My Arrogant Husband BY Becca Lnz (Completed)

[Rebec Nunziri]

Chapter-1



Stacy Ramthansangi POV




"Nilo doctor i hre sual a ni ngei ang" ka ti sep a, doctor thusawi zawh chiah khan min thawng lutuk mah mah a ni, "Stacy, thil ni thei ka sawi mai chauh a ni ka tihkha, karleh lamah pangai zawk in test te i nei leh anga, engkim chu a chiang vek mai ang" a tih leh te chuan ka a chhulh nimai hian ka hria, doctor hnenah chuan lawmthu sawi sap in ka chhuak a, ka pum chu ka khawih a, a ni theilo ang, hetiang thil hi a thleng theilo, ka tello in ka pa hi engtinge a awm theih ang?..




Damdawiin corridor ah chuan ka kal phei a, ka ngaihtuah na ringawt chu ka kawm zui mawlh mawlh bawk, ka pum ah hian bawk a awm a, chuchu cancer a ni thei tih doctor khan min hrilh a nihkha, a awmna a rei tawh thu leh a bawk chu a len viau tawh thu a sawi te khan keimah lam ai mahin ka pa ka ngaihtuah zawk, tunah chuan ka pa hian keilo in nghah na dang a nei tawh lo, keipawh hian ka pa lo chu he khawvel ah hian neih engmah ka neilo bawk.



Ka hma lamah enge awm pawh hrelo chuan ka melh ngai chu ka melh vawng vawng a, ka hmaa rawn ding thim khup an awm takah chuan muangchangin ka hawi chho a, chuta ka mi hmuh chuan min ti chau zual, mitmeng dur khup a min en chungin ka thaw hrawih a, "Khawiah teh hrep nge i lo kal hman, i thiltih tur ti hmasa lovin" tiin ka kutah chuan a rawn chelh a, min kai kal nghal dawr dawr bawk, hnial nachang pawh hre lovin min kaih ang ang chuan ka awm zui mawl ve tawp bawk.




Nurse lo duty hnenah chuan nakin deuh a lo lut turin a ti nghut a, min luh pui nghal, khum lo awm ah chuan a theh in min theh ka ti mai, "Ka sawi tawh kha, engvanga lo awm mai mai nge i nih?" a ti hrawk a, ka tim deuh chawih mai, "Sawi ta che, nge ni a ngawih i chuh leh dawn zawk?" a tih leh chuan ka thaw ta hak a, "Mz ka chau lutuk, vawin chu ka chawl mai theilo em ni, thla thum na chiah chiah a la ni si a" ka ti sep a, ka thusawi vanga lungawi lo tih hriat lutuk in hmel dur khup in min en a.




"Ka nupui i nih chhan kha enge i la hria em?" ka beng bula a rawn phun sup chuan ka kawchhung chu a vawt rawih rawih hial in ka hria, "Mahse.." ka tih lai mek chuan "Mahse a awmlo, kan in rem siam na kha hre reng rawh" tiin room atang chuan a chhuak a, reilote hnuah nurse nen an rawn lut a, nurse chuan ka hmel dang bel mai a hmuh chuan a ngaih a that hmel loh hle, ka chal ah chuan a rawn dawm a, "Ka pu, i nupui hi a taksa a chak lo riau in ka hria, tunah hrih chuan thil tih chi ber a nih ka ringlo" a hming mai a ka pasal hnenah chuan a ti a.




"Ka ngai pawimawh lo, i thil tih tur chu ti vat mai rawh" Mza chuan a lo ti hluk thung, nurse pawh chuan hreh tak chungin ka banah chuan hriau a rawn vit lut a, a thip vat vat mai, khumah chuan ngawi reng in ka mu a, ka chau hluah hluah a ni, nichin maia ka thu hriat te khan min thawng bawk nen tunah hrih chuan awm hahdam ka mamawh takzet, mahse he ka pasal hian min ngaihtuah na chhete mah a nei bawk silo, eng ang pawn ka that loh thu sawi mah ila engah mah a ngai dawn chuanglo tih ka hrechiang mah mah bawk.




