CHAPTER 4
U Cindy chu tlai zetah a rawn haw a, a rui tih a hriat hle bawk. U John-an a hmuh chuan a lâwm loh hmêl takzet, keipawh ni ila ka pasal emaw rawn rui haw se ka lâwm hauh lovang, u Cindy phei chu nu a ni tawh lehnghâl. Hmeichhia kan mualpho awl zia a hre miah lo nge mawni, rui tak a ni.
“Cindy Lalthanpui" u John-a chuan a tihrawka, a lawm loh zia a aw aṭang chuan hai rual a nilo. U Cindy lah chu a pasal thinrim rawl chu a hrelo der nge a nui hak haka, Puipuii chu rui pai chhut chhut chuan pawm a tuma. A nilahin hlau zetin a lo ṭap vak vak mai, “I nu ka nih hi, min hlau a maw? Rawn kal rawh" tiin pawm luih a tum chu Puipuii chu ṭap chungin ka lamah a rawn tlana.
U Cindy chu a lawm loh hmel hle bawk, rawn phei leh a tum lai chuan u John-a chuan roomah a pawt lût dawr dawra, an inhau ri chu reilote ah a rawn chhuak leh ta, Puipuii lah a ṭap nasa bawk nen pawnlamah chhuahpuiin ka awia, a nipawh chutia len chhuahpui tâkah chuan a ṭap chu a bâng zui mai bawk.
Kawngpui sir vêlah chuan vah kual puiin ka in ngaihtuah neuh neuha, awmna tûr dang ka zawng tawp dawn emaw ni ka ti tawh. Mahse Puipuii hian min ngaina in ka bulah lo a awm duh loh zia ka hre ve bawk si, bakah u John-a pawh khan an fanu enkawl turin keimah bak rin ngam a neih loh thu a sawi tawh a nihkha, ka chungah an ṭha bawk nen chhuahsan dâwn ila an ngaithiam hauh lovang.
Mahse u Cindy lah heti hi a ni a, Puipuii hma hun ka ngaihtuahin ka khawngaih bawk si. A nu lahin amah a enkawl ngai lo ti ila ka awm hnu hian zan ah an bulah a mu tih loh chu ka bulah a awm chawta, hei vang pawh hi a nimahna a nu ai mahin min duh tawh zawk emaw tih turin ka bulah lo a tlei duh hauh silo.
Reife ka awm hnu chuan Puipuii pawh chu a muhil zui ta daiha, ka thaw huai mai. Muangchang chuan in lamah chuan chhoh puiin inchhung ka luh chuan u John-a chu a lo indawm kûn ngura, a nupui awmdan chuan a rilru a ti hah hle tih a hriat mai.
“I ṭha em?" ka inrawlh na tur ani em phei chu ka hrelo, mahse titi pui tur a mamawh in ka hriat avang chuan ka pan hnaia. “Engvanga hetianga awm ta nge maw a nih le, a bulah hun ka hmang tam lo tih chu ka hria, mahse pasal ka nihna angin theih tawp chu ka chhuah ve a sin" tiin a phun supa, ka lo en reng thung.
“Ka nupui ka enkawlna ah hian ka tling lo mah mah em ni ang?" a tihchuan a bulah chuan ka ṭhu thla a, “Hun pe la a ṭha mai thei a sin, a rawn rui ve palh mai mai pawh ani theia. Puipuii a awm tawha, a ni pawhin Puipuii hma hun hi a ngaihtuah takzet a nihchuan a insiam ṭha em em ang" ka tihchuan a rawn nui hak ringawt.
“Engkim hi ka hmuh hmaih hleinem, a bul berah chuan ka lo mutpui kha ka tihsual lian ber a ni. Ka hmangaih miau loh avangin a bulah pawh awmin ka duat hliau hliau ngai lova. Min phatsan hi a mak ka ti rêng rêng lo; mahsela kan fanu tal hi ṭha takin enkawl sela, a fanu vang tal pawh hian a tuar hrâm hrâm ka ringa, mahse a lo ni lo a nih hi. Engtia tih tur nge pawh ka hre tawh love" tiin a ngawi zui ta rana.
A thusawi chuan min ṭhawng takzet, a ni pawh hian u Cindy ngaihzâwng neih kha a lo hre tawh a maw? A nihchuan engvanga ngawi reng nge maw a nih le, sawi tur hre mai lo leh mak ti zet chuan ka en renga, a hmelah chuan a inchhir hle tih ka hria, ka khawngaih takzet. A theih tawp chhuaha Puipuii leh u Cindy a duat zia ka hmu ve renga, u Cindy zâwk hi a hel reng bawk nen a tan pawh a rilru buai tur zia ka hailo.
