ZOSANGZUALA BY Becca Lnz (Completed)

[Rebec Nunziri]

Chapter-30



Zorinsanga POV



Khum atang chuan muangchang in ka tho chhuak a, Prof. Sangzuala chu mak ti zetin ka en, engvangin nge kut min thlak ringawt, ka biang na ngut ngut pawh chu ka hre chang lo, ka mak tihna in min chiah hneh em bawk a ni, "Engtinge khatiang thil kha i tih theih zawk?" thinrim zet chuan a au chhuak a, a aw chu room ah chuan a khawk rum rum thei hial, "Engthil nge ka tih?" ka tih haw chuan ka ban bulah a rawn man leh chawt.




"Hrelo der suh, nang hian i thiannu ngei kha khatiang khan i ti thei amaw?" a ti leh, "Engthil nge ka tih chu sawi ta reng che, engmah tih sual ka neilo, step atanga a min thlak chungchang I sawi a nih chuan ka nam ni lovin amah leh amah a lum a nihkha, chuan kha hmeichhia vang khan kit min thlak amaw?" ka ngaihtuah na fim hnu chuan ka ti a, kha hmeichhe rilru chhe zet avang khan kut min thlak a nia, ka awih theilo hial zawk.




"Ka mit ngeiin ka hmu, nang lo chu nam thla tu tur an awm lo hrim hrim, in pahnih bakin in awm lo, chuti chung chuan phat i la tum amaw?" tiin min thing nawk, "Min thlah rawh, engthil mah tih sual ka neilo a, chuvang chuan khatiang khan min ti ngawt suh, kut min thlak bawk amaw, chupawh kha hmeichhe rapthlak lutuk vang khan" ka ti tuar, "Ngawi hmak rawh, i thiannu ngei pawh khatiang khan i sawi duh a, eng ang thian nge i nih hrep?" a ti ve leh hrawk.




"Kha hmeichhia kha ka thian a nilo a, a ni kum khua lo bawk ang, khatiang chinghne beram vun sin khan ka thian nih a phu lo, engvanga a em em nge i nih, thudik hi engvanga hre duh lo tlat nge i nih pawh hi ka hrelo, Zosangzual nanghi mipa a tak chu i lo nih hi, engtinge ka lo hmangaih theih zawk che ni?" a tawp lam chu keimah leh keimah ka in bia a ni zawk mah.




A ngawi reng a, "Ka tuan hnem tawk tawh e, mihring ka ni a, tawrh theih chin ka nei ve, ka chungah i chet dan nunrawng tak te avang hian ka na ve theilo ah I ngai a, mahse hre rawh hun hi a kal zel anga ka nat zia leh i laka ka rilru put hmang a danglam zia chu i la hmu chiang telh telh ang, chutih hunah chuan ka bula i thusawi zawng zawng te hi theihnghilh suh ang che, a bik takin in chhir na tur i neih loh thu i sawi lai kha chiang takin hria ang che" ka ti leh fak fak a.




Room atang chuan ka chhuak hmak, ka room hman thin ah chuan lut in ka biang chu ka en a, a sen tul mai, ka beng te hi a la kiu vawng vawng in ka hre hial, Hmela kha a la in chhir dawn khawp alawm, kha hmeichhe phakar lutuk vang khan kut min thlak a, a hma pawh ka lakah nunrawng takin a che fo tawh ngei alawm, mahse ka hmelma lian ber vanga kut min thlak na hi na ka la tih ber a ni ngei ang.




"Ka naute i pa in ka chung a a chet dan avang hian i thinrim ve em, min khawngaih ve em?" ka ti sap sap a, "Lo lungngai miah suh aw, he in hreawm lutuk atang hian kan chhuak thei tep tawh ania, i pa lak a ka la hrang tur che hi min dem lovang tiraw, hmeichhe dang a nun ah an awm tlat a, a bulah awm ve reng hian awmzia a neilo, kan nida hian hreawm kan ti mai mai dawn, kan pahnih in kan awmdun anga, keichuan ka hmangaih lutuk che a nia" ka ti leh sep sep.