In lama ka haw theih hnu chuan damdawiin atang ka chhuak vat a, tunah hetiang khawp hian ka chau a ni a, mahse Mza chuan min ngaihtuahna chhete mah a neilo tih lan tir nan tunah pawh hian a tan a mi hlu ber bulah a awm leh daih tawh bawk, taxi rawn tlan ka hmuh chuan ka phar a, midang pathum chu an lo chuang tawh, kan veng awmna te ka sawi chuan vanneih thlak takin an kal na lam tur a lo ni hlauh bawk.




A hmaah chuan ka thu a, midang zawng chu chhungkua an ni ngei ang, an in biak danah, "Nanghi ka hre tawh tlat che in ka hria, Pu Saitluangpuia mo kha i ni em?" ka hnunglam atang chuan hmeichhe aw hian a rawn ti a, hnunglam a thle deuh pah hian "Aw.. ni e" ka ti sep, "A nihchu, ka hmu che chu ka lawm hle mai, i pasal pa kha kan chhungkua hian kan ngaisang khawp a sin" tiin a tawng zui mawlh mawlh a, lawmthu te ka lo sawi ve sep sep bawk.




Ni e, ka pasal pa hi chu mi chhuan awm tak a ni reng a ni, keipawh hian ka ngaisang in ka zah viau bawk, Minister a ni a, dikna tan tlat mi leh nelawm tak, mi rethei te ṭanpui peih em em mai a ni bawk, kei ang engmah chhuan tur neilo an mo ka nih dawn pawh khan engmah a sawi buai lova, chu a chhap ah min duhsak in ka pasal te chhungkua ro ro ah ka pa tluk a ngainat hi ka nei lo, ka nu nen ve thung hi chuan kan in be tam lem lo hle a, a mo atan min duh chiah lo tih sawi lang dawt lo mahse a awmdan ah hian ka hrechiang a, mahse ka dem hauh lo.




Tu nu in nge kei ang mi rethei, nu nei tawh lo mai pawh nilo ka pa lah zu ngawl vei leh zu zuar ni bawk chu mo atan pawm duh ang ni, tu nu pawh hian an mo atan chuan hmeichhe tha tak, lehkha zir sang leh mi zawng zawng in an zah rawn an duh ngei ang, keilah chutiang mi chu ka ni hauh bawk silo, mahse hetiang chung hian ka tan awm hreawm in emaw tawngkam mei nei tak tak ka hriat ah a sawi ngailo, Mza hi chu doctor a ni thung a, Mizoram ah chuan doctor lar leh tha pawl tak tiin miten an sawi fo thin bawk.




In ka thleng a ka chau hlauh hlauh a ni tawp, engmah ti kawi peih tawh lovin ka room ah chuan ka lut a, he in hreawm tak hi engtik ah nge ka chhuahsan ve theih ang le, ka pa lah hian pasal tha tak ka nei emaw tiin thlamuang takin nun a hmang chu a ni si a, tuna ka hreawm tawrh na zawng zawng hi ka pa ka hrilh ngailo, a chhan chu a fanu hi min duat em em a, hetiang hreawm ka tuar tih a hriat chuan a keh chhe vek mai ang, ka pasal neih chhan hi amah a ni tih a in hriat leh lek phei chuan in thiamlo reng reng in nun a hmang tawh dawn tih kei ai hrechiang an awm kher lovang.


Flashback


Keihi Stacy Ramthansangi ka ni a, kum 22 a upa ka ni ve tawh bawk, ka pa nen chiah a khawsa kan ni a, ka pa hi mistiri a ni thin a, tunah erawh hna engmah a thawk tawh lo thung, zu a in nasa em em a, zu in lova reilote pawh awm thei tawh lo ang kha a ni, ka pa hetianga a awm hi hmuh hreawm ka ti thin em em a, ka nu nilo, a hming maia ka nu khan ka pa hi na taka siam in kalsan lo nise chu hetiang hian ka pa hi a awm hauh lovang.




