KA HMANGAIH THINGTLANGPA BY MAWITEI BAWITLUNG (Completed)

[mawitei bawihtlung]

KA HMANGAIH THINGTLANGPA





CHAPTER 36





“Nunu i nuam deuh tawh em?" putea te chu an rawn lûta, ka haw aṭanga thla khat aliam aṭangin ka nuam thei meuh lova, Sama rawn haw tum erawh ka hnial thei hram a nih kha. Ka khua a sik ser ser reng bawk nen school pawh ka kal rih meuh lo “Test kid te kan lei chhin dâwn em ni? I rai te a nilo maw? Nau pai tirh te hian khawsik hi neih ngai a nia, i period tawh em?" pitei zawkin a rawn tihchuan ka harh zawk mai.








Ka la period hauh lo “Ka la period miah lo, anih chuan nau ka pai tihna em ni?" tiin ka dul chu ka khawiha, putea te nupa chu in enin an nui haka, “Test kid chu ka va lei ange, Rintei ten an zawrh tak kha maw" tiin putea chu a chhuak zuia, kei erawh ka phur ru ngei mai. Nau chu lo pai hlauh ila tihte chu ka ngaihtuaha, a ruk chuan ka ṭawngṭai mawlh mawlh bawk.








Pitei chuan nau ka pai chu a rin thu a sawi ve sap sapa, chu chuan min ti phur zual. Putea a rawn thlen rual chuan test kid nen chuan bathroom lam chu ka pana, toilet nen an siam tel vek avang in a remchâng phian bawk. Ka zun chu test in ka chhuaka, kan pathum chuan result kan nghak ṭhapa.







A tâwp a tâwpah chuan rin sen pahnih chu a rawn awm ta kalha, kan au nghal chûl mai. Kei phei chu ka hlim takzet, Sama hrilh hun mawlh ka nghakhlel, a hlim ve dâwn tih ka hrechiang hle bawk. Fa neih a nghakhlel tawh hle tih a sawi fo va, tûnah chuan ka pe ve thei dâwn ta.





Putea te pawh chuan hlim zetin min chhuahsana, keipawh chu ka phone la in Sama ka call nghal zat mai. A ring fe hnuah a rawn la chauha “Aw ka duatnu" zângkhai vaha a rawn tihchuan ka lo nuih hak mai, kan in biak apiangin ka awm nawmlohna tur zawngin ṭawngkam a nei ngai lova, englai pawhin zângkhai vahin min lo chhâng thei ziah bawk.






Mipa fel leh zaidam tak a ni tih a aw aṭang pawhin a hriat ngawih ngawih ṭhin. “Enge i tih ka duhpa" ti ve sapin hlim ru zet chung chuan ka zawta, rawn haw vat vat se tih tluka duh leh châk ka neilo.





“Hei ka kal dawn chiaha, min ngai tawh em ni?" a tihchuan ka lo nui haka “Ngai lutuk e, thil hrilh tûr che ka neia" tiin ka chawl leh riha, ka phur lutuk chuan min sawi harsat tir mah mah zawk. “Enge ni sawi la ka lo ngaithla ania" kawngka a kalh pah a ni ngei ang, kawngka khâr ri ka hre thei.





Stepa a chho ri nen thleng chuan phone chhan mah ni sela ka hre thei vek mai. “Naute ka paia" a faifuk rût rût chu a tawp chawt a, a aw thian kharhin “Eng maw!? Naute maw?" a rawn ti nghal chung chunga, a nghakhlel hle tih ka hriat avâng chuan pehhêl pawh ka tum bik lem lo.







“Aw ni e, i fa ka pai. Tukinah khân kan hre chiaha, ka khawsik pawh kha nau ka lo pai vâng a nih ka ring" hlim zet chuan ka hrilha, ka naute pai chuan ka aw thlengin a ti zângkhai vuah mai. “Aw Lalpa! Ka lawm e" ti in a phun ri chu ka hre renga, a Bolero kawngkhar hawng ri chu ngaithla in ka nui var vara.







“I hlim takzet a ni tiraw? Keipawh ka in awih theilo, ka lâwm bawk si. Nau ka pai ve ta mai chu ania, ngaihtuah chian phei chuan mak ka ti zawk, lo haw vat tum rawh aw. Kan lo nghâk reng dâwn che a nia" ka ti zuia, a ni pawhin rawn haw vat a tum tur thu chu a sawi ve bawka.








