Hmeichhe ṭawng duh ve tak, rual pâwl thiam tak a ni a. A harhvangin ṭhian a ngaina em em bawk a, mi han fiam zeuh zeuh te hi a thiam in huat awm si huat hleih theih si loha mi fiam dân tâwk a thiam a. Ṭawng duh viau e ti lo hian mi pawi sawi zawng erawh chuan a ṭawng duh miah lo thung. A rîk hawr hawr avang leh a awm huat huat avanga ngei a hlawh tak ka la hre ngai lo va. Mipa chu thuhran, hmeichhiate hi chuan insawi neuh neuh leh mi chanchin chhe lai sawi hi an peih a, mahse kan Lalnunhlimi erawh hi chu a hmeichhiatpuite pawhin an ngaina in a bula awm nuam an ti vekin ka hria. A bikin KṬP thiltih khawm nikhua hian a hriat leh zual, a awm loh chuan a reh a, a chanchin tal sawiin kan nuih pui ṭhin. A nun hlim lutuk hi midangte hian kan hlimpui vek a ni ber.
_________*_________*__________*_________
Hun kha leh chen Lalnunhlimi hi ka lo hre ve tawh a, ani pawhin min hrechiang khawp ang. A hma zawng kha chuan ka lo phek en mai ṭhin. Mahse tunah chuan a danglam zo ta, a mizia, hawiher leh engkim hian min hneh a ni chêk ang chu! Ri phawr phawr in ho halh angin lang mah se zahawm rûkna riau a nei tlat a. Hmeichhe ri phawr phawr hi ka ngaina ngai miah lo, mahse Lalnunhlimi hi chu a danglam tlat. Mi hneh theihna riau hi a nei a, a hmeichhiatpuite hi a thuhnuaia dah hauh si lovin a thû an awih thei riau leh nghal. Ngaizâwngtu a neih àwm ka hre ngai lo va, a hmelchhiat vang leh a ngaihzawn awm loh vang anih chu ka ring miah lo. A hmêlṭha in a hmeichhiatpuite lakah pawh a langsar nalh si a. Mi zawng zawng hi a ṭhian kawm vek vâng pawh a ni mahna. Keipaw'n a tirah kha chuan hetiang lam hawi hian ka en ngai lo hrim hrim. Mahse tunah zet zawng, a laka ka rilru puthmang danglam ta tial tial hi ka pha thei hauh lo vang.
Nun tihlimtu Lalnunhlimi
By CVL.Awmpuii
Chapter 1
Mizo te hian kan hun tawn a zir zela hming sak kan chîng a. Kan pi leh pute hunlai ata tawh hming sak hi kan uluk in kan la urhsùn hle a tih theih àwm e. Hming pu zo tak tak an awm laiin "Lalrinawma" tih hming pu rinawm miah lo te, "Lalnunmawii" tih hming pu nun tleu em em si te pawh an awm nawk a, "Lalrawngbawla" tih hming pu te lah hi sual rawng an bâwl uar sauh zawk emaw tih mai tur an ni hlawm a. Mahse kan Lalnunhlimi erawh hi chu khawvela hming pu zo ber thlang chhuak dâwn ta ila, amah hre tute chuan kan thlang fur in ka ring. A hming hi a pu zo a ni satliah lo va, 'Lalnunhlimi' tih hi a tá a ni tawp mai.
Hmeichhe ṭawng duh ve tak, rual pâwl thiam tak a ni a. A harhvangin ṭhian a ngaina em em bawk a, mi han fiam zeuh zeuh te hi a thiam in huat awm si huat hleih theih si loha mi fiam dân tâwk a thiam a. Ṭawng duh viau e ti lo hian mi pawi sawi zawng erawh chuan a ṭawng duh miah lo thung. A rîk hawr hawr avang leh a awm huat huat avanga ngei a hlawh tak ka la hre ngai lo va. Mipa chu thuhran, hmeichhiate hi chuan insawi neuh neuh leh mi chanchin chhe lai sawi hi an peih a, mahse kan Lalnunhlimi erawh hi chu a hmeichhiatpuite pawhin an ngaina in a bula awm nuam an ti vekin ka hria. A bikin KṬP thiltih khawm nikhua hian a hriat leh zual, a awm loh chuan a reh a, a chanchin tal sawiin kan nuih pui ṭhin. A nun hlim lutuk hi midangte hian kan hlimpui vek a ni ber.
