CHAPTER 18
☆☆☆☆☆☆
SHARONI POV:
Thawhtanni a ni a,college kal tur chuan hmanhmawh takin ka insiam sawk sawk a. Saia erawh damdawiin lamah emergency a awm vangin a kal tawh a,a awm kha ngaiah ka lo nei tawh em maw ni,tuk khat a han awmlo meuh chuan ka che buai nghal em em ringawt mai a,ka tlai lek lek a ni.
Scooty in college lamah ka tlan chhova,ka thlen hma chuan Lily call ka dawng a,ka laklawh em vangin ka la ta lo.
College ka thleng a,garage ah scooty ka dah a,zirtirtu Car dahna phen lamah chuan phun sur sur ri hi ka hre ta a,naupang tute emaw annih ringa kalsan mai ka tum chu hmeichhe tap ri ang deuh ka hre leh a.
Ka hmelhriat tute emaw annih takah tiin ka va phei de de a,Car dahna hnunga Sintex phenah chuan tute emaw hi anlo inhau ngei a,a mipa hmel ka hmu chiah chu ka phu deuh zawk..
"Vanthlahlu,eng nge itih?" Tih paha ka va lang thut chu an phu zawk a,a hmeichhia zawk chu a tap tak tak nge lehlam a hawi vat. Vanthlahlua zawk chuan
"Engmah" alo ti hluk a.
A hmeichhe dinpui chu ka enchiang deuh a,kan college ami ngei chu ani,mahse,ka class ami chu a nilo. Hmeichhe nun nem leh ze zawi em em,lehkha thiamthei tak ani tih chauh ka hria.
"Lokal teh,eng nge maw hetah te inlo inhnial" tih pahin ka pawt a,alo tang deuh tung lehnghal.
"Khawimaw" tia hmeichhe lam ava melh leh chuan ngaihsak duhlo luiin ka kalpui pawp pawp a.
Tlema mi awmlohna deuh kan thlen chuan ka thlah a,tum bur chungin ka hmaah chuan a ding a.
"Eng buaina nge i neih a,kha te chu zirlai naupang thiamthei tak anih kha,i chhaih buai ami?" Ka tih chuan rum fe hian min melh a.
"I kawp ami?" Ka tih leh chuan hnuailam a bih leh daih a.
He mihring ler kawh lutuk hian hmeichhia a titap reng mai zawng anih hi.
"I kawp dawn anih paw'n hmeichhe fel tak kawp tawh suh,a zirlaiah te a tihchhiat phah thei" tha taka ka tih chuan a kawr a pawt deuh sawk a.
"Ka hria" tih hluk pahin kal mai a tum chu.
"Saizampuii nen in inkawp lo ami?" Ka tih leh chuan alo hawilet leh a,min chhang mailo chuan a ding deuh vang vang a.
"Amah vanga buai kan nih hi" thinrim hmel taka atih leh chuan ka lo meng deuh awk a.
"A tha e,zanah lokal la,sawipui i duh chuan kan sawi dawn nia,a tha em?" Tia ka zawh chuan a bu nghut a
"Kal tawh rawh,ani ang kha chu tina tawhlo la" ka tih chuan ngawi rengin a kal a.
Lehlamah chuan ka khawngaih ve tho,a langlo lamah an chhungkua hi an kehchhe ru riau a,thawkkhat lai phei kha chu a nu leh pate kha an inthen lek lek hial anih kha. Vanthahlua chiah hi fapa annei a,an duat luatah an sual zo vek lehnghal. A ler em em a,zan len a hrat bawk si. Tunah pawh nichina nula leh Saizampuii hi a kawp tih hriat reng reng.
Class ka la nghal mawp mawpa,tunah chuan tu vakin min sawi zui peih tawhlo. College group ah notice an siam a,zirtirtu leh zirlaite zawng zawng hmuh theihin an post a,hna nghet ka neih theih nan tu puihna mah ka la lo tih an hre ta a,ala sawi zui awmchhun pawh angai,Miss Rosie te thian dun bak anni lo. Mahse,anni chu ngaia neih ngai annih bakah,a nau kha alo tlinglo kher bawk nen,an kumkhaw sawi chu a tling maithei ni.
