THE SICILIAN (BOOK III-V) By Mario Puzo

[Loma hmar]

CHAPTER 17

Michael Corleone leh Hector Adonis chu villa lamah chuan kir lehin Peter Clemenza nen ser kung hnuaiah an thu ho va. Michaela chuan Thuthlung bu chu chhiar vat vat a chak hle a, mahse Adonis chuan Andolini-an Montelepre pan turin a rawn hruai dawn tih sawiin, Andolini an thuchah a rawn hawn leh hawn loh lo chang rih turin a ngen a.

Darkar khat lai a liam tawh a. hector Adonis chuan a sana chu a en a, a lungngaih hmel hle. Michael chuan, “a car a chhia pawh a ni maithei asin, kha fiat ke kha thlak a hun tawh viau a ni.” a ti a.

Hector Adonis chuan a lu a thing a, “Steano Andolini hian tualthattu thinlung pu mahse, hun a vawngdik tlat a ni. Innghahna tlak tak a ni bawk. Darkar khat laia a tlai takah chuan thil dik lo a thleng a ni ang tih ka hlau mang e. Thim hma, Curfew puan hmaa Montelepre ka thlen hman a ngai a ni.”

Peter Clemenza chuan, “Ka unaupain car leh a khalhtu a pe thei ang che.”

Hector Adonis chuan a han ngaihtuah vang vang a, “Ni love, ka lo nghak ang e, ka hmuh a tul em em a ni.”

Michaela chuan, “”I tel lovin thuthlung bu chu han chhiar ta ila pawi i ti em? Engtia hawn tur nge?” a ti a.

Hector Adonis chuan, “Ni tehreng e a, han chhiar tawh u. A hawn danah chuan tih dan dang vak a awm lo. milim kha thing chang chia siam a ni a, a lu kha turi-an lehkha a thun hnuah char zawm mai a ni e, in tan bung hmawk mai dawn a nia. hriatthiam loh in nei a nih chuan puih che u ka inhuam reng a nia, chhiahhlawh pakhat in lo tir mai dawn a nia.”

Michael Corleone leh Peter Clemenza chu Michaela room lamah chuan an chho a. Milim chu Michaela Jacketah chuan a lo la awm reng a, Michaela chuan a lo theihnghilh hmin der a ni (Book I lamah khan Maria-in a pek kha kan la hre reng awm e-Loma). A han lakchhuah chuan an pahnih chuan chu mithianghlim Mari lim dum thal mai chu an en dun vang vang a. A lan dan chu African hmel ni mahse Sicily in tin deuhthawa awm thin Madonna var nen a danglamna a awm lem lo. a rit reuh viau mai a, a chhung kawrawng a ni tih hriat har tak tur a ni.

Peter Clemenza chu kawngkharah va kalin chhiahhlawh hmeichhe pakhat chu a han au va, hmeichhe pakhat chu choka chemte kengin a lo kal nghal vat a, room chhung a en vang vang hnuah chemte chu Clemenza a pe ta a. A mitmengah chuan hriat belh a chak hmel viau chungin kawngka chu a khar ta tho va.

Michaela chuan milim chu thing dawhkan chungah rem deuhin a dah a, Peter Clemenza chuan chemte chu mlim nghawngah chuan chuktuahin a han nam vak a, milim lu chu a bung hmawk a, room chhuatah chuan a vawr thla nawlh a. Milim nghawng kawrawng atang chuan Lehkha zial, savuna tuam hi a lo pawk chhuak nawlh bawk a.

Clemenza chuan a inzawmna lai takah a tan hmawk a ni, chuti ni lo ze Olive thing chang tak chu chutiang chemte mai maia tih bun rual a ni lo. Chemte chu dawhkana dahin lehkha zial chu milim lubung kawrawng chhung atang chuan a phawrh chhuak a. A tuamtu savun chu phelhin lehkha chu dawhkanah chuan a pharh ta a. Pentui duma zing tak taka ziak purnsen pil ang maia pan lehkha phek sawmpanga lai a ni a. Phek hnuai lam zelah chuan Guilianno a hming ziak chu a chuang vek bawk a ni. Lehkha pawimawh tak tak, sorkar seal chuanna te leh Sorkar letter head ngata ziak lehkhathawnte pawh a awm bawk. Wine in pahin chu thuthlung bu chu an chhiar tan ta a. Chhiar zawh nan darkar hnih dawn lai hun an hmang a ni. Michaela chuan Guilianno, naupang tak si, thil tha duh em em chunga inphatsanna chi hrang hrang hnuaia a la dam thei chu mak a ti hle. Guilianno an a ma finna te, a thil tum te leh a mission ti hlawhtling tura a beih nasat zia ngaihruat thei tur chuan Michaela chuan khawvel hi a hrechiang ve tawk a. Guilianno tlan chhuah theihna tur chuan theih tawp chhuah a tum ruh ta hle a ni.

Guilianno-an kum sarih liam ta chhunga a chanchin a ziak ho chu ni lovin, lehkha pawimawh tak tak zawk chuan a ni Rom Democratic sorkar titlu thei tu chu ni. Eng tin nge heng mi thiltithei tak tak ho hi an at viau theih? tiin Michaela chuan a ngaihtuah a. Lehkha thema inziak Cardinal hming ziak hnan te, Minister of Justice-ina Ginnestra hmuna inhmuhkhawmna tibuai tura Don Croce hnena lehkha a thawn te chu.