Min hring tu nu pawh nise ka haw em em a, a pasal leh a fanu min kalsan in pa hausa tak amah aia kum 20 dawn a upa chu a nei ta hmak kha a ni a, vawikhat te mah min rawn ngaihsak tumna pawh a nei tawh chuanglo, ka nu min kalsan khan kum 12 lek a upa ka ni a, ka pa pawh a la thalai hle, ka pa hi a mipa ah pawh pa ve tak thin kha a ni a, ka nu pawh a nulat lai kha chuan nula chhelo tia sawi ve hat hat thin a ni nghe nghe, ka pa sawidan hmang ah ka nu kha a hmangaih hle a, ka nu pawh khan a lo hnar bik silo nen an in ngaihzawn atanga kum em pawh a ral hma in an in ru nghal a ni awm e.




Ka nu in min kalsan atang khan ka pa chu zu a in tan a, ka nu kha a lo hmangaih bawk nen khatia a hmangaih berin a kalsan kha chu a tuar thiamlo em em a, zu a in nasa zel a, reilote hnuah zu ngawl vei ah a chhuak ta nghal der bawk, hna pawh thawk mumal thei lovin zu a in zel a, khati chung khan kei a fanu hi chu min ngaihthah ngai chuanglo, mut hmunah te khan ngaihdam min dil a, a thiamloh a nih thu a sawi reng thin bawk.




Ka lo upa chho ve zel a, college ka chhuak chiah tih in ka pa chu a taksa lamah natna a tawk chho nasa em em a, kei min enkawl a ngaih si avangin zu hial a zuar ta reng bawk, hreawm ka tih thin em avangin MA pawh kal chhunzawm ta lovin hna ka thawk ta a, ka pa hnenah pawh zu zuar tawh lo turin ka ngen hial, mahse ka hriat lovin a lo la zuar zel a, veng chhung ah sawi hat kan kai nghal vat bawk, ka thinrim em avangin ka pa chu ka hau ta hrep a, khami hnu atang kha chuan a zuar leh ta miah lo bawk.




Hna han thawk ve bawk mahila ka pa damdawi lei nan leh mamawh lei a lo ngai thin bawk nen kan in daih ngai meuh lo, tum khat hnathawk ka bang chu a la hma deuh avangin ke in ka haw a, chutah khawvel a ka mihring huat ber nen chuan kan in hmachhawn ta ran mai, kei leh ka pa min kalsan hnua ka hmuh hmasak leh na ber a ni, "Bawihte" tih paha min rawn pan hnaih a tum rual chuan rang lutuk in hnung lamah ka lo tawlh hnung nghal rawk rawk thung a.




"Bawihte, keimah i nu ka nihhi" tih pah a a rawn kal hnaih leh chuan "Ding rawh" ka ti chang nghal fak, a ni pawh chu a ke pen a tawp ve chawt tho "Bawihte i nu ka nihhi" a tih leh te chuan ka ner sawk a, a va han zaklo mai mai tak, "I hriat suah a nih dawn chu ka nu chu kum 12 ka nih lai khan a boral tawh" a ti leh hmak a, a thaw hap a, "I pa leh nang ka kalsan vang cheu khan ka tihpalh a ni, min haw hle ang tih pawh ka hria, mahse ka thusawi tur hi min ngaihthlak sak hram rawh" a ti tham tiak a.




"I thusawi ngaihthlak na chhan tur ka nei in ka hrelo, ka haw vat angai, chuvang chuan min kalsan vat zawk rawh" ka ti ram hmak a, "Khawngaihin reilote chiah ka thusawi ngaithla teh" a ti leh sep a, "Ka duhlo ka tihkha, ka hmaah emaw ka pa hmaah pawh nise vawikhat mah rawn in lan leh tawh suh ang che, nanghi kan mamawh lo che" tiin ka kalsan nghal hlawk hlawk a,




In ka thleng a, ka pa chu thutthleng ah mu in a lo chat thla leh tawh a, ka thaw chhuak hap, a zu in na no ruak chu sil hmunah ka dah a, room ah lutin ka inthlak nghal zung zung bawk, in ka tihfel hnuah ka pa awmna lam ah ka kal a, a hmel chu ka en vang vang a, ka khawngaih takzet a ni, hetianga hmuh te hi hreawm ka ti, min hring tu nu ngei vawin ah khan ka hmu tih hria se engtinge a awm ang, mahse engmah a hre tur a nilo, kha hmeichhia pawh kha ka pa nen kan hmuh phak ah a awm ka duh tawh lo bawk, ka pa te hi hmuh a tum ang tih ka hlau ru takzet bawk.




