My Arrogant Husband BY Becca Lnz (Completed)

[Rebec Nunziri]

Chapter-8



Stacy Ramthansangi POV




Naktuk ah hian Aizawl lamah kan let leh tawh dawn a, ka phur teh chiam lo hle, karkhat lek cham mah ila a khua mai bakah khaw mite hi ka ngaina hman hle a, an zavai mai hian kan nupa chungah an tha bawk nen cham hlen daih mai te ka duh, tlai lamah hian Pu Nghaktea te inah chaw kan ei dawn vangin chhun ah khan kan thawmhnaw te ka pack fel vek tawh a, Mza erawh kum upa tawh inchhung lum chhuahsan thei tawh lo te a la tlawh kual thung.




Mza rawn haw hnu reiloteah Pu Nghaktea te inah chuan kan kal a, an chhungkua hi an fel bawk nen mahni in ang maiin kan tlang nel ve tawh bawk, an fapa naupang ber Ruatruata phei hi chu ka ngai ngawt ang, kan thlen inah a rawn leng lut ve fo a, a tawng duh barh barh bawk nen kan haw hunah chuan ka la ngai ber in ka ring, Ruatruata nen chuan kan in be mawlh mawlh a, kum 14 lai ni ve tawh mahse an naupang ber a ni bawk nen a la naupang chhia ve viau mai.




"I len hunah chuan kan inah lehkha zir turin in la rawn awm daih dawn nia" ka tih chuan a phur ngang mai, a nu leh pa te bulah kan bul a a awm theih nan a dil nghal chung chung a, nui hak hak chungin a nu te pawn an lo phal a, a lawm lutuk chu a au hliai nghe nghe, a chezia te hi a duhawm thin a nia, hetiang tak hian naupang ka ngaina tih ka hre ngailo, mahse Ruatruata hi chu ka ngaina takzet thung, a mize nelawm zet hi a rawn thang len hunah pawh a paih lo hram ka beisei bawk.




Chaw te kan ei a, an chhungkua hi an rual ve a, an nupa mai bakah fa panga lai an nei bawk a, an nu ber erawh a taksa a chak tawh loh em avangin room lamah a awm thung, kan thawm pawh a tha ham ham viau mai, "Ate, in haw dawn hunah min hruai ve rawh u aw, Pa Mza motor ah khan ka chuang ve chak a nia" Ruatruata chuan a ti a, "I la chuang dawn nia, zanah hian khaw thenawm ah kal kan ngai a, kan rualin I lo kal ve duh em?" ka tih chuan a bu rang khawp mai, chaw kan ei kham chuan hmun hnawk vel tihfel pui ka tum a, an lo phal lo nasa mai.




"Lo va thu mai mai rawh, kan khual tha te in ni a, hetiang i tih ve a ngai reng reng lo, hei nula an awm hi" Pu Nghaktea nupui chuan a ti zung zung a, tih luih ve ngial ka tum pawn an phal thlawt loh avang chuan ka ti lui duh ta bik lova, "In haw hunah chuan kan fapa hian a ngai dawn hle che u a nih hi mawle" thut khawm na lama kan thut thap lai chuan Pu Nghaktea chuan a ti a, "Keini pawh hian kan ngai khawp ang, a fel bawk sia" ka lo ti ve vat a.




Khaw thenawm ah kal kan la ngaih avangin dar 8 rik dawn ah chuan kan haw ta a, Ruatruata chu kan hruai tel ve nghal bawk, "Ate, haw tawh lo mai ula, hetah awm ve reng ula" motor a kan chuan lai chuan a ti leh thin a, "Kan rual in lo kal ve nghal daih mai la, i duh lo a mi?" Mza'n a lo tih chuan in ngaihtuah ni awm tak hian a ngawih vang vang reuh a, a chezia chu a duhawm hluah hluah, Mza nen chuan in en zeuh in kan nui hak hak a.




"In bula ka lo kal ve chuan a nu ten min ngai dawn sia" a ti sap a, "Awle, i upat deuh hunah kan bulah I lo awm daih mai dawn alawm tiraw?" ka ti a, a bu nghat nghat a, khaw thenawm kan thlen chuan a dar 9 a la ri lo deuh, naktuk kan haw kawng a kan mamawh tur ang te chu kan lei nghal zung zung a, Ruatruata te unau tan thil ka lei sak bawk, kan let leh vat a, Ruatruata kan thlah hnuah kan thlen na in lam kan pan nghal a, naktuk a haw tur kan ni bawk nen kan muhil nghal thuai a.




