KA HMANGAIH THINGTLANGPA BY MAWITEI BAWITLUNG (Completed)

[mawitei bawihtlung]

KA HMANGAIH THINGTLANGPA






CHAPTER 4





Waiwai chu chhumin hmarcha chu ka telh bawka, bahkhawr kawmchhaka mi chu u Sangpuia nen la in kan thlak bawka, chutia kan pahniha chet dun chu amah tawng tam lo viau mahse ka tan chuan a nuamin ka hlim lutuk tho, mi tawng tam deuh fiamthu duh deuh bula ka awm ai pawhin ka hlim zawk, khawvela hmun nuam ber chu kan duhtak leh hmangaih tak te bula awm hi an lo tih fo kha a dik hle in ka hria.








“Ka lawm e aw, lo leng ve ziah tawh rawh; chuan min puihna avang pawh hian ka lawm e" tiin ka nuih sen sena, a rawn nui ve suk mai. Miin a nelawm loh a sual an tih fo chhan hi ka ngaihtuaha, a tawng tlem vang hi a ni berin ka hria, mihring hian mize hran theuh kan neia, a then fiamthu duh tak, thenkhat tawng thei deuh te. Tawng tlem deuh te chenin, thenkhat ngawi renga hlei deuh pawh an awm ve bawk.






Chuvang chuan kan mizia theuh hi in hriatthiam sakin in en liam mai ila, tumah hian in sawiselna tur kan neih ka ringlo. Mi an tawngtam loh avang maiin sual hmel kan ti ngawt zel te hi a dik lo ka ti, mi kara ri phawng phawng fiamthu duhtak te hi an rilru a chhe ru phian theia, mi tawngtam lo tak te hi mi rilru tha tak an lo ni ru reng thei bawk.







Mi a enga mah hma a kan thiante huat an nih avangte, kan mi ngaihsan zawngin an huat avanga lo huat ve ngawt te hi a thing ka ti. Mizo hian kan ching hle bawk, thu lehlam hre hmasa hauh lova midang lo huat ve ngawt te hi a ringtu zia miahlo, misual tak anga kan ngaih te pawh hi mi fel tak kan tana mi tha tak an lo ni reng thei.







Tu lakah mah hian rilru chhia pu nghal ngawt thin lo hian in belhchian ve phawt hi a tha in ka hria, tun angah social media kan hmang nasa a, thingtlang leh khawpui in er na na zet chenin ka hmu in ka hre ve, mi pakhat fak duh avanga midang sawisel kher hi a thalo ka tih ber a ni bawk, thingtlang nula ah pawh hnathawk taima tak tak an awma, mahse an intilar ve vek kher lo, kan hmeltha tihzawng an nih avanga thingtlang nula dang hnathawk ngailo anga chhuah te, khawpui nula awm awl han tih nghal ngawt te hi a tha ka tilo thin.







Hei hian khawpui nula te leh thingtlang nula buaina a tel miah lo tur pawh in hmelmak na a thlen ve fo mai, thingtlang nula lo nei chin chuan hna an thawk vek, mahse YouTube leh fb velah an hnathawh an live ve kher lo, khawpui nula ah pawh hna tha tak tak thawk leh hnathawh hreh miah loh an awm bawk, mipa ho in a kan hmeltha tih zawng kan fak duh avanga hmeichhe rilru hruaisual thei zawnga kan post kher zel hi a pawi berin ka hria.







Kan awmna hmun a zirin a tu a te pawh hian kan in siam rem mai a ni zawk. “Le, a ei theih ta e" tiin thlengkumah chuan suakin fian nen chuan kan keng chhuaka; chuveleh an zai chawlhsanin guitar chu an dah riha, an hawp nghal char char mai. U Sangpuia nen chuan a hranah eiin sprite nen chuan kan hmeha, kan in nuih leh thin, a tawng tam lo nan a chetzia hi hmeichhe tan chuan a ngaihawm ngawih ngawih thung.








“Lalnunkim khek ve rawh, i heh lutuk" Valpuia phun hluk hluk kan hriat rualin pakhat zawk lahin “Ala tam em hi, belah pawh a la awm teuh, i uikawm lutuk ka ril a tam a lawm" a lo ti ve bawk, an va han hahthlak thin tak.







