THE SICILIAN (BOOK III-V) By Mario Puzo

[Loma hmar]

CHAPTER 18B

“Min ring rawh,” Don Croce chuan Minister Trezza hnenah chuan a ti a, “Guilianno chuan kan hna hi a thawk thei a ni, Sicily-a Socialist leh Communist party laka indo puang turin ka hmin ang a. an hmunpuite a beiin, a buaipuitu te a vaubet thei bawk an. Ka sipai pawl ang a ni mai dawn a ni. tin, kei leh ka thiante chuan lang chhuak lova kan tih tur awm ang ang chu kan ti bawk dawn a ni.”

Minister Trezza chu chu thurawn chu mak tiawm pawhin a lang lo, Mahse induh deuh larhin, “Guilianno chu ram puma thang chhuak tawh a ni a, ka dawhkanah hian amah tudai tura sipai rual tirh luh dan tur ruahmanna, Chief of Army Staff atanga ka dawn a awm a ni. A lumanah cheng maktaduaih khat phal a ni a. Sicily rama carabinieri-te pui turin carabinieri sangkhat chu inring rengin an awm tawh a ni. A mah hum tur chuan min beisei a maw? My dear Don Croce, bandit dang te man tura min puih thin ang khan tunah pawh hian amah manna turah min puih ka beisei zawk a ni. Guilianno hi Italy ram pum hming chhiatna a ni a, mi zawng zawngin tihboral ngei an duh a ni.”

Don Croce chuan coffee chu a in a, a kut chuan a hmuihmul tlemte chu a han hru a. Rome ho that derna mai chu a ning deuh hle. A lu a thing mut mut a, “Turi Guilianno dama a awm leh tlang lama a thil tih te hi kan tan hian a hlu em em a ni, Sicily mipuite hian an be lo chauh a, a thlarau leh him taka a awm nan an tawngtaisak reng thin. Ka thliarkarah hian amah phatsan duh tur tumah an awm lo. Khang bandit dangte ai kha chuan a fing zawk hle bawk. A campah enthlatu ka nei a, mahse chumite chu ka laka an rinawm leh rinawm loh pawh ka hre ngam tawh lo. Guilianno chu chutiang mi chu a ni a, mi ngainat hlawh theihna riau a nei tlat a ni. I sipaite leh Carabinieri sangkhat chuang i tirh luh a an hlawhchham chuan - a hma pawhin an hlawhchham fo tawh ang khan - eng tin zel nge ni ang? ka hrilh ang che, inthlan lo awm leh turah Guilianno hian Left party-te a tanpui a nih vaih chuan Sicily chu i chan a ni mai, tichuan, i hriat chian em em ang khan, i party chuan Italy an chan ve thung ang.” a han chawl vang vang a, chutah Minister chu a melh vung vung a, “Guilianno nen chuan inremsiamna i neih pui ngei tur a ni.”

“Heng zawng zawng hi engtinnge kan tih chuan ang?” hawihawm takin a ti a, chungtlang deuh taka a nui chu Don Croce chuan a helh hle. Rome ho nuih dan a ni a, a ni chu sicilian a ni reng si a. Minister chuan a sawi zawm a, “Thu ka dawn danin Guilianno hian a ngaina vak l che a ni awm a.”

Don Croce chuan a dar a chhin uk a, “Inhuatna theihnghilh lo khawpa ^ tur chuan khang kum thum chhung a tuar chhuak lo ve. Amah nena inzawmna kan nei a ni. Hector Adonis chu ka mite zing a mi a ni a, Guilianno-a godfather leh a mirin ber a ni bawk. Ka palai a anga Guilianno nen kan inremna a siam dawn a ni. mahse nangmah atanga intiamna nghet leh rintlak tak ka neih a ngai dawn a ni.”

Minister chuan tiel deuh takin, “man ka tum bandit chu ka hmangaih a ni tih ka hming ziah hnan i duh deuh em ni?” a lo ti a.

Don Croce-a chakna ber chu miin an hmusitna tawngkam te, an zah lohna an tih lan te a hre lo der tlat thei thin chu a ni, mahse a thinglungah a vawng reng thung thin. Awlsam takin a chhang mai a, inthup ru tak chungin, “Ni lo ve, Guilianno tudai tura Army chief-in ruahmanna a siam copy leh sicily-a carabinieri sangkhat thawn an nih tur order lehkha copy kha min pe la a tawk mai. Guilianno-a hnenah ka entir ang a, Sicilian voterte hmin tura min puih chuan chung orderte chu tihchhuah a nih loh tur thu ka tiam ang. Chu chu nakina i tan a pawi thei a ni chuang lo vang- rukbo a ni i ti thei mai ang. Chubakah Chistian Democratic te inthlan leh huna an chak a nih chuan Ngaihdam a ni ang tih ka tiam bawk ang.”

