" Enge thil awm zia kha sawi fiah rawh? " Inchhung kan luh rual in ka pa chuan a ti chhuak hrawk a. Dawrah khan ka piin Sawmin Zorina fa a pai thu a sawi a, a bak sawi belh lo mahse ka nu leh pa chu an thinrim khawp mai.
" Pa... Thu chiang engmah a la hriat loh, naute pawh a fa a ni tih a chiang lo a.... " Ka tih rual chuan " Kha nula khan a puh satliah mai ni lo in a luh khung hial a ni lawm ni? Chubak a chiang enge i la beisei a? " A rawn ti chhuak hrawk a. A tawng zawng a a tang lutuk leh dam tha bawk si lo nen a awm chu dawm in a khuh zui bawrh bawrh a. Ka nu chuan a hnungzang a chul sak nghal vat.
" Mambawih... I pa sawi chu a dik a nia. A hmeichhia zawk in a luhkhung hmak a, Zorina pawn pawm lo hmel a put loh kha. " Ka nu chuan a ti ve bawk a. Thuthleng pakhat a thu in tah in sum zet chuan ka nu leh pa chu ka melh a. Ka mal chung a ka kut chu ka hum nghet viau bawk.
" Mahse an inah sawn Zorina awm tir a ni lo a sin. " Ka ti zawi sep. Ka tlawm vawng vawng mai hian ka hria.
" I mit kha meng la fim tak in thil ngaihtuah rawh! Tunah hian hmeichhe dangin a fa paiin an luh khung hial a. Chutiang mipa la zui kual vel chu ka fanu tih a tan ka duh reng reng lo. " Ka pa chuan a rawn ti khur hluk a. Kawngka lamah thawm a awm vang chuan ka hawi vat a, Zorinpuia chu a rawn lang ve hlawl mai.
" Enge hetah i la rawn ti cheu a? " Ka pa chuan a lo ti nghal hrawk. Zorina chu thaw hawk in a rawn pen lut a. Ka pa chak vak tawh lo nen thei leh thei lo chuan a ding chhuak ve bawk.
" He inah hian rawn kal tawh suh! I pa ka zah vangin engmah ka sawi lo a mahse a ni em em tawh lo. Hmeichhe dang i fa pai mektu in inchhungah inkawl laiin ka fanu bulah engmah thleng lo ang maiin i rawn awm leh a. " Ka pa chuan a ti chang hrawk a. Zorinpuia pawh ngawi rengin a ding kun ngur mai.
" Chhuak rawh ka tih chu! I rawn kal leh a nih chuan i pa te nen a kan in zawmna hi ka theihnghilh ang! " Tiin ka pa chuan kawngka lam pan chuan a pawt let dawr dawr a. Ka nu nen chuan dan kan lo tum a mahse kan thei lo lam mah a ni.
" Chhuah tum hlek suh! A ni kha hmu tawh ngai suh ang che. " Kawngka khar in ka pa chuan a ti leh hluk a. Ka chhuak zui ngam bik lo. Ka pa thinrimna hi a awm miau a ,hnial let tur pawn sawi tur ngang ka hre lo. Ka nu in ka pa chu kaiin thutna lamah a kal pui a kei erawh chhuak ngam si lo in kawngka in khar chu ka melh tlawk tlawk ringawt.
Muangchangin ka pa te thutna lam chu muangchangin ka pan a, ka ngaihtuahna hi a chawl duk a. Enge tih ber tur pawh ka hre lo. Ka nu leh pa in min zilh mawlh mawlh lai pawh chuan ka beng leh lamah a lut a leh lamah a chhuak leh nghal zel ni maiin ka hria.
*
*
Thla a ral a ni a liam ve zel a. Zorina nen pawh kan in hmu ngai mang lo ti i la ka sawi sual lo ang. Ka chhungte chuan a huat l in an haw hlur a, mama pawh in tun tum chu a haw khawp mai.
Phone in kan in be zeuh zeuh a, hna ka nei lo a chhuah na tur ka neih loh miau avangin khawiah mah ka chhuak ngai lo . Kan chhuah pawn ka pa in entir puiin kan kal leh tawp a. In lamah ka nu leh pa nen kan awm tawp a ni ber a. Tei hi a rawn leng leh zeuh thin Brandon school atanga hruai tur a a kal hian haw lam emaw kal lamah hian rawn pen kawi a ching a. Tei te in lamah pawh ka pa in len a rem ti vak lo a, a chhan pawh Andrew hi Zorina putea a nia, an chhungkua nen a in hniam hnaih hrim hrim an duh lo ni ber in a lang.