“Ni e, a la tam a nia. In hnial suh u, kha hei suah belh rawh u" tiin an lamah chuan bel chu ka dah hnaia, ngawi rengin an panga chuan an hawp leh nghal zata. Ei chu thei tak an ni, u Sangpuia erawhin a ei tam lem lo, a thak a ti deuh nge sprite chu a in zawm reng mai, nuih deuh hakin ka ei zawm mawlh mawlha, waiwai hi chu ka kham thei thlawtlo.








Kan ei zawh chuan sil in an ni ho erawh an la zai thunga, u Sangpuia pawh tun tum chu a zai ve rut rut mai, rinai in zai lah chu a thiam zek lehnghal. A aw fawn nen chuan a zai thiam lutuk tlat, thleng chu rem tha mawlh mawlhin an bulah chuan ka va thu leha, Samuela erawh a lo haw tawh a nih hmel, engmah sawiloa a haw chu mak ka ti deuh viau mai.








U Sangpuia bulah chuan thu in ka zai ve rat rata, Cfla hla “Suihlung ti lengzual mai maw i anka, dar ang tawn leh ni awm ang maw? chhim tuipui lian i kai thlengin, a cham reng thin ka thinlaiah" tichuan zai thap thapin kan in sawi dial diala.






“Zai ho hi a lo nuam ber a nih hi, rilru hah chang pawh hian han zai vak ila kan zang hawk zel a nia, thiam loh pawhin han zai vak vak ila, thaw a veng hawk zel an tihkha a dik ang, Nunui lo awm chu kan thian ho tan chuan vanneihna a ni ringawt alawm, khawpui nula chhelo zetin keini ang min kawm duh te hi a lawmawm a nia" an tihchuan ka lo nui sen sena.







“Kei deuh hi a nia lawm chu, nangni awm lo ula chu ka khua a har viau ang, lo leng reng rawh u. Kawm tur dang pawh ka neih loh hi, in awm avang hian nuam ka ti teh a nia" tiin ka lo sawi ve a, titi in kan nui ho dar dar mai.





“Naktuk chu race en ila, hmalaiah a ni dawn lehnghal ilo kal ve duh em? U Sangpuia hi a chak leh dawn chiang" an tihchuan u Sangpuia chu ka en vata, min en lo in hmalam ngawt chu a lo ena, zial a zu khu laih laih bawk nen ka thaw hak mai.







“Accident palh a hlauhawm a sin, zan ah lehnghal" tiin ka lo sawia, “A ho lutuk, an ti thanga ngaiah an neih tawh. An in chawi ziah a lawm, ilo kal ve duh chuan kan phur ve ang che" Valpuian a rawn tihchuan “A ngailo" u Sangpuia chuan a lo ti hluka, kan en thap mai “Hmeichhe kal a ngailo, a hlauhawm lutuk. Bakah miin an ngai dik lo palh ang che, inah lo awm mai mai rawh" a rawn tihzawma, chhan dan tur pawh ka hrelo.








“Aaa... a bulah kan awm dawn a lawm" an lo tih pawh chuan a phal tlat lo “Miin an hriat hunah an sawi leh dawna, nuam lo a ti ang. Sawi hmuh suh u, tin, a tlai tawh haw tawh ang u" a tizuia, a thusawi awmzia ka hriat takah chuan keipawhin kal luih chu ka tum bik lo, Valpuia te chu phun nang nang chungin haw tur chuan an kal chhuak zuia.








“Fimkhur rawh aw, sawi theih phei chu ka neilo nangin in veng fimkhur ang che, tunlaiah accident a tam si. Ka ngaihtuah teh mai che a nia" tiin ka rilru dik tak chu ka sawi leh phawng phawng tawh mai, then sakin alamah chuan min pawt hnaiin “Ka bialnu i ni tawh a lawm, chuan i thusawi chu ka lo hre reng ang, reilote sawlaiah sawn awm lawk ang hmiang" tiin thimkarah chuan min pawt luta.








“Ka nundan i hria in ka ring ang, ka sawi tawh ang khan. Ka nihna ang anga min pawm dawn lo anihchuan tunah hian min kalsan la ka duh" a tihchuan ka en chho ha a, a hmel chu eng thlarah ka hmu rei ruai chauh a ni, a awmah chuan ka beia, keichuan ka thu sawhsawn ka tumlo, hepa hnaih ka chak tlat chhan hi ka hrethiam biklo.







“A pawi ka tilo, miin an sawidan che ka ngai pawimawh lo" ka tihzawh rual chuan duhthawh zetin min fawp zui tawn tawna, ka lo chhang let ve vat bawk, ka hlim lutuk tlat. A kawngah chuan kuahin ka mit ka chhing chiala, hepa hian zawlaidi min tat nge pawh ka hrelo, heti em em a a zûna ka uai mai hi mak pawh ka inti.







Miin an ngaihzawng te chungchang an sawi khan ka lo ngai ho lam viau zela, mahse ka duhzawng tak ka tawn meuh chuan ka insum thei ta bik lo va, thinlung leh rilru zawng zawng pe in ka hnaih ta reng chu a nih hi, thinlung pawh hian in nghahna tur dik tak a lo hre fuh chat thei te hi siamtu ropuizia tilang tu a niin ka hria.









Kan duh viau emaw ti a kan lo ngaihpawimawh ve em em thin te ti tlawm rawk thei turin thinlungin a milpui tur a tawn meuh chuan kan danglam rawk rawk mai chu a nih hi.






Kan inthlah rual chuan thawk la dun ham hamin kan chal leh chal chu kan insik tira, a taksa lum thur thur ka nghen chuan ka thlamuang hliah hliah mai, “Ka kal phawt ange, i mangah min lo hmu dawn a nia" a tihchuan ka bu nghata, mahse ka ui ngawih ngawih mai nia, a hmeichhia zawk ka niin insum ka tum viau nan mahse ka thei ngang lo, hepa hi ka tan a ka talbuaina tur khawp a ni tih ka hailo.








A kal tur chu ka en zui renga, a kal liam mai dawn emaw ka tihlaiin a rawn let leh thuta, a tawp nan ti ni awm hrim hian min rawn fawp leh chawta, keipawh chuan ka lo kuah nghal chat bawk.“Ka kalsan thei dawn lo che niin ka hria, anih muttui aw, naktuk zan chu lo kal hauh suh ka tihkha" tiin min thlaha.









“Aw le, a nih zan dangah i lo leng leh ang tiraw?" ka tihchuan a rawn len tur thu a min chhangin a kal liam zuia, keipawh chu guitar la chuan in chhung lamah ka lut zuia, guitar chu dah tha in ka zung leh te te a.Ka roomah chuan ka lut ta chauh va, ka phone ka en chuan message thar a lo awma.








Tunge tih ka hre mai hauh lo, a dp lah chu ka hmu thei bawk silo. “I mu tawh em?" tih te mai hi a lo nia, u Sangpuia ti dawn ila a nih ka ring chiahlo, ka phone number tak ngial pawh a la nei in ka ringlo.







“Mu dawn chiah tunge aw?" ka tihchuan tum hmuk emoji chu a rawn daha, min rawn chhan danah ka hmelhriat tha tak a nih ka ring ve ringawta “Min hrelo amaw?" a rawn tihchuan “Aw hre miahlo" tichuan ka lo chhang leha, ka hre lo tak tak min rawn biak danah chuan min hre chiang tak a nih ka ring ve ringawt.








“Mawli Samuela" a rawn tih takah chuan ka nui haka “Aw, tinge i haw daiha?" tiin ka zawta, a seen nghal zel theih danah ka message chang char char te pawh a ang dawn dawn mai “Ka awm peih tawh lo tihna a nihkha, kan mimawl hi teh an haw na a rei tawh em?" a rawn tihleh chuan ka ner nanga, a mi chhan dan chu mak ka ti.







“La rei vaklo, awm tlang ve mai tur che ania, thil pawh i ei velo lehnghal" tichuan chhang lehin ka thawn zuia “Aaa ka duh lo. Bakah ka chau deuh a, naktuk main chu kal i tum em?" a tihchuan a thil min zawh chu ka hre nghal mai bawk, ka kal loh tur thu a ka chhan rual chuan a rawn len tur thu chu a sawi ve nghala.








“Ka number hi lo save rawh, i changtupa nen teh chuan hun in hmang nuam maw?" a rawn tihchuan u Sangpuia nen kan awmdan chu ka ngaihtuah chhuak zawka “I ho, Valpuia te an awm ve reng a lawm, i haw daih kha ka lawm vak lo a nia" ka tihchuan nui vak chu a rawn daha.








“Lawm rawh, chance ka pe cheu a nihkha. Tak takin ka pi a nuam lo bawk nen ka haw a nihkha, naktuk zanah ka rawn kawm dawn che a nia, i thianpa hi hrethiam hram mai rawh" a tihchuan ka nui ve ta var vara, an thian ho ah chuan kawm nuam ka ti ta ber mai. Tawng tamin au ve pung pung lo mahse a kawm a nuam ka tihchi tak a ni.









Ka mut a chhuah takah chuan in mangtha in ka mu zuia, mahse ka muhil leh mai theilo. Mitthlaah chuan u Sangpuia nen kan awmdan ringawt kha a langa, ka muhil thei thlawt lo. A chang leh ka nui leh vur vur thin, hetiang khawpa min tihlimtu mipa hi ka la tawnglo, au vak mai ta chu ka chaka, ka ke tang chu ka tawm leh vak thin.








A chet dan nen zawng zawng khan a pa hliah hliah hian ka hria, ka nun atihlim viau bawk. Thawk la ham hamin mutthilh ka tuma, mahse min fawh dan bawk ka ngaihtuah leh thin vang chuan ka muhil thei mailo “Nuntluangpui i lerh lutuk" ka in ti leh ngawt thin, ka hlimna chhar thar chuan min ti mu tha thei meuh lo.








A tawpah chuan ka muhil ve thei hrama, zingah lah thawh ka la hai zui; mahsela Sunday a ni bawk nen a vanneihthlak. Rawngbawl chu puiin ka vir ve zak zaka, thingtlanga awm chuan thawh tur a lo tam zual bikin ka hria, vawk chaw chu pe turin ka intisiam ve ngeia, a in pana ka chhuk chu tawlh thlu in ka ti baw vek mai.






Nu Chhingi min hauh ka hlau bawk si, sawi loh theih ni hek lo. Phur lo zet chuan inah chuan letin ka tawlhthluk thu ka hrilh chuan an lawm lo dawn emaw tihlaiin an rawn nui vak vaka, an nupa chuan ka en tawn reng ringawt.








“Keimahin ka zuk pe ange, inah hian lo awm mai mai rawh. I pek than hunah i la hrethiam ve zel mai ang, kalkawng kha a nal deuh sia kal thang tan lo chuan kal a har a lawm" tiin nu Chhingi chuan vawk chaw chu siam leh in a chhuak zuia, ka zak lutuk chu ka lei ka chhuah vak ringawt. Engmah hi ka zei thlawt lo a nih hi, a rawngbawl sa chu ka lo vil ta tawpa.









Chaw eikhama inkhawm tura ka insiam lai chuan Valpuia te ho pawh an rawn kal thap thapa “In awm maw? Nunui teh a hman tawh em? Kan lo sawm a nia" an tihchuan ka room ata chu chhuakin ka pan vata “Uai i va mawi ve, angel ang mai i ni. Hmeltha kalpui chu inkhawm a nuam sawt dawn a nih hi" tiin an nui dar dara, nui ve sak chung chuan kan inzui chhuak hlawma.








Kalkawngah chuan an infiam leh nasa tawh mai, Biak in chhung kan luh hnuah chuan kal hrangin hmeichhe thutna lamah chuan ka thu a, Rengpuia hla la hmasa fal thei lutuk erawh thenkhat an nui leh hak thin. Mi hla chang lak hma fe a a lo la thin lah a hriat ropui bawk nen keipawh chu nui lo turin ka insum nasa viau, a thianten an hau leh nasa dawn mange.





ZAWM LEH TUR, YOUTUBE LAM DAH TUR BUAIPUI NEN KA HUN IN A DAIH NGANGLO.