My Arrogant Husband BY Becca Lnz (Completed)

[Rebec Nunziri]

Chapter-4



Lalmuanzova POV




"Doctor khan i taksa a chak loh thu a sawi a" ka ti sup a, ka tawng chu hria angin a awm lo, khum atang chuan muangchangin thawh chhuah a tum a, puih tumna a kut ka va khawih chuan rang lutuk in a lo tawlh sawn nghal rawk rawk a, min hlauh hmel zetin min en bawk, "Bawihi engtin mah ka ti dawn lo che, puih che ka tum ringawt alawm" tih paha ka va awm hnaih leh chu "Aih.. min hnaih suh" ti bah nawk in khum atang chuan rang zetin a chhuk thla nghal tharh bawk.




Ka kawr ka hak tir hnuaiah sawn engmah a ha lo tih a hria a niang chu min rawn en vat a, ka lo nui suk thung, "In be teh ang" ka room atanga a chhuah dawn chuan ka ti zawi sup a, mahse ka thusawi chu hrelo ang hmak in kawngka lam chu a pan lui zel tho, rang zet a che ve vut in kawngka a hawn hma chuan kawngka hmaah tak ka va ding a, a che pawh chu a tawp ve chawt a, "In be lawk ang" ka ti leh sup a, "Ka be duh lo che" a rawn ti fak thung.




"I chunga ka chet dan avang khan min hua tih ka hria alawm, ka in thiam lo em em bawk" a nuih rik hak rual chuan ka thusawi pawh chu ka tawp chawt a, "Lemchan kual vel a ngai lo, i in thiam lo tak tak lo tih pawh ka hria, chuvang chuan ngaihdam chu min dil tum kual der lo mai rawh" ka thaw chhuak hulh a, "I ngaihdan tur chu ka hrethiam alawm, i chunga ka lo chet tawh thin dan zawng zawng nen khan i tan chuan min rin a harsat dawn tih pawh ka hria, mahse ka thiltih a vang khan ka in chhir takzet a ni tihhi chu min hriat sak la ka duh a ni" a ti zawi leh sup a.




"Ka haw lutuk che" kha zet hian a rawn ti chhuak a, "Ka hria, min hua ang tih ka hria alawm, i chungah rawng takin ka che thin a, mahse.." sawi zawm lo chuan ka thaw ham ham phawt a, "Mahse ka thiltih avang khan ka in thiam lo em em a ni, thudik engkim lo hre hmasa ni ila chuan khatiang khan i chungah ka che ngai hauh lovang" a mitmeng huat naa khat chuan min en a, "Eng thudik nge hriat tur awm chu?" a aw chu a ma tawk ah a chang tha ve hle bawk.




"Nanghian ngaihzawng I nei emaw tiin khatiang khan i chungah ka che thin a ni, mipa dang kawp in in khawsa dun fo emaw ka tih lai khan ka haw em em che a, ka nupui ni chunga mipa dang i hnaih anga ka hriat avang khan i lakah pawh ka nun rawng thin hle bawk" ka thusawi chu uluk takin a lo ngaithla a, "Chutah chuan enge i lo buai ve vak, ka duh duh mipa chu ka kawp thei alawm, i tih loh dan pawh a nih bik loh kha, i bialnu kan nupa inchhung ngei a i rawn hruai luh pawh in keichuan engmah ka sawi ngailo, chuvang chuan enge i lo buai ve vak, kei hian mipa dang lo hnaih in lo khawsak pui pawh ni ila khatianga ka chunga i chet kha thil dik a nih phah chuanglo" a ti chang leh fak a.




"I hre tawh lo pawh a ni maithei, nang leh kei a in zawmna neih ve kha chu phuah chawp thil leh in rem siam na mai a ni tih chu, chuvang chuan vawikhat mah ka taksa hi ka phal na tello chuan si leh tawh suh ang che, chuan ka chunga i chet dan tenawm leh nunrawng zet kha ka damchhung zawngin ka hre reng tawh ang tih hre bawk ang che" a ti leh hmak a, "Nilo keichuan ka nupui ang tak tak in ka en che, chuan kan pahnih in zawmna hi ka la thutak viau bawk" a nui hul hak a.