“Ah, chuzawng a theih lo,” Minister chuan a ti a, “Ngaihdamna chu ka thuneihna piah lam a ni.”

“Thutiam ringawt chu i thuneihna pawn lam a ni lo,” Don croce chuan a ti a, “a lo tih theih ta a nih leh a tha a ni mai a, thil tih theih loh a nih leh, chanchintha lo chu kan hrilh mai ang chu.”

Minister Trezza chuan a hrethiam ta chiah mai. Don Croce-an hmu se a tih chu a hmu ta a ni; a tawpah chuan Don Croce chuan Guilianno chu a dah bo ang, an pahnih chuan Sicily-a awm dun thei an ni lo. Don Croce chuan chung mawhphurhna zawng zawng chu a la vek ang a, Minister chu chung harsatna sukiang tur chuan a inrawlh ve a ngai lo vang. Thutiam te chu a neih theih alawm, sipai ho ruahmanna copy hnih kha Don croce hnena pek chauh a ni mai. (Tu te emaw ram Politician an ang awm hi ka tia!)

Minister chuan a thutlukna chu a buk vel mek a ni. Don Croce chuan a lu ropui tak chu a kun deuh a, nem takin, “Ngaihdamna chu a theih dawn a nih phawt chuan, theih tawp ka chhuah ang.” Minister chuan thil buaithlak lo thleng thei tur ngaihtuahin roomah chuan a vei tuak sek a. Don Croce chuan a chet dan en zui tur chuan a lu emaw a taksa emaw pawh a ti che lo reng reng a ni.

Minister chuan, “Ngaihdamna chu ka hmingin tiam ang che, mahse a har hle ang tih i hriat a tul. Hmingchhiatna a nasa lutuk dawn a ni. Tunah pawh chanchinbumi ten kan pahnih hian kan inhmu tih an hriat ringawt pawhin a nung chungin ka vun an duh hial ang a, Sicily-a ka loah ka let a ngai ang a, ran ek leh beram rual ka khawm a ngai mai ang. Khang ruahmanna leh order copy-te kha a ngai takzet em ni?”

“A tel lo chuan engmah tih theih a ni lo,” Don Croce chuan a ti a. “Guilianno chuan keini pahnih hi thian kan ni tih fiahna leh a thil tih avanga a lawmman tur a hriat a ngai a ni.Ruahmanna te ka hmuh huna tih hlawhtlin a nih loh tur thu ka tiam hunah chuan keini pahnih chuan kan tih tur kan zo a ni mai. Sipai leh police-te laka harsatna nei lovin zalen takin a tih tur chu a ti thei dawn a ni. Ruahmanna copy ka neih hian nang nen inzawmna kan nei tih a tichiang dawn a ni.”

Minister chuan, “Ka rem ti e. Hei hi hrereng ang che, Kan party hi Sicily pumpui vote kan hui thei dawn tih ka tiam theih a, Guilianno chungchanga harsatna hi ka tihfel theih bawk chuan Italy ram rorelnaah hian engtia sang nge ka thlen dawn tih sawi theih a ni lo. Eng anga sang pawh thleng ila, ka theihnghilh ngai lo ang che. Ka thian, i tan ka inhawng reng ang.”

Don Croce chuan awka rinawm tak, a hmingthan pui em emna ngei chuan, “kan inthianthatna avangin lawmthu ka hrilh a che. I vanneihna kawng sial pui tur chuan ka theihna zawng zawng ka hmang ang. kan remti dun ta bawk a, naktukah Palermo ka chhuahsan ang a, zing lama hotela ruahmanna leh order copy kha i lo dah theih chuan ka lawm khawp ang. Guilianno chu, a hna a thawh zawh hnua ngaihdamna pek theih loh a nih tak leh a awm bo theih nan ruahhmanna ka lo siam ang e, America-ah emaw, hmun dang buaina a siam theih lohna hmun lama kal turin.”

