MUANZUALA--6

Episode kal lai dah luhna

Moderator: writers

Ramdinsangi Ralte
Posts: 158
Joined: December 2nd, 2018, 4:10 pm

MUANZUALA--6

Unread post by Ramdinsangi Ralte » May 13th, 2022, 9:41 pm

Duhawm-in umapuia nupui neih ni ah chuan, kal ve turin min sawm nasa viau mahse, muanzuala nu nen kan lo in bauh ve deuh hlek chu thu hran, anni chhungkaw thil tih a va inlan kha ka duh loh a vangin ka hnial fithla thei hram a.







"Laltebawih, kan thian dang ho nu anni deuh vek tawh sia, tumah kawm tur dang ka nei hlei nem, keimah choh te chuan ka riang dawn bik e" ati niah niah a. Engmah hna thawh tur em em ka nei chuang si lo a, chutia inneihna a ka kal duh lo chu. Duhawmi pawh ka lak ah athinrim phah lek lek a. Ni e, lungawi lo ah pawh amawh lo e, ani chuan muanzuala te chhungkua nen kan boruak, a kil kel in arawn hre ve vek lo a, keipawh in thil awmzia han sawi chiam pawh ka tum hran chuang lo.







Thian ho chaw eikhawm ni tur pawh alo thleng ve leh der a, chhun dar sawm pahnih ah chuan kim vek tur kan ti nghe nghe a, rei tak inhmu tawh lo kan nih hlawm avang in kan phur tlang a niang, group pawh areh lo ngang mai. A then lah in "chaw eikhawm hun chu, pasal fanau te theihnghilh thak in, namthamlo te chu kan ti leh ang chu" rawn ti tawk lah bo hek lo kan nui leh dar dar thin.







Chaw eikhawm hma zan chuan zan rei tawh ah pate-an min rawn phone a, chutiang zan rei tawh taka patea'n min rawn call chu ka lo hlauthawng nghal em em ringawt a. "Tebawih inutei a pum ana thut a, aizawl lam ah doctorin min lo refer leh sia, hei azan azan in kan rawn tlan thlakpui dawn a, zing ah LRM hospital ah khan tihfel ngaitur ang ang lo va buaipui rawh aw" a rawn tih chuan ka lo mangang ve khawp mai.








Nu leh pa kan chân tawh vang hian nu leh pa hlut zia hrechiang tu ka ni a, patea sawi dan hmang khan nutei chu athat loh hmel riau bawk sia, a thi ve mai ang tih ka hlauh em avang chuan, khum atang chuan tho chhuak in nutei tan thingthi meuh in Pathian hnenah ka tawngtai a, nu awmlohna inchhungkhur hi chu a nuam lo in akimlo riau thin a, chubak ah an fate ho anla te in, nu tello a awm tur chuan ka ngaihtuah zawng ringawt pawh in ka lainat ve leh chhawng chu ania.








Zan lam ka mut that vak loh vang chuan lu na bur in ka tho chhuak a, choka ah ka u in rawng alo bawl leh rak rak tawh a, ka hmel a hmuh rual chuan "Mate reunion neih intum ni kha vawiin hi tiraw? dar engzat ah nge kim intih? kawrthar te lei ve la atha lo maw? thiante zingah thing deuh a ilan bik ka phal lo ania" a lo ti bawrh bawrh a.







"Dar sawm pahnih ah kim tur chu antia, mahse ka kal ve thei ange maw, nizan khan pate-an min rawn bia a nutei pum ana thut a, atha vaklo ani awm e, azan azan in anrawn phurthla nghal chuk chuk a, ka intifai anga LRM hospital lam ah tihfel ngai ka lo va buaipui lawk angai dawn a, chaw eikhawmna ah chuan ka kal thei ngut lo ang" ka tih chuan mami pawh chu nutei damlohna chuan athawng ve kher mai.








"Tinge nizan ah chuan min kaihthawh ve loh a? patea a mangan dawn teh lul nen, phone atang tal in ka lo hnem ve tur hi ania" ka kaihthawh loh vang chuan min chhuahchhal nghal zat a.






" Engmah tihtheih kan nei chuang hlei nem, patea nen kan inbiak zawh ah Pathian hnenah tawngtai in nutei tan ka dil thlap alawm, eng em kan ti lo tur ah ngai ila, hospital ah chuan ka va kal phawt anga ka rawn tlai deuh leh chaw chu min lo eisan mai la aw" ka tih chuan "I chhuah rau rau chuan ikawr hak tur chu rawn lei nghal law law rawh, chutia nang ber in ithulh san leh si ten ithian ten nuam anti lo ang, patea pawh keiman ka lo hrilh fiah mai anga hunrei inhmang dawn pawh anilo a" atih chuan.