“Kan dah phawt dâwn em ni? Hna kal i ngai rawh si a, ka ti khawtlai lutuk palh ang che" tiin phone chu dah mai ka tuma “Aih, nilo. I pum kha thla lo la la, min rawn thawn rawh, ka hmu duh" a rawn tihchuan ka nui deuh hak mai, tunah a lan nghal a ring reng reng emaw ni? Buaithlâk ṭhin, thla khat vêl awrh ala nia ka dul pawh ala lang lo hrim hrima.








“Tumah a la lang hleinem, thla thum te a han nih chuan a lang ve ṭan chauh ang. Tûnah chuan a hma ang tho kha a la nia lawm" dam dap chuan ka ti a “Chupawh nise ka hmu duh alawm, ka fa pai tu i nia, enge i dul mai mai chu i ui, ka hmu duh a nimai alâwm" a rawn ti bul bula, ka thawn hma loh a ti leh dawn tih ka hriat avâng chuan ka aw ta tawpa, phone chu ka dah zui bawk.







Ka dul la thêp tak chu thla lâk sakin ka thawn zuia, a seen rang ngei mai. A nghâkhlel viau emaw ni? “Lo duat ang che, ilo duat loh vaih chuan ka rawn haw hunah ka duat miah lo ang che" a la rawn tizuia, overthanga a ni ringawt.







“Tunah duat theih pawh a nilo, a nu hi min duat la a hrisel ṭha a nimai. Over viau suh, nidangah chuan ka thawn tawh lovang che" tihchu ka va thawna, a seen kur nangin a rawn chhâng rih lova. A tlân lak lawh te pawh a niang, keipawh chu ka la nuam chiah lo nen khum sirah ka phone chu dahin ka mu leha.







Pitei ten chaw ei tura min rawn koh chuan eichak vak lo mah ila nau ka pai tih ka hre ta bawk nen ka va ei lui hrama, an ni pawhin min duat lehzual ngei mai.



Thleng pawh chu ka sil vel an phal rih lova, ka khawsik a zual an hlau a ni ber mai. Keipawh chuan tilui duh bik lovin ka mu zui leh ta thuaia, reiloteah ka muhil ve mai bawk.






Tlai lamah chuan Manuni te ho an rawn langa, mipa ho chu an rawn au ring bawk nen ka muhil pawh harh lo theilo in ka awm phah. Peih lo zet chuan ka tho chhuaka, an ṭhianho chu Sama tihloh an lo kim leh ṭhap tawh mai, an in lungrual ṭhin ania.






“Kan fapa duat tur i pai tawh a maw? In pa lahin in ti thei lutukin min rawn hrilh kha, hmelchhe lil lel te hi a rawn chhuak ange. In pa a lawm lo viau ang," Rengpuia chuan a rawn tinghal zung zunga, biak hmasak pawh hi an ngai lo. An mahni hian an ṭawng nghal zung zung mai zel chu a nih hi.






“Engah nge a lawm loh anga, eng mi pawh rawn piang sela ama fa a nia, a hlim dawn lutuk. A hrim hrimin mi muhil an au harh mai mai ngailo" tiin an bulah chuan ka va ṭhua, an la nui mai mai lehnghala.






“Inpa a rawn in ti thei vêl lutuka, rawn fiah kha kan châk a lawm, a rawn haw har lutuk hrim hrim. A rawn haw vat theih nân runluih hrim hrim tur, khulam nuam a ti tlat" tiin an nui zui dar dara, an ngai ve viau a nih hmel.






A âwm ve tho mai, an inzui rei tawha. Chutia an han awm hrang thut chu an tân chuan a hrehawm ve reng ang chu, an inkâwm nasa ema. U Sangpuia te pawhin naute an nei tawha, tunah chuan min rawn tibuai tawh bik lova, khawlaia kan intawh châng erawhin min en duh thei viau mai.






Biak hmasak ka tum ngai lem lova, Saman a thik hle tih ka hriat avângin mi a be hmasa te a nih loh chuan ka be ngailo. Chutih rual erawhin ka haw tawh lêm lo thunga, tûnah chuan chhûngkua a din tawh bawk nen hlim taka a awm ngei ka beisei pui bawk.







“A rawn haw ve ṭep ang, bâkah helamah an rawn sawi mai theia. An rawn sawn a nih chuan in inhmu leh reng thei tawh ang chu, nang ni lah hian biak hmasak hi in tum silo" ka tihchuan an ner nasa ngang mai, be hmasa ngailo anga ka sawi chu an duh lo hle tih a hriat.