Puipuii ngaihtuah lo phei se chuan an inṭhen hial ka ring, u John-a zawk hian dawhthei hle lo phei se chuan u Cindy chu a mualpho viau ngei ang. “Kan ina awm reng hi i duh lovang tiraw?" tih zawhna min rawn pêk leh avang chuan chhang mai lovin ka en renga.
“I duh chuan awmna tûr dang ka zawn sak thei che a nia. I tan pawh kan inchhûng boruak ṭha lo zeta awm reng hi a hrehawm ang, i awm loh erawh chuan Puipuii hi a ngaihtuah awm deuh anga. Mahse inchhûng khur hrehawm lutuka i awm chuan i tân a nuam dawn lo tih ka hria a, chuvang chuan i duh chuan awmna tûr dang ka zawn sak thei che a nia" a ti leha.
“Ah! A ngailo, hrehawm ka tilo a nia, Puipuii hmuloa awm te chu ka duh bik hleinem. In bula awm hi hrehawm ka ti miah lo a nia, hmun dangah awm pawh ni ila nang ni ang hian min duat kher lovang, he inah chuan zalên takin ka awm theia, ka tan chuan in hlu lutuk a nia. Chhuah ka duh reng reng lo, Puipuii ka ngai lutuk palh ang" tiin boruak thlâk tum chuan ka nui hak haka.
Min en vung vung hnuah a rawn nui ve ta var vâra, “Chaw ei tawh ang hmiang, i u Cindy lah a muhil daih sia" a tihchuan choka lam chu kan pan duna, ka nau pua nen a mah zawk chuan chaw ei chu a siam mawlh mawlha, keiin chaw vel chu ka lo khawrh thunga.
Kan pahnih chuan ei mawlh mawlhin a ṭawng mawh bawk nen keimah chuan ka be mawlh mawlha. Ni e, a ngaihdan kha a dik tho, mahse ka lakah an sual chuang lo nen. Bakah Puipuii hian min ngaina ropui sia hmun danga han awma, bul han ṭan leh tur kha chuan ka peihlo, ka awmna a lo fuh loh leh phei chuan tunai daihin ka hrehawm thei tih ka hria.
“Nula fel tak i ni, kan chhungkua hi nangmah avangin a nuam mai mai a ni e" a rawn tihchuan ka en ha a, min lo en leh reng tawh. Hawisawn vatin “A âwm lo emai, keimah vâng a nilo ang. Naupang an awm hian inchhung chu a nuam ṭhin a lawm" ka tihchuan a nui suka.
“Nilo e, i rawn awma titi pui tur te ka neih phaha, kan chhûngkua chu heti lek hi kan nia. Zânah mut hma phei chuan a reh ṭhin khawp a sin. Puipuii rawn pian a chinah hian i sawi angin nau awm tûr leh chhaih tur an awma, a zia a nimaia. In khaw lam teh i ngai tawh em?" a rawn tihdaih avang chuan nui hakin ka lu ka thing nar nara.
“Ka chhûngte ka ngai tih loh chu ngaih tur em em pawh an awm lo, ṭhian ka kawm ngai lova. Ka nu ka ngai em em thung, tunah pawh a hah ṭhin viau ang, ka naute lah an la naupangin engmah an la hrethiam em em silova, an thil duh ngenin an ṭap nasa ṭhin a lawm" tiin ka nui var vara, a ni pawh a rawn nui ve hak haka.
“A nawm dawn chu, Christmas chu haw i tum em?" a rawn tihchuan ka chaw ei lai chu ka chawl deta “Um haw ang, Christmas tal ka haw ve loh chuan. Bâkah Christmas tak hi chu Thingtlang lamah chuan a nawm hunlai ber a nia, helam angin kâwn chei vel fan tûr awm ve ngailo mahsela ṭhian emaw, chhûngte nen emaw urlâwk zân te hmang ve in kan tlaivâr ṭhina. Christmas thingfawm te, in tihhlimna leh carol vêl pawh kan nei ṭhina, a nuam ve thei lutuk, tam lo mah ila kan hun awl neih ve chhun ania" tiin ka nui leh var vara.
Chutia kan khaw lam chanchin ka sawi takah chuan ka lung a leng ve ngei mai. “A nawm dawn chu, helamah pawh kan ti ve fo tak nângin thingtlang lam ang chuan kan hmang urhsun lutuk tawh lova, kumin chu rawn hmang ve ila a ṭha ang" a tihchuan ka lo phur pui viau.
“Nia kan lo mikhual ang che u, mahse kan in erawh a lian lem lova, in duh chuan midang pawhin an thleng thei ang cheu. An fel a lawm, Christmas ruai ṭheh te hi a nuam teh a nia" tiin ka phûl hluta, kan titi tui ta viau nen nichina boruak uap lutuk ang kha a awm tawh lo.
Thleng sil zawh chuan inkawm leh in thil chi hrang hrang kan sawi duna. A ni pawhin a tlangval lai chanchin te sawiin a mah a lerh ve viau ṭhin a nih hmel. Nui dun hak hakin a chang leh thil ho te te chu sawiin kan phûl hluta, chutia kan lo nuih lai chuan u Cindy chu sam thur zet hian a rawn chhuaka, u John-a nen chuan a che vel chu kan lo en reng mai.
“Nang ni pahnih chu in va in nel awm ve" tiin toilet lamah a lut zuia, u John-a nen chuan a chevêl chu kan en reng ringawt. Toilet aṭanga a rawn chhuah leh hnu chuan roomah a lût zuia, keipawh chu nuam ka tih chiah tawh loh avang chuan room lamah luh tumin Puipuii chu an room lamah pawm phei mai turin ka ti a.
“Zanin chu i bulah i lo mut tir mai dâwn em ni, a nu zu rim nen hetiang lam hi hnaih lo sela ka duh" a tihchuan ka hnial em em bik lo. Roomah chuan lutin Puipuii chu bang kil lamah chuan dimtea mutin keipawh chu ka mu zui vea, mut hma chuan movie enin reelshort vêl chu enin a changtupa pakhat chuan ka mit ala ngei mai Resisting Mr. Lloyd tiha a changtupa sang leh pian nalh lutuk chuan ka mit a la ngei mai.
Ka vei nghal bur dâwn tih ka hrechiang, story boy ang mai a ni (LO EN VE RAWH U, A CHHELO TEH MAI A NIA
MAHSE LO DUH VE KHER SUH U, KA I MAITA TAWH
) hetiang mipa hi tawng ve ila chuan nuam ka ti viau ang. Mahse keilah heti te mai hi ka ni a, ka chhe ve ropui sia.Puipuii a rawn chet ṭiah ṭiah avang chuan phone chu dahin ka pawma, a hnungah chuan ka ben thek thek hnuah a muhil ve leh mai bawk. Ka naute ka enkawl nasa bawk nen naupang enkawl hi chu ka thiam ve tawh viau mai.
A mutthilh hnu chuan ka film en lai bawk chu en leh in a zawh tâkah chuan mutthilh tum chuan ka insiam rema, Puipuii pawhin min kuah ve ṭai mai.He naute hi a duhawm takzet, duat a phu hliah hliah a sin mawle, a nu lahin a ngaihsak der silo, ala te bawk nen ka khawngaih takzet. Keimah talin duat taka enkawl ka tum ang.
Zîngah chuan Puipuii che sat sat leh ka hnar kua a rawn kawm avang chuan harh vatin ka ṭhu chhuaka. A lo la nui khek vak vak zuia, thawh phan ṭah a neilo chu a vanneihthlak, mahsela a tho hma mah mah ani. Mut leh chi lah a ni tawh bawk silo, pua in ka intihfai puia, room aṭang chuan ka chhuahpui zui nghal vat bawk.
A hnute tur chu tui chhuang lumin ka siam saka, chhuatah ka bulah ṭhut tirin a ni pawhin a hne dawk dawk mai. Chaw chhum siamin Puipuii harh lutuk chu ka veng pah paha, dar ruk velah u Cindy pawh phirsi zetin a rawn tho chhuaka, bathroom lama a luh hnuah a rawn chhuah leh chuan a fai leh ta vawk mai. Amah a hmelṭha bawka, a mu tho hlim pawh hmuh a nuam viau tho.
“Bawihtei chu a va tho hma ve, nizanah i riahpui tih ka hria a, i fel ṭhin hle mai. I hah viau lo maw?" a rawn tihchuan ka lu ka thing nak naka “Amah a fel bawka ka chau lo, zanah pawh kan harh miahlo a nia, bakah Puipuii awm te chu kan hah theilo, amah hi a fel emai" tiin Puipuii tlan kual vel chu ka ena.