Hun a kal ve zel a, ka pa chu a ni telin a taksa chak loh na chu a zual zel a, damdawi inah kan lut khat tawk reng bawk, doctor ten zu in tawh lo turin an ti a, keipawh hian ka theihtawp in ka pa chu zu a in tawh loh nan ka veng ve bawk. Thlakhat chhung zet zu a nghei takah chuan a taksa ah pawh a lang a, ama tawk ah a thau ve kung bawk, ka lawm takzet, ka pa pawh chuan zu nghei hlen hmak chu a tum ruh ve hle, damdawiin lamah pawh kan in check up tir reng bawk a, doctor te pawn ka pa hrisel na a that zel thu an lo sawi a, a lawmawm takzet a ni.




Hun a kal ve zel a, kum khat a liam leh meuh chuan ka pa chu taksa lamah harsatna a tawk leh ta a, zu a lo in nasa tawh bawk nen a natna tak pawh hriat hleih theih a ni tawh lo, ka rilru a hah em em a, damdawi inah ka pa chu a awm ta reng a, theihtawp in hna ka thawk a, mahse ka pa enkawl na tur pawisa chu ka nei daih thei chuanglo, ka mangang lutuk bawk si chu pawisa a pung a puk tir thin ka hmelhriat te hnenah chuan cheng nuai hnih ngawt mai ka puk ta tawp a.




Mahse chu pawh chu kan hmang zo leh rang hle, nuai khat ka puk belh leh a, ka pa pawh a zia awm leh ta deuh, damdawiin atanga kan chhuah hnuah chuan hna ka thawk leh ta char char a, kan pawisa puk zo zai te kha ka rilru in a hre ve reng bawk nen pawisa tam thei ang ber thawh chhuah ka mamawh tih hria in zan lamah pawh chuan hna ka thawk zel a, thla thum a ral hnuah ka pawisa puk na te chuan ba min rawn thing tan ta a, kan pawisa neih ang ang te ka pe chung pawh chuan an lungawi thei ta der lo, a pung lah a tam chak ngang bawk.




A vaia kan pawisa puk kha nuai thum a ni a, thla thum a ral leh meuh chuan a pung zawng zawng nen nuai thum leh sing nga a ni leh der tawh, ka rilru a hah lutuk chu awm ngaihna pawh ka hre tawh lo, thum khat hna ka thawh mawlh mawlh lai chuan mipa pakhat nen kan in hmu hlawl a, a ni chuan kei min rawn pan ding nghal, a ni chu ka hre ve khawp mai, a chhan pawh Mizoram ah chuan doctor tha ber tia miten an sawi fo thin a ni miau si a.




"Min lo hrethiam la, i blood group min hrilh thei angem?" a rawn ti sup a, a aw chu chhum bung viau mahse a rum hran chuanglo, "AB-" a zawhna min zawh chu mak ti ru zetin ka ti a, "Awle, a that chu, min pui theih ngei ka beisei" a ti leh sup a, a tawng dan chu ka hrethiam lo hle, engvanga chutiang sawi ringawt chu nge maw anih le, ka hmelhriat ngai pawh a ni tawp silo nen, mak ti zeta ka en na chu haider hmiah in ka banah a rawn vuan chawt a, ka hnathawh na atang chuan min kalsawn pui nghal dawr dawr a.



End of Flashback



Ka mit chu ka meng chhuak riai riai a, khatih hunlai kha Mza ka hmuh hmasak na ber a ni a, ka nun atang a chhuak leh tawh lo chu a nihhi, kan ba zawng zawng te min rulh sak vek hnuah ka pa enkawl a in tiam a, chumi aiah chuan ka neih a ngai thung dawn a ni, ka pa ka ngaihtuah em avang khan a rawt na siam kha ka hnial phal thlawt lova, ka pawm ta nge nge, mahse kan han in nei ta cheng a, engvanga min nei nge anih ka hriat chhuah meuh chuan engkim a tlai zo tawh.