Tunah pawh KṬP brick thiar hnatlâng neiin kan inhlawh a, fiamthu a thawh leh nasa tawh mai. An nuih pui hawk hawk a, kei fiamthu duh lĕm lo, nui tam lo tak pawh ka khi ve suk suk mai. Min rawn hmù fuh a ni ngei ang a tih ṭhan dân ngai tê in min fiam zui leh hlak a. "U Hluzual, i nuih ve dâwn ro ro chuan nui ve hawk hawk rawh, khi suk suk lo khan" a rawn ti pek a. A sawi ang tak takin ka nui chhuak nghal hawk a, midang pawh chuan min lo fiam zui ve bawrh bawrh a. Lalnunhlimi hian ngam tlâk loh pawh a nei lo, khawvel hi a tá emaw a ti ni berin ka hria. Kei ang mi ṭawng tam lo leh nêlawm loh lutuk pawh min fiam sek ngam a, haw àwm tak ka nih laiin ka haw thei dér lo. Hmeichhe ri huat huat hi ka ngaina lĕm lo va, mahse ani hi chu a dân a dang tlat. Tu huat mah a kai lo a tih theih ang.
Hnatlâng kan chawlh lai chuan thingpui a rawn sem veleh hman tawh a. Brick kha a thiar ve tun tun emaw tih laiin engtik lai khan nge eitur siam ho bulah a lo va kal ve hman ka hre hauh lo. A thingpui rawn sem pah te chuan a la uang cheu a, midang a ngam tlâk ang chiah hian midang pawhin an ngam tlâk a, an fiam bawrh bawrh ṭhin a. A haw ngai bîk lo. Tunah pawh a ṭhianpa pakhatin a lo fiam ve hlut a "Lalnunhlimi hi chu hmêlṭha in han chhelo ve viau ṭhin mah la i star awm loh ve ngawt mai. Ri huat huat ṭhin lo la, mipa hîp turte hian awm ve ṭhin rawh" a ti lùng lúng a. Pakhatnu lah chuan ngeiawm rawng kai lek lek hian "Hmeichhe hîp tura i awm chung paw'n an duh na che nge?" a lo ti ve zat a. Midangho chu an lo nui dar dar a, anni pawh inmelh rum viau mah se an inhaw lo tih kan hre tlâng vek àwm e.
Hnatlâng kan han bâng chu mahni in lama haw turin kan in mangṭha sap sap hlawm a. Nunhlimi bawk chu a lo uang leh pek tawh a, "KṬP hnatlâng e ti lo hian pasal lo ûm daih mai ila, ka chhungte ngaih ka ti ṭha lo àwm ma'nge" a tih chuan nichina lo fiam hlut tu Lawma bawk khan "An lâwm viau zawk ang, úm turte i hmuh zawh ve chuan" a lo ti vat a. An han inhnial uang leh bap bap a, haw mai tawh tur si kha an pahnih hnialkhan hre lutuk avang chuan kan han tawi khawmuang leh rih a. In ka thlen meuh chuan zan dár 12 a lo ri thuak tawh mai.
Ka inbual zo ka mut hmâ chuan KṬP Group-a kan hnatlanna thlalakho an rawn dah chu ka en veleh thuak thuak a, ka lanna te pawh a lo awm ve nual mai. Lalnunhlimi bawk chu a tam leh ber a, a ṭhen chu uang thuang deuh taka hnai zeta an lâk sakna te a ni a. Henu hi chu tupawh a ngam a, tupawh in an ngam ve a ni ber. Group-ah chuan an inhnial zui leh bap bap a, Nunhlimi an perhna thû te a ni fur a, ṭhenkhatin amah tiphûr tur tâwk lekin an lo ṭan ve bawk a. A châng hi chuan an ti thiam ka ti dâwn nge, a fiamthu an duh êm avang hian an sawisa zui chiam ṭhin ni berin ka hria. 'Bâwl' tih ṭawngkam chu a mawi chiah lo ang a, an fuih ka ti thei zawk mah ang chu!