"I lemchan kual hi duhtawk teh, ka kham lutuk, ka tan pasal tha tak anga awm kha chu tum buai duh suh, nang chuan ngaihtuah tur Mary i neih kha, keichu keimah in ka in enkawl thei, chuan awm sawn rawh, helai hmun ah hian second 1 lek pawh awm ka peih tawh lo tih hria ang che" a ti leh nghat a, "Bawihi, ka thusawi hi hriatthiam hram tum teh, nang hi ka nupui ang tak tak in ka en che" ngeiawm zetin a lo meng kual ralh a, mahse engtin mah ti thei ka nilo tih ka hriat avangin a che zia chu ka en ngawt ngawt tawp.




"Keichuan ka pasal angin ka en ve lo che, ka pasal angin ka en ngai bawk hek lovang che, nang hi chu tih luih na hmanga ka thianghlim na min laksak a min pawng sual tu, hreawm taka min nun tir tu leh ka nun a harsatna ka tawh te min belh chhah sak tu i nih hi" a ti leh a, tunah rih chuan engmah sawi tawh lo zawk ila a that ka rin avangin ka awm sawn a, kawngka chu a hawng nghal a, a chhuah rual rual chuan na zetin a rawn khar lehnghal bur bawk.




Ka thaw chhuak hawk a, Stacy rilru hneh hi thil awlsam a ni dawn hauh lo tih ka hria, mahse ka tum ang, min duh ve hma chu keihian ka bansan mai mai dawn hek lo, ka duh ang chiah hian min la duh ve ngei ang, nilo min hmangaih ngawih ngawih turin ka la siam ang, ka mizia a chhe lam chauh a la hria a, tunah erawh ka duat na bak a dawng tawh lovang, chuchu a ni hian a phu reng bawk a ni, ka nupui a nih na angin ka theihtawp in ka ngaihsak tawh bawk ang, a ni aia dah hmasak tumah ka nei tawh hek lovang.




A tuk lamah chuan hna ah kal nghal mai lovin room ah rei fe ka in khung hnu chuan inhnuai lamah ka zuk chhuk a, ka nupui chu choka lamah a awm tih hriat takin a tawng ri chu ka hria a, choka lam pan chuan ka kal ta vat, Opi nen chuan rawng an lo bawl mawlh mawlh a, choka luh na bula ka ding pawh chu min hmu hauh lovin an titi mawlh mawlh a, ka nupui chu ka en a, a chau tih a mitmeng dul zet ah chuan ka hmu chiang ngang mai, a chunga ka thiltih te kha ka mitthla ah a rawn lang a, ka kut chu ka hum ruh nghal tawlh tawlh bawk.




Chutia ka lo din lai mek chu Opi chuan min rawn hmu fuh a, tawng tum a a ka a ang hman zuai tih chuan tawng rih lo turin ka lo mit mei vat a, a ni pawh chuan a lo hrethiam ve mai bawk, Stacy ringawt chu ka en a, Opi chu a nel tih hriat takin a be bawrh bawrh a, a thil chan lai chu a chan pah mawlh mawlh bawk, hetiang taka a tawng lai hi ka la hmuh loh vang nge hmuhnawm ka tiin en nin har ka ti takzet, a tawng zawng a a hmui chhah tap mai che kual thin te chu en loh phal chi zia zang a nilo.




Chutah a thil chan lai a zo chu a rawn hawi chhuak a, min hmuh ve leh nichin a a hmel nung deuh sarh leh nuam ti tak a titi na hmui ngei chu a chip deuh hmak a, tawng leh tum ang pawn a awm tawh lo, sil hmunah chuan kal in a thil chan zawh tak chiah kha a va sil nghal mawlh mawlh a, a hnunglam chu ka lo en reng, "Ka pu, chaw ei kan peih tep a, i ei ve nghal ang tiraw?" ka chhan hman hma chuan "Op kan pahnih chiah in kan ei dawn, a ni chuan buaipui tur pawimawh a nei" Stacy chuan a lo ti nghat a.