“A rawn haw hun chuan i chang miah lovang aw, kan haw phawt ange. In enkawl ṭha la, artui kan rawn pe ṭeuh dâwn che ania, naupai lai chuan ei tur ṭha ṭha ei hi a pawimawh. Sangha te pawh kan la man angai dâwn a nihchu, nau an awl bik an tia, hrehawm deuha nau hrin ai chuan sangha avânga i hrin awlsam theih nan ṭiau lamah kan liam vawk vawk aniang chu, chaw ei tui u" tiin an chhuak leh diala.







Pawn thleng chuan va thlahin ka vai liam hlawma, a reh nghal huai mai. “An fel ṭhin ania, bawiha awm loh pawh hi a hriat mang loh, ṭhian nih hi an tlin ber mai. Bawiha pawh a vânnei, an ni ang ṭhian a lo nei hlauha, englai pawhin an ngaihven em em reng sia" pitei chuan a lo ti a, a sawi dik ka ti viau.






Hmeichhe tam tak chu kan ṭhiante ngei pawh an bula kan awm laiin kan faka, an bula awm lova midang kan kawm rualin kan in rel leh thei ania. Mipa erawh chu an nilo, pali panga an inkâwm khawma, in ngeih takin an awm thei mai. Hmeichhia erawh kan awmkhâwm tam deuh chuan in ngeih lo tâwk hi kan awm thei ziah zêl.







Room-ah chuan lût lehin ka phone a lo ri chiah a, Sama a ni tih ka hmuh rual chuan ka la nghal vat bawk. Chhûnah a reh char char bawka, kan fiam hlak ange.




“Duati" a rawn ti dut duta “Um" ka lo ti ringawta, fiam ka châk tlat mai.


“Um tih chauh maw?" “Um" “Min ngai miah lo em ni? “Um" a dawh thei tawh lo nge “Nge um um chu? I thinrim em ni?" dam deuh zawk chuan a rawn ti leha “Um" a rawn thaw hawka.





“Nuntluangpui, ka hmuam pawp che i duh loh chuan um um kha ti sek suh, i nuam lo em ni?" a rawn ti tawi tûk tawh mai. Keipawh chu nui chhuak hak hakin “Chhunah min lo biak duh loh man a nih kha, tin min hmuam sêng ringawt dâwn em ni? Khati tiat kha nimahla i ka a te lutuk tlat" tiin ka nui hak haka.







A thinrim duh miah lo ṭhin hi ka ngaisang ṭhin, ṭhenkhat chu fiam dawl lo deuh, kut mi thlâk mai hrehlo hi an ni ṭhina. Nupuite duhtawka sawisa ṭhin mi te hi ka nei ang tih ka hlau ṭhin.






Sama erawh englai pawhin a dam dap renga, kei ka thinrim châng pawhin a zâwl dawh zawkah a ṭang thei ziah ṭhinte hi amah min ngaihsân tirtu leh zah tîr tu ani. A thinrimin zêp ṭit ṭêt lovin a thinrim chhan ṭha takin a sawia, ka laka a lungdum loh zawng deuh a awmin pehhêl miah lovin min hrilh ṭhin, min sawisel khâta. Chutih rualin ka dik lohnaah min ṭan ngai lova, min hrilh zâwk ṭhin.








Keipawhin huatah ka la duh bik ngailo, ka ṭhatna tur zel a ni tih hriain ka haw duh ngailo.






“Min ti mangang a lawm, chhûn chu ka buai deuha. Valpuia te kha an lo kal em?" a tihchuan an rawn kal thu vêl chu ka sawia, an thusawi ka hrilh chuan a nui ve hawk hawk mai.







“Ka rawn haw theih leh tshirt leh sneaker ka rawn hawn ang chu, lo hrilh duh lêm lo la. An hriat sa chuan an duh leh dâwn lova, an hriat loha hawn a ṭha ber" a tihchuan ka lo aw ve mai bawka, ni e, ṭhiante mahnisela thilpêk in lâksak mai te hi a nuam lo ve bawk nen hre lawk lova in pêk mai kha an tan pawh a ṭha zawk.








“Engtik nge i lo haw theih ang? Keimah chauha mut reng ka ning ve ania, ruahte hi a sur duh si. Khua a vawt vur reng bawk nen lo haw zung zung la ka duh, bâkah ka ngai tawh che" ti nang nangin khumah chuan ka mu thla a.







