THE SICILIAN (BOOK III-V) By Mario Puzo

[Loma hmar]

CHAPTER 30

Guilianno-a thihna chuan Sicily mipuite thinlung chu a sawp chhe nasa hle mai. An champion a ni a, mihausa leh lal chhungkuate, Friends of friends lak atang te leh Rome-a Christian Democratic lak atangte a an inhumhimna phaw a ni si a. Guilianno a awm tak lohah chuan, Don Croce Malo chuan Sicily chu a grep sawrna khura hmangin mi hausa leh retheite lak atangin vanneihna a sawr chhuak hiau hiau a ni. mipuiin man tlawm zawka tui an hmuh theihna atana sorkarin Dam siam a tum chuan Don Corce chuan a bomb darh vek a. Chu bakah Don Chuan Sicily rama tuichhunchhuah zawng zawng a thunun vek a, man tlawm zawka tui hmuh theihna dam tih vel chu a ngaihven tehchiam lo. Sicily rama sumdawnna zawng zawng chu a thuhnuaiah a dah vek a. Palermo-a bajarah chuan Artichoke (thlai chi khat, sawhthing par ang deuh nei) fahran pawh Don Croce-a tangka tlemte tal pawh pe lovin i hralh thei hauh lo ang. Don Croce laka zakhamna tlemte tal awm lo chuan Mihausa ho chuan an nupuite tan tlereuh an lei sak thei lo a, an fate tan intlansiakna sakawr an leisak thei hek lo. Italian sorkarin dan awmze nei lo an siam hmanga Prince Ollorto theh loh ram neih tumtu loneitute beiseina atthlak tak chu Don Croce chuan a hmeh chimih sak vek a. Don Croce leh lal chhungkuate leh sorkar che vel inkara awm Sicily mipuite chuan an beiseina neihchhun pawh an hnuchhawn ta a ni.

Guilianno thih atanga kum hnih hnuah chuan, Sicilian nuaihnga chuang- a tam ber chu thalai an ni a- chuan an ram chhuahsanin ram dangah an pem a ni. England-ah kalin huan enkawltu te, restaurant-a waiterah te, Ice cream siamtuah te an tang hlawm a. Germany-ah kalin h a rum tak tak an thawk a, Switzerland-ah kalin an ram an thian a, sana te an siam bawk a. Franceah kalin choka-ah te, hmunphiatah an tang bawk a. Then khat chu Brazilah kalin ramhnuaiah hna an thawk a, thenkhat chu thlasik vawt em em Scandinavia lamah an kal bawk. United State-a Corleone family tana thawk tur mi vannei zual tlemte Clemenza-an a lak an awm bawk. Hengte hi a vannei ber bera ngaih te an ni. Tichuan Sicily chu ei leh bar harsatnain a run avanga Putar, naupang leh hmeichhia chauh chenna ram a lo ni ta a. Thingtlang khuate chuan mihausate rama thawk tur mi an nei ta lo a, mihausate pawh chuan an tuar ve ta a ni. Don Croce chauh chu a ding chang ta a ni.

Gaspare ‘Aspanu’ Pisciotta chu suamhmang a nih avanga rorel sak a niin, dam chhung tang turin Ucciardone taninah dah a ni a. Mahse ngaihdam a ni thuai ang tih chu mi zawng zawngin an hria a ni. A hlauh ber chu tanina a awm laiin thah a ni ang tih chu a ni. Chutichungin ngaihdamna chu a lo thleng mai thei lo. Ngaihdam a nih vat loh chuan an pawlte leh tuna Italy Premier thar ni ta, Trezza nena inzawmna an neih dan, Trezza leh Don Croce-an Portella della Ginnestra hmuna ama mipui ngeite that tura ruahmanna an neih dan chu sawi chhuah a ni ang tiin Don Croce hnenah chuan thu a thawn a.

Minister Trezza Italy Premier-a a kaisan tukah chuan Pisciotta chu zing dar riatah a tho va. A cell chu lian tak a ni a, Pangpar leh hun khawhral nana a hman thil thui hna a thawhna te chu a awm bawk a. Silk puan han nalh tak taka a cheimawi vel te chuan a rilru a ti hahdam rih a, mahse tunah chuan an naupan laia Guilianno nen inhmangaih tawn taka an awm thin lai kha a ngaihtuah chhuak ta a ni.