Zing chaw te kan ei hnuah haw turin kan in tin tuah tan a, Pu Nghaktea te chhungkua mai bakah khaw mite chu min thlah turin an rawn pung khawm a, kan in chibai liam liam a, an ngaihawm dawn khawp mai, Ruatruata chu a tap deuh pur a, "Tap suh le, tlangval i nih tawh kha, kan lo kal leh vat dawn alawm" ka tih chuan a mittui chu a hru fai ve zung zung a, motor ah chuan kan chuang lut a, kan tlan chhuah hma chuan hawi chhuak leh in khaw mite chu kan mangtha leh a, Ruatruata pawh chuan kut a vai ve nasa mai.




Ka tlan chhuah hnu chuan ka ngawi reng a, "Bawihi enge i ngaihtuah a?" ka pasal chuan ka kut vawn pah in a rawn ti sup a, "Ka ngai hlawm dawn e" ka ti hap a, a nui ri suk a, "Kan kal leh vat dawn nia, hetiang tak hian nuam I ti dawn tih hria ila chu cham rei deuh thei turin chawlh ka lo la tur a nia" a ti ve sup a, "Kan kal leh hunah chuan Nu Rini khan an huan ah min kalpui tur thu a sawi a sin" phur zetin ka ti a, "Lo hna I thawk ve thiam dawn emaw ni le?" min rin loh hmel tak chuan a ti sup a.




"Ka zir dawn alawm, Aizawl a sei lian nilo phei ila chu ka thiam ngawt ang" ka ti zat zat a, a lo nui hawk ringawt, kan kal hma khan motor ruih lohna damdawi ka ei bawk a, kawng chanve lai kan tlan hnuah pawh engtin mah ka la awm lo, motor chuan reng takah chuan mut a lo chhuak hma bawk a ka muhil reng a, vawihnih kan chawl tawh a, kan tlan chhuah leh rual rual in ka muhil lehnghal zel tho, Mza erawh mut chhuak hmel pawh a pu ve lo thung.




Aizawl kan luh pawh chuan a la tlai chhe lo, in kan thlen chuan dar 4 a pel vel chiah a ni, kawng lak ah chaw kan ei tawh tho avangin kan in bual sawk sawk a, kan muhil nghal, zan dar 7 vel an chuan kan tho leh ta chiah a, ril a tam leh dawn dawn tawh mai, rawngbawl hluai na chi a ni tawh bawk silo nen noodles chu chhum in artui ka chhum tel bawk a, kan ei zawh hnu chuan mut a chhuak tawh lo bawk a tiin movie kan en leh a, naktuk atang Mza'n hna a zawm leh a ngai tawh dawn bawk.




Kan movie en a zawh meuh chuan Mza chu a mutui hle tawh, kan haw kawng ah khan ka muhil tam tawh bawk nen ka mu meng kar a, zanlai dar 12 a rik pawh chuan la harh tha vet vet tak ka ni, Mza erawh a thaw sak sak a, a hmel chu chiang zetin ka en a, a hmeltha ve chiang alawm, a ni aia mipa hmeltha hi khawvel ah hian an tam dawn lutuk tih ka hria, mahse a ni anga ka mit la tu mipa hi chu an awm leh theih kher tawh pawh hian ka ring lo.




Zingah chuan kei ai a tho hma a, nizan ah ka meng leh hrep bawk nen Mza chuan min kaih thawh chawp ka ngai hial, chaw kan ei hnuah a hna kal tur ka in siam pui leh a, pawn thleng ka thlah thlap bawk, a hma kha chuan nupa ni tho mahila lemchan na mai anga ka ngaih avang khan pasal nei te awm dan tur angin ka awm ngailo tih ka hria, mahse tunah erawh engkim a danglam tawh a, Mza tan nupui ka nihna hi tha taka ka hlen chhuah ngei theih nan ka theihtawp ka chhuah ang.




