tih an hre chiang si a. Khua lah chu a thim tawh bawk si, khawchhungah ṭanpuina han ngên dawn ngawt sela, Zopui khaw mite chuan an lo awihsak kherin a rinawm bawk si lo. Tumah han hruai tel ve theih tura chakna nei an awm tawh loh avang tak chuan an buai hle a ni.

Nakzanah ka rawn chhunzawm leh nghal dawn nia, ka hun tiamah chuan a thui emaw a tawi emaw rawn tih chhuah ngei ka tum tawh ang. Min lo hre thiam ṭhin a ka lawm e.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2018, 8:39 pm

HNAMCHAWM PASALṬHA KAPHLEIA
By. Nghaka Chelsea.

EPISODE - 39
.
Chutia rilru buai taka an lo awm mêk lai chuan, an piah lawk ràl leh lam aṭang chuan mêichher a rawn de ta thluah thluah mai le. Chu'ng mêi de thluah thluahte chuan Zopui khawchhung lam chu an rawn pan leh nghal a. An fimkhur loh dân aṭang chuan râl anni lo tih a chiang hle a, engmah han inthup buai annei tlat lo.
.
Chu chuan Bawmzo pasalṭhate buaina chu a belhchhah leh sauh a, " râl an nih si loh chuan chu'ng mite chu tute nge ni ta ang? " Nge? " Kaphleia hian lal dang thu rualpui tur a lo zawng reng zawk? " Chu chu lo ni ta pawh ni se, an rawn kal dân aṭang chuan râldo tura rawn che chhuak an ang bawk si lo. " kan lo hmachhawn dawn nge ni ang a? "Kan lo inthiar fihlim mai dawn " tiin an ngaihtuahna an seng nasa hle a.
.
Mahse, thichhawnga let reng Kaphleia leh a ṭhiante chu an mawhphurhnaah an ngai tawh si a, han kalsan ngawt chu ni theiin an hre tawh si lo. Val upa a bân tansak pawh chet a harsat ve tawh kher mai, val upa chuan, " engpawh ni se naute u, " saw'ng mite saw tute nge an nih kan hre lo ṭheuh a, " kan lo hmachhawn mai a ngai dawn a ni. " khuanu'n kan chungah zah a ngai em ang chu ti r'u " tiin a naute hnenah chuan a han ti a.
.
Chu'ng an mi hmuhte rawn thlen hma chuan Kaphleia thisen chhuak pawh anti phui ve thei ta hram a. Tuibûr hmuam dâ vel zet an lo nghah hnu chuan, an lam pana mêichher êng nena rawn kalte pawh chuan an awmna chu an rawn hnaih sawt hle a, an ṭawng thâwmte pawh a hriat theih tawh a. A lan dân chuan an mahni rawn pantute chu mi sawm hnih thum vel lek chu an ni lo tlat mai le.
.
Mêi chu thing a hnâwn deuh avang chuan a alh ṭha duh lo kher mai, bûk pakhat zawka an thing kham chu an han ṭhiat sawk sawk a, a tam thei ang ber chuan an vur hluah a, Zopui khaw mite chu an bûkah chuan an mut tlar dal mai a, " Bawmzo pasalṭhate tân chuan Kaphleia chu an hmelma pasalṭha mah ni se, a khua leh tui tâna a thiltih zawng zawng an hmuh avang leh, mahni nun pawh hlut zo lo khawpa midang tâna a nun hlan hreh lotu pasalṭha chu en nin har an va ti teh lul em! Chutah, patling chu aw ring taka rawn auin, " tute nge in nih a? " helai hmunah hian eng thil nge in tih? " a rawn ti vin tuarh tuarh ta mai a.
.
Bûk chhunga awm Bawmzo pasalṭhate chu an phu nasa kher mai, an lo beisei ang ngawt chu a ni dawn ta hauh lo. Pâw'n lama an va dak chhuak chu tlangval silai keng sawm thum vel zet chuan bûk chu an lo din hual ṭhap tawh mai a, Bawmzo pasalṭhate hian chu'ng mite rawn thlen lai âwm reng reng chu an lo hre loa, an mahni rawn pantute aw kha chu an hre phak tawh ngei kha a ni a, Mahse, hetiang tut tut hi chu an lo beisei lo a ni.
.
Chutah, aw bawk chuan, " bûk chhungah tute nge awm che u, " ka thusawi kha inhre lo em ni? " hualbeh vek in ni tawh, " Zopui khaw daiah hian eng ti tih a awm nge in nih? " a han ti vin leh tuarh a. Chuveleh bûk chhung aṭanga chuan patling aw dam dap hian, " pute u, " Zopui pasalṭha chhuanvawr Kaphleia ṭhiante kan ni e, " kan chungah zahngai hram rawh u khai! " ani chuan hliam na tak tuarin ṭanpuina a mamawh a ni. " a ṭhiante tlangval dang pawh an awm a, " ṭanpui kan ngai a ni " a lo ti thuai a.
.
Chutih rual chuan bûk pâwn lam aṭang chuan, " mêi kha chhi kai thuai teh u, " Kaphleia chu engtin nge a awm? " tih leh bûk chhunga zuan luh chu a rual nghal a. Mêi an han chhi kaia, bûk chhung an han ên nak chuan e, a khua leh tui hmangaih êm êmtu, thim leh var pawh thlu lo leh, mutmu pawh tuah hman loa a hmangaihte tâna a nun zawng zawng petu Kaphleia chu nikhaw hre loin a lo mu dâng bam mai le. " Zopui pasalṭha chuan a silai ken lai chu thlauh nghalin, " Kaphlei, Kaphlei, harh teh, harh teh?
.
" Ka pu, " eng nge thil awmzia ni ta? a hliam zo zai te hi engvang nge ni le? " ani hian dik lo takin mi chungah thil a ti ngai lo asin.. " tiin a au ta chûl mai a. " a ni lah taka, an khaw rawlthar pasalṭha hi dikna duhmi a nihzia a hre chiangtute zinga mi a ni a, chu chu huailiamkawn ngawpui chhunga buaina an tawh aṭang leh, an hmelma Suakzawl pasalṭhate chungah zahngaihna a lantir dân zawng zawng kha ani hian a hmu miau alawm le.
.
Chutah, Bawmzo pasalṭhate zinga pakhat chuan, " Ka pu, Bawmzo pasalṭhate kan ni e, " a rawn ti chuai raih a. Chuveleh Zopui pasalṭha chuan Kaphleia kut a vawnna chu thlah nghalin, " pu a, tunah khan eng thil nge i sawi kha! " in lal leh upate rual sawn in thi ve ngei ang le, " tu hian nge ani chungah hian hriam lo lek che u chu " tih leh a silai leia tla chu chhar a rual nghal a.
.
Mahse, chet a thawh hma chuan Darzo val upa pakhat chu rawn inrawlh vatin, " E khai, tunah chuan ni rih lo e, " he'ng mite hian duh ni sela'ng chuan Kaphleia leh in mite nunna chu helai hmun kan va thlen hma khan an laksak thei asin. " pute u, eng thil nge lo thleng ta le " tiin zawhna a zawt let ta zawk a.
.
Chutih lai chuan midangte pawh chuan Zopui tlangval rual chau tawh takte chu an lo bawihsawm ve thuai a, Lawmsanga ruang an buaipui mêk lai chuan, Darzo lalpa leh Kaphleia'n a man tak Bawmzo lalpa leh midangte chu an lo thleng ve chiah a. Lalpa Ngurthanglura'n a tupa thichhawngin a let reng a han hmuh chuan insum har a va ti kher em! " ka tupa, " ka tupa neih chhun, i putea ka lo thleng tawh asin, " pasalṭha huaisen i nih kha harh teh, " i hmangaih em em i nu chhan turin i hawng a ni lawm ni? " ani chu ka hmu a nih chuan engtin nge ka sawi tak ang? " hetianga in i thleng a nih chuan e, i nu beidawng hmel tur ka hmu ngam dawn em ni? " tiin thil thleng awmzia a hriat hma hauh chuan a khap per ve ta sak sak mai a.
.
Darzo khua chu an lalpa nen meuh an lo thawk chhuak an ni a, an beisei loh tak thil an va hmu ta si a le, Zopui khua chu a nih tur ang ang ni zo vek tawh turah an ngai a, râl la thah bang leh la dam awm chhunte tuam hlawm tura thawk chhuaka kal an ni zawk zaw maha, Zopui khua chu Lal Tinkhara pasalṭhate'n an hal darh vek tawh turah an ngai a ni. Chu chu Bawmzo lalpa Tinkhara a upate ngaihdan chiah pawh a ni a. Bawmzo lal leh upate bakah, pasalṭha dang an mante chu mêi êng lamah chuan an rawn phih phei dawr dawr a.
.
Chutah, Bawmzo lalpa Tinkhara'n Zopui khaw mite kianga an val upa pakhat leh an pasalṭhate a hmu ve chu a phu chiang kher mai, chutiang bawkin an upate leh an pasalṭha mante pawh chu mak tiin an meng phâwk nasa hle a. " an mite chungah chuan eng thil nge thleng ta? " tiin an inzawt nasa mai a.
.
Darzo val upa chuan, "khai le, " pu a, helai hmunah hian eng thil nge thleng chu han sawi tawh rawh le " a rawn ti a. Bawmzo pasalṭha pakhat chuan an val upa chu han mitmei zeuhin, ani pawh chu a lo bu ve deuh nghat a. Mêi êng lamah chuan rawn pheiin, an zavaia hmuh theih tur chuan a rawn ding chhuak a, a chil chu a han lem deuh khawlh khawlh a, Darzo lalpa leh pasalṭha rual sawm riat vel zet leh, Bawmzo lama an mi mante chuan an lalpa ho chuan chu pasalṭha thusawi tur chu an lo ngaichâng ṭhap hlawm a.