Pisciotta chuan zing lam coffee insiamin a in a. tura hrai hlum nih a hlau hle a. Chuvangin chu coffee noa thil awm zawng zawng chu a chhungte rawn ken vek a ni thin a ni. Chaw a ei dawn pawhin bawma a khung vaki chu a tem tir hmasa phawt thin. Engemaw thulhah tiin a chhuarah chuan thil thui mawina hriau, puan them leh Olive oil bawm a dah reng thin. Tura a lo ei palh a nih chuan a in ang a, chu chuan tur hnathawh a tih buai emaw, a luak chhuahna turah a tanpui a beisei a ni. Tharum hmanga beih nih chu a hlau lem lo, uluk taka ven a ni tlat a. Tlawhtu pawh ama remtih ngei chauhin a cell kawngkhar an thleng thei a, tin amah chu chhuah phal a ni lo hrim hrim bawk a ni. Dawhthei takin a Vakiin a chaw a ei a, a paitawih chu a nghak vang vang phawt a, chutah ril tam takin tukthuan chu a ei ta a ni.

Hector Adonis chuan Palermoa a apartment chu chhuahsanin Ucciardone tanin pan nan chuan khawlai Rel a hmang a. A la hma viau nachungin february thla ni chu a sa hle tawh tho a, kawrchung dum leh tie a awrh chu a inchhir deuh hle. Mahse chutiang hun pawimawhah chuan nalh taka inchei a duh tlat si a ni. A jacket hmalam iptea lehkha pawimawh zet mai, ipte mawng lama dah that khiau chu a han khawih a.

Chutia Khawpui chhunga a tlan zur zur lai chuan a bulah Guilianno thlarau chuan awmpui reng niin a inhria a. Tuk khat a nu leh pa he Tanin ngeia an tan tir avanga thinurna tihlan nana Guilianno-an khawlai Rel, carabinieri chuan khat tlatna a bomb darh leuh chu a hrechhuak zawk a. Theih tawpa a lo zirtir thinin chutiang thil a ti duh mai chu mak a la ti reng a ni. An tlan pelh chiah bang chu engmah intar a awm lo chungin a mitthlaah chuan rawng senduk a, ‘Guilianno dam reng rawhse’ tih intar chu a hmu a, a hma chuan chutiang chu hmuh tur a awm fo a ni. Ni e, A Godson chu a dam rei ta chuang lo a. Mahse Hector Adonis tibuai fo tu chu Guilianno chu a naupan lai atanga a thian tha berin a that ta mai chu a ni. Chuvang chuan a ni a iptea note dah tura thupek a dawn pawh a a phur em em ni. Chu note chu Don Croce hnen atanga chiang taka hrilhfiahna nena a dawn a ni.

Rel chu leirawhchana sak in lianpui, Ucciardone tanin bulah chuan a ding ta a. Lung bang, a chunga thirhlingnei zam chhuah vek hian hung a ni a. Gate chu uluk taka ven a ni a, hungna bang bulah chuan Police ralthuam keng te an vei kual reng bawk. Hector Adonis, lehkha pawimawh tur ang nei vek chu luh tir a niin, guard pakhat hian a hruai a, Hospital damdawi dawrah chuan a lut ta a. Chutah chuan a ngahktu, a hming Cuto chuan chibai a lo buk a. Amah pawh chu hun pawimawh tak nia a hriat avangin a lo inchei nalhin kawrchung nen a induang ve zaih a ni. Nelawm takin Hectora chu chibai a buk a, an thu a, an nghak ta a.


“Aspanu chuan a damdawi chu a la ei tha zel maw?” Hector Adonis chuan a zawt a. Pisciotta chuan a TB avang chuan Streptomycin a la ei reng a ni.

“Ni e a,” Cuto chuan a ti a, “A hriselna a ngaipawimawh khawp mai. meizuk pawh a sim daih a ni. Mitangte ho hi mak ka ti ngawt mai, zalen an nihin hriselna ngaipawimawh lovin mei an zu vak vak a, zu an in nghek nghek bawk a, inhman ral raih pawh an hreh lo. Exer an la tha lovin an mu tha hek lo. Taninah an han awm ta cheng a, exer an la a, vaihlo lam chi an thlah a, an in-diet a, engkimah an insum thei hlauh zuk nia.” a ti a.

“Hun remchang an neih tlem vangte pawh a ni maithei asin.” Hector chuan a ti a.