"Engmah tihtur ka nei hleinem, kan ei ho dawn nia" tiin dining chair ah chuan ka thu thla dawt a, Stacy chuan engmah a sawi tawh em biklo, Opi nen chuan chaw ei an siam mawlh mawlh a, inah hian chaw ka ei khat hle, mahse ka ei ve chhun ah hi chuan kan chawhmeh hi a tui thei hle thung, ka nupui hi ei siam thiam tak a ni tih ka hre chiang hle bawk, Opi nen hian rawng bawl dun thin mahse Stacy hian Opi hnenah chawhhmeh siam dan a hrilh pah thin tih pawh ka hrechiang hle bawk.




"Op khata ding reng lo khan lo ei ve rawh" Stacy chuan chair a thut pah chuan a ti a, Opi chu a dinna ngai a la ding reng chung chuan min rawn en a, ka awm ve vangin dawhkan hi a rawn kil ngam lo tih ka hre reng, "Ni e, rawn ei ve nghal mai rawh, i ril pawh a tam tawh ang" ka tih takah chuan Stacy bulah chuan a thu ve nghal zat a, chaw kan ei lai te chuan an in be reng a, ka nupui chuan kei chu awm ve lo ang maiah min ngai tih pawh ka hria.




Chaw kan ei kham a, room ah chho in damdawi in lama hotute chu ka bia a, vawi in chu hna ka kal dawn lo a ni, a chhan pawh ka nupui bula nileng hun hman ka duh vang a ni ber, inhnuai a ka chhuk leh chuan hmeichhe pahnih te chuan mak tih hmel takin min en dun ha a, a chhan pawh ka hrechiang, awm hmun kawr nen ka la nih vang a ni, "Op vawin chu i chawl hahdam dawn nia, engmah tihtur a awm lo bawk a, i haw thei ang" ka ti nghal sup a.




"Awle, a tih zia hlauh e, ka nu damdawi inah kal pui a ngai a, dil che ka lo tum lawk sa deuh hrim hrim a" a ti hliai a, a thutna atang chuan tho chhuak in a bag a la a, Stacy chuan bathlar thleng a va thlah a, a rawn let leh hun chu ka lo nghak ran thung, inchhung ah chuan a rawn pen lut a, "Vawin chu hna ka kal dawn lova, ka pu kan va tlawh dawn em ni?" a room lam a pan tawh pawh chu a tawp chawt a, "Nimin ah ka kal tawh, bakah hmu tura i kal ve kher a ngailo" tiin a room ah chuan a lut tlang nghal daih a.




Ka thutna atang chuan tho chhuak in Stacy room lam chu ka pan a, a kalh daih chu niin kawngka chu ka kik a, min chhawn tu an awmlo, eng ang pawn hawng turin ti mahila min hawn sak dawn lo tih ka chian em avangin chahbi spare ka dah na lamah chuan ka kal a, Stacy room chahbi chu la in kawngka chu ka hawng zui a, ka hmu mai lo, bathroom ah a awm ring in a khumah chuan thu chungin ka lo nghak a, a rei deuh phian lehnghal, a inbual a ni maithei.




A room chu ka en kual a, ka lut ngailo bawk a, tun hi a room chiang taka ka hmuh vawikhat na a ni, a lian lemlo na chu a fel fai thlap a, hmeichhe room a ni tih a hriat hluah hluah bawk, drawer chu ka hawng chhin a, chutah damdawi tam tham zet hi ka hmu a, a vai chuan lu na leh khawsik rehna damdawi deuh vek a ni a, a sang hlawm em em mai lehnghal, nimin lama doctor thu min hrilh kha ka hre chhuak a, ka thaw chhuak nghal hawlh bawk, a rang lama damdawi in a ka hruai vat a ngai dawn a ni.




