It Is Well With My Soul_@Hringnun Guru

Story tawi te te emaw luanliamna emaw post na
April Hmar Liverpool
Posts: 37
Joined: January 14th, 2024, 5:03 pm

It Is Well With My Soul_@Hringnun Guru

Unread post by April Hmar Liverpool »

It Is Well With My Soul

Story from_@Hringnun Guru


Bung Khatna

"Pa, a pa, ka hlau a nia. ka kal duh lo, i bulah ka awm duh. khawiah mah kal ka duh lo. Thih ka duh lo" Ka fanu hnuk chat lai chu ka en reng a. Notei, naupang harhvang hlim thei, a mit meng leh hmuiin a nu a chhun vanga ka inchhuanpui thin a mit leh hmui chu ka en a. Mihring a ang lo, naute lem ang chauh niin ka hria. A mitkhur chu a thuk kek kawk hle a, a biang chu a ki ven vawn hle. A hmui chu a pan thler a, a dâng lep mai a.



Ka fanu chuan a kut khing hnih chu ka lamah a rawn phar a, "a pa, i bulah ka awm duh alawm, ka thi duh lo" a ti chhuak sep sep reng a. Kei chuan nghet zeta a ban cher thiak maia lo vawn vat pah chuan "bawihte, hlau reng reng suh. A nu-in alo hmuak dawn che alawm, keipawh nakinah ka lo kal ve dawn, nang leh kei, a nu nen kan pathumin kan la inhmu leh dawn alawm" tiin a mutthilh dawna ka tih fo thin danin a chal chu ka chul sak hliau hliau a.



Kei chu ka harh zawk a, Ngaihtuahna ram-ah ka cheng mek tih ka hria. A tak takah zawng ka fanu chu biak tlak a lawi a ni lova, oxygen ringin a thaw tek tek chauh a ni mai a. A mit chu a chhing riai riai a, dinglamah a thle ngiai a; a kut dinglam, drip khaina lam chu a awm chungah dahin a kut vei lam chu a beng bulah a dah kawi ngiai bawk a. Chumi lai chuan doctor leh nurse te chu an phun ri mawlh mawlh reng a, ka vel ah chuan an vei tawn sek reng mai.



mumang ang chauh ni hian ka hria. ka hun tawn mek chu a lem mai mai han ni se emaw chan chawp mai mai han ni se ka ti kher asin. Mahse, a nu hnung zuia ka fanuin min kalsan mek ani tih ka hriatna chuan ka hun tawn mek chu lemchanna mai a ni lo tih a tichiang hle si a.



Ka hnunglam atang chuan tawng ri dang ka hre ruai ruai a, ka nu tawng ri a ni. "Mama, mama, inti pachang rawh" a rawn ti lawm lawm a, ka darah chuan nghet zet hian mi rawn vuan zui a. Chu veleh, nurse pakhat chuan, "a mar a awm ta lo" a tih ri hi ka hre zui a. kei chu ka vai nghal mup mup a, ka mit salh salh a, ka khawhmuh a thim nghal riai riai a, chutah, ni khua ka hre lo zui ta a ni.



Hringnun teh hrep hi! Naugpang kan nih ve lai chuan mihring nun kal zel dan tur chungchung kan chhui a, kan zir thin. keini hun lai khan naupang te kha an fing hma-in thil an hrethiam hma hi tun hnu hian ka ti hnuhnawh ta khawp a. Kum sawm kan nih Kum, pawl li Kan zir kuma kan zirtirtu ten zawhna pakhat min zawh kha ka hrereng thin.



Naupang zingah pawh a phurthak Kai chin ka ni ve a; tun angin internet khawvelin min la chiah lova, kan hmuh phak leh hriat phak kha TV a ni deuh mai. TV-a sap ho leh hnam changkang tih dan kha kan hmua kan hriatin lak chhâwn kan ching hle a, Tun angin khatih lai khan In lamah kan awm tam lova, khawlai leh zirna In kha kan nun a ni deuh ber awm e.



Mahsela, khatiang a ni chung khan ngaihzawng awmzia te, hlawhtlinna awmzia te, hmangaihna leh puitlin awmzia te kan hrethiam phak ve lek lek thova. TV-a a changtupa chet dan han zir mai lah a changtupa kha khan lo baksak sa teh mah ila kan sam lawi a; a changtupain a changtunu a'n chhai vel te kha hmuhnawm thlira thlir tan kha zawng thil namai lo tak a ni.



Pawl li zirlai naupang ho chu mizo subject la tu sir Richard-a chuan min ko khawm a, mak kan ti viau mai, a chhan chu khatiang khan tum dangah zirtirtu ten min la ko khawm ngai tlat lo a ni.



Naupang harh rual ta chu a awmzia hre chak sa kha kan ni reng a. Sir Richard-a chuan ka piaha thu mize zawi awi lam, mi chimlim lem lo tak Partei hnenah chuan, "Parte, i len hunah eng nge nih i tum le? A ti ta mai a, midang khan Partei kha kan en nghal thap mai. Partei chhanna kha kan nghakhlel nghal em em ringawt mai a ni. Engtin tak chhang ang maw?



Chutah le, Partei chuan a kuttin kheuh niap niap chung chuan, "sir, ih, ih, ka len hunah chuan in wrestling ka tum" a ti ta mai a, midang kha ngum sawh an sawi ang maiin kan dir bu tlarh tlarh hlawm. Ni e, kei ni a harh chin khan WWE an tih kha kan en nasa hle mai a, an tih dan han zir te kha kan uar si a, Triple-h a tui phuh dana a phuh pa ber leh thiam ber nih tum khan kan in el nasa thin hle reng a, Khang te kha hmeichhe lam Khan hmuhnawm thlir takin an thlir ve thin rêng a ni.



Chutah, sir Richard-a chuan nui sang hian, "e he! Chu, Parte, i va tum ropui ve le" tiin zahminga lam chu a'n awn leh nghal da a. A tarmit kara a mit de ra mai, a fin hmel kan tih em vanga a mit men dan kan zir fo thin ang ngei mai chuan zahminga chu a'n melh a, "hminga, nang ve thung le. I len hunah eng nge nih i tum?" A'n ti ve leh a. zahminga chuan Partei ianga nuihzat hlawh a hlauh em vang a ni chek ang, in seh ruh al al chung hian, "ih, ih, sir kei chu Pilot nih ka tum" a ti ta a. Pilot awmzia a hria em tih kan hre hauh lo. kan rilru chuan vana thlawhna thlawk ri vut vut thin chu chhui dawn rauh rauh chungin a tum sang mah mah niin kan hria a.



Ka thianpa, keimah ang bawka naupang harh Duhtea chu sir chuan a'n zawt ve leh ta a. Duhtea chuan inringtawk zet chung chuan, "sir, kei chu Doctor nih ka tum" a lo ti a, sir Richard-a pawh chu a bu nghat nghat mai.



Ka hun a thleng ve ta. "Nang ve thung le, Ma muan, eng nge i len hunah nih i tum? mi'n ti ve leh ta a, kei chuan uluk fahran hian ka'n ngaihtuah a, chutah sir Richard-a en da chung chuan , "sir, kei chu Teacher nih ka duh" ka ti ta a. Chutah, ka chhanna avanga Sir Richard-a, a tarmit kuai thlaa ka lam ena a nui hmel mawlh chu a mawi danglam duh kher asin.



Khatih lai khan thinlung taka thahnem ngaihna erawh kan pawh phak lem hlei lo a ni tih tun hnu hian ka hrechhuak leh lawi a ni. Ni e, sir Richard-a tih lawm nana khatia chhang mai kha ka nia. A nihna takah chuan ka puitlin huna ka tum, 'Teacher' tia ka chhan kha ka ti tak tak miah lova, khatih laia kan zirtirtu tih lawm nan leh mark score tumna mai a ni. Amah kha ngaisang ila, amah ang kha nih ve chak ila, chu chu zirtirtu ka tih lawm nana thil hautak lo tê niin ka hria a ni.



Kum a'n vei a hun a liam a, naupang chhia lutuk kan ni ta bik lo. ka pa hi kan khua Keifang Police venga Middle School Headmaster a ni a, ka nu hian dawr lian lo tê siamin In lamah hun tam zawk a hmang thin thung. unau hi pathum kan ni ve a, kei hi a mi lai ka ni. Mahse, kei chu ka nausen tet ata tawh taksa lam bawrhsawm thang ta ngang ka ni a, ka nu min hrilh danah ka pian hlim hian nau tê pianghlim rih dan pangngai loin ka zang bik hle niin a sawi. Ka unau dangte aiin ka sawngnawi bik hle a, tah pawh ka tah belh bik hle. Amaherawh chu, thian zingah erawh a harh pawl leh chintawk hre lo pawl ka ni pha tho.



Nimin ang mai niin ka hria, thian te nena tual kan chai hun te, sava veha ramhnuaia hun kan hman lai te, ni e, tunah zawng khatiang thil kha kan kalsan ve tawh. Rawlthar til pawr aw kha nalh lo kan va'n ti thin tak.



kan veng mi chu a ni lo, veng thenawm a mi an ni. Mahsela, kan veng Police vengah hian a nutei te an awm avangin he lamah a rawn tla tam viau thung a, a hming chu Mawitei a ni. Keini thian chauh nilo, kan venga rawlthar mipa zawng zawng khan kan ngaizawng ru vek. A nui hmel mawi zet mai phena hmel pawisawi lo tak lo lang te, a bahsam tle siau siau mai te, a mit meng ngaihno bei zet mai te kha thla eng ang mai a duhawm an ni.