Papuia pawh rawn leng in pawi a tih zia te a rawn sawi a. Ka pa te erawh in tawngkam an nei lem lo na a, an thinrim tih chu mi â ber tan pawh a hriat vek thung. Lo tih lan chiam kha a dik ber lo ve bawk nen, inngaizawng satliah mai kan la ni a eng pawh thleng thei a ni miau a. Mahse ka chhungte erawh chuan Zorina chu thlah tur in min ti reng tho a. Kan chhungkaw hnih chu kan in then phawk a ni ber a, kei tak pawh in beisei ka nei tawh lem lo hial.
Vawin pawh ka pa in entir pui tur in kan chhuak leh a. Ka nu nen kan kal pui tlangpui a, Mama erawh a hna lamah a kal regu viau thung. Kum thar lamah ka pa a pension tawh bawk nen kan khua lamah kan awm tam thei ta bawk lo nen,kan dawr leh ram khi hralh in he lamah dawr lian ve pangai tak siam ve a sawi a, ka nu leh pa pawn an hnial lem lo.
He lam kan rilru in a awn bakah khua a ka nu leh pa chauh awm tir reng kha kan ngaihtuah a ni ber a. Inpui erawh chu ka pa in ti khian awm rawh se a ti thung a chu pawh chu kan hnial lem lo.
" Ehee.... Muanpuia te chu... ” ka nu chuan a ti hliai a, damdawiin kan lut tur chu kawtah kan in tawk a. Mahse a mah chauh ni lo in Apuii pawh a lo tel ve bawk a, a fanu kha a kai bawk a.
" Enge in tih dawn a hetah te kan in hmuh hlawl? " Muanpuia pawh chuan a ti ve mai a. Hman a thinrim tak a min haw san a chin kha kan in hmu leh ta miah lo a. Apuii ka melh rual chuan min lo nui sak a. A ni phei chu hman a reunion kan neih ni kha ka hmuh hnu hnu hnunna ber a ni hial in ka hre tawh.
" Hei... Mambawihi pa hi kan zui leh a. Nang pawh chu damdawiin lamah enge i tih a? " Ka nu chuan a ti leh vat a.
" Kei ni pawh kan in entir a, kan haw dawn chiah. " A lo ti ve sup.
" I lo leng duh tawh lo lutuk a, kan lakah i lungawi lo zawk nge? " Ka pa chuan a lo ti ve bawk a, awm nuam lo zet chuan ka lo ding reng ringawt.
" Hna lamah ka buai deuh a. " Muanpuia chuan a ti mai a. In entir tur kan nih vangin thil dang erawh kan sawi lem lo. Ka nu ten damdawiin lam kan pan hnu in Apuite nufa kha min zawt a, thian leh in hmelhtiat tha tak an ni thu chauh in ka chhang a. Muanpuia hi ka fak thlawt, Apuiin kha ti khawp khan a bum in kan in kar a chhiat phah vek a, tunah Apuii dinhmun hria in huat chu sawi lo an tan a in hawng em em a. Ohh... Ka tan pawh a in hawng reng a kei man ka zir lo mai zawk a nih kha.
Ka pa kan entir zo kan let tur taxi kan chan laiin kan piah lawkah motor rawn ding vang chuan ka hawi sawn lawk thei lo. A chhan pawh tu motor nge tih ka chiang em a. Driver kawngka lam chu rawn in hawng in Zorinpuia chu a rawn pen chhuak vut a. Motor chu kal hual in passenger seat lam chu a pawt hawng a, Sawmi kawr fual hring dal lam ha in pum puar ve lah a alo chhuak ka hmuh chuan ka na vawng vawng mai. Zorinpuian ngaihtuah hmel zet a a buai pui te chu ral khat atang in ka lo thik em em ringawt a tih theih erawh ka nei si lo.
Ka taksa chu a tang tung a, ka in hum ruh nasa lutuk chu ka khur dar dar thei hial. An pahnih chauh an nih hmel. A naupai chu a lian ve tawh khawp mai. Chuan rai chu a in hmeh in a ngeih hmel tak zet.