Ka phone awmna ka la hre silo, tlai lamah kha chuan muang mar in thudik hi midang ka la hriat tir ang ka ti a, mahse tunah chuan ka rilru ka thlak chiang hle, tunkar nilo, nihnih chhung in thudik ka hai lang vek ang, a hmasa berah chuan ka phone ka mamawh, ka thiante puih na ka mamawh dawn si a, Zosangzual Misuala hian khawiah nge ka phone a dah ang, room ka en chhuak vek tawh a, ka hmu silo, hetah pawh a awm lo tih ka chiang.




A tuk zingah chuan rooma tang ka chhuak a, choka ah awm in Zosangzuala rawn chhuah hun chu ka lo nghak ran, ka phone dil ka duh vangin zingkar hma lutuk ah ka harh tawh a, chutiang a nih loh chuan ka thawh hma in a lo chhuak leh hma daih palh ang tih ka hlau a ni, Sangtei chu a tawng siam siam a, nimin lama thil thlen dan engmah a hrelo, Remsangi rawn kal hnu khan haw turin ka ti nghal daih kha a nia.




Sangtei nen kan lo in kawm mawlh mawlh lai chuan Zosangzuala chu a rawn lut a, kan ngawi nghal hmak, ka hma zawn ah chuan a rawn thu thla a, a in siam sa vek tawh bawk, Sangtei chuan chaw ei a siam nghal mawlh mawlh mai, "Khawiah nge ka phone i dah, min pa let tawh" ka ti fak a, nem deuh a biak ka tum reng reng lo, phu pawh a phu lo, engmah a sawi lo, a thil ei lai chu a en mawlh mawlh a, ka tawng kha chu a hria tih ka hai lo.




"Khawiah nge ka phone chu i dah sawi rawh" min chhan mai loh avang ka ti leh that a, Sangtei awm mahse in sum buai ka tum lo, heta a rawn thawh na a rei ve tawh a, kan nupa in kar that loh zia pawh a hai biklo, Zosangzuala chuan Sangtei chu a mitmei zeuh a, rang zetin choka atang a chhuak nghal, "Midang awm laiin khatiang khan min be hauh suh, i pasal ka nih hi" ti nghut in min en a, ka ner sak, "Zah taka biak phu i in ti em ni?" ka ti hlak a.




"Ka phone chu min pe vat rawh, i lei pawh a nilo a, ka chhungte min leisak a nihkha, nang a lo dah bo ngawt chhan tur a awmlo" ka ti leh hlak hlak a, "Tha taka i awm chuan zaninah ka pe ang che" a tih chuan ka sa zak, "A tha alawm, min pe reng reng suh, phone thar lei na tur te chu ka nei ve bawk alawm, ka lei ve mai ang" ka ti a, mahse ka phone ber a awm loh chuan cash engmah ka neilo tih ka ngaihtuah zawm zat, "A tha alawm, i lo lei mai dawn nia" ka ngaihtuah na hria ni awm tak chuan a rawn ti a, hepa ka huat zia hi.




Engmah sawi tawh lovin ka tho chhuak hmak a, room ah lut in thil dang ka ngaihtuah nghal char char, Profm Sangzuala hnaa a kal hnuah Sangtei hnenah ka kal a, a phone hman ka dil leh, Chhani ka call a, "Keimah" ka tih chuan a lo hre nghal, "Tinge biak i va har em em ve, kan ngaihtuah lutuk che tih i hria em, enge i an, i phone ah lah kan ve tlang thei silo che a, ina rawn kal kan tum lahin Prof. Sangzuala'n i that thu a sawi a" a rawn ti nghal nawlh mawlh mai.




"Phone a sawi mai chi pawh a nilo, in theih chuan vawin chu class kal lovin kan inah rawn kal ta che u, in puih na ka mamawh dawn a nia" ka ti a, class kal an lo peih vak bik lo nen a lo aw rang ngang mai, "Chuan in rawn kal hma in phone that leh sim min lo lei bawk rawh u aw, pawisa chu ka u ka bia anga i ac ah ka rawn thun tir mai ang" ka ti leh zung zung a, midangte a hrilh hnuah an rawn kal nghal tur thu chu a sawi a.




