MEMORY OF THAT DAY BY Rosy Lalhriatpuii

Ngaia
Site Admin
Posts: 25813
Joined: April 30th, 2016, 4:07 pm

MEMORY OF THAT DAY BY Rosy Lalhriatpuii

Unread post by Ngaia » March 9th, 2021, 9:06 pm

bdtza9th.jpg

MEMORY OF THAT DAY
(COMPETITION 2021)

Khuangchawi thla (October) ani a, Mizoram chu boruak nawm hun lai tak ani anga, tuna ka awm na erawh hi chu hrehawm khawp in a uap churh thung.

Vawiin tak hi Chawlhni ani a, tlai lam dar li (4:00pm)a ri thuak tawh bawk. Ka sim card hman vang hian emaw ni Assam ramri kan thlen thlâk ṭang tawh in phone call hmang thei reng chung siin Roaming a in ti char char a, Internet signal ka nei thei miah lo.

Hla ka ngaithla deuh tlut tlut ringawt, ka playlist ah hian ka hla duh zual pariat bâk ka dah lo a,chu chu vawi ruk ngawt mai a zai chhuak tawh.

Ni tla tur sen rût mai chu meialh sat hmelzet ang mai hian a sen a,chu chuan Khawvela lui len lama pakua na ni pha leh a sei zawng pawha sawmpanga na ni pha ngat Brahmaputra lui cham dûl mai, mita hmuh thei chin zawng zawng chu a kâp sen siah a.

Mosia hunlaia tuipui sen te kha min hriatchhuah tir nia.

A mawi zia chu sawi chhuak miah lo ila, a fiah hian ka ring mah zâwk a. Mahse,ka sawi loh erawh hi chu a rem thei hian ka hre bawk silo a..a buaithlâk zia mai chu!

A mawi dân chu a lunglen thlâk êm êm a, ngaih em em tur neih loh pawn a lunglen thlâk ngawih ngawih tho ni hian ka hria. Internet khawih theih loh pawh chu a hrehawm hran em em leh si loh.

Lawnglian zeta mi ṭhenkhat chuang te chu ka thlir a, ka chuang châk ve lutuk. Mahse..kei mi dawihzep lutuk hian mahni chauh a va pan ka ngam leh pek lo.

Ka ṭhutna ṭiau pho aṭang chuan tho chhuakin a chhaka Lawng chawlh na bul lawka Park zau fahran lo,nawm hmel zet si lam chu ka pan chho ta daih a.

Park chhûng chu thing a siam pal hian mawi zetin an hung chhuak vek a, a lei chu phûl hring(natural grass) a in phah chhuak vek thung. Chutah Pangpar nalh leh changkang zet zet hi awmze nei zet hian an khawi far bawk.

Nîhliap hlai zet hnuaiah hian dawhkân pakhat leh mi pahnih ṭhutna tur (pakhat ve ve) thing a siam hi an hûng a, chutiang ngawt chu Park chhûng hual khat mawi tawk tur hian a khât tawk in sawm vel hi a in hûng.

Restaurant nuam zet te hi a ang mah zâwk hian ka hria.

Ṭhutna ruak pakhat ah chuan ka ṭhu thla a, a nuam tak zet,ka hawi kual a, chuta ka hmuh theih chin zawng zawng chu lungkham nei hmêl rêng ka hmu lo,an hlim êm êm vek tawp mai hian ka hria.

Ka ṭhutna hnung chiah ka han hawi let nâk chuan min ti phu zuk thei thil ka hmu. Vâi changkân hmel zet te pahnih chu tu mit mei mah veng hauhlo in an lo in kiss buan buan nia,ka nui tawp.

Ka phone ka la chhuak a,in selfie ang deuhin ka awm a,thlâ ka laksak vel. Ka ṭhiante hmuh atan,an lawm leh chung chung dawn lutuk a.

Thlâ ka lak mawlh mawlh laiin ka Phone screen a hming rawn lang ka hmuh chuan ka thinrim tih ka hrechhuak thar thut!
Helai hmun ah mal tâwkin darkar thum dâwn ka nghâk tawh a lawm maw le.

“In rei lutuk” ka lak rual rualin ka ti nghâl phat. A exam a tih ṭhat leh ṭhat loh zawt hmasa tur ka nia,mahse ka thinrim rih.

“Kan zo chiah a,Kan rawn thlâwk phei nghal alawm…Mate” a nui tih ka hre thei.

“Hmanhmawh ru…ka rilṭam tawh lutuk ania” ka ti leh a.

“Saidingpui….kan rawn la thleng dawn teuhlo, darkar hnih vel lo la rilṭam phawt mai teh” nui huk huk chunga rawn ti tu chu Lalhmingmawia nih pek chu.

“Zoremkim…tak tak ami a?” lungawi lo zet hian ka ti.

“A teuhlo…Kan rawn thleng nghal ani mai,Lalhmingmawia dawt sawi hrat zia chu I hriat ve reng kha…thil chu lo ei hmasa mai la, I pum kha ana leh vak ange”

Rilṭam lutuk hnua thil ka ei chuan nasa takin ka pum hi ana vak ṭhin miau a.

“Keimahin ka ei peih lo, hmanhmawh mai ru..e…exam chu in ti ṭha em?” ka ti leh hnuhnawh.

“Chutiang rawn sawi suh,i sawi duh bik tawp lo kha nangpawn.. Saii” Lalhmingmawia leh bawk.

Zorema leh Lalthlamuana chu an lo nui huk huk a,ka ve nui tawp. A sawi dik lutuk avang chuan.