Saia khan a chhuah atangin min lo la be miah lova,a buai anih ka ring deuh. Chaw chhun kan ei lai chuan number ka save miahloh hian min lo call a,chaw kan ei laklawh bawk nen ka la lawk lova,mahse,vawihnih a rawn tih takah chuan pawnah chhuakin ka va la ta a.
"Saia pa ka nia" atih chuan awmze nei lovin ka hlau ringawt nia,a tawng reng reng chu a nghet charh a. Min hmuh a duh thu a sawi phei chuan ka hlauthawng lehzual. A fapa kalsan tura min ti anih vaih chuan ka thei dawn der si lo,chutiang anihloh hram beisei ang.
Saia pa hmu tura ka chhuak tur chu Saizami leh Vanthlahlua rawn inzui phei rawl rawl ka tawk a.
Ka biak chak fahran loh vangin ka melh zawk a,kalsan mai ka tum Saizami zawk chuan
"Ka pa khan alo bia che em?" Atih chuan ka ding dat a.
"Bia e,tinge?" Ka tih chuan Vanthlahlua ding ngawi reng chu a melh zawk a..
"Ihh,i number min dil a,ka u khan a pe duh lova. Mahse,hlauthawng suh,a hmu duh satliah mai mai che aniang" atih chuan Scott-a min melhdan zawk chuan ka awm a tinuamlo.
"Aw,ka hria,ka hmu dawn a,ka kal mai" tih paha ka inher tur Vanthlahlua hmel ka en zawk chuan tur ve mai hian min lo melh a. Enge maw alo thinrim hmel em em ringawt,a pawi ka sawi tawp silo. Nge,tukin zing ka hauh vang khan alo thinrim zawk??????
Kan inhmuhna hmun tur a tihfel tawh vangin chumi lam pan chuan ka tlanchhova,Dawrpui ah daih a ni. A hmun ka thlen chuan anlo awm deuh laih laih a,dawhkan awlah chuan ka thu thawr a,zam tawh sa nen alo lang lawklo lehnghal.
Minute 10 chuang ka thu tawh a,ka kut ka sik ka sik ringawt. Ahnu leh deuha kawngkhar rawn nem hawngtu chu tunge anih hrilh nawn ka ngailo,Saia nen double roll anni ringawt.
Min hre chiahlo nge a hawikual deuh a,ding chunga ka kut ka vai chuan buk ngut pahin ka thutna lam alo pan a,a mitmeng fin hmel lutuk zawng zawng nen chuan min tizam lehzual.
"Chibai le,Sharon Ramdinpuii ka nia" tih paha ka kut ka phar chuan alo ban vat a
"Saia pa ka ni e,thu ta che,tinge i din?" Tih pahin a thu zui nghal a.
Waiter in order alo lak chuan coffee chiah kan order a,tawng hmasak a tum bawk silo,eng nge sawi tur pawh ka hrelo.
"Eng hna maw i thawh?" A tawpa tawpah chuan ati ta a.
"Synod College ah zirtirtu ka nia" ka tih chuan engmah sawi lovin a bu leh nghut nghut a,a kut lah chu hum chungin a mal chungah a nghat reng bawk si,a zahawm ngawih ngawih.
"Eng nge min hmuh duh chhan?" Tim deuh taka ka zawh chuan Coffee hawp pahin min rawn melh zauh a.
"Ni tak maw,hmuh duh chhan em em che pawh ka neilo,inhmuh hi a tha hrim hrim ka ti mai ania" nuih deuh paha atih chuan ka thawveng hawk thei.
"Saia'n alo bia che em,kan inhmuh tur hi a hria maw?" Atih chuan lu ka thing vat a.
"Zing atang khan kan inbe lehlo" ka ti mai a.
Chutah,han thu tha sauh sauhin ka hlauh ang nge nge chuan
"Chhan awmlo ti mai ila,han sawi tlang mai ila" ati ta a. Ka thungil nghal zat a,hun harsa tak min thlenloh hram ka beisei.