Ka en reng lai chuan damdawiin lam pan a an in her tur chu Zorinpuian min hmu ve tih hriat lutuk in a ding chawt a. Ka biang chu a rawn lum thla pap a, kan sir a taxi a rawn ding takah chuan sir lam hawi a ka mittui hru zeuh in taxi kawngka chu ka pawt hawng a, a hnungah ka nu leh pa thut tir in a hmaah kei ka thu thung.
Zorina te dinna lam kan tlan pelh thleng chuan an ding reng a, a hma pawh khan ka na reng tawh a mahse kha tih lai kha chu a thu chauh in min ti na a mahse tunah ka mit ngei in kha tiang ka hmuh khan ka beiseina nei ve tlem te kha an ral riai riai ta mai.
In kan thleng a ka pa chu a chauh deuh vangin a mu nghal a. Ka pa din hmun hi a tha lo tulh tulh ni mai hian ka hria. A chhuah hlek hi chuan a chau nghal em em mai zel a. A natna neih sa ho tih loh natna dang kan entir hian an hmu bawk si lo. Rilru hi a nuam lo ve ngawih ngawih a, a nat zual a inentir leh tawp bak tih theih kan nei si lo a. Chuvang a helamah awm ngheh tum kan ni pakhat a.
Ka in ti fai a ka in thlak zo room ka chhuah san tur chu khum a ka phone dah chu a lo ri a, kawngka ka hawng tawh chu let leh in ka phone ka en chu Zorinpuia a ni. Thaw la hak in call chu ka la ta hram.
" In kawtah ka awm. " A rawn ti sup. An inentir zo hman a maw ni ka rilru chuan ka ti hial.
" Chuan.. " Ka ti tawi tak mai.
" Lo chho lawk la, nge ka lo chhuk dawn? " A ti leh sup.
" A ngai lo ka lo chho ang. " Tiin call chu ka dah a. Ni e, in biak a engkim sawi fel kan ngai tawh tak zet.
" Bawihte i pa kha puan va thuah lawk teh, a vawt a tih ka hlau riau mai. " Ka nu in a lo tih leh vang chuan ka pa te room, a hma a ka room thin chu ka pan a. Thla a sik ve tah tawh a, kan in hi a dam ve reuh bawk nen a vawt hma khawp mai.
" Nu... Ka chhuak lawk dawn a nia ka rei lo ang! " Tiin room atanga ka chhuak chu kawngka pui lam ka pan nghal a. Kawt ka thleng chho chu kan in step hmawrah a lo ding reng tawh. Damdawiin atang khan a rawn tlang tih hai rual loh in a thawmhnaw pawh a la ngai vek.
Ngawi reng a min lo melh ngur vang chuan a bulah ding in ka hrawk ka thian kharh kharh a. Khua a vawt deuh vur nen ka kawrlum hma lam chu ka zip phui nghal vat a.
" Lo kal la! " Tiin a motor lam chu a pan a. A hnungah chuan ka zui ve det det a. A motor kawngka chu min pawh hawn sak a, sawi sel lo in ka lut ve nghal mai bawk.
Driver seat lamah rawn lut in min melh zawk a, a tlan chhuak zui nghal a. A in lam kha kan pan tih ka hria. Kawng tluan chuan kan ngawi reng a. Driver seat lam chu ka melh leh zawk thin. Thil ngaihtuah muk hmel zet hian hma lam kawng chu a melh ding ngur a. A khat tawk in thawk ka la leh halh thin.
" Tah hian sawi mai ang. " A in kawt a motor a tih din rual chuan ka ti sep a. A thutna lam kawngka a nem hawng tawh chu a pawt khar leh a. Ka thaw chhuak vak ringawt.
" I thinrim a mi? " A ti zawi sup a. Nui ro hak in ka melh vat.
" Thinrim chhan tur ka nei a mi? " Ka ti let kher chu a ner sawk mai.
" Vawin kha chu... "
" Sawi fiah duh suh. I fa a pai a damdawiinah in entir turin i kal pui a ni mai a. Tah chuan thinrim chhan tur ka nei em ni? " A mit a melh ve ngar chuan ka ti a. Lawm lo zet in a rum chhuak nghut a, a mit meng chu a dur nghal khawp mai. Ka thu khawi lai kha nge dik lo a thinrim na tur awm ni.
