THE SICILIAN (Book I &II) By Mario Puzo (Completed)

[Loma hmar]

Chapter 12A

Indopui a lo tawp a, mahse Guilianno tan chuan a intan dawn chauh a ni. Kum hnih chhung chuan salvatore Guilianno chu Sicily rama mi hmingthang ber a ni chho a. Sicily thliarkar hmarchhak lam zawng chu a awp a ni ber. A lal ram innghahna ber chu Montelepre niin, Piani Dei Creci, Borghetto leh Particino te a thunun a, chubakah Corleon khaw hlauhawm tak, a mi chengte pawh kawlh hrawng tak, Sicily ram meuhah pawh sual avanga thang hat te pawh chu. Trapani khua pawh a huam zauh zauh a, Monreal leh Sicily khawpui Palermo pawh a tihlauthawng zauh zauh thin. Democracy sorkar tharin a luman atana Lire maktaduaih sawm an siam tum chuan, Guilianno chu a nui hawk a, khaw hrang hranga a vah vel a thulh chuang lo. A chang changin Paermoah pawh zanriah eiin a kal fo va, a eikhamah a thleng hnuaiah chuan, “Hei hi Guilianno chu a duhna hmun apiangah a kal thei tih lantirna a ni,” tih thuziak a hnutchhiah ziah bawk.

Guilianno-a himna kulhpui chu Cammarata tlang lian leh zau tak chu a ni a. He tlang atang hian Sorkar Convoy lam bun tur te, rel rawk tur leh nu hausa deuh te incheina tlereuh chhawk zangkhai turin a mite nen chuan an thawk chhuak thin. Tawlailir cheimawi khalhtu te chuan Kut thianghlim a lo thlenin chibai an buk a, a mite chuan a tirah hlau thin mahse a hnuah huan zahna leh ngaihnatnain an en tawh thin. Tumah, beram vengtute leh hnathawktu te pawh, a thil sem dawng lo an awm ngai lo.

Chulai thingtlang khaw mi zawng zawng chu a ma tana enthlatu an ni vek a. Naupangte chuan an tawngtainaah Virgin Mary chu, ‘Carabinieri laka Guilianno chhan turin’ an ngen thin.

Tlangah chuan thlasik chu a rei bik hle a, a vawt hle bawk, chuti chungin Guilianno-a pawl chu a thang zel a. Zanah chuan tlang pangah chuan mei a de chuaih thin. Mei ang chu silai tihfai nan te, thawmhnaw thawm that nan te leh insuk nan hial te an hmang thin.

Guilianno chuan a mite chu trench khur lai teuh turin leh ngaihthlakna hmun inhlat deuh taka siam turin a hrilh a, sorkar sipai beih an tawh thut pawha inrin lawk nan an ti a ni. Vawikhat chu chutia lei an laih lai chuan ramsa ruhro lian em em mai, an ngaihruat phak baka lian tur hi an lai chhuak a. Tlaiah chuan Hector Adonis chuan lehkhabu ip khata kengin a lo kal a, a chhan chu Guilianno chuan engkim hriat vek a duh tlat tawh a ni. Science lam te, damdawi lam te, Politics leh Phylosophy bakah indo dan kalhmang hrang hrangte a chhiar tlut tlut thin, adonis chuan kar hnih khat danah lehkhabu a lo ken thin a ni.

A miten ruhro an laih chhuahnaah chuan Adonis chu a hruai a, an hriat loh avang chuan adonis chu a nuih a za hle, “History lam lehkhabu ka pe tam viau che a ni lo’m ni?” guilianno hnenah chuan a ti a. “Mi kum sanghnih chhunga mihring history hre lo mi chu thim zinga cheng tluk a ni.” a han ngawi hlek a, a aw chu zirtirtuin zirtirna a pek ang raih a ni a.

“He thil hi Carthage hringei ten indonna atana an hman thin ruh a nih hi, kum sanghnih liam tawhah khan he tlang paltlang hian Rome lal ram tichhe vek turin an lo kal tawh a ni. Indona atana khawi fin sai ruhro a nih hi, he khawmualpuiah hian hmuh a ni ngai lo. Rome sipai tan chuan an hlauhawm dan tur zia mai chu, mahse hringeite chu engmahloah an chan tir a, rome chuan a ti tlawmin Carthage chu a tichhe vek a ni. He tlang hi hmuhtheih loh thlarauin a khat a, chung zinga pakhat chu in hmuchhuak a nih hi. Ngaihtuah teh Turi, nakinah chuan nangpawh thlarau mai i la ni ve dawn a ni.”

