DEAR JOHN BY MAWITEI BAWITLUNG (Completed)

[mawitei bawihtlung]

DEAR JOHN






CHAPTER 8







“Â pa " Puipuii chu kawngka lamah a tlan phei ter tera, u John-a chuan a lo pawm nghal nawlh mai. Kei erawh ka chawhmeh kan lai chu ka chawk mawlh mawlh thung, a sawi ang tak takin vawiin chu a rawn haw hma hle mai. Ka bulah chuan an pafa in an rawn pheia, ka en duh mai lo thung.







“A va rimtui ve, bawihte ânu thil siam chu a tui hmel hle mai tiraw?" a tihchuan Puipuii pawh a lo bu nghat nghata, kei erawh a thusawi avâng chuan ka melh kawka, mitmeng de sar sara min lo en reng avâng chuan ka hawi sawn nghal vat “Thil nilo lo sawi suh, i â emai. Naupang mai a nihkha, a nu dik tak pawh ka niloa, khatianga sawi kha a ṭul ber lo" ka lo tih hlak chuan a rum nghata.








“Chu a nu nih chu i duh lo tihna em ni? I lo duh miah lo a nimaw?" a rawn tih tâkah chuan thaw hakin ka inher a, “Chutiang pawh a nilo, a nu a la dam ve renga, nakinah a hre leh tho dawna. Keiina a nu lo in tih tir kha a zahthlâk, innei pawh kan nilova, awmpui mai ka ni lehnghâl" ka tihchuan min rawn hnaih nghal ruak mai.








“Awmpui kha in ti tawh ngai suh, nakin maia ka nupui tur i nih hi, tuna a nu emaw a tih che kha a ṭha zawk, a nu dik takin a ngaihsak in a enkawl ngai heklo, aniin a fanu in a koh dânah che thuneihna a neilo, a pian tirh aṭanga pawm duh lo leh hnute tak ngial pawh pe duh lo a nia,a hringtu nimahse nu nihna pakhat mah a hlen lo" a tihchuan ka ngawi ta ringawt.








Enge sawi tur ber pawh ka hre tawhlo, ka ngawi ta reng ringawt, a niin ka ngawih chu a lo duh chiah lo nge min rawn hnaih sauha “Eng nge i duh chiah, kei hi min duh ve tak tak lo em ni? Thudik tak min hrilh rawh, i duh lo chunga nawr luih che ka duh lo ania, keichuan ka duh che ka tih tawh kha, midang ngaihtuah lo in i rilru dik tak min hrilh rawh" a rawn tih leh tâkah chuan en chho in ka kûn leh daih a.








“Min duh lo a nihchuan ka nawr lui tawh lovang che, eng pawh ti ila i thinrim thei lovang, hmeichhe dang ka rawn hruai lût leh a nih pawhin" a tih leh chuan ka ner saka, a kutah chuan vawn sakin chiang tak chuan ka melha, ka chhânna nghak chuan min en ve run bawk.







Puipuii pawhin thil a hrethiam emaw tih turin thawm a lo chhuah miah lo, a pa tih ang chiahin kei chu min en ve kar mai. “Aw le, mahse min nawr lutuk suh ang che. Keipawhin ka duh ve che a lawm, mahse mi hmuha tihlan lutuk ka duh rihlo, mi'n min sel nasa lutuk palh ang, vawiinah ka vahchhuahna ah pawh in ngaizawng thanin kan lo thang leh tawh a nia, tûn atân chuan in thup taka kal ka duh" ka ti sapa.









“Ho lutuk, ka sawi tawh kha mi nun sawisel peih lutuk chuan a rei leh reiloh nilo in sawisel tur an hre reng, an hmu reng bawk ang. Kan nun kher lo pawh, an hmelhriat leh hriat loh pawh an rêl reng tho, chûng mai mai chu ngaihtuah duh loh tur. Social media aṭang pawhin an duhchuan an rêl reng tho, mi zawng zawng kan ti lâwm theilo; tlawn pawh a ṭul chuang lo, an laka ṭhat kan chhuah avang khan kan lakah lâwmna châng an hre chuanglo" a rawn tih bung nghut chuan dik ka ti ve tho bawk si.








Mahse tam takah hmeichhe tan chuan a hlauhthâwn awm loh theihloh, kan hmeichhiatpui te ngeiin min sawisela kan nihlohna thleng thlenga min sawi duh an ni ṭhin si. Thil sual tih chuan min huatna lamah kan nihna lo bak bakin min sawia, miten min lo hmuh mawh tawh sa nen chûng kan nih lohna thleng chuan thil sual pakhat lek kan tihpawhin kan nihna a ni tawh mai ṭhin si.








“Engmah hlau thâwng suh, mî pa i chhuh a nilova, nupui ṭhen chupawh thlahnih chuang dâwn tawh i nihpui a ni dâwn mai zawk a lawm. Innei nghal kan nilova, hlauhthâwn tur a awm lo ka tih tawh kha, ka nupui hlui ber pawhin ngaihzâwng a nei leh tawha, nanga lo inthlahrunna tur a awm lo, mipa mi rêl hmang tak pawh min timahla nang ka hrilhfin theihna che a nihchuan a pawi ka tilo" a rawn tih kher chuan rum zetin ka ena.







“Ka â i tiin, thil hrethiam theilo min ti maw?" lâwm lo zet chuan ka ti a, a rawn nui hak mai. “Chutiang pawh ka sawi loh kha, khâ i chawhmeh a ut zo dâwn" a tih takah chuan harh chhuak zawkin ka chaw hmeh chhuan hi chu ka ena, a hmin takah chuan suan vatin thil dang chu ka siam zawma.







“I inhmeh hle mai, nula nilo in nupui che fel leh zam ṭha zet i ang" tiin ka sirah chuan Puipuii pawm chung chuan an rawn dinga, ka rawngbâwl che vêl chu hawisawn miah lo hian min lo en renga “Christmas chu ka nute ka hrilh tawha, in duh chuan Puipuii nen in lo kal ve thei ang" ka tihchuan a lo phur phian lehnghâl.








“Kan inkar hi i nu hnênah i hrilh tawh em?" a rawn tih khauh chuan ka thil tih lai tawp chatin ka ngawi vang vanga, ka la hrilh hauh lo. A chhan pawh a ngaihdan tur ka hre lo miaua, kan inkar a la chiang lo bawk nen ka la hrilh duhlo kha a nia “Hrilh lo, a ngaihdan ka hre siloa, tûnah rih chuan hrilh loh hi a ṭha in ka hria" ka tihchuan a pawm hmel vak loh.









A rum nghut a “Tûnah hrilh ang, keimahin ka lo bia ange, khawi maw a number min lo pe teh.." a tih chuan hlauthâwng zetin ka ena “U John, a chi rih lo ang ngaihdan dik lo a neih chuan kan tân a buaithlak dâwn a nia" tiin ka chawhmeh siam chu duhtawkin ka dah fela.







“Keimahin ka be dâwn a lawm, engkim hriat tîr law law a ṭha nakinah kan pahnih tân buaina leh tûr tho a ni a, keimahin engkim ka hrilh anga a pawm em em ang, khawi maw i phone chu" a tih leh tak tlat avang chuan hnial duh tawh lem lo in phone chu ka pe a, la nghal vatin reilote a enkual hnuah ka nu number chu a calla, loud-ah a dah nghal bawk.







“Tunge a hming?" a rawn tihchuan ka lo hrilh vata “Aw bawihi" ka nu aw chu ka a rawn ri lang lânga, a hlim hmêl hle lehnghâl. Ka zâm lutuk chu ka kut te chu a thlan bat bat thei nia, “Nu Vên keimah Felfeli awmna pa kha ka nia, biak lawk che ka duha" a tihchuan ka lung phu chu a rawn sawt chhuak ang tih hlauhawm khawpin a ri dup dup tawh mai.








“E pu Mapuia maw? Enge ni ta?" ka nu chuan a rawn ti thuaia, mitmeng buai zeta ka en lai chuan a mitmet chuan hahdam tûrin min hrilh pah mawlh mawlha, mahse ka hahdam thei thlawt lo.






“Eng lo ania, Felfeli nen kan inkar hi hrilh che ka duh, Puipuii hi lo pawm lawk ta che" tiin a kalsawn zuia, ka nu chuan engtin tak ngai ang maw. Sofa ah chuan ṭhuin an inbiak zawh hun chu ka lo nghâk renga, a kalsawn daih bawk nen enge an sawi ka hre thei tawh hauh silo.






Darkar khat dâwn hnuah chuan ka bulah rawn kalin phone chu min rawn pe a “Engtin nge a tih? A thinrim ang tiraw?" ka tihchuan nui sukin ka biangah chuan a rawn piai zauha “Hlauthawng suh ka tih kha, a tîr ah chuan a thinrim viaua, mahse engkim thil nihna dik tak ka sawi tâkah kha chuan a hma ang em em chuan a awm tawhlo, lo va in be leh ula chaw ei ka lo siam ange" atihchuan ka hnial bik lo.









Room ah chuan lûtin ka nu chu ka calla, a lo la har lo “Nu ka tihpalh" ka tinghal tawng a, “Bawihte ṭha lo viau mahse chutia an nupa ber an inṭhen tawh chuan i duh chuan ka dang lovang che, Mahse fimkhur ang che. Engkim min hrilh a, chuti nilose mi nupa inkar tichhe tu ni turin ka duh miah lo che a nia. Hmeichhe lepchiah ber ang maia mi ngaih theih tur che in awm hauh suh ang che, ka pawm theilo viau nangin Mapuia thusawi pawh ngun takin ka ngaithla a, i thu thu ani mai. Mahse ka sawi fo kha fimkhur tluk a awm lo a nia" a tihchuan ka hahdam huai huai mai.








“Nu ka lo hre reng ang, ka tihpalh, ka tum em em bik pawh a nilo" inthlahrung ru tak chung chuan ka tileha “Ka sawi tawh kha, kan thinlung leh rilru hi kan dang thei hleinem, mahse chin tawk thiam a ṭha, in enkawl ṭha la. Nupui ṭhen tawh a niin an fanu i la enkawl zui dawn a ni a, fimkhur hle ang che" a tihchuan ka aw ringawta.








Chaw kan ei dâwn thu hrilhin phone chu ka dah zuia, room aṭanga ka chhuah chuan u John-a chuan engkim a lo peih fel thlap tawh mai, Puipuii pawh chair-ah chuan a lo ṭhu fel ve at mai, chaw pangngai kan pe tel tawha, tam erawh ala ei ngai lo thung.








An bulah chuan va ṭhu ve in u John-a chuan min lo en rana, ka nu nen kan inbiakna chu hriat a duh tih ka hria “Engkim a ṭha, a pawm a nih kha ei vat ang u" tiin chaw chu ka en san ta daiha, Puipuii chaw rawt sa chu ka barh pah bawk, a ni pawhin engmah a sawi tawh lem lo.







“Tunah chuan hlauhthâwnna tur a awm tawh loa, nangpawh ngaihṭha deuh in awm tawh rawh" a tihchuan ka bu nghata “Mahse zâna kan bula mut ve kha ka phal tawh lo a nia, khum i nei ve a, a mawi lo. In ngaizawng pawh ni ila nupa kan la niloa, nangmahin riak hrang tawh rawh. Puipuii nen phei chuan kan tâwt lutuk" ka tihchuan a lawm loh hmel hle.







“Thil dang kan ti pawh a nilo, enge mut tlân mai mai chu a pawina? A ho emai" a tihchuan ka thaw haka “A ho lo, Puipuii nen kan mu ang, nangmahin i mu ang, i duh loh leh teddy bear leila i mut pui mai dawn a nia" ngeiawm zet chuan ka ti a, a lawm loh hmel em em lehnghala, enge kan bula mut phet a tum ni.








“I thulo" a rawn ti bul hmuk mai, nui hakin “Thu e le, i duh loh pawhin i mu dâwn chuanglo" tiin kham zuiin ka tho chhuaka, thleng chu an sil na hmunah ka dah nghal bawk, a ni pawh a ei reilo,a rawn kham zui ve thuaia; chuveleh thlêng chu seng zung zungin ka sil leh sawk sawka, a niin Puipuii a lo buaipui ve bawk.







Ka tih tur te ka zawh tâkah chuan chhuat chu nawt fai leh te te in Puipuii chu ka va lâksak zuia, room-a luhpui ka tumlaia min rawn zui ve zêl avâng chuan inherin ka nam deuha “I room-ah lût rawh, rawn tel ve suh ka tih kha, mi i tibuai mai mai. A mawilo, i khumah va mu rawh" tiin ka kal zui leha, min la rawn zui zel tho.








“Ka riak dâwn lo, Puipuii a mut veleh ka phei ang" a tih tâkah chuan tilui duh bik lo in Puipuii chu ka mutpuia, a nipawh reiloteah a muhil leh nghal mai. Chhûnah a mu tlem bawk nen zanlam hi chu a mu hma ṭhin viau mai “Va mu tawh rawh, i intiam tawh kha" ka tihlai chuan ka hmuiah a rawn fawp vang vanga.








“Muttui le" tiin a tho ve hnu hnu mai, en vang vangin ka nui haka. Tihluih deuh hlek loh chuan a luhlul ve bawk nen a ti leh duh dawn lo tih ka hriat vâng a ni pakhat, a chhuah hnu chuan mutthilh tum chuan thawnthu playin ka insiam rema, Pasalṭha thawnthu hi ka in awih mutna ber a ni a, ngaithla lo chuan ka muhil ṭha thei meuhlo, mut paha ngaihthlak loh chuan a rehna hian keichu min ti harh tulh tulh zêl.








Midang hi an ni ve angem ka hrelo, phone ka en pah hian ka mut hi a chhuak em em a, ka muthlu lawp lawpa. Dah ve leh hian ka harh leh em em ṭhin thung, mak pawh ka ti in tihharh tuma phone ka enin ka mut a chhuak deuh deuha, mut tuma phone ka dahin ka harh leh tulh tulh thung si.



CHHUNAH KA TYPE HMAN THLAWTLO A, MUTCHHUAK NEN TIHI PAWM LEH RIH MAI RU AW.