A bialnu Mary a hum him theih nan chauh a min nei a ni a, min ngaihsak na chhete mah a neilo, ka pa chu a enkawl ngei e, mahse pasal a nihna anga a hlen tur ang pakhat mah hlen a la neilo, thla thum dan ah Mary tan thisen ka pek zel a ngai a, eng natna chiah nge a neih ka hre ve lem lo, vawikhat chu Mza ka zawt tawh a, thinrim takin min vin hrep a nihkha, khami hnu atang kha chuan zawh nawn leh tumna ka nei tawh lo hrim hrim.




Mary thisen pek ka ngaih vang chauh a in nei emaw kan nih ka tih hnu khan thu dang thup a lo la nei tel cheu chu niin, chuthil chu Mza pa hian Mary hi a mo atan a pawm lova, mahse Mza hian a thlah duh chuang bawk silo, apa in Mary chunga tuan a tum takah kha chuan a hmeichhe hmangaih chhanhim nan keihi min nei mai zawk a ni bawk, kha thil zawng zawng ka hriat hnuah khan ka thinrim hle a, Mza kha then ka tum hman hial, mahse Mza chuan ka pa hmangin ka then theih loh nan hma a la a, a hlawhtling ngei bawk.




Mary nen hian an rawn in zui haw fo bawk, mahse ka tan engmah an nih loh vang hian sawisel pawh ka tum hran lo, Mary ka hmuh ve a piang hian damlo hmel pawh hi a pu ngailo, min be ngai lova, awm ve lo ang maiin min ngai a ni mah zawk ang chu, keipawh hian biak ka tum bik lem hlei lova, Mza nen pawh hian kan in be khat khawp mai, in khat ah cheng dun e tilo hian in hmuh pawh hi kan in hmu zen zen lo bawk, kan in hmuh ve chhun ah pawh hian a hmel dur khui bak ka hmu ngailo.




Zan dar 10 a pel tawh, Mza chu a la rawn haw ta chuanglo, Mary bulah bawk a awm leh dawn niah ngaiin kawngka chu ka kalh a, awmpui nula fel deuh mai kan nei a, lang in a rawn kal thin a, a haw tawh thung, room ah bawk chuan ka let leh a, ka mu dawn chiah tihchuan pawn lamah thawm na zet ka hria a ka che lai pawh chu ka tawp chawt nghe nghe, ka room kawngkhar chu ka en reng a, ka thin a phu nghal dup dup bawk.




"Ramthansang, kawngka rawn hawng nghal rawh" ti tuar thawm ah chuan ka phu zawk a, Mza a ni tih ka hre nghal mai, rang zetin room atang chuan ka chhuak a, kawngka ka hawn rual chuan ka pasal hmel thim khup nen chuan kan in hmachhawn ran a, "Engvangin nge kawngka i kalh a?" inchhung a rawn pen luh pah chuan a ti a, "I lo haw dawn lo emaw ka ti a" ka ti sep, engmah a sawi tawh lo, choka ah a luh takah chuan keipawh chu room lamah ka lut lehnghal daih.




Zing ka harh chuan vanneih thlak takin nimin ka nawm loh na te kha nei tawh lo ang maiin ka tho nuam a, ka zang vah mai, room atang chhuakin choka ah ka lut a, Opi chuan rawng a lo bawlh leh mawlh mawlh tawh mai, ka pui ve nghal vat a, "I pu a tho tawh em?" ka ti sep a, "Aw... hnaah a kal tlang nghal dawn a nihkha" a tihchuan ka bu zeuh ringawt a, zing lamah hi chuan inah chaw a ei ngailo, nilo inah hian chaw a ei ngai mang lo a ni zawk mah.