Keimah te in inah ka awm a, Opi erawh a rawn kal hman lo thung, kan pindan te chu ka phiat fai a, bedsheet te chu a thar phah in kan phah tawh sa zawk chu ka su nghal bawk, rooma atang ka chhuak a, pawn lam chu ka tifai lehnghal, a hahthlak lem loh bawk a nileng a awm mai mai ai chuan hetiang hna ho te te hi thawk ila hun a kal chak zawk bawk in ka hria, tual lai ka phiah mawlh mawlh lai chuan kan thenawm nu hian min rawn bia a.




"In zinna te chu a nuam maw?" a rawn ti lang lang a, kan thenawm ah hian nupa chauh a awm an awm ve tho a, an nu zawk hi chu kei ai tlem in a upa deuh ang tih tur a ni a, a pasal erawh Mza nen hian an in rual khat viau ang, an khawsak pawh a nuam sa ve khawp mai, an fel nupa bawk a, kan in pawh ve viau bawk, Mza tak erawh hi chu inah a awm khat bawk nen an in be lutuk lem lo thung.




"Nuam lutuk kan cham hlen tep a ni" nui hak hak chungin ka ti a, a ni pawh a nui ve tho, U Marem tiin ka ko mai a, a pasal hi Faka a ni thung, "Kan pa bulah thingtlang a zin ka chak ve thu ka sawi a, hnaa a buai loh ve leh a pi te khua a min zin pui tur thu te a sawi a sin" phur zetin a lo ti ve a, "Nia.. la zin ve rawh u, thingtlang boruak hi a hrisel a nia" ka lo ti zang vah, rei fe kan in biak hnuah inchhung lamah a lut ta a, keipawh chuan ka hmunphiah lai chu ka chhunzawm leh mawp mawp a.




Mza a rawn haw chuan rawng ka lo bawl fel leh diam tawh, a in bual hmasak te te hnuah chaw kan ei ve ta chiah a, zan lamah ka pa te inah kal kan ngaih avangin kan che zung zung a, ka pa te in pawh chu kan thleng vat ta reng bawk a, ka pa chuan kan zin na chanchin te chu min lo zawt nghal thuai a, nuam ka tih zia leh a khaw mite an fel zia chu hahip in ka sawi a, Mza pawh chuan min rawn zawm ve zeuh zeuh bawk.




Ka pa leh Mza te chu library room ah an lut ta a, ka nu leh Mza nau Malsawma te nen chiah kan awm tawh, ka nu chuan min biak chu sawi loh awm ve lo ang hmak in min ngai ni berin ka hria, vawikhat mah min la be lova, Mza nen kan in kar a that hnu atang hian min ngaih theih loh hmel em em mai hian ka hre tlat, ka ngaihtuah na mai mai pawh a ni maithei, Malsawma erawh in min be reng thung a, ka sawi tawh ang khan a tawng duh bawk a, keipawh chuan nuam lo ka ti em em hran lo.




Malsawma pawh hi kei aiin a la upa cheu a, mahse a u nupui ka nih na angah min zah thiam em em thung, Malsawma chu chhuah lawk na tur a neih thu sawi in a kal ta daih a, ka nu nen chiah a kan awm tak ah chuan ka tim dai mai hian ka hria, min be lovin tv chu a en reng a, ka awm chu a nuam lem lo khawp mai, Mza leh ka pa pawh chu an rei ka ti tawh takzet, tv a a thil en ber kher lah chu hmuhnawm ka ti em em bawk silo, ka phone chu tul miah lovah ka thai kual ta vel mai mai a.




"Pawn lamah kan va in be lawk dawn em ni?" ka nu chuan a rawn ti chhuak hlawl a, a rawn tawng thut avang chuan ka phu zawk nghe nghe, in siam tha vat in "Awle" ka ti sep a, pawn lamah chuan kan in zui chhuak nghal, balcony ah chuan kan ding ran a, a tawng mai loh avang chuan lai zetin a bulah chuan ka ding ve ta reng bawk, "Mary a rawn kal ngai em?" a rawn tih chuan mak ka ti takzet, a zawh na min zawh chu ka beisei loh em avangin chhan mai na chang pawh ka hrelo hial zawk.




