Stacy Ramthansangi POV
"Bawihi" nui hawk chungin Mza chu a in la hrang a, mitmeng de sawr sawr in min en pah reng bawk, "I pum a bawk awm chu bawk satliah mai a ni e" a ti a nihchu, tuna a thusawi kha ka hriat sual a nilo tih ka chiang, keihian cancer natna ka neilo tihna a nihchu, Lalpa leh, ka lawm lutuk chu ka mittui a hnam sawk thei, "Ka lawmpui a che u, Stacy a rang lama zai I ngai dawn tih i hriat ka duh, karleh lamah hian a remchang chuan in zai nghal deuh rum rum mah ila a pawi hauh lovang, i pum a bawk awm kha a thang lian ve telh telh bawk si a" doctor in a tihchuan ka lo pawm khawp mai.
Doctor room atang chuan kan chhuak a, "Ka room ah min lo zui lut la, thil kan ei dun dawn nia" Mza chuan a ti sup a, pawi ka lo ti lo nasa, tukin zing khan ka rilru hah lutuk nen engmah ka ei mumal lova, tunah erawh ka ril a tam tawh viau thung, bakah Mza office pawh hi vawikhat mah ka la hmuh pui lo hrim hrim, a room awm na lam ni ngei turah chuan min hruai a, kan pahnih a kan in zui lai chu kan mi tawh te chuan min en duh hle a, a bikin nurse ho chuan.
"Khakha a nupui chu a ni ngei ngei ang, awi ka thik e, hetiang khawp a pasal chhelo hi a nei bik sia" nurse pahnih kan kal pelh deuh chiah te thusawi chu ka hre hman hram a, Mza pawh chuan a hriat ve tho ka ring, mahse a ni chuan midang te lo en huang huang na pawh chu engah vak a ngailo tih hriat takin a room lamah chuan a kal zel a, ka kut ah a kai ran bawk, room chhungah kan lut a, a nuam reuh phian mai, "Enge i ei duh ang?" a ti sup a, "Ka hrelo, engmah ka la eilo a, engpawh kha chah tawp rawh" ka ti hluai a.
Tunah chuan eng natna mah ka neilo tih ka hre ta bawk a, keimah hi mi har vawk ang mai hian ka in hria, eitur a lo la thlen mai loh avang chuan Mza room chu ka en kual a, doctor room tih takah damlo check na vel tur thil tih loh chu thil dang hmuh tur a vang viau mai, "Eitur chu a lo thleng tep tawh angem le, ka ril a tam tawh e" ka ti zawi sep a, a hriat phak ka rin loh tehlul nen a lo hre pha a ni chek ang chu, nui suk chungin ka bulah chuan a rawn thu thla a.
"Eitur chu a lo thleng tep ang, chuan engvangin nge vawinah i result a chhuak dawn tih min hrilh loh?" a ti ta nghut a, "Hnaah kal I ngai bawk sia, bakah keimah pawh in ka kal thei reng tho a" ka ti zawi sep, "I pasal ka nihhi, hetiang thu pawimawh te chu hriat ka phu ve i tilo em ni?" a tih leh chuan nuamlo ka ti ve takzet, min ngaihtuah zia a ti lang chamchi a, keipawh hian hrilh hre ve ngei ngei tur ka ni tih ka hria, "Ka tihpalh" ka ti sep ringawt a.
"Ok.. a leh pek ah chuan harsat na i tawk a nih pawhin ka hre hmasa ber tur a ni i hrethiam tiraw?" a tih chuan ka bu nghat nghat a, eitur a rawn thleng a, ka ril a tam tawh bawk a ka ei nghal tawn tawn mai, "Hetiang tak hian thil i ei thei tih ka lo hre ngai hauh lova" a tih sup chuan amah chu ka en a, khaw dang hawi leh lovin keimah ngawt chu min lo en niin, "Zing atang engmah ka la ei bawk silo a, ka ril a tam tawh alawm" ka thil hmuam ka lem hnuah chuan ka ti hlak a.
