THLAMUANZUALA Chapter-12

Episode kal lai dah luhna

Moderator: writers

Hmuakteii Fanai
Posts: 95
Joined: May 18th, 2020, 7:27 pm

THLAMUANZUALA Chapter-12

Unread post by Hmuakteii Fanai » August 1st, 2020, 8:46 pm

THLAMUANZUALA









Chapter-12









"Ka fa apai a ka neih ngei ngei angai" Nekluih ngam miah loh turin ati nghet churh. A sawi tawh chu ati ngei ngei dawn tih ka hria chuvanga helai hmuna min hruai pawh a ni, mahse rilru nuamin ka awm lo thung ang.







"Chu pawh nise" hmeichhia zawkin ati nghal ṭiau.







Naute vanga min nei tur anih chu ka hriat sa a ni. Mahse amah ngeiin ka mualphona ti zual turin a sawi chhuak kher bawk a.








Hmeichhe dang a nunah anei anih si chuan eng vanga min neih luih ṭalh tum nge anih.







Hrehawm ka tihna leh ka rilru natna a inzat reng ang. Chuan ka zak bawk. Loh theih loh dinhmunah ka dintir ni berin ka hria.







Kei hian ka duh tawh lutuk tih pawh ka inhria mahse lehlamah sawnu saw a awm tel ve tlat. Nau ka pai vang chauha min neih tum anihna hian min ti na a, lehlam zawnga thlir chuan mi inkar pawt buaituah ka inngaih phah bawk a. Chu chuan hrehawm min tih tir hle bawk.







Hmeichhia zawkin a kuahna phelhin Thlamuanzuala hmalam a ding turin a insiamrem a. Kawngka bula ka ding ve reng min hmuh rualin a biang tawn tawn a dawm chungin a dingdihlip ak ak a, a fawp nghal chawt anihchu.







Room luh hma chiah kawngkhar sira an vase hun ka nek rawk rawk a a tlakeh nghal chuai.







Thlamuanzula te pahnih an rawn hawi zui dawrh!







"Lovie" kawngkhar bula ka ding zum reng min hmuh rualin abiang a dawmna a pawh phelhsak a min rawn pan nghal.







An thusawi leh an awmdan hmuh tuma helai hmuna chho ka ni bik lo, kalsawn nachang hre loin min siam ani ber zawk.







"Khutah kalo awm ang" ka bul a rawn thlen rualin kati chhuak nawk nawk.







Inhersanin step ah ka penthla nghal pawp pawp a. Living room ka thlenthlak rualin Thlamuanzuala te pahnih an rawn thlengthla zui ve nghal zat.







A chhungte bula an awmdan vel ka sawi an  hlau ani mahna hetiang a ranga min rawn zuithlak chhan hi.







"Ehe Lawmi chu hetah ilo awm ve reng animaw" upuiin a ti hluai a. Min rawn hui zauha abulah ka ṭhuthla ve nghal zat bawk.








"Nia hei Thundera hi thil pawimawh sawipui tur ka neia kalo kal lawk anih hi" ati ṭha ve mai bawk a.







Thlamuanzuala ka bulah min si chetin a rawn ṭhuthla a ka kut rawn vawn atum chu ka dahsawn nghal hmak, upuii lamah ka tawlh phei nghal hrat chu a thaw deuh hawk.







"Pa, kan haw mai dawn amawn le, lovie hi anuamsam chiah lo a mut hahdam a mamawh tawh ang"






Hah ka nuih atiza zawk. Nichin lawkah hmeichhe dang a awmpui a, tunah min ngaihsak ber ang zia zangin a khawsa leh a. A zak lo kati ngawih ngawih.







"Feli in enkawl ṭha rawh aw, Thundera hi helamah rawn inhruaitir fo la" Thlamuanzuala pa in ati churh churh a. Ka kal fo tur thuin ka chhang satliah.







Ka kal fo dawn lo tih ka chiang lutuk. Tun thlengin anu hmel hmuh tur pawh a awm lo ania. Hetiang tak hian min pawm lohna hi a lanchhuahtir ang tih ka ring bik lo.








Ṭawngkam na tak takin min ṭawngkhum ṭhin mahse hetiang kan nih tawh si techuan ka chungah ṭhat a chhuah ve mai ka beisei ania.







Apa emaw upuii pawn anu awm loh lang miah lovin min be seuh seuh zawk a. Chuti ni lo se helai hmuna ka kal hi ka inchhir viau zawk ang.







Upuii ho vin pawnlamah kan inzui chhuak a. Lawmi pawh a rawn chhuak zui ve nghal.







"Thunder min thlah kawi hman chuan" inti polite fahranin a ti nem duai a.







Thalmuanzuala'n a mitmeiin min rawn a ka hawisawn nghal hmak. Tuna taka ka duhdan a ngai pawimawh kual vel hian ka luak ati chhuak.