Bathroom kawngkhar a rih rak takah chuan drawer chu hmanhmawh zetin ka khar nghal a, Stacy chu bathrobe chauh ha in a rawn chhuak a, a lu chu towel in a tuam bawk, a room ah ka lo awm chu mak tih hmel zetin min en a, "Enge i lo tih dawn, kawngka ka kalh reng sia" a tih chuan chahbi spare chu a hmuh turin ka lek kang zeuh a, "Chhuak rawh, ka phal na tello in engvangin nge ka room ah i rawn luh ve ringawt?" a ti bak leh hlar a, hetiang em em hian a thinchhia tih ka lo hre ngai miah lo.




"In thlak la, kal na tur kan nei a nia" ka tih chuan a ner nang reuh a, "Khawiah mah nang nen a kal dun ka duh lo, chuvang chuan chhuak rawh" a ti leh hmak a, "Bawihi min hnial teh suh" ka ti hulh, "Khatiang khan min ko tawh suh, engvangin nge hetiang hian i awm tlat a, ka thianghlim na min laksak avang khan ka lakah that chhuah kher a ngailo ka tih tawh kha, eng ang pawn che mahla ka ngaidam dawn chuanglo che" a ti hmak a.




"Awle, khalam kha chu sawi tawh rih lo teh ang, chhuak turin lo in siam la, pawn lamah ka lo nghak ang che" ka ti sup a, "Ka sawi tawh kha, khawiah mah nanghi ka zui lovang che" a ti leh hmak, engmah sawi tawh lo chuan room chu ka chhuah san a, eng ang pawn min hnial mahse damdawi in lamah ka kalpui dawn tho tho hi a ni tawp, a ni hi ka chan mai ang tih ka hlau, a pum a bawk awm hi eng chiah nge a nih hriat chhuah vat a ngai tih ka hrechiang hle bawk.




Room ah lut in ka in siam a, ka zawh hnuah inhnuai lamah bawk chhuk leh in ka nupui lo chhuah hun chu ka nghak reng a, darkar khat dawn ka nghah hnuah pawh a rawn la chhuak thei chuang hauh lo, a room kawngka zawn ah chuan ka ding ran a, "Bawihi, i hman dawn tawh em, a hma tawh lo viau a nia" ka ti sup a, "Ka sawi tawh kha, i rual in ka chhuak peih lo, i chhuak chak viau a nih chuan nangmah in i chhuak ve thei reng alawm, chuvang chuan min nawr luih tum lo mai teh" a rawn ti vin that a nih chu, ka nui chhuak huk a.




"I rawn chhuak dawn lo maw?" ka ti sup a, ka la nui reng bawk, "Aw..chhuak dawn lo, i bula chhuah ai chuan inah awm nilen pawh ka duh zawk" a ti leh hmak reuh a, "Awle, a tha alawm, ka pu hmu turin ka kal dawn a nia" ka sawi zawh rual rual chuan thawm ri deuh rak rak chu ka hria a, ka nui nghal suk bawk, kawngka a rawn in hawn ve leh chuan lo in siam tha vat in thutak hmel zet chuan ka awm leh a, "Enge i hriat a, ka pa hmu tura i kal hi ka duh hauh lo" a ti nghal hlar a.




"A nih chuan ka thu zawm rawh, i in siam vek tawh emaw ka tih laiin nang lah chu heti hian i lo la awm mai mai chu a ni sia, hun a kal zel a nia, in siam vat la, ka thusawi zawm lova i insiam duh lo a nihchuan ka pu hmu turin ka kal dawn tih hre bawk la" tiin ka in her a, sitting room lam chu ka pan lehnghal, "Hmeichhe pa" ti tuar in kawngka chu a khar ti deuh bur a, ka nui vur vur mai, minutes 10 hnu velah chuan a rawn chhuak ve thei ta hram e.




Motor a kan chuan luh hnuah damdawi in lam chu ka pan pui ta a, ka nupui chu a thu ngawi ngal a, biak buai ka tum hran lo, damdawi in zawn ah chuan motor ka ti ding a, "Enge hetah hian kan ti dawn, Mary thisen min pek tir i tum a nih chuan nimin ah ka pe tih i hriat kha, tunah chuan ka pe thei tawh rih lo, bakah eng ang pawn min pek luih tir tum mahla i bianu tan khan thisen ka pe tawh dawn hlek lo tih hria ang che" thinrim zet chuan a rawn ti chhuak tuar a.