"Ok.. i duh zah zah I ei dawn nia, I la ei belh duh a nih pawh in kan lam leh thei reng bawk a, inthlahrung lovin han ei nghek mai teh" a tih chuan nui var var chungin ka ei leh mai a, nidang ah chuan hetiang tak hian ka be tha ngailo, mahse vawin chu thu lawmawm tak ka hre bawk nen tumah ka be chhe thei lo, ka mood hi a fuh ngawih ngawih ti ila a dik ber ang, thil kan ei zawh chuan ka puar em avangin kal nghal mai lovin ka thu khawmuang leh te te phawt a.
Darkar chanve chuang ka awm leh hnuah ka thutna atang chuan ka ding nghal hluai a, "Mz ka kal dawn a nia aw, ka pa tlawh kawi ka duh bawk sia, a tlai lam tawh emai" ka ti sep a, ka bag chu ka ak tha pah nghal zat bawk, "Min lo nghak la, kan pahnih in kan kal dun dawn nia, ka hman tep" a ti sup a, "I ban a la hun loh hi" ka ti sep a, tunah dar 4 chiah a la nia, a rawn haw hma ve tum pawh in dar 5:30 ai hma chuan in a rawn thleng ngailo.
"Vawin chu ka buai lem lo bawk a, ka haw hma thei alawm" a tih leh tak zel ah chuan engmah ka sawi tawh biklo, ka pa ka tlawh hian keimah chiah in ka kal thin a, Mza a tel ve ngailo, ka pa pawh in Mza rawn hruai tel turin min ti ve fo bawk nen amah berin a hnial lem loh chuan rawn kal ve rawh se, Mza haw theih hun chu ka nghak ran a, a rei lem lo, ka pa in lam chu kan pan a, kawng laka kan tlan lai te chuan keini lo ang takin kan in be ve reng bawk.
Ka pa in chhungah chuan kan lut a, ka pa in kan nupa a min hmuh chuan a lo lawm hmel khawp mai, "Bawihtei hian amah chiah in min rawn tlawh thin bawk sia, rawn hruai tel ve tur che a ka tih pawhin i buai thu a sawi zel thin bawk nen i rawn lang ve thei ta chu a lawmawm hle mai" ka pa chuan a lo ti a, Mza chuan min rawn en vat a, a hmelah chuan in thiam loh na ka hmuh sak thei, ka pa hnenah chuan thupha te a chawi a, tun hnuah chuan a rawn tlawh ve ziah tawh tur thu te nen lam a sawi a, ka pa pawh a hlim hmel hle.
Ka pa in atanga kan haw meuh chuan khua a thim ti tih der tawh, in kan thleng a, Opi pawh a haw nghal, chaw kan ei lai chuan Mza chu kap tu nei ang maiin a thaw leh hawk thin a, a awmdan chu mak ka ti hle, ka pa in atanga kan haw hnu khan a mizia a thlak vek nimai in ka hria, "Tinge i nuamlo em ni?" ka ti ta tawp a, "Nilo e, ka tha, min ngaihtuah suh" nui suk chungin ti mahse a nuih a zat loh zia chu ka hriat hmaih lo nasa.
Chaw te kan eikham hnuah sitting room ah kan thu a, "I pa kan hmuh zawh hnu atang khan ka in thiam loh na a nasa zual sauh, a makpa khatiang khawp khan a hmu chak ang tih rin ngaihna ka lo hre ngailo a" a ti chhuak sup a, "Thil kal tawh a nihkha, sawi chhuak fo tawh suh, hmu turin I kal tawh alawm, a lawm tawk em em tih i hriat kha" ka ti a, thil dang sawi vak tur ka hrelo, "I lakah mai nilo i pa lakah pawh hian ka in thiam lo takzet a ni" a ti leh a, Mza chu ka en reng ringawt.