"Englo ania,i hria anga,Saia hi kan fapa neihchhun ani a,ka thlah kal zel tur chu a kutah a innghat tihna anih chu" a'n ti te te phawt a,chhang mailo chuan a thusawi chu ka en kar a..
"I hrelo maithei a,kan chhungkua hi Sailo Lal thlah kal zel la dam awmchhun tlemte zing ami kan ni a,ka pianpui unau mipa awmchhun chu Saia Patea chiah hi ani tawh. Chuvang chuan kan chhungkaw member lo awm zel turah pawh kan fimkhur in kan duhtui hle" tih pahin a tarmit a chawi kang a,min melh kur bawk.
"Chu chu eng nge i sawi chhan?" Tia ka zawh chuan ka mal a khur dar dar thei.
"Tlang takin ka sawi ang. I chanchin an sawite ka lo hria a,fa pakhat hring tawh ini a,i nunhlui a duhawm vak lemlo tihte pawh" atih chuan ka kun nghal daih a,tiang leh bawk hi maw. Min hnawl dawna nih chuan an fapa hi dan hmasak tur alawm.
"Mahse" a tihlai chuan dawhkana ka phone dah alo ri a,inthlahrung taka ka en chuan a fapa ngei alo ni,amah chu ka melh zawk a,ka phone chu alo melh ve kur. La ta lo chuan ka off a,dawhkanah bawk chuan ka dah leh mai.
"Saia hnenah pawh ka sawi tawh angin,eng anga nunhlui thalo nei pawh nise,a hmangaih a,chhungkaw dinpui tura a thlan chu dan ka tumlo" atih chuan ka melh ha a.
"In inzawmna hi ka thlawplo hranpa lo ka tihna anih chu. Amaherawhchu,in hriat tur. Kan chhungkaw thlah kual hi kan tam a,inlo innei anih pawhin ze hran hran nei kan ni tih hria la,an zavaiin anlo lawm veklo maithei che. A bikin ka farnu Malsawmi te chhungkua" atih chuan tunge a sawi pawh ka hrelo.
"Malsawmi chu i Thenawmpa nupui hlui te kha annia" atih chuan ka hre ve ta chiah. Khami te nufa khan bazarah min tizak zek tawh anih kha,hmuh tamloh ka duh ber..
"Mahse,in in hmangaih anih chuan engmah buaina a awmlo. Ka sawi tum ber ka thelh reng mai,ka ngen duh tak che chu,Saia hi lo thlem la,ina lo let turin" atih chuan chhan mai dan tur pawh ka hrelo. A fapa luhlul turu zia hretu chu amah tho hi ania.
"A duhloh chuan tihtheih ka nei biklo" ka tih sep chuan ka phone alo rik zawm lehnghal,ka enlo,a chhan pawh tunge tih ka chian em vang a ni.
"Nia,a duhlo,a luhlul hle bawk. Mahse,hetia,nupa nih hma hmaa in riah chilh reng hi a tha ngailo,midang sawi sep hlawhte pawh a hlauhawm a,Saia chu mipa a ni a,nakina hmingchhe tur chu hmeichhia bawk hi inia,tunah an sawilo a ni thei,a rei anga anla sawi khawp ang" atih chuan dik ka ti hle. Tiang ka ngaihtuah vang hi ania,Saia lo awm pawh ka duhloh,chuta karah ka inah ala rawn insawn seuh seuh bawk si.
"Ka lo tum dawn nia" ka tih chuan lawm hmel takin a bu ta nghut nghut a,Coffee ka in leh tur chiah pawnlam ka hawi chuan hmanhmawh fe a Saia lo phei ka hmu ta a,ka phone ka On chuan a missed call alo tam hle.
Ka en reng lai chuan min hmu thut a,eng emaw sawia phun hluk pahin a rawn lut zui ve nghal.
"Ka pa" tih pahin kan sirah chuan a rawn din luah mai a. Apa chuan a fapa lo lang thut chu mak tih hmel deuhin a en a,chutah,kei min en leh chuan
"Ani hian min hrilhlo ania,ka rawn zawng che u" Saia'n alo ti hloh a.