“Hmanhmawh ru aw…ka dah nia” min rawn chhan let na pawh nghâk lo in ka dah daih.

Delhi University a luh theihna tur entrance pe turin Guwahati ah Kan Kal a, Aizawla exam center kan chan tawh loh vangin.

Nimin ah ka subject chu ka exam tawh a, ka mi nghah mêk te erawh hi chu Engineer zir zo hlim an nia, Gate exam an pe ve thung.

Keimah chauh a Hotel-a awm ka peih loh vangin hetah ka lo nghâk ang che u ka ti kha nia,an rei lutuk hi ka thinrim hlur mai.
He lai hmun ah vawikhat chu ka Kal zuai tawh a,mahse engmah tak tak ka hrechiang bawk si lo.

An rawn la thlen lawk ka rin loh vangin tho chhuakin Gate pawn lam ka pan a,ka nin tawh êm vang ani pakhat. Ṭam hnem tak tak atan Gate bul lawka kawng sira an zawrh Pani puri ka ei a,ka ten viau chung hian a tui hi ka ti ve thei bawk sia.

Thil ka ei mawlh mawlh lai takin Ka Ni,ka pa farnu neih chhun in min rawn call hlawl.

A sawi tur ka hre sa,a thil min chah ka lei nge lei lo tih bâk va ni suh.

“Ni…i rawn sawi tur ka hria,ka lei vek tawh buai suh” hello pawh tibuai peih lo hian ring deuh tak hian ka chhang a.

A tih thin dan pangaiin a rawn nui leh uar uar, “Awi..ka duat,i va han fel ṭhin tak em!lo haw vat rawh aw, ka ngai tawh lutuk che, eitur tuideuh ka siam dawn che nia” min tlawn zet hian a rawn ti lang lang. Ka lo ner nawng nawng.

“Rawn haw vat peih lo, awi en teh Ni…tunah hian Brahmaputra lui ah khan keimah in ka kal leh a maw, ka ning tawh râpthlak, Bernard-a te exam ka la nghâk char char”

“Ani maw…enge chutah daih daih i nghah kher a, Hotel-ah nghak mai ta che,mahni chauh te chuan I hlau lo em ni?”

“Ka huai alawm kei te chu…” in tih theih hmel zeta ka tih chuan a rawn chek tlak tlak.

“E i nin tawh viau te chuan Nehru Park ah te Khan han kal la, a nuam ve mai mai reuh lutuk asin”.

“Ani maw?”

“Yes…va tlawh rawh,mahse..fimkhur la aw,hei I Pu in min ko, ka dah phawt ang aw Bawihte…bye” ka chhan let hma hma in zu han dah daih a. Awi a duh duh hi a sawi a,a dah ve ziah mai.

Hetia nghah reng ai chuan,park ah chuan han kal mai mai ka duh zâwk. Bâkah Lalhmingmawia sawi ang khan darkar hnih vel an la thang tak tak dawn nih ka ring.

Auto lo tlan hmasa ber ka phar ding a,ka lut zui nghal. 'Nehru Park' tih ringawt hi ka sawi a, Driver chu hmel fel zet hi ani reuh a,a bu ve mai bawk a, a tlan chhuak zui nghâl.

Ka rin ai daih in a hla vak lo, chuti chung chuan Rs 150 min chawi tir nia, ava han to mai mai tak,ka lungawi lo nasa… tih theih lah ka nei dêr silo. Vâi ṭawng chu han thiam ila ka hau nek tur hi nia,ka thiam der mai si lo a.

Park chhûng lah chu thil danglam teh chiam a awm lo, Pu Nehru lim (statue) a ding zur a,park dang ang tho hian pangpar nalh deuh deuh a awm ve ani mai chuan fountain a awm ve bawk.

Ka kal kual vel laiin Zoremkima’n min lo call ve leh chiah, “In rawn thleng tawh mi?” hello tih hi ka peih lo hranpa ve tawp zel.

“Um..thleng chiah,khawi ah tak nge i awm a?” a rawn ti a.

“In rei ngar ngar bawk a, hetah Nehru park ah khan ka len san daih che u” ka tih chuan a rawn nui chhuak hawk!

“Hmela nui suh”
Ka tih chuan a nui ri chu a tawp chawt.

“Saidingpui, khatiang ṭawngkam kha hmang ziah suh ka tih che kha” thutak deuh hian a rawn ti chhuak.

“Enge Hmela?” ka la ti hrâm.

Ani chu hahthlak tih hmel zet hian a rawn thaw hawk. Ka lo khi sak.

“Ka rawn hruai dawn che nge,I rawn kal dawn?” a rawn ti hmuk.

Eng helh lo zet hian “Ka rawn kal mai ang,I chau lutuk palh ang,Lawng ah khan ka chuang châk ania aw” fiam thu deuh hian ka ti a.

“I chuang lo ang” chang zet hian a rawn ti nghut.

“Ngai lo, chuang ang…aw please Zo..hei I thinrim mi?”

“Rawn kal vat mai teh…auto I hmu tawh em?” ala chang tha bawng bawng viau tho.

“Ka zawng mêk a….i thinrim tak tak a mi?” in thlahrung aw deuh hian ka ti, ‘Hmela’ tih ṭawngkam hman hi a hua tih ka hre reng,ka lei chak zet hi ka veng hman ṭhin lo alawm.

“Ka thinrim lo,lawng ticket chu ka lo lei ang, a thlawh in rawn thlâwk ang che” a rawn ti bung leh nghut.

A thinrim lo anih chu!