A tha e, thudik chu Zosangzuala hma ngei ah ka la hailang dawn alawm, chutih hunah chuan engtinge a awm ang ka hmu chak tawh takzet, ka thiante pawh chu an rawn thleng har haklo, phone that pawh chu min rawn leisak ngei a, kan in biak zawh khan ka u hnenah phone leina tur ka dil a, a chhan min zawh khan ka phone ka tih chhiat thu ka sawi kha a nia, engmah sawi buai lovin Chhani ac ah a rawn thun ve nghal mai bawk a.




"Tinge biak i va han har em em ve, kan ngaihtuah zia che hi i hria em?" Mary chuan vui deuh ti tih chuan a ti a, "Ka tihpalh a ni, tun hnai te chu a hma aiin boruak a ṭhalo leh zual a, ka phone pawh khawiah nge a awm ka hrelo, chuvang alawm a thar lei tura ka rawn tih cheu ni" tiin phone chu ka hmet eng a, sim pawh an lo thun tir sa vek, U Nghaktea no chu ka chhu lut zui nghal mawlh mawlh a.




"Enge thleng chiah hi, tunge i biak dawn?" tiin ka awmdan mak tih hmel fe chuan min en hlawm a, "Lo ngawi lawk rawh u, tuna ka mi biak tur hi min pawimawh tak a ni, ka biak zawh ah engkim ka hrilhfiah vek ang cheu" ka tih takah chuan engmah an sawi tawh biklo, U Nghaktea chu ka bia a, voice record min rawn thawn tura ka tih hnuah ka biak leh vat tur thu ka sawi zawm zat a, ka thiante chuan min lo nghak thap.




Ka thiante hnenah chuan thil awmdan te leh U Nghaktea chu Remsangi chhui tura ka rawih thu te ka sawi vek a, voice record pawh chu ka play a, keipawh ka vawikhat ngaihthlak na a ni a, hre ve nel nual tawh mahila Remsangi thusawi ngei ka ngaihthlak takah chuan rapthlak ka ti ve hle, ka rin phak bak aia nasa in he hmeichhia hi a hlauhawm daih mai, naupang te hi hetiang ngaihtuah na hi a nei tawh a nia, nasa ve tak a ni.




"A va han nasa em em, damdawi mai nilo khami ni a i accident na pawh kha a ma lo ruahman na vek maw lo ni a?" Puipuii chuan a ti a, a aw ah chuan a thawn zia a hriat hmaih theih loh, khakha chu U Nghaktea'n min hrilh tawh avangin mak ka ti hran lo, mahse a ruahman na kha chu rapthlak ka ti takzet, "Kha car khalh tu kha chhui turin ka ti a, Mizoram chu hmuk zim te a la ni bawk a, U Nghaktea pawn zawn chhuah a awlsam tur thu a rawn sawi vek tawh alawm" ka ti leh sap sap a.




"Engpawh nise thil then dan chu han sawi tawh kha, khang ni ni tam tak chhung khan enge thleng?" Feli'n a rawn ti a, keipawh chuan ka sawi ve vek, mahse Zosangzuala'n min pawngsual tih erawh ka sawi tello thung a, nimin a Remsangi a rawn kal thu leh a thusawi te, a hnua thil thlen dan te leh Zosangzuala'n kut min thlak thu te ka sawi chuan an thinrim hle, "Kha hmeichhe phakar lutuk vang khan kut a thlak che maw? ka awih theilo" Mary chuan a ti hlak a.




"Tunkar chhung in thudik engkim hi sawi chhuah ka duh tawh, ka tuar hnem tawk tawh bawk alawm, ka thei tawh lo, tuna ka duh ber chu he in atanga chhuah vat vat hi a ni" ka ti a, ka thiante nen ruahman na kan siam zung zung a, a hmaa ka lo sawi tawh ang ngei khan Remsangi chu amah leh amah in sawi awh tir kan tum a ni, ka thiante haw hnuah keipawh damdawi ei in ka mu hahdam a, tunlai chu ka damdawi pakhat ei vang hian men ka theilo ka muhil nghak zung zung a, ka mut chhuah a rawn kal tak tak phei chuan men tum eng ang mahila ka thei ngailo.