"A rawn kal ngai em?" a rawn tih nawn leh takah chuan "Kal ngailo" ka lo ti vat a, chutah thaw chhuak hak chung chuan chiang zetin min rawn en a, a mitmeng ah chuan ka chung a a lawm loh zia pawh ka hnu chiang hle bawk, "Eng ang hmeichhia nge maw i nih leh, engtinge i hmeichhiat pui lakah i nunrawng em em theih zawk?" a ti vin that a, "Ka nu i sawi awmzia ka hrelo" ka tih chuan "Hrelo der suh, nang hian ka fapa hnenah Mary ngaihsak tawh lo turin I ti a nilawm ni?" a tih leh chuan ka meng kawk a, vawikhat mah chutiang thil chu Mza hnenah ka la sawi lo hrim hrim.




"Ka nu, tuin nge chutiang thu chu hrilh che ka hre hauh lova, mahse Mza hnenah hian Mary thlah thlam tur hian vawikhat mah ka la sawi lo a sin" ka ti sep a, "A tir atangin ka fapa nupui atan hian ka duh lo che tih i hriat kha, mahse engmah ka sawi buai lova, tunah erawh I ti mah mah tawh a ni, nang i rawn lan hma atang daih tawh khan Mary leh Mza te hi an lo in hre tawh a, Mary phei hi chu ka monu atan ka lo hual lawk a ni a, mahse nang i rawn lang a, ka fapa hian nupui ah a nei ta che a, chutah zahna nei lek lovin ka fapa hi i thu hnuai ah dah i tum bawk a" a ti hmarh hmarh a.




Chhang tawh lovin ka lo in hum ruh ngar ngar thung, "Nang ang nu tello a sei lian hi chuan nung chang mawi in hriat ka ring lo reng a ni, zak map lovin nang aia dinhmun sang daih chhungkua ah i rawn lawi lut a, thuam chhawm pawh engmah i rawn keng lut lo bawk a, chuchu lo dah tha ta ila, i pa enkawl na tur pawisa pawh ka fapa i dil reng bawk a, i rilru diktak hi ka hriat loh ring suh, ka fapa i neih chhan hi a sum i duh vang tih ka hria, i duh ang zat pawisa chu sawi rawh, ka pe ang che, tihchuan ka fapa lak atang hian kal bo ang che" a ti leh fak fak a.




Ka mittui chu ti tla lo turin ka in sum hram hram a, mahse ka thei thlawt lo, ka biang ah chuan a luang thla pap a, "Lemchan kual kha chu tum duh suh, i rilru dik tak hi ka hrechiang viau a nia, khatianga hmeichhe fel ber awm zia zang a i mittui tih tlak kha chu tum buai duh suh ang che, ka sawi kha lo ngaihtuah ang che, i duh ang zat pawisa chu min dil a, ka pe ang che, mahse pawisa i kut a ka pek rual rual che in ka fapa mit hmuh ah rawn in lan leh tawh suh ang che" tiin in chhungah chuan a lut ta nal nal a.




Ka dinna ngai ah chuan ding in ka nu thusawi mal tin te chu ka beng ah a ri nawn tluk tluk a, ka thawk te hi a chham vek maiin ka hria, chutia che chang miah lova ka lo awm reng lai chuan Mza aw ri ka hre thut a, ka in her nghal vat, "Tinge pawn ah hian i lo awm a?" tiin ka hmaah chuan a rawn ding a, ka hrawk a in hnawh tlat avangin ka chhang thei mai lo, chutah Mza chuan ngaihthat loh hmel zetin min rawm en a, "I tha miah lo" ti sup in ka biang chu a rawn tawk zeuh a.




"Kan haw thei tawh em?" ka lo ti daih thung, "Aw.. ka pa hnenah kan haw nghal mai tur thu ka sawi tawh a" a tih takah chuan ka thaw huai thei, in chhung a luh leh chu ka phur tawh hlawl lo a ni, kan in lam pan a kan tlan lai chuan ka thaw leh hak thin a, "I awmdan hi a danglam riau in ka hria, thil diklo a thleng em ni?" min rawn en zawk chungin a ti tha leh a, motor a khalh avangin rei erawh min en lem lo thung.