"Lut rawh" min en chunga ti hmukin hmalam kawngkhar a hawng a, chhunglamah a thle buk bawk.






Ka pen chiah tihin Lawmi'n hmalamah min luh khalh hmak anihchu. Ka nui deuh hak a. Thlamuanzuala'n inthlahrun hmel deuh a min en chu ngeiawm zetin ka ṭhen khumsak.







"Fel lo kal fo rawh aw" upuiin ti hliaiin hnunglam kawngka a pawt hawnga ka ṭhulut ve nghal zat bawk.







Rawn ṭhulut mai lovin a û nen eng emaw an sawi zui a. Nichina ka thil tihkeh vel kha thiam takin apha kual vel turah ka dah hmiah.






Hmalam ka hawia front mirror aṭangin Lawmi'n thip lutukin min melh ram ram chu ka melh let ve ngar.







"Naute vang chauh ani tih ka hria a ka thawveng huai mai" a hmui nawihsen hlarah sawn ka beng thlawp chak lutuk.







"Chuan ka pawt buai reng dawn a ilo hrethiam zel aniang chu" a hmui pet sawi zauhin ati zui leh zat. Ka bag hrui ka hmer nghal chawt chawt.







Thlamunzuala rawn ṭhutluh hnuin a danglam leh nghal vek anihchu. Hetiang em em a han insiamrem theih mai chu atlin zawk kati.




................


"Hmalamah hian rawn ṭhu la" Lawmi te kawt aṭanga kan tlan chhuah hmain front mirror aṭanga min en chungin a rawn ti sup a.






"Angai lo tihian ka ṭha" ka ti ve deuh hmak.






Ngawirengin car a start a atlan chhuak ve mai bawk a.







A in kan thlen hma zawng kan inbe tawh lo hrim hrim.






Kawta a din rualin car aṭangin ka chhuka nghah pawh nghak lovin inchhung lam ka pan ding nghal nal nal.







Inchhung lam a reh deuh duak. Khawnge maw an awm le. An muhil ti dawn ila tunah mut nan ala hma lutuk bawk si.







Thlamuanzuala a rawn lut zui ve nghal a. Biak pawh inbe lem chuang lovin inchunglam kan pan dun a.







Kan la inneih loh avangin kala tlangnel chiam ngam lo. Ka in ala ni ve tlat loh avangin a zaingai zel a ka chet ala ngai tih ka hre ve kar.







Ruatdiki te awmna room lam ka hawnga.  Light on vek chungin anlo muhil der tawh anihchu. Enge maw an hriat a an mut hma viau le.







Julie hetah riak dawn lo se chu ka nau bulah ka riak mai ang kati kha ania. Thlamuanzuala room lama ka riah mai angaih hmel. Living room a ka mu ngawt te anih loh chuan.







"Lo lut la"  a room kawngka bul aṭangin a rawn ti a. Alo la ding ve reng tih ka hre ve chiah.







Amah silo thei tur ang bera ka penlut chu a thaw deuh hawk.







"I thawmhnaw chu an rem lut vek tawh ang aw i naute khan" arawn ti sup a. Ka melh nghal haw chu a nui suk.







"A aw le"







Ka thawmhnaw la chhuak sawk sawkin washroom lamah ka lut bo zui nghal a.







Ka rilru a buai kual vel vek. Hmangaihna tel lovin pasal nei turin ka inbuatsaih mek chu ani sia. Chuta karah hmeichhe dang anla awm zui a. Mahse fahrah ka nih tawhna vangin pa tel lova kafa lo piang tur chawilen ka zuam thlawt bawk silo.







Ka nu kha chu la dam se a zia deuh tur ania. Innei kher lo mahila ka nu awm se chu ka paltlang ve nawk nawk mai tur.







Ka nun buaichuar bik em em hi ka hne ngawih ngawih tawh. Rual pual thei ka nih aṭangin rilru hahdam deuh a hman ni ka nei lo tluk ania. Ka pahrawn buaina chinfel ngai reng rengin kan khawsa a. Khang pawh kha ka chauhpui tawh lutuk.








  Buaina hmachhawn lo zawng hlira khawsak ve ka duh tawh. Mahse ka tan chuan buaina hi min kiansan ngai lotu ka chhungkhat nimaiin ka hre tawh. Engtikah nge nun zalen leh hahdam hi ka hman ve theih ang tih pawh hi ngaihtuah tham fe.







Washroom aṭangin ka penchhuak a Thlamuanzuala hmuh tur a awm lo. Mahse ka lawm zawk tunah hrih chuan ka hmu chak lo ber ang.







Khuma blanket pakhat lulama awm ka la a couch lampanin ka muthla nghal a ka inlu khup zui hmak. A bula mut chakna pawh ka nei chuang lo.