Mi pahnihte chu an inthen ta a. Sicilian mi Trezza, vantlang tumdin tumtu leh Don Croce, Rome dan leh dunte chu he leia a mah khuahkhirh tura ramhuai lo awm nia ngai tlat tu te chu.

Palermo-ah chuan Don Croce chuan Hector Adonis chu a ko ta a. Trezza nena an inhmuh dan leh inremna an neih te chu a hrilh a, Chutah Guilianno dona atana sorkarin ruahmanna a siam copy chu a hmuh ta a. Don Croce-a beisei ang takin chu pa tereuhte chu a mangang hle mai.

“Minister chuan heng ruahmanna hi a pawm lo vang a, hlen chhuah a ni lo vang tih a tiam a ni,” Don chuan a ti a, “Mahse i Godson chuan inthlan lo awm leh turah a theihna zawng zawng hmangin a inrawlh tur a ni. Nghet leh chak takin a bei ang a, mi retheite a ngaihtuah lutuk tur a ni lo. A pang damna a ngaihtuah zawk tur a ni. Rome leh Minister of Justice te an tan ho lai hi hun remchang tak a ni tih a hrethiam tur a ni. Trezza chuan carbinieri zawn zawng te, Police zawng zawng leh Judge zawng zawng a thunun vek a, engtik niah emaw Italy Premier a la ni maithei. Chutiang a lo thleng a nih chuan turi chu a chhunte thla zar hnuaiah a kir leh thei ang a, politics lamah pawh a la kal duh maithei a, Sicily mipuiin an hmangaih tlat avangin. Mahse tun dinhmunah chuan ngaihdamna thinlung a put a ngai a ni. Thuhneh turin ka rin dawn che a ni.”

Hector Adonis chuan, “Mahse engtinnge rome thutiam chu a rin theih ang, Turi hian mirethei tan a bei fo va, an tana hlawkna awm lo turah chuan engmah a ti duh lo vang.”

Don Croce chuan hriam hrakin, “Communist a ni lo tih a chiang a, kan inhmuh theih nan ruahmanna siam rawh, ka lo hmin ang e. Sicily-a thil ti thei ber pahnih kan ni a, eng vangin nge kan thawh dun loh vang? A hma pawhin a lo hnial tawh a, mahse hun a inher danglam tawh a ni, tuna mi hi a mah leh keini tan nun khawchhuahna tur a ni asin. Communist chuan kan pahnihin phur takin min ti chhe vek mai ang. Communist sorkar chuan Guilianno ang pasaltha leh keimah ang misual hi an tuar lo vang. Inhmuh a duhna hmun apiangah ka lo kal mai ang. Rome thutiam chu a chiang a ni tih hrilh la. Democratic hi tun inthlan hi an chak a nih chuan a ngaihdamna turah chuan mawh ka phur ang, ka nunna leh zahawmna chhalin ka sawi e.”

Minister Trezza thutiam chu tihhlawhtlin a nih loh chuan Guilianno thinurna chu Don Croce chuan dawn a inhuam tih Hector Adonis chuan a hrethiam a ni.

“Heng ruahmanna te hi Guilianno entir turin ka keng thei ang em?” Adonis chuan a ti a.

Don Croce chu reilote a inngaihtuah a. A nei let leh thei lovang tih a hria a, Guilianno hnenah nakin lama ralthuam hlauhawm tak ni thei tur a pe dawn tihna a ni. Hector Adonis chu a nuih a, “Tehreng mai, i ken thei ang.” a ti ta a.

Hector Adonis nghah pah chuan, Guilianno chuan a thil tih zel dan tur chu a rilruin a buk kual vel a. Inthlanna leh left party te an chakna chuan Don Croce chu tanpui dilin a rawn kal a beisei reng a ni.

Kum li dawn dawn chhung khan Guilianno chuan Sicily khawthlang huam china miretheite hnenah cheng maktaduaih chuang leh eitur a sem ral hman a. Mahse thuneihna tlemte a neih hmang chauh chuan a pui thei a ni.

Economics leh Politics lam lehkhabu, Hector Adonis-an a chhiar tura a rawn kente chuan a tibuai hle. History kalphung atanga thlir chuan Left party te chu America tih lohah chuan miretheite tana beiseina awm chhun a ni tlat a ni. Chuti chungin chulam chu a la awn chuang lo. Kohhran lam kalh zawnga an thusawi leh Sicily chhungkaw dan hmasang atanga an chhawm an hmusit chu a haw hle a. Socialist sorkar chuan Christian Democratic sorkar ai chuan tlang atanga umchhuah an tum nasa zawk dawn tih pawh a hria a ni.