Rawng kan bawl zawh hnuah in bual turin room ah ka lut leh a, inbual fai sar a ka chhuah leh hnuah Opi nen chuan chaw kan ei a, ka thian neih chhun tak meuh meuh a ni a, ka tan a in hawng em em a, Mza nen kan inkar a hrechiang bawk a, engmah zep nei lovin a bulah hi chuan ka tawng ngam thin, chuvang tak chuan a ni a bula awm pawh nuam ka tih em em chhan, chaw kan ei kham hnuah sitting room lamah kan thu phei leh a, tv kan en a, kei erawh in enge chhuak mek pawh hrelo in ka ngaihtuah na ka kawm daih thung.




"Rilru hahna I nei tiraw?" Opi chu ka en vat a, "I awmdan ah khan ka hre vek alawm, ka bulah in sawi thawl i duh chuan engmah zep lovin i sawi thei a nia" a ti leh sep a, ka thaw chhuak hak a, "Ka beidawng a ni, enge tih ber tur pawh ka hre tawh lo, nimin khan doctor hnenah ka in entir na kha ka va lam a, ka pum ah hian bawk a awm a, cancer a ni thut thei tih min lo hrilh a" ka tihchuan a meng phawk vak a, "Enga, chutiang chu engtinge a nih theih zawk?" a thawng hle tih ka hre thei.




"Ka rilru a hah a ni, lo cancer tak tak ta ila ka pa hi engtinnge a awm tak ang?" ka mittui chu a tling nghal pam a, "Pu hnenah i sawi tawh em?" a tihchuan lu ka thing mai a, "Pu hnenah sawi vat a ngai a nihchu, engtik ah nge hrilh i tum?" a tih leh nghal vat a, a tawng te chu a bah deuh nawk nawk a, "Sawi pawh ni ila enga tan mah a ti dawn lo tih i hriat kha" ka tihchuan beidawng hmel zetin a ni pawh chu ka thaw ve hliai a.




Chutia kan thut ngawi vang vang lai chuan ka phone a rawn ri thut a, ka phu deuh zawk mai, min call tu ka hmuh chuan ka la nghal vat bawk, "Bawihi, kan inah i rawn leng phei hman em, biak duhna che ka nei a" ka pasal pa chuan a rawn ti sup a, "Awle, ka hman alawm, ka lo kal dawn nia" ka tih hnuah Opi hnenah ka pa in an in lamah leng phei lawk tura min tih thu sawiin insiam turin room ah chuan ka lut nghal.




Ka pa te in lam pan chuan taxi in ka kal a, ka thlen hnuah inchhung ah lut in awmpui hnenah chuan ka pa awmna ka zawt a, ka nu pawh choka atang a rawn chhuak ve chiah bawk, "I lo kal a nimaw?" a ti sep a, "Aw.. ka pa in min biak duh thu a sawi a" ka tihchuan engmah a sawi chhunzawm tawh chuanglo, ka pa chu library ah a awm thu an sawi takah chuan chulam pan chuan ka kal vat a, "Pa.. ka lo thleng a, ka rawn lut dawn a nia aw" tiin library ah chuan ka lut tlang ve nghal.




"Lo thu rawh, ka thil ziah lai hi kan ziak zo lawk ange" dawhkan a lehkha ah chuan eng waqm hi a ziak chhunzawm mawlh mawlh a, library chu ka en kual a, I TI THEI tih lehkhabu Pc Lalremruati ziah ka hmuh fuh chuan lehkhabu awmna lamah chuan ka kal vat a, la nghak vatin ka keu zui mawlh mawlh a, "I chhiar tawh em ni?" ka hnunglam atang chuan ka pa in a rawn ti dut a, "Library atangin ka hawh a, tlemte chiah ka la chhiar a, chhiar na hun ka neih loh em avangin ka dah let leh daih a" ka ti sep a.




"I duh phawt chuan i nei thei ang" a ti leh sup a, "Tak tak maw?" ka ti deuh hliai, nui suk chungin a bu zeuh a, "Ka lawm e, ka pa" tiin lehkhabu chu ka khup a, ka pa pawh chuan a lehkha ziah chu a lo ziak zo ve chiah bawk nen a hmaa thutna awm ah chuan ka thu thla ve nghal a, "Tunlai chu i rawn leng khat hle mai" a tih leh sup chuan "Nia.. hun ka neilo ve lutuk a, tun atang chuan hun ka neih apiangin ka rawn kal tawh dawn nia" ka ti sep a.