"Aih.. chutiang engmah a awm lo" tiin pawn lam chu ka hawi ta daih a, inchhung a kan luh lai te chuan ka la ngawi reng a, ka awmdan chu Mza chuan mak a ti hle tih ka hria, room ah kan lut a, "Ka va in tifai hmasa ang aw" tiin min chhan na pawh ngaihsak tawh lem lo chuan bathroom lam chu ka pan vat a, kawngka chu chhung lam ah kalh in ka thin zawn chu ka dawm vang vang a, ka thin hnun hi a thip vawng vawng mai hian ka hria.




Khatiang taka in hmusit na tawngkam kha hmaichhan ah ka dawn ka rinh ngailo, ka pasal nu lak atang phei chuan ka beisei pha lo hrim hrim, mahse zanin khan min lo hmuhsit thin zia chu ka hrechiang chiah, reife bathroom a ka in khung hnu chuan ka chhuak a, Mza chu a thawmhnaw pawh la thlak lovin couch ah a lo thu ran a, bathroom atanga ka chhuak a hmuh chuan ka hmaah chuan a rawn ding chawt a.




"Bawihi, i awmdan hi a dik miah lo a nia, ka pa nen kan in biak chhung khan enge thleng?" min zawh chhuah ngei tum chuan a ti a, "Mz, va in tifai ve phawt la, mut hmun ah kan sawi dun zawk dawn em ni, tunah chuan ka chau bawk sia, mut hahdam ka duh" ka tih takah chuan ngaihthat hmel zan loh chuan a bu ta nghat a, bathroom a a luh rual rual chuan khumah ka in thawlh ve nghal, Mza hnenah hian ka sawi dawn em ka hrelo, ka nu khatianga a awm danah khan Mary nen an in hmu tih chiang takin ka hria a, kan boruak a chhiat zual zel loh nan Mza bulah hian ka sawi tlang nghal mai dawn nge tih chu ka ngaihtuah a, mahse keimah vanga ka nu nen an inkar a chhiat ka duh bawk silo, ka rilru chu a buai takzet a ni.


Zawmna



Lalmuanzova POV



Shower hnuaiah chuan ka ding ran a, Bawihi awmdan ah khan eng emaw diklo chu a awm chiang a ni tih ka hre bawk, ka pa te in a kan kal hma zawng kha chuan a mizia a harh vang em em a, mahse ka pa te in atanga kan chhuah hnu khan a mizia a dang vek a nihkha, ka pa nen kan in biak chhung khan eng emaw tak chu a thleng chiang alawm, ka nu hian Bawihi bulah eng thu emaw a lo sawi a ni ngei ang, kan in neih dawn pawh khan ka hnenah Bawihi a duh loh thu a sawi a nihkha.




Mahse ka pa in a khak hnu kha chuan engmah a sawi ngam tawh lo mai pawh a, kan thlen tirh te atang khan ka nupui kha vawikhat mah a be lo bawk tih pawh ka hre ru reng bawk, engpawh nise Bawihi hi engkim zawh chhuah ka duh a, ka tum ngei bawk, nupa kan ni a, pum khat kan nihna angin kan in kar ah hian engmah zep awm lo se ka duh, bathroom atanga ka chhuah hnu chuan ka sam chu hru thuak thuak in Bawihi bulah ka mu nghal a, ka taksa si chet in ka kuah nghal hmak bawk.




"Lee.. enge thleng chiah min han hrilh teh le" ka ti sup a, a thaw chhuak hak reuh a, "Aa.. Mz engmah a nilo, a ho lutuk" sawi hreh hmel zet hian a ti a, "Bawihi ka nupui i ni a, ka lak ah hian engmah zep lo la ka duh bawk che tih i hriat kha, ka pa nen kan in biak lai khan ka nu in i hnenah thusawi a nei a ni tiraw?" ka ti nghet charh a, "A ho lutuk" a la ti fan a, min chhan dan atang chuan ka nu chuan eng emaw ka nupui hriat nuam loh tur thil a sawi tih ka chiang ta viau bawk.




"Awle, a nihchuan min han hrilh teh le" ka tih leh takah chuan a ngawi vang vang phawt a, "Ka nu khan pawn ah min biak a duh thu a sawi a, chuan.." tiin thil thlen dan te chu a sawi zui sep sep a, ka nupui thusawi chhung zawng chuan ka lo in hum ruh tung a, ka nu lakah chuan ka thinrim hle, ka nupui a ni a, tunah chuan a monu a ni tawh bawk, chuvang chuan hetianga a ṭawngkhum tur a nilo hrim hrim, ka nu thusawi te min hrilh lai chuan a rilru a na hle tih hriat takin a chawl leh thin a, chute chuan ka thinrim na a ti zual deuh deuh bawk.