“Ni lo, ni lo,” Cuto chuan a ti a, “Ucciardone taninah hi chuan i duh apiang i nei thei ang. Vengtute hi an rethei a, mitangte hi an hausa thung a, pawisa inthleng tawn a lo remchang ta riau a ni. thil sual engpawh tih duh a thu a ni mai.”

“A damdawi laksak chungchangah harsatna i nei thin em?” Hector chuan a ti a.

“Aih, A bika ngensak thin a ni a,” Cuto chuan a ti a. “He ama bur thar hi tukinah ka dawng a ni. America-in thawnchhuah tura an tih tih lanna seal bik chuang ngat a nih hi. Damdawi man to tak a ni. A dam theihna tura thuneitute hetianga an buai chiam mai hi mak ka ti hle a ni.”

An pahnih chuan inhrethiam tawn takin an innuih dun sak a.

A cell-ah chuan Pisciotta chuan Streptomycin damdawi bur chu lain a chhin, in-seal thlap chu a hawng a. Vawikhata a ei tur zat teh chhuakin a lem ta a. A ei laia tlema kha deuh fak awm avang chuan mak a ti deuh hle. Chutah a taksa chu hnunglamah a eu vak a, chhuatah chuan paih ang thlawrhin a tlu ta a. A te chiam chiam a, guard ho chu a Cell kawngkharah chuan an lo lang nghal bawk a. Pisciotta chuan a kea din tumin theih tawpin a bei a, a taksa na tak tuartir tu chu a sual mek a ni. A hrawkah chuan thil ri ro zet a rawn ri chhuak a, olive oil a dahna lam panin a pai phei tawk tawk bawk a. A han eu leh vak a, gaurad ho chu koin, “Tura hrai ka ni, min pui rawh u, min pui teh u,” tiin a au tuar tuar bawk a. A tluk leh hma chiah chuan thinurna nasa tak nen a tawpah chuan Don Croce-an a lehkhalh leh ta nge nge tih a ngaihtuah chhuak ta a.

Pisciotta chu vengtute chuan Damdawi dawr lamah chuan zawn pheiin tura hrai a nih thu an aupui tuarh tuarh a. Cuto chuan khum lo awm pakhatah chuan mut tir turin a ti a, Pisciotta chu a han endik a. Chutah rang takin luak chhuahna damdawi chu siamin Pisciotta kaah chuan a chhung lut ta a. Gaurd ho hmuhah chuan Pisciotta chhanhim nan a ti vel niawm takin a lang a. Hector Adonis chauh chuan chu luak danna damdawi chu pawlh dal a niin Pisciotta chu a chhan thei chuang dawn lo tih a hre khiau a ni. Adonis chu khum sirah chuan va kalin a iptea lehkha them a phawrh a, a kutin a hum bo tlat a. Dawr nghaktu chu tanpui niawm fahranin a awm a, Pisciotta kawr huaiah chuan lehkha them chu a thun ta zauh a. Chumi rual chuan Pisciotta hmel chu a zu en a, na tawrh lutuk avangin a hmel chu a inpawtsawi nasa hle a ni. A na tawrh lutuk avang chuan a hmuihmul tereuhte thenkhat chu a tla hial bawk. Chutih lai chuan Hector Adonis chuan Pisciotta thlarau tan chuan a tawngtai sak a, lungngaihna nasa takin a tuam vel bawk a ni. He mi leh a Godson kha kut leh kut insuihzawm chungin Sicily tlang velah te chuan Roland leh Charlamange Hla thu an chham rual thin kha a la hre reng a ni.

Darkar ruk dawn lai a liam hnuah chauh Pisciotta taksaa lehkha them chu hmuhchhuah a ni a, mahse Pisciotta thih chungchang chhuahtu chanchinbuah chuan a tel hman tho a ni. Hector Adonis-an Pisciotta kawr chhunga a thun lehkha themah chuan ti hian a inziak a, ‘Guilianno phatsantu apiang chu thi vek rawhse’ tiin

CHAPTER 31

Sicily-ah chuan pawisa i nei a nih chuan, i hmangaihte chu leiah i phum tur a ni lo. Chu chu hneha awmna tawp ber a ni tlat a ni, Sicily leilung chu intihmualphona tamtakah mawh a lo phur sa tawh tlat a. chuvangin thlanmualte chu lung leh marble a siam thlanin te deuh, congregazioni an tih chuan a khat a. a luhnaah chuan thir kham dah vek a ni a, a chhungah chuan mitthi kuangte chu a inchherchhuana dahin, cement hmanga char belhbawm vek a ni thin. chhungkaw dang tan hmunawl zuah a ni thin bawk.