Thlasikah chuan an camp chu an sawn fo thin a, kar khat chhung lai an chhungte leh an thian beram vengtute hnenah emaw mihausa ho chhekinah te an riah darh chang a awm thin bawk. Guilianno chuan chu thlasik chhung chuan lehkha zir nan leh ruahmanna siamin hun a hmang deuh ber thin. Hector Adonis nen rei tak tak an inkawm thin bawk.

Nipui a lo thawt tirh chuan Pisciotta hruaiin Trappani kawng lam panin an chhuk dun a. kawngah chuan tawlailir pakhat a banga Pasalthate lem inziak an hmu a, a vawikhatna atan Guilianno lem inziak chu an hmu ve ta a ni, chutah chuan Duchess kutzungtanga emerald zungbun kun chunga a la lai lem a ni a, a hnungah chuan Pisciotta chu dingin Machine gun a keng a, mi dang hlauhlawpa awm te a lo rikrap vel a ni. Chumi ni vek chuan a vawikhatna atan bawk kawnghren Buckle, Rangkachak kil li neia siam, mupui leh sakeibaknei vak kual lai lem inker chu an hreng a ni. Chu chu Silvestro siam a ni a, tunah chuan ralthuam enkawltu a ni tawh a ni. Guilianno leh Pisciotta a pe ve ve a, an pawla hruaitu chhinchhiahna a lo ni ta a ni. Guilianno chuan a kawngah a hreng reng thin a, Pisciotta erawh chuan Guilianno bula a awm chauhin a hreng thung; Khawpui te deuh leh thingtlangkhuaah te, bakah Palermo-ah te hial pawh inchei danglama a kal fo vang a ni.

Zanah chuan Guilianno chuan a Buckle chu phelhin a en vel a, a vei lamah chuan mihring ang tak mupui a awm a, a dinglamah chuan sakeibaknei vak vel chu a awm thung, mupui thlain a tih ang chiahin a tin hriam tak chuan an inkara rinbial awm chu a khawih ve a. An pahniha khawvel tivir ang maiin a lang a ni. Boruak lam lal leh lei lam lalte chu rawng eng nem tak, rangkachakah chuan ker an ni a. Guilianno chuan mupui angah a inchan a, sakeibaknei chu Pisciotta, rinbial chu Sicily.

Kum za chhung zet zawt chu sicilyah chuan mihausate rukbo chu sumdawnna hlawk ve tak pakhat a ni a. A rubotu berte chu Mafia mihlauhawm ber ber te, an rukbo hmaa lehkha thawn hmasa phawt thin te an ni. Chu chu hawihhawmna lantirna niin, buaina tam tak tawh ngai lova tlanna sum dil lawkna a ni tlangpui. Bungraw zuartuin a man pe tla nghal te a hniam thin ang deuhin, chutianga tih a nih chuan inrukbona tak tak thleng lemlo a, tlanna sum tlem deuh zawka tih ang chi tein a ni. A dik takah chuan chutianga mihausa rukbona chu ngaihdan tlanglawn anga awlsam a ni lo, a sakechek leh silai hum satliah ngawtin an tih ve theih a ni hek lo.

‘Inrukbona’tih thumal hi Sicily-ah chuan hman a ni ve ngai lo a, naupangte pawh tlanna sum ngiat vanga hren ngawt a ni ngai lo bawk, puitling kaihruaitu an awm tel a nih ngawt loh chuan. Sicilian te chu sual tur renga piang, hmeichhiain pangpar a lawh ang leka tualthah awlsam, Turk ho ang maia fing phakar, kum 300 liam ta a mi ang maia tunlai lo an ni chungin, naupang an ngaina, nilo, an pathian biak thawthang a ni tih hi hnial rual a ni lo. Chuvangin chutiang chu sicily-ah chuan ‘inrukbona’ tih a ni ve ngai lo. Mihausate chu lengah an ‘sawm’ zawk thin a. an riah man leh room luahman te, hotela an tih ang hian an pek hma loh chuan chhuah an ni ngai lo.

Guilianno an inrukbona lam a hawi tirh chuan, Sicly rama mi hausa ber berte chauh a hma a ni. A hmasa ber chu Sicily rama mihausa ber leh lalchhungkaw zinga thiltithei ber, Prince Ollorto (a hma lamah pawh a hming kan hmuh tawh kha, a lo puitling ta nih dawn hi - loma) a ni a. Sicily rama a in leh lo zau tak chauh lo pawh, Brazil lamah pawh ram zau tak a nei nia sawi a ni bawk. politics lamah pawh a lang loa mipawimawhh ber a ni. Rome-a Minister of Justice chu a thian bulfuk a niin, Italy lal hlui pawh a fate tana Godfather a ni bawk. Sicily-a a in leh lo ram zawng zawng enkawl puitu chu Don Croce a ni a, chung avanga a hlawh tam tham tak chuan Prince Ollorto rukbo tumtu leh thah tumtu laka hum te, a thil hlu leh ranrual leh beramte ruk ruk laka hum te chu a huam tel ang tih chu sawi loha lum a ni.