Chutia chil han lem khawlh khawlh paha an lalpa Tinkhara chu va melh pahin, " lal tenawm tak i ni, " an ni hian an that lo che a nih pawhin, kei hian ka la that tho tho ang che " tiin an lalpa Tinkhara chu a va kawk ta siah siah mai a. An lalpa Tinkhara khawih a tum chu dan a ngai hial a, Lal Tinkhara leh a upate tih loh, chulai hmuna awmte chuan thil awmzia chu an hrethiam lo tlang hle a. Lal Tinkhara leh a upate erawh chuan an hre chiang ngang mai, hawi pawh hawichhuak ṭha ngam loin an meng khup làp tawh mai a.
.
Chutah, Bawmzo pasalṭha chuan khawi khua aṭanga lo kal nge an nih pawh a hriat loh leh, Zopui khaw mite thlavâng rawn hauhtute hnenah chuan, " pute u, inhriat ṭheuh angin he rawlthar pasalṭha Kaphleia leh a ṭhiante hi kan duh chuan that vek thei kan ni asin.." thil thlen dân zawng zawng chu a sawi ta vek a. Hnung lamah chuan va kal kawi zawkin, êng in a chhun phak lohna hmunah ruang awmna lam chu a va pan a, an chhehvel khua zawng zawngin an lo hlauh rawn leh, Bawmzo pasalṭha râlhrat ti a an lo sawi huai huai, râl lû pawh sawm hnih chuang lo khai hawng tawhtu lû ngei mai chu a rawn khai chhuak ta vaw vaw a.
.
Darzo pasalṭhate chuan chu chu tu lû nge a nih an la hre chuang tlat lo. Mahse, tunge a nih hria Bawmzo lalpa leh upate chu an meng phar awn awn mai a, an pasalṭha dangte pawh an bang chuang lo. Thil thleng tur ang zawng zawng chu an man thiam ta! An pasalṭha chhuanvawr leh hneh theih loh ang a an lo ngaih chu, he rawlthar kutah hian a famta a ni tih chu.
.
Darzo lalpa Ngurthanglura leh a pasalṭhate'n thil thlen dân zawng zawng an han hriat meuh chuan, Lal Tinkhara leh a upate chungah chuan an thinur hle mai, Mahse, an chunga thu tlûkna siamtu tur erawh Kaphleia chauh chu a ni si a ni. Kaphleia'n pasalṭha râlhrat leh khualthang hat khawpa mite hriat hlawh Tlanzoa a that a ni tih an hriat chuan, chulai hmuna awm mak ti lo reng reng an awm loa, Kaphleia engmah hre loa mu reng chu an thlir tlawk tlawk a, a khua leh tui hmangaiha a nunna hial thâp duhtu pasalṭha zawnna tur hlâng chu an siam ta si, hlâng chu an han siam ta nghal thuai thuai a. Lawmsanga ruang leh midangte pawh zâwn theih turin a inpeih ta ap mai le.
.
Khatia an buai nuaih nuaih lai khan Zopui pasalṭha huailiamkawn-a Kaphleia ruala kal ve pasalṭha leh midangte chu Zopui khawchhung lamah chuan an lo han zualko ve bawk a. Mahse, an rawn let leh chu mi pali nga vel bakin an rawn zui tlat lo. A rawn kal chhun a te lah chu eng khaw sawi set set lo chuan tuikhur lam chu an pan nghal chawt mai a ni. Chu thil chuan Zopui khawchunga awm mêkte chunga thil thleng chu a hrilhfiah chiang viau awm e.
.
Zopui khawchung lam pawh pûk chhunga tawmin awmzia a nei lo a ni tih hriain, tui hâl dang chara thi tur tho tho heta awm reng hi a ngai hlei nêm " tiin khawchhung lamah an lo insuan leh vek tawh a. An mite ruang pawh an theih ang ang a seng hawiin, hmelmate ruang pawh chu an senghawi ve bawk a.
.
Zopui khaw mite chu thihna kut vawtin a man mêk lai pawh chuan, tumah han indem an awm loa, lalpa Dokulha leh a chhungkuate pawh chuan eiin chungchangah chuan duhsakna dawng bik nih an duh hek lo. Inhmangaih tawn an zir a ni ber a, tui awm lo chuan chet a ti har em em a, buhfai neihin awmzia a nei hek lo. In tin aṭanga tui an lak khawm ang angte chu lal leh upate kutah chuan a awm vek a, an ni chuan mipuite dângro lutuk tur dâng hnâwnna tur khawp chuan an lo sem chhuak ta ṭhin a ni. An rân neih ang chhun chhunte pawh an talh zo tawh a, Lal leh upate meuh paw'n thuka melh alh chu an thlir tur neih chhun a ni ta.
.
Chutiang thil a lo nih takah chuan, pu Hrangthangate nupa tân chuan damlo Ngursangi chu phur rit a ni ta tlat mai, an mahni pawh an in buaipui thei tawh lo a nih laiin, ani lo ngaihtuah chu thil theih a ni ta tlat lo. Ngursangi tân chuan dam khaw chhuah chu thil theih loh tluk chu a ni ta ringawt a, Mahse, khuanu hi mi dikte lamah chuan a bân a lo phar tlat ṭhin alawm le, Siamliani chuan Ngursangi chu mawhphurhnaah ngaiin, a nu leh pa pawh rawn hmasa lem lo chuan an inah a la lut hmiah mai a ni.
.
Pu Hrillianate nupa pawh chuan an fanu rilru tur chu hriain, lalpa Dokulha'n, " Ngursangi chu kan mawhphurhna ve tho a ni a, engtik lai pawhin ka lal in chhungah a tân hmun a awm reng a nia " a ti chamchi a. Mahse, Siamliani chuan a phal tlat loa, " lalpa, he'ng zawng zawng hi keimah vanga thleng a nia sin, " Kaphleia chu a nu pawh buaipui thei loin ka siam a ni. " hei tal hi chu min tihtir hram rawh u " tiin lalpa hnenah chuan a lo ngen zawk a. Chuti na nâ na chu tiin lalpa pawh chuan, " ni e maw le, puih in ngaih phawt chuan sawi hreh reng reng suh u aw, " ti a inthlah kha a ni a.
.
Mak tak mai chuan Ngursangi chu a rawn ṭha chho ve tial tial a, mite mak tih pawh a hlawh hle a, Bawlpû meuh pawh Ngursangi lakah khan a beidawng tawh kha a nia, Siamliani chuan Ngursangi mamawh engkim laksak tur chuan a in pumpek tawp mai a, Ngursangi pawh a chau em a tih mai loh chu, a rilru chu a harh em em tawh a, nikhua pawh a rawn hre ṭan chho ve zel a.
.
Chuti a nih lai chuan, a enkawltu Siamliani erawh a cher chhe tual tual emaw tih mai tur a ni ve thung a. A chau em em mai bawk a. Pu Hrillianate nupa chuan thil hriat chhuah an nei ta tlat mai le, an fanu chuan eitur a dawn ve ṭhinte chu Ngursangi tân a pe vek ṭhin a ni tih an hre chhuak a, Siamliani nu leh pa chu an fanu cher chak lutuk avang chuan mangang hle a. Han tih ngaihna vak an hre bawk si lo. An fanu bula an sawi lahin, " ka nu, ka pa, min ngaihtuah suh u, " kei chu ka ṭha e, " Kaphleia a rawn hawn hunah a nu hi dam takin rawn hmu sela ka duh a ni. " chu chu a tâna ka tih theih ve awm chhun a ni a, " ani chu a rawn let leh ngei dawn a ni tih ka hria asin " tih chauhin a chhâng a, a bak engmah a sawi duh loa, han biak leh paw'n lungtum biak ang chauh a ni tawh si.
.
Zopui khawchhung chu lênglèn ar khuan hun vel aṭangin, vaibel bengkhat zuk daih a liam leh ang a? " tih hun velah chuan, thu lawmawm a rawn thleng ta hlauh mai le. Chu thu lawmawm lutuk chu, hmelmate chu an tlawm tawh a ni tih chu, Mahse, chu thu lawmawm chuan ṭhenkhat chu a ti harh zo tawh mang loa, ṭhenkhat erawh lawm luat avang chuan an biangah mittui a luang zawih zawih thung a. Chu lawmna dar rimawi tak chuan nula hmelṭha eltiang Siamliani beng a thleng zo ve ta tlat lo. Ṭhenkhat chu thei leh thei loa tuikhur awmna lam chu pan nghal chawn chawnin, Zopui khaw mite tân nunna dar a rawn ri leh ta!

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 16th, 2018, 10:09 pm

HNAMCHAWM PASALṬHA KAPHLEIA
By. Nghaka Chelsea.

EPISODE - 40

A hmasain Kaphleia story min lo chhiarsaktute zawng zawng chungah lawmthu ka sawi e. Han khawrpum kan tum zet naa, readers te'n chhunzawm zel tura min ngen avang leh, dam lohnain min tlakbuak leh tak si avangin ka duh angin ka khawrpum leh thei ta mai si lova, ti hian hman chang changin ka rawn dah leh zawk dawn a nia. Zanin chu a ngaihnawm viau lo ang. Next aṭang pangngai zawk a rawn kaltir ka tum dawn nia.
.
Zopui Lal in chhungah ve thung chuan lal leh upate chu lawmin kut an lo beng dar dar a, an mite thihna kutvawtin a tuam mêk laia chanchin lawmawm an hria chu an va hlim teh lul em! Mahse, Darzo lalpa leh a pasalṭha rual tam tak an lo tel ve a ni tih thu an hria chu mak anti hle a, " Darzo chu Zopui khua aṭang hian hla tak a ni si a, " eng ti tih a an ni chu rawn tel ve ngawt nge an nih chu an hre lo kher mai.
.
Pasalṭha han zualko khan tlangau hna khawchhungah han thawk nghal a, râl chu an tlan tawh thu leh, an pasalṭhate chu an khaw dai maia an awm thu chu an mite hnenah chuan a puang ta dap dap a, lawm avanga mittui luang chu a dana han dan rual a ni nem le.
.
Mahse, thu lawmawm lo pawh an hriat a ngai ve tho si, lungngaihna mittui leh lawmna mittui chu a luang kawp a ni ber a, an pasalṭha famta Lawmsanga ruang chuan Zopui khawchhung a rawn lut ve mêk a, Darzo khaw pasalṭhate chuan Zopui khaw mite ei tur chu an rawn keng bawk a, tlangau chuan an mite chu au phurin, " Zopui tlangvalte u, harh rawh u le, " in pasalṭhate hnehna nena lo hawng chu in lo hmuak dawn lo em ni? " tiin a au lauh lauh a. Kan indona min hnehsaktu kan pasalṭha Kaphleia chu tunah hian thichhâwngin a awm reng a, " ani chuan a mah chauhin Bawmzo khua a hneh asin " a han ti ta dum dum mai a. Zopui khaw mite beng a verh ta zar mai le.
.
Zopui tlangval la chak vak deuh ho chuan lal in lam chu an pan nghal ta ṭak ṭak hlawm a, Darzo lalpa ho chuan Kaphleia leh midangte chu rawn zawnin, Zopui khawchhungah chuan an rawn lut ve mêk bawk a. An thâwm pawh a ṭha narawh e, chu chuan Zopui khaw mite tân chakna thar pein, mipuite pawh an chakna zawng zawng sawr khawmin, lal in lam pan chuan an rawn pungkhawm tuau tuau a. Mahse, lal in tual thleng zo ve lo in chhung lama awm chu an la tam zawk zaw mah awm e.
.
Tlangau au thâwm chuan Ngursangi mutna khum pawh a thleng phak ve ngei mai. " engkim a hriaa, " a mah avanga thichawnga let reng Siamliani pawh a hmuh hmaih hek lo. Mahse, a taksa a la chak loh em avang chuan a tho chhuak thei lo mai chauh a, Ngursangi mit aṭanga chuan mittui a rawn luang chhuak ngiai ngiai a, "Taite, " ṭang fan fan rawh aw, " i hmangaihte avang hian i va tuar nasa zo zai tawh tak em!
.
" Ngursangi chuan thawk chu a han la deuh hrâwk a, "Taite, " tunah chuan pasalṭha tak tak i ni ta, khua leh tui tâna innghahna tlak pasalṭha i ni tawh e, " U Kap, " i fapa hi i lo hmu em? " a dam leh ang a, " nang leh i chhungte phuba chu a la rawn la em em ang " tiin a han phun deuh siap siap a. " a kianga mû engmah hre lo Siamliani chu duat taka va chûlin, "Siamliani pa pawh chu an kiangah chuan a lo ṭhu ve reng a, Chutah, Ngursangi chu thei leh thei loa pu Hrilliana chu rawn en ṭawk ṭawkin, " ka pu, a pawi ka ti hle mai, " a pawi ka ti tak zet a ni. " i fanu hi keimah vanga hetianga awm a ni tih hi ka hria asin, " tiin Siamliani pa mangang taka lo ṭhu kùn deuh lap hnenah chuan a va ti a.
.
Siamliani pa Hrilliana chuan Ngursangi chu mak ti hmel taka va enin, " Ngursang, i lo harh tawh a ni maw, " lungngaih tur a awm love, " mami pawh a ṭha ve leh thuai dawn alawm, hnehna nen kan pasalṭhate pawh an lo hawng asin " tiin a lo hnêm let zawk a, chutih mêk lai chuan tlangval tui chawia kalte chuan in an rawn lut ve chiah a.
.
Lal in tual zawl lam pawh thâwm a ṭha tawh khawp mai. " Siamliani kâ-ah chuan tui chu an tulh ve nghal thuai a, Mahse, chu chuan danglamna a thlen tawh meuh lo chu a ni e, " Siamliani nu leh pa mangang leh baihvai lutuk hmel chu hmuh hreawm a tling chiang hle awm e.
.
Lalpa Dokulha chuan an pasalṭha pakhat kâ aṭang khan engkim a lo hre tawh a, " a fapa Dosanga pawh Khuangphah khuaah dam takin a awm a ni tih a hre tawh bawk a ni. Tichuan Lawmsanga ruang leh a khaw daingul Kaphleia, hliampui tuara awm mêkte pawh chu a sawi ang ngei chuan a lal in chhungah chuan an rawn nghat ta rup mai le. Mipuite chu an zi nuaih nuaih hlawm a, Kaphleia hnehna chan dan chuan Zopui khawchhung chu a fan chhuak nghal a ni.
.
Darzo pasalṭhate pawh an awm mai mai bik hauh lo. Mipui rilṭamte ei tur buatsaih chuan an buai mup mup hle a, ṭhenkhatin tui an lo chawia, ṭap thâwm leh hlim au thawm chuan Zopui khawchhung chu a khat a ni ber mai. Kaphleia hliam chu Bawlpu chuan a han endik nghal thuai a, a hliam a lo nat em avang leh, a chauh tawngkhawng tawh avang chuan beisei a sang lo kher mai.
.
Chutiang teh nuaiha thil a awm avang chuan Lawmsanga ruang chu an in lamah an la phei leh ta nge nge a, Bawlpu-in damlo a enkawl lai chuan Darzo lalpa leh lalpa Dokulhate chu thil thlen dante loin zawtin, Darzo lalpa Ngurthanglura'n Kaphleia chu a tupa a nih thu leh, a nu Ngursangi chu a farnu neih chhun a nih thute chu lalpa Dokulha leh a upate hnenah chuan hrilhin, a tupa-in Bawmzo khua a va a hneh dan zawng zawng leh, a khua-in manganna a tawh laia a rawn puih dan zawng zawngte chu a hrilh ta vek a.
.