Keini rawlthar tan khan chu chu kan lo hai hauh silo. Kei ngei pawh khan zan tina ka mut hmuna ka suangtuahna luahkhat tu leh ka ngaihtuahna zem buai fo thintu chu ka vei ru ve veng veng thin a ni si, amah ka hmuh ngawt pawhin chhungril hi a nghing thin a, a biak ngawt pawh kha ka be ngam ngailo. Mahse khatiang mai mai kan ni chung khan a lehlamah ve thung rual u zawk, kan ngaihsan te tih dan zir reng renga khawsak kha kan la ching riau tho a, hmui hmul neih te kha kan inchhuanpui thin hle.



Hun chuan a tih tur a hlen zar zar viau a, ni thar a herchhuahpui rualin hmasawnna leh changkannain a ken tel thil tha lo tak tak pawh a herchhuahpui ve reng bawk.



Tumkhat chu zahminga leh Duhtea hian Sunday school inkhawm kan bang chu eng nge maw min sawi hmawr hmuh a. An sawi hmangin nu leh pa te rem tih zawng a nih kha a rinawm hauh loh a ni. Mahse, thiam takin min thlem a, kan inhrechiang si a, kei lah mi rilru nem chi, tih nuam tak, thian te phurna a pianga phur zel thei hi ka ni a, ka cheng deh lah an thian narawh si.



Duhtea te In-ah chuan kan inzui lut ta tham tham mai a, a chhung te tumah an awm lo. A room lamah chuan kan inzui lut zel a, chutah thutna ah chuan thuin kan thil tih tur chungchang chu kan sawi khawm tan ta a. Inkhawm bang hlim kan ni a, hla bu pawh ka zakzeh tat nghe nghe. Zahminga chuan a kekawr ip atang chuan damdawi mum lian deuh pa li hi a rawn phawrh ta a, kei chuan a ngaihna reng ka hre lo. Ka lu lah a na der silo'engtia chutia damdawi mum a lam lam' tiin ka ngaihven tehchiam vak lova, ka hla bu ken chu ka keu a, inkhawmpui lo awm tura kan hla rem tur chu ka chhiar a, ka rilru chuan ka By heart pah tlauh tlauh reng a.



Duhtea chuan, "muan, kha le" a rawn ti a, damdawi mum khat chu min pe a, "a laiah khan ulhbung la a lehlam kha i ei dawn nia, nakin deuhah pakhat zawk kha a charge nan i hmang leh ang" a'n ti a. Kei chuan, "eng nge hei? ka lo ti a, zahminga chuan, "aww, damdawi anih kha, ei la i hre mai ang, i zawngchhang dawn lutuk" min ti a. kei chuan, "ka duh lo, nangmah nin ei mai ru" ka lo ti a, "kei te chu ka dam tha alawm" ka ti zui a, ka nui lui sang a.



"Nep viau thin lo teh ma muan, pa lo lutuk mai, mipa i ni lawm ni? Mipa i nih chuan hmawm tawp la i hrethiam mai dawn a ni" a'n ti leh a. kei chuan ka duh loh bawk ka hrilh leh mai. Ka thian te lah chuan damdawi mum ei luih tir phet tum chuan mi tawng bum an han tum vel viau na a, A nihna takah chuan ka ei ve chhin chak hle a, thil thar han tem te, hriat ngai loh hmelhriat te chu keini rawlthar tana thil awm lo pawh a ni hauh si lo a.



Chutia ka tan na a ka tan khawh tak tlat avang chuan ka thian te pawh chuan mi pek luih an tum ta bik lova, eng eng emaw an sawi dun nasa hle, kei chuan hla bu chu ka la en ngun viau thung. An sawi tam tak kha ka hre nel nual na in a awmzia erawh ka hrethiam seng lo. 'MET' tih te, 'AP' tih te chu an thil sawi ka hriat zing a mi a ni.



Kei hi Sunday school kai taima tak ka ni a, kai kim lawmman leh examna-a titha lawmman lah ka la ngun malh malh thin hle. Kum thar a niha Sunday school kai kim hming an han chhiar thlak dan dan tawh chinah hi chuan ka hming a ri tel ngei ngei thin, hei hi chu ngaiah pawh ka neih deuh roh. Ka u chiah hi kohhran lama inhmang a ni a, a ni hniak hi ka zui a tih theih awm e. A hnen atangin fuihna tam tak ka dawng thin a, phurna leh thatho-na min siamsak thintu a ni.



Ka phak tawkin Inhmang rual ka nih ata kohhran ka bel zui nghal a, kohhran hnatlang leh activity hrang hrangah theihtawp ka chhuah ve thin. Kan chhungkua hi sawisel bo chhungkua chu kan ni bik hauh lo. Ka nu leh pa hi kohhrana inhmang an ni sa hrim hrim a, an fa te hian an hnung kan zui zo a ngem tih chu kan inelna a ni chho hial zawk awm e.



Amaherawh chu, keimah bik hi ka hrisel lo ka tih tawh kha, naupan tet ata bawrhsawm thang ka ni a, hun laklawh deuh deuha han dam loh leh tut hi ka ching tlat mai thin a, bial inkhawmpui te, Conference ang ah te, tin, tualchhung lamah, bial zaipawla inhman ve phei chuan hreh tak chungin ka pha leh nge nge thin. Mahse, 'ka tum nge ruh sa ruh' tiin dam lo chung pawha han inpal luih erawh ka ngah tho a, a result-ah ka inchhir ngai lo thung.



Ka hrisel lo chho ta hle reng a, ka nu leh pate ngaih a tha lo chho ve zel bawk, ka nu chuan, "mama, inenkawl tha la, heti reng reng hi zawng kohhrana inhmang in ni a, rual pawl kawngah leh khawtlangah i hnufual lutuk bik a nge" tiin ka hriselna ngaipawimawh turin min duh ta hle a. lehkha zir lai ka la ni a, ka lehkha zirna thleng chuan ka hrisellohna chuan a nghawng mek zel a ni tih ka hrethiam tawh a. Heti reng hi ka nih chuan lehkha zir pawh ka chhunzawm thei lo maiin ka ringhlel hauh lo a ni.



Sulhnu leh lunghlui ngaih chang te a awm a, ka hrisel lohna chhuanlamin 'eng nge maw, vawikhat pian manah' tia ka khawvel thian ho nena khawvel han chen ve bawk bawk mai chu ka chak ve thin. Bei hi a dawng ru ve fo a, rilru hi a vak kual ve nasa thin hle a ni.



Ka thian thenkhat chu High School kan chhuah hian lehkha zir an chawlhsan tawh hlawm a, ruihhloah talbuaiin, mipat hmeichhiatna nen, kei erawh College te ka'n lut leh a, kohhran lamah ka phak tawkin ka inhmang ve ngar ngar thung. An ni khawvel leh ka khawvel chu a hrang lo thei ta lova, eng nge maw nikhua-a han inkawm khawm leh hluai kan ching thin e' tih mai loh zawng nun a inpersan hlawm ta viau a ni.



Thian thenkhat chu nupui pasal nei an ni tawh a, thenkhat phei chu nuthlawi pathlawi hial an awm tawh. Tin, kan veng thenawm a mi Mawitei kha tlangval rual zingah a la lar hat reng a, tin, a tan tir atang reng khan ka thian thenkhat ten, kei nena min chhhaih fiam hi an chin thin avangin mi tam zawk chuan inngaizawng angah min la ngai hial reng a ni. A ruka nuam deuh si, a takah erawh zahthlak deuh a ni.



Tum khat chu In-ah ka awm lai a ni a, ka thian zarmawia chu a rawn leng a, a ni chuan Mawitei chungchang min sawi pui chiam mai a, a sawi zel danin amah Mawitei ngei pawhin kei chu min mitmei ruk ve thu te a sawi a ni awm a, ka hlim takzet. Rawlthar kan nih phat ata ka vei ruk leh ka duh ruk, mahse a biak ngawt pawh ka ngam that thum loh kha a ni si a. Zarmawia thusawi duhawm tak mai chu han theihnghilh leh nghal mai chi a ni hauh lo a tin ni.



Rem te min ruat pui bawk a, chet lak hmang tur min ruahman sak a, amah zarmawia hi kohhran lamah ka sa ngawi zawnpui ber anih vangin a ni lakah hian rinna ka nghat thuk hle a, ka ring tawk hle bawk a ni.



Nia, zarmawia chuan Mawitei hnenah ka chungchang tam tak a hrilh ta ngei a. kei chuan tun hma ata ka vei thin zia te, ka duh ruk zia te chu a hrilh a ni, chuta mawitei chhanna chuan kei chu min va tihlim ngai em! Kei pawh chu min duh ve thu leh a rem chuan ka phone number neih a duh thu a lo hrilh a, Zara chuan ka number te chu pein ka hnenah a hlawhtlinna ropui tak mai min hrilh tura lokal lehin khami tum kan thian duna kan hlim zia kha.



Tumkhat chu Central KTP General conference champhaia neihah ka kal ve tum a ni a, bial zaipawl member ka nih ve avang leh bialah Treasurer te ka nih ve vangin thahnem ka ngai hle a, zan hnihna zanah kan bial chu kan zai dawn si a, mahse ka khua lah chu a sik reng mai nen awm a nuam lo leh tawh hle.