" Kha chu kan sawi fel vek tawh kha! " A ti bung nghut a. Mit chhingin ka kut pahnih chuan ka hmai ka hup vang vang a. Eng emaw sawi tur chu ka nei a, ka kawchhung lamah hian min hnawh ut ut a mahse sawi chhuah hi harsa ka ti bawk si.
" Thla engzat nge? " Ka hmai hup reng chung chuan ka ti sep. Min chhan mai loh vang chuan ka kut chu la thla in ka en a, motor stearing chu nghet zet in a hum a, a hmel chu a thim khup bawk.
" Thla 7 na a hmang tan mek. " Rei fe a ngawih hnu chuan a ti leh sup a. A tawng ring hran lo mahse motor ah in hnaih tak a kan thut vangin ka hre chiang hle thung.
" Hun a lo kal chak ta hle mai! " Ka ti leh hap ringawt.
" A dik a lawm! " A ti ve sup. Chu bak sawi belh tum hmel a pu tawh bik lo.
" Zorin.. "
" Rei lo te chiah min lo nghak leh rawh! " Ka sawi zawh hma chuan a lo ti sup a. Turverh lam chu hawiin ka kut chuan ka chhip sam chu ka hui chho zui pap.
" Ka thei tawh in ka ring lo! " A mah pawn en lo chuan ka ti chhuak tiau. Ka tawng zawi lutuk tlat, ka tawng ring a nih chuan ka tap chhuak mai dawn tlat a.
" Chutiang in ti suh! " A ti khur ru hluk a. A aw a hlauhna ri tel chu ka hre chiang ngang bawk.
" Ka nghah theih mai che kha ka ring a! Ka ngaihdan chu thla 6 lek a nia ka nghak thei ang che tiin kei mah leh kei mah ka in fuih nasa ve a sin. A tir kha chu ka theih ngei pawh ka ring a. Mahse vawin a ka hmuh cheu khan ka ngaihtuahna atthlak zia ka hre chhuak a. " Ka ti chhuak halh. Ka mal chungah ka kut pahnih chu nghet zet in ka hum a.
A tir kha chu Sawmi a rai tih kan hriat tirh khan thla 3 lai naute kha a ni tawh a. Thla 6 lo awm leh tur chu ka nghak thei mai ang tiin ka chhungte thu sawi pawh hnial lem li mah i la ka awm hmunah ka rilru ka lo sawh nghet ve em em a nih kha.
" Ka hmangaih lutuk che avangin khua ka lo hmu lo tih vawin khan ka hre chhuak a. Keu chuan naute lo pian zawhah ka hnenah i lo let leh nghal turah ka lo ngai ringawt a. Mahse vawin khan.... Sawmi ka hmuh khan ka harh chhuak chiah . Naute chu lo piang pawh nise naute pa hi nangmah i ni tih ka ngaihtuah miah lo a. I fa a nih chuan engtun nge kan awm leh zel ang? " Tiin Zorina lam chu ka hawi a, a mit meng chu a buai nak mai.
" Ngang pawn chhanna i nei lo ti raw? " Ka ti sep.
" Ka chau tawh tak zet! Tah hian duh tawk ang, beiseina awm ze nei lo in siam tawh lo ang aw! A ni chiah kha ngaihven tawh rawh. I fa ni lo se chiang tak in a rawn pan miah lo ang che. I sawi kha hmeichhe awm herh leh sual a ni lo tih! " Ti sep in ka nui lui sak.
" Tun tumah pawh beidawng hmasaah i tang leh dawn a maw? " Tiin a in seh ruh tawlh tawlh a. " Hrep chuan.. " Ti chhuak hrawkin motor stearing chuan a chum zui chawrh bawk.
" Ka thlah ve thei lo che! " A ti chang leh bawl a. Beidawng lutuk a ka en chu hma lam bing zet in a melh run thung.
" Thlah thei che ni i la hmanah tawp i tih khan ka um zui tawh lo ang che! " A ti nawn leh hluk.