Khawnge a kal ka hre lo mahse alo lan hma a muthilh vat ka duh ani tawp.







"Khumah rawn mu rawh" ka bulah a ding reng tih ka hria. Engtik laiin nge alo luh hman ni a thawm pawh ka hre miah lo.







Ka luhlul chhuahin ka mit ka chhing zui nghal hmak.







"Ruatfel khumah rawn mu rawh ka tihchu" a aw aṭangin a dawh theihna apan tawh hmel viau, ka ngai pawimawh hran lo.







"Luhlulnu" ti hlukin ka puan sinlai nen min pawm kang nawlh a, ka ke ka leng nghal vak.







"Mi thlah rawh i bulah ka mu peih lo" ka ti zui pang pang a. Engah mah ngai lo in khumah min nghatthla nghal dawt.







"Ka mu chak thung alawm" nuihza insum aw in ati thawp sut a. Ka thinrimna a chawk tho leh vek tawh.







Rawn muthla ve nghalin alamah min pawt hnai nghal dawrh a.







"Min thlah rawh" ti nghekin a kutah ka sik vak. Min thlah phah chuang der lo.







"Mi lerpa min thlah nghal rawh, i bula mut pawh ka peih bawk lo. I duhleh khanu bulah khan va mu rawh i bula mut techu kei ang lo takin alo chak hiam hiam ang chu" ka ti chhuak tan tan a. Ka thin arim a khanu kha ka thik lutuk tih pawh ka hria. Sawi chhuah loh ka tum ve ṭang ṭang tho mahse ka insum thei thlawt lo.








"I thik ami?" Alama min kuaiherin ka mit a min melh runin a ati sup a.







"Thik mai mai lo"








"A ṭha thik duh suh kan inkarah engmah a awm lo. I thik anihchuan i inti hah thlawn mai mai" angaih sam leh lutuk tehi ka haw hlur. Nichin an awmdan kha min hrilhfiah ka phut a mahse hrilhfiah chu khawilam thik lo turin min ti zawk ania.







"Mahse naute vang chauh a min neih i tum thu i sawi chhuah khan ka zak a, min ngai hniam dawn lutuk tih i hria em" ti zui nghekin a bengah ka pawt nghal vak.







A beng ka pawhna ka kut ala thla a ahum zui vang vang. Alama min pawt hnai leh tur chu ka ṭang ve tlat.







"Kan thu sawi zawng zawng i hre hman hleinem. A hmalam a ka sawi kha hre hman la ni tur" mitmeng thuk ruih a min melhin ati thawp sut a.







"In thusawi pawh ka hre chak bawk lo. Min thlah vat mai rawh" ka ti bak hlar a. Diktak chuan enge ka hriat hman loh an sawi chu ka hre chak, mahse hre chak anga lan ka tum lo bur.








"Ka duh che Remruatfel" alama min pawt hnai salhin ka chalah a fawp zui nghal vang vang. Cheloin ka dawh mawl ve tawp.







"Kan naute vanga nei che ka ni tih chu ka pha lo mahse nangmah ka duh vang che a hnaih tum che ka ni bawk tih hi hre tel rawh. Zingtin i muhil hmel thlir ka duh a. Ka theihtawp a duat che ka duh bawk. Hlimna zawng zawng pek ka tiam thei lo che mahse i hlimna tur anih phawt chuan engkim kati vek ang" ka mita melh vang vangin ati thuk ruih a. A thusawi hi rinhelh tur pakhat mah a awm lo. Ati vek dawn tih hi a mitmengah a lang chhuak vek. Nichina ka lungawi loh vena zawng zawng tekha vawm bo ang hmak ani tawh. Ka thinlung hi a hlim veng veng, tuna kan boruak hahdam ru zet hi tihchhiat tuma luhlul chhuah ṭalh pawh ka tum bik lo.







"A fawp bawk che a" ka insum thei thlawt lo.






"Thikthu chhenu" ka hnarah a piai zauh a, a kut ka vaithla nghal lawp.







Blanket kan sinlai a hlim thawk a ka melh nghal haw.







"Enge itih dawn?"








A kutzungchal ka hmuiah a rawn nghat a, ka hmui ka chip zui hmak. Enge atih tum ka thlir mawl tawp.








Hmuh nuam zeta kiai sukin ka kawr haklaia a hlim a. Ka dul la thep thlepa a fawp vang vang chu ka ip zui nghal chawih.







A fawhna tawpin a lu ka dulah a nghat a. Ka kiu a innemkalhin a awmdan ka en khiau.







"Junior, ilo chhuah hunah mama lak aṭang hian min chhan ṭhin angai dawn ania" thu tak fe hian ati sup a. Ka nui chhuak hak hak. A chetdan hi naupang chhia viau mahse ka thinlung tak takin ka hlimpui tih ka chiang.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)