Lalpa Ngurthanglura chuan a tupa vang chauha la dam khaw chhuak an nihzia chu hrilh vekin, sal an rawn hruaite zingah chuan, a hming an hriat ringawt pawha a ṭhenawm lalte meikhupa tlan dawr dawrtir ṭhintu Bawmzo lalpa Tinkhara leh a chhungte bakah, an upate pawh an tel ve thute thleng chuan a hrilh a, " a tupa leh a farnu a lo chhawmdawl avanga lawmzia thute chu lalpa Dokulha hnenah chuan a hrilh mawlh mawlh mai a. Lalpa Ngurthanglura hian a thusawi hi a hun leh hmun pawh a thliar thiam tawh lo a ni ber a, Lalpa Dokulha leh a upate chuan Darzo lalpa thusawi chu mitkhap lek lo chuan an lo en a, mak tiin an lo meng phâwk nasa kher mai, " Kaphleia chu sailo lal thisen kai maw a lo nih le, " chu'ng thil chu engtin nge a nih theih " tiin an inzawt hlawm a. Lalpa Dokulha chu ngawi reng chuan a tho vut a.
.
"Khawnge lal tenawm Tinkhara chu? " tih leh tlengrel chu a han nawr phei deuh nawk a, " a pasalṭhate nufa chu a lawmpui em em rualin an ni chuan Darzo khua chu an pansan mai ang tih a hlau hle a ni. " a pasalṭha chu lo dam chhuak ta teh reng pawh ni se, a chelh zui zel thei ang em tihah chuan a buai nghal der mai a ni.
.
Lal in tual zawlah chuan mipui chu an lo zi nuaih nuaih a, lalpa Dokulha chuan an mite chu ngawi tura tiin a kut chu a rawn phar a, lal Tinkharate awmna lam chu rawn panin lal Tinkhara samah chuan a han ṭham bu lawpa, " nang hi maw pawisawi lote nunna lalsak ṭhin lal chu " a han ti bung hmuk a. " Lal Tinkhara leh a mite chuan kamkhat mahin an chhâng lo a, lalpa Dokulha bawk chuan, " i thihna tur hian thu tlukna siam thei ka ni asin, Mahse, ka khaw daingul leh indona min hnehsaktu rawn harh hun ka nghak ang. " ani chuan eng thu tlukna pawh rawn nei sela, a tih ang ngei chuan ka ti ngei ang " tiin lal Tinkhara a ṭhamna chu thlahin, a pasalṭha nikhaw hre loa awm reng awmna lamah chuan a lut zui ve leh ta nghal a.
.
Lal leh upate meuh pawh Kaphleia'n a khua leh tui tan a beih nasatzia an hmuh avang leh, chutiang khawpa a khua leh tui hmangaihtu a han let bal mai an hmuh chuan, insum a har bawk a ni ang e, " Kaphleia engmah hre lo leh, thisen hloh nasat luat avanga lo mu dâng bam mai awmna lam chu va melhin, a ruk chuan an inhru mawlh mawlh mai a.
.
Kaphleia chu rawlthar chauh ni mahse, leido khua Suakzawl pasalṭha râlhrat Ralngamate unau chu amah chauhin a hneh thei a, huailiamkawn-a harsatna an tawhah lah khan, an lal fapa thi mai tawh tura ngaih chu zawng chhuakin, dam takin hmun himah a dah leh a, an khaw rûn tumtute khua in zali zet chu a mah chauha luh chhuahin, zawlbûk pasalṭha riak zawng zawng that deuh vekin, dik lo taka rorêl ṭhin lal leh upate a manin, a hneh leh bawk a.
.
An ṭhenawm khua zawng zawngin an lo hlauh rawn leh, hneh theih loh ni-a an lo sawi, lal Tinkhara leh a upate paw'na an lo chhuan em em ṭhin, râl lû pawh amah chauha sawm hnih chuang zet lo khai hawng tawhtu pasalṭha râlhrat Tlanzoa chu, pialrâla a bawih ni kum khua tawh turin a tir liam leh a ni a. " a hun hman dan zawng zawng hi Zopui khaw mite'n hria ni ngat phei sela chuan, Kaphleia chu engtiang takin la rawn sawi zui zel ang maw?Chu zan lungngaih zan leh hnehna au thâwm ri nuaih nuaih chu, Zopui khaw mite tan chuan hriat reng a ni tawh ngei ang le.
.
Zopui khaw mipuite chu tlai leh puar taka hrai an nih zawh meuh chuan, zanlai ar khuan hun a lo ni der tawh a, Siamliani chauh chu thichhawnga let awmchhun a ni bik lova, Zopui khaw in zahve vel zet chu, tlangvalte chuan luhchhuahin an in sûlpel suau suau mai a ni. Mahse, Siamliami erawh rilṭam tui hal dangchar avang ringawt a ni ve tlat lo. Tleirawl tê mah ni se, thil thleng engkim chu a hmuh hmaih bik lova, a mah avanga thisen luang zo zai a hmuh avang chuan hreawm a ti em em a, zah namên lovin a zak a, hawi pawh hawichhuak ngam lo leh, Zopui khaw mite hmai eng pawh hmu ngam lo khawpin a in kiltawih phah ta hial a, a tih theih awmchhun ni a a hriat, Kaphleia nu Ngursangi damlo chu duat tak leh hmangaih taka lo enkawlin, Bawlpu leh mi zawng zawngin a dam an beisei tawh loh chu tihdam ngei tumin a lo bei ve fat fat kha a ni a.
.
Mahse, ani hmeichhe âwm nem leh rilru mangang vak vel chuan a tlin mawlh si lo a le, chu tleirawl duhawmna khat leh khuanu'n mipate duh zawng taka a lo duan taksa chuan a harsatna tawh chu a hriat thiampui ve bawk si lo a ni. Zopui lal in chhung lam pawh khuavâng kal lai an sawi ang mai chuan a reh ṭhiap mai a, tumai pawh chuan an pasalṭha na tawrh chu a namai lo hle a ni tih an hre chiang kher mai.
.
Darzo lalpa Ngurthanglura chuan a farnu lam reng reng a lo ngaihtuah tawh lova, a tupa-ah chiah chuan a rilru a awm emaw tih mai tur chuan a tupa kiangah chuan a ṭhu tlat a. Ngursangi lahin khuaah chuan a nuṭapa a awm ve a ni tih a hre hek lo. Kaphleia chu Bawlpu-in zan khuaa enkawl hnu pawh chuan, thu lawmawm lam han hriattur a awm thei chuang tlat lo.
.
Khua a lo vara Zopui khawchhung chu romei zâm chuan a rawn bawh chiai chiai mai a, naupang tualchai thâwm hriattur pawh a awm ve leh ta! Kaphleia lakah chuan Bawlpu chu a beidawng ṭhelh tawh a, Mahse, a tuar chhelzia hre chiangtu a nih ve avang chuan beiseina erawh a nei tlat thung. Chutih mêk lai chuan Ngursangi chuan a fapa dinhmun chu lo hriain, tlangvalte puihna hmangin lal in lam chu an rawn pan ve mêk a, mipuite chu lal in kawtah chuan an pasalṭha chanchin ngaichang chuan an lo la awm ṭhap hlawm a, nî pawh a tlangsang tawh khawp mai. Lal in kawt aṭang chuan Lawmsanga ûitute ṭap hawm hawm thâwm pawh a hriat theih a!
.
Chutia ngawi reng a an kal lai chuan mipuite chuan Ngursangi lam chu an lo thlir ṭhap a, chutah lal in chhung aṭang chuan, " ka tupa, ka tupa Kaphlei, sa leh râl hmaa zam ngai lo Kapvunga fapa i nih kha ṭang ta che le " tiin patling chu a rawn au chhuak rawih rawih a. Chu thil chuan Ngursangi ke pên chu a tawp chiang kher mai.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 4th, 2018, 6:06 pm