“Keipawhin ka ngai tawh che alâwm, lo tuar hram hram la ka lo haw thei ṭep e. Khalama thawh ka dilna an pawm veleh kan awm dûn reng tawh dâwn alâwm, ka hmangaih che" tiin phone chhanah chuan min rawn muaha, nui hak hakin “Keipawhin ka hmangaih che" tiin ka dul chu ka chûl zauha, ka ṭhian ang bâka ka en loh kha tûnah hetiang khawp hian ka ngaiin ka thlahlel ang tih ka ring pha ngailo.








A hma aṭang rengin ani chu ka tân a awm renga, keimah zâwkin rei tak chhûng ka lo hrem zawk a. Ka phu hlawllo mawle, mahse ka hmangaih tawha, chân erawh ka tum tawh lo bur mai.







“Ka dah phawt ange, zânah ka lo be leh ang che, chaw eitui ka nupui duhtak" tiin phone chu a dah zuia, a buai deuh ani ngei ang. Engmah sawi tawh lêm lo chuan pitei te bul lamah chuan ka chhuaka.






“I zia deuh em? I khawsik teh chu enge a an? A la hrehawm viau em?" tihchu min lo zâwt sawk sawka, ka ṭhat thu a ka chhan chuan an lo thaw huai mai. “Sama nen kan in bia a, a ni pawh alo haw thei ṭep ang, khawnge naupang ho hi an va rawn haw har ve?" tiin ka zâwt zuia.






Pitei zâwk chuan an len thu chuan min lo chhanga, ka bu nghat ringawt. Thil dang dang chu sawi kualin ka naupai chungchângte nen chen chuan sawiin kan nui leh dar dar ṭhin. An chhungkaw lam hrim hrim hi an zia a dam raih hlawma, an bula awm a nuam zual ka ti, hetiang ang chhûngkua hi chu tupawhin an awt vek ang.








Pathian malsâwmna an dawng em em pawh hi an nundan vang hi a nih ka ring ber, mi fel leh ṭha chu malsâwmna hian a vur leh nge nge zela.






Naupang ho an rawn haw takah chuan chaw eite chu siamin kan che buai nak naka, rin ang ngeiin ruah chu a rawn sûr leh ṭana, thli a thaw vuk vuk bawk nen awm a nuam lo duh ngei mai.







Keiphei chu chaw ei kham veleh chuan ka mu lût leh ta daiha, Sama nen chuan in text in kan hmalam hun tur te chu kan theih ang ang chuan kan sawi duna, hlen thei tak ang maw?



ZAWMNA..






Thla a liam leh tawha, keipawh nawm lohna em em nei tawh lovin ka chaw ei pawh a tui chho bawk nen ka thau lek lek ta maia, a leh lamah erawh rai chu ka vunin a ngeih nge mawni ka êng sur mai.






Huana thlai chinna tur kan siamah chuan hna thawk malh malhin a hnimte chu ka pawt faia, anṭam leh parbawr, purun var tih vêl chu kan chîng ve a. An ṭha phian lehnghâl, ka thlan chhuak chu hru in ka in tuai nak naka.







Ka lei khawih nân ka hmai te chu a ngap tel vek mai. Darthlalangah in en ila chuan ka bal viauin ka ring a ni, motor ri chu nitin tlân an nih avângin ka bengkhawn duh lem lova, mahsela kan tuala a din takah chuan hawi chho in engmah erawh ka hmu lem lo thung.







“Ka duatnu" Sama aw ka hriat avâng chuan ka hawi chhuak leh vata, ka beng chhe ri emaw ka ti hial mai. Chutah in bul aṭanga huan panna a a rawn chhukthla ka hmuh chuan ka ding chhuaka, alam pan chuan ka tlân nghal zat bawk.






A ni pawh chu rawn tlân thla in kan intawh rual chuan min pawm kâng nghal nawlha, nghet zet chuan a nghâwngah kut suihin ka kuah beta, a kawngah ka inkherh bet ṭai bawk. “Sam, tinge engmah i rawn sawi loha?" tiin ka nui hak haka “Surprise che ka duh alâwm, min lo ngai em?" tiin min zâwta, ka lu chu siam remin amah hmachhawn chuan ka awma.







“Ngai lutuk, ilo haw har lutuka. Ka thinrim ṭep a ni, kal tawh lo mai la ka duh" tiin a hmêl chu chiang takin ka ena. Hna a thawk rim deuh nge ni, a mitmeng a zuai tlat, bâkah a biang hmul vêl a ṭo siar siar mai “I va upat hmel ve, i hmul i ziat ngai lo em ni?" tiin a taksa aṭang chuan ka chhuka.