"U, kawrthar lei kher angai lo, tun a ka kawr neih pawh ho hi ala tha hlawm lutuk, chubak ah date a kaltur pawh ka nih loh hi, thian ho inhmukhawm tur mai choh alawm kan nih, tul leh pawimawh tak tak ah lo chuan sum hman huau huau loh tur" ka tih chuan mami pawh in sawitur a hre tawh lo aniang a ngawi ta ringawt a.







Patea sawi angin tihfel leh buaipui ngai tur ka lo buaipui fel vek a, aizawl anrawn thlen hnaih tawh avang in inlam ah haw lo in ka lo nghak tlang ta law law a, zing chaw pawh ei lo vin thingpui leh chhang in ka inhnawh puar ta ringawt a, thian ho group lamah nutei chanchin sawiin ka kal hman lo mai thei tih ka report a, chaw eidawn ah tal chuan kal ve hram tur chuan min rawn ti sap sap a, kan dinhmun azir in rawn tel theih hram chu ka tum ang ka ti ve bawk a.







Patea ka biak chuan "I nutei hi a chau deuh riau tawh a, duh ang in kan rawn tlan chakpui vak ngam tawh lo a" arawn tih leh lek phei chuan ka mangang ru ngang mai, beisei aiin anrawn thleng har leh sia, keiin inlama haw lo in ka lo nghak ve lak lawh tawh bawk si, tihtur nei hlei lo in damdawiin ah chuan ka lo awm ve reng a, tumah hmelhriat ka nei bawk silo, aninawm duh angreng khawp mai.







Patea te pawh zing darkua pelh hret ah anrawn thleng a, doctor in alo check nghal zung zung a, emergency a zai nghal rum rum angaih thu asawi chuan, patea ho chuan kan mangang khawp mai, nutei chuan a chi kawngah nau alo pai lek alo nia, chu chu alo puakkeh lek lek tawh a, a hun tak ah an rawn thleng hman chu, leh lam zawng taka thlir chuan a thawven thlak huai bawk.







Mami chu raipuar chak vak lo anih vang in, damdawiin lam ah rawn kal ve duh viau mahse a kal kan phal ve lo a, patea leh nutei unau te ho nen chuan inzai chhung chuan rilru mangang ru deuh chuan kan lo nghak thap a, doctor in "kan zai hlawhtling e, damlo pawh a ngaihtuahawm tawh lo" arawn tih tak ah chuan kan lo thaw huai thei, cabin lam ah kan indah fel hnu ah chuan dar khat a lo ri ruai tawh a, group ah thian te ho pawh in thlalak an rawn post deuh chuai chuai tawh a.








"Pate, vawiin tlai ah hian thian ho chaw eikhawm kan lo rawt tawh sia, han lan loh bik ngawt chu nithei in ka hre lo a, tih tur tul em em a awm tawh loh chuan ka va kal ve lawk dawn emni? duh leh zan lam ah ka riahpui ve thung anga, nizan lam inrawn tlaivar sia mut hahdam te induh ang chu" in thlahrung deuh tak chuan ka ti a.







"Tinge ahma lai khan isawi loh aw, rilru thlamuang deuh in ithiante bulah chuan va kal rawh khai, inutei pawh angaihtuahawm tawh loh hi, ithian te nen chuan hun nuam deuh va hmang rawh u, zan lam pawh kha riahpui angai lo ang, zanin chu keiman ka lo riahpui phawt anga, atul leh zan dang ah ila riah pui zawk dawn ania, he lam ngaihtuah lo in rilru thlamuang deuh khan va awm rawh" min lo ti sawt sawt a.








In ka thlen chuan mami chuan "Mate, nutei chu irawn haw in ala harh lo emni? patea ka biak khan ala harh lo atia, tlema tlema nutei chu kan chan teuh hle ther ther hle mai, eng pawh chu nise han inbual vat vat la, ithian ten anlo nghakhlel tawh ang che" alo ti bawrh bawrh a.







Hmanhmawh zet chuan ka intleuh thuak thuak a, bathroom atang a ka chhuak chu, ka khum ah chuan kawrfual senduk leh pheikhawk thar alo awm ran a. "Mate ikawrthar tur ka lei hi iduhzawng ani em? ibazar hman ta silo a, ka lo bazar sak ringawt che a" nui var var chunga ka u in arawn tih chuan "U, lei angai lo ka tih mawlh mawlh kha mawle, analh chu ka ti lutuk, mahse pawisa ka ui alawm, hetiang kawr te chu hakna hun avang awm ropui si ka dah leh mai mai awm sia" ka ti niah niah a.