HNAMCHAWM PASALṬHA KAPHLEIA
By. Nghaka Chelsea.

EPISODE - 41

Chutih rual vek chuan lal in chhung lam aṭang bawk chuan hlim au thâwm leh kutbeng ri dar dar ri chu a rawn chhuak zui nghal zat a. Chutah, lalpa Dokulha chu ring lenglawnga rawn auin, " ka pasalṭha chu a lo harh ta e, " ani hi ka khaw daingul leh ka pasalṭha chhuanvawr a nih hi, " a khua leh tui hmangaiha a mite thlahthlam ngai lo pasalṭha chu a rawn harh leh ta! " mahni chauh pawha Bawmzo khua rûn thei ka pasalṭha tan khan hmun kian rawh u. " boruak thianghlim a mamawh a ni . " tiin a rawn au ta chûl mai a.

Chu thil chuan Zopui khaw mipui pungkawmte a ti lawm kher mai, Ngursangi pawh midangte chuan rawn pui ve vatin, " ka pi, " i fapa, kan pasalṭha chhuanvawr chu a rawn harh ta a nih chu le, " khuanu'n a chungah zah a ngai a ni. " Nang pawh, khuanu duhsakna dawngtu i ni asin " an lo ti tliar tliar hlawm a. " Ngursangi chuan an lalpa thusawi kha hre lo a ni bik lova, Mahse, mipuite hian an pasalṭha chhuanvawr rawn harh leh ta chu an lawm luatah awm ngaihna an hre lo a ni ber mai, awmna hmun inang ṭheuh ṭheuh pawh, lawm avang chuan an ri chûl mai a ni. Harsatna leh buaina tam tak karah hlim râwl hriattur a awm leh ta.
.
Ngursangi pawh a hlim na ngiang mai, a fapa chuan thihna khawp vawi tam tak hliampui tuar mah se, a hmangaih Kapvunga leh a chhungte pawisawi lo nunna laksaktu chunga phuba la thei turin, khuanu'n a fapa chungah chuan zah a ngai a ni tih chu a ring nghet hmiah tawh mai a ni.
.
Mahse, Ngursangi chuan ngaihtuahna dang a pu rei lo khawp mai, a ngaihtuahna chu lal in chhungah bawk chuan a ni a awm ni. Lal in chhung aṭanga a aw hriat mawlh mai chuan a rilru a luah khat a, a fapa Kaphleia chu a tu chuan nge ka tupa lo ti ve ngawt ang a, " chumi chu tunge a nih a? " ani chuan a hmangaih Kapvunga chu engtin nge a hriat le, " tiin a ngaihtuah chu a kalding nasa mai a. " ka tupa Kaphlei " ti a han ko thei tur chu tunge ni ta ang le? " tiin thâwk han la deuh kâwk chung chuan lal in lam chu an panpui ta zel a, hlauh vang leh a taksa bawrhsawm vang ni hauh lo chuan Ngursangi chu a khur ta der der mai le.
.
Chutah, Ngursangi rawn hruaitute chuan lal in-a luh chu an han dil a, mipui hlim zi hulh hulh karah chuan Lawmsanga uitute ṭap rawih rawih thâwm chu lal in aṭang pawh chuan a hriat theih rei ruai a. Ngursangi'n a fapa a hmu duh a ni tih hriaa luh an dilsakna chuan lal in chhunga awmte mak tih a hlawh kher mai! " Lalpa chuan an ni chu lo chhâwn vatin, " Ê khai! " lo lut tawh u, " Uai! " pi Sangi lah ni rengin, " i damlo na viau khan ka hre si a eng ti tiha rawn che chhuak peih chu nge maw i nih zawk le, " tiin kawng chu lo hawnin a lo chhâwn thuai a.
.
Ngursangi chuan lalpa Dokulha biakna pawh chu chhâng lem lo chuan a fapa awmna tur ni-a a ngaih lam chu a va melh ṭâwk ṭàwk a, chuta a thil va hmuh chuan a barakhaih chiang kher mai! Tlangvalte'n an chelhna kut chu vai kiangin a dinna hmunah chuan a ṭhusawp ta niaih a. " Aw khur der der leh sai hlak hlak chuan, " ka u.. " ka u Ngura i ni em? " a han tih bah deuh nawk nawk a.
.
Lal in chhunga awmte chuan Ngursangi chu an lainat kher mai, thil thleng engkim an hriat tawh avangin lal in chhung chu khuavâng kal lai an sawi ang mai chu a ni a, Ngursangi chu Sailo lal fanu hmelṭha leh duh tin reng nei thei a nih ṭhin vei awm nen, " a chunga thil thleng mek chu an hre thiam thei mawlh lo! Tunah chuan Ngursangi chu damlo enkawltu nei lo leh hmeithai satliah ve mai a ni tawh si.
.
Lal fanu Ngursangi leh a fapa Kaphleia chunga thil thleng zawng zawng hriat chakna chuan an khat a ni ber mai a, Sailo lal chhungkua aṭanga lo chhuak nufate hian engvanga Zopui khua chu rawn pan nge an nih? " tih chu an hre chak thar leh hle a, " eng harsatna chiah nge an tawh ang a? " Kaphleia chu Sailo lal thisen kai maw a lo nih a " tiin zawhna an inzawt mawlh mawlh a ni ber mai.
.
Chutah, lalpa Ngurthanglura chuan a farnu awmna lam chu rawn panin, " Ngursang, " ka farnu neih chhun, " dama ka hmuh leh che hi ka lo inbeisei tawh lo asin. " thi tura ka pa'n i chunga thu tlukna a siam lai khan engmah ka ti lova, ka farnu kha thlah thlam miah lo tur che ka ni asin maw le. Zânthim ṭihbaiawm tak i hmachhawn laia kalsantu che i û kha ka ni alawm, "Ngursang, " min ngaidam hram ang che aw? " a han ti zuai raih a.
.