Zawmna



Tlai lamah chuan ka phone ri avangin ka harh hlawl a, U Nghaktea hnen atangin a nih avangin rang takin ka chhang a, "Zorin kha motor khalh tu kha ka hmu tawh a, hnai chhan ngei ah kan in be zo chiah bawk, engmah buaina tur a awm lo, min puih a in huam a nih chu" a thusawi avang chuan ka lawm ngei mai, "Engtinge awlsam takin i hmin theih zawk a, min puih duh pawh ka lo ring lo a sin" ka ti a.




"Awlsam lutuk, kan finfiah na neih te ka hmuh alawm, min pui duh lova hel a chhuah tlat a nih chuan atan a pawi thui thei zawk dawn tih a hai biklo" ka nui hak a, "Ka lawm lutuk a, a rang lamin thudik hi Zosangzuala hmaah ngei lan tir ka duh , finfiah na leh thu hre tu kan nei tha tawh bawk a, lo in ring rawh aw, ka rawn call hunah che driver kha i lo hruai dawn a nia" ka ti a.




Zan dang ang lo takin Zosangzuala chu chaw ei turin ka lo nghak ve ngei a, a chhan pawh zanriah kan kil dun hnuhnun na ber tur pawh a ni maithei tlat a ni, dar 7 rik dawn tep ah a rawn haw ve chiah a, "Han in thlak la chaw ei ka lo siam ang" tiin choka lam chu ka pan nghal a, ka awmdan chu mak a tih hmel.hle, mak ti tur pawh a ni reng a ni, zan dangah hetiang hian chaw ei ah ka nghak ngai miau lova, mahse engvanga lo nghak nge ka nih tih chu a hre hauh lo thung ang.




Chaw kan ei dun mawlh mawlh lai chuan ka phone hlui chu dawhkan ah a rawn dah a, "Kha i phone chu" a ti sup bawn, "A ngai tawh lo, a thar ka lei mai ang ka tih tawh kha, hei a thar ka nei tawh" tiin ka lek kang zeuh a, min melh nghal run mai, "Engtik in nge i lei?" a tih nghut chuan "Vawinah" tih te in ka chhang a, a dang sawi belh ka tum lo, tha takin ka dil lai khan min pe nise a thar ka lei a ngai hauh lo tur a nia.




Chaw kan ei kham a, room lamah ka chho lehnghal, naktuk ah Remsangi ka biak ngei a ngai dawn a ni, he in hi ka chhuahsan thei tep tawh e, ka chhungten in then an phal lo a nih leh keimah in chen na in tur ka in zawn chawp tawh mai a niang chu, an thu angin Zosangzuala pasal ah ka nei tawh a, ka hlim loh zia an hriat hnuah pawh in then an phal lo a nih chuan an thu angin ka awm tawh dawn biklo, ka hlim na tur ka ngaih pawimawh ve a hun tawh.




Kan thian ho group ah chuan ka lut a, "Naktuk ah Remsangi hmuh ka tum a, a thiltih engkim in puan tir ka tum, min puih leh a ngai dawn a nia aw, ka tuar hnem tawk tawh, nikhat lek pawh hi ka nghak thei tawh lo" tih ka va thawn a, "Engtia hmalak nge i tum?" Feli'n a rawn tih chuan ka ruahman na chu ka sawi a, tha an tih thu an rawn sawi sap sap, a kal sual ang tih erawh a hlauhawm viau thung.




Ka tum dan chuan Remsangi hnenah in biak ka duh thu ka sawi anga, Zosangzuala erawh ka thiante kutah ka dah thung dawn a ni, an mahni chauh chuan an ti thei dawn lo tih ka hriat avangin Prof. Chhuana hnenah min pui turin ka sawm a, a lo in huam khawp mai, Remsangi nen kan in hmuh na hnai te an awm anga, Remsangi nen kan in biak chhungin ka thiante tu emaw ber nen kan in call reng tho ang, a thiltih engkim a tir atanga a tawp thleng in sawi tir ka tum bawk anga, chuchu an lo ngaithla dawn a ni.




Remsangi tan pawh in sawifiah ngaihna a awm tawh lovang, a tal buai lai hmel hmuh chu tun atan a ka thil hmuh chak ber a ni, Prof. Sangzuala awmdan pawh ka hnu chak tawh bawk, chutih rual in ka thil tum dan in a kal lo maithei bawk, fimkhur taka ka chet ngei a ngai dawn a ni, Remsangi lah hmeichhe a a ni bawk silo, a thiltih dan engkim a puang duh angem tih pawh ka hrelo a, mahse a hma pawn zam hauh lovin a sawi a nihkha.




Khua a var a, Prof. Sangzuala chhuah hnuah Remsangi chu call in in hmuh ka duh thu ka sawi a, in hmuh na hmun tur pawh ka ruahman fel vek tawh bawk a, a hmin tur ka sawi hnuah chhuak turin ka in siam ve nghal a, chhun dar 12 ah chiah kan in hmu dawn, mahse Remsangi thlen hmaa thlen ka duh vangin ka kal hmasa a ni, kan in hmuh na hmun tur ka thleng a, engkim a fel vek, private room ah kan in hmu dawn bawk nen pawn lam a awm ten kan thusawi an hre dawn lo tih ka chiang.





"A rawn thleng tep tawh ang, Zosangzuala te nen chuan in awm ho tawh em?" Chhani chu call in ka ti a, "Aw.. hei in in hmuh na bul a cafe ah kan awm" a tih chuan ka nui sak, "Theihnghilh lovin kan in biak na zawng zawng I lo record dawn a nia, a la pawimawh dawn, chuan U Nghaktea pawh a rawn thleng tep ang, in lo ngaihven deuh dawn a nia" tiin phone chu dawhkan ah ka dah a, call pawh kan la cut lo hrim hrim bawk.




Remsangi chu a rawn lut a, a hma ang bawk in a nui sang bawk, "Engvanga min hnu duh nge i nih a, min hmuh duh pawh ka lo ring tawh lova" tiin ka hma zawn ah chuan a rawn thu thla a, "I thil ruahman na vang khan ka tuar hnem khawp mai" ka ti hmasa te te a, "Ka tihpalh, nilo diktak chuan in thiam loh na tur ka neilo, a chhan chu Prof. Sangzuala nun a lo lang lo ni la khatiang thil kha ka tih a ngai hauh lo tur a nia, ka sawi tawh kha, Prof. Sangzuala hi keima ta chauh a ni" tiin a nui hak a.




"Hetiang zawng kher a i chet hi a ngai em ni, Prof. Sangzuala nen fa kan nei tep tawh a, ka pum chhung a naute vang tal pawh hian vawikhat tal i in chhir ve tawh em?" ka tih chuan nui hak hak chungin lu a thing a, "Ka thiltih avang khan in chhir na pakhat mah ka neilo, in chhir leh turin engmah ka ti ngailo bawk, ka ta min lo chuh pui vang a i tawrh ve reng tur a nihkha, tunah phei chuan ka duh ang ngeiin thil a thleng chho a, tih atanga reilote ah Prof. Sangzuala saw ka ta a ni tawh ang" a ni hi a rilru a buai tak tak tawh a nih hi.




"I ring chiah amaw, nang hi Prof. Sangzuala'n engah mah a ngailo che ka tihkha" thinrim a au khum lo turin ka in sum hram hram a ni, "Ngawi hmak rawh, Prof. Sangzuala hian keihi min duh ve, engvangin nge min duh lovang ni, ka hmeltha a, ka pian a nalh bawk, nang ai chuan min thlang fe zawk ang" a ti hlak a, "Hmel ringawt hi a pawimawh lo, chhungril hi a pawimawh ber, Prof. Sangzuala hian kei min kalsan nanghi a thlang ngai lovang che" ka tih chuan a thutna atangin a ding hluai a.




"Min duh turin ka siam mai ang, lungngai suh, ka mizia ka thup thiam zia i hriat kha, ka thiltih engmah hi a hre chhuak ngai dawn lo" mahni in ring tawk tak chung chuan a ti leh a, ka nui sak, "A tha e, mahse Prof. Sangzuala hian kei min kalsan mahse nanghi chu a rawn pan ngai chuang lovang che, a chhan chu Prof. Azami a awm tlat" ka sawi zawh rual chuan za zet hian a rawn nui uar uar a.




"Prof. Azami te chuan fa a pai tih i la hrelo em ni, chupawh Prof. Sangzuala fa ni lovin mipa dang fa, oh.. i pasal hian a la hrilh lo che a ni ang maw, a tirah kha chuan an in zui tak tak emaw ka ti ve tho, Prof. Azami dah that na tur ruahman na ka siam lai mek in mipa dang fa a lai tih leh Prof. Sangzuala nen an in hnaih em em na chhan chu a fa paina pa hi misual tak leh hausa tak a nih vangin Prof. Sangzuala hian a buaipui mai mai a ni" a thusawi chuan min thawng takzet.




Ka vawikhat hriat na chauh a ni, mahse Prof. Sangzuala leh Prof. Azami te in kar ah engmah a awm lo tih ka hriat takah chuan ka thaw huai thung, "Engpawh ni se Prof. Sangzuala chu i nei thei ang, engah mah ka ngai tawh lo, ka naute pa a ni tih chu ka hria, ka dam chung zawng in chuchu ka ti danglam thei ngai dawn lo bawk a, i duh chuan i nei dawn nia, a tir atang khan min hrilh nila chuan hetiang hi i tih a ngai miah lo tur a nia" ka ti leh a.




Ka duh ang takin a la in puang lo, thlalak zawng zawng te kha sawi chhuak vek turin ka la duh a, chuvang chuan zawl dawh taka ka awm a ngai a ni, "Hetiang thil hi tilo ni ila chuan Prof. Sangzuala nen hlim takin in la awm reng ang chu, mi mawl ka nilo a nia, khatiang hmang a ka rilru hneh chu tum buai duh suh, Prof. Sangzuala hi i kalsan phal dawn lo tih ka hria, chuvang a hetiang thil ti pawh hi ka ni" a ti leh fak.




"A nihchuan khami zan Mary birthday zana thla la tu pawh kha nangmah i ni tihna em ni?" Ka ti a, "Ni e, kha thil kha ka ruahman na hmasa ber a nihkha, thlalak kha Prof. Sangzuala ka va thawn nghal a, i phatsan tih a hriat hnuah chuan a kalsan mai che ka ring a, mahse a ni khan a lo hmangaih lutuk che a, a kalsan thei lo che, khavang a ka thinrim zia kha i hre kher lovang, ka thil ruahman na te a kal tluan tak siloh ah chuan ruahman na dang ka siam leh a, accident kha ka ruahman naa thleng a nihkha" tiin a nui hak a, in thiamlo hmel a pu eih lo bawk.




"Mahse i vanneih na a kal tluang kan ti dawn nge, nang leh i pum chhung a mi kha thi nghal law law turin ka duh cheu a sin, mahse chutiang chuan a thleng leh ta chuang lo, damdawi in a an kalpui thu che ka hriat ve leh rang takin damdawi in lam chu ka rawn pan ve nghal a, doctor in a check lai che kha ka lo hmu ve reng che a sin, doctor tham in damdawi i ei angin result ah a la tir bawk, Prof. Sangzuala chuan a kalsan ngei ngei che ka ring tawh mahse enge thleng kha?" A ti tuar.




"Ka tum angin thil a kal leh ta lova, in in neih naa ka rawn kal loh chhan kha i hre duh em, ka rawn kal a nihchuan ka en liam mai mai thei dawn tlat lo che u alawm, tu hmeichhia in nge an mipa duh tak leh hmeichhe dang in nei lai chu hlim taka en liam mai mai thei ang, buai na ka siam a nih chuan ka nihna diktak an hre vek dawn a sin, chuvanga rawn kal lo ka ni, engtinge kha ni kha ka hman tak.i hre duh em?" Tiin a nui sawng a, a hmel te chu rapawm tak a ni.




"Ka kut hi en rawh, ka thinrim tuh reh ka tumna lama ka zai an nih hi, mahse hetiang thil hi ka tih a ngai leh tawh ngai lovang, a chhan chu ka duh ber Prof. Sangzuala ka nei tep tawh miau alawm, kei ka awm chhung chuan hlim taka in awmdun hi ka phal ngai dawn lo, chuvang chuan nanghi lo in thiar fihlim vat ang che, a nih loh chuan i pum chhung a i fa nen khan ka that hreh dawn hauh lo cheu a nia" a ti leh chhar chhar a, a sawi zawh rual rual chuan a hnai ah ka beng pawp.




"Ka naute chungchang hi kha i ka bawlhhlawh lutuk khan sawi ve tawh suh ang che" ka ti that a, "Ka tih hreh i ring em ni, ka kawng dal zawng a i awm zel a nih chuan ka ti ngei ngei ang min hriat chuan tawh kha, ka duh ka neih na turah hian ka kawng min dal tum tu an awm a nih chuan engmah tih hreh ka neilo" a ti leh fak fak a, ka nui sak, engmah ka sawi lo, ka phone chu ka in ka en a, call chu ka cut nghal, tikhan an rawn thleng thuai tawh mai ang, ka duh angin a in puang tawk tawh bawk e.




"Fing tak angah i in ngai a ni maithei, mahse i fing pum hlum biklo chu a nih hi tiraw?" Tiin ka nuih sak a, "Engvanga chutiang thil chu sawi nge i nih, hah.. nang hian ka thiltih te kha midang hnenah sawi i tum tih min hrilh suh, finfiah na pakhat mah i nei dawn chuang lo" a la in ring tawk ve hle mai maw, "Finfiah na ka neih kher a ngai tawh hleinem, nangmah leh nangmah i in puang vek tawh alawm" ka tih leh chuan a meng kawk a.




Chutah leh kawngka a rawn in hawng a, ka thinte leh Prof. Sangzuala te thian dun chu an rawn lut ta mai, a hnung ber ah U Nghaktea mai nilo car khalh tu leh doctor te chen chuan an rawn lut ta a, Remsangi chu mak tih luat vangin a meng phawk hle, kei ka lo nui sak thung, "Chuan enge i ngaihdan, i thang kam ah ka awk rei ta bawk a, tunah chuan ka thang kam ah ngei i awk ve ta a nih hi" ka ti chang fak a, Remsangi erawh mak tih luat avangin engmah a la sawi theilo thung, hetianga a awm lai hi alawm ka lo hmuh chak em em thin chu ni.




"Eng.. Engthil nge?" A ti bah nawk nawk a, "Thil thlen dan hi i la hrethiam chiah lo niin ka hria, kan hrilhfiah ang che, kha thi i ruahman na te zam hauh lova i sawi zawt zawt lai khan Chhani nen kan in call reng alawm, chuan i thusawi te kha record kan nei tha hle bawk, finfiah na ka neih loh vangin a nilawm ni i in rin tawk em em, tunah chuan finfiah na ka neih that zia i hre ta bawk a, enge i ngaihdan, chu mai nilo doctor leh motor khalh tura i rawih pawh hian thu hretu a tan an hnial lo bawk" ka ti leh takah chuan a tawlh hnung deuh rawk rawk a.




"Nang hian min bum amaw?" Tiin keichu min rawn en a, "Ka bum lo che, ka hnung lama min beih ang chiah khan ka bei ve mai che a ni, chuan heihi theihnghilh suh, bul tan hmasa tu chu nangmah i ni a, keiin a tawp ka khar mai chauh a ni, kan in rul tawk viau bawk in ka hria, tun atang chuan i thil tih hrem na hmu turin i lo in ruahman tawh dawn a nia" tiin ka nuih sang a.




"Hmeli" tih paha min rawn pan hnai lai chuan Prof. Sangzuala chu ka hmaah a rawn ding a, Remsangi kut chu rawn man in chhiat ah a paih thlu hnawk a, "Nang hian ruahman na tenawm tak hmangin keini hi min bum amaw?" A ti ṭhawt, a au ring bawk a, keipawh chu ka phu zawk thei, "Professor" tih paha Zosangzuala ke a vawn rual rual chuan a lo tlawh sawn leh dawrh, "Hmeichhe rapthlak lutuk" a ti leh hrawk a, ka thiante awm na lamah chuan ka va kal hnai a.




"Police chu i ko tawh em?" Chhani bulah chuan ka ti sap a, "An rawn thleng tep tawh ang" a ti sep, "Heng thil ka tih chhan chu ka hmangaih vang che alawm, ka neih theih nan chauh che a hetiang thil hi ti ka ni, saw hmeichhia saw awm lo nise chuan ka ta i ni daih tawh ang" tiin a tap pur a, thawk leh khatah Professor chuan a tukhum sam ah a tham nawk a, dim lo zetin a din pui nghal nawlh bawk, Remsangi chu na tih hmel zetin a then chak chak a.




"Nanghi engah mah ka ngailo che tih hre rawh, I ta nih maw ka damchhung zawng chuan i ta ka ni ngai lovang chu chu theihnghilh suh ang che" a ti leh hrawih, "Engvangin maw, saw hmeichhia vang sawn maw, saw hmeichhe damchhung zawng saw chuan nang hian min duh ve thei dawn lo a nih hi, sawnu saw thi se engkim a dik vek mai ang" tiin keichu rum zetin min rawn en a, chutiang thil a ka sawi ngam ringawt pawh chu mak ka tih tawk a tling viau, a chan a chhiat tawh tehreng nen huaisen lam pawh a nilo a a a nih saw, mi a dahna awm tlak a nih ber saw mawle.




"Ngawi hmak rawh" tiin Zosangzuala chuan a beng pawp a, Remsangi chu chhuat ah a hlawm thla nghal tawp, pan leh mai a tum chuan Prof. Chhuana'n a lo dang a, police te pawh an rawn thleng ve chiah bawk, U Nghaktea chuan thil awmdan te chu a lo hrilh zung zung a, hmeichhe police chuan Remsangi chu a hruai chhuak a, Zosangzuala kut thlak na avang khan nge tha neilo zetin a tal ve a, mahse a tal na theilo thung, driver leh doctor te pawh chuan thil an tih sual ve tho avangin police te chuan an man a ngai.




"I chunga ka thiltih vang khan min ngaidam theilo a nih pawh in ka hrethiam che, mahse i theih hram chuan min ngaidam dawn a nia, ka nupui dam that loh lai a ni nen pawisa kan mamawh lai tak a lo ni a, chuvanga khatiang thil ti kha ka ni a, min hrethiam dawn nia" driver pa chuan a ti a, police te chuan an hruai chhuak nghal, Doctor pawh chuan ngaihdam min dil a, engmah ka sawi chuang lo, an thiltih a an in chhir takzet a nih chuan ngaihdam theih loh chhan tur ka neilo, ni e mihring kan ni a, ngaihdam na hi a ropui lutuk, mahse an thil tih sual a zirin ngaihdam theih loh chin pawh hi kan nei fo.




Thawm chu a reh tlawk tlawk a, Prof. Sangzuala mit chu ka chungah a fu ngur tih hre mahila ka en duh lo, a hma kha chuan a in thiamlo hmel hmuh ka duh thu ka sawi a, mahse a hun a lo thleng ta cheng a, hmuh harsa ka ti leh em em thung si a, mahse chumi vang ringawt chuan ngaihdam ka tum tihna a nilo, ka chung a a chet dan kha a nunrawng em a, tunah rih chuan ngaihdam duh na rilru pakhat te mah ka neilo.




"Naute" rei fe hnuah chuan a rawn ti thawp sup a, chumi rual chiah chuan U Nghaktea lam ka hawi a, "Min thlah haw thei angem?" Ka ti nghal zat, "Tehreng mai" a tih chuan chhuah mai ka tum a, mahse ka kutah Zosangzuala chuan a rawn chelh hman, hawi let in a mitah chuan ka en kar a, "Ka kut hi thlah rawh" ka ti chang fak a, mitmeng thuk ruih leh mahni in thiam loh na chuan min en a, "In be lawk ang aw, khawngaihin" a ti sup, min ngen a ni mah zawk, "Vawitam biak che ka tum lai khan engmah min ngaihthlak sak duh ngailo a nihkha, i thusawi engmah ngaihthlak tur ka nei biklo, chuan ka taksa hi vawikhat mah tawk leh tawh ngai suh ang che" tiin a kut chu ka thing thla hnawk a, room atang chuan ka chhuak nghal nal nal.

Cont...

Comment leh click ah khan tan la leh ang aw, naktuk phei chu ka buai zual dawn a, a that loh chuan awm dawn lo chiang sa...