"Tlai a ka hmuh khan ka lakah rinna a nghah nasat zia leh ka bulah i hlim hle turah a ngai tih ka hmu thiam a, mahse kei erawh in hreawm takin ka nun tir thin che a ni si a" a ti zawi leh sup a, engmah sawi tur ka hre ve lo, "Khatiang thil kha lo ti miah lo ni ila hetiang taka in chhir na leh zah na hi ka neilo tur, ka puzawn ngei pawh ka zah hluah hluah a ni" a ti leh sup a, "Mz, ka sawi tawh kha, thil kal tawh a nia, kan sawi chhuah fo hian engmah hlawk na a thleng phah dawn chuanglo, chuvang chuan hun kal tawh kha chu ngawih liam pui zawk ang" ka ti sep a.
"Ka hria alawm, hun kal tawh a ni tihchu, mahse ka in chhir em a ni" a tih leh chuan a bul hnaiah va kal in a kut chu ka va chelh ringawt a, "Engah mah in thiam lo duh tawh suh, tunah chuan i thiltih sual te i hre tawh a, engkim a tha vek tawh alawm, chuvang chuan khatiang khan awm tawh suh" ka ti a, ni e, Mza hi ka ngaidam lovang ka ti kha a nia, mahse tuna a awmdan ka hmuh hian ka tan pawh ngaihdam loh chu thil harsa tak a ni tawh zawk, a chhan chu a mitmeng ah a in thiam lo tak tak tih ka hmu chiang em a ni.
"Min ngaidam thei angem?" a tih leh chuan ka nui seih a, "Ka lo in ngaihtuah ang" tiin ka fiam a, a thaw deuh huai chu ka hmu thei, "Awle, tun atang chuan a hma ang kha ni tawh lovin ka duat tawh ang che, i duh engkim pek che ka tum bawk ang" a ti leh a, ka hlim ve veng veng mai, mut a hun hnai tawh mai bawk nen Mza bulah chuan ka mut dawn thu ka sawi a, "Bawihi" ka room lam ka pan tawh chu min koh avangin ka hawi let leh a, a ni erawh sitting room ah thu in in khel a la en thung.
"I mu dawn maw?" a ti leh sup a, "Aw.. ka mut a chhuak tawh lutuk, nangpawh naktuk zingah hna kal hma i ngaih kha, meng rei lutuk lo la aw" ka tih chuan min chhang lovin min en reng ringawt a, "Ka sawi chu I hria em?" ka tih leh takah chuan a bu ta nghut a, tv lam chu a hawi lehnghal daih bawk, nui var var chungin room ah chuan ka lut a, tuna a hmel awm dan kha naupang titau hmel chiah chiah a ni, a duhawm em em bawk.
Ka bula mut a chak tih ka hre reng, mahse ka haider lui hmiah thung a nihkha, ka haw tawh lo na chungin nupa ang tak tak a awm tur chuan ka la in peih loh bakah Mza hi ka duh em tih ka chiang tlat lo, ni e, a hmel hi chu tha ka ti alawm, hmeichhe tam tak in an atchilh rawn a ni tih pawh ka hria, ka chungah that a chhuah ngai lo bawk nen kei atan kha chuan duh ngaihna a awm lo, hmeichhe dangin an duh thu an sawi chamchi te khan mak ka ti thin zawk hial a nihkha.
Tunah a mizia a in thlak nasa em em a, hetiang reng a nih chuan keipawh hian ka la duh ve vat in ka ring tho, tun ah rih erawh chuan ka rilru put hmang hi ka la sawifiah thei mai lo tlat a ni. Khumah chuan lawn in ka tawngtai a, Pathian hnenah lawmthu ka sawi mawlh mawlh bawk, diktak chuan vawin a ka result kan lam khan ka cancer loh reng ka ring tawh lo a nihkha, mahse Pathian hian kei malsawm na dawng tlak lo tak hi a malsawm na chhiar sen loh a min vur in tunah erawh engmah natna ka neih lo tih ka hre ta a, vawi 1000 chuang pawh lawmthu sawi mah ila, a la tawk zo lo tih ka hria.