Hector Adonis chuan Pisciotta thih hnu lawk chawlhni-ah chuan Montelepre thlanmual chu a tlawh a. Guilianno thlana tawngtai turin chutah chuan Don Croce chuan a rawn hmu dawn a ni. Engemaw sawi dun tur an nei bawk a; chutiang hmun rilru chapona reng reng awm lohna, hun kal tawha hliamte pawh inngaihdam tawnna hmun leh duh ang anga khawsak theihna hmun tluka thil sawihona tur hmun tha chu a awm chuang ang em le?

Chubakah thiante an thil tih that lawmpuina hmun tha tak a ni bawk. Pisciotta, tawng duh lutuk leh hriatna tha lutuk tih bo hna chu Don Croce-a hna a ni a. Chu hna tihlawhtling leh ruahman tur chuan Hector Adonis chu a thlang ta a ni. Lehkha thema thu inziak hnutchhiah kha Don Coce-an zahderna a lan tirna a ni a, Hector Adonis a lungawi a, politics thil avanga inthahna chu dikna hlenchhuahna anga lan tir a ni ta hlauh bawk a ni. Thlanmual luhna Gate-ah chuan Hector Adonis chuan motor khalhtu leh gaurd ten Don Croce-a car atanga a chhuak tur an pui lai chu a thlir reng a. kum hmasa atang khan Don Croce-a taksa chu a ritin a thau zual hle a, a thiltihtheihna a than ang zelin a taksa pawh a thang ni maiin a lang.

Chu mi pahnihte chu gateah chuan an lut dun a. Adonis chuan gate chunga an thil tar chu a han en chho a, thira uluk vakloa frame siama thirphek awmah chuan lusun tura kalte tana thuchah a inziak a, hetiangin, ‘Nagmah ang kha kan ni ve thin a, nakinah keimahni ang i la ni ve ang’ tiin.

Hector Adonis chu chu chona avang chuan a han nui lui sak a. Guilianno chu chutiang chu a ni ve hauh lo ang, mahse Pisciotta-an a thlan atanga a rawn auh dan tur ang tak a ni.

hector Adonis chuan Guilianno thih hnua Pisciotta a huatna kha tak kha tunah chuan a pu tawh lem lo a. Phuba a la tawh tlat a ni. Tunah chuan chumi pahnih te chu naupang ang maia infiam dun a, Outlaw pawh ni dun angin a ngaihtuah tawh a ni.

Don Croce leh Hector Adonis chu thlanmual ril lamah chuan an kal a, Don Croce leh amah vengtute chu a huhova kalin kawng titoh takah chuan an inveng tawn a. Driver chuan pangpar bawr a ken chu Guilianno an zalhna congregazione kawngkhar bulah chuan a dah a. Don Croce chuan pangpar thenkhat chu lain lunga ker Guilianno thlalak chungah chuan a theh a. A bodygaurd chuan a tluk loh nan a lo chelh reng bawk a.

Don Croce chu a han ding ngil a, “Mi huaisen tak a ni asin,” a ti a. “Guilianno kha kan hmangaih vek a. Mahse engtinnge amah nen kan nun ho theih ang? Khawvel kha thlak danglam a duh a, lehlin thawk a duh a ni. A mite kha a hmangaiha mahse a tam zawk a tihlum a, Pathian a hmangaih a mahse Cardinal a rubo tlat si.” a ti a.

Hector Adonis chuan thlalak chu a han en a, Guilianno kum 17 mi a nih laia lak a ni a, Mediteranean tuipui kama a ding lai thlalak a ni. A hmelah chuan hmangaih loh theih loh turin ngainatawmna a awm a, mi sang tam thihna thu petu leh sang tam tak hremhmun lama thawn liamtu a ni tih i ring miah lo vang.

Ah, Sicily, Sicily, tiin a ngaihtuah a. I mi tha ber i ti chhia a, vaivutah i chan tir a ni. i leilung atangin naupang Angel ai maha tha zawk an lo chhuak a, ramhuaiah i chantir ta a nih hi. He leiah ngei hian sualna chu chu thlai leh theirah ang maiiin a thang duang a; Chuti chungin engtinnge Don Croce te ang hi Guilianno thlana pangpar dah tura a la dam theih?