"Chhuak phawt ang, kan thiltih tur chu i hre mai ang" ka ti sup thung, "Ka chhuak dawn lo, i duh duh a min tih kual i tum hi bansan rawh" a ti kha leh fak a, "Bawihi, ka thu zawm hram teh, Mary thisen pe tur in ka hruai hauh lo che" ka tih leh te chuan ka thusawi chu awih loh hmel takin min en kal a, "A nihchuan helai hmunah hian engmah tihtur ka neilo, chuvang chuan let leh vat zawk rawh" a ti leh hmak a, eng ang pawn min hnial mahse vawin ni ngei ah hian doctor hnenah hruai in test ka neih luih tir dawn tho tho.




"Ok.. in hnial hi chu duhtawk ila chhuak ang le, i chhuak duh lo talh a nih leh ka pawm chhuak hreh hauh lo bawk che, ka nupui pawm te chu ka chak zawng tak a ni bawk a" tiin kawngkhar chu ka nem hawng rawp a, ka chhuak zui nghal, Bawihi thutna lam kawngkhar ka va hawng ve leh a, luh lul zetin hma lam chu a en ngar a, a che sawn duh eih lo bawk, "Bawihi nangmah in i rawn chhuak dawn nge, ka pawm chhuak zawk dawn che" ka ti sup a, ka thusawi chu hre lo ang hmak in hma lam chu a la en ngar tho.




"A tha alawm" tih paha ka che hrut chu rang lutuk in ka kut chu a rawn beng per nawlh a, "Ka lo chhuak dawn, atthlak taka chet tum suh" zawi si vin hrak chungin a ti a, motor atang chuan rang zetin a rawn chhuak nghal bawk, kawngkhar chu ka khar dawp a, "Ka thusawi awih ve nghal mai thin la chuan hetianga ka tih hi a ngai lo thin tur a nia" ka tih sup chuan min ngei hmel zetin min en a, midang an awm ve nual avang erawh in engmah a sawi lo thung, damdawi in chhung lamah chuan a kal hlawk hlawk a, a hnung ah chuan nui suk suk chungin ka zui ve ta zel bawk.


Zawmna



Stacy Ramthansangi POV




Doctor room hmaah chuan min din pui a, a ni hi enge maw a hriat le, ka doctor hmuh thin cabin a la ni zui, doctor chu a lo buai loh lai tak a lo ni bawk nen kan lut vat a, "In rawn thleng thei maw?, lo thu ula, test ngai te chu vawinah kan test nghal thei ang" doctor in a tih chuan mak tih zetin ka en haw a, eng test nge maw a sawi le, "Stacy, a hma pawn ka sawn tawh kha, hlauthawng lo la, i pum a bawk awm chu bawk satliah pawh a ni thei tho bawk a nia" a tih zawm leh takah chuan a thusawi chu ka man fiah ta kuar kuar mai.




Lalmuanzova lam chu rum zetin ka en a, "Hei vang hian maw damdawi inah ka duh lo chung min hruai luih a?" ka ti ram hmarh a, "Aw.. a rang lama i in enkawl a ngai alawm" a lo ti sup, "Keimah in ka in enkawl ve thei, nanga min buaipui hi ka ngai lo" ka ti leh deuh hmak a, "Ka hria, nangmah in i in enkawl thei tihchu, mahse i pasal ka ni a, I dam loh lai a engmah tilo a ka awm chu beisei suh" pasal tha ber awm zia zang a a awm vel te chu ka ngei hluah hlauh a ni tawp mai.




Doctor chu thil pawimawh ti lawk turin a chhuak a, kan pahnih chiah a kan awm takah chuan ka tho tharh a, "Khawiah nge kal I tum?" tiin ka banah chuan a rawn vuan a, "Min thlah nghal rawh, eng test mah neih ka duh lo" ka tih chuan a rawn ding chhuak ve vut a, "Hetia engmah tilo a kan awm reng a nih chuan i tan a pawi thei tih i hriat kha, chuvang chuan min hnial lo la, test chu nei zawk rawh" min ngaihtuah hmel zeta a tih te chuan ka nuih a za zawk hial, lem chang thiam lutuk.