Zing ka harh chuan nidang zawng aiin ka tho fuh, ka tho hma bawk a tiin in atang chuan ka chhuak a, khawlai ah chuan ka tei kual vel mai mai a, ka let leh hnu chuan Opi pawh a lo thleng leh diam tawh, a hma thin a nia, "Khawiah nge i kal a?" a lo ti vat a, "Pawn ah ka chhuak thawveng vel mai mai mawle, ka in bual anga, ka rawn pui nghal ang che aw" tiin ka room lamah chuan ka lut nghal a, ka in bual zawh hnuah chuan chhuak in Opi chu rawng ka bawl pui nghal vat bawk.
"Tunlai chu i hlim riau in ka hria, i hmel pawh a eng sawt tawp" Opi chuan a ti a, ka lo nui hak, "Nimin ah ka test result a chhuak a, ka pum a bawk awm kha bawk satliah mai mai a lo nia, karleh lamah hian min zai dawn" ka ti sep sep a, a lawm ve hmel hle, "A van tih zia tak, ka lo hlauthawng lutuk a, tunlai chu thu lawmawm hlir hriat tur a awm hi a hahdam thlak takzet, pu lah hi a mizia a in thlak nasa bawk sia, chiang takin nangmah vang a ni tih pawh ka hria" ka hmai chu a sa nghal hat hat thei.
"Engtinge a lo in thlak vak a?" ka tih chuan a nui hak hak a , "Hrelo der vel suh aw, in awmdan hi ka hrethiam ve vek ania, hrim hrim in nangpawh hian enge zep i tum tlat a" a ti leh hlak a, "Engmah zep ka tumlo, Mza nen kan inkar ah te chuan engmah a awm hleinem" ka ti tha ve leh mai a, "Mahse Pu awmdan vel atang hi chuan eng emaw chu a awm chiang alawm" a ti leh hram a, "A ni mahna" ka ti ringawt, min ngei hmel zetin min en a, ka lo nui var var ringawt.
"Bawihi" ti sup ri ah chuan choka luh na lam chu ka en a, Mza a lo ding leh reng tawh mai, "I va rawn tho hma ve" ka ti sep a, nui suk chungin ka lamah chuan a rawn kal hnai a, ka biang ah chuan rawn fawp zeuh in chair ah chuan a thu zawm zat a, "Thingpui min lo siam la" a tih takah chuan ka siam vat a, Opi din na lam ka va hawi chuan mit ko ti sang ak ak chungin min lo en a, lu ka thing na na ringawt, Mza khan ka biangah a rawn fawp deuh kher bawk nen kei tak pawh ka lai hle.
Thingpui chu a hma zawnah ka dah a, nui suk chungin a lo ban ve mai, "Hnaah I kal dawn tiraw?" ka ti sep a, "Aw.. zai tur ka nei a" a ti sup a, "A nihchu" ka ti tawp a, "Tinge hna kal lova i bula nileng a awm turin min duh zawk tihna em ni?" a ti leh a, ka rilru nilo lutuk thil a rawn sawi vang chuan ka en haw a, chutah Mza leh Opi chu an nui chhuak ta hawk hawk a, "In va han hmeichhe dun tak" ti hlak in chawhmeh chu ka siam zui mawlh mawlh a, ka ngaihsak duh tawh hauh lo bawk.
Chaw kan ei kham hnuah Mza chu hna kal turin room lamah a in siam a, "Pu awmdan vel kha, keimah zawk ka lo lai a lawm, khatiang khawp khan a zei tih ka lo hre miah lova" Opi chuan a ti sep sep a, "Ka nupui duhtak, ka kal dawn a nia, i pasal hi min rawn thlah ta che" Mza chuan a rawn ti lang lang a, min rawn koh dan avang chuan ka ner nang a, "Va kal vat vat rawh, i pasal chuan a nghak reng tawh che a nia" Opi chuan min chhaih deuh paha a tih te chuan ka melh rawm rawm a.