"Tinge i lokal duh. Thu ve ta che" apa in atih chuan ka bulah a rawn thu ve nghal a. A mawng a hun rual rualin
"I tha maw,eng nge in sawi?" Ati nghal.
"Ahh,tha e,kan titi mai mai alawm" tih paha apa ka melh zeuh chuan alo nui ta sun sun a..
"Ka tih thaih hleinem,kan inhmu satliah mai alawm,hlauthawng lutuk suh" atih chuan dawhkan hnuaia ka kut vawn pahin apa chu ava melh zauh a.
"I tha maw?" Te chu ati leh hnuhnawh a. An awmdan chu a nuihzatthlak letling zawk,pafa inbia pawh an anglo.
"Tha e,engtik nge lo haw i tum?" Apa ina tih chuan ka kut a hum nghet sauh a.
"Ka hrelo" tih ringawt pahin ka Coffee in zawhloh chu a rawn ban zat a.
"Inu thihcham kha ila hre ve ang chu maw,hun kan hman thin kha" atih leh chuan Saia chu a tang deuh tung a,ka melh chuan a hmai alo sen deuh tun mai.
"Hria e" ati leh mai a.
"Sharoni nen hian hmuh che u kan in beisei ania. Inu Ropuii thih hnua inu in thil a tihsak che hre ran in i awm dawn nia,ka kal ang e" tih pahin a tho ta hluai a. Ding ve vatin ka mangtha a,Saia erawh chu a thut ngaiin ala thu ngul mai..
"Eng nge in sawi?" Apa a kal chiah tihah chuan min zawt leh nghal a.
"Engmah,eng emaw vel mai mai kan sawi" ka tih chuan a awih chiahlo nge,sir zawnga thu chung in mit tizim sun chuan min melh a.
"Tak taka,ka zep lovang. Haw turin a duh che a,keipaw'n haw turin ka duh che" ka tih hap chuan hmalam hawiin a thu ngil nghal hmak a,a hmaa tui chu thli in a tlak nghal pap.
"Min ning tawh anih kha" tih paha hmalam a melh ngur chuan ka nuih hak a,a titau deuh em maw ni.
"Teuhlo,ka ninglo che" tih paha a kut ka tawh chuan alo vuan let hauhlo.
"I hrethiamlo maithei,mipa aiin hmeichhia hian hmingchhiat theihna kan ngah zawk a,kei phei chu englai pawha puak chhuak thei reng ang kha ka ni tih i hre bawk. Tunah miin sawi rihlo mah se,nakin deuhah chuan anla sawi anga. Ka Thenawm satliah mai mai nen pawh khati khawp khan min sawi zui a,nang phei chu ka inah i awm ania,han ngaihtuah teh,miin hre ta se engtin nge an sawi a,inzuar thin ang hialin min chhuah mai dawn sin" ka tih chuan min melh zawk a.
"Engtik nge i nu thih cham chu ni reng reng?" Tia boruak thlak ka tum chuan țhutthleng hnung nghen dat pahin
"Karleh" ati mai a. A sawi tam peih vaklo anih ringin ka zawt zui tawhlo mai.
"Ka thusawi kha ngaihtuah zui ve deuh rawh aw,haw pawh nila nitin kan inhmu thei thova" ka tih chuan min chhang lova,ngawi renga a thut ngul hnu chuan a tho hluai a. A awmdan teh thut thut chu a mak hle.
"Kal ang" atih chuan
"I bang thei tawh ami?" Tih pahin ka tho ve nghal a.
"Thei e,haw ang" tih pahin min kai lawk a,chhuah pahin kan Coffee man chu a pe a,ngawi rengin min kalpui mawp mawp a,Civil Garage kan thlen chuan biak ka tum zet a,a hmel a chan em vang chuan ngawi rengin Car ah ka lut ta zawk a.
Apa nen kan inbiakna min zawt a,thu pehhel kual lovin ka hrilh tlang mai a,kan ngaihdan a inang chiah bawk. Chumi ngaihtuah zui ve tura ka hrilh chu a diklo viau em ni,tunah chhuak nghal rawh pawh ka ti lova,mahse,tinge,a awmdan vang hian tihsual nei anga ka inngaih tlat?????