Bawihi chu muhil tura ka tih hnu reiloteah muttui tih hriat zetin a thaw ta sak sak a, kei erawh ka mut chu chhuak lo tak a ni, ka nu lakah chuan ka lawm lo em em a, chu ai mah chuan Mary chungah ka lawm lo zual zawk, ka nu hi lo hmu in a bulah eng eng emaw a lo sawi tih hriat reng reng, a ni pawh hi ka biak a ngai ngei dawn a nihhi, hetiang reng chuan kan nupa in kar ah hian a in rawlh thuk lutuk dawn tlat, ka nu hial a lo hmu tawh lehnghal, ngawih liam mai mai na chi a ni tawh lo.




Zing khua a lo var a, vawin chu nidang aiin hna ka kal hma deuh a, a chhan pawh ka pa te in lama kal kawi ka tum vang a ni, ka nupui erawh engmah ka hrilh lo thung, nizan ah khan ka nu hnenah engmah sawi lo turin min ngen nasa hle a nihkha, engmah ka sawi dawn loh thu ka hrilh ngei a, mahse engmah tilo chuan ka awm liam mai mai thei tlat lo, ka nu pawh ni rawh se ka nupui hmusit taka a tawng khum vang hian ka lawm lo a, Mary nen pawh in hmu fo lo se ka duh bawk.




Ka pa te in ka thleng a, ka kal thut chu mak an tih hmel khawp mai, a awm lo hran lo, ka kal dawn a nih chuan ka hrilh hmasa ziah thin a, mahse vawin chu engmah sawi lovin ka va kal tawp kha a nia, Malsawma chu a chhuak tawh a, ka nu leh pa te chiah an awm takah chuan room lamah biak ka duh thu ka sawi a, kan in zui lut nghal, "Mama, enge i sawi duh chu a va pawimawh awm ve, engmah sawi lawk lovin i rawn kal tawp mai si a, thil tha lo thleng te a awm em ni?" ka pa chuan a ti charh charh a.




"Thil tha lo engmah thleng a awm lo, ka lo kal chhan chu ka nu vang hi a ni zawk mah" tiin ka nu chu ka en a, "Enge ni ta a?" ka pa chuan awmzia hriat loh hmel takin a ti leh haw a, "Ka nu, ka nupui hnena I thusawi zawng zawng kha ka hre vek, chuan khatiang thu kha ka nupui hriat ah,.. nilo, khatiang thu kha vawikhat mah sawi tawh lo tur che in ka duh bawk che" ka nu en pah chuan a ti a, "Enge i sawi awmzia, i nu chuan engmaw a lo tih a?" ka pa in a tih leh chuan ka pa lam bawk chu ka hawi leh a.




"Engthil nge I lo tih leh tak, Stacy chu I lo hau em ni?" ka chhan mai loh vang chuan ka nu en chung chuan a ti leh dut a, "I nupui hi then vat la i tan pawh a tha zawk ang, a tir atang khan ka duh lo tih pawh i hriat kha, khatiang hmeichhe sum duh lutuk kha chu an hlauhawm a nia, a hrim hrim in a va tawngthei ve, i hnenah engkim a lo hrilh leh hman vek che amaw?" a ti hlak hlak a, "Eng thil chiah nge in sawi hi han sawi chiang teh u" ka pa chuan a ti ta hluk a.




Ka pa chu en in nizan lama ka nupui min hrilh ang zawng zawng chu ka hrilh ve ta vek a, zep buai vel kha ka tum lo, ka nu hi mahni in duh tawk ve tak a ni a, kei a thusawi te hi chu a fapa ka nihna angin min hnial ngam dawn lutuk tih ka hrechiang, mahse ka pa hian a zilh a nih chuan a hnial let ngam mai mai ngam tawh dawn lo tih ka hre miau, ka sawi zawh chuan ka pa chu a thinur hmel khawp mai, ka nu chu lungawi loh hmel zetin a en a.




"Engtinge chutiang thil chu I tih theih zawk, i monu a ni tih i hria a nilawm ni?" ka nu en ran chung chuan a ti zawi sup a, ka pa hian a thinrim lai ber pawh in tawngkam vin hi a hmang zen zen ngailo, mahse a hlauhawm loh phah lo hrim hrim thung, "A nihna diktak ka hriat chian em avangin ka sawi a nimai" ka nu chuan in chhir na neilo tih hriat takin a ti a, "I in rawlh lohna turah i in rawlh thuk mah mah a ni, kan fapa hi puitling a ni tawh a, a tan a thil tha ber tur pawh a hre bawk, Stacy hi a nupui a tan a duh a nih chuan engmah sawi buai tur kan neilo tih ka sawi chian tawh kha" a ti leh hmak hmak a.




"Ka fapa tana hmeichhe tha a nilo tih ka hriatchian em avanga khatiang thil ti mai kha ka ni a, thil dik lo ka tiin ka hrelo, tu nu pawh hian kan fa te tana tha ber tur chu kan duh vek alawm" ka nu bawk a ni, "I fapa tana thil tha tih i duh a nih chuan a nun ah emaw an nupa in karah hian in rawlh thuk lutuk tawh suh, hetianga i che zel dawn a nih chuan i fapa hian hlim takin a nun a hmang ngai lovang tih hria la, chuvang chuan i in rawlh na tur awm tawk hre tawh ang che" ka pa chuan thu pe aw zet in a ti leh a.




"Ka fapa ka hrin a ni a, a nun ah hian in rawlh turin thu neih na ka nei" ka nu chuan a ti leh a, a aw ki pawh a sang sawt viau, ka pa erawh a la lang pangai reng thung, "Ka sawi tawh tun bak hi ka sawi tawh lovang, kan fapa te nupa in kar ah hian in rawlh tawh suh, kan fapa hian chhungkua a din chho ve mek a ni a, tih chhiat sak tum zawng in hma la tawh lo la a nimai" ka pa aw chu a khauh ve ta far a, "Kha hmeichhia kha ka mo atan ka pawm ngai lovang" ka nu in a tih leh hram chuan ka pa pawh chu a thinrim hmel ta hle.




"A tawk ta viau e, Stacy tluk a hmeichhe tha hi kan fapa hian a tawng leh tawh ngai dawn lo, Mary kha chu rawn sawi chhuak duh tawh lo mai rawh, an chhungkaw dinhmun vanga mo atan duh i ni tih pawh ka hria, Mary hi Stacy ang chiah hian rawn sei lian ta se i mo atan i pawm dawn hlek lo bawk, chuvang chuan kha i rilru chhe zet kha paih bo tum la, kan fapa in hlim taka nun a hman mek hi tih chhiat sak zawngin khawsa tawh lo mai rawh, tun bak hi ka sawi tawh lovang" ka pa aw ri avang chuan ka nu pawh chu a ngawi ve ta hram a.




Ka sawi tawh kha, ka pa hi chu eng ang pawn thinrim mahse tawngkam vin a hmang ngailo, tawngkam vin a hmang tawh a nih chuan ka nu pawh hian a hnial let ngam ngailo bawk, ka nu laka ka lungawi loh em avang chuan ka pa in a biak dan pawh chu pawi tihna ka neilo, hna kal ka la ngai bawk nen ka hmanhmawh riau tawh, ka nu leh pa te hnenah chuan buai na ka siam avanga thupha chawi in in chu ka chhuah san a, damdawi in lam ka pan nghal bawk.




In entir turah rawn kal te ka en zawh hnu chuan hun awl ka nei ve ta deuh a, ka thawh pui te bulah ka chhuah lawk tur thu ka sawi hnuah Mary hnathawh na lam chu ka pan nghal, a chhungah lut kher lovin Mary chu ka call a, a lo la rang khawp mai, "I hnathawh na building pawn ah ka awm, lo chhuak rawh, ka be duh che" a rawn tawng hma hma chuan ka lo ti khalh a, "Maw.. enge i rawn tih dawn?" a aw ah chuan mak a tih hmel hle "Lo chhuak la i hre mai ang" tiin phone chu ka dah nghal.