Kaphleia chu harh tawh mah se, thisen chhuak nasa lutuk avang leh a taksa chauh tawngkhawng tawh avang chuan biak hleih theih a la ni lo va, Mahse, Kaphleia chuan lal in chhunga thil thleng chu a mang hriat rei ruai a, Chutah, zawite hian a rawn phun ta siap siap a, a thusawi hriat chian tumin Bawlpû chu Kaphleia hmui bulah chuan a beng chu zuk dawh vat a, " eng nge a sawi erawh a hre thei mai lo. Chutia Kaphleia'n thusawi duh a nei tih an hriat rual chuan lal in chhunga awmte chu an phu suau suau a ni ber a, Ngursangi chuan a fapa awmna lam pan a tum lai chuan a nuṭapa chuan a bânah chuan rawn kai vatin, "Ngursang, " tunah chuan pui tur che-in i kiangah ka awm reng tawh dawn a ni. " Ka tupa hian thil engkim a hriat hnu-ah min ngaidam thei lo a nih paw'n nang tal chuan min ngaidam ang che aw! " a han ti leh hrâm a.
.
Ngursangi'n a fapa chau tawngkhawng tih hriat taka a lo mu dâng bam mai a hmuh chuan a insum zo ta thlawt lo! " Taite, " ṭang fan fan rawh aw, " hrehawm chu i tawrh ṭhan leh nangmah ti chaktu che a nih ṭhin kha! " ka û.. " ka u Ngur, " i tupa hian harsatna a paltlang nasatzia hi i hre lo a ni ti raw? " hmangaihtu pa leh chhungkua a mamawh em em asin, Ka pa khan a lal in chhungah khan ani hi a pian ve pawh a phalsak lo a ni ti raw? " ani hian eng nge tihsual a neih a, heti em em a hrehawm hi a phu bikin i hria em? " tiin bianga mittui luang zawih zawih chuan a insut ta hraih hraih a. Lal in chhunga awmte tân chuan han sawi tur avang kher mai, Ngurthanglura pawh chuan a tupa chu a en tlawk tlawk ringawt mai a ni.
.
Chutia Ngursangi mittui tla fáp fáp chuan Kaphleia-ah chuan awmzia a nei ta tlat mai, Kaphleia tân chuan chu hmeichhia tluka hlu chu a awm miau lo a ni. Ngursangi mangang au râwl chuan a thisen zâmte chu tih chak thar sakin, a nu kut chu a rawn vuan ta chat mai le. " Ka nu, " i hmangaihna ka dawn hi ka tân chuan a tawk em em asin. " i damlo a nih kha! In enkawl ṭha hle ang che aw..! " ṭhianpa Lawmsang, " ka thlah ve thei dawn ta lo che a ni maw, " ka venhim zawh loh che avangin min ngaidam hram dawn nia aw...? " pute u, " ani kha pasalṭha dik tak a nih kha! " kei chu ngaihtuahawm ka ni love, pasalṭha chu ropui takin in lo vui liam hram dawn nia... "Kaphleia chu a taksa a chauh rih em avang chuan a chhing zui leh ta siai siai a. A aw chu ring lem lo mah se, lal in chhunga awmte tân chuan han hriat loh rual a ni lo thung.
.
Lal in chhunga awmte'n Kaphleia thu rawn sawi an hriat meuh chuan mak tihnain an khat a ni ber mai, thihna kut vâwtin a chunga thla a zar mêk lai pawha a ṭhianpa hming a rawn la lam leh, a thlarau hnenah ngaihdam a rawn la dil hram hram mai chuan a ṭhiante a ngaihsakzia leh an laka a rilru puthmang chu a tilang chiang hle a, kum lamah chuan zawlbûk kai rual chauh a la ni na-in, chu rawlthar chuan pasalṭha-in a neih tur ang zawng zawng chu a nei vek tawh a ni, " tih chu lal in chhunga awmte chu a hre chiangtu berte an ni âwm e.
.
Chutiang ang boruak a nih tak nuaih si-ah chuan, lalpa Dokulha chu a lo â lo nasa mai a, " ka upate u, " kan pasalṭha sawi ang khan kei ni pawh kan mitthi in lamah chuan i va phei teh ang u khai! " tunah chuan kan pasalṭha pawh a ṭha tih kan hre tawh alawm, chawlh hahdam a la mamawh a ni. " Ngursang, i nu leh pate paw'n in lamah an lo nghak reng tawh ang che, nang paw'n hahdam i mamawh a ni. " anni khu i nu leh pa tak tak ni lo mah se, hrin hrang in nih reng reng hriat loh khawpa hmangaihtu che an ni asin. " kan pasalṭha duhthusam ang ngeiin Lawmsanga chu vui liam a ni ang. " Bawlpu hnenah chuan, " pu Luai, eng nge kan Bawmzo val upa chu a ân zel le, anni ho kha kan khual ṭha an nih kha! " theih tawp i lo chhuah dawn nia, " ka upate nen hian kan chhuahsan rih ang che u, " han tih leh chhuah chu an rual ta nghal a.
.
Darzo lalpa Ngurthanglura leh Ngursangi pawh Kaphleia kianga han awm reng duh mah se, in lamah lo ngaihtuah em emtu an awm ve avang chuan hreh tak chung chuan an inzui thla ve ta hnà hná hlawm a. Kaphleia thil tih chuan Bawmzo khua leh a chhehvel chu a dêng chhuak rang kher mai. Lal tam tak mak tih a hlawhin, pasalṭhate leh tlangvalte zawlbûk titî ber chu a ni thuai a, ṭhenkhat chuan awih harsa anti hle a, mihring pangngai tih theih chi a ni lo " ti tawk lah bo lo. Khual thuthang aṭanga hria mai an nih hlawm avangin, Kaphleia chu lasi nen an inzâwl a ni ngei ang " ti a lo sawi duh tawk an awm bawk a. Eng thil pawh lo sawi se la an ngaihdan hi a âwm lo hran tlat lo. Pasalṭha pakhatin Bawmzo khua a rûn a, an lal leh upate a man vek tih thu an hre miau alawm le.

Tlêm hi ka rawn dah zuai ang e, a thawnthu kaldan kan hriat leh theihna turin. Chhunzawm theih ve leh kan tum tawh si a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 16th, 2018, 6:59 pm

HNAMCHAWM PASALṬHA KAPHLEIA
By. Nghaka Chelsea.