Zan a ni tawh a, Hector Adonis a lo thlen chuan American khawnvar battery hmang inchhitna hmun puk lian tak chhungah Guilianno chuan a hruai lut a, chutah chuan dawhkan leh chairte a lo awm bawk a. Hector chuan a kuah thawk thawk a, lehkha bu ip khat a rawn ken sak chuan Guilianno chu a tilawm hle. Lehkhaa khat file hi a pe bawk a, “Heng hi i hmuh duh ka ring tlat a ni, i chhiar nghal tur a ni ang.”

Guilianno chuan lehkhate chu thing dawhkanah chuan a han pharh a. Guilianno-a pawlte bei tura Sicily-a caribinieri sangkhat chuang tirh luhna tur order, Minister Trezza signature chuang te, Army Chief of staff in ruahmanna a siam te chu. Guilianno chuan ngun takin a zir chiang a, mahse a hlau lem lo. Tlang pilril lehzual lama insawn luh leh a ni mai. mahse inthawtlawkna chu a hun chiah chiah hle.

“Hengte hi tu pek che nge?” tiin Adonis chu a zawt a.

“Don Croce,” Adonis chuan a ti a, “Minister Trezza hnen atang ngeia a dawn a ni.” Guilianno chuan mak ti hmel pawh a pu lem lo, a nui sak mai chauh a ni.

“Hei hi min tih hlauhna tur em ni?” tiin Guilianno chuan a zawt a, “Tlang lah hi a zau thain a pilril tha tawk a, Mihring an rawn tirh zawng zawng a dawlh zo thei ang chu, keilah thinghnuaia muhil turin thlamuang takin ka faifuk hlerh hlerh thei tho dawn a ni.”

“Don Croce-an hmuh che a duh a ni, i duhna hmun apiangah lo kal a duh a ni.” Adonis chuan a ti a, “Heng ruahmanna lehkhate hi a duhsak zia che entir nana a tih a ni. Rawtna siam a duh a ni.’

Guilianno chuan, “A nih nang, godfather, Don Croce hmu tur chuan min duh em?” Ngun takin hector-a chu a en a.

“Yes,” Hector Adonis chuan a ti nghal mai a.

Guilianno chu a bu nghat a, “Chutia nih chuan Montelepre-a i inah kan inhmu ang, Don croce chu a lo kal ngam ang tih i chiang a maw?”

Adonis chuan, “Engvangin nge a duh loh ang? A him ngei dawn a ni tih ka tiam dawn a, tin, nang he khawvela ka mi rin ber hnen atangin thu ka hmu bawk dawn a ni.”

Guilianno chuan Hector-a kut chu a vuan a, “I tih ang chuan le,” a ti a, “Ruahmanna lehkhate avang leh lehkhabu min lo ken avang hian ka lawm e. I kal hmain zanin chu bu khat tal chu min han tihpui dawn em ni ang?”

“Tehreng mai,” Adonis chuan a ti a. chumi zan chuan a lehkhabu lo kena thu har hriatthiam har tak tak te chu an inzirtir a. Guianno chun ngunthluk taka ngaithlain zawhna a lo zawt zauh zauh a. Hun rei tak liam taa Zirtirtu leh naupang inzirtir thin ang mai kha an ni leh ta a ni.

Chu mi zan chuan a ni Hector Adonis chuan thuthlung bu chu ziak tura a hrilh tak ni. Lehkha pawimawh te chu an pawl chhunga thil thleng chhinchhiahna tha tak leh Guilianno-an Don Croce leh Minister Trezza nena indawrna ruk a neih tih fiahna tha tak a ni ang a, nakina inhumhimna pawimawh tak a la ni dawn a ni.

Guilianno chu a phur thar hle. Chu thuthlung bu chuan thiltihtheihna a nei lo emaw, a bo palh emaw a nih pawhin kum za hnuah pawh hel dangin an rawn hmuchhuak maithei asin tiin a ngaihtuah a, Pisciotta leh amahin hringei ho sai ruh an hmuh chhuah ang khan.

(He bungah hi chuan Action lam a awm lo a ni ber e. Mahse thuthlungbu lo pian dan a niin apawimawh viau si a, a ngaihnawm lem lo maithei)