In lam pana kan tlan chhung zawng chuan kan inbe leh tawh lova,biak tuma ka hawiphei apiangin a khabe che rawlh rawlh khawpa hmalam a melh ngur ka hmuh vang chuan ka be ngam meuhlo.
Kan kawmchhak kan thlen chuan scooty ka keng tih ka hrechhuak zawk,engtin nge ka theihghilh theih zawk ni,hepa hrek hruk vang vek hi..
Chhuk hma chuan ka phone ka phawrh a,MIZRUN ho chu ka be ta tawp a
"Dawrpui State Bank bulah khan ka scooty ka kalsan a,a chahbi inah ka kawl daih bawk sia,min lo lamsak thei ang em?" Ka tih chuan ka sir mi chuan a seatbelt vel chu a phelh ruk ruk a.
"Aw,in awmna lo sawi la,chahbi kan lo lam ang" antih chuan kan awmna vel chu ka sawi a,tikhan chahbi anlo lam anga,ka scooty chu an rawn khalh thla mai dawn a ni. Mizrun ho hian Instagram ah account pawh an nei a,khawilo kala thil dah/lam ngaite,awmhmun atanga thil tihfel duh chuan an koh mai theih,an rintlak a,an rate pawh a pangngai viau,ka hman ngun vangin hmelhriat pawh ka nei nual tawh...
"Tunge i biak?" Thut hle hle paha atih chuan seatbelt ka phelh ve nghal a.
"Scooty ka keng tih ka lo theihghilh daih alawm,anlo lam ang" ka tih chuan min chhang leh ta lo.
"Chhuk ila" tih paha ka va melh chuan a steering chu ava hum leh rih a.
"Naktukah ka haw dawn nia" tih leh a leia a biang hawl kual ralh pah chuan a thaw hawk a.
"Ka sawi awmzia i manlo deuh ami,tun tut tuta chhuak turin ka tilo che ania,ipa nen kan thusawi hrilh pah che in ka sawi mai mai anih kha" ka tih chuan
"Pawilo" tih leh kawngkhar hawn a rual a,engmah sawi zui tawh lovin a chhuak nghal.
Eng nge kha kha,eng nge pawilo atih ber chu. Pawilo ti siin a pawi hle anih kha. A awmdan khan min ti hahdam lo tawp. Ka tisual zawk em ni,tinge maw engmah hi a kal tluan fumfe theih reng rengloh??????
Mizrun ho lo chhuk chu ka lo nghah angai bawk si,Pakhat lah chu min hre tawhlo ang maiin a chhuk thla luah luah a,a lut daih tawh bawk.
Minute tam pawh ka nghah hma chuan anlo thleng mai a,college thil thawn tur vel vanga ka hman thin mipa tho kha alo nia,ani nen hian kan intawng fuh thei riau,nge,kalna tur veng an insem thin zawk.
Chahbi chu pe in a awmna lai vel chu ka hrilh a,pawisa ka pek zawh chuan a kal leh nghal mai.
Mahni inchhung ngeia zu luh pawh ka huphurh lek lek mai. Eng tak kha nge alak fuhlo ang aw,kan thusawi min zawt a,ka hrilh mai sia. Engmah kha keichuan diklo ka hre ve lo. Tihtak emah chuan,ka ina a rawn awm dawn te khan dan tang tang ka tum a,a chhan pawh vawikhat ka hming alo hliau tawh vang a ni. Mahse,apu thihna meuh pawhin a dang zo si lova,ka dan theih ni lul lovin ka hria a,ka pawm ta mai kha ania. Aaaa,Engpawh chu nise tuar mai ang,nakinah ala hrethiam zawm ve mai ang,mipa ania,Saizami nen an boruak tihloh,vawikhat pawh hmingchhiatna em em nei lovin chhungkaw zahawm takah a seilian a,a hrethiamlo pawh hi a awm lutuk tho.