EPISODE - 42
(Last episode)
.
Darzo lalpa Ngurthanglura chuan a tupa thusawi chu ngaihtuah zui neuh neuhin, " ka nu kha ṭha takin min lo enkawlsak dawn nia aw..." a harsa ti taka a rawn melh hram hram lai chu mitthlain, " ka tupa, " tunah chuan i nu hi ka kalsan dawn tawh hlei nêm! "Nang pawh i ṭha leh thuai dawn alawm, " i nu chu rawn ngaihtuah reng reng suh ang che aw " tiin a han phun deuh sap a, lal in lam chu a thlir zui vawng vawng a.
.
Ngursangi leh a nuṭapa Ngurthanglura chuan zawhna tam tak nei mah se, an hamhaihna ta langah engmah sawi thei loin an awm a, Ngursangi chuan a unaupa leh a nuṭa neih chhun chu Darzo lalpa a ni tih a hriat chuan mak a ti hle a, Chutah, Ngursangi chuan, " ka û, " Taitea tel lo va in thlen chu ka va'n hreh tak em! " ka fapa neihchhun leh ka innghahna a ni asin.. "Taite, kan rawn let leh thuai dawn nia aw, " tiin a han phun deuh siap siap a. Ngursangi chuan a hmangaih em em a fapa han tlansan chu a hreh kher mai. Chutih ruala Ngursangi rilru-a thil lo lang nghal zawk chu, " a mah hmangaih em emtu a nu thinlung nat turzia mawlh mai kha a ni. " A nu chu a ngaihtuah chhuak uar uar a, engtin nge ani kha a awm ve tak zel ang le? " ka û lah tlang hranah a awm daih tawh si a, " engtin chuan hun leh ni chhiar ve ṭhin tak ang maw " tiin a ngaihtuahzui vawng vawng a.
.
Siamlianite in awmna zâwn an thlen chuan Ngursangi ke pên chu a tawp ta chat mai a, a mah kâitu tlangvalte paw'n thil awmzia chu hre thiamin a dinpui ve nghal bawk a, Chutah, Ngursangi chuan a nuṭapa hnenah chuan, " ka û, " hei hi Siamlianite in a nih hi.. " tleirawl hmelṭha tak niin, a lainatawm tak zet asin. " i fanu chunga thil thleng ni se i dem bik hauh lo ang ti raw..? " buaina rawn thlentu chu Bawmzo lal fapa Kharchina zawk kha a ni asin. " Siamliani leh a chhungte hian thiam lohna engmah an nei lo a ni. " a rawn ti chuai raih a.
.
Darzo lalpa chuan chu hmeichhia chu titi phunglêng aṭang chuan a lo hre ve tawh ngei mai, buaina lo chhuahna chhan a nih pawh a hming aṭang chuan a hre nghal mai a, a farnu sawi hmang aṭang chuan chu tleirawl chuan hun harsa tak a hmachhawn mêk a tih chu a hmu thiam nghal vat a. Chutiang khawpa tleirawl hmelṭha leh khaw thum lalte meuh buaina thlen thei chu hmuh ve ngei chu a rilru pawh a ni.
.
Chutah, Ngursangi chuan, " ka û, " ani hnenah chuan i kal lawk ang hmiang? " ani chu naupangtê mah ni se, thil thleng engkim hi a hmuh hmaih hauh lo asin. " kei pawh hi ani vang chauha nungdam ka la nih hi, " eng nge a án ka hre duh a ni " a rawn tih chuan, " lalpa Ngurthanglura chuan, " Ngursang, " chawlh hahdam i mamawh asin. Mahse, nangman i tih tlat chuan han kawi zawk chu a pawi hlei nêm! Mahse, i fapa thuchah che kha hre reng ang che aw? " ti rawh, " keipaw'n ani chu hmuh ve ngei ka duh e " tiin an inkuah lut zui ta nghal a.
.
Mipui an mahni lo thlir ve rengtute chuan Ngursangi leh Darzo lalpa unau an ni tih an hriat chuan mak anti hle a, Ngursangi chu sailo lal fanu a ni a maw? Chuti si engtin nge mi hnuaihnung ber ang maia a awm theih zawk le? " sailo lal fanu nun dân a tân chuan a va thangtlawmthlak ngai ve le! " tiin a chanchin hriat chian châk tak chuan an lo uipui tui thlir dauh dauh hlawm a.
.
Siamlianite inchhungah chuan mi chu an lo ṭhahnem ang reng hle a, Ngursangi chuan Siamliani chungah chuan thil ṭha lo a thleng ta ni-ah ngaiin, an mahni lo chhâwntu Siamliani pa Hrilliana hnenah chuan, " ka pu, " eng nge thil awmzia ni ta le? " Ngursangi chu a hmel aṭang chuan a thlaphâng hle a ni tih a hriat theih a.
.
Mahse, Ngursangi lo rin dân ang lo zawkin thil chu a ṭha lam a lo ni hlauh mai a, Pu Hrilliana chuan, " Ê khai! Nangni meuh kan inah inlo chuangkâi leh duh chu kan va lawm teh lul em! " kha, pi Sangi chu i ṭha zel maw? " Siamtei pawh in i chhuahsan hnu rei vak loah khan a rawn harh ve tawh asin! " Pu Hrilliana chu a hmel aṭang chuan a hlim hle a ni tih a hriat theih a ni.
.
Chu'ng thil Ngursangi'n a'n hriat chuan mak a ti êm êm a, Siamliani chu rawn harh leh thei mai turah a ruat lo a ni. Ngurthanglura chuan a farnu bânah chuan vuanin, Siamliani lo mutna lam pan chu an rual nghal a. Siamliani kiangah chuan Zopui khaw nula hmelṭha Thanpuii chu a lo ṭhu a. Mi dang lo awm vete chuan Darzo lalpa leh Ngursangi chu pâwn lama mite ang bawkin an lo hmu duh kher mai. Thanpuii chuan a unaunu hnenah chuan eng thil emaw tak chu lo sawiin, Ngursangi leh a nuṭapa chuan chu thil chu va hre pha ve lem lo mah se, Siamliani mit aṭanga lawmna mittui lo luang ngiai ngiau erawh an va hmuh hmaih hauh lo thung.
.
Chutah, Darzo lalpa Ngurthanglura chuan, " Ê khai! " Zopui khua chu in vannei mang teh tak e aw! " Mami, " nula zawng zawng zinga hmelṭha ber i la nih ngei dawn hi maw le, " i lo harh leh thei chu ka lawm hle mai! Ka farnu hian a ngaihtuah lutuk che asin, " ani hi in lo puih nasatzia ka hriaa in chungah hian ka lawm hle a ni, " a han ti a.
.
Siamliani te inchhunga awm vete chu Darzo lalpa thusawi lai chuan an lo ngawi ṭhiap hlawm a. Chutah, Siamliani nu chu rawn inrawlh ve vatin, " ka pu, " i tupa vang chauha nung dama la awm ka ni asin! " Ani kha chu awm lo ni sela chuan, " he kan fanu leh keini hi chu Lal Tinkhara kutah kan thi vek tawh ngei ang. " ka pu, Zopui khaw mite hian a lakah hian bat kan ngah teh asin, " pi sangi chungah hian engthil mah han tih kan nei hlei nêm! " a lo ti thuai a.
.
Ngurthanglura chu a'n ngawi deuh vang vang a. Ngursangi chuan Siamliani chu duat tak chuan a chûl hliau hliau reng a. Kaphleia vang chauha la dam khawchhuak an nih chu in chhunga awmte chuan an hre ṭheuh a ni. Lalpa Ngurthanglura chu muang ban chapa rawng ṭawng lehin, " khuanu rorêlna hi chu a dik a ni ti r'u..? " in hmelmate pawh an tlâwm zawh tak hi, " hmelmate min hnehsaktu pasalṭha chu ka tupa ngei chu a ni si a maw! " ka mumang ni mai hian ka la hriat chu, " Zopui khaw mite u, Lal ropui, pachhia leh hmeithaite hmangaiha, a hmel hriat ngai loh mi baihvai ṭanpuitu lal in nei hi in va vannei tak em! " khuanu in lamah a ṭang a ni, " a rawn ti ta charh charh a.
.
Pu Hrilliana leh mi dang lo awm ve te chuan chu Darzo lalpa thusawi chu dik an ti hle a. Lal meuh an mahni rawnpui tura a rawn thawhchhuah ve avanga an lawmzia thute leh, tunah chuan an mahni avanga an thlamuan tawhzia thu chu hrilh let ve-in, Zopui khua paw'n ngai a awh leh thuai an rin thu an sawi ve ta liam liam hlawm a. Darzo lalpa ngilneihzia an hmuh chuan, " a khua leh tui tân lal ṭha tak a nih ngei chu an ring a, a tupa Kaphleia hian a chhûn fuh hle a ni tih pawh a hmu tute vek an ni , " anni putu zet zawng khuanu duhsakna dawngtlak an lo ni ngei e.. " an ti hial ta reng a.
.