A kulh rinawm tak chhungah chuan, Don Croce-a mi ten Gate an ven tlatna hnuaiah leh a bula a ma gaurd bikin a ven tlat naah chuan Prince Ollorto chuan he khawvel thildang zawng aia a ngainat a telescope chuan vana arsite thlirin tlai lam hun nuam leh muanawm tak a hmang mek a. Ke pen ri ring tak, a thlirvelna pindan pana lo chho mek chu a hre ta thut a, kawngka chu rawn intheh hawng thuaiin mi pali bumro tak tak, silai kengte chuan chu pindan tereuhte chu an rawn luah khat nghal a. Prince chuan a kuta telescope chu hliahin, arsi pawisawi lo tak a tang chuan a mit la sawnin chu mite chu a hmachhawn a. terranova hmel tlumtherh ang tak a hmuh chuan Pathian hnenah tawngtaina a hlan zauh a.

Mahse Terranova chuan hawihawm takin, “Ka lalpa, Tlang lama Guilianno hnena chawlh hmang tura hruai tur che a thupek ka ni. Pindan hran chenna tur pek i ni ang, chu chu kan tih dan thin a ni. Naute pianghlim ang maia enkawl i ni ang.”

Prince chuan a hlauhna chu thup hram hram a tum a, buk nghat pahin,“ ka damdawi leh thawmhnaw tlem azawng ka la thei ang em?” khawngaihna dil hmel takina ti a.

Terranova chuan, “Chu mi la tur chuan mi kan tir mai ang, tunah chuan hmanhmawh a tha ber, Carabinieri te an lo thleng tep ang a, he kan party tereuhteah hian sawm an ni ve si lo. Tunah ka hmaah stepah hian kal thla rawh le, khawi hmunah pawh kan mite an awm a, lal fapa meuh pawhin silaimu chu a tlan san thei bik lovang.”

Gate sir hla deuh takah chuan Alfa Romeo Car leh Jeep hi a lo ding a. Alfa Romeo-ah chuan Prince leh Terranova chu an lut nghal a, midang ho pawh chu Jeepah chuan lut ve nghalin chak takin tlang lam pan chuan an tlan ta a. palermo atanga darkar chanve tlan leh Montelepre atanga hnai te ah chuan dingin an chhuk ta a. Kawng sirah chuan Maddona lim hi a lo awm a, terranova chu Madonna hmaah chuan thingthiin Kraws chhinchhiahna a siam a. Mipanga te chu arsi pianhmang ang taka inremin, Prince chu a lai takah an dah a, awih tlanah chuan an chhuk ta a, ruam an zu pawh anga chuta tang chuan cammarata tlang to lurh lam panin an lawn leh dawn a ni.

Darkar engemaw zat an kal ta a, Prince chuan chawlh a rawt fo a, a kalpuite chuan dawhthei takin an chawlhpui fo thin. Granite lung lian tak hnuaiah chuan cawlin zanriah atan chhang leh cheese leh wine te an eiin an in a, Terranova chuan a inzat theuhin, prince tel chuan a sem kual a, “Hei aia tha zawk ka pek theih loh che avangin pawi ka ti khawp mai, Campa kan thlen hunah chuan Guilianno chuan chaw sa ver vawr, sazupui tuihang nen a hlui ngei ang che, Cook thiam tak, Palermo-a restaurant a thawk thin kan nei alawm,” a ti a.

Prinse chuan lawmthu a lo hrilh a, tui ti takin a ei a ni. Nidanga zanriah ropui tak a kil thin ai pawhin a ei tui hial awm e. Chutianga riltamna chu kum tam tak chhung a hre tawh lo hial a ni. A ipte atang chuan english sikret a phawrh a, a pe kual a, Terranova leh a mite chuan pakhat te tein an la diat diat a, chu sikret chu a zuk phak ngai loh a ni tih a hria.Chuvang chuan a tihuangtau deuh a, “Damdawi ei reng ngai ka ni. Zunthlum vei ka ni a, nitin insulin ka lak a ngai a ni.”

Terranova an a ngaihsak viau tih a hriat chuan mak a ti zawk hle. Terranova chuan, “A hma khan engatinge i sawi loh? Reilote chu kan nghak thei tur che a nia.Engpawh nise lungngai suh, Gulianno-an a ngaihtuahsak angche a, zingah chuan i nei hman em em ang.”

“Thank you.”

Tlang lam pan chuan an kal tan leh ta a.