“Yes…Vâi vawih ai rangin ka lo thlâwk ang” ka tih chuan a rawn nui chhuak hawk hawk! Thinrim te chu a han tum ve bawk a, ka ti hlim leh vat tho sia…Keipawh ka hlim,a thinrim hi chuan hrehawm ka ti ṭhin.

“Auto chu ka hmu chiah,Battery ka nei tlem lutuk lutuk a,ka dah dawn aw” ka ti a.
Driver hnenah ‘Bhramaputra River’ ka ti zeuh a. A tlan chhuak ve leh mai bawk a.

“ka ngai tawh lutuk che Zo-a, ti phawt la,i dah dawn nia” a rawn ti..ava han ho mai mai tak!

“a ho”

“Ho ka ti ve si lo ah…i sawi hma chuan kan dah lo ang” a rawn ti leh.

Hepa hi chuan ati leh duh tak tak ang,phone dah daih pawh ni ila,a rawn call leh char char duh tho ang.

“I ti dawn em? I battery a tlem kha”

“Ti dawn reng, ninawm…” ka ngawi deuh dat a chutah, “Ka ngai che,ka ngai tawh lutuk che Zo-a..Zoremkim, I lawm tawh em?” ner nawng hian ka ti.

“Lawm vak na tur a awm ami? min ngai hma thei lutuk,I chau vek ang..i chauh ka phal loh kha, I dah thei” a sawi zo chiah Amah zawkin a dah daih!

Awi…Hmelchhe pa hi.

Kan tlan dan chu ka kal lam ang kha a ni tawh pawn ka hrelo e ah, a mak tawp. Mahse, lui chu ka hmu ve ṭan e. Rei vak lo ah Driver chuan a ti ding ta hlawl mai. Rs 150 tho ka chawi…awi pawisa ka ui.

Ka chhuk thla a, Ka hma a Gate awm chu Main Gate (Gate Lian ber) kha ani miah lo. Gate tam tham zet hi a khât tawkin alo awm far mai. A hma khan hetiang hian Gate tam lutuk a awm tih pawh ka lo hre lo.

Ka hma zawna Gate ah chuan ka lut ta tawp a, nula leh tlangval a kawp te te in an lo ṭhu far mai.

Zorema ka call a, “Min ngai leh tawh tiraw?” uang zet hian min rawn chhang nghal.

“Ngai lo bawk…ka rawn thleng tawh,khawi ah nge in awm?”

“Lawng chawlhna bulah khan…lo kal vat la,min ngai tawh sia” a rawn ti uang leh zut.

“I ninawm a nih chu!…ka dah”.

Ka kal phei zel a,mahni chauh a kal chu a nuam em em lo khawp mai.A ṭhen an in kuah,a ṭhen an lo in fawp thul,an zak bawk silo. Kei mah hi ka zak,hreawm ka ti.

Hmanhmawh zet hian ka kal phei hlawk hlawk.

Mahse, Lawng chawlhna kha ka hmu thei tawh reng reng lo ta anih chu!

Zorema biak ka tum lai takin ka Nu in min rawn bia, ka len chhuah vel chungchang ka hrilh duh lo,min ngaihtuah leh dawn sia. Chaw ka ei tawh leh tawh lo vel min rawn zawt a ni ber, engtin nge ka chhan pawh ka hre mumal tawh lo.

Zorema biak ka tum leh lai takin amah zawkin min rawn call a, “Ka ngai che tih ka sawi ve kher I phut vang ani tiraw i rawn thlen har?” a rawn ti. Mi rilru buai lai lai a.

“Zo…ka awm na hi ka hrelo ania” mangang zet hian ka chhang a.

“Eng maw? Enge awmzia?” a ngaihna a hriat loh hmel tak tak.

“Ka hrelo…lawng chawlhna kha ka rawn hmu zo tawh lo” la kal phei char char chung hian ka ti,ka hma zawn kawng chu phûl hring vek in phah hian ala awm phei zur mai.

“Awle..ka rawn hruai ang che khawiah tak nge I awm?”

“A chhûngah chuan ka rawn lut tawh,ka awmna lai tak hi ka hre thiam lo”

“I location kha on rawh” a rawn ti.

“internet signal ka nei thei lo ka tih kha” ka tum loh deuh in ka vin vak.

A chek tlak a…chutah, “ Ka phone keng rawh ka ti mawlh mawlh che ni lawm ni?” min rawn zilh titih.

“Min rawn hruai mai rawh”

“Ka zawng mêk tawh che” a rawn tih chuan ka thla a muang deuh.

“Mate…Thlamuana leh Hmingmawia ka call lawk ang aw sawtah an kal lawk a” a rawn ti a. Ka lo aw ve mai.

Zan dar sarih a ri thuak tawh a,khua a rawn thim ṭan tawh si,ka phone battery lah chu sawm hnih pathum chiah a ni tawh.
Chuta kârah a ngai te bawkin roaming ala in ti char char bawka, internet ka hmang thei lo a,ka awmna hmun (location) tak hi ka hre thei bawk si lo. Ka phone hi ka vawm pawp chak…ka ngam awzawng bawk silo.

Zoremkima’n a phone keng tura min tih khan ka lo la duh lo vel a,ka va inchhir mai mai tak em!

Ka rilru chu namên lo hian a rawn hah ṭan. Mahse,ka in ti huai lui tlat a,hetiang mai mai a ka hlauh chuan khawvelah hlauh tur a tam dawn emai ka ti ve tlat.
Hetiang a dina lo nghah tawp ka thei lo,Kum khua pawn min rawn Zawng hmulo Mai thei a sin.