Ina ka luh chuan alo reh duk a,sitting room ah a awmlova,bathroom lamah a awm anih ka ring. Pindan lam panin ka inthlak zui nghal a,ka chhuah hma hret chuan Lily bawkin min lo call leh a,ka buai a talangin call let nachang pawh ka lo hre leh tawhlo.
Min rawn call zin ngaihtuah in eng thu pawimawh teh vak a sawi chuang lova,an zirna chungchang leh ama chanchin hlir a sawi.
"Ka nu damlo chu eng nge a an?" Atih chuan
"A damlo ami,engmah ka hre ve hleinem?" Ka ti vat a.
"Eee,nimin nge maw ni khan a luhai a chhuak leh a,bathroom kawngka bulah alo tlu aniang,i mangan a hlauh vangin a hrilhloh che anih chu" atih chuan ka mangang nghal.
Kan inbiak zawh veleh ka nu chu ka call vat a,
"Hello" rawn titu aw ka hriat veleh rang zetin ka off leh vat a,a rawn call let a,ka off nawn leh hmak. Ani kha ka be peih reng renglo,a mawiah
'Ka pa,ka nu ka lo bia' tihte kha angai leh anga,ka peih teuhlo.
Ka thut deuh vang vang hnu chuan ka call leh a,Verandah lama Saia ri ruk ruk ka hre zui bawk. Lianzuala bawk chuan
"Hello" a rawn ti leh a,teh sek chuan
"Ka nu kha phone pe teh" ka tih chuan
"Ee,hei a mu" ati chiah
"A thiltih ka zawtlo che,amah ka be duh" ka ti deuh hrawk a,ka tum ai hma hian ka vin leh thin,ka haw em a ni.
"Aw,Mate" chauh hmel zeta ka nu in atih chuan ka tah a chhuak mai dawn.
"I nuamlo ami?" Ka tih chuan
"Nuamlo hranpa love,ka tlu sual deuh a" ati mai a,heihi ania ka ngei,ana hi ka bulah a sawi duh ngailo,ka naupan lai atanga tun thlengin. Lung thalo a nei tih pawh Lianzuala ka atanga ka hriat chawp a ni.
"Chutiang te chu min hrilh ve tur alawm" vui aw taka ka tih chuan
"Kan chhungkua angah i inngailo deuh khan ka hria a" ati tham chhel a,phone chu dah sawn in ka mittui tling chu ka khap let sak a..
"Chutiang in ka tihloh kha" hnuk ulh lek leka ka tih chuan a nui deuh hak a.
"Ka uan anih kha,i rilru alo hah ka hlau a,ka hrilhlo mai che alawm. Bakah,inau in a hrilh leh che ka ring thova" atih chuan chhang lovin ka ngawi reng a.
"I che thei em?" Ka tih leh chuan
"Che thei e,ka ke hi ana deuh tih mai ania,ipa a awm a,ka chetna apiangah min pui thei alawm,lungngai suh" atih chuan ka inpet ruh teuh a.
"Naktuk lamah ka lo tlawh dawn che nia,in enkawl tha la" tih pahin ka inhmer vak a.
"Aw le,min ngaihtuah reng reng suh,ka tha ania" tia a dah chuan ka khuma lukham chu ban in ka vawm pawp a,chupawh ka la duhtawk lo,ka ban chu en in ka inseh ta nghek a,ana lutuk chu ka vun asa mum mum thei.
Enkawltu a mamawh,enkawl a,a tihtheihloh tihsak a,duat ka duh. Mahse,ka thei lo. Kha ramhuai Lianzuala vang bawk khan ka theilo. Ka enkawl anih chuan riah te kha angai anga,tunah pawn ka riah a beisei khawp ang. Mahse,ka theilo,ka theilo a ni tawp. Ka nu damlo awmpuina bula alo vei ve sek turte,min be sek turte ka ngaihtuah ringawt pawhin ka thisen a lum pup pup thei.
"Tinge a harsat em em le?" Beidawng taka tih sep pahin ka bek sam chu ka tham vak a,ka natna alo chhuak leh mai dawn in ka hria. Chutia ka sam tham vak paha Lianzuala hmel ka ngaihtuah lai chuan ka kut chu tu emaw hian a rawn chelh hnan a,ka hawichhuah chuan Saia hian mitmeng buai nakin min lo en reng a.
"Tinge?" Atih thum sup chuan ka chhanglo,ani pawh hian min tibuai,min tibuai takzet.
Engtin mah ka chhan takloh vang chuan ka kut a rawn hum hnan chu a vuan nghet sauh a,ka sam ata ka kut chu phelh riai riaiin a lasawn ta a..
"Eng nge thleng?" Tih pahin ka hmaah a thu nghal a,ka kut ala hum tlat bawk.
"Eng nge thleng ka tih chu,nangmah in tina duh tur khawpin tu in nge i pawi lo sawi?" Chang deuh taka atih chuan ka beidawng zual sauhin ka hria.
"Engmah,engmah a nilo" tih paha ka kut laksawn ka tum chu alo hum nghet hle a.
"Chuti si tinge nangmah i in tihnat,i inseh a,i sam i tham vak vak bawk" atih chuan amah zawk hi ka thinrim khum mai ang tih ka hlau hle.
"Ka rilru a hah a nimai,ka buai anih hi. Ka nu damlo khum betin ana a,buaipui pawh ka theilo chu anih hi,chupawh huatna vangin" ka ti ta nghek a.
"Chutiang vang mai maiin tinge i intih nat,buai mah ta che,kan enkawl mai dawn alawm" atih chuan a ngai awlsam lutuk chu ka nuih aza zawk..
"I hrethiamlo a ni" ka tih sep chuan ka kut lasawn in min kuah thut a.
"Nangmah in tina tawh tawh,a harsa ang tih pawh ka hria. Mahse,tuvang mahin ina tur a nilo,chu chu i hria em?" Atih chuan ka ngawi reng a,min kuah ang ang chuan ka awm hle hle.
Ka mangan laia hetia min han kuah chiah chu,ka mamawh zia ka in hrechhuak a. A ângchhungah ngaihngam taka ka han bei leh meuh chuan hahdam ka mamawh zia te,thinlung taka min thlamuan theitu awmchhun a nihzia te chu ka hre nawn awn awn mai.
"I hrelo maithei,ka rawn riah tirh khan zanah i buai thin a" atih chuan ka nem sawn vat a.
"Engtin,tinge engmah ka hriatloh?" Hlauthawng ru taka ka tih chuan ani erawh alo meng dam thlup lawi si.
"Zankhat kha i au deuhin ka hria ,chuvang ania kawngka kalh lo tura ka hrilh che. A hnuah chuan ban vai chungin i auchhuak tak tak a,lokal in i ban te ka man a,i taksa a zawi vek a,i thisen kallai te zut in ka Malis hnu che khan i zia leh mai a,engmah hre lovin i muhil mai" atih chuan han awihloh ngawt thu a awm silo. Mahse,ka buai chuan ka buailaiin emaw,zingah ka hre leh ziah si a. Tuna a sawi chu pakhat mah ka hre bawk silo..
"Engmah ka hrelo" ka tih chuan
"Pawilo,i hrelo ang. Chuvang ania,i bula awm tam kha ka tum tlat. Zankhat phei kha chu i phone kha ila lawk a,i ban velah khan i chhu ringawt a,ka rawn hmu lawk silo che a,i ban pawh ana hial ang. I chet tawp lawk theihloh vangin ka ban ka dawh a,mahse,vawikhat i vai thuak a,i tawp nghal mai" atih chuan ka ngaihtuah chiang a,ka kawr hlima ka ban ka en chuan bial deuh hian alo duk thluah a,mahse,a rei tawh tih hriat takin a rawng pawh a dal deuh tawh..
Hei vang alo nih chiah hi,ka kut chelh tlat chunga alo mut ve thin. Lo hria ni ila chuan damdawi pawh ka ei leh mai tur ania. Mahse,amak ka ti tawp theilo,ka buai tih pawh ka hrelo ania,hetiang anih zel chuan a nasa telh telh ang tih pawh ka hlau hlel love.
"Ka tihpalh lutuk,ka lo hrelo a,hria ni ila chuan damdawi ka ei tur ania,i ban chu ana em?" Ka tih chuan alo nui mai a.
"Na lo,i vai thuak ringawt ka tih kha" tih pahin ka ban chu ala kang a.
"I thinrim chhan awm chu ka hria in ka hria. Mahse,tu vang mahin in tina lui tawh lul suh,min hliamtute avanga nat zawm reng nan chuan damchhung hi a reilo lutuk,mahni na insiam nawn mawlh mawlh nan pawh kan taksa hi a hlu. Nangpawh,midangin na an siamsak che chu kan sawi theih a tamlo hle,mahse,i duhthu ngeia na i insiam atan chuan i taksa hi a hlu lutuk,duk khawp khawp phei chuan in tina tawh hauh suh" ka mit taka min melh reng pahin a kut pakhat chuan ka sam ka thamna lai chu a han zen a
"Helai hi ami?" Atih chuan ka bu nghat a.
"Midang vanga i samzai khat tla tur pawh ui rawh,na insiam tawh suh" tih pahin ka in thamna lai na chu tihdam tum ang mai hian a kuttang chuan a chul kual a.
"Ila thinrim em?" Tia ka zawh chuan
"Engvangin?" Ati mai a.
"Ka thusawi vang khan,ipa nen kan inbiakna vel kha" inthiamlo taka ka tih leh chuan
"Engah nge ka thinrim ngawt ang,khatiang vang mai maia thinrim rual ka nih tawhloh hi" tiin min nuih sak a..
"I thinrim loh chuan a that chu,i tawng duh tawh si lova,min haw ta emaw ka tia,min kalsan mai turin ka ngai a" ka tih zawh chuan ka thaw deuh hawk thei.
"Tiang vang mai maiin ka kalsan dawn hleinem che,hei chen ka thleng tawh a,kawng laklawha tawpsan mai atan chuan i uiawm lutuk tlat. Chuvangin,i laka ka rilru put hmang hi ringhlel tawh ngai suh,eng mahin a sawi nghing lovang,i hria em?" Tih pahin min kuah leh a,ka bek chu a fawp vang vang bawk.
"Ka lawm e,ka kianga i awm reng vangin" tia ka kuahlet chuan min kuah nghet sauh a.
"Ka kalsan ngailo ang che,ka lam pana pen khat i rawn pen chuan i lam panin pen sawm ka pen chhuak anga,i kal chak poh leh kei ka tlan thung ang,ka hnaiha i awm tam leh ka hnaih zual zel ang che a,min chelh ngheh poh leh ka thlahthlam ngailo lehzual ang che. I natna te chhawk tura phurrit min siam duh anih pawhin ka awmphaw tichak zual sauhin i lak atanga ka dawn apiang chu lawm takin ka lo pawm zel ang. Chutiang vanga min hlat zawnga i kal anih erawh pawhin ka hlat dawn che tihna a ni chuanglo"
tih paha ka hnung a zut hluau hluau chuan lawm vangin biangah mittui a luanglo theilo. Tiang khawpa hmangaihna leh inpekna ropui hi,Agape hmangaihna aia a duai ka ring bik chuang reng renglo.
______________________________
Kha zawng kha nimai rawh se aw,han tihzawm ka tum viau a,mahse,a laklawh leh vek dawn sia,tah khian tan chhum mai ang
. Marina-i Cousin te khan lo hria ula,zanin ka dah dawnlo aw,naktuk zanah ka dah theih ka ring.
Chuan,naktuk hian dar 9-5 thleng current awmlo tur angin an sawi a. Zuangtui sub station hmangho aniang. Mahse,ka hrechiang chuanglo,kan inleng sawi mai mai ania,alo nih thut takin,in phone te kha lo charge lawk ve ula,bettery low vanga nilenga Zoramthanga anchhia lawh ai chuan
,a nilo anih tak leh atha nimai a,min chhuahchhal kher suh ang che u
(MNF ka ni tihna ni chuanglo ania
)Lalnuna leh lalmuana te pawhin
"Prevention is better than sure" antih kha
. Chawlh nuam leh tha takin inlo hmang theuh dawn nia
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***
Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/