“Ah,” Don Croce chuan a ti a. “Turi Guilianno ang kha fapa nei ni ila chu, a rorelna tur lal ram ka hnutchhiah tur zia chu aw, eng anga ropuina nasa nge a hlawhchhuah ang tih tunge hria ang le?”

Hector Adonis chu a nui sak a. Don Croce chu miropui tak chu a ni ngei a, mahse History hriatna a nei tlat lo. Don Croce chuan a rorelna chhunzawm tur, a fin vervekna rochun tur, Sicily rawk a rome hlemhletna siam tur mi fapa sang tam tak a nei zawk a ni. Amah, Hector Adonis, Palermo Universitya History leh Literature zirtirtu challan tak pawh hi chung zinga pakhat chua a ni.

Hector Adonis leh Don croce chu kal tumin an inher a. Thlanmual gate bulah chuan Tawlailir intlar pat hian an lo nghak a. Chung tawlailir khawi lai mai pawh chu rawnglar taka Turi Guilianno leh Aspanu Pisciotta lim chi hrang hranga chei a ni a: Duchess rawk a nih lai te, Mafia chief ho thah an nih lai te, Aspanu-an Guilianno a thah laite chu. Hector Adonis chuan chung zawng zawng chu a hre vek ni maiin a lang. Don Croce chu a ropuina zawng zawng nen theihnghilh a ni ang a, Guilianno zawk chu a ni dam reng tur chu. Guilianno ropuina chu a thang zel ang a, thenkhat chuan a thi lo va, camarrata tlang velah a leng kual reng thin a, nakinah chuan ni ropui lo thlengin Sicily chu a phuarna hrui tichat tur leh a retheihna zawng zawng lak ata chawi kang turin a lo la lang leh ang, tiin an la ring fan ang. Lung leh vaivuta khat thingtlang khuaa naupang lo la piang tur thleng chuan Guilianno thlarau tan leh a thawhlehna atan an la tawngtai ang.

Aspanu Pisciotta, Hector adonis an thu tha tinreng a hrilh te ngaithla lo tu pawh kha. Guilianno lakah chuan rinawm reng ni se chuan theihnghilh a ni ve ngei ang a, Guilianno chuan ropuina zawng zawng a khum mai tur. Mahse a thil tih sual nasa tak avang chuan a hmangaih turi Guilianno bulah a awm kumkhua dawn ta a ni.

Pisciotta chu Guilianno an zalhna thlanmual hmun khatah zalh a ni ang a, an pahnih chuan an ngainat em em tlangah chuan an eng kumkhua tawh ang a, hringei ho sai ruh awmna hmun, Roland-a tawtawrawt ropui zet leh saracen ho a beihna thangkhawk ri awmna tlangah ngei chuan. Turi Guilianno leh Aspanu Pisciotta te chu naupang takin an thi a ni thei e, mahse an nung kumkhua ang. Chutiang a nih loh pawhin Don Croce emaw amah, Hector Adonis te aia rei chu a ni ngei ang le.

Mi pahnih, Pakhat lian em em leh pakhat tereuhte te chuan thlanmual chu an chhuahsan dun ta a. Huan mawi tak te chuan a chheh vel tlang hring dup chu rawng senin mawi takin a chawi vel a, Lungpui var paw paw phuk te chu tle sutin an lang a. Muvanlai hi chu Sicily ram ni sa vawl vawl hnuaiah chuan lungmuang takin boruakah a leng diai diai a.

A TAWP TA

( Phuailuai taka ka lehlin ve min ngaih hlutsak a, a dik lo leh ulh lai te en khum a, Ka Quality kual loh zia hre reng chunga min chhiar zawh sak a vangin ka lawm hle a ni. Awmze bo thak leh tum thelh duai emaw a lehlin ka nei mai thei. Mahse lo enkhum zel mai teh un. Edit miah loa Post a nih thin avangin a fel fai thei ta lo a ni.
Guilianno-an fam dairial min chan san ta si a, tunge kan kawm leh tak ang? Michaela pa (The Godfather) kha kan chhui zui dawn nge ni ang a? Astorre of Omerta kan then hawng zawk ang?)