Main Gate kha ka zawn hmuh angai, Gate lo awm leh hmasa berah chuan ka chhuak tawp a.

Kawngpui ka pawh nghal, chu kawngpui zawh chuan Ka Kal phei tawp, Park a ka ṭhutna emaw Lawng emaw tal kha hmu ila chu a zia tur, mahse ka hmu thei tawh lo reng reng.

Ka kalna zawn veilam sir zelah chuan Brahmaputra lui chu a la luang ri hum hum a,a in hungna railing ah chuan vai sual hmel deuh deuh an ṭhu far hlawm bawk.
Zêp loah chuan ka hlau…ka hlau takzet.

Hmeichhia tun ang huna mahni chauh a Kal ta ngang chu min rawn chhaih deuh ṭhin a, mahse engah mah ngai lo hian ka Kal phei char char. Min rawn man thut anga ka bag hi min rawn chhuhsak thut mai ang tih te ka ngaihtuah thul.

Main Gate zawng si kha, eng gate luh theihna mah ka hmu tawh reng reng .

Kha rickshaw driver vang vek kha lawm, tinge Main Gate ah min chhuk tir loh? ka ngaihtuah na chuan ka hau vak vak a, awmzia a nei thui lo nasa si.

Zorema’n min lo call leh chiah rang zet hian ka lo la “Mate…I awm na lai chu I sawi thei tawh em?” a rawn ti a.

“Kawngpuiah ka chhuak a” ka ti tawp.

“Awle..a tha e…I bul vel kha han hawi chhuak la engemaw dawr lian deuh te i hmu em? a nih loh pawn enge maw in ziak tal?”

Ka hawi kual ruai a, engmah chutiang ka hmu lo “Aih..hmulo..ih….dawr lian pakhat mah a awmlo,bâkah Engtin nge Assamese ka chhiar thiam I rin a, English leh Hindi a inziak eng mah a awm lo alawm” ka sawi tawp lamah chuan ka vin deuh hlar tawh.

Hahthlâk tih hmel zet hian a rawn thaw deuh hawk!

“Awle ka hria e..ka hria e”

“Zo…min lo hruai rawh…ka hlau ania” ka ti ṭiau mai.

“Hlau suh…ka rawn zawng hmu vat dawn che, engtin mah I awm dawn lo..i hria tiraw?”

“aw..mahse, Vâi ho hian min ru bo in min pâwng….”

“SAIDINGPUI…” a rawn ti vin tuarh!
Ka tum lo deuh in ka ngîk chhuak..ka rilru no lai taka min vîn vak kher chu ka ngei lutuk.

“Mate….ka…”

‘Khawi keima’n ka lo bia ang,vîn vak mah ta che'

‘Dikchiah..Bernard, thinchhe viau zel suh, a hlau anih kha' tih vel a rawn ri nawk nawk a.

“Hei…Sai, tu emaw I bul velah Khan rintlâk deuh tur i hmu em,ka lo bia anga” Thlamuana chuan nêm deuh hian a rawn ti a.

In sut deuh hlawp hlawp chung hian “Aih…ka duhlo,ka phone hi tlanbo pui daih ta se ka chhe vek ani mai” ka ti leh ṭiau, phai vela Vâi rukru ho in phone an rûk sak dan ka hre ve nel nual alawm.

In sum deuh tak hian a rawn nui hak.

“I nui a law?”

“A teuhlo,nuih hun pawh nih loh hi” nuih in sum tih hriat zet hian a rawn ti.

An ni ho hian min thlamuan hlawl lo. Lalthlamuana ngat phei chu mahni hming pu zo lo leh lutuk!!

“Lalthlamuan i hming thlâk rawh” tih leh na zeta phone hmeh tawp hmak ka rual.

Ka in ti paukhauh lui a,ka kalphei zel. Nasa takin ka ṭawngṭai thung. Tun ang rênga ka nuna ka ṭawngṭai nasat ka la hre ngai lo,chham tur ber pawh ka hrelo. ‘Lalpa..min pui rawh' tih ringawt ka chham tawp nimai in ka hria.

Ka phone chu a rawn vibrate char char a mahse, ka chhang duh tawh lo,ka hma zawn kawng phei duai tawp chin nei lo ang mai zawh chuan ka Kal zel ringawt. Ka ti thei em em ang,ka bo lo ang.

Ka ke te hi ana ut ut tawh. A Hrehawm ber chu ka rilṭam lutuk tawh chu,eitur zawrhna ka hmu tawh eih si lo.

Ka beisei ber chu Bus emaw auto rickshaw rawn tlan se tih chiah hi.Chu chu hmu ngat ila chu Kan thlen na Hotel-ah haw vang vang ka duh.

Mahse…chu chu a theih loh hmel khawp mai,a chhan chu pribate car bâk rawn tlân an awm reng reng lo. Nga tinge Bus service reng reng te kha ka hmuh tawh miah loh mai le?

Kutdawh ka kal pelh mai vang te Khan Pathian hian min hrem ani chiang mai,chuvang aniang auto emaw taxi pawh min hmuh tir duh loh tih te ka ngaihtuah.

Mi veivâk hmuh tur an tlem êm êm maia,hmeichhia ngat phei chu an awm lo hrim hrim. Ka bag chu nghet leh zualin ka kuah a,ka kal phei zel a,kawngpui chuan tâwp chin anei lo emaw ka ti hial tawh.

Thing kung buk leh sang zet zet thli thaw in a chhem rik dual dual chuan min ti hlauthawng zual a, street light êng a awm ve zeuh zeuh a,chu chuan a ti râp awm zual.