"Enteh, ka sawi tawh kha, eng test mah ka nei dawn lo, chuan ka chungah hian engpawh lo thleng se, i tan enge ni vak, lo thi pawh ni ila nang te chuan engah mah I ngai tawp nang, chuvang chuan min ngaihtuah der vel hi bansan rawh" a rum chhuak nghal nghut a, "Ka mitah hian chiang takin en rawh, lem ka chang lo tihchu i hmuh theih ka ring, ka ngaihtuah em em che a sin, min kalsan mai ang tih pawh ka hlau, chuvang chuan vawin ni ngei ah hian test chu i nei ang, min hnial eng ang mahla a sawt dawn chuanglo" a ti chhum ta hmuk a.




"I duh duh a min tih kual i tum hi bansan vat mai teh, i thu a ka awm na chhan tur a awm lo ve" ka luh lul chhuah in ka la ti ve fan fan a, engmah a sawi tawh lo, ka chhuah mai hlau ni awm fahran in ka kut ah chuan a vuan reng a, doctor a rawn let leh hnu chuan test te chu kan tih theih nghal tur thu a rawn sawi a, "Doctor nidang ah test chu kan nei mai thei angem?" ka lo ti hmanhmawh a, "Vawin ngei ah hian test chu neih nghal ka duh" Lalmuanzova chuan a lo ti hmak thung.




"Nangmah ni lovin keimah a ni test nei tur chu, chuvang chuan lo in rawlh ve phet tum suh" ka ti ta that a, doctor pawh awm mahse ka zah zo tawh lo a ni, "Stacy i pasal sawi kha a dik alawm, a rang lama test neih kha i tan a tha ber, kan nghak khaw tlai zel a nih chuan bawk satliah pawh lo ni se a than belh ve zel bawk nen a rang lam a i in enkawl vat kha a tha zawk" doctor in a lo tih ve takah chuan ka ngawi ta reng a.




Test nei tur chuan kan kal a, kan zawh meuh chuan chawhnu lam a lo ni der tawh, ka chau ve hnawk thei mai, in lamah kan haw a, inchhung kan luh rual rual chuan ngawi rengin ka room lamah chuan ka kal a, ka mu zui nghal, ka harh leh chuan tlai lam dar 5 a lo pel va tawh, rawngbawl a ngai tih hria in hmanhmawh zetin room atang chuan ka chhuak a, Opi a awm bawk silo nen tiang em em hian ka mut rei ka in ring lo a sin mawle.




Choka ah ka lut chiah chu mak ti lutukin ka meng phawk vak ringawt, "I lo tho chhuak tawh maw, chaw ei pawh ka peih tawh a nia, i ril a tam tawh chuan kan ei nghal thei reng" Mza chuan a ti zang vah a, ngawi rengin choka luh na bulah chuan ka la ding reng tho, "I ril a la tam lo em ni?" a ti leh sup a, ka harh chhuak zawk, "Tam tawh e" tiin choka ah chuan ka lut a, eitur a siam ho chu a rawn chhawp zung zung a, puih ka tum pawn a phal miau loh avangin tih luih ka tum bik lo.




A eitur siam ka ei chu ka rin ai daih in a tui, mahse engmah sawi lovin ka en zawm mial mial a, ka thil ei chhung zawng chuan ka hawi chhuak eih lo bawk, ka ei zo a, ka plate chu nawr sawn deuh in Mza thut na lam chu ka va en a, a plate a eitur pawh chu ei lovin min lo en reng a nihchu, "I eitur kha ei ta che" ka ti hmak a, "Ka ei dawn alawm, mahse khatia tui tih hmel taka ka thil siam I ei lai ka hmuh khan ka puar nghal maiin ka hria" a ti sup a, ka ner nang ringawt.