“Nangma min ziah sak ka duha, ka rawn zuah a nih hi. Tirawh kha i chau a nih kha, chho vat ang. Kan naute hna i lo thawhpui nasa lutuka, ka duh miahlo a nia; lo awm mai mai tur che a lawm. Hna hahthlak lam phei chu tisuh ka tih kha" a tihchuan ka nuih ringawta, thlai china enkawl chu nuam ka tih mahnak a lai, mahni thlai chin ngei mai an rawn ṭhang liana, an hrisel ṭhat zia hmuh chu a nuam êm bawk a ni.









“A nuam alâwm; enteh an ṭha reuh a sin.An ei theih ve tawh a" tiin ka nuih chho ver vera, anui ve suk mai “Um a enkawltu nu an chhûn anih kha, tirawh chho phawt ang. Min va ngai love" tiin min pawm nawlhin min chhoh puia, “Sam, min tlukpui ange aw, i chau ang min dahthla teh" tiin a âwm ah chuan ka nam deuha.








“Awm mai mai teh, ka zo lutuk che. Che sek lo la kan tlu lo animai" tiin min kal luih pui zela, ka hnial duh tawh biklo. Kawngpui kan chhuak chhoa, Valpuia te ho rawn phei mek chu kan hmu nghal zat bawk. An rawn au phei lâng lânga “In va induat ve, Romeo-a chuan a Juliet-i a pawm leh tawh elo?" tiin an rawn nui vur vura.








Sama chuan min dahthla in an ṭhianho chu an han inkuah khâwm a, an in beng thak thak bawk. “I rawn haw har hle mai, ṭhiante mi i hre chang lo lutuk tawha, a buaithlâk. Police nih meuh chuan kan kâwm pha tawh hleinem che" Rengpuian a tihchuan Sama chu a lo nui haka.







“Uang lo teh u, kha ka bungraw rawn hawn te kha min chhuahpui ula, rawn khai lût teh u. Kan nu hi ka ngai sia kan lo zu lût phawt ange; lâk hmaih te kha in rawn nei hlauh ange" tiin min kaiin inchhûng lamah chuan min luhpuia, putea te ho erawh a lo hmuh tawh avângin an lo nui ṭha thunga.







“Kha inchhûng luh hma hmain i hming a lama, a rawn hmu che chu a bet leh chawt tawh a nih kha. A ngai bawk che a, a len pawh phal miah suh" an tihchuan ka nui haka, inchhûng pawh a la lût lo tih ka hriat chuan ka nuih te lam lam a tiza.







Valpuia te ho chuan a bungrua vêl chu an rawn keng luta, chutah naupang ho a thil hawn vêl chu pe hmasa in, a tâwpah a sawi ang ngeiin tshirt leh sneakers chu a inkawp vekin a ṭhiante chu a pe zuia, an ni pawh an lâwm tih an hmelah a hriat. Lei ve thei vek mahse ṭhiante thil min pêk hi chu a hlut dân a dang ve miau va, an ni pawhin an ṭhianpa chu lâwmthu te an hrilh ve nak naka.








“Ka awm loh chhûnga ka chhûngte in lo buaipui man a nih kha, bâkah ka hre chang lo cheu in ti bawk sia kha khân ka hre reng cheu tih a tilang ang chu maw" tiin min rawn kuaha, a hahdam hmêl hliah hliah mai.







Valpuia te ho pawh an rawn lêng rei phiana, an ṭhianho chuan titi in an hnathawhna chanchin vêl leh eng emaw an sawi khawma, Valpuia te pawh an inru ve kha a nia, dân khatna in an innei dâwn emaw tihlaiin “Lawmpa'n a nei si lova, ka nei peih bik lo. Bakah maichâm hmaa thu chham vêl te kha ka zak, chu ai chuan inruk mai hi a awlsam, mipui hmaa thu chham kulh kulh chu ka khur hlum thei ang" zuk ti mauh maia.







An ngaihdan te hi a mak thei sia, a lehlamah erawh a ni ve thei tho mai. Mi hmaa thu chhamte hi mi zakzum sa tan phei chuan a hrehawm ve viau ang, an chetsual nuk zel mai hi.








Zânah chuan lêng chhuak lovin kan pahnihin kan awm dûn chawta, rawn hmuak tu ho chu sweet vêl chu alo hawn zela, an ni pawh an lawm tâwk em em tho. Thil hawn lam ai mah chuan hmun danga awm bo char chara, rawn haw chu an ngaipawimawh ve tih a hriat, keini lam ang lo takin thingtlâng lamah chuan a khuate hian an la inhre vek ti ila a sual kher lovang.







Zin an awm emaw, khualkha a hna leh zirna avânga awm bo te an rawn haw hian an inhmuakin, khawlaiah in hmu se an be ngei ngei bawka. Keini ve, hmun dangah zin in haw pawh ni ila chhûngkhat laina te tih loh chu hmuak tu kan nei der lo.







Zân a rei takah chuan room-ah awm dunin ka dul chûl heuh heuh pah chuan kan titi a. Helama awm a dîlna pawh a hlawhtlin ngei a rin thu a sawi chuan ka lo lâwm ve em em ringawt, khaw ṭhenawm ah hian Police station a awma, heta an rawn dah theih chuan khua aṭangin ahla lo bawk nen lâng in nitin a kal thei anga, hmun danga awm ai chuan a thlakhlelhawm hrim hrim bawk.









“Ka kuah leh thei ringawt che pawh hi a hlu, i pum a len deuh chuan i hna hi chawlhsan rih la ka duh ania, keimahin ka châwm mai ang cheu" a tihchuan ka nuih haka “Mahse hnathawk lova awm chu nuam ka tilo alâwm, kan naute hi a rawn len chhoh zêl chuan chawl hlen kher lovin aikal te pawh kan la rih mai anga, chawlh hlen tawp chu ka hreh deuh alâwm, kan fate hma hun ngaihtuah ve te a ngai dâwna" ka tihchuan a thaw hawka.







“Ka enkawl thei cheu ka tih kha, kan inkhawl chho zel anga. Mi awt reng reng chuan ka awm tîr ngai lovang che u, ka fate hi ṭha taka enkawl turin ka duh che. Nu leh pa nei tawhlo, an bulah pawh awm rei hman lo in reife zirna avângin ka awm bova, ka enkawl ve theih dâwnah khatiang thil kha a thleng a nia, kan fate tân hian kan theihna zawng zawng sawmkhawma, an kiangah hun tam thei ang ber hman dun ka duh" thutak zet chuan a sawia.







Ka ngawi kar mai, chutiang lam zâwng chuan ka la ngaihtuah hauh lo. A nu leh pa a thlakhlelh tur zia pawh ka hria, “Ka tihpalh, nia, ka tum dawn ania. Kei talin ka enkawl an ngai a lawm tiraw? Nangin min châwm anga" tiin a kut chu ka khalhsak neuh neuh va, tûnah hian a pi leh pu pawisa khâwl nen, an sawhthing vel leh an sum lakluh tam zawk hi bank-ah Sama hming hi a awm veka, keipawh ka inkhawl bawk nen sum chu kan harsa rih em em lo.







Kan fate ṭha taka an rawn pian theiha, School te an kal thei ngai a nihchuan kan la hautak dâwn chauh tih ka hria. “Chuti tur chu, nang leh kan fate ka châwm theih nân alawm in hlata awm ka pawm ni, mahsela tûnah chuan kan awm dûn leh thei tawh ang chu. Kan naute hi a rawn danglama,i dul rawn puar ṭan tur te hmuh ka duh" ti sup supin ka dul chu chulin ka hmuiah chuan a rawn fawpa.






A nghâwngah chuan kuahin ka lamah ka pawt hnaia, a sam chu ṭham sak in a biang hmul ṭo siar siar te chu ka biang chuan ka nul dan dana, a rawn nui huk lehnghâl.





“Min fiam i tum deuh em ni? Ka insûm dâwn miah lo ania aw" ka hnute chu a rawn ṭham zauha, “Mu phawt teh, i mitmeng aṭangin i chau tih a hriat reng alawm, mu phawt la naktûk lamah titina hun te chu ala tam dawn alâwm" tiin ka mut rem puia, min hnial bik lem lo.








A hnungah chuan chulsak in reilote-ah a muhil zuia, mitchhing chiala a thaw sâk sâk chu hmuhnawm tizetin ka en reng bawk.Ka tan hian a va han hlu tak, kalsan ka tum tawh ngailo ang, amah anga Pasalṭha, rinawm leh sawisêlbo hi ka tawng tawh dâwn lo tih ka hria, amah ah hian ka duh zawng zawng a kim vek tlat ani.




NAKTUK ZÂNAH LAST KAN TUM ANG AW, KA NEXT STORY TUR PROLOGUE KA RAWN DAH TEL ANG