"Bawihi" Mza chuan a rawn ti leh a, "Va kal vat rawh, I kal hma loh chu hna a kal thei lo mai ang" a tih leh takah chuan keipawh chu ka kal ve mai a, "I van han over tak, khatianga rawn tawng kha angai kher lo" ka ti hlak a, ka thusawi chu engah mah a ngaih loh hmel hle, in atang chuan kan in zui chhuak a, garrage ah chuan ka luh pui leh a, "Kal vat vat rawh, i tlai dawn lutuk a nia, zai tur i neih kha" ka ti sep a.
"Chumi hma chuan" tiin bangah chuan min nawr bet a, a che rang lutuk chu ka lo meng phawk vak ringawt, "Enge tih I tum a?" ka ti haw a, nui suk chungin ka hmai zawn ah chuan a rawn kun hniam run a, "Heihi mawle, i phal na ka lak hmasak loh vang erawh in min ngaidam dawn nia" tiin ka hmui chu a rawn khar chilh nghal hmiah a, a chet dan chuan min thawn em avangin ka lo dawh mawl tawp a, ka hmui chu a hne dek dek nimai hian ka hria, hetiang hian mipa tumah ka la awmpui ngai loh avangin ka lo dawh mawl tawp.
"Bawihi min chhang let ve la" tiin a in la hrang a, "Ka thiamlo" ka ti zawi sep, nuam ka ti em pawh ka hre chiah lo, ka thin erawh a phu rang khawp mai, "Ka hria e, hetiang hian tu mipa mah I la awmpui lo tih ka hria alawm, lungngai suh ka la zirtir ang che, I la thiam mah mah maithei a ni" tiin mit min siai zeuh a, ka lo ner nang ringawt, "Kal vat vat mai teh" ka ti hmak a, a nui nghawr leh dat a, '?"Awle, ka kal ange, chuan rawn haw hma ka lo tum dawn nia" a ti sup a, motor ah chuan a chuang lut nghal.
Inchhung ah chuan ka lut leh a, ka awmdan hi ka hrethiam lo, mahse nuam ka ti veng veng mai, "Kan mood a va fuh hmel ve" Opi chuan ka nui lut var var lai a hmuh chuan a lo ti leh hmanhmawh a, "I nghal a nih mai chu" ka ti hlak a, a nui nasa zual sauh, "Huan saw vawin chu kan va tifai leh tawh dawn a mi, i peih angem?" ka tih chuan ka rin ai takin a lo phur zawk a, ka thawmhnaw hak te chu ka thlak a, huan lamah chuan kan in zui a, nimbu kan bawl chu kan keng chhuak nghal bawk.
Huan kan tih fai hnuah chuan inchhung ah kan lut leh a, ka phone ka keng chhuak lo bawk nen room ah lut in ka phone chu ka va en a, Mza miss call a lo tam khawp mai, ka call back nghal thuai a, a lo la rang khawp mai, ka call hun lo chang sa a ang zawk mah alawm mawle, "Tinge call I lak theih loh?" hello pawh rawn ti lovin a ti a, "Huan ah ka awm daih alawm, enge min rawn call chhan?" ka lo ti let ve nghal zat a, "Ka ngai che a, ka lo call che mawle" a tih sup chuan sawi leh tur ka hre leh ta chuang lo.
"I buai lo a mi?" ka ti ta ngawt a, "Buai lo, zai tur ka nei ka tih kha ka zai zo tawh a, tunah tak hi chuan in lama rawn haw a i bula hun hman ka chak ber" a rawn ti thawp leh sut a, ka lo hlim veng veng mai, "I rawn haw hma dawn tho alawm, taka theihai min lo hawn rawh a, a hmin i hmuh phei chuan ka duh a nia" ka ti nghal vat a, thei thur hi ka ngai a lem lo, a chang hian nimbu ka ei ve leh zeuh thin a, thei dang hi chu ka ei vak lo, theihai hmin ve thung hi chu engtik lai pawhin ka ei duh reng thung.
"Tehreng mai, a dang ei duh i neih chuan min rawn hrilh leh dawn nia" a tih hnuah call chu kan ti tawp a, ka thlan a chhuak nasa bawk nen ka in bual fai nghal daih a, ka chhuah leh hnu chuan ka rin loh lutuk in Mary chu a lo awm vang a, Opi chuan coffee a lo pe mek bawk, "I lo leng a nimaw?" pangai tak chuan ka ti a, "A nihhi, Mza rawn haw hun ka lo nghak a" a ti tha ve mai a, engmah sawi tawh lovin a bulah chuan ka va thu a.
"A rawn haw hma dawn alawm, lo nghak rawh" ka ti tha ve mai a, nichin a kan in biak khan a zai zawh chiah kha a en dik hnuah a rawn haw nghal mai tur thu a sawi a nihkha, "Nia.. tunlai chu ka buai bawk nen Mza bulah pawh ka awm hman meuh bawk silo a, min ngai tawh a niang, min rawn be reng a" mei nei zet chuan a ti a, "A nihchu" ka ti tha ve mai, "Heta awm reng ai chuan Mza chu a room ah ka lo han nghak mai ang" tih paha a ding chhuak chu ka ding chhuak ve vat a.
"Nilo e, hetah hian lo nghak rawh, Mza room ah chuan i kal kher a ngailo" ka lo ti hmak a, chutah rum zetin min rawn en a, "Min dang tur hian tunge i nih a?" a rawn ti ram hmak a, "Keihi maw, i hriat angin Mza nupui ka ni e" min huat hmel zetin min en a, kei erawh in nui sangin ka en thung, "A nupui phuah chawp mai mai i nihkha" a rawn ti leh fak a, "I chiang chiah maw, i hre sual a ang hle mai, keihi Mza nupui phuah chawp mai mai ni lovin dan leh mipui hriat a a nupui ka ni e" ka ti leh a.
"Hmeichhe zaktheilo lutuk mai, Mza hian a hman tangkai duh vang chiah che a nupui a nei che a nihkha" a ti leh hmak a, a nui sak bawk, "I ti dik, min hmang tangkai ngei alawm, mahse tunah chuan engmah khatiang thil kha kan inkar ah a thleng tawh dawn lo, kan inkar hi tunah chuan a tha tawh khawp a sin, I lo hriat ve mai mai atan Mza hian nupa diktak kan nih theih na turin hma lak a tum tih min hrilh" ka ti leh a.
"Enga, chutiang thil chu a sawi hauh lovang, min bum chu tum buai duh lo mai rawh, Mza nen kan inkar chu i hriat chian kha, kan awmdan zawng zawng te nen" hneh tu in ti zet chuan a ti leh nghat a, "Oh.. ka hriat loh i ring em ni, Mza nen in inkar ah hian engmah a awm ngailo tih ka hrechiang hle bawk, chuvang chuan in inkar a thil awm anga i sawi thin kha duhtawk teh, Mza hian I unaupa vang chauh a la ngaihsak che a ni tih pawh min hrilh bawk" a thinrim lutuk chu a hmai a sen tawn tawn thei.
"Chuan thil pakhat leh, ka chungchang hi Mza hnenah dawt in I lo sawi thin tih pawh ka hre bawk a, ngaihzawng ka nei anga i lo sawi thin avanga ka lakah nunrawng em em thin a ni tih pawh ka hria, chuvang chuan fimkhur hle ang che, tun atang chuan nanghi ka en liam mai mai tawh dawn hauh lo che tih hria ang che, I dam theih nan a thisen pe tu che ka ni tih i hriat kha, tunah erawh ka thisen i mamawh tawh lo pawh a ni mahna, mahse hre rawh, ka chungchang dawt hmanga i lo sawi leh a nihchuan maw ka thisen pek tawh zawng zawng che kha ka la hip chhuah sak leh vek lovang che tih ka sawi theilo" ka ti kha fak a.
"Hmeichhe rapthlak lutuk" a ti hlak a, "Hei ai pawh hian ka la rapthlak thei a nia, chuvang chuan fimkhur hle rawh" ka ti leh a, Mary nen kan lo in hmachhawn lai tak chuan sitting room ah Mza ngei mai chu a rawn pen lut a, "Mz" tih pahin Mary chuan a banah a va kuah nghal chawt a, Mza chuan en chhuk run pah hian "Enge hetah i rawn tih?" ti chhum hmuk in Mary kut chu a dah thlak sak a, ka lo nui ru sak thung, "Ka ngai tawh che a, hmu tur che in ka lo kal mawle" Mary bawk chuan in la no tak chungin a ti a.
"Hetah hian lo kal tur i ni miah lo a sin" tiin keichu min rawn en zeuh a, min ve thawng tih ka hre reng, "Mahse ka ngai tawh che alawm, tunlai chu hnaah I buai bawk sia, i rawn kal hman mang bawk silo, chuan he i nupui lem hian i room ah kal min phal lo bawk a" tiin keichu min rawn kawk a, pawisawi loh hmel zetin Mza chu a en reng bawk, Mza chuan min rawn en vut a, dar ka lo kan ak thung, "Tuin nge Stacy hi ka nupui lem ti a hrilh che?" a ti ta nghut a, Mary chuan mak tih hmel zetin Mza chu a en a.
"Mahse.." a tih lai mek chuan "Ka hrilh chian tawh che kha, Stacy hi ka nupui lem ni lovin ka nupui diktak a ni ka tihkha, chuchu theihnghilh tawh ngai suh, chuan ka nupui in kal a phal loh na hmunah che chuan kal lo mai rawh, he inchung nu ber hi a ni a, a thu chu thu tawp a ni bawk" a ti dap dap a, chutiang zawng kher a a sawi chu ka ring lo a sin mawle, Mary chuan Mza chu a en ngawt ngawt a, Mza erawh chuan ngaihsak lem lovin ka bulah chuan a rawn kal a, ka kawng ah chuan a rawn vuan nghal chat bawk.
"Huan ah te enge i tih, hah viau thei I nilo tih i in hriat kha" a ti sup a, "Ka hah hleinem" ka lo ti mai, Mary chu a awm ve tih pawh hrelo ang hmak chuan a awm a, "Awle, chuan zaninah i room a thawmhnaw zawng zawng saw ka room ah kan sawi chho dawn nia" a tihchuan chhan tum in ka ka ka ang zuai hman tih chuan ka kawng a vawn na chu a hmer salh a, ka ka chu ka chip leh hmak.
"Mz tinge hetiang hian i awm a?" mittui ting pam chungin Mary chu a ding reng a, "Ka sawi tawh kha Mary, tunah chuan i natna pawh a dam tawh bawk a, puitling i ni tawh bawk, i in enkawl ve thei tih ka hria, i nu leh pa te pawn an la dam pui bawk che a, ka lakah chuan engmah beisei tawh suh, tunah chuan chhungkua ka nei tawh a, ka chhungkaw tan chauh a nun hman ka tum tawh bawk" a ti nghet leh charh a, a thusawi chu a sawi mai mai lo tih chiang takin a lang chiang ngang bawk.
"Mahse ka u hnena I thutiam te kha i theihnghilh ta em ni, min enkawl tur thu I tiam kha" a ti leh sep a, Mza rilru hneh tum tak chuan in la khawngaih thlak zetin a en reng bawk a, "I u hnena ka thutiam chu ka hlen tawh alawm, nanghi ka theihtawp in ka enkawl che tih i hriat kha, ka enkawl na lamah che ka nupui ngei pawh ka ngaihsak hman lo bawk, tunah chuan enkawl ngai I ni lova, hna tha tak i nei bawk, chuvang chuan ka ngaihsak zui zel che a ngaiin ka hre tawh lo" a ti leh ta hmak a.
"Mz, chutiang chuan i ti theilo ang" Mary bawk a ni, "Mary, ka in sum theih na bang hi i thiat hlauh ange, nangmah vang hian ka nupui hreawm takin ka nun tir a, nanga dawt sawi te avang khan ka nupui hi hreawm reng reng in a nun phah a sin, kut hial ka thlak a, khatiang khawp khan a ni hian ṭanpui che in a thisen hial a pe che a ni a, chuti chung chuan nang chuan chhe tak tak in i puh a, a tawk tawh em em e, tun atang chuan ka nupui hi tawngkam mawi lo tak tak in be tawh ngai suh ang che, i nunna chhanhim tu a ni tih hria in a lakah that chhuah hle tawh zawk ang che" a ti chhum leh hmak hmak a.
Mary chhuah hnuah chuan Mza chu ka en a, "Enge i sawi awmzia kha, i room ah in sawn tih te kha i sawi a?" ka tih chuan a nui suk a, "Aw.. ka room ah i rawn in sawn luh a ngaih hmel, naktuk ah ka nutei fate karhnih vel cham turin an rawn zin dawn a, ka nute in lamah thleng lovin kan inah an rawn theng dawn" a ti sup a, ka meng phawk vak, "Room pakhat ah an awm dun thei mai lo a mi?" ka ti chhuak hap a.
"Bawihi, an puitling tawh a, room in tawm chu an duh bik nang, mipa leh hmeichhia an ni bawk si a, bakah nupa kan ni a, kan mu hrang tih an hriat chuan mak an ti dawn lutuk a sin" a ti leh sup a, ka rilru a buai em em laiin a ni erawh a nui vur vur reng a, a awmdan chu ka ngei tawk a tling em em mai ni, kan in hi zau ve viau mahse room pathum chiah a awm a, inhnuai ah hian room pakhat a awm a, chuchu keima room a ni, inchung lamah erawh pahnih a awm thung a, pakhat chu a room a ni thung.
Duhthlan tur nei ta hek lo, zanah chuan kan pahnih in ka kawr ho chu a room lamah kan sawn a, a che reng reng chu a phur hmel hle lehnghal, ka kawr dah na tur chu a lo dah awl vek tawh chu niin engtik laiin nge a lo dah awl pawh ka hrelo e a, kawr kan rem fel zo a, sana ka en chuan dar 10 a lo pel tawh, "Zanin chu ka room ah ka mu dawn a nia" ka ti a, "Engvang ngawt chuan maw, hetah i thawmhnaw pawh kan dah vek tawh hi" mak tih hmel zeta a tih chuan ka nui hak a.
"A tawp nan mawle, karhnih chhung chu ka riak thei dawn bawk silo a" ka ti leh a, "Karhnih chauh nilo, kumkhua in room khatah khum khatah ngei kan mu dun tawh ang" a ti hmuk a, nui hak chungin room atang chuan ka chhuak a, min dang miah lo chu mak ka ti hle, ka in thlak na tur ka keng vek bawk a, bathroom ah lutin ka in bual a, bathroom chhungah chuan ka inthlak nghal vek bawk, ka chhuak chiah tih chuan Mza khuma lo mu hlum chu mak ti zetin ka en a, "Enge hetah i rawn tih ve dawn a?" ka ti a, "I room thlah nan ka lo riah pui dawn che a nihhi, lo mu la, a tlai tawh a nia" a ti sup a, eng ang pawn hnial mah ila a sawt dawn lo tih ka hriat avangin a sir ah chuan ka va in thawlh ve nghal a.
Cont...
4 August hi ka birthday a nih vangin ka rawn dah aw... comment leh click kha min han tihsak leh hram hram ula aw hmeltha ho...
🩷🩷