"Awle, chuan ka biak duh chhan che chu ka sawi tlang nghal mai anga, Bawiha chungchang ah a nia" a ti a, ka pa thusawi tur chu ka lo ngai chang ran thung, "Mary nen hian an la in hmu thin a ni tiraw?" a tih leh takah chuan chhan dan tur mai hrelo chuan ka ngawi vang vang a, "Bawihi, ka lakah hian zep nei lo la ka duh tih i hriat kha" a ti nghet leh charh a, "Ka pa, kha lam kha chu ka hriatpui ve vak lova" ka ti sep a, dawt ka sawi vang chuan ka pa hmel pawh ka en ngam lo.




"Awle, engkim ka hre vek tho a, zawh hrim hrim che ka duh vang ania, a hma pawn ka sawi tawh kha, eng ang pawn lo in hmu mahse nang lo chu mo atan ka pawm ngai dawn chuanglo tih hria la, ka fapa hian engtik ah emaw chuan Mary hi a la kalsan ngei ang, Bawihi, ka fanu ang chiah in ka en che tih i hriat kha, ka fapa hi dawh hram hram rawh aw" a ti a, "Awle" ka ti zawi leh sep ringawt, "Nang anga hmeichhe tha hi a tawng leh tawh ngai dawn lo tih a la hrechhuak vat mai ang" a ti leh sup a, sawi mai tur pawh ka hre tawh lo.




"Chuan tu hmel hmuh ka chak tawh takzet tih i hriat bawk kha" a tih leh te chuan chutiang thil chu a thleng ngai dawn lo tih ka hriat chian em avangin ka pa chu ka hmai zah hliah hliah a, sawi leh tur chuang pawh ka nei tawh lo bawk, "Ti rawh, pawn lamah chhuak ve ila, thil te kan ei dawn nia, engmah i la ei bikin ka ringlo, kan in hmuh khat vang nge ka hmu cher riau bawk che a nia" tiin a thutna atang chuan a tho chhuak a, library atang chuan kan in zui chhuak nghal.




Ka nu leh an nula chuan thingpui an lo siam peih diam tawh chu niin sitting room ah ka nu te nen chuan kan thu ho a, Mza hian u hmeichhia leh nau mipa a nei a, a u hi chu pasal nei in Champhai lamah an awm daih vang hian kan in hmu khat khawp mai, Mza nen hian kum 1 dawn chu kan in nei ve tawh, chuti chung chuan vawithum chiah kan la in hmu thung, a fel em em a, in hmu zing deuh phei ila chu ka nel viau in ka ring, chutiang bawkin Mza nau inpui ber nghak tu tur Malsawmtluanga a awm bawk a, ka lakah a fel viau bawk, a ni erawh amah in sumdawnna a tan ve mek chauh a la ni.




Ka pa te nen thingpui kan in a, ka nu nen pawh kan in be ve zeuh zeuh bawk, "I pa hi enge a an zel, a hrisel na te a tha zel maw?" ka pa chuan a ti sup a, "Aw.. a tha khawp mai, a pumpui lam pawh in sawisel na em em a nei tawh lova" ka ti sep a, ka pa chu a bu nghut nghut a, "A that nasat chu, eng emaw harsatna deuh te a nei a nihchuan min rawn hrilh vat dawn nia, tunah chuan chhungkua kan ni tawh bawk a, kan theih ang ang in kan in pui zel ang chu" a ti leh charh a.




Ka pa te ina rei fe ka len hnu chuan in lamah ka haw a, diktak chuan haw ka peih lo hle, mahse ka pasal pa te ina awm reng thu a awm bawk silo, in ka thleng a, a la tlai chhe lo, rawngbawl nan pawh a la hma viau mai, inchhung ka lut a, ka pa te in atanga ka chhuah hnu reilote atang khan ka pum a nuam lo tan a, tunah phei chuan na tawh tak a ni, inchhung ah pawh kun deuh chhal chungin ka lut thei hram a, "Tinge, na I nei em ni?" Opi chu ka bulah a rawn ding vat a.




"Ka pum hi tlem in a na deuh a, a dam leh vat mai ang, min ngaihtuah suh, kan mu hahdam lawk ange" tiin room lamah chuan ka lut a, ka room hi in hnuaiah a awm a, Mza room erawh inchung lamah a awm thung, room a ka luh rual rual chuan drawer a ka damdawi dah that chu la chhuak in ka ei nghal vat a, thlan in min bual huh dup tawh bawk, khumah chuan ka mu nghal a, ka damdawi ei chuan tlem tlem in min chhawk ve hret hret bawk.




Ka muhil lai chu min tung tho nawlh tu an awm avang chuan ka harh kawk a, chutah Mza thinrim hmel dur khui nen kan in hmachhawn nghal siah bawk, "Vawinah engthil nge I tih?" a ti chhum hmuk a, "Inah ka awm, nilo ka pa in an in lama leng turin min ko a, ka va leng lawk" ka ti sep a, a rum nghut thung, "Chuan ka pa hnenah eng thu duk dak lo nge i lo va sawi?" a tih leh chuan a thusawi awmzia hrelo zet in ka en hau a.




"Enge i sawi awmzia?" ka ti ta reng bawk a, ro zet hian a nui hawk a, chutah a hmel chu a hma ai mahin a rum zual, "Hrelo der suh, nang hian ka pa hnenah Mary chungchang dawt in I sawi a nilawm ni?" a tihchuan mak ti lutuk in ka en a, "Chutiang engmah ka sawi lo" ka dar tawn tawn ah rawn chelh in min thing zui nawk a nihchu, "Ramthansang, dawt sawi tum tawh suh, ka in sum theih lai hian eng chiah nge ka pa hnenah chuan i sawi sawi nghal vek rawh" a ti vin tuar a.




"Engmah ka sawi lo ka tihchu, a ni chungchang kha engvangin nge ka sawi ngawt ang?" ka ti ve ta nghek a, chauh nen hetiang a a rawn che hi ka lawm bik teh chiam lo, "Sawi lo nila Mary hian engmah ka bulah a sawi lovang, nang hian ka pa hnenah eng emaw sawi I nei chiang alawm" a tih leh chuan "Lalpa leh, engthil mah ka sawi lo, ka thusawi i awih lo a nihchuan engvangin nge ka pa hnenah chuan kal in kan va zawh chian mai loh ang ni?" ka ti ta fak a.




"Mary hian dawt a sawi lo tih ka hrechiang" a ti hluk a, "Dawt a sawi lo tih i chiang amaw, han ngaihtuah chiang teh, ka pa ina ka awm lai khan Mary chu ka bulah a awm ve a, ka pa nen kan thusawi zawng zawng a hre ve vek i tihna maw, vawinah damdawiin atang a chhuak chiah a, engtinge chutiang thil te chu a lo hriat hman ni?, nge a ni khan min zui ru tu tur a ruai zawk?" nui hak chung chuan ka ti a, ka awmdan chu he mihring mahni thu duh zet, midang zawng zawng a thu hnuaia dah tum vek tan hi chuan a ngeiawm thawkhat viau ang tih pawh ka hria.




"Mary chungchang khatiang khan sawi hauh suh" a ti ta hrawk reng a, ka nui leh hak, "Engvangin nge dawt a min puh tu hmeichhia chu ka dim bik ang ni, khatiang hmeichhe daw heh lutuk, a awmdan a hawi her atang khan hmeichhe naran lo tak a nih ka ring sa reng a ni, nang ang mipa pawh a duh duh dan a a bum kual theih dan ah che hian" ka biang chu a ti nghal sawk a, ka beng a kiu nghal vawng vawng mai, "Kha i lei bawlhhlawh lutuk hmang khan Mary hming hi sawi leh tawh suh ang che, chuti a nihloh chuan maw enge i chunga ka tihtur i hriat chian kha" tiin room atang chuan a chhuak nghal vang vang a.

Cont...

A ngaihnawm hmel in ti em?.. Comment na lamah in lo sawi vek dawn nia aw..