Ka hawi let a,khawi ah nge a kal zui tak ka hrelo. A reh ṭhiap a. Tui dehna hmun ah chuan ka ṭap tih an hriat loh nan hmai ka phih leh tawp. Gos-a'n chaw a ei peih silo a,kei in ka chak ngang bik bawk silo ka siam sa chu ka ti fel leh vek a. Inchung a ka chhoh hmâ in ka hmai te chu darthlalang ah ka en hmasa phawt,ka ṭap ani tih ala lang chiang mai bawk sia engtia han tih tur nge pawh ka hrelo. Hmai ka phih tawh a,a zia ve deuh ka ring a sin mawle.
" Bawihtei khi hnute pek a ngai aniang,a pa'n a pawm a. A tal a tal tawh mai " ka nu alo chhuk thut a ka phu nasa ngang mai.
" A hnêk na a la rei lo a sin " kun deuh ngal pah chuan ka chho zui a.
U Nancy tal alo la awm ka rin laiin Gos-a leh Bawihtei te pahnih chiah chu an lo awm tawh. Ngawi rengin ka lut a,mut a hun tawh tho vangin kawngkhar pawh ka khar nghal. Min lo en a,laklawh deuh chuan ka awm phah tawp,ngawi reng a min en vang chuan nuam ka tilo lutuk a bathroom ah ka va lut ringawt. Ka va chhuah leh pawn ngawi rengin min lo la en,bawihtei chu ka lak sak a hnute ka pe lai chu ngawi reng hian min la en zui ta reng a. Ka rilru tak chuan a thinrim lutuk hian awm ngaihna a hrelo in ka ring hial tawh.
" I ṭap em ni? " A rawn ti chhuak hlawl.
" Ṭap lo e " ka en duh tawhlo. Ka mit a bui ang reng sia.
" I ṭap anihkha " ti hmuk in a tho chhuak a. Towel la in bathroom ah inbual tur chuan a lut zui a. Thil thleng aṭangin a ze ngai kha an bo vek tih ka hre thei a,engtin nge kan awm zui zel ang tih chuan ka rilru a tibuai ber tawh.
Ka hmangaih a,bawihtei pa alo nilo anih pawh in ṭhen emaw chân ka phallo. Mahse tih theih ka neilo a, ani'n inṭhen a lo duh zawk anih phei chuan,ka fa pa nilo chelh tlat turin dik na pakhatmah ka neilo bawk. Mahse a tello hi chuan ka awm thei tawh lo ang.
" Test neih ka duh " hnunglam ah Gos-a'n a rawn ti thut. Ka hawi â ruai a, a inbual zo tawh tih pawh ka lo theihnghilh hman. A kawr pawh ka la la chhuak hleinem.
" Eng " ka ti zet na in ka hrechhuak chiah.
" Thisen test. Florence -i hi ka fanu ani ngei em tih hriat ka duh. Engahmah hmâ in Remruata fanu ka nih tir tawp dâwn lo " a ti hmuk.
" Gos-a!! " He mihring hi tinge a rilru a ṭhat em em mai le? A awih awm lo hial zawk alawm,mi ṭhenkhat nise khami hunlai la la khan min ṭhen in min chhuah tîr ka ring.
" Ka fanu ani lo anihchuan.." ati hman hluk a,engmah a sawi zui duh tawh lo. Bawihtei a fanu anihloh chuan kan inṭhen dâwn tih chu a ṭawngka chhuak aṭang hian ka hrethiam thei tawh; ka van huphurh tak êm.
" Thil hriatsual palh vang liau liau ani. Tiang a tih che hi ka tum lo a sin " ka tih chuan thinrim ni awm zawk tak in a nui zui hawk.
"Rawn kal teh " sofa tê ah bawk chuan a ṭhu leh. Bawihtei a muhil fel chiah a,chutia min ko chu hrethiam lo deuh hian ka en a,dawhtheihna tlachham hmel tak a min en chungin " Vat in " a ti nawn leh.
Khum kalsan in a bul ah chuan ka va phei a,min en kur a,hman ata tawh ze ṭha tak nei si a hmel ngainat awmlo leh hmel rum deuh pu thung anih avang chiah khân tun ah a lungawilo bawk nen an hmêl pawh hmuh a nuam lo zual. Ka ding reng chu ning hmêl pu zet in a thaw hawk a,ka bân rek a man in min pawt ṭhu hnawk. A mal chung ah lai zet in ka ṭhu a,min tih nat a tum sa reng em ka hrelo na in ka ban rek a hmer na erawh a na vei phian.
" Engtin he hetiang hian ka chungah i tih theih? Ṭha takin ka enkawl lo che em ni? " Tûnah tak chuan mize dang daih nei ang maiin a awm.
" Aih "
" Anihchuan engvangin nge min bum? " A thinrim lutuk aniang ka ban rek a hmer na zual a,ka thisen kal lai chu a tawp dâwn ni mai hian ka hria.
" Ka..ka bum lo che. Nilo engmah ka hre bik lo a,thil hriatsual vang zawk ani. Heng thil hi tum rêng vang a thlen tir ka nilo " ka ti bah ta nawk.
" Ka rilru tur hi I ngaihtuah ve em? Ka chhûngkaw hnai tak leh ka nupui,ka hmangaih leh ka rin em em in ka hriat miah loh in fa in lo nei dun reng a"
" Ka tihpalh lutuk Gos-a "
" Tihpalh tih ringawt a tawk lo " a vin ṭhawt. ka phu lutuk a ka che sawn lawih thei.
" Min thlah teh Gos-a,min hmer na lutuk ania " min hmer na tawh lutuk chu ka tuar thei tawhlo. Ka kut phah lam te chu a mur uai uai tawh.
" Engtia rei nge in lo inkawp tawh. Engvangin nge min neih kher? Ka nun tih chhiat kher hi enge a ṭangkai na? Min chhâng rawh " min din pui thut a. Hnai tak a min melh in a thaw hlawih hlawih bawk.
" Min thlah rawh,ka inthiamlo ve tho a sin; engmah ka hre lawk bik hleinem "
" Dawt anihchu" ti hluk in min thlah a, thawmhnaw kan dahna wordrobe chu a hnek nghal ṭhuai. A thinrimna hi a âwm ka ti q,mahse tharum thawh tur ang zâwng chuan ka ngai lo. Kan thawm a na deuh aniang bawihtei a harh a,a ṭap nghal. U Nancy'n kan thawm chu alo hre bawk aniang kawngka a rawn kik in min lo au bawk.
" Inṭhen i duh em? " Min ti ta tawl!! Chhan ngaihna ka hrelo a, chhan dan tur pawh ka hre bawk hek lo.
" Nu leh Pa ni in chhûngkaw hlim tak kan din dawn emaw ka ti hman a sin. He thil atân hian engtiang fa ko in nge ka thawhrim i hria em? I hlim loh ka hlau a,ka theihtawp a hmangaih che ka tum bawk a " a ṭawng lai a ṭawng ve ka tum chuan min lo khap thuai.
" Theihnghilh rawh,awmzia awm tawh lo " ti sup in kawngka lam a pan a, a hâwn rualin U Nancy'n " tinge in thawm a va na ve? " Alo ti a.
" Engmah anilo " tih chiah in a chhâng a,a chhuak zui daih bawk.
" Zampui ngati nge a? " Tiin a rawn lut tlang tho a.
" Engmah anilo, kan in hau ve deuh a " ka ti a,mahse ka mit bui ala reh chian loh avangin ka hmêl a hmu chu mak a ti viau mai.
" I ṭap a law? " A ti a. Ka chhâng thei tawh lo, bawihtei ka pawm a hnute pek pah chuan ka insut leh ṭhin.
" Englampang nge a? " A rawn kal hnai a,tun kan in hauhna thu chu sawichhuak rih lo ila ka duh avangin thil dang daih chhuanlam chuan ka sawi a " I sawi ṭha duhlo emai " a tiin an chhuak lehnghal.
Kan nufa tê chuan kan mu a, Gos-a a lo lût leh tawh mai bawk silo nen ka be ngam tawh chiah lo. Pawn lam ah a chhuak leh tawh zâwk nge pawh ka hre lo a ka ngaihtuah ru khawp mai. Bawihtei pawh kan boruak tawn hria ni awm takin a mu ṭha reuh lutuk a,kei lah ka zuai phah bawk nen a mu ṭha duh chu ka lawm tak tak ani. Dar 11 thleng ka meng a, Gos-a rawn lut theilo chuan ka mang a ti ang tawh; ka tho chhuak a,chutih rual in kawngkhar a rawn in hawng ve nghal zat. A mah anih ringin ka mu ṭha leh thuai a,muhil ang chuan ka lo awm tawp. Ngawi rengin light a off a,naute kan neih chin a kan chhit ṭhin light tê chu êng dim deuh chu an rawn on zui bawk a,a rik deuh rak rak hnu ah bawihtei awmna lam ah chuan a rawn awm tih ka hre thei.
" Bawihte, ka fanu tak i lo nilo anih pawh in i pian tirh ang tho khan ka hmangaih ang che " ati a. A thusawi chuan ka thinlung a khawih lutuk a ka hnuk a ulh hman hial,ka harh reng ani tih a hriat ka hlauh avangin ka in sum hram hram.
Ka vanneih zia ka ngaihtuah a,ka ngaihzâwng ni miah lo a ka neih mipa ṭhat zia leh hmangaihna ngah zia hi. Ani ang mipa hi an tam dâwn lo a,ka tawng ka vanneih zia hi ka sawithiam lo hial zawk. Engtin nge hetiang chung pawh hian tiang rilru te kan lak ah a la put theih zawk ni? A rawn mu ve a,zan dang ang chuan min rawn hnaih lo. Ka hrethiam a,sawisel emaw huat pawh ka tum lo,a tân chuan ka tenawm dâwn êm a sin. A cousin lo mutpui tu ka ni a,tum rêng vang nilo hriatsual vang zawk in ka pasal anih a ngaih phah bawk a. Ka tân Tlanpuii theihtawp in a lak a ta a dah kiang ve bawk. Keimah hi anih hi heng buaina zawng zawng bul chu.
" Bawihte,Duati tinge i ṭah a? " Dar 2 bâwr ah Bawihtei chu a ṭap vak a,a tuihal ni tur ah ka ngai a hnute ka barh pawh in a hne mai theilo. Chhuak deuh hian a ṭap ve reuh a,ka pawm kâng a hnute bawk chu ka barh ṭha leh a,ka pawm tak ah chuan a zia ta deuh.
" Zanin chu i mu ṭha dâwn emaw ka tia " tiin an hnute hne chu ka en reng a. Gos-a a rawn chet ve tak ṭual ṭual vângin ngawi rengin Bawihtei chu ka melh lui char char.
" Hnute ngen ami? " A muhil ṭha nghal mai tur ah ka ngai a,a rawn ṭhu chhuak ve.
" Umm aniang " ka ti zo chiah a ṭap leh thut! Ka thawhchhuah pui a,room chhung ah chuan pawm pah in ka tei kual vel a.
A ṭap bâng mai silo a ka nu koh ka rilrûk hman deuh tawh Gos-a'n " ka lo pawm ve chhin ang " a tih vangin ka pe leh zawk. An pafa chuan an in awi a,mak deuh maiin an han in pawm a,an in awih rei deuh chuan bawihtei ṭap pawh a bâng ve ta mai!
" A pa pawm chu nuam i ti ami a? " A tih laiin Remruata leh Rengpuii te thusawi kha ka lo ngaihtuah hman a,nuam lo ti si, Gos-a leh Bawihtei te pahnih hmuhnawm ti bawk si chuan ka thlir reng tawp. Ka rilru in ka ṭawngṭai zui a, thil tam tak ka sawilo,bawihtei hi Gos-a fa anih theih nân ka dil tawp ani ber mai.
Bawihtei muthilh ngheh ah a rawn mut tîr a,kan pahnih chuan in be silo in kan la mu meng rih.Zanin chu ka nu, Gos-a a awm a ti deuh nge zan dang a min men pui fo ṭhin kha a chau tawngkhawng tawh zâwk ni? Bawihtei a ṭah rin reuh nen an rawn lang miah lo mai. Zan dang ah chuan a rawn lang chho vat ṭhin kha ania.
" I ban rek chu a nâ êm? " A rawn ti mial.
" Aih na lo e " tiin ka chhâng. A che a, tlêm in a rawn tawlh hnai deuh ni in ka hria.
" Naktuk ah thisen chu test ṭha ka ti " min râwn hran pawh anilo. A thutlûkna min hrilh a ni zawk mah.
" Ka pa te i hrilh angem? " Ka ti tawp. Nakinah an la hre ve vek dâwn tho si a. Mahse an hriat hun a hmachhawn ka hreh ani.
" Aih,a ruk in. Result a zir in kan sawi in kan sawi lo ang. Engamah hmâ a an rilru tih buai kha a ngai kher lo " ka lak ah a thinrim a min biak pawh in hriat a nuam lo a aw ki pawh a dang daih. Mahsela a ṭawng dan vel aṭang chuan bawihtei a fa ni a ngaihna chhete chu ala nei ve ni in ka hria.
" Awle "a bak sawi ngam ka neilo. Hnial ila tunai hian a thinrim thei tlat bawk si.
" Mut tum rawh a mut lai khan, a harh leh chuan min lo kai tho dawn ania " a ti a.
" Harh tawh lo tur ah ngai ang" ka ti a.
" An chhuah vek hnu ah kan kal dawn nia " q ti leh a,ka chhâng lem tawh lo, naktûk chu ka ngaihtuah a huphurh nâ nen mut pawh ka mu leh mai theilo.
*
" Nizân kha ngati nge a? " U Nancy'n nizân chungchâng bawk chu zing rawngbawl laiin min zawt leh.
" Kan in hau deuh a " ka ti a,a duh khawp chhânna a hmu lo aniang rang deuhin " chu te chu ka hria a lawm " a ti hmuk.
" Bawihtei zan ṭap nasa ṭhin hi entir atia,hruai chhuah ka la phal chiah silo a " ka ti ta ngawt. Bak ah vawiin ah thisen test kha a sawi sia kan chhûng a kan chhuah chuan zawhna an nei dâwn tho.
" Chutiang pawh ani ami? Hrim hrim ah Bawihtei a la sên êm hi,tun ang a han hruai chhuah dawn chu! Bak ah tiang te an entir ngai ami? " a ti niah niah. Ka chhâng duh tawh lo a,ani pawh in a sawi zui rei peih chuang lo.
Zîng chaw te kan han eikham a, Gos-a'n nizân a a sawi tawh ang in chhuak turin ka insiam rilru deuh. Bawihtei a la sên si a,chhuahpui chu ka huphurh a Gos-a hnial ka hreh bawk si. Tun ang bak hian kan inkar boruak hi chhiat belh tawhlo se ka ti. Ka nu'n Gos-a a awm vangin hnathawk turin min chhuahsan thuai a,U Nancy leh ka pa te an kal fel ah chuan bawihtei chu ka buaipui sawk sawk a. Ka tuam a,chhuah hun ah pawh harsatna a tawh loh nan ka ti uluk hle bawk. Ka siam zo a,ka kawr hak thlak ve ka tum avangin ka in hlip a,kawr ka lakchhuah mêk laiin Gos-a'n min rawn pawt lawp!! A lam ah ka pe tek phei nawk a,chumi rual deuhthaw chuan bang ah min nam bet nghal. Hnai zet ah hian min en a,engtia min tih nge a tum ka hrelo a mahse mit ka chhing tawp. A thinrim nge rim lo pawh ka hre hman lo.
" Ngati nge ka vanduai êm êm? " Remruata hnên a ka sawi ang chiah chiah khân a rawn sawi chhuak!! Ka meng dawn chiah a,ka hmui leh a hmui in sik avang chuan ka meng leh ngam lo.
Duhtawk chin a nei lo emaw tih tur hial khawp in min fawp nasa a,a tawp mai duh lo bawk. Ka chhâng theilo a,min fawh ang ang chuan ka lo dawh tawp. A lei lum ṭha zet in ka kâ chhûng a rawn luh rual chuan ka mur sawk! A in la hrang a,ka meng ngam mai lo. Tinge a awmdan hi a tih danglam thut thut thin le?? Min hua leh ka chung a thinrim ang maiin nizân ah pawh an khawsa a,tun ah duh hmel takin min fawp leh bawk si. Ka khabe chu an khawih kual a,chutah a rawn hmer thut! Ka meng nghal kawk a hlau takin ka en bawk.
" Ka fel miah lo a sin " a ti sap. Chu chu engvang a sawi nge anih ka hre hauh lo.
" Hetiang hian min en suh. Ka sual anih pawh in na takin ka siam ve hauh lo ang che " a ti ram hmak a. Ka hlau hmêl hmuh chu an duh lo ngang aniang.
" Min ṭhen mai rawh " ka ti chhuak sep. Ni e,ka lak ah hian a thinrim lutuk tih ka hria a,kan inṭhen hian thil a ṭhat zawk ka ring. Mahse a tello hian ka awm rei thei dawn lo.
A nui a,ka thusawi atthlak ti hmel hi a pu bawk " Nilo,nilo e ka damchhung kawppui atan ka thlang tawh che a,hei hi damchhung ala nilo. Kan thih hun ah pawh nupa kan la ni reng tur ani " a ti sap.
" Mahse min hua ani lawm ni? I hmeichhe huat leh I nun tih khawloh sak tu che chu I chenpui reng thei dâwn em ni? " Ka khabe kual a dawnna thlah in bawihtei muhil lam chu a en a.
" A ṭha leh vek mai ang " tih tawp in min chhâng a " inhnuai lam ah ka lo nghak ang che u " a ti zui leh ringawt.
Thinphu diklo zet in reitak chu ka dinna ngai ah ka ding reng a. Bawihtei tal pah in aw a lo chhuah deuh chuan ka harh zawk,ka pawm a,a la sên bawk si, Gos-a'n vawiin kher a chhuahpui a ti chu ka lawm vaklo. Inhnuai lam a kan chhuk chuan beisei loh deuhin mipa pakhat hi alo awm,eng emaw hi a rawn khai lut bawk. Bawihtei pawm pah chuan ka pan a, Gos-a ka melh rual in " Chhuahpui leh lo mai ang,ka ṭhianpa hian min rawn pan hman leh sia " a ti a. Bu nghat in chupa bul ah chuan ka ṭhu a.
Naute thisen lak na atân chuan ala hmâ ka tia,sawi erawh ka sawi chhuak ngam chuanglo. Bawihtei hian nâ ati ang tih mawlh ka hlau. Mahse Gos-a'n a en vang vang pah in " Dim rawh aw ala sên si " a lo ti leh ang lawi a.
" A nâ angem? " Ka ti a. Diktak chuan keipawh hian in chiu te,thisen lak te hi hrehawm ka tia ka hlau a, bawihtei thisen la tur pawh ka lo huphurh pui.
" Na ve deuh mai thei,kan ti zung zung dâwn nia" a ti a. Mak ka tih chu eng zawhna mah aneilo hi ani. Ani ang nausen thisen test turin kan la dawn ania,mak an ti miah lo nge Gos-a'n engkim a hrilh zawk.
Bawihtei chu a tap ta chiam a,thisen erawh an la la lo. Kan khawih kan khawih vang a harh leh ṭap ta zawk ania,mahse thisen lak hma in a ṭap nghal bawk sia ka khawngaih lehzual. Gos-a ka va en a,engtinmah alo ti lo a en tawp a, ka haw lek lek zawk.
" Lo pawm hnai deuh la,a reilo ang " thisen la tur pa chuan a ti a. Keimah takngial pawh in ka hlau sia ka hnaih pui ṭha ngam lo.A pian hma a ka in checkup leh eng emaw vel a in chiu ngai te khân ka hlau a,ka chi ai phah fo mai.
" Gos-a lo pawm mai teh,ka en theilo " ka ti tawp. A rawn tho a,bawihtei min lak sak rual chuan ka tho a,choka lam ah ka tlan phei nghal.
An chiu hun a bawihtei na ti ṭap tur ka ngaihtuah chuan ka tha te khur dawn hman lek lek. An thâwm ka ngaichang reng a,mahse ka beisei ang engmah ka hrelo. Va phei ka tum rilrûk lai takin " Ti rih lo mai ang, nâ ati dâwn emai " Gos-a'n a tih hi ka hre pha a. Chak tawk a kal in an bul ah ka va ding vat a, Gos-a'n ngawi rengin min lo en.
" Nidang ah ni mai rawh se,i lo kal hah viau a chu ti rih lo mai ang " Gos-a'n ati leh a, bawihtei min hlan lehnghal zat.
" Nia, tih rih loh kha a pawi lo " chupa pawh chuan ati ve a,lawm tawk in inchung lam ah kan in pawm chho nghal.
Bawihtei khum a ka mut fel chiah min lo call a,no lawng anih vang leh pawimawh a nih ka rin vangin ka chhâng mai a " Vawiin ah ka lo kal leh thei angem? Bawihtei kha ka ngai lutuk..nangpawh " a rawn ti!! tu dang anilo Remruata!! Ka block char char avangin no dang in min rawn be leh nia!!
" Lo phone chhên suh " ka ti tawp. A va han beidawng har em em ve!
" Khawi maw? " Gos-a a lo thleng chho leh dêr tawh!! Phone mi rawn chhuh a, caller id a en a,no lawng tawp anih miau vangin engmah a sawi lo. A beng zawn ah a dah a " I duhtawk mai mai dawn lo anihchuan ka chhûngte i nihna hi ka theihnghilh hmak ang "
" Remruat, a nei duh lo che. A chhan chu maw a hmangaih awmchhun ka nia,engpawh lo thleng Mahse nang kher pan tur che hi chuan ka thlah zalen lo tawp ang. Ka mizia chu i hriat vek kha " tiin phone chu a off hmak.
Ngawi reng a phone chu ban in kut ka dawh a,a ni chu alo nui ringawt " Ka'n kawl mai ange " a ti a,phone chu a rang a rang in ka pawt thla nghal.
" Minute reilote pawh min kawl tir phalloh chuan ka thikthu hi a chhe tawh viau ang " a ti a. A kut a rawn dawh leh.
" Tinge i zia hi I thlâk thut thut a? Ka lak ah i thinrim emaw tih laiin min fiam ti tih thil,ka hrethiam lo che. Min hua anihchuan thup suh " ka ti ta ngawt.
" Hua e,ka haw lutuk che a lawm. Ka thinrim lutuk hian engtia awm tur nge pawh ka hre tawh lo "ati a. Ka thaw halh a,bawihtei ka melh zui thuai " mahse ka huatna che ai hian ka hmangaihna che hi a la nasa zawk " a ti leh sup. Ka thin zawn chu engtin emaw hian a rawn awm thut in ka hria.
" Ka mawl anih hi,tiang hian tuman an tilo ang " ati sap a. A kut a chelh sak ka tum lai chuan an che hrut a kan nufa chuan min chhuahsan leh hmak.