"Pawisa te chu kan dam anga kan la thawkchhuak leh mai dawn alawm. I sam kha lo chhem ro la ka rawn chei ang che, ithiante bulah chuan nalh deuh a ilan angai alawm" phurh sarh chuan minti a.

.
.
.... . ..............

Kawrfual ka chawn thleng ka pian ti lang chiang thei tura fit tha zet adar ruak huau ang chi ka hak chuan "U, ka kawr hak hi asexy emai tiang te chuan ka chhuak ngam dawn emni? ka ti chhuak phawng a.





Nui hak hak chung chuan "Khatiang te zawng a sexy lo emai, tunlai nula te incheina mak sak tawh zia hi ihrelo emni? I inhmeh lutuk tlat! chubak ah inchei vur angin ilang lo a, ilang simple viau bawk a" ka sam roll mawlh mawlh pah chuan ati duh lek chauh a, phei khawk ka kawr rawng chiah, ka ngalrek chung hret thleng a in vet chho thei tur a hrui nei chu ka bun leh a, leh lam zawng tak chuan ka inhmeh ka ti ve reng, tlema dangdai deuh hlek hian ka inchei ngai lo a, keimah ka lai deuh hu tihloh ah chuan mawi ka inti ve khawp mai, ka kawr leh phei khawk inbel chuan ka vun a kap no chek tak bawk sia, kan unau chuan kan hlim dun ve khawp mai.






A ban a sana a bun chu bih zauh chung chuan "Ila tlai chhe lutuk lo e, taxi ka koh sak tawh che a ihman tawh chuan kal nghal mai rawh" min rawn tih leh chuan, engdang mah sawilo chuan mami chu ka va kuah chawt a. "Mami, ka lawm lutuk aw, nang hi awmlo la chuan hetiang a mawi hian ka lang awm tawp silo a, pangchang fe chuan ka ti sep sep a.







"Min kuah nasa lutuk kan naute hian thawk hreawm ati ania" nui hak hak chunga arawn tih chuan ka thlah vat a. "Ka naute, anu thu lo awih tur aw, anu kha lo pet vak vak tawh lo bawk la fel deuh in lo awm ang che, mam ka kal nghal mai dawn asin" ka tih chuan kan in zui chhuak nghal dat dat a, kan kawt ah chuan taxi pawh alo ding ran tawh a, ti ti khawmuang tawh lo chuan, Duhawmi te inlam ah chuan kan tlan nghal vang vang a.








Duhawmi te in ka thlen chuan anlo ri hut hut tawh a, hmeichhe rual kalkhawm tih tak ah, pawnlam atang pawh chuan anthawm aring tha ngang mai, sawi tawh ang in Duhawmi te chhungkua hi an nghialnghet em em a, an in compaund ringawt pawh hi picnic spot tenau hi ani ringawt, an hmunhma afuh in kawtzawl zau tha fe an nei bawk a, hawina lam apiang ah hmuhnawm thlir tur a awm ani ber mai.








Kawngkapui panna tualzawl sir lam ah chuan mi panga vel hian rawng anlo bawl laih laih a, ka va kal hnaih chuan min lo en deuh thap zui a, Duhawmi u zualtea tih loh chu ka hriat zawng pawh anni hlawm lo.





"Tebawih, kha ivan tlai bik ve a? a hnuhnung ber ah achhelo ber irawn thleng ani maw?" nui vur chung chuan uzualtea chuan min lo fiam vei chul a.







"Niang chu mawle, chhungkaw lam ah buaina kan nei a, ka rawn tel thei dawnlo emaw ka ti hman rum rum tawh a, tlai viau mah ila hun nuam tak hmang tur ah ka inngai" nui var var chung chuan ka lo ti ve bawrh bawrh a.







"Tlai deuh mahla ichhelo ber tho alawm tiraw?" nui thaw chunga arawn tih leh chuan lai fe chuan ka lei ka chhuah khum zeuh a, midang ho pawh chu anlo nui dar dar hlawm a.






"A nih chuan ka tlai tawh bawk sia ka luhsan mai ang cheu aw, tui deuh khan lo siam ula kan rawn ei teuh ang" ka tih chuan.. "A tui dawn chiang alawm, a eitu tur ngaituah ran chunga siam anih dawn avang in atui lo thei lo" pakhat chuan arawn ti ve zat a. Rin ai taka an lo hawt hlawm vang chuan, tum loh deuhin ka nui ka nui ringawt a.