Siamliani ngaihtuahawm a nih loh avang chuan in lam chu an pan vat ta zawk a. Pu Hrangthangate nupa pawh rin ai tak chuan an lo harh ṭhain, Darzo tlangvalte chuan theihtawp chhuahin an lo enkawla, pi Sawiveli'n a fanu dam taka a rawn hawng a han hmu leh zet chu, lawm avanga mittui luang zawih zawiha Ngursangi chu rawn kuahin, " Sangte, damin ka hmu tawh dawn lo che emaw ka ti hman asin... " ka tupa chu eng nge a chanchin..? " a lo ti nghal thuai a.
.
Pu Hrangthanga chuan a fanu a kawngkâa rawn kuah luttu hnenah chuan, " Pu a, nang hi ka fanu unaupa Darzo lal chu i ni ang maw..? " lo ṭhu tawh u khai! " kei hi Ngursangi pa Hrangthanga ka ni a, " ani saw ka nupui Sawiveli a ni e. Kan tupa chungah chuan eng thil chiah nge thleng le! " a lo ti dam dap a.
.
Ngursangi pawh hmangaih taka lo enkawltute chungah chuan a pangchan chhuakin a insum buai thei ta bik lo. " ka nu..." insut deuh hraih hraih chung chuan, " i tupa chu hliam na tak tuarin a awm mêk asin.. " ka nu, ka pa, in lo ṭha chu ka va lawm teh lul em! " Taitea pawh a lo harh ve leh thuai dawn a ni ti raw..? " tiin a rawn ṭap chhuak ta hawm hawm a. Mahse, chutia han ṭah chu a taksain a zo dawn lo a ni tih hriain, Ngurthanglura chuan, " Ngursang, inti pachang hram hram rawh khai, chawlh hahdam i mamawh a ni tih leh khum lama kuah phei chu a rual nghal a.
.
Chutia Ngursangi leh pi Sawiveli khum lama an phei takah chuan, Ngurthanglura pawh chuan pu Hrangthanga zawhna chu chhângin, " Ngursangi chu a farnu neihchhun a nih thu leh, nung dama hmuh a inbeisei tawh loh thu chu hrilhin, tun hma lama thil thlen dan zawng zawng chu a chepakai aṭang chuan a sawi ta vek a.
.
Pu Hrangthanga chuan thil tam tak chu lo hre tawh mah se, Ngursangite nufa chungchangah chuan hriat loh a lo la ngah hle a ni tih chu hre tharin, Ngursangite nufa nena an intawn dan zawng zawng leh, fapa an chân ve tawh thute chu a hrilh bawk a. Pu Hrangthanga chuan a fanu leh a tupa chu a Darzo lalpa lakah chuan an chân mai ang tih chu a hlau hle a, Sailo lal chhungkua awmna ve-na hmun atân chuan a in chhung chu a sit ngawih ngawih tawh mai a.
.
Chutah, pu Hrangthanga chuan, " ka pu, i farnu leh ka tupa hi kan nunna an nih hi, " Ngursangi hi kan fanu, kan hrin ang maia kan ngaih a ni a, Kaphleia pawh kan tupa dik takah kan lo ngai tawh a ni. " kan innghahna ber leh dam kan la thlahlel ve-na awmchhun an ni tawh a... " Ngursangite nufa tel lo va kan hun tawp lam hman chu kan zuam lo a ni, " a han ti chuai raih a.
.
Darzo lalpa Ngurthanglura leh Darzo val upa pakhat chuan pu Hrangthanga rilru tur chu an lo man thiam nghal vek a. Chuveleh, lalpa Ngurthanglura chuan, " Ê khai! " chu'ng thil chu sawi a ngai love, lungngaihna tur a awm hek lo. " Anni hi chu i kut a awm alawm an nih, tunah chuan chhungkuaah kan insiam tawh alawm.. " i rem i tihna loin ka farnu leh ka tupa hi khawiah mah an kal lovang, " in thil lo tih tawh zawng zawng avang hian ka lawm êm êm zawk asin. In lakah hian bat ka ngah hle mai, tunah rih chuan ka tupa ka han ngaihven rih ang e, ani pawh a ṭha leh thuai ang " tiin lal in lam pan chuan an chhuahsan ta rih a.
.
Zopui khua chuan hun harsa tak an tawng mêk a, pawisawilo nunnain a tuar phal lovin, hriat ngai loh mi khual tân an ding a, an khawchhung chu a buai zo ta nuaih mai si, nunna tam takin an chân a, rilṭamin an awm a, an ṭapa, an chiau vawng vawng a, Mahse, khuanu chuan dikna avanga tuartute chu hawisan mai lovin, an tân beiseina thar siamsak turin pasalṭha tuaitir Kaphleia chu a rawn tir a, hma lam pan tura beiseina siamsaktu Kaphleia hming lam chungin nun bul an ṭan leh thei dawn ta.
.
Ni thum a han liam meuh chuan Zopui khua pawh a pangngai chho ṭan viau tawh a. Kaphleia paw'n ziaawm lam pan zelin, Ngurthanglura pawh khua leh tui nei a nih avangin, han châm reng thei ni hek lo le, a hmangaih êm êm a farnu leh, a tupa a chhuan êm êm chu hreh tak chuan a hâwnsan ta rih a. A tupa leh a farnu hnenah chuan, an dam ṭhat huna a hnena zin thuai tur chuan a inchah mawlh mawlh a. Kaphleia chuan lal in-a awm chu hreh hle mah se, a hliam na tak avang chuan han khawih chet ngam a ni rih si lo va le, lal inah chuan a lungawi mai a ngai rih si a, Ramzau chu a ṭhianpa bulah chuan a tâp deuh chawt a ni ber a, Ngursangi pawh lalpa chuan a fapa awm chhung chu a in lama awm ve rih mai turin a ti bawk a.
.
Siamliani pawh natna dang nei lo na nâ na chu, hma a sawn chakin, chaw te hial a rawn ei thei ta bawk a. Siamliani rilru-ah chuan dam thuai thuai a, a mah avanga hliampui tuar mêk leh, damin a rawn let leh a ni tih a hriat ruala lawm avanga a bianga mittui luantirtu chu hmuh hlan mawlh mai chu a nghak hlel a ni.
.
Zopui khuain Bawmzo khua a hneh a ni tih chu a darh chak hle mai a, Kaphleia hming chu an chhehvel khua zawng zawngah chuan an sawi huai huai a, hre lo reng an awm âwm love, chutiang thil mak thlentirtu Kaphleia chu mit ngei a hmuh tuma Zopui khua rawn pan ṭang ṭang lal lah an kat nuk mai a. Lal Dokulha meuh pawh a thiltih avang chuan a inchhir lo hle a, a pasalṭha chu a chhuangin, an ṭhenawm lalte kiangah chuan a pasalṭhain a hmelmate a hnehsak dan chu sawi nuam a ti kher mai.
.
Ti chuan, Bawmzo lalpa Tinkhara leh a nupui fanaute chu, Kaphleia duh ang ngeiin an damchhung hun chu sal ni chungin an hmang tawh dawn a, chutiang bawkin an upate pawh rorêlsak an ni bawk a. Bawmzo val upa Kaphleia'n a rawn chhan tak leh an mite erawh an khaw lama let lehin, lal thar nena bul ṭan leh tura duhsakna nen a inthlah liam ta thung a.
.
Hrangkai khaw mite paw'n an khaw nula hmelṭha chu hawn let thei lo mah se, an hmelmate chu hnehin, zalên taka nung tawh turin an khaw lam an pan ve bawk a, Zopui khaw lal thu tlukna chu lal tam tak mak tih a hlawh hle nain, a rah chhuah erawh duhawm tak a ni lawi si, tunah chuan Zopui khua chu an khaw chhehvel lal zawng zawngte chuan tih lawm loh an hlau hliah hliah tawh mai a, Suakzawl lal Suallkliana'n a pasalṭha chhuanvawr ber berte thah an nih a hriat phei chuan, Zopui khua aṭanga hla thei ang berah chuan khawthar a kai nghal ta rum rum mai a ni. He'ng thil zawng zawng a lo nih theihna chhan chu thil pakhat chiah a awm a ni. Dikna hi eng ang pawhin rahbeh tum ṭhin sa teh mah se, a tawpah chuan a lo ding chang leh nge nge ṭhin a ni.

Kaphleia story chu a tawp ta rih e. Ka story famkimlo leh phuailuai zet min lo chhiarsaka like leh comment min pe ṭhin tute zawng zawng chungah ka lawm em em vek e. Admin te leh readers te vang chauha tun hun thleng thei hi ka ni a, ka lawm tak zet a ni tih min lo hriatsak dawn nia. Story ziah hi a lo namai lo hle a, duh ai hmain ka rek bung ta mai a ni. Mi zoṭawng ka pawngsual nasa ṭhin hle mai. Zoṭawng humhalhtute chungah pawh ngaihdam ka dil tak meuh e.


Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)