Prince Ollorto an mawi tak maia Guilianno a fakna lehkha, Guilianno-an ti tura an hrilh a tih phawt chuan ngaihdam a nih theih na atana an thuneihna zawng zawng hman an intiam tih tihlanna te a awm a. He lehkhathawnah hian Prince Ollorto chuan Minister of Justice nen inhriatthiamna thuk tak an nei tih a sawi lang bawk.

Guilianno man dan tur ruahmanna, Carabinieri sipai hotu luin a buatsaih a awm bawk a, chu chu a thil tih tur an tuksak a tih hlawhtlin avanga an pek a ni.

“Guilianno man an duh lo hi a lo mak vak lo ve,” Michaela chuan a ti a, “heng lehkhate hmang hian a tichhe vek thei dawn tlat a ni.”

Peter Clemenza chuan, “Heng lehkhate hi Tunis lam ka pan pui nghal a ngai ang, naktukah chuan i pa pindan awmkhauhah a awm hman tawh ang.” a ti a, Madonna lim dum thal chu lain lehkhate chu a chhungah a thun leh a, a iptea milim chu dah pahin, “Ti teh i che tan teh ang, tuna ka kal nghal chuan naktuk zingah ka lo let leh hman dawn a ni.”

Villa atang chuan an chhuak a, Clemenza chuan chemte chu chokaa lo awm chhiahhlawh hnenah chuan a pe a, a ni chuan ringhlel ru takin thisen hnuhma awm leh awm loh a en vat vat a. Tuipui kam lam pana an kal chuan Hector Adonis an a lo la nghak reng tih an hmuh chuan mak an ti hle. Stefano Andolini chu a lo la lang lo reng a ni.

Cu pa tereuhte chuan a neck tie phelh thawlin a jacket pawh a phelh a. Ser kung hlim hnuaia thu ni mahse a kamis var tak chu thlanin a bual huh hlup a ni. A rui deuh niin a lang bawk a, dawhkan chunga wine bur chu a ruak thak a ni.

Beidawn hmel takin Michaela leh Clemenza chu a lo lawm a. “Inphatsanna tawp ber chu a intan ta. Andolini chu darkar thum laiin a tlai tawh a ni. Montelepre leh Palermo-a ka kal ngei ngei a ngai a ni. Guilianno hnena thu ka thawn a ngai tlat a ni.”

Peter Clemenza chuan fiamthu ti tak deuh hian, “Professor, a car a chhia pawh a ni thei a, emaw thildang pawimawh zawkah a buai ta pawh a ni thei asin, a tam lutuk. Hetah him takin i awm a i lo nghak ang tih a hre bawk alawm. Vawiina a lo kal loh chuan riak leh la ni mai lawm.” a ti a.

Mahse Hector Adonis chu a phun chhunzawm mawlh mawlh a, “Thil a kal dik lo vek ang, a kal dik lo vek ang,” chutah veivahna tur lirthei a dil ta a. Clemenza chuan mi pahnih chu Alfa Romeo chu hmanga Palermo thlenga Adonis hruai tur chuan thu a pe a. Mahse thim hmain an lo let leh hman ngei tur a ni.

Adonis-a car-a a lut tur chu an pui a, lungngai lutuk lo turin an hrilh a. Thuthlungbu chu darkar 24 chhungin America a thleng ang a Guilianno chu a him mai dawn a ni. Carin gate a chhuahsan hnu chuan Michaela chu Clemenza nen tuipui kam lam an pan leh ta a, Motorboat-a chuang lai chu thlirin, Africa lama a kal tan thleng chuan a thlir reng a. “Zingkarah ka lo let leh ang,” Peter Clemenza chuan a rawn ti lauh lauh a. Michaela chuan zanin hi Guilianno-an lo kal a thlan zan ni ta se engtin nge ni ang tih a ngaihtuah chhunzawm zat a.

Zanriah a ei zawh hnu chuan tuipui kamah chuan chu Villa huam chhung pelh thleng rawkin a kal a, giard hovin an kir tir leh a ni. Khaw thim nan minute tlem te chiah a awm tawh a, Mediteranean tuipui chu a dumpawl kuk a, kawlkil piaha Africa khawmualpui rim chu hre thei hialin a inhria, ram pangpar rimtui tak leh ramsa rimte chu.

Chu tupui kamah chuan dingin chulai boruak muanawm tak leh Sicily ram zan hun nuam tak chu a feel vang vang a, zan thim hnuaia hlauhlawpa zinkawng zawh mekte chu a khawngaih thar hle; Guilianno a lalna tlang lama awm te, Pisciotta, a Special pass hmanga hmelma tamna hmunah pawh duh duha vak vel thei te, Professor Adonis leh Stefano Andolini te Sicily ram kawng khu tak kara an inzawng lai te, Peter Clemenza tuipui dum kuk chunga inkhalh mek te chu. Zanriah ei hun pawha lo lang lo Don Domenico Clemenza pawh khawiah tak kal ang maw? Chu Sicily ram zan khawhar takah chuan hlimthla mai an ni hlawm a. An lo lan leh tikah chuan chu lemchan tual chu Guilianno thihna emaw a nunna emaw chungchang a ni tawh ang.

End of Book III, Wait for Book IV (He lehkhabu laimu leh inzawmkhawmna chu he Book-ah hian a kim vek ang.)