“Kan ina i rawn awm chu kan zân phah huai a lawm, ahma kha chuan keimah lo in an la theilo va, ka hah phah asin. Tunah erawh a nu ai mahin a ngaina zâwk che a nih hi" a tihchuan ka nui ringawta, chhan dân tur pawh ka hre lem lo.
Chawhmeh chu chan mawlh mawlhin ka phone a rawn rik avâng chuan ka la zuia, ka nu a ni. “I putea a damlo a, pawisa puk min rawn dila engtin nge kan tih ang?" a rawn tihchuan ka thaw haka, putea te maw? Engvanga ka nute chu lo va bia nge an nih ang.
“Nu a ngailo, a hma a min tihdan kha ka theihnghilh theilo, kan mangan ngawih ngawih lai, mittui nen a i ngen chung pawhin min ṭanpui duh lo a nih kha" ka rilru natna chu a rawn thara, ka mittui a tling pam thei. Khatih hun lai khân kan naupang ber khawsik sang lutuk avang khan damdawiin pan tumin kan in buatsaiha, pawisa kan nei lo nen putea te kha min ṭanpui turin kan ngên a nih kha.
Mahse an ni erawh in sum an neih loh thu a min chhangin ka nu in mittui tla chunga a dil ngawih ngawih chung pawhin min hawisan hmak thei a nia. Tunah hetia inhlawha ka awm veleh min rawn hre leh si a maw? Eng ang mihring nge maw an nih le? Ka nu in khawngaih a dil lawm lawm lai leh ka nau khawsik sâng hrehawm ti lutuka a awm lai te chu ka mitthla ah a rawn lang nawn awn awn maia.
“Bawihte chuti tur a ni hleinem, tunah chuan i zarah hei nun nuam takin kan awm ve thei ṭana, i putea te hi kan chhungkaw neih chhun an ni tih hre reng rawh. Bible pawhin sual chu sual veka thungrul lo turin min hrilh kha, midang kan ṭanpui theih chuan malsawm dawnna a ni zâwk ngai e, chhungkua kan ni a mangan lai chuan kan in pui tur a lâwm" a tihchuan dik ka ti ve tho. Mahse chuti maia nem chu ka duh lo.
“Mahse nu, an tihdan che kha i hre lo em ni? Khatih hunlai khan tûn ang chiahin a sin kan dil ve, an chhungkua kan ni tih an hre duh miah lo a nih kha" ka tihchuan ka nu chu a rawn nui haka, “Bawihte ka hria a lawm, mahse hei i nau te pawh an ṭha tawha, i pa ngaihtuahla, a ni pawhin a unaute min tihdanah khân a lawm bik hauh lovanga. Mahse an mahni ang maia kan insiam danglam chuan i pa a lâwm hauh lovang, kan ṭanpui a ni tih a hriat chuan i pa thlarau pawh a hlim dâwn a sin" a tih takah chuan ka thaw ta haka.
“A ṭha alawm, chuan nu hna kha lo thawk nasa tawh lutuk lo la, ka nau te pawh an puitling ve tawha, bakah hlawhfa lo la zeuh zeuh mah ula a pawi lo. Ka inhlawh zêl mai dawn a lawm" tiin ka hrilha, a nipawhin a thawh em em tawh loh thu chu a rawn sawi ve bawk, rawng bâwl ka laklawh em avang chuan thudang sawi tawh lovin phone chu kan dah zuia.
U John-a pawh rawn tho chhuakin Puipuii nen chuan in pawmin u Cindy chuan a lo lâwm ve bawka, tukin chu an pathum chuan infiamin an nui ho va, ka en reng. In ngeih taka an awm chu an hmuhnawm viau mai, nui sakin rawng chu ka bâwl zawm mawlh mawlha.
Chhûnah chuan tih tur em em a awm loh avangin phone a ka ṭhiante nen chuan kan in bia a, Aizawlah ka awm tih an hriat aṭangin rawn len an tum foa, mahse u John-a te ngaihdan ka hriat loh avangin ka la hnial ve ṭang ṭang thung. Vawiin chu u Cindy pawh a mah ang lo takin inah awm in Puipuii nên chuan an in awma, keipawh ka hahdam phah phian mai.
Tlai lam chu ka ṭhiante rawn len an rem ti nge tilo zawh ngei angai ang, inhmuh an châk ve bawk nen. Bâkah ka bialpa ve deuh reuh pawh rawn len a tum nguna, ka phal ṭhin loh avangin a thinrim ti tih tawh lehnghâl.
An remti em ang chu maw
(ZAWMNA HMULO CHUAN CHAPTER 3 AH EN RU AW, HEI PAWH ZAWM LEH TUR .