Tawngtai lamah tan ka la a, ka member pui te hnenah ngei pawh, min tawngtai pui turin ka sawm ngun khawp mai. Tawngtai chhanna te pawh a ni a nga, a tuk zan a lo nih chuan, huphurh tak, phur ru tak siin ka chanvo chu ka hlen ve thei ta hram a, ka lawm ve hle a ni.



A zan hnuhnung ber zanah chuan zaithiam zai tur an awm a, kei ngei pawhin ka ngaihsan leh mizo zaithiam zinga ka duh ve ber anih vangin a zai lai chu hlah ka tum hauh lo. Hemi zan hi alawm tun hun thlenga ka theihnghilh theih tak loh chu ni.



Kan thian thenkhat chu rui tih hriat tak hian an meng sen ram hlawm a, tin, zaithiam zai hunah chuan programme kaihruai tu te ngei pawh an inhawng zau a, lamtualah chuan a duh apiang zalen takin an lam chhuak thei dawn a ni. Chumi hre rana rui an tam hle a, kan bial atanga kal ve mi thenkhat pawh an bang lo. kei chu a hminga Ob te ka nih ve vangin kan veng mi rui thenkhat pawh ka khak ve nghe nghe a, mahse ka zilhhau hla chu engah an ngai duh a zeng pawh chu a ni lo.



Zaithiam chu a zai dawn ta a, lamtual pawh an dah awl tan a. Lamtuala chet nat tum an kat fur tawh. Chumi lai chuan ka thian Duhtea kha ka bulah a lokal hnai a, "ma muan, hei hi in teh" a rawn ti a, bottle hi min pe a. kei chu ka chhawl hal lai tak a ni nen, tui emaw tiin ka in nghal pawp pawp a. Chutah, Duhtea hnenah chuan, "nang hi i rui ve em? ka'n ti a, Duhtea chuan min ngaihven lo zet hian lamtual lam chu a thlek ha ha reng a, "sir ma muan, ka lam ve dawn, lo lam ve rawh" min ti a, kei chuan, "teuh lo lutuk" ka lo ti a.



Chutah le, Duhtea chuan, "chiah maw? tiin lamtual lam chu min pansan ta a. Kei chu ka kawhmuh a dik ta hauh lo. Ka lu chu a hai hle a, ka tisa chhungril atang hian zauthauna a rawn intham ni berin ka hria. Duhtawka ka taksa chu han sawi nghawng nghawng mai hi ka chak a, ka kawng kal te reng chu ka kal pai lek lek ta mai a, chutah ka hrethiam ta, an sawi fo thin 'rui' an tih awmzia chu ka hrethiam ve ta a ni.



Lamtualah chuan an lam mup mup reng a, 'misual tlan nan a thisen hlu a pe' tih hla chu an sa rual thup thup reng mai a ni. Chutah le, ka taksa za chem chem reng chu ka tuar zo ta bik lo, lamtual lam chuan ka lung min len ve ta hle mai a. chumi lai tak chuan ka rilru hria ni awm fahran hian Duhtea bawk kha a rawn lang leh a, "ma muan, mawitei pawh a lam nasa mai, thuai vat" tih leh ka bana kaih a rual a.



Chhungrila phurna zawng zawng nena lam ka'n thai ve ta tak tak mai chu thawklehkhatah ka kawng chu a ri nawk a, ka che thei ta reng reng lo mai a. Chutah, mangang tak chuan Duhtea, ka bula lam su nghawng nghawng reng chu ka'n au vak mai a. kei chu ka ding sawi reng a, ka che thei tawh lo. Duhtea chuan mangang hmanhmawh zet hian midang pakhat a pun vat a, chutah pandal pawn lamah kei chu min kuahchhuak ta a ni.



Field sirah chuan ka thu sawi reng a, ka kawng na lai chu min zut sak hauh hauh reng a, na tiin kei chu ka then chak chak reng a. chutah le, ka hawi lohna lam atang chuan hmeichhe aw, ka hriat zawng ringawt pawha ka zam chhiat derna Mawitei aw ngei mai chuan, "khawi, ka lo zut ang" tih leh ka kawng na lai rawn deh a rual thut a! Kei chu ka phu vak mai a! Rang lutuk hian Mawitei lam chu ka leh hawi thut mai a! chuveleh, Chiang zet hian Mawitei nen chuan hnai set sawtah kan mit leh mit chu a intawng ta siah mai anih chu!. Kan in en reng ringawt a, kei chu ka khur ru der der mai. Chutah, Mawitei chu a harhchhuak thut a, nui sen sen chung chuan "enge i an? mi'n ti a, kei pawh chu ka harhchhuak thut a, ka kawng na chu ka'n hmet a, a na tawh miah lo.



Kha mi zan atang khan Mawitei nen hian pangngai takin kan inzui ve tan ta a ni a, kan inbe ve ta fo mai. Kohhran lamah ka inhmang nasa si a, ka phone-a a message lo awm ka chhan hman mai loh thenkhat ka hmuh te hian thupha ka chawi mawlh mawlh thin a ni.



Mawitei nena kan inzui tan atang khan thla thum lai mai chu a liam ve leh ta a, Tumkhat chu ka nu hian tukthuan kan Kil laiin thu dengkhawng tak min hrilh ta a ni. kei chu mipat hmeichhiatna lama ka fihlim lo nia ngai mi tam tak an awm thu leh ruihhlo thleng pawha ka fihlim ring lo chu an lo kat nuk mai a ni awm a. kei chuan chutiang engmah a awm loh thu leh Mawitei nen chuan a fawh ringawt pawh kan la infawh ngai loh thu te chu ka hrilh ta phiar phiar mai a ni.



ka pa ngei pawh chuan, "mama, i fimkhur a ngai, chhungkaw hmingchhiatna mai a nilo a, nangma mimal nun zel atan pawh a mualphothlak hle a ni. Kohhranah a kul tai in ni a, rintlakah ngaiin nihna neuh neuh pek in ni a, tin lehkha zirlai in ni bawk a, hetiang boruak tha lo tak a piang ta mai hi i in enfiah vat a tul hle a ni" min ti bawk a.



Kei chu ka lung a awi lo hle a, ka rilru a na hle bawk. A hnua ka hriat leh danin Ka chungchang sawi tute chu ka thian kawm te pawh an tel nghe nghe a, thenkhat phei chu ka mi rin em em, kohhrana ka inhman pui ka fak em em thinte an ni. Mak ka ti hle. Mipat hmeichhiatna a lam lam ruihhlo nen lam maw? ka rilru na chu Chaw ka ei theih loh phah reng a, zanah ka mu mumal thei meuh lo. Ka theihtawkin ka tangtai thin a, ka harsatna te chu Pathian hnenah hmachhawna hneh thei turin ka dil thin, ka inhlan thar fo thin a ni. Ka khawvel thian te kohhran lamah theih tawka hui ka tum ve lai kara chutia a ni lo zawnga min lo sawi duh mai chu a thlarau bo vei loh thlak hlein ka hre ve nghe nghe a ni.



Ma'ni lo maha, In chhungkurah ngei pawh inthlahrun sa laia, Ka taksa hriselna a tlahniam zel si a, Doctor pan fo a tul a, damdawi man tam tak tak ka mamawh a, a hautakin inthlahrun a nat sa tehreng nen, chutia boruak tha lo a lo thang Chiam Mai chu hreawm ka ti hle a ni.

Zan khat chu Mawitei nen chuan kan venga Mela an hawn tharah kan lengchhuak dun ve a, vana thla chu a eng no kher lehnghal. Lung te chu a ti leng dawn dawn mai. Mahse, ka bulah, bahsam tle siau mai leh a hmel hlim tak, hah tidam vawng vawng thei tur khawp siamtuin a bika a duan hmeichhe duhawm chu a awm tlat a. Thutna awmah chuan kan thu a, van lam chu kan en a, arsi pe un kara thla eng chu a no nalh ma nge.

Mawitei kut chu ka vuan chawt a, a kut thianghlim leh no em em mai ka'n vawn tak a ruaiah chuan ka lo duhthawh mah mah a. Mawitei kut chu ka vuan nghet sauh sauh a, thlifim thaw heuh heuh kara a rim tui leng chem chem te chuan lung a ti awi chiang teh e. Mawitei chuan ka lam alo hawi a, ka mitah tak chiang taka en in a nui sak a, chuveleh van lam chu en in, "ma muan, duhthusam rawh le" min ti a, kei chuan van lam chu ka thlir ve vat a, mawitei chuan, "i mit chhing rawh, eng nge i duhthusam? tiin ka mit chu a kut chuan a rawn chhin tir a. kei chuan ka rilru chuan, "chatuan in nang nen" ka ti a. "lalpa, hei hi ka duhthusam a ni. ka kianga hmeichhia hi ka damchhung nupui nia fanau duhawm tak nena hringnun ka zawhpui atan ni rawh se" tiin ka meng a, mawitei chu dak chungin alo la chhing vang vang a, a van hmeltha in a va'n duhawm reuh tak! Vantirhkoh hawlhthlak nghal loh chuan!

Hun te a liam zel a, Kum a vei a, hringnun tak tak hmachhawn tura ka la inpeih hma hauh chuan chanchin tam tak sawi tur ka hre der tawh. Hetih lai hian harsatna vangin nun beidawnpui chang leh hriatthiam loh chang ka nei ve fo tho a. ka rilru chuan 'Enga tinge maw' ka ti thin. Vanduai riaua inhriat chang hi ka nei thin. Sawi nuam anih loh vangin ka sawi lang khat thin hle. zirna lamah hian ka vanduai thin hle a, ka naupan deuh lai ata kha examna-ah hian ka ti chhe thei hle. Ka pass tang tang chauh a ni thin. Tun tumah pawh ka ngaih a tha leh tawh tlat lo.

Pawl sawm hi Kum hnih ka bei a, a Kum thumna ah ka in ziak tling ve hram a, tunah hian BA second year ka bei mek a, BA hi ka paltlang lo mai ang tih ka hlau hlel ta lo, a chhan chu ka hriatna te hi ka hlauh zo a, ka thil chhiahchhiah theihna te hi a mang zo ta. Doctor hnenah pawh ka harsatna hi ka thlen fo a, Doctor chuan damdawi hnathawh avanga thil thleng thei anih thu te min hrilh a ni. A ni awm teh tak e' ka ti ta a. Ka naupang tet ata mi hrisel lo ka nih avangin damdawi ka ei nasa a, tun hun thleng hian damdawi dose sang tak tak ka tih nasat avangin ka hriatna te thleng hian a khawih chhe ta a nih paw'n a awm lo hran lo ang.

Ka nu leh pate chuan min ngaipawimawh chho leh ta riau a, BA tal hi chu zirchhuak tura min duh avangin ti hram hram turin min fuih thin kha a ni a, mahse tunah zawng an rilru pawh ka ti hnual zo ta niin ka hria. Sum leh pai a lo hautak si a, damdawi man sang tak tak ka mamawh reng bawk nen, kohhran lamah a kul tai kan ni a, mamawh neuh neuh lah a tam thin si. A nihna takah chuan rilru leh ngaihtuahna sen a tul a, hrisel a ngaiin a chang hi chuan ka tlin lo thelh thelh thin reng a ni. "Tun exam hi han bei leh la, i result a zirin hma hun tur kan la ngaihtuah dawn nia" ka pa chuan a ti ta a.

A mak nek lah tak a! Exam kan han neih dawn hnaih apiang te hian ka hrisel loh hi a chhuak duh hle a, nuam sam lo chung chungin exam hi ka hmachhawn fo thin reng a ni. Heng te pawh hi a ni ngei ang result tha ka hlawhchhuah loh fo chhan hi. Mahse, midang bula harsatna han sawi chiam te hi alo nuam hauh lova, nuihzat nih te hi kan hlawh duh nek lehnghal a.

A khat tawkin Mawitei nen pawh kan inbe reng tho va, a ni hi kei aiin a upa a, BA final a bei mek ani. Ama insawi dan takah tun exam lo awm turah result tha a nei anih chuan Aizawl lamah zirna chhunzawm a rilruk thu min hrilh nghe nghe a, nia, lung a leng lawk dawn hle a ni.

Hun a kal a, exam hun a thleng a, rin ang ngeiin ka hrisel lohna bawk chuan min tlakbuak leh ta! Ka khuh berh berh reng a, ka khuh tawp hleithei meuh lo. ka khuh tawp telh telh a, ngaih a tha leh ta lo, khua lah chu a sik reng mai si a. Exam ni hma ni chiah chuan damdawi In-ah in entir turin ka kal a, Doctor ten min lo en a, kei chu TB natna nei ka lo ni reng mai. Ka chungchang ka chhung ten an hriat ve chuan an hnual hle a, amaherawh chu a rang lama in enkawl chuan hrisel tha taka ka awm theih thu min hrilh a. Chu chauh pawh chu beiseina chau rau tak a tling hrim hrim e.

Exam chu kan han bei ta a, kawng engkimah ka hnufual dawn ani tih ka hria. Exam kan zo a, kei chu loh theih loha damdawi In lama hun ka hman chhunzawm a tul leh a, kohhran lama ka nihna chelh ve pawh ka pha nghe nghe. Mahse a mak khawp mai, vanduaina tiin kan chhiar dawn nge an sawi khuarel zawk. Damdawi In pawh ka la chhuahsan hma hauhin ka u, kan unau zinga a upa ber chu keifang khaw daia kual mawi an tih kawng kual lai takah motor nen an insu hlauh mai a, a nunna chhan hman ani lova, ka chhawn lovin a hmunah a thi ta mai a. Chu thu dengkhawng ka hriat rual chuan ka nghing dawt dawt a, ka chawmawlh zovin ka hria. Ka u hi Aizawlah lehkha zirin a awm chhuahna ala rei lova, kan khaw lamah chawlh hmang tura lo haw a ni. Mahse vanduaina erawh kan tan a ruat a ni ta si.

Ka u thlanah chuan kan chhungin kan kal a, ka nu mit atanga mittui lo luangchhuak ka hmuh khan khati taka mittui a zawnga mittui awmzia min hrilhfiah tu kha ka la tawng lo a ni tih ka hrechhuak.

Hun a kal a, In lamah hun ka hmang chho veleh ta. A hmaa ka sawi lawk ang ngeiin zirna lamah result tha ka hlawhchhuah leh tak loh avangin kei chuan zirna chu ka chawlhsan ta rih a. Pathian ruat a ni a nge' tia lungawi pui mai chu kan tih theih a ni rih a ni.

Hun inlumlet leh mihring nuna zirlai tam tak inmung chu ka tan hmuhnawm a ni ngai hauh lo. Ka u thih atangin rei ala inrial lo, Inrin ni tuk a ni a, Aizawl lama awm ka thian tha zirsanga chuan thu dengkhawng tak mai min hrilh leh ta! Ka phone message chu ka'n chhiar nawn leh thin a, na ka tih avang leh min tih hrilhhai em avangin ka mittui chu ka mit atang chuan a luangchhuak ve hial a ni.

"Ma muan, mawitei'n pasal a nei dawn" chu thu chu ka en nawn tluk tluk reng a, ka chhiar nawn fo mai. Nia, tun hun thleng pawh hian he hriatrengna chak väk lo takah hian nawh reh hleihtheih a ni der si lo a nih hi. Mawitei chungchang chu ka ngaihven nghal chung chung reng a. Nia, ngaihzawng a neihna hi a rei tawh niin mi thenkhat chuan an sawi a, kei nena kan inzui tan atang daih tawh khan midang an lo awm reng a ni tih ka hre ve ta chiah a ni.

Eng nge ka tih tak ang? Ka hrisel lohna chu thuhran, kawng tam taka ka belh thin leh a thurawn ka lak fona thin ka u in min kalsan tawh a, ka suangtuah leh duhthusam tihlawhtling tura kailawn pawimawh zirna ka chawlhsan a tul a, tunah ka hmangaih berin min phatsan leh a. Eng nge he nunah hian tih tur ka neih ve tak? Ka khawvel neih ve chu a tawp deuh hmuk ni mai hian ka hria. Engtin tak hma hun chuan min lo hmuak zel dawn ni maw?

Mawitei te inneih niah chuan sawm ka ni hauh lo chungin ka va tel ve ta tho a, a pasal tur chu pa khansang tak, sam zuah lek lek, a hawiher leh a chezia te reng chu hmeichhe mit la tur chi tak hi a ni ve reng reng a. Mahse, a phu lo, mawitei hi he pa hian a phu mawlh lo. Thil tam tak ka chhuikir a, thikna in ka khat a, Pastor-in inneih thu tiam a lak tir lai te reng chuan mittui hi ka dang zo lo thelh thelh a ni. Mahse, naupang chhia kan ni tawh lo a, pachang taka ka awm a tul tih ka hria. Ka thian te, ka kianga ding ve thenkhat chuan kei chu min rawn thlek leh vang vang thin a, keimah atang chuan eng nge maw tak hmuh an inbeisei a ni chek ang a.

Bung hnihna.

Kohhrana pangngaia ka inhman tanna hi a rei ve ta, thangkhat lian dawn chu a ni tawh ngei ang. Kum 29 ka ni ve ta a, ka la upa hauh lo nain ka kum rualpui midang nen tehkhin loh theih ka ni bik lo. Thian ten nupui fanau an nei zel a, kei erawh Mawitei hnuah hmeichhe dang lakah ka tuiral leh ta ngai lo. Kohhran lamah theihtawp ka chhuah chhunzawm zel thung a, ka hrisel lohna pawh ka harsatna lian tak a la ni reng bawk.

Kum sawmthum ka tlin champha chu thian hlui thenkhat nen kan chhungkuain kan lawm ve teh mial a, nunhlui ka chhuikir a, a rei ve ta hle mai. Hmanah chuan tual lai kha kan nun a ni a, mi thei lawh ruk te kha kan ching thin hle, luiah te kan kal a, ai a u deuh, a fing hmasa te hnung kha kan zui nasa thin hle. Thian thenkhat chu ruihhlo bawiah tangin lungchhiatthlak taka vui liam an ni tawh a, thenkhatin nupui pasal an nei zo tawh a, thenkhat erawh nupui pasal tifuh lova leng leh an kat nuk mai.

Ka u kan ngaih a zual hle a, banga chhungkaw thlalak intar chu enin ka u chu ka'n en chiang a, nimin mai kha niin ka hria, a thih thu ka hriat khan mumang ang mai niin ka hria. Ni e, thihna te, chhiatna te hi chu mangchhia ang chauh an ni. A tan tirah chuan kan awih lo fo a, pawm har kan ti a, mahse a tuk khua a var apiang hian a tak tulh tulh lawi a, mumang mai a han nih loh zia chu a fiah tulh tulh si a ni.

Piancham hi ka lawm khat viau mai. A bikin ka nu leh pate hian tet tê atangin piancham hi a khat mawi tawk chauh hian min lawm sak thin a, tuna kum upat hnua han tharthawh leh hluai pawh chu khawr a awl duh nek mai.

Ka piancham lawmna hun te kan hman zawh hnu chuan thian hlui te nen titi turin thutkhawmna lamah  kan insuan phei leh a, nunhlui te kan sawi a, sulhnu te kan chhuikir leh a, hun nuam danglam tak zawng a ni Chiang a ni!

Tumkhat Pathian ni tuk a ni a, ka chhungte chu inkhawm turin an liam vek tawh. Kei chu ka tlai deuh a, hmanhmawh takin biak In lam ka pan a, chutia biak In lam pana ka kal chu biak In thlen hma deuhah kawng sirah hian kan kohhran upa pahnih leh ka pa chuan eng eng emaw hi an lo sawi a, kei min han hmuh takah chuan min hmachhawn zawngin an tan hmun an siam rem nghal thuai a. Chutah, ka pa chuan mangan hmel tak leh pawi tih hmel zet hian ka lam a rawn pan nghal vat a.

"Mama, muantê, i thil tih hi i hria em? Min han ti a, kei chuan, "eng thil nge ni ka pa? ka lo ti vat a. ka pa chu a'n chek tlak tlak phawt a, chutah, "mama, kan kohhran upate hekna lam hawi synod-ah i thlen reng em? Min ti ta mai a. Kei chuan phawk zet hian, "eng maw? Eng hekna maw? Ka pa chuan, "muantê" tiin lungawi lo zet hian min melh vang vang reng a, chutah thaw han lain "mama, he laia sawi mai chi pawh a nilo. Kal tawh, i haw vat teh ang, a zahthlak dan hi a pawi chi a ni tlat mai" tiin ka darah a rawn vuan vat a, hmanhmawh takin In lam kan pan ta a. Ka han lehhawi a, kan kohhran upa te hmaia lungawilohna langchhuak chu ka hai lo, keimah vang a ni tih lah ka pa thu min hrilh dan atang khan hai chi a ni silo a.

"Lalrinmuan! I thil tih pawi zia hi i hrethiam dawn na nge" Ka pa thinur hmel chu en in, "ka pa, eng hekna mah ka thlen lo. Engvang ngawtin nge kohhran pui pa te ka hek mai ang ni? Keia hek ngawt theih lah ni lo hian" ka ti a.

Ka pa chuan, "mama, KTP lamah leader in ni a, tin bialah lah OB in ni a, bial leh tualchhunga kut ke ber in ni, hetiang thil tih chu a awmin a awm ang lo lutuk! Thil zahthlak tak a ni" ka pa hmai chu a sen tawn tawn thei hial a. ka pa chu chiang taka en in, "ka pa, eng nge thil awmzia ni ngai ka va hrethiam lo em!, tu in nge hekna lehkha ka thlen thu chu sawi reng reng a?

Ka pa chuan, "mama, kan chhungkua chu zah avangin then rual ziangah kan hawi ngam dawn tawh lo anih hi. Kohhran thil tih ni khua reng rengah an sawi luai luai tawh alawm, a hma daih atang tawh khan a rukin an lo khel ngat ngat tawh a lo ni. Engmah kan hre ve ngai lo zawk a, tunah ka hre ve chauh a ni. Kohhran hian i thil tih atthlak tak avang hian phiar che a tum a ni. Kha, kan upa te sawi zel dan phei kha chuan kohhran atanga intuithlar hial kan tawk lovang tih a sawi theih hauh loh.

Ka thu hriat chu mak ka tih em avang chuan ka pa chu ka en reng ringawt a. "Ka pa, tu mihring hnaisai lo thusawi nge maw ilo hriat ni. Engkim hi ka finfiah dawn, ka thil tih niloah hmingchhiat ka hlawh dawn lo. Tunge hetia min puh tu hi? tiin ka lungawi lo chuan ka mobile phone chu ka'an lekkang a. Chuveleh, ka pa chuan "lalrinmuan! Dah vat rawh. Synod lama thu thlen te kha ilo zuk tum leh mai mai a nge, a tihin ti tawh hlek suh" A ti vin thawt mai a. Ka phone chu ka dah thla rang kher mai. Chuti taka ka pa thinur chu ka la hmu ngai tlat lo a ni.

An sawi dan chuan kei ni Pastor bial chhung atangin Synod lamah kohhran upa te hekna thu lo thlen an awm a ni awm a, an han chhui chiang zel a, a tawpah keimah Police veng KTP leader ni lai mek leh bial Treasurer ni mek hi hekna thlentu chu ka lo ni reng niin an sawi a ni. Synod lamin thu nawi leh hla nawi engmah thlen tawh lo tur leh buaina chhuak zawnga boruak vai lo turin he lamah thuchhuah an rawn nei a ni awm a, mi tumah thu hla nei zui ngam an awm rih lo a ni awm e. Mahse, tualchhung kan kohhran bilah erawh khel zui a hlawh nasa hle a, lungawi lohna leh kohhran phuar hial te ka tawk ta a ni awm e.

Kohhranin kei min phuar ve ngawt mai pawh chu ka hrethiam lo hle a, chu erawh ka rindan chuan kohhran upa te leh kohhran commitee thuchhuak niin an phuahchawp thil tih deuh niah ka ngai. Mahse, thu leh hla ka neih zui an remti lova, kohhran thuchhuak ka dodal anih chuan kohhran atanga hnawhchhuah thlengin ka chungah hremna lek a ni dawn niin thu ka dawng zui ta a ni.

Hun rei tak chhung chu ka ngawi reng a, thu hla ka nei duh lo. Ka pa in thu awih tak leh tih nuam takin awm phawt mai rawh' min tih kha ka hrereng a, na ti viau mah ila ka chantawka khawrel a ni tih chu ka pawm tho a ni. He thil hi Kum nga a liam leh hnuah chauh a nihna tak hriatchhuah a ni a. Keimah anga insawi mi pakhat thil tih a lo ni a. Synod inrelbawl dan leh Presbyterian kohhran kalphung pawh hre ve tak thil tih niin kei min tihmualpho a tumna a ni lem lo a, a thahnem ngaihna leh thil diklo nia a hriat chungchang ka hming leh nihna hawha Synod hnena thlen a lo ni a. Thudik hailan anih hnu chuan kei chu kohhran upa ten ngaihdam dilin kan chenna In-ah ngei an rawn kal leh thlap nghe nghe a. Hun rei tak chhung biak In pawha kal tha ngam lo leh ka nihna zawng zawng hlipa mahni ka inphat ral raihna rah chu ka hmu ve ta chauh a ni.

Khatih lai khan a nihna takah chuan kei kha kohhran atanga hnawhchhuah kha commitee thurel dan a ni a, mahse ka nu leh pa an hmai zahna avang te pawh a ni ang a, tin keimah ngei pawh kohhranah tawnhriat ka neih tawhna te, kohhran tan tha leh zung tam tak ka sen ve tawhna-te an ngaihtuahin intuithlarna lehkha em chu min pe ngam an awm lo mai chauh zawk a lo ni.

Hun a liam leh deuh a, dan ngai bawkin damdawi In lamah ka kal leh ta tlauh tlauh mai. Ka pa chuan, "heti reng hi zawng a buaithlak em mai" tiin Private Doctor min ngaihtuah sak ta ngawt mai a, a hautak zualin sum leh pai lamah nasa taka harsatna ka tawh phah reng a ni. Ka sum inkhawl ve sa te chu ka in enkawlnaah ka hmang zo zel a, hna lah chu pangngai taka thawh ka nei der si lo. Rilru hah leh thlamuang lo reng rengin hun ka hmang fo thin.

Tumkhat chu Dawrpui vengah ka kal a, ka pa hmelhriat hian hnaruak tha tak mai, keima thawh thiam zawng chi a hriat thu ka pa hnenah a lo sawi hmuh a ni awm a, amaherawh chu a hun an tiam hun ni khata ka bawhpelh avangin hna chu ka chang ngei ang tih chiang lo deuhin ka kal a ni.

Dawrpui Traffic Point ep chiahah hian State Bank building hi a awm a, chumi bul maiah chuan a ni ka pa hmelhriat te chu an awm ni. In chhung ka lut chu In-a awmte chuan min lo chhawn nghal thuai a, "lo kal tawh ma muana i ni em? Min lo ti nghal sawk sawk a. Ka laka an inthlahrun sa em em danah ka hna beisei mek, ka kal chhan bera chu midang kutah a awm tawh a ni tih ka hrethiam nghal a ni.

A lo dik lah tak a, pu Thiamsanga chu a inthiam loin a inthlahrung hle mai a, ka hnenah chuan, "tlangval, i rawn tlai deuh alawm mawle, i pa hnenah khan a hun ka hrilh chiang hle si a" a'n ti a. kei chuan, "imm, ka ui viau nain a pawi lo ve, hreawm ti duh suh, keima thiam loh zawk hi a nia, treatment lak ka tul si a, palh thut inhuam a lokal ka ni hrim hrim a" tiin ka harsatna te chu pu Thiamsanga hnenah chuan ka hrilh ve a. A ni pu Thiamsanga pawh chuan, "ee, chuti na na na ngawi rih rawh, hnathawh tur dang tha deuh a la rawn awm leh em em ang. Ka ngaihven pui dawn che nia" tiin ka rilru hreawm lutuk tur chu min han thlamuan ve ta bawk a.

Ka la hrereng, kha mi ni khan a ni a ni hi ka tawn ni. ka nupui lo ni ta Hmingthankimi hi. Pu Thiamsanga te In bul maia State Bank awmah khan manager in a rawn awm thar a ni a, amah hi Aizawl lam mi ani nghe nghe. Saitualah hian tlangnel sa a ni lem lova, amaherawh chu sawi tak angin he laia Bank manager hna a ruah thu hi pu Thiamsanga hnen atang veka hria hi a lo ni a. Tin, pu Thiamsanga te nen hian hla deuh tawh mahse chhungkhat an lo ni bawk a.

Tichuan, ka Bank account chunchangah harsatna ka neih vangin pu Thiamsanga hnenah chuan ka harsatna neih te chu ka sawichhuak ve luam a, pu Thiamsanga chuan an nau Hmingthankimi chungchang te chu a sawi lang ta zel a, ka harsatna neih chu a niin a chinfel dan a hriat ngei a rin thu te min hrilh a. Tichuan, kei pawh chuan tum dangah 'hmelhriat sa te ngei chu' tiin an ni hi ka va pan ta fo a ni. Tin, Dawrpui hi Saitualah chuan a lun lai leh a pui lai ber hi a ni ve hrim hrim a, chung te pawh chu he lama ka tlat tam tak nachhan pakhat a ni.

Hmingi nen hian kan inngaizawng nghal mai bik lova, ngaihzawng anga kan in en tanna tak pawh hi pu Thiamsanga atang bawkin a ni. Hnaruak midang kuta a kal tak avanga ka laka a inthiam lo zahzel ni ta berin ka hria.

Kum 32 ka tlin Kumah tak kan innei a. kan inneih ni kha ka la chhinchhiah reng mai. Ka nu leh ka pa hmela hlimna lo lang te, ka nau nunkima phur hmel te, ka thian hlui biak ina pawha kal ngai tawh hlei lo kan inneih nia an rawn lang kim thap mai te. Kohhran lama ka member puite lah chuti bawk. Nu leh pa, a te ber atanga a lian ber thleng Khan nupui ka nei kha min lawm pui em em vek a ni. 'Nupui hmu chu thil tha hmu' tih kha a tak ngeiah ka'n tawng ve chu a ni a.

Kan nu hi hna lamah a buai deuh thin avang leh a chauh ve thin avangin In lamah pawh hian a chet tam hi ka phal ngai lo a, ka theih tawkin ka awl ve thin a. Tin, a ni pawh hi ka'n duat deuh chang hian chintawk hi a hre lo thin ve bawk a, remchangah a chuh thiam ve thin nangiang mai.

Kei kohhran lamah ka inhmang na leh tawh angreng viau mai a, khatia ka hmingchhiat vak hnu khan kohhranah hian nihna leh chanvo ka chelh ngai ta meuh lova. ka ngaihbel nge ni, mite min en dan chu hreawm ka ti thin hle, mahse, biak In han rah tawh chinah chuan kohhrana hnuhma leh sulhnu nei tha kan lo nihna avang hrim hrimin ka leng halh tho a, inkiltawih reng emaw ka tum bik chuang lo. A Kum a Kum hial a'n vei takah tiin kohhran lamah pawh ka tlangnel leh sarh tawh a. Tin, Ka phak tawkah Pathian tana ke pen chu ka lungkham ber a ni bawk a. Tin, Hun eng nge maw ti chhung biak in pawh rap tha ngam lova ka awm hnuah nupui ka neih atanga ka tharthawh that leh pawh ti ila a sual awm lo ve.

Ka thian dang te ang thovin tunah chuan tlangval ka ni ta bik lova, nupui nei, chhungkua tha tak din tuma hma la mek ka in chan ve a. A mak khawp mai, hman deuhah chuan upa thenkhat leh nu leh pa thenkhat sawi ka hre thawi tawh. Nulat laia hrisel lo deuh te leh natna benvawn nei te hi pasal an han neih hian an hrisel daih zawk thin a, nau an neihnaah thisen chhia tam tak taksa atanga a chhuah avanga hrisel ta phian ni ang ten an sawi ka hre tawh. Mipa ah erawh eng nge a an ka hre bik lo. Mahse, kha zeldin thu kha a dik anih te hi ka ring ta deuh. Hetia nupui ka'n neih tak hnu hian ka hrisel tha ta zek hian ka hria a, ka hlim a, ka lawm a, nun hi a thar a, beiseina leh phurna te, thathona te kha a lokir leh mek ni hian ka hriat phah nghe nghe a ni.

Nia, rilru lam Doctor te sawi dan pawh a ni a. Mipa, rilru lama harsatna nei te hi hmeichhe bula a khawsaka hun a hman tam hian a rilrua harsatna tam tak kha a kiang thei niin an sawi tlat a ni. Nia, hmangaih ber a ni em phei zawng ka chiang lo, a chhan chu hriatrengna a hliam hnuhma kha a reh mai bik si lo a. Mahse, ka beisei, ka nupui hi 'ka hmangaih ber' ka la ti ngei ang.

Pathian ni tuk a ni a, chumi tum chuan ka lung a leng hle mai a, ka u thih cham kan hnaih viau tawh. Ka u thlan tlawh ka rilruk deuh a, kan nu hnenah chuan, "hmingi, ka u thlan ka tlawh lawk dawn" ka ti a. kan nu pawh chuan, "e a ni maw, a thih cham kha a hnai tawh em kha? A lo ti vat a. kei chuan, "aw, kar khat chauhin min dang tawh" Ka lo ti ve mai a.

ka jacket lum chu ka ha a, pheikhawk bunin ka petek chhuak nghal thuai a. Kan nu chuan pawnah min rawn zui chhuak in, "i ti deuh vut sia, chhungkuaa han tlawh theih a va tha ve" a rawn ti a. kei chuan, "aa, ka lung a leng deuh mai a nia, tunlai ka tlawh khat riau a, ka rilruah a awm deuh thut mai mai" ka lo ti a. Hmingi chuan, "awle, nia tum dangah ka la tlawh ve ang, hnim te khan a bawh tawh lo maw" a'n ti ve luam a.

Kan Kum a la upa hauh lova, amaherawh chu KTP lamah kan hun hnuhnung kan hnaih ve zel a, chanchin duhawm lo tak ten min han tlakbuak lawp lawp mahse, Pathian tana ka theihtawp chhuah chu leia ka damlaia ka tih theih sang ber a ni tlat a. Chhungkaw lamah pawh buaina te, harsatna neuh neuh tawk lo kan ni bik lo, mahse harsatna leh hreawmna te, buaina karah Pathian rawngbawla hma lam pan zel dan hi ka zir thiam ve tan niin ka hria.

Hmingthankimi nen kan inneih atanga kum thumna anih Kumah chuan nau tê kan nei ve ta nge nge a, kan nau tê hming hi ka nu phuah ani nghe nghe. Khatih chhung, nu berin nau a pai thla kaw chhung zawng khan Pathian zarah buaina lian tham kan tawk lova, vanneihthlak zawkin keimah ber hi nu ber nau pai buaipui turin ka dam sen lul hlauh a. A nau neih nia ka hlim Zia te kha. Nau te piang min lawmpui tu lah an thahnem. Alo pianchhuah phat atangin kan fanu chuan mite ngainat leh lawm a hlawh nghal der a, hmeltha tih te, ngo tih te kha a va'n hlawh tak. Kei chuan a mit leh a hmuiah chuan a nu chiah chiah niin ka hria a ni. Mahse, kan fanu hian a nu leh pate hi min khum chiang hle awm e.

Hnathawh bik em em hi ka nei meuh lova, kohhranah ka inhmang nasa a, 'nihna leh chanvo hi ka hna chelh chu a ni mai e' ka ti fiamthu thin. He thu hi kan nu nena kan intawn hmasak ber tum pawhin fiamthua ka sawi kha a ni a, a ni pawh khan a lo nuih pui ve mai bawk.

Nau tê a lian ve zel a, hmingi pawhin a hna chu regular-in a zawm leh tawh a, keiin In lamah nau ka awm loh pawhin ka nu te hian min awm sak mai thin. A cháng chángin hnathawh tur ka hmuh ang ang thawkin ka chhuak ve fo a, tin nau kan neih hma chiah Kum, kan inneih atanga Kum hnihna anih Kuma in dang tawh hi kan ni a. Pathian zarah In luah tur zawn ngai lovin mahni sum sengin In kan khawr pum ve thei a, heng te hi Pathian hnena lawmthu sawina tham a tling reng a ni.

Kum tawp lam a ni tawh a, lal pian thla kan hnaih viau tawh. Ka fanu notei pawh Kum 4 lai a lo ni ve ta reng mai. A tet tê atanga kan chhuan ve em em thin a ni a, a hriatna te hi a pa ang lo tak hian a tha vei reuh phian a, lehkha thiam thei tak ala nih a, a nu leh pate chawimawitu ni tura kan beisei hi a sang ve thin hle. A hmelthatna te chuan tlangval te a hip lo chauh tawh a, a nu leh pa mitah chauh nilo Police venga mi te mit hmuhah ngei pawh chuan fanu duhawm tak zawng a va ni chiang em!

Kan nu chu Aizawl lama a nu leh pate tlawh turin amah in a zin a, a nu pi Lianhrimi hi a damlo a, a fanu hmel chu hmuh a duh a ni. Nia, hringnun hi chuan tawktarh hmangin min vehthlem hmasa tê tê a, a hnu leha min thawn thut hi a ching si anih hi maw.

Kan pafa chuan TV kan en a, ka fanu Notei chuan zawhna eng eng emaw hi min zawt awllo bawk. Keipawh chuan ka fanu fel reuh lutuk mai leh a nu ngai ang pawha a khawsa ngailo chu mak ti in, "bawihte, a nu i ngai tawh em? Ka'n ti mai pek a, a tul ber em phei zawng ka hre hauh lo. Mahse, kei chu chhungrilah hian eng nge maw hian mi tham er er reng tlat si a, ngaihthat lohna leh awm nawm lohna riau hi ka nei tlat a ni.

Chutia pafa a kan lo inkhawm melh melh lai chuan ka mobile phone chu a lo ri a, ka'n la a, lehlam atang chuan pu makima hian hlauthawng aw zet hian, "aw hello ma muan, vanduaina lian tak kan tawk tlat mai" a rawn ti nghal bawrh bawrh mai a. kei chuan, "aw eng nge ni ta, pu kim? Ka'n ti a. Chutah, pu makima chuan harsa tih hmel zet hian, "hei, tuirial thlen hma deuhah accident kan tawk a, vanduaithlak takin i nupui hmingi a boral!

Kei chu ka phu deuh zawk a! ka fanu ka phone hmang min lo en ran tu chu ka en a. Nia, a lem mai a ni, hei hi phuahchawp mai a ni. MUMANG mai mai a ni" Ka ti ka ti a, ka chhia leh tha hriatna te chu a chawmawlh hneh kher mai. Khami hnua thil thleng zel kha ka hrechiang ta lo, vai ruai ruai chungin ka nu leh pate chu kan vanduaina tawh chungchang ka hrilh nghal ni tain ka hria. A bak chu thawnthu phuahchawp ang mai a ni.

Ka nupui boral atanga thla hnihna a liam hnuah ka nunphung mumal lo tak ata chu ka harhchhuak ve ta a. Zan tinin Bible ka chhiar thin a, sam ziak bik hi ka ngaina a, a bikin mihringin a tawrhna lam hian ka lung a len ber mai.

Notei pawh hian a nu thih atang khan zan mut mai theih loh hi a ching ta tlat thin a, kei chuan lungchhe tak leh tah chhuak zet chungin ka fanu sama chul hliau hliauin nau awih hla ka sa zan tin thin a ni.

Ka la hrereng mai, a nu thih ni kha. kuang chhunga a nu ruang zalh ani kha a ni naupang â ta chuan hrethiam ve hek lo le. A nu, engmah hre tawh lo kha a be reng mai a, khami tuma kha laia awm te kha tumah hnuk ulh lo reng an awm lo.

Ni e, ka fanu hi kum li lai a ni ve tawh a, a fing var chi leh thil hrethiam hma chi a nih vei reuh nen, khatia mahni nu te ngei thihna in thawklehkhata a'n thawng thut mai kha zawng a rilru lamah nasa takin nghawng a nei ni ngeiin a hnu lehah ka hre ta a ni. Kei a puitling zawk pawh ka ât phah lo chauh a ni si a.

Tum khat chu Aizawl lamah In chhung bungrua mamawh lam turin ka thangchhuah a tul tlat mai a, ni hnih khat zan riah a tul si a, Notei ka ngaihtuah a, ka kalsan hreh hle. A chhan chu ka fanu nen hian kan inhlat ngai meuh lova, khawi lo ilo hmun danga a vah chhuah hlek te hian ka ngaithei lova, ka kiangah, ka bul hnaiah, ka hmuh phakah a awm reng anih loh chuan a pa hi ka awm thei lo a ni. Ka khua a har tlat zel a, ka ngai tlat thin a ni.

Ka nu te bulah chuan ka dah a, kei chu Aizawl lamah ka liamthla ta a. Hetih lai hi fur lai a ni a, fur pui ruah baw hawk lai a nih avangin hmun hrana han vahchhuah ringawt pawh thil chakawm tak a ni lo rêng a.

Aizawlah ni khat ka cham a, tul dang avangin zanhnih dang riah leh ka ngai ta hlauh mai a, In lama ka fanu nen pawh kan inbe ve reng mai. Notei chuan min ngaih tawh thu te, haw thuai thuai tura min duh thu te, eng nge ka hawn ang tihah ringawt te chuan a buai ve riau a. Keipawh chuan zan ka mut dawn apiangin tawngtaina nen uluk takin ka fanu tan thil tam tak ka dil sak ve thin a ni. A pain a pek zawh loh awh a la rawn nei ngeiin ka ringhlel hauh lo.

Kan khaw lamah ka haw dawn tuk a ni a, ka thawmhnaw te ka pack fel mek lai chuan ka mobile phone lo ri chu ka'n en a, ka nu a lo ni. "Mama, mama, vanduaina hi engati bik nge keini chungah kher hian a thlen thin le! Tiin a rawn tap nghal hawm hawm ringawt mai a. Kei chu ka lungphu a mumal lo lehnghal der tawh. "Ka nu, enga ti chiam chiam nge? ka'n ti a. ka nu chuan, "mama, nizan ruah sur kha i hre ve em? kha ti em ema a sur nasa kha ka ngaih a tha lo rêng a ni. In In kha ka ngaihtuah lutuk a" Ka thaw chu a tawp thut ni maiin ka hria.

Ni e, kan In sakna lai hi motor kawngpui an a ni a, kawng thlang lam niin leivung chhahna lai tak a ni. Tun hmain ngaih that lohna ka nei ngai lo a, mahse fur a rawn nih chiah hian thla a muang lo ta riau a ni. A thlang chu awih vek a ni a, In ding la awm tho mahse kan In chu leimin avangin a tawlh anih vaih zawngin a tlusawp hneh viau ang tih chu kei tluka hrechiang an awm bik kher awm lo ve.

Ina ka haw chu eng nge tih tur ber pawh ka hre lo. Kan in chu Assam type a nih avangin a thlang awih thui zet maiah chuan a dinna lei chawp chuan a tla thla a ni ber awm e. Tlawmngai pawl leh thenawm khawveng te an lo pungkhawm lat lat reng a, engtin zel nge kei ni pafa hi kan awm ve tak ang?

Ka nu te In-ah kan insuan lut lo thei ta lova, kan bungraw neih that ve ber ber te lah mit khap kar lekah heti an ni ta si a. Engkim mai chu a bul atanga tan leh a tul dawn niin a lang. Harsatna te, manganna te, buaina te, natna te kan tawk fo thin. Mahse ka chan chu rapthlak ka ti a, nausen pianghlim ang chauh niin ka inhria.

Bawihtei nu ka chan tawh a, tunah bawihtei nu nena hah taka kan din kan In neihchhun ve liau liau chu a tlusawp leh ta mai si a. In-ah tumah kan awm loh laia thil thleng a ni mah zawk a, nunna em kan inchan lova, vanduaina karah vanneihnate ni ve rawh se.

Zanah chuan ka fanu Notei muhil thei lo chu a mut hmuna a sama chul hliau hliau pah chuan, "Note, i muhil thei lo em ni? Ka'n ti a, a bak sawi tur a vang duh kher asin. Ka fanu duh tak mai chuan ka mitah chiang taka en in, "a pa, kei chu ka rilru a na" a ti chhuak hlawl mai a. Kei chu te chem chem hian ka inhria. Ni e, ka melh ngai chu ka melh vang vang a, tun ang hunah tak hi zawng han sawi mai tur emaw thil han tih mai dan tur hi a vang duh hle dawn a lo nih hi.

Ka engkim deuh thaw ka chan zo ta. Ka fanu chauh hi ka neihchhun a ni ta. Ka nu leh pa te nen hian. Mahse engvang nge heti em ema kan chunga vanduaina a thlen tak mai le? Ka u min boralsan ta kha ka ngaihtuah a, a ni tal kha la awm se mi han thlamuan dan tur a hre ngei awm si a. Ni e, alo mak ngawt mai. Tuna ka chan leh ka dinhmun hi a lem a ni hial zawk lo maw? Tu emaw thawnthu phuahchawp leh zeldin mai han ni zawk se. Mahse, a tuk khua a var poh a, tawnmang a ni hauh lo tih lah a hrechiang ber tur kan ni leh tho si a. Hringnun teh hrep hi!

Ka fanu nen chuan a nu thlan kiangah kan thu ngawi reng a, ka fanu ka hmangaih em em mai chuan, "a pa, a nu hi khawiah nge a awm ang le? A ti chhuak leh phawng thin a, a hmel chu ngun takin ka en a, hnuai lam a bih lek lek a, a hmel chu a nguiin a lungngai ve hle a ni tih ka hria. zawhna mak angreng tak mi zawh a hrat riau bawk.

Kei ngei pawh chuan han chhan mai ngaihna ka hre pek thin lo. "Note, ih, ih, i nu te chu vanramah a awm alawm. Natna te, lungngaihna te, tawrhna te a awm ve lohna hmunah" ka ti a. "A pa, a nu thlarau i tihna em ni? A ti leh a. kei chuan, "aw ni ang chu, nakinah kan la thi vek dawn alawm. Kan thlarau hi vanramah a kal daih dawn alawm," tiin lehlam chu ka hawi sawn thuai a, ka mittui tla tur chu ka fanu hmuh atan ka duh lo. Ka fanu hian a pa mit atanga chhuak mittui avang hian mittui awmzia a hriatthiam ka duh tlat lo a tin ni.

Kum thar February thla tawp lam a ni tawh a, kan In neih ve chhun leimin in a hnawl chhiat hnu atang khan thla hnih tha zen zawn chu a ni ve tawh. Chawhma kan inkhawm bang chu biak in choka-a a hnufual zingah ka tang a, KTP-ah hruaitu zinga mi ka la ni a, kan upa thenkhat te leh pavalai member te nen kohhran leh a behbawm dang dang kan sawi kai zel a.

Chutia thu hla kan lo chai laih laih reng lai chuan kawngkhar chu a rawn inhawng deuh thut a, ka rin loh lutukin ka nu hmel phawklêk tak leh mangan hmel tak chu a lo lang a. In chhung chu a melh kual ruai a, kei min hmuh takah chuan a kut chuan min hui vat a , kei chuan hmanhmawh takin ka thian te pawh hre chang lo lekin ka nu chu ka zui chhuak nghal a.

"Mama, Notei nikhua hre loin a tlu. Biak theih a nilo" a ti ta mai a! Ka nghing dawt a. Sawi mai tur ka haihchham lek lek mai. Chutah harhchhuak zawkin, "kal teh, ka nu" tiin hmanhmawh takin In lam kan pan ta a.

Ka fanu chu khumah a lo mu bam a, a mit chhingin nikhua a hre lo ni ngei tur a ni. A hmel ka hmuh khan ka fanu chu ka chanpual a ni rei dawn hauh lo a ni tih ka hrethiam nghal a ni.

Kei tak phei chuan ka lo hre ve hauh lo a, ka nuin a'n sawi takah chuan tun lo pawh tumkhat nikhua hre lovin a lo tlu tawh a ni awm e, mahse buaina lian tham awm lovin a harh tha ve leh mai a ni awm a. Kei chu min lo hrilh tha duh ngailo a ni awm e,

a bikin tun hnai chho hian pawn lamah ka buai hi a zual thin si a, ka fanu nen pawh hian hun hi kan hmang dun tam ta lo viau a ni. Mahse, kei ngei pawh hian ka fanu hmel leh tisa te chuan tun hma pha ta lo riaua hriatna hi ka nei ve tawh thin tho a, mahse hetia nikhua hre lova a tluk thu ka hriat takah leh mit ngeia ka'n hmuh takah hian ka fanu chu eng natna emaw avangin a tla hniam hret hret zel a ni tih ka man thiam ta chauh a ni.

Notei a harh hnu chuan Doctor kan pan nghal thuai a, Doctor te chuan ka fanu naupang mai chu thluak cancer nei a nih thu min hrilh ta mai a ni. A rang chi leh a hlauhawm chi niin an sawi leh zel a, chumi vang pawh chu a ni ngei ang kan inrin hman hma hauh a hetia min thawn tak thut mai ni.

Damdawi In-ah hun kan hmang chho tan ta a, Doctor te min hrilh dan khan beisei a awm meuh tawh lo niin a lang. A hmingin Chemo kan khai a, a na chhawk nan damdawi kan pe a, chu chu tihtheih kan neih chu a ni deuh mai. Chuti rum rum a Cancer natnain kan chhungkua min han thawng thut mai chu hrilh a hai a, chau rau ek thai an sawi ang maiin kan tlusawp zo ta a ni ber e.

Tuk khat chu ka lung a leng hle mai, ka nun hlui ka chhuikir a, naupang tê ka nih lai ata ka hrisel lo em em reng a, damdawi hnathawh avangin ka hriatrengna leh ka thil chhinchhiah theihna a tlahniam nasa hle a, ka lehkha zirna-ah nasa takin ka hnufual phah a ni. Kawng tam taka ka belh thin leh a thurawn ka dawnna thin ka u thihna in damlo khum beta ka awm laiin min thawng a. Rawlthar kan han ni a, ka beisei ngam ngai loh ka hmeichhe duh em em nen kan inngaizawng a, nupui pasala infawm mai tawh tura ka inngaih mek laiin phatsanna thu dengkhawng tak ka dawng zui leh a, ka hmangaih ber pasal neih ka chhim bawk.

Ka hrisel loh vanga zirna ka chawlhsan thu chu sawi loh a leng a ni. Mahse, Pathianin a rawng ka bawl rah min hmuh tir a, nupui tha tak ka phu loh min pe a, fanu duhawm tak leh hmeltha tak min pe a, In leh lo dina chhungkaw puitling din tura ka inpuahchah mek laiin ka nuna anchhia nge vanduaina zawk nia ka chhiar dawn ni, chu mangchhia bawk chuan min tlakbuak leh ta a.

Ka nupui ka chan leh a. Khami tum khan ka â lo chauh a ni. Khuarel chhiatna avangin kan In a tlusawp leh a, Ka engkim mai chu ka chan zo mai dawn niin ka hria, ka fanu chauh chu ka neihchhun a ni ta si. Ni e, khatih hun lai khan ka fanu Notei hi nei lo ni ngat ta ila zawng beidawnna vangin hruizen hi ka melh no viau ta ve ang. Tunah, tunah lehzel ka neihchhun chan hi ka duh tawh lo. Ka chanpual hi ka chan leh a nih vaih zawngin khawvelah eng nge ka tih tak ang? Eng nge neih ka neih ve?

Ka Mobile phone lo ri chu ka'n en a, ka nu chuan hmanhmawh turin min rawn tur nghal a. A tawngkam atang chuan ka neihchhun, ka fanu chu ka chan ve leh mek a ni tih ka hria. Ka hmanhmawh em vang chuan ka mi tawh apiang te chu ka su kat deuh nawk nawk hlawm a. Ka fanu awmna ward ka va thlen chuan pawnah ka chhungte leh thenrual thenkhat an lo tap khawm taih a. Ka nu chu a insut hlap hlap reng a, kei chuan mangang zet chuan, "ka nu, Notei dinhmun eng nge? Ka ti vat a, ka aw ka chhuak te reng chu a lawi chhe lo chang chang chauh a ni.

Ka nu-in rilru na taka a tunu kan chan mek thu min hrilh hnu chuan hrilhhai beidawng zetin hnuai lam ka bih reng ringawt a, sawi tur kan van tlang kher mai. Chutia ngawi renga mahni ngaihtuahna theuh kan kawm lai chuan nurse pakhat hi Notei awmna ward atang chuan a lo chhuak a, "mi pakhat lo lut ru" a rawn ti a. Chuveleh, ka nu chuan mangang zet hian kei chu min rawn en a, kei chu rang zet hian ka fanu awmna-ah chuan ka tleh lut ta nghal a ni.

Ka nupui ka chan tawh a, tunah ka fanu ka dawm hlum leh ta! Pa thil tih a zawnga ropui berah nge ka chhal dawn lungchhiatthlak berah? Ka hmangaih ten min kalsan zo ta! Kei hi tunge ka nih a hetiang thilin mi tlakbuak tak reng mai le! Tihtur ka la nei ve em ni? Ka ka atanga chhuak ngai lo vuina aw ka chu ka chhakchhuak ve mai dawn em ni? Nge ni, hringnun hi ka teh thiam lo zawk?

Khatia ka fanuin min kalsan tak avanga nikhua hre loa ka tluk hnu khan mu mal neilo-in ka khawsa reng a, Doctor ten uluk taka min enkawl hnuah ka TB natna chu a rawn langchhuak leh niin an sawi a.

Sulhnu hlui ka chhuikir a, ka nupui leh ka fanu, ka u Remruatsanga te thlan chu ka tlawh thin a, thlarau te khawvelah chuan eng nge an tih ve thin ang le? Keini hi min la hre ve a ngem?

Ka fanu thih atanga chawlh kar hnih zet zawt a liam hnu chuan kei chuan damdawi In lamah bawk hun ka hmang leh tawh. Ni khat chu thil pakhat ka ngaihtuah a, Kei hi thi ta ila khawnge ka kal ang?

Ka mutna khum vei lam sirah chuan tukverh a awm a, tukverh parda chu nurse hnenah zar kiang turin ka ti a. Tukverh atang chuan Aizawl khawpui chhung chu a pe ut mai a, ral leh lama romei zing te chuan lung min len a ni. Van boruak te chu ka thlir a, kan nunhlui ka chhuikir a, ka thian hlui, ruihhlo avanga mual liam ta te, min hmangaih tu ka nu leh pa, ka u Remruatsanga, ka nupui duh tak min boralsan ta te, ka fanu notei nen.

Chutah, ka mobile phone, ka bula mi chu la in Gospel hla pakhat hi YouTube-ah chuan ka'n hmet chhuak a, chu hla chu ka'n ngaithla a, 'khawvel hrut chhuak ila lal Isua ang hi' tia zaipawlin mawi taka an rem chuan ka hringnun mangchhia a khat chhanna chu min pe niin ka hre ta a ni.

A Tawp Ta.......

Link:
BBcode:
HTML:
Hide post links
Show post links
ADVERTISEMENT (A hnuai a milem hi a nia hmeh zeuh tur chu)
Post Reply
  • Similar Topics
    Replies
    Views
    Last post

Who is online

Users browsing this forum: April Hmar Liverpool and 1 guest