Zingah chuan zân lam hnathawk ṭhang lo tih takah ka tho chu ka sil ṭhûm a, ka Nu chuan a lo hre lâwk nge ni damdawi ei turin min ti nghal vat a. "Tlangval ṭhalai si hna rum i thawk ṭhang lo ve bawk êm a ni, i hna chawlh ah chhawr deuh hlek i ngai anih kha. Khatiang leka han sil ṭhûm mai chu a tlangval hna lo emai" a ti zui barh barh a. Hnial lĕm lovin ka nui suk suk ringawt a, a sawi dik ve reng. Ka tleirawl chhuah hlim kha chuan ka Pa hnathawk ka pui ve ṭhin a. Mahse tun hnu hian a hminga sawrkar hnathawk te lo nih ve tâk ah chuan hna rum lam ka ti ta vak lo kha ania. Hun ka neih loh bâk ah a lo ṭul teh chiam tawh lo bawk nen ka thâ a zawi phah te pawh a ni mahna.
"Hluzual, i nau admission chu vawiin lamah i lo tifel thei ang tiraw?" tukṭhuan ei laia ka Pa in a rawn tih chuan "Thei ang" ka lo ti ve mai a. "I hman dâwn loh chuan keimah pawhin ka ti ve thei tho ania aw" Kimtei chuan a lo ti vat a, "Ka thei ang" ka lo ti leh charh a. Min ring zui ve ta mai bawk aniang engmah a rawn sawi zui tawh lem lo. Mahse ka Nu in titi dang a rawn vawrh zui tâk ah chuan a rawn tuihnih veleh zat a, an titi zui luam bawk a. Ka pa nen erawh chuan châw kan lo ei mial mial thung a. Pafa inchhun fuh ngang hi kan ni a, midang pawhin an sawi fo rêng a ni. Kan ṭawng tam lo va, thu pawimawh bâk hi chu kan sawi vak lo a tih theih ang. Kan unau hi pali kan ni a, û pahnih, mipa leh hmeichhia ka la nei a, nupui pasal neiin chhungkua an din ve ve tawh a. U Mawitei te chu Aizawl-ah tho hian an awm a, mahse kan vêng a inhlat ang reng viau. U Muana te erawh hna vangin Khawzawl lamah an awm thung a. Hun pui hi kan inhmuhkhawm theih chhun chu a ni deuh mai. Ka nau chiah, kan tê ber ni bawk Kimtei hi chu kan unau ah a piang tlai fâl deuh hlek a, ka chhang chiah a ni na in kum 9 laiin kan inthlau a, college a kal ve dâwn ṭan chiah a ni. A naupan fâl avang hian kan duatin a pangchang thiam em em a. Mahse ka Nu strict zarah duat sual kan tih ang erawh kha chu a ni hauh lo thung. A tê ber a nihna erawh a lang fo a, a tih loh chinah chuan luhlul ve ngít ngêt ṭhin tak a ni.
Ka office bân veleh Kimtei admission tih sak tur chuan PUC lamah ka tlang nghal a. Vanneih thlâk takin hmanni lawk khan entrance test a paltlang ve hlauh mai a, buaipui lutuk ngai miah lovin a college kalna tur chu kan tifel ve thei ta hram a. An zirtirtute ah ka hmelhriat an awm ve nual avangin min lo be luam hlawm a. Ka tihfel hnu pawh chuan lêng a min sàwm deuh tlat avangin ka ṭhu khawmawi veleh rih a. Ka hna chungchâng min zawh chuan ṭha takin ka chhang ve zel mai a. Kan ram inrélbàwl dân a an ngaihdân te an sawi liam liam hnu chuan ka haw hman ta chauh a. A hminga sawrkar hnathawk lo ni ve ta fam chu hmelhriat ṭha hmun tin deuh thàw ah kan nei ve zul a. A ṭha lamah ka ngai hmiah mai. Dik lo taka thiltih nan erawh chuan hman ka tum hauh lo thung.