Kan thil ei na plate bal vel chu keiman ka sil ve ta thung a, tun hi Mza nen in hau lova kan awm rei ber tum a ni hial ang, min biak loh chuan ka be hmasa lo, min biak thung erawh chuan tha takin ka chhang ve mai, mahse hemi avang hian ka huat na te kha a reh ta tihna a nilo, ka thianghlim na tih luihna hmanga min laksak tu a ni a, chu mai nilo a hma zawng a min lo tih retheih na leh hreawm taka min awm tir thin avang pawh khan ka la haw hle bawk.




"Ka room ah ka lut dawn nia, ka mut a chhuak" sitting room a tv kan en lai chuan ka ti a, tunah zan dar 7:30 chiah a la ni, dik tak chuan ka mut chu chhuak lo tak a ni, tlai lamah khan ka mu hrep tawh a, mahse kan pahnih chiah a kan awm hian nuam ka tilo, chu ai chuan room ah awm daih ila a nawm zawk ka rin vang a ni, bang a nasa kan tar chu a en zeuh a, "A la hma nen, tlai lamah khan i mu rei tawh bawk sia, i mut a chhuak leh tawh amaw?" a tawng dan atang chuan ka thusawi chu a awih teh chiam lo tih a chiang ngang mai.




"Aw.. ka mu dawn ania" tih pah in ka room lam chu ka pan nghal a, room chhung a ka luh rual chuan a rawn in thawlh lut ve nghal a nihchu, min rawn zui tih reng reng ka lo hre hauh lo, "Enge maw i tih le, ka mu duh ka tihkha" ka ti bak hlar a, "Ka hria alawm" ti sam then in khum lam chu a pan nul nul a nihchu, enge a tih dawn tih ka lo ngaih chan reng lai chuan ka khum ah a mu ringawt a nihchu, "Enge i tihkha, tho nghal rawh" tiin khum sir ah chuan ka va ding tau a.




Hahdam hmel zet a mu chungin min rawn en a, "Keipawh ka mut a chhuak ve tawh khawp mai, vawin lamah kan chhuak bawk si a, lo mu la, ka lo kuah ang che" a tih te chuan sa tha vet vet tawh tak hi ka nimai, "I zaktheilo lutuk, tho rawh, I mut a chhuah tawh chuan i room ah kal la i khumah mu ve mai rawh" ka ti that a, ner nung chungin min rawn en a nihchu, "Nupa kan nih hi, ti rawh, in hnial lo hian mu hahdam zawk ang hmiang, kan pahnih tan pawh a nuam zawk ang" a ti leh sup a nihchu.




A duh duh a chet a tum ve ringawt chu ka ngei hluah hluah, "Tho vat mai rawh, i duh duh dana awm tum ringawt suh, nge nia i thil siam te ka ei a, i zawhna te ka chhan vang khan hetiang hian i awm zawk?, nanghi ka ngaidam hauh lo che a nia, ka chunga i chet dan zawng zawng kha chiang takin ka la hre vek bawk, chuvang chuan hetiang a I duh duh a awm kual i tum hi bansan vat rawh, chuan min hnaih taka awm tawh bawk suh ang che" ka ti leh nghat a.




"Ka hria alawm, I laka ka thil lo tih tawh te avang khan min ngaihdam chu a harsa hle ang tihchu, mahse ka tum mek a nihhi, vawikhat tal chance min pe leh hram ta che, ka duh zawng chu nang nen a nupa hlim tak nih a ni, Bawihi vawikhat chiah chance min pe leh rawh, ka duh che, ka duh che ka tih hian ka sawi mai mai hauh lo bawk a ni" a ti leh sup a, a rawn tho chhuak nghal zat bawk, a thusawi chu awih tura min duh zia a mitmeng ah chuan chiang takin ka hmu, mahse a ni hi ka ring ngam thlawt lo a ni.




"Engpawh nise keichuan nang nen a in ngeih taka awm emaw, nupa tak tak anga awm ka duhlo, ka chunga i thiltih tawh te avang hrim hrim khan nanghi ka ring theilo che, chuvang chuan ka laka that chhuah hi tum duh suh, nang chuan buaipui tur Mary a neih kha, a ni chauh kha buaipui rawh, keichu keimah in ka in enkawl thei, kha leh chen kha i tello in ka lo in enkawl tawh a, ka dam loh vang mai mai in hetiang hian i awm tih ka hria, chuvang chuan min ngaihtuah viau duh suh" ka ti sep a.




"Nilo i dam loh vang a ni hauh lo, ka sawi tawh kha nanghi ka duh che a ni ka tihkha" a rawn tih leh chuan lu ka thing nak a, "I thusawi pawh kha ka awih theilo, a chhan chu min duh nila khatiang taka rawng khan ka chungah i che ngai hauh lovang, nang chuan Mary alawm i duh, ka thianghlim na min laksak vanga hetiang rilru i pu a nih chuan bansan vat zawk rawh" ka ti leh a, beidawn hmel zetin min en a, a thusawi ho zawng zawng kha chhan nei vek a a tih ka ring miau a ni.




"Min rin mai chu i tan a harsa ang tih ka hria alawm, mahse ka duh che ka tihkha chu ka ti takzet tih min hriat sak hram rawh, nanghi ka duh che a, tun hnai mai atang ni lovin ka duhna che hi a hma daih tawh atanga in tan a ni zawk, ka chapo vang leh ka thil hriat sual te avangin I chungah rawng takin ka lo che tawh thin ngei tih ka pawm thlap, a tha e, ka thusawi te ring nghal turin ka tilo ang che, mahse ka hmuh tir ang che" tiin room atang chuan a chhuak a.




Mza chu a sawi ang tak tak in min ngaihsak em em a, a hna bang pawh a rawn haw tlang thin tih hriat takin a hma ang khan a rawn haw tlai tawh ngailo, zing ah leh zan lamah pawh chaw kan ei rual ta ziah bawk a, tha tak tak in min be thin bawk nen ka tan pawh lo biak chhiat ngawt thu kha chu a awm lo, Mary pawh a reh ta hmak a, mahse chumi avang ringawt chuan ka hlim phah lo, a ruk in an la in hmu fo vang tih erawh ka chhungril hian a hrechiang hle a, engmah sawi buai tumna pawh ka nei hram chuanglo.




Ka test result vawinah a chhuak dawn a, doctor khan phone kal tlang in min rawn hrilh a, chhun lamah ka kal dawn a ni, ka hlauthawng hle a, mahse eng result pawh lo hmu ila lungawi leh pawm thiam thei turin ka in fuih ru sauh sauh a, mahse a harsa takzet, result ka hriat hunah ka cancer a ni tih lo hre ta ila engtinge ka tih ang, keimah lam chu lo in dah tha ta ila ka pa ber hi a ni ka ngaihtuah ni, tunah pawh a hrisel na a chhe tawh em em a, keilah heti hi ka lo ni leh bawk si.




Phur lo zetin damdawi in lamah chuan ka kal a, doctor room ah ka luh hnuah kawngka chu a rawn in hawng a, Mza chu a doctor coat nen a rawn lut ve a, ka bulah chuan a rawn thu thla nghal zat bawk, engmah ka hrilh bawk silo a, engtinge a lo hriat ni, "I pasal pawh a rawn thleng hma hle mai" nui hak chungin doctor chuan a ti a, ka hrethiam ta mai, doctor hian a lo hrilh a ni ngei ang, engmah ka hrilh loh avanga lungawi lo hmel pu deuh chungin min en a, ka en let ve lem lo thung.




"Result chu heihi a nia" tih pahin doctor chuan kan lamah lehkha a rawn lek a, rang zetin Mza chuan a lo la nghal vat, kei phei chu ka lo thu ngawi reng a, ka thin chu a phu dawp dawp bawk, Mza chuan lehkha chu a keu mawlh mawlh a, ka rilru in ka lo tawngtai mawlh mawlh thung, chutah Mza chuan a lehkha ken chu dawhkan ah a theh thla a, keichu min rawn en vang vang a, engmah sawi tum hmel pawh a pu lo, rawn che vut in min rawn kuah chuan a awmdan mak tih deuh chuan ka lo awm mawl tawp.

Cont...


Comment leh click lamah khan tan min han lakpui zel ula ka lawm ngawt ang..