" A hma leh tun buaina hi a in ang lo. " Ti hap in ka thutna kawngka ka nem hawng a. Ngawi ngul a thu chu a tawp nan melh leh vang vang in ka chhuak a. Taxi lo tlan phar dingin ka thut luh thleng pawh chuan a awm ngaiin a la awm reng.
*
*
" Mambawih lo chhuak teh. " Zanriah kan ei kham hnu in roomah thawmhnaw suk ka thlep fel chu min rawn ko a, ka va chhuak chu ka pa chu thuthleng seiah chuan a lo thu mu deuh a. A taksa a cher in a tla kuam kuam mai a, a chhan ka hre bawk si lo hi rilru nuam pawn ka awm thei lo.
" Thil sawi duh ka nei a, nang leh i nau bulah hian... " Tiin min melh tawn a, Mama leh ka nu pawh kan bulah chuan an thu ve nghal a. Mama nen chuan kan in en a, ka pa sawi tur chu kan hriat loh hmel khawp mai.
" Tunah chuan thu dik in hriat hi a tul tawh te pawh a ni mahna. Kei hi ka cancer a. " Ka pa in a tih chuan rang zet in ka melh nghal kawk mai. Ka nu chu a thu kun nghal lap a. Kei ang in mak a tih hmel lem loh, a hre sa a ni mai thei. Mama ka en chu a ni pawh a hmelah chuan mak tihna bak a lang lo.
" Pa... Enge maw I sawi le? " Ka ti vat.
" In rilru tih hah i nu nen kan duh lo vangin kan zep a. Mahse zep reng theih a ni lo a thil tih chi pawh a ni lo. Nang ni pawn in hria a nga a ni tel in ka chhe telh telh a, chuvang chuan ka fanu leh fapa neih chhun te hi ka ngaihtuah em em cheuh a. A bik in Mambawih nang ngaihtuah hian ka rilru hi a vak kual thui thin khawp mai.
Muanpuia ka lo sawi pui tawh a, in in hriatna pawh a rei tawh bawk a. Ka dam lai ngei hian pasal nei la tih hi ka duhthu sam tawp ber chu a ni ta mai a. I hriat angin i nau chu mipa a ni a mahni in hai kaw thei turin ka ring tawk bawk a. " A tih churh churh lai chuan " Pa enge i sawi kha i hre chiang em? Engtin nge kan lakah hetiang thu lian tham hi in zep theih a? Chuan pasal neih maw? " Vin lek lek chuan ka ti a. Ka pa a natna kan hre thei lo an tih kha min lo hrilh duh loh vang lek chu niin.
Damdawiin pawh ka kal pui ve ziah a, engtin nge ka hriat loh theih hi ka hre thiam lo. Nge ni a hetiang lam hi ka lo beisei lo zawk pawh ka hrethiam lo. Kei chuan a natna neih sa ho kha ka puh a ni ber a mahse cancer ber kher chu!
" Lo ngaithla zo phawt la, hun lo zawk zawk pawh i ni tawh lo a. Muanpuia pawh tlang tak in ka zawt tawh bawk a. A ni chuan ka thu sawi min pawm pui thlap a. Ka thih hma hian tu hmel em ka hmu hman lo a nih pawn ka fanu pasal nei lai tal chu hmuh hman ka duh ve a. Chumi hnuah chuan hahdam tak in ka chawl thei chauh ang. Chuan nang leh Muanpuia hi in in hriatna a rei tawh bawk a. " Tiin min melh a. Sawi ve tur reng ka hre lo.
Muanpuia pawh a hria a tihna a ni ber a. Chuvang em ni a hma zawk a rawn leng duh tawh lo kha a rawn kal leh tak fo? Kei chuan Damdawiinah ka nu leh pa ten leng khat an tih kha a in thiam lo te pawh a ni ka ring kha a nia.
Mahse a hma ang em em kha chuan a rawn lang ngun lo. Kei mah tak phei chu a lakah hian ka in ihthlahrung vek tawh zawk a. Zorinpuia hmeichhe dangin an luh khung tih te pawh a hre ve reng a mahse engmah a sawi lang lem lo. Mahse tunah ka pa in a lo va bia a, engtin nge a va sawi a, a ngen in a ngen zawk nge pawh ka hre lo.
" Mahse pa pasal neih ka la duh hlei nem. " Ka ti halh.
" Zorina a nih loh vang tih ka hria lawm! Chuvang tak chuan ka ngaihtuah zual che. Ka awm loh hunah buaina dang i tawh ka hlauthawng a. Nangmah enkawl a veng thei tur ka ngaihtuah a Muanpuia hi ka rilruah a lang hmasa ber. A mi rin zawng leh makpa atan a ka awh chi tak a ni bawk a. " A rawn tih leh chuan a ngaihna hre lo lutuk in ka hawi kual ruai a. Ka nu leh Mama chu an ngawi hmak mai.
" Kei mah in ka in enkawl thei a lawm. Nangmah zawk a nih chu enkawl ngai. Doctor thiam deuh kan rawn leh a nga i tha mai ang. " Ka ti bah nak nak a. Mahse ka nu leh pa hmel chu a beidawng tak zet.
" Ka nawr lui lo che a nia, tun tum chu ka duh dan chiah ka sawi a. I kutah a in nghat ka tihna a nih chu. Muanpuia nen pawh lo sawi dun u la. " A ti dam dap a. Mittui tling pam in ka pa chu ka melh tlawk tlawk ringawt.
Ka mit ka khap rualin ka mittui chu a rawn luang thla pap a. Mahse ka tah chhan zawk tak chu pasal neih lam kha a ni. Ka pa zawk a ni! Enge ka tih tak ang pawh ka hrethiam tawh lo. Tun tum chu ka nu thlabar hma em em thin ai pawn ka laktlak loh zawk hial ang.
" U.. I tha em? " Mama chuan a rawn ti a, ka hawi chhuak chu kan unau chiah in kan lo awm tawh. Ka pa te room an luh lai tak ngial pawh ka hre lo. Ka â vek ni ber in ka hria.
" Ka pa chu doctor rawn pui leh ka duh! " Ka ti chhuak tawl ringawt. Tunah kan hre ve chiah a beidawn nghal chu ka tum lo but.
" A rang lam in kan pahnih in kan kal pui dawn nia. Mahse u.... Ka pa sawi kha a dik chiah a nia. " A rawn tih chuan ka thaw hak.
" Pasal neih kha maw? Hahh.... Ka pa in Muanpuia a va bia a nih kha. Chuan ka pa a hmai zah vang leh min khawngaih vang a lo hnial ngam po pawh a ni ngei ang. " Ka ti zawi sep.
" Ka ring chiah lo. Hman atang khan Muanpuia hian thian satliah angin an en lo che tih chu ka hrethiam ve a nia. Mahse Zorina i thlang miau a, kei chuan i hlimna leh i duhthlanna zah sak che a pawm pui che kha ka tum mai zawk a. Midang zawng zawng in ka farnu an dem luih luih lai a i mal loh zia i hriat nan i lam ka tang zel thin.
Mahse tunah chuan hma lam pan a hun tawh. Zorina pawh tunah chuan an la in nei lo tih kan hre vek a mahse naute a lo pian meuh chuan a pi leh a pa rilru i hre tawh bawk a. Nang pawh hma lam i pan a ngai. Ka pa pawh hrethiam tak leh i ngaihdan ngai chang zetin a sawi a nih kha. U Muanpuia chu bia la thil awm zia pawh i chiang mahna. Mahse tun tum chu ka pa sawi kha ka tawm pui thung. " A rawn ti a, ka rilru chuan ngaihtuah tur ber pawh a hre lo.
Maman roomah min luh san a kei pawh thuthlengah mu tur in ka in siam fel a. Ka mut erawh chhuak lo tak a ni. Ka phone chu hmet eng in whatsapp ah chuan ka lut a.
* Naktukah hun i nei em? * tiin Muanpuia chu ka va text a. Dar 12 a pelh vah tawh a, ka be tlai lutuk chu ka in thiam lo leh nghal. A mu daih tawh a nih ka ring rum rum, mut loh a hun tawh lo bawk a.
Mahse rei lo te hnuah min rawn reply ta hram a. Hun a neih thu a sawi ve mai a. Ka pa chhung chang lam ka sawi belh pui lo a naktukah in hmu tur ah kan in biak zawh chuan ka phone chu hmet thim in mit ka chhing vang vang. Ni e... Kei hian hma lam ka pan a hun ve tawh a ni!
Ads click kha theihnghilh lo hram ang aw