"U Hluzual" ràl aṭanga min rawn au thâwm ka hriat rual chuan ka hawi vat a, Nunhlimi chuan nui sâng hian bân min lo vai khum a, ka lam panin a ṭhiannu pakhat nen an rawn inzui zat bawk a. Car ka lût mai tawh tur chu ka han ding leh rih a, ka bul an rawn thlen rual chuan "Eng nge hetah i tih a?" a lo ti hà a, "Kimtei admission ka rawn tihsak a" ka lo ti ve mai bawk a. Ka zawh ngai lĕm lovin an thiltih te chu a sawi ve nghal zung zung a. A ṭhiannu nen chuan an B.A result an lam hi a lo nia, "I ti ṭha em?" te chu ka'n ti khawmawi veleh a. "Naa...result te chu a chhuah daih tawh kha, Pass lawmpuina thû te pawh kan KṬP whatsapp group aṭangin ka dawng ve fer fur a. Khangte kha i lo hmù ve miah lo em ni? A mak e" a ti nghal bawrh bawrh a. Ni dâwn tak, Mizoram pumpuiah Economics subject bikah a top 10 ve tak kha mawle, "Ni dâwn tak e, pasarihna tiraw i nih kha?" ka han ti leh hnuhnawh a. A hmui a lo tipawrh nasa mai, ka hriatsual àwm ka hre tawh bawk si lo. Mahse "Parukna" uar zeta a lo tih tâk ah chuan ka hre sual leh pek tih ka hre nghal a. Zà lo zet hian ka ṭhen khum ta ringawt a. A ṭhiannu chuan "I haw tawh dâwn em?" min lo ti ve khauh a. "Ka tum dân chu ania" ka lo ti ṭha veleh mai bawk a.
A ṭhiannu chuan min hre ṭhin a ni chêk ang chu, min biak dân aṭang chuan hmelhriat loh pawh a ang lĕm lo. Mahse ka la hmuh ngai àwm ka hre miah lo va, mak chu ka ti ang reng viau. Nunhlimi chu rawn ṭawng chhuak veleh in "E anih chuan haw vat rawh, kan lo be khawtlai zo che anih chu" a lo ti hluai a. Chhâng tawh lem lovin ka car-ah chuan ka lût zui ve mai bawk a. "Anih u aw" te chu ka tih ve kha! Ka tlân chhuah hnù fê chuan harh chhuak thutin an haw ve dâwn leh dâwn lohte kha lo zawt ila, lo phur haw ve mai ila ṭha tur ania tiin ka ngaihtuah leh hnuhnawh a. Mahse ka harh chhuak tlai hret a ni, an lo beisei ru ve mai thei bawk a. Zialo ka ti hnuhnawh khawp mai.
In ka thleng ṭep tawh tihah office lam aṭangin phone call ka dawng leh a, kan office tifai ṭhin tu Pu Liana hnen aṭangin a ni. Ka lâk rual chuan ka file pawimawh, hawn tur ni àwm taka ka dah chhuah sa chu ka theihnghilh anih leh nih loh min rawn zawt nghal a. Kimtei admission tihsak a lo ngai bawk nen ka hmanhmawh luatah in lama ka file khawih tur ka lo hawn theihnghilh chu niin! Office lama ka lêt leh nghal tur thû te chu hrilhin min lo nghak zuai turin ka ti a. Ka va thlen chuan min lo la nghak ve ran a, lâwmthu hrilhin a haw nghal dâwn leh dâwn lohte chu ka zawt a. Ka tih khawtlai vek a ni a, a haw nghal tur thû a sawi chuan "Ka lo thlah ang che" ka ti a, "Ngawi rawh, ka tibuai mai mai ang che" ti ve bawk mahsela a inthlahrun vang a ni tih ka hria a. Ka phur ta tho a, a awm nawm nan ka be luam bawk a. Ani pawh a inthlahrung rei bîk lo, a titi ve bawrh bawrh a. Ka hnathawh dân chungchang rawn sawi a min fak tâk ah chuan läwm viau mah ila ka awm thiam chiah lo.