Ka ṭawngtai nasa lutuk ringawt.
Ka mangân viau tawh hnuah, a tawp a tawpah chuan ka beidawn loh na rah ka ti mai,ka beisei chhân na ka va hmu ta nih chu!

In awih em? Keipawn ka awih lo ṭep zawk a,mahse ka thil hmuh chu a tak ngei ani si. Ih e, ka thil hmuh chu maw…

Ka hma lawka kawngsir thlang lam deuh ah hian Auto rickshaw hlui lam tawh hi a lo ding vang mai nia mawle.

Beidawng mai lo a, thinlung leh tihtak zeta Pathian hnen a kan duh kan thlen tawh chin ah hi chuan, kan duh ang diak diak thil hi min pe vat lo mahse, kan duhthusam zâwk min pek hi kan Pa Pathian hian a hnial ngai lo ang tih hi ka chiang.

Ka Pu Bible châng duh êm êm mai ka thinlung ah alo lang, “Beiseina tih khawtlai hian thinlung a tina a,duhthusam lo thleng erawh chu nunna thing ani” (Thufingte 13:12) tih thu kha.

‘Nunna Thing’ leh Auto rickshaw han khâikhin vel chu a âwm lo viau maithei, mahse…tunah tak hi chuan a in tluk loh na ka hre bik lo.

Auto lam pana ka kal chhung zawng chuan 'Lalpa ka lawm e..ka lawm e' ka ti phei char char.

Hetiang tluka lawmna hi ka nei leh tawh lo hial maithei ani,ka ti tak tak.

Mahse…mahse tih ngai leh ṭhin hi ka ning tawh ngawt mai. Auto chhûng ka va en chuan tûmah an lo awm lo.

A bul lawkah chuan vâi Tlangval panga vel hi sikret zu hian an lo ṭhu ṭham hlawm a, phone ah game an khel in ka hria.
Hmel bum ro hmel tak an pu hran lo a,bâkah tun ang huna hmeichhia keimah chauh a min hmu chu mâk ti hmel pawh hian an awm lo a,ka lawm zia chu.

Ka huaisen na Zawng Zawng ka sawm khawm a,ka lam hnai ber aṭhu chu ka va pan tawp, tun ah tak hi chuan ka hlauh na te kha tlêmin a zia ve deuh tawh hrim hrim bawk a.

Chupa chuan T-Shirt vâr leh jeans kekawr bul paw dal lam mah hi a ha a,nike sneaker a bun bawk,a inchei dan atang chuan mi pangai tak ani ang tih a hriat a. Chuvang nia ka pan ngam tawp.

“Min lo hrethiam lawk….hei hi ita ani em?” tiin auto chu ka kâwk ngawt a.

Min rawn en haw a, english a thiam lo tih ka hre nghal,mahse ka sawi awmzia chu a hre tho nih hmel.Ka dinna ep (opposite) chu zai zir hian min kawh hmuh ringawt a.

A kawhna zawn ka hawi phei chuan, In hlui chhe lam tawh deuh a,dawr kaw te reuh tê a,Vâi nupakhat thauzet mai Bindi (chalbel) sen lar leh lian zet in bel lo ṭhu vâng mai hi ka han hmu.

Ka Kal ngam teuh lo mai,ngawi rengin ka en reng ringawt, ka Kal tâk mai loh vang chuan a niang Assamese nge Hindi ṭawng hian chûpa chuan min rawn be leh a.
Ka lo hawi â hû mai.

“Han Kal rawh” ati nimai hian ka hria a, mahse…ka Kal ngam lo alawm. Milim ang mai hian ka la ding Khawng reng tawp.
A ṭhiante chu engemaw a hrilh zeuh a, chutah lo Kal rawh ti ni âwm tak hian min rawn hui a.

Dawr te lam pana a Kal chu ka zui ve tawp. Game kha a khel ve lo hrim hrim nge,a khel laklawh lai thawhsan in min puih pawh ka hrelo. Ka tan Pathian in a rawn tirh anih hi tih chiah ni ka ngaihtuah,mahni hma sial tak hi chu ka ni chiang khawp.

Chuta lo ṭhu nu chu abia a,keimah min rawn en zeuh zeuh pah bawk, abulah ka lo ding zum zat ringawt a.

Chu nu chuan min rawn melh Kêl kâwl a,za vak lo hian ka lo ṭhensak,min nuih let ve eih lo. Ka lo ṭhen kher kher chu ka in chhir chiang ngei mai.

A nêl awm loh zia mai chu. Ka duh vâng rêng pawh nilo in ka hlauhna kha a rawn chhuak leh ṭan deuh ti tih tawh leh ta nghal.

An dawr kuhva zawrhna niawm lek tur dawr chu ka enkual a,Current a lut lo hrim hrim nge,a êng lo zawk pawh ka hrelo, mawmbati pakhat chiah hi an chhi a,engmah ka hmu thei lem lo. Vâi rim ka ti mai, Zarda rim leh masala rim a nam chum chum.

Ka phone ka kuta ka hum lai chu ala vibrate char char a,mahse ka la la duhlo.

Bernard Zoremkima khan min rawn vin leh vak palh ang.

Vâi nu chuan min rawn bia a,a ṭawng ka hrethiam leh ta pek lo.

“Sorry…I can’t speak Assamese” (Tihpalh…Assamese ṭawng ka thiam lo a) ka'n ti ve ngawt a.

Assamese in nge Hindi in min biak pawh ka hrethiam teuh lo.

Min kalpui tupa khan “nangmah chauh in em ni i nih atia nih chu?”
English nalh zet hian a rawn ti chhuak.

Ehe!…a thiam reng sia. Assamese chu ani lo chiang ang. Âng deuh phuang hian ka lo bu ringawt a.

A kiai deuh suk!Mawl min ti âwm. A ho emai, mak ka tih chu a âwm lo hran lo chiang alawm, enga tinge ka biak hmasak ber khan min chhân loh vei ni?.

Chu nu a hrilh leh a,vâinu chuan a lu a thing nang nang mai. Vâi in an lu an thin nar nar hi chuan a ṭha e an tih zawk na a ni tih te chu ka hre ve a lawm. Chutah vainu chuan tu emaw hi a ko vak a.Tih tur hre lo zet hian an awm dan chu ka lo en tawp ringawt.

Rei vak lo hnu ah..Vâi Cher deuh kuam mai,tawnzau dum ha, puithiam ang maia hmuihmul a thin zawn vel thleng khawpa sei leh balh hmel zet nei hi puan zar phen ni mai hian ka hria chuta ṭang chuan a rawn chhuak ta mai.

Ka tîm sawk thei, an in biak dan chu a pasal anih hmel khawp mai.

Chu pa chuan min rawn en a,a mitmeng thîp zet chuan min ti khur ru der der nghal. Ṭawng rang zet hian min rawn bia a,ka lo hawi â leh hu tawh.

“Khawiah nge Kal I duh tih a zawt che” min kalpui tupa bawk Khan a rawn ti a.

“Aww ahh…Mizoram House” rangmang khêng in ka ti vat. Ka ngaihtuah chhuah hmasak ber ani tlat.

An pathum chuan an nui dar dar a. Ka sawi rang lutuk kha niang keipawh ka nui ve tawp. An nui hmêl chuan an hmel nelawm loh zet kha a ti zia hian ka hria a, ka in thlahdul ve thei deuh tawh.Ṭawng rang zet zet hian an in be leh a,min kalpui tupa nen khan.

“Rs 250 lo chuan a duhlo a..apawi iti em?” tiin min rawn en a.
“aih tilo, tilo...apawi lo” ka lo ti vat.

“I tak tak em?a to lo maw?” a rawn ti leh a.

Ka lu ka lo thing a, “Aih…a pawilo,a pawilo” ka tih chuan a bu zui ve mai bawk a.
Eng tianga to pawh nise to ka ti tawh lo, helai hmun hrehawm lutuk atang hian chhuah vat vat ka duh tawh.

Phai a ka awm ve châkna te kha a bo hneh tawh nasa tun ah tak hi chuan.
Pawisa ka neih phawt chuan khawi hmunah pawh ka bo ngailo ang te kha ka lo ti vei ṭhin a. Mahse, tun ang din hmun ah hi chuan pawisa hian awmzia teh vak alo nei tlêm hle. Lehlamah chuan India rama Hindi thiam apawimawh zia ka hriat phah ve tal alawm le. Northeast ah ringawt pawh ka buai let der chu ni sia.

Auto lam pan chuan Kan phei ho a, “Ka lawm lutuk aw…Bhaia,ka lawm lutuk” ka ti a.

‘ Bhaia’ tih chu a lawm kher lo thei a sin le,ka va han â tak. Kan kawmchhak a dawr lian zet nei, vâi pa hi tu mai pawh hian Bhaia kan ti vek ṭhin a,chuvang vek chu lawm,ninawm e.…ka ko laklawh tawh bawk si.

A ni chu a lu thing nang nang hian a nui a “Its okay” hi a ti ringawt a. Ka koh dan chu engah vak angai lo tih a ti lang chuan min ti hahdam huai.

Ka tan chuan Ani hi chu Vantirhkoh ani rinngawt,ka theihnghilh leh tawh ngai lo ang..eng tikah mah.

A ṭhianten an rawn koh vang chuan a ṭhiante lam hawiin enge maw sawi hian a au zeuh a, chutah ka lam hawi in chiang zeta min rawn en nawn leh ngat hian a nui suk!

Chutah chuan maw…chiang em em mai hian a biangsum a lang, awiii John Abraham-a a an zia mai chu!

Lai zet hian ka lo nuih ve var var ringawt. Mipa, a hming pawh ka hriat loh, chuta kâra hnamdang lehnghal lai zeta ka nuih hi ka mipa hriat tawh zawnga vâi ngaithei lo ber mai Zoremkim a’n lo hria in emaw min hmu ta ni ngat se chu…ka chan chuan maiân chan pawh a tluk in ka ringlo.

Mahse..a hre dawn chuang lo a,bâkah min hmu dawn bawk hek lo a,ka duhtâwkin ka nuih thei chiang emai.

Chutah nui mawia chuan a ban dinglam a rawn phar chho zeuh a,a ṭhiante lam pan chuan a Kal ta nghal a,lawmthu pawh ka duh angin ka sawi ṭha hman lo,bâkah han sawi dan teh vak pawh ka hre chuanglo a.
Mahse,ka hmelah ka lawmzia chu chiang takin a hre ve tho in ka ring. A pathian emaw ka Pathian pawn malsawm ngawih ngawih se ka ti.

Ehe! A hming emaw a phone number tal pawh ka dillo tih ka hrechhuak chiah. Mahse,a kal tawh sia…ka va pan buai duh tawh lo mai,bâkah amah ka beisei emaw te a ti palh ang tih te ka ngaihtuah a,ka dil ta lo chu a ṭha zawk ni te hian ka hre leh hnuhnawh a.

Auto chhe zetah chuan ka lut a,ka hlauhna kha a rawn let leh tawh…hrehawm e. Min tlanbo pui daih mai anga tih vel ka rilru ah a rawn lut leh zut zut tawh. Ka ngaihtuah na chak zet,lâk tlâk em em loh takzet hi chuh!

Auto chu ka enkual a,hlui ve tawh tak chu ni. Driver seat bul ah chuan Ganesha: Lord of the People (Hindu te pathian, a taksa chu mihring pian ang, sâi hnâr sei zet nei) an tih hi a in târ vah mai.

Ka râp zia chu…a hmain ka râp ngai pawh ka hrelo mahse, engkim hian min ti hlau vek tawh.

Chutah Driver chu muangchâng hian a rawn lut a,a auto chu a han ti nung a,a rawn ri phurh a,a tawp leh daih,enge maw sawi hian a phun nuah nuah a.

Ka thin chu alo phu dup dup mai,nung thei lo ta se? Engtin nge ka tih tâk ang? Ka kut suihzawm in a rûkin ka tawngtai leh ngat ngat.

Chu tah….tih nun tum hian chabi chu a herh leh a,a rawn ri vung vung a,a nung ve ta hrâm. Ka thaw huai mai.

A tlan chhuak ta mai dawn emaw ka ti a,mahse ani lo…agarbati a hal ta phawt anih chu!a agarbati hal chu auto chhungah chuan a nam lo ang tih a hlau ni mai awm hian a khu chu a kutin a ti darh vel chiam a,enge maw hi a chham pual nuah nuah zui. In thâwi nan min hmang dawn em ni tih vel ka ngaihtuah chhuak leh zut zut tawh. Ka hlau lutuk chu ka in hum ruh ngawt ngawt mai.

A thil tih chu ka ngaihtuah ang hi ani lo, a pathian hnenah a lirthei neihchhun (?) chu venhim sak turin a dil a ni zâwk.

A duh ang thlap in a hlan zo tawh niang chu,Agarbati chu a ti hlum a. Chutah a sam sei zet chu Coconut oil hi a chulh a,mawm zet hian.

A tawp a tawp ah tlân chhuah a tum ve ta hrâm e.Ka phone a rawn vibrate leh chiah a,ka phu zawk, ngaihtuah nawn eih lo hian ka la tawp.

“Mate…I ṭha em?” hlauthawng aw zet a rawn tih chuan ka ṭah chhuak leh ngawt tawh.

“Umm…” ka ṭapchhuak anih chuan he vâipa hian min zuam palh ang.

“Phone I la thei lo a,ka hlauthawng”

“Battery thi ṭep a” in sum deuh tak hian ka ti a,a thi ṭep tak tak rêng bawka.

“anih chu…ka rawn zawng char char che nia aw..” a rawn ti leh a.

“Auto ah ka chuang tawh…” ka ti sep.

“Maw?...auto I hmu tawh a maw?”

“aw…House kawtah min lo nghak rawh” aw lawi deuh rat hian ka ti a.

‘Muan..Auto hmu tawh nih chu…driver kha House lamah let tir rawh’

“Hello Mate…Kan in hmu vat dawn nia aw”

“Dah suh…” ka au vak. Driver chuan side mirror a ṭangin min rawn melh zawk mai.

“Ka dah dawn hlei nêm...I la hlau ami?” min ngaihtuah aw deuh hian a rawn ti.

“Ka rawn chuan na pa hi ka hlau”

“Eng tin nge a tih che?” a rawn ti vawt raih mai. Hla deuh ṭang pawh nise a aw chang zeta min ngaihtuah zia lang chuan min ti thlamuang,him ta riau hian ka in hria.

“Tin mah…khabe hmul sei deuh anei a,a râpawm lutuk, min tlanbo pui daih ta se”
Ka ti leh ṭiau, hetiang hian engtin nge ka dawih êm êm theih le? Midang tana hnawksak nih hi khawi hmun ah pawh ka duh ngai miah lo a,mahse engkim mai hian min ti hlau sia,a hrehawm ka ti lutuk.

“Chutiang ngaihtuah tawh la..engtin mah i awm ka phal lo ang,i hriat kha…driver chu ka lo be dawn mi?”

“Aih…ka duhlo,ngailo… House ah chuan in lêt em?”

“Aw..chak deuhin kan tlân,I lo thlen chuan Kan lo hmuak hman daih tawh ang che,I duh duh Kan ei dawn nia…enge I ei châk?” a rawn tih zawm zata. Ka rilru lâkpen a duh tih ka hria.

“Chaw” ngaihtuah nawn eih lo hian ka lo ti hmuk.

A nuih ka rin nen. Anui miah lo..

“awle…vawksa mi Kan hmeh ang”?

“umm”

“anih eng salad nge niang?”

“Cream salad” ka lo ti leh vat,ka ngaihtuah Zawng pawn ka chil a put zawih zawih tawh.

“Aw…chu..a..nnnn”

“Hello…hello” ka phone ka en a,a lo thim hmuk. Ka battery a thi der!

Kawng chêp leh mak deuh deuh ah Kan tlan zel a,ka la khur der der mai. Driver nen chuan vawikhat pawh Kan ṭawng lo,min bia ang tih ka hlau mah zâwk. A lu chung zawna darthlalang aṭang chuan min rawn melh zeuh zeuh ṭhin a,ka in ngaihbel zawk nge pawh ka hre lo.

Guwahati boruak lum zet chu lum pawh ka ti lo,ka in kuah hlun a,ka han dâk chhuak a, fancy bazar tih intarna vel ka hmu ta.
Heti hi chuan ka hlauh thawn dan a zia deuh tawh,kawng ka hreve tawh alawm. Kan tlan zel a..chutah GS (Guwahati to Shillong) road lamah Kan chhuak ta hlawl mai.

Heta ṭang hi chuan ka him tawh tih ka hria, Mizo an tam tawh miau a,minute 10 vel Kan tlân leh chuan House Kan thleng ani nghal tawh mai.

Kan tlân leh deuh vang vang a chutah ka han hawi chhuak leh a,kan hma lawka Mizoram House kawtah chuan an lo ding ṭhap tih ka va hmuh chuan ka ṭah a rawn chhuak leh,ka ṭahbelh zia hi,ka in ngei zâwk. Mahse, ka duh angin ka awm thei chuang lo.

Zoremkima chu Kan rawn tlanna lam rawn en hian a vei tawn deuh sek tih pawh ka va hmu.

Chu tah an lo din ṭhap na bulah chuan kan auto chu a ding ta hlawl a.

Ka chhuk thei lawk lo. Ka tha te hi an khur nasa lutuk a,ka ṭamchhâwl lek lek bawk si, ka chauh zia ka in hrechhuak ani ber.
Zoremkima ka hmuh chiah chuan ka in sum thei tawh lo, ka ṭap deuh pûr a.

“Mate....” ka ṭah vang chuan aniang hlauhthawn hmel zet hian auto kawngkhâr chu a rawn hawng deuh râwk râwk a,driver chuan hlauthawng fê hian min rawn en a rang zet zet hian a rawn ṭawng.

‘engtin mah ka ti lo ania' ati nimai hian ka hria.

A aia ring hian ka ṭap chhuak a,ka zak peih bawk lo.

“Lo chhuk rawh le…a ṭha vek tawh lawm” tih pah hian ka kutah nghet zet hian a rawn chelh a,min kai chhuak a,lei ka rah rual rual chuan ka kuah thlawp.

Chhuak mangkhêng hian ka ṭap a,ṭhenkhat chuan ka kal (kidney) min rûk sak ta emaw an tih tur khawpin nia ka ṭah ka rin.

Ka samah rawn chûl hian min rawn kuah leh a,nghet zet hian.

“Enga tinge min rawn zawn hmuh loh…misualpa” ṭap pûr chungin a hnungah ka chûm vak vak.

“Ka tihpalh…ka tihpalh” ti mawlh mawlh pahin aia nghet in min rawn kuah. Ka thaw ṭha thei lo ṭep,mahse chu chu keipawn ka ngai pawimawh bik lo,tunah hi chuan a kuah hi ka mamawh lutuk tlat! Ka him tawh tih ka chian nan.

“Saii…police station ah mi bo angin Kan report hman che nia aw”
Lalhmingmawia'n nui huk huk chung hian min rawn fiam a.

Ṭap pur chunga Zorema dar aṭanga ka hawi chhuah deuh chuan Thlamuana chuan min nuihzat hmel zet hian “Guwahati a mahni thu a bo ka hriat awmchhun i ni” hmui phun hian a rawn ti nih chu!

Ka ngei lutuk…Ka ṭah lai reng chuan ka lei ka chhuah khum hrâm. A ni lah pek chu za zet hian a lo nui hawk hawk..chhe ê.

Awii…Driver pawisa ka la pe lo tih ka hrechhuak.

Zorema ka kuahna phelh ka tuma, min la kuah nghet lutuk.In sût hlawp hlawp chung hian a beng bul sêtah “Driver pawisa ka la pe lo nia” ka ti sep a.

Ka lu ah min rawn kuah nghet sauh pah hian “Muan…ka wallet hi rawn la la,Driver hi lo pe lawk mai” ati sup a.

“Ka pe daih tawh…” rang zet hian alo ti then a.

“Vâi film in chang emaw a tia Driver pawh ala awm ve reng alawm” nui huk huk chung hian a rawn ti leh a.

Zorema chu a rawn nui nghâwr dat mai.

“Nui suh” tih leh a hnunga chum âwk ka rual a. A nui nasa zual.

“I zia awm tawh tiraw ?” A aw ah chuan min duat lutuk aw ri hi a ri tel . A duh na ah hi chuan min duat ve thei chiang alawm,a duat nihhi chu engtik lai pawn ka thlahlel,a nuam êm êm tlat alawm.

Min duat loh hi ka han hlau thei khawp ah, abulah hi chuan ka pangchang lui vel ṭhin, a mah tak hian a nia min han duat vel hi chu nuam ti ni. Chu chu ka hre chiang ve lutuk tlat! Mahse…ka hre lo der tlat ṭhin thung,a nuam ve a lawm.

“ymmm…” pangchang aw zeta ka tih chuan min thlah deuh a.

Min thlah deuh chiah tih chuan kut beng ri a rawn ri dar dar,ka hawi chhuah nâk chuan Lalthlamuana leh Lalhmingmawia chu thuhran,House bul vela awm auto leh taxi driver awm tawh phawt chuan an kut bengin min lo en ṭhap anih chu!

Ka zak lutuk chu ka sa chhuak vek. Khu chhuah na chu nei ila ka khu chhuak pawp pawp in nia ka rin.

Zoremkima chu zak ang pawn a awm ve lo,ka darah min rawn kuah leh vata,a amah si chêt hian min kuah bet nghal zat a.

“Lut ang u” a ti zui sup.

A TAWP TA….

I LO CHHIAR AVANGIN KA LAWM LUTUK TLAT!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)