Reilote hnuah Mary chu a rawn chhuak a, min nuih var var chungin ka lamah chuan a rawn kal bawk, ka hmaah rawn ding in "Enge I lo tih ve dawn teh mial a, i rawn kal deuh teh thut bawk sia, mak ka ti hman alawm" a ti zang vah a, "Min rawn zui rawh" tiin ka kal nghal pawk pawk a, ka hnunglam ah chuan min rawn zui ve zel tih pawh ka hre thei, cafe ah chuan kan lut a, in tur ka order hnuah Mary chu ka melh nghal run a, "Enge i lo tih dawn a, i buai lo em ni?" a tih leh chuan ka thaw chhuak hrawk a.




"Ka nu nen in in hmu em ni?" ka ti sup a, ka zawh na avang chuan mak tih hmel takin min en a, min chhan mai loh avang chuan dawhthei lo zetin "Ka nu nen in in hmu em tih ka zawt che a nihchu" ka ti leh hluk a, "Aah.. aw, hmani khan kan in hmu a" a tih chuan "Ka nu bulah enge i lo sawi?" ka ti lehnghal hmuk a, "Eng vak mah ka sawi lo, ka chhungte an dam em tih te min zawt a, chuzawng chu, chuchu ngatinge min zawh deuh teh thut a?" a ti ha a.




"Ka nu hnenah ka nupui chungchang I sawi tih ka hria, zep kual tum duh suh" ka tih leh hrawk rual chuan "I nupui chanchin engmah ka sawi lo, ngawi teh, i nupui chuan i nu bulah a chungchang sawi thin ang in min sawi em ni?" tiin za lo tih hriat fe hian a nui hak a, "Ka nupui tham loh hmel zet khan tawng hauh suh, chuan ka nupui hian ka bulah engthil mah a sawi lo, ka thil hriat sa ka sawi mai a ni, chuan ka nu hnenah ka nupui chungchang sawi lo ang kha chuan awm tum duh suh, engkim ka hre vek" ka ti hriam leh hrawk a.




"Engvangin nge i nupui chanchin chu i nu hnenah ka sawi ang, chuan hetiang tak hian min ngai chhia ang tih ka ring pha ngailo a sin" mittui tling pam chungin a ti chhuak sep a, "Lemchan kha chu duhtawk teh, ka hrechiang ve thawkhat viau tawh che tih i hriat kha, kha i mittui khan min bum chu tum duh suh, ka nu hnenah ka nupui vangin nanghi ngaihsak tawh lo che ka ni tih i sawi tih pawh ka hria, hrep tak hian" ka thinrim lutuk chuan ka ti chhuak hrawih a.




"Lalnunkim, ka sawi chian tawh kha, nanghi ka ngaihsak na chhan tur che a awm tawh lo, tunah chuan nupui nei in a ni nen a chhungkaw din ka tum a, ka ti ngei dawn bawk, nang teh hrep avang hian ka nupui chu rilru na takin a awm a, tu angah nge i lo in ngaih hrep a, kei hian ngaihsak reng tur che in ka mawh phurh na i nilo tih leh puitling i ni tawh tih i hriat kha, chuan Bawihi nen kan in neih chhan zawng zawng pawh ka nu I lo hrilh bawk a, fimkhur hle tawh ang che, nangmah vanga ka nupui na taka a awm lai ka hmu leh a nih chuan i chungah hian enge ka tih dawn ka sawi lawk thei hauh lo" ti chhuak leh hrawk in ka ding zui zat a.




"I nupui vangin kei i thiantha ber farnu hi min thlah thlam dawn amaw?" ka kalsawn tur chu tawp chawt in ka in her leh a, "I nunphung leh I awmdan in zir se chuan ka farnu ang chiah in ka en ngei ang che, mahse chuchu i phu lo, ka tan hian engmah I nilo e" tiin ka kalsawn zui a, min auh zui na pawh chu hrelo der hmak in cafe atang chuan ka chhuak nghal, damdawi in lamah let leh in damlo te ka en leh hnuah ka haw ta daih a, ka nupui hmuh hlan ka nghakhlel tawh takzet, kha ka nupui zun ngah zet kha, ni e, a tello chuan kei mipa ah pawh pa in ti ve tawk tak pawh hi a zun in min zem buai tlat chu a nih hi.


Cont...

Comment leh click a chhe thei lutuk a, naktuk chu ka awl maithei aw..