"Naupangtê ni si hian nang hi chu i puitling a, in lâk na leh chapona i nei lo. Aia upa leh i aia senior zawkte i zah thiam in i inngaitlawm em em a. In office-ah hian hnathawktu satliah ve tak ni mah ila engmah hi ka hmuh hmaih bîk lo ania. Officer biak nuam deuh leh fel deuhte hi chu ka hre ve lutuk. Office rawn dawr tute zingah pawh fak i hlawh teh ania. Lo ṭang sauh sauh rawh aw" a ti luam a. Sawiselna ai chuan fakna dawnsawn hi a nuam zawk a, chutihrual chuan miin min lo fak der te hian ka zak a, chhan ngaihna ka hre ṭhin lo. Chutiang chiah chuan Pu Liana pawh chu chhan ngaihna ka hre lo. Ṭawngkam thiam loh nen ka fawm a, mahse office-a min lo dawr tute ho hi chu ka be thiam em em tho bawk si. Ka hna a lo nih vangte pawh a ni mai thei a ni.
Pu Liana bawk chuan "I chîmlìm tehlul nen vawiin tlai chu theihnghilh i nei ve teh mial a, i inhmeh lo ngawt mai" a rawn ti leh daih a, a nui pah bawk a. Keipawh lo nui ve suk chung chuan "Nia mawle, ka nau admission buaipui a ka kal tur khan ka rilru a la pêng ve êm a ni" ka lo ti ṭha ve mai a. An in thleng ka thlah hnu chuan keipawh in lam panin ka tlân haw ve nghal a. Pu Liana min fakna ṭawngkam te chu ngaihtuah zui loh a har, ka tán ai mah chuan ka Nu leh Pa te ka chawimawi ve niin ka hria a. Chu chuan min ti läwm in ka rilru a hahdam veng veng mai. Ka Nu hian kan naupan lai ata tawh a sawi fo ṭhin a, "Eng ang mi pawh niin eng ang dinhmunah pawh lo ding ula, midang tana hnawksak zawng leh midang hrehawm tihna turin khawsa ngai suh u. Midang tán a hranpa in malsawmna in va ni thei lo pawh a ni thei, mahse a hnawksak zawnga in awm lohna kha midang tán malsawmna in nih theihna kawng chu a ni mai" a ti ṭhin a. Min chah uluk ṭhin bawk a, ka vawng ta zel chu ania.
KṬP inkhawm zân a ni a, Kimtei nen pawh inkhawm ve ngei tumin kan insiam a. Ka insiam zawh hnù chuan rei fê ka nghak a, a rawn hman lawk thei lo lehnghal a. Hmeichhe ho hi eng em em nge maw an tih ṭhin ni? An insiam rei theih dân em em hi a nihin a ni lo reng reng. Ka Nu in a lo tŭr ve sek tâk ah chuan a rawn chhuak ve thei ta hram a. A insiam rei tehlul nen eng he hu a nih phei chu ka hre lo, mahse a duh dân thlap in a rawn chhuak chu a ni phawt ang. Kimtei ka nghah rei zarah ṭan hma chuan hla pakhat chiah kan va sa ve hman a, pawi ka ti em em chuang lo.
Tètté aṭangin kohhran hi kan bêl tam ve ang reng a, langsàr le lu lo mah ila mite hriat pawh kan hlawh ve viau chuan ka hria. Ka Nu leh Pa te hi ringtu ṭha tak an ni a, phâk ang tâwk in an fate pawhin an hnung kan zui ve ṭhin. Nihna chanvo chelh langsàr erawh kan nei lem lo va, Branch Committee member -te chu ka ni ve a. Ka Nu leh Pa pawh Kohhran hmeichhia leh Pavalai pâwl ah chuan chutiang bawk chu an ni. Ka Nu leh Pa te hi primary sikul zirtirtu pension an ni ve ve a, chhungkaw khawsak lamah pawh kan harsa lĕm lo. Hausa lutuk tih tur erawh kan ni hauh lo va, chapo leh inchhuang thei kan ni chuang lo. Pathian malsