UIRE FANU BY Tluangpuii Cck (Completed)

[ngaia]

" Thuawi deuh khan inlo awm thei mai lo em ni? , kan ruahmanna zawng zawng in ti chhe vek anih hi" Henrya chuan a ti hluk hluk a , a hliam chu a nat dawn tehreng nen chutia a la phum hluk hluk thei chu a fakawm zawk. " Engmah sawi duh heklo che u ruahmanna in neih chuan min hrilh ta

che u, a tir atang engmah in sawi lo a tunah buaina zawng zawng min bur bun tum hlek suh u " Mimi'n a ti let kha kha a , thil awmzia sawi ni se thlamuang lo deuh chung pawh khan in kan chhuahsan miahlo tur asin mawle..



In hnial buai a hunlo tih ka hria kan damdawi kawl ang ang

chu Henrya hliam ah ka hnawih sak a , nachhawk na ka ei tir

bawk a chutiang a ka ngaihsakna ka lantir chu mak a ti deuh a ni ngei ang min thlek dauh dauh mai. Mimii a tum bur a Davida'n a biak pawn a meng ling hlar a , biak pawh huphurh awm khawp in a tum zui bur a ,Henry lah chuan a riltam thu a lo sawi ve sek reng bawk a,kei chu ka ril a tam thei meuhlo ani.


Rei vaklo ah Zomuana leh Rosangzuala anlo in zui lut ve hlawl a , ka lo ding ve hluai ringawt a . A hmel chu ka lo en chik khawp a hliam a neih leh neihloh ka en a ni mah zawk a , hliam na sawitur a neih ka hrelo a a biang vel chu a duk ve deuhin ka hria . " In han hmu em?" Davida'n a lo ti vat a ,chutih lai mek chuan mipa pakhat hi a lo lut ve hlawl a a hmel leh a landan chu a rorum la tih zawng tak ani , a landan chu a nelawm loh ngawih ngawih.


Chupa hmel a hmu chiah chu Henrya a ding vut a " engtin nge ila rawn kal leh ngam zawk a , fair in kan ti dawn ami thiante zar a pawr satliah ringawt " a rawn ti nghal tun tun a , chupa erawh chu a kiai suk duh chauh a , Henry lam hawiin a ner sawk a a ngaihnep zia a tilang ni mai in ka hria . " Bawiha in sum teh, Zorina puihna vang chauh a him kan nih hi " Davida'n a tih leh laiin " dawizep lutuk" tiin Henrya chu a chek hluk a tuman an chhang tawh lem lo.


" A hmel i hmu hman em?" ti thum dutin Zorina chuan Davida chu a melh zawk a , " hmu e , kan han thlen khan in hnunglam atang sawn a rawn chhuak hlawl a , Zomuana te hian an rawn hmuh hman danah an a lo kal leh emaw ni dawn le ?" a ti nuah nuah a , " pahnih a lawm an nih " Zaipuii'n a tih chuan an rawn hawi rang hle . " Enge a nia lawm tiraw, Lizzy " tih pah a min rawn melh chuan kalo bu sawk sawk a ,kan chhuah hma a kan mi hmuhte kha an sawi a nih awm chu.


" Cher sang lampang an nia pakhat zawk kha chu a hmai a tung deuh a , chuan ka hmuh sual loh chuan a hmai a duk deuh bawk a , thawm an dim loh danah an rui a niang " Mimii'n a tih chuan anlo bu nghat nghat a , " i hmu ve em?" Zomuana'n a tih chuan " a hnunglam chauh ka hmu, Mimii'n a hmuchiang a bihthla a " ka tih chuan a nui suk a, ka ding reng chu a bulah min pawt thu nghal zat bawk a . " Pakhat zawk kha chu a sang lutuk , mahse pakhat leh kha chu a vantlang Henry te chen vel hi a niang, pakhat kha chuan bansan a duh a mahse a thianpa khan a duhlo a " ka thiannu chuan a ti leh a . " Rin dan ka nei thiam mai , in sawi hmangah Francisa te thian dun an niang, damdawi khawih thin an nia kan dawp dawn nia a harsa lo ang " Zorina pui khan a lo ti khauh a , enge maw an duh ang le ?.


" Ka chhuk teh ang, hlauthawng suh u an lo kal nawn ngam tawhlo ang " tiin a chhuak zui nul nul a ,a mizia pui chu a nelawm loh ka ti lehzual. Dar 10 tlangah zanriah kan kil ve chauh a ,ka ril a tam tawh bawk nen ka ei ve nual mai . " Kan la haw theih hmel siloh a i chhungte biak sak i ngai em ?" Zomuana'n a tih chuan ka lo hnial a , keiman ka biak tur thu la hrilh a mahse kan sawi mai erawh ka hreh ru ngang mai a , lo haw hmasak lah ni thei in ka hre silo a rilru a buai nak mai .


Mut dawn a ka nu ka call chuan a chhang thei mailo a , putea ka call leh chuan pitei'n a lo chhang hlauh a , kan haw theihloh tur thu ka hrilh chuan minlo hrethiam khawp a a thil rawn sawi ve thung chuan min thawng a , " i pa alo zin a nia aw " a tih sar sar chuan mak ka ti deuh. Ka pa chuan engmah min hrilh loh bakah ka nu reng reng pawn a remti dawn em maw ni aw ..'" Kha tah a awm ve ami ?" ka ti leh zat a " nilo e , pa Hmuna te in lamah a awm a , naktuk tlai lamah chaw a lo ei ang" a ti sap sap a . " Ka nu'n a remti em ni?" ka ti leh hluai a "engmah a sawi buai hleinem" a tih chuan ka thaw deuh huai a ,ka nu kha ka venthawn ber a ni miau a .


Room ah mut vek an rawt a Zaipuii rawt a ni mah zawk a , a hlauthawng deuh tlat tawh a . Chhuatah mutna ka phah a Henry chu a damtha vaklo bawk nen khumah a mu vei than a , na nei ang phei chuan a awm lo na a zing a thawh chuan a hreawm ngawtin ka ring. Mawilo leh dik ti vaklo chung chuan Zomuana bulah ka mu a , ka sir lehlamah Mimii a mu thung a . Kan thiante muthilh hnu pawh chuan ka muhil thei mailo a ,Zomuana hmel ka en leh thin a mit a chhing chial tawh a a chau ve a nih ka ring. Ka en reng lai chuan rawn nui sukin " i muhil thei ngang lo ami?" a rawn ti thum dut a ,a lo muhil miahlo a ni awm e .


" tlaiah khan khawnge in kal ?" ka tih chuan min thlek vung vung a " thlanmual piah deuh ah khan Zorina te ho nen kan buai deuh a , kawn a tang khan kan buai deuh a Henrya'n let san a duh silo a minlo nghah tur thu an sawi a , mal leh mal chuan kan ngam reng mawle .. Henrya kha chu pakhat khan a inringlo lai a khawih a " a tih chuan ka khawngaih reuh khawp mai. Zorina khan a thiante kha a bengdai theilo a ,a thianpa pawh a hnek alawm,a thiante khan an huat phah lehnghal . In ah tute emaw an lo kal tih in sawi khan Zorina'n tu te emaw in an bum chhuak che u a nih dawn kha a tih vang khan Henry leh Davida kha an lo haw hmasa a, kei ni erawh an hnung ah kanlo haw a mahse pakhat kha a tlanchhiatna lamah kan um zui a , kan hmu hmanlo " a tih chuan ka lo ngaithla tui khawp mai.


"Nimin kan chhuah lai khan Henry kha nimin a buaina a neih puite khan an rawn cho nawn leh a , a insum theiloh thleng an nawr lui a kan um zui ta kha nia . Rosangzuala te anlo chhuah hnu khan inlo chhuak ve a , inlo chhuak har an ti zawk ang kan misual pahnih khan , kan awm loh lai a inchhung dap an tum a nih dawn kha , nimin kan buaina a tel ve zingah thurual pui an nei ang, min chelh tlai luih tlat danah khan ruahman sa a ang tlat" a sawi zawh rual chuan min kuah bet hlun in " muhil rawh" a ti ta daih a , ka tawng zui ta biklo.


Ka harh leh chuan Zomuana'n minlo kuah hlun a khaw vawh tawh tehreng nen ka mu lum khawp mai. Kalo muhil leh chu ni in ka harh chuan khua a lo eng uar tawh a , chhun lamah chuan in bul vel tih fai kan rilruk a chaw pawh kan nei hma khawp mai. Tukthuan ei kham ah Zorina a lo lang leh hlawl a reilo ah Zomuana leh Rosangzuala nen an in zui chhuak a , ruahman na eng emaw an nei leh tawh a nih ka ring. In bul kan tih fai zawh pawh chuan an lo let mai lo a ,Davida chu ngaihtha lo ang pawh a a awm loh avangin engmah ka sawi ta biklo.


Naktuk chawhnu lamah kan haw ang Davida'n a tih avangin thawmhnaw vel lo siam lawk ka rilruk a , eirawng bawl nan a la tlai lo bwwk nen ka thiante pawn min zui in thawmhnaw chu kan siam mawlh mawlh a , Zaipuii pawn Rosangzuala thawmhnaw leh a thil vel a siam sak mawlh mawlh a , kan zo fel vel awr ang tih ah pawn lamah thawm a lo awm a room atang in kan chhuak thuai a , rin lawk ang ngeiin Zomuana te an lo ni a mahse mipa sa chhe lam pahnih an rawn tel ve a ,an hmel a tang ringawt pawn 'nam nilenga ' an tih ang chi kha an nih ka ring.


Kan mipa ho chu engthil emaw sawiin an in rawn kual a ,a chang leh an in khak leh thin a ," in duh ang chuan ti rawh u , ka mawhphurhna ka hlen tawh" Zorina chuan a ti hmuk a ,tuman an chhang zui tawhlo. Rosangzuala chu room ah lutin a rawn chhuak leh thuai a , kan hma dawhkan a thil rawn theh thlak chu ka lo en zui thuai a . " Awiii.. Engthil nge ni ? " damdawi ruihtheih lam chi hlir a ni a ka hriatsual loh chuan no 4 te pawh a tel nawkin ka hria .

" Rosangzual, engtin nge hetiang te i kawl theih a ? ti a lo zawt tu chu Zaipuii a ni , keipawn chu zawhna chhanna chu ka hrechiang chak khawp mai. " U Sangpuia kawl a nih hi " a ti khawl a , ka thiannu mai nilo kei ngei pawh chu ka meng phawk viau in ka ring . Tawng mai ka tum laiin Zomuana' n min rawn mitmei a ka ngawi leh rih a , an sawi leh tur ngai changin Zomuana bulah chuan ka thu thla thuai bawk a .


" Ka u thlarau pawh zah zo lo khawp a ,a ruk a ral a in chetna chhan thil hi la ula kal rawh u" a ti leh hluk a , a hma a thu pa pahnih chu an in melh tawn zak zak a ,pakhat chuan a chil a lem khawlh a . " Kal ta che u " Zorina pui khan a lo ti ve khauh a . " Kaaa kan nilo tak tak a nia aw , Sangpuia kha damdawi in kan hrai lo tak tak a mah kha a sual lo a , mahse Sangtei chu kan vo ngei a Sangpuia a lo hrilh leh sia ,chuan kan thil kha min mansak a police kut a hlan ah min vo bawk a , a mah pawh kha kan vo a mahse min hlau lo a " pakhat chuan a ti , Zomuana chu a lo nui hawk a " kal tawh rawh u" a lo ti daih a .


" Kan lawm lutuk , in sawichhuak lo tak tak ang maw ?" tiin Zorina chu an melh leh te te phawt a , khawchhung mi a ni bawk nen an ngaichang ber a nih hmel, a lo buk ve nghut takah chuan hmanhmawh fe in an chhuak nghal rawk rawk a , buaina chu a fel duak na in hriat duh ka la ngah lutuk tlat...


Kha mi te pahnih kha thawm lo siam tu te kha an nia , U Sangpuian am damdawi a mansak anlo zawng thin a ni awm e . Vawinah Zomuana te chhuak khan anlo vo a an hlau viau a niang an in puang tha duh emai , keimah tak phei chuan ka khawngaih khawp mai. " Khawiah nge U Sangpuia bialnu ve kha?"ka tih chuan "Aizawlah" tih zawngin min chhang a ka zawt zui duh ta biklo.



Dar khat velah haw turin khua kan chhuahsan a awm rei lo mahila a ngaihawm dawn hle in ka hria . Chutih rualin U Sangpuia tawpna tak tak ni in la hre bawk a , Rosangzuala mawlh chu ka ngaihtuah a ani tan phei chuan a u atang a a beiseina chu a bo tawh viau in la ring a , rilru dam takin U Sangpuia chu thlahliam ve thei se 'a dam tawh ani' tih pawm thiam se ka ti khawp mai. Harsatna em em nei lo in dar 7 velah in kan thleng a , Zomuana'n min thlah thlap a a lo lut ve bawk a rin loh takin ka pa alo awm ve bawk a , ka pa ka hmuh chuan ka tim deuh ringawt a.


Ka nu chuan minlo be nghal sawk sawk a , " inlo tluang em? In chau em?" tih angreng a lo sawi a ,Zomuana chu chawi ei ve nghal turin a sawm bawk a mahse a lo hnial ve vat thung a . Sawmtea lahin enge ka hawn tih minlo zawt ve sek bawk a , chauh pawh a sawi theih meuhlo. Ka pa chuan a be ve lo na in a en chik khawp a , Zomuana erawh chuan a enghelh loh hmel khawp mai. Zomuana haw tur chu pawn thleng ka va thlah a , " ka pa a nih kha " ka ti nghal thawr a lo nui suk in a bu ve nghat a . A chauh ka rin a vangin chelh muang tawhlo in ka mangtha thuai a , a tlan liam hnu ah ka lut ve ta chauh a .



Ka va luh leh chuan chaw ei an lo siam a chaw ei pahin kan zinna chanchin te min zawt a , an zawhna chu ka chhang tha viau a , naupang thuawi deuhte pawh ka ang zawkin ka hria . Ka pa nen erawh kanin be mang lo a , sawi duh nei teuh sawi hreh si in kan awm ve ve ni mai in ka hria .


Show post links
Top