Inchhung lam pana ka pen chiah chu, Muanzuala bel chawi chunga, inchhung atanga arawn chhuak nen chuan kan in melh fuh chiang ngang mai, ani teh daih hmuh chu ka lo in beisei hauh silo a, ani pawh chu ka hmel a hmuh thut vang nge? akal lai chu ading deuh chawt a. Bel chawi reng chung chuan chik fe hian min melh ngur ngur a, tawnzau dum leh kekawrbul a hak chuan a pian nalh zet chu ati lang chiang ngang mai. Hman atanga tun thleng hian, he pa hmaah hi chuan ka lungphu danglam thin hi ala reh thei lo cheu chu anih hi.






"Z-a bai bel tur chu emni irawn lak" uzualtea'n arawn tih tak ah chuan, a mit chu ka lak atang chuan ala sawn ve ta hram a, be lemlo chuan hmanhmawh fe chuan inchhung lam pan chuan ka lut san ta vat a.








Inchhung ka lut chiah chu anlo ri hak a, min lo chibai liam liam chung chuan. "Tebawih, nang chu nula ila ni bawk a, inalh bik lutuk" tiin minlo fiam chul leh nghal a, muanzuala ka hmuh vang khan nuam ka tih tur ang pawh in nuam ka ti thei tawh lo, kha mihring lo awm ve vang khan ka rilru a kap tlat a, thiante kiang ah alang apau in ka nui lui vel ve mai mai anih ber chu.







"Tebawih, lo chhuak lawk teh" Duhawm-in pawn lam atanga min rawn auh tak lung lung ah chuan thian te ho chu anlo nui thaw hlawm a. "Enge ni chiam chiam a? chutiang fakau a min rawn koh vak vak kher a? Ka tih chuan minlo nuih vur vur a.







"Hetah hian lo kal teh, irawn thlen atangin minute tam pawh ala liam hman lo a, kan fatu ho hi engtin nge ilo hmelhriat leh hman tawh a? Heng ho hian thla kan lakpui loh chuan rawng ka bawl tawh lo ang anti tlat ania" fiamthu titak deuh chuan min lo ti barh barh a.







"Awih awm loh ve e, kan inhre reng reng lo, u zualtea bak hriat ka nei lo an uang mai mai anih chu" lai fe chuan ka lo ti ve zat zat a. Sirlam ka hawi phei chu.. Muanzuala pawh an zingah chuan alo awm ve reng a thinrim hmel tawk chuan min lo melh dur khui khui a. Uzualtea chiah ka hmelhriat ang khan ka lo sawi ve laklawh tawh sia nuam lo ka ti ru ngang mai, ka unaunu pasal hlui anih vang in ka hua ah min ngai ngei ang le.








"Tak tak chuan, bawngkawn ah thil lam lawk tur a awm a, heng ho hian ikalpui kher an phut sia, kei lah han kal chhuak dawn ila, thian te ho saw anlo hawihai a hlauhawm ve tho sia. Joshua nen hian inva kal lawk mai dawn emni? joshua nena kal chu ihreh angem? thu tak deuha arawn tih tak ah chuan, hmelhriat loh mipa nen han chhuah dun chu ka chak hran lo khawp mai, chumi anih rual chuan ka peih lo tihchi lah ani der bawk silo a.








"Kan kal nghal mai dawn emni? joshua'n arawn tih tak ah chuan, phur vak lo chuan "I hman chuan kal nghal mai ila" ka lo ti ve sep a. "Joshua bike ken itum emni? Ka car keng rawh u, Tebawihi incheidan leh bike a chuan chu a inrem teh chiam lo ang" Duhawm-in arawn tih leh tak ah chuan.








"Kan thil lam tur leh bike ken te chu a inrem tawp nang mawle, i car chahbi chu min rawn pe vat mai la" joshua chuan alo ti sup a.








"Tarmitlian, ibungrua chu keiman ka va lam maidawn emni? Tebawihi chu rawn kal ve kher angailo ang, bawngkawn ah chuan ka hnalam thil ah mi hmuh lawk tur ka nei tho a... "Muanzual-an arawn tih chuan, Duhawmi chuan alo ngei hmel ngang mai.









"Khatiang khan min ko ziah suh, joshua te pahnih hi va kal zawk rawh se, nang chu rawngbawlna lamah hian itangkai zawk" muanzuala melh rawm rawm chunga, Duhawmi'n a rawn tih chuan ka lo nui hak a. Muanzuala'n Duhawmi arawn koh dan khan hun kaltawh min hriatchhuah tir miau a.







"Tebawihi nen chuan kanva lam zawk ang, chu bak ah hna lam anih phei chuan irei lutuk thei a, kan tan kal a harsa chuang lo a, kan va kal zawk ange" joshua chuan alo hnial ve nghal zat a. Muanzuala hmel ka va en chuan, lawmloh hmel lutuk hian alo ner nawk a.







"Mate, engthil chu nge tun tut tut a va lam ngai chu? Tebawihi pawh arawn thleng fel ve awrh choh a, ilo tir leh nghal ringawt a, inthian te ho nen inkawm te pawh aduh ve ang chu, ithil chu tun ah kher lam nghal a ngai anih leh z-a hian tihtur aneih tho chuan va tlan zawk mai rawh se" uzualte-an arawn tih ve tak ah chuan ka lo lawm ru ngang mai.








joshua pawh chuan engmah a sawi buai zui ta bik lemlo a. Duhawmi chuan muanzuala chu a bungrua lamna tur hmun chu a hrilh nghal mawlh mawlh a, muanzuala tlanliam hnu chuan inchhung lamah kan inzui lut leh a.







"Lalduh, iti mak ve chiang e, tinge hmelhriat loh nen a min chhuah dun tir itum ve ngawt a? a thuhrim ah enge tun tut tut a va lam ngai thil chu" tum bar bar chung chuan Duhawmi chu ka chhuahchhal nghal zat a.







"I sawi ring lutuk, beer va laktir cheu ka tum mawle mama hriat kha ka hlau bawk sia, ujoshua cousin kha kan chah a, an rawn thleng ve deuh chiah a. Lal z-a ka ngei zia kha! mama kha ka hnial ngam tawh bawk silo a" ati zui nang nang a.









"Beer chu min intir leh intum em lo ang chu maw? tun tum chu ka in thei tawh dawn lo ania aw, hospital lamah patea te tlawh kual leh angai dawn bawk sia, rimdang ka nam thiang lo hrim hrim" mahni inveng ru zet chuan ka lo insawi khalh zat zat a.








"I ti leh ta, nang berin i in loh ten, beer in ti nuamtu ber inih si, chutiang chhuanlam engmah sawi sawi angai lo, namtham lo te chuan iti leh ang chu" nui hawr hawr chunga atih chuan ka lo tum bar bar a.








"Ka fiamthu miah lo ania, tun ah nutei thih ngam in adamlo a, chutih lai kara lo ruih chu a tih chi vaklo ang" hnial hnial mah ila min inluih tir atum leh dawn tho tho tih ka hrechiang viau bawk, Duhawmi hi ava sual ka tihna nilo in, kan thian ho zingah ah khan a inla boss deuh ber a, a thutê a min awmtir hi a tum deuh tlat thin hi ka sawisel ve na ber chu ani.








Ka thlen ve hma in hunserh ve deuh chu anlo hmang fel vek tawh a, zanriah eihma chu mahni nuam tih dan dan a awm in kan ri teng tung a, kan hun hman thin dan te in hrilh tawn in, hun nuam tak kan hmang a, thla pawh kanla ho nasa narawh e.







"Tebawih, minlo zui lawk teh, thil pawimawh sawidun tur kan nei ania" Duhawmi'n min rawn tih chuan aroom lam ah kan inzui chho a, Duhawmi room kan thlen rual rual chuan ka zawi nghal ngawih ngawih, nizan lam atangin mut ka hmuh that loh bak ah, nutei ka ngaihtuah vangin ka rilru alo hah ve bawk nen, Duhawmi khum ah chuan ka bawk thla hnawk a.







"Enteh Lalduh, enge min sawipui iduh a? ka chau lutuk tlat, ka taksa hian mut a mamawh ngawih ngawih ni berin ka hria" khum a bawk phek reng chung chuan ka ti sep a.







"I nutei chu enge a an tawh reng reng a?
he tiang luih luih kan lo ni bawk nen chanchin a hma khan ka lo zawt miah lo che a" inthiam loh hmel fe chuan arawn ti a.








"Tunah chuan ngaihtuah awm ani tawh lo, doctor khan kanzai hlawhtling e chu atia, a chi kawng ah nau alo keng a, alo puak darh hman lek lek tawh a, ahun tak ah anrawn thlenpui hman hlauh a kan vannei khawp mai" ka tih chuan..

"A van lawmawm tak, chutia tha taka anzai tawh chuan, a zia chho ve leh maitur ah ngai ila, ichauh viau chuan tikhan lo mu hahdam la, zanriah anla peih chuang lo a, eidawn ah ka lo kaitho mai ang che. E tak in ka kohfal chhan zawk che chu, u z-a te nupa chungchang hi ania, utluangte-in nau anei tep tawh bawk sia hetia inthen tawp hi chu atha ber in kan hrelo a, ka nu te pawh in Tebawihi lo sawipui ve la, engtin emaw inthiandun hian hma la teh u mintia, chumi chung chang chu sawipui che ka duh deuh mawle" arawn ti deuh duah a.







"Nia tiraw, hetia achhan bulbal sawitur pawh awmlo a an inthen ringawt hi chu azia lo khawp mai, kei pawh hian hetianga an inthen hi ka duh dan ani bik hauh lo a, ihriat ang in keini unau chu fahrah mai kan nitawh a, ka unaunu in keimahni ang tho a fahrah dang a hring leh tur hi chu hreawm ka ti ru ve thin khawp asin, mahse an mahni ber in inneih leh anduh tawh miau si loh chuan, kan tan chuan hma han lak vak theih pawh anih ka ring chiah lo" ka sep a.







"Tebawih, u z-a hi mi ten ansawi ang hi ani miahlo ania aw, ka rawn thlentirh khan keipawh hian bialnu anei niin ka lo hria a, mahse thuthang diklo mai mai anih kha, ka unaupa hian utluangtei kha a rinawm loh san miah lo, a hmeichhe zui fo thin kha chu nang pawh in ihrelo emni? Higher kan kallai pawhin kan in velah pawh ahrawn hruai ve reng thin kha. U salomi leh u z-a te chu tette atang a inkawm tawh annia, tunthleng hian anla inzui reng alawm, u z-a leh usalomi te inkar ah hian inthian thatna bak thildang a awm lo, chu bak ah ka unaupa hian hmeichhia angin a en ngailo hrim hrim, mama pawh hian thu dik chu a hre vek alawm" muanzuala leh salomi ka hmuh dun dan leh Duhawmi sawi dan chu in persan riau hian ka hria a.








"Engmah hi ka hrethiam tawh lo, mami hi chuan let leh hi aduh ka ring tawh lo hulhual, diktak chuan maw, u z-a nu sawn mami hi a mo atan apawm ve reng reng hlei nem, chuta tang ringawt pawh chuan innei leh thei anni tawh in ka hre lo, ti hian han awm ve nawk nawk rih se, naute alo pian chhuah hunah awmdun leh pawh chu anlo duh ve leh maithei bawk a, tun dinhmun ah chuan hetia lo thlir liam mai mai hrih hi ka duh deuh zawk" tiin ka ngaihdan chiang tak in ka sawi tlang nghal khawl a.









Sana melh zawk pah chuan "Kan pilbo rei minti viau tawh ang, nang chu duh leh tikhan lo mu hahdam rih mai la, imuhil thei anih phei chuan lo muhil bawrh bawrh rawh, chaw ei dawn ah ka rawn kaitho ang che, kan thiante ho chu ka lo hrilhfiah mai ang" thu dang arawn sawi tak vang chuan ka lo thaw huai thei, zep loh chuan muanzuala chanchin sawi reng pawh hi nuam ka ti chiah lo, a laka ka rilru puthmang te hi tuman min hriatpui ve silo a, ka tleirawl chhuah atanga ka mipa duh awmchhun tunthleng hian ala ni miau mai si a. Lehlam ah awmdun tura duan kan ni ve miau silo a, thinlung tap chung reng a ka duhna te hi ka zep ral raih angai dawn ta anih hi.








"Lo mut bo daih bik chu azia lo awm e, mahse ka chau lutuk tlat reilo te tak tak ka lo tluzal anga, ka rawn fin vat ang cheu" ka lo ti ve thuai a.







Ka pheikhawk chu phelh in, Duhawmi khumah chuan avang zawng chuan ka mu zangthal dar dar a, keimaha ka awm apianga ka rilru a ka ngaihtuah hmasak reng thin. Muanzuala bawk ka ngaihtuah leh tawh, he thil hi chu ka u pasal anih rual khan tihreh tum in ka bei tawh a, mahse vawiin thleng hian reh ahnek in a zual sauh zawk chu anih hi, mami dinhmun ka chhutpui a, atan atlawmthlak zia pawh ka hre ve vek chung hian, muanzuala ka thinglung atanga tunthlenga ka la paih bo theilo cheu hi chu, keimah ka inhuat bak ah mami ka hmaizah ngawih ngawih, a nau hian a pasal alo duh ve tih hi hria se engang in nge min ngaih ang? Ka ngaihtuah zawng ringawt pawh in ka u lakah ka in thlahrung ru takzet ani.








Thil ri rak rak leh phun sar sar thawm chuan ka muhil lai chu min ti harh a, peih lo fe chuan ka mit chu ka meng chhuak diar diar a. Khum sir sofa ah chuan Duhawmi leh Muanzuala chu an lo thu dun ran a, chutia ka chet takah chuan ka lam chu anrawn hawi dun vat a.








"I chau bawk aniang maw? ilo muhil hman tak tak a, thianten chaw ei anla ti chuang silo a ,ka kaitho duh rihlo che a, mahse kan tawng thawm ah kan ti harh leh tho che ani maw?" Duhawmi chuan alo ti var a.







Ngawi reng chuan muanzuala pawh chuan min lo en ve reng a, aruk in ka lo duh mai bak ah ka u pasal hlui anih vang hrim hrim hian. muanzuala hmuh reng hi nuam ka ti chiah lo a. Mahse tum loh deuh hian engtin tin emaw kan inhmu zut lawi a.







"A zialo e, muthilh tak tak ka tum bik miah lo a, reilo te tlukzal mai mai tum kha ka nia, ka lo muhil daih a, thiante ho pawh an hmaizahawm a lawm" lai zet chuan ka ti tham tiak a.





"In thlahrung reng reng suh, inchhung ah nu leh pa chan ichan angai a, itaksa a chau rimtawng anih kha, namtham lo te chu ti ve la iharh hawk mai ang" nui sawng chunga arawn tih chuan ka lu ka lo thin khum chiam a.






"I vahan naupangchhia tak, imuthilh chhung khan mi dang pawh in anti vek tawh ania, thian ho ah chuan intihfel fal bik kan phal loh kha" arawn tih leh chuan muanzuala chu ka va melh zuk a, mit la leklo chuan minlo ka en kur a.







'A theih tawh loh, ka sawi lawk vek tawh kha, chhungkua in buaina kan tawk a, chuta kara lo ruih te chu ka duh lo hrim hrim" ka ti ve tlat a.







"Tarmitlian, mi duhlo chung chu tinge inluih tir phet chu itum a?, nangmahni khan in ula atawk ani mai alawm, chubak ah tebawihi te chu rui chi anilo. Tluangi nau nei thei mai dinhmun ah ading tawh a inring reng a awm angai alawm" alo ti ve sup a.







"Naaa... inupui nau anih vang in itan bik, Laltebawihi'n a in ve loh chuan anuam lo alawm" ala ti ve fan a.







"Lalduh, chaw ei chu rawt tawh mai ula, inlam ah ka u in minlo nghakhlel tawh ang, chu bakah ka haw tlai chi ka ni velo ania, kan dinhmun min hriatpui vek kha" ka tih chuan.








"Nang chu anuamlo e, tinge thildang ringawt ingaihtuah a? vawiin na na na chu ichhungkua dahtha in hlim han tum ve teh! kan inhmukhawm hi nuam iti ve pawh in ka hrelo irilru abet lo emai aw, zanlam ah pawh party an rawt nghal kha" arawn tih leh lek phei chuan ka lo tap lo choh tawh.






"Ka tello in inlo party tawh mai aniang chu, nutei damlo nen vawiin ka rawn chhuahsan pawh hi ka inthlahrung tawh viau ania, chubak ah mami chhuahsan reng a chiloh a lawm" ka tih chuan a kut a rawn beng ri thak thak a.







"Ruahmanna tha deuh ka nei" a rawn ti hlut a, alo lem sek tawh tih hriat zet chuan ameng phi teh ang chiai a.





"Eng ruahmanna maw ineih? ka lo ti var a.






"Ruahmanna chu hei hi" muanzuala kawk zeuh pah chuan a ti awlsam et a. Muanzuala chuan minrawn melh zuk a.






"U z-a, hian utluangi chu lo va awmpui rawh se, ti chuan nang thian ho partyna ah i awm ve thung anga, anni pahnih tan chance tha lutuk ani pah bawk anga, awi ka ruahmanna chu a fuh vel lutuk tlat" ngaihtuah chhuak fuh inti lutuk chuan, phur lutuk hian a sawi bawrh bawrh a.








"I ruahmanna chu atha khawp mai, u z-an mami lo awmpui thei pawh nise, haw hma ka ngai tho tho alawm mawle, ka hrilh vek tawh che kha hospital ah patea te tlawh kawi ka ngai tih kha" ka tih chuan achal chu a beng thek thek a.







"Nidawn tak min hrilh tawh reng sia, aaa pawilo itello in nuam deuh in hun kanlo hmang anga ani mai" a tih tak ah chuan ka hahdam huai thei, an mahni ang mai hian duh duh lam hawi a thle kual hman ka ni ve miau silo a.







Duhawmi phone arawn rik tak ah chuan "Ka Pathian in min rawn call anih hi, kan be lawk ange aw, thikthu te lah hi a pe chhe ve thei mai sia"
balcony lam ah chuan chhuak in abe zui lawng lawng a, khum tlang ah chuan thu in ka pheikhawk chu ka bun mawlh mawlh a.







"Tebawih, tluangi chu atha zel maw? rawn hmuh ka duh thin viau na in tunlai chu hun awl ka nei lo ve lutuk a, umapuia nupui neih boruak vel nen , inutei chu engtin chiah nge a awm a? avan zia lo ve aw" muanzuala chuan a rawn ti sup a.






Pheikhawk bun tha mawlh mawlh chung chuan "Nutei chuan a chi kawng ah nau alo pai a, tunah chuan atha tawh e, mami pawh atha lutuk e, in inkar ah eng inzawmna mah a awm tawh chuanglo a, rawn ngaihven reng turin engmah imawhphurhna a awm tawh hlei nem" ka lo ti sap a.







"Chutiang anilo, inthen tawh mah ila kan fa lo piang tur vang hian kan inkar hi chu a la chat tak tak hlei nem, i u tha taka ilo enkawl vang hian ichung ah ka lawm lutuk ania, kei chuan ka mawhphurhna pawh ka hlen chhuak zo ta silo a, izirlai thlenga nghawng anei hi hreawm ka ti tak zet" a tawngkam rilruih chuan min ti zam chhe zo vek tawh.






Vawikhat mah mami a rawn ngaihven chhin eih loh vang khan ka lo ngei thin hle kha ania, a inthiam loh zia thu an han sawi leh tak ah chuan ka lo khawngaih leh hman lek lek ani.







"Kan thu dang alai chuan...MZU ah chuan ilut thei dawn ta em? arawn tih leh chuan ka lu chu ka lo thinkhum ringawt a.






"Kan dinhmun thlir in lehkha zirna kawng a kaw hrih tlat lo, Mami hian nau te han neifel te te se, naute tlema aleikang deuh hun ah,muangmarin zirna te chu ka zawm leh ang chu, lehkha zir te chu tlai luat a awm hleinem" nui sak chung chuan ka ti a.







"Tebawih, i u nen kan inkar buaina a atuartu bera itang ta mai hi pawi ka ti takzet asin, diktak chuan i u leh kan fa lo piang mai tur tan a rim taka hna ithawk ka hmuh hian hreawm ka ti thin, invanduaina ti belhchhah tura kan chhungkua min tawng hi apawi ka ti vawng vawng, Tebawih kei hian engtik lai pawhin puih cheu hi ka hreh miah lo ania, itaksa te kha enteh! I cher sawt zia kha, rim taka hna ithawh kher ngai lo hian kei hian ka pui thei reng cheu sia, tinge ka puihna hi indawn duh miah lo a? A aw atang chuan min dem lek lek in ahriat a.







"Chungte chu sawi vak tur pawh a awm hleinem, ipuihna dawng tur hian ka makpa pawh ini tawh silo a, mami te nufa chu ipuihna dawng miah lo pawh hian tha tak in ka enkawl thei em em ang, kan dam te chuan hetiang dinhmun harsa tak ah hian kan ding reng bik nang" ka tih chuan alo thaw hawk a.






"I in rintawkna chu a ropui khawp mai, mahse thil pakhat chiah hrereng tura ka duh che chu, i u te nufa tha taka i enkawl theih nan nangmah kha in enkawl tha rawh aw" a hmel ah chuan min ngaihtuah ve tak tak te pawh a ang. A kiang hnai a ka awm reng zawngin ka buai zo leh thei tak ngial dawn hian ka hria a.







Duhawmi arawn let har tak em avang chuan "Ka lo zu chhuk thla ange, ka tawm bo rei tawh sia" ka kawr ka delh chuar zut tha mawlh mawlh chung chuan ka ti sep a. Tawng tawh lemlo chuan ani pawh chu sofa atang chuan arawn tho chhuak ve vut a.






"I chhuk thla ve nghal dawn emni? Ka lo ti nghal vat a.






"Chaw eihma kha iduh ani lawm ni? Chaw ei ka zu rawt nghal mai ang chu" ati sup a.






"A nih chuan chhuk thla hmasa rawh" ka tih chuan mawl min tih hmel fe chuan min melh leh vung vung a.






"A eng thil chu ngaihtuah che ni maw? a rawn ti hluk a.





"Kan chhukthla dun minlo hmuh chuan min ngai diklo palh ang, chuvang chuan chhuk thla phawt rawh" ka tih chuan arawn nui chhuak huk a.






"Ngaihdan atthlak zet anih chu" ti hluk pah chuan inhnuai lam pan chuan a pen thla pawk pawk a...cont





Note...Saturday leh Sunday zan chu ka awl ang aw. Inkhawm duh nen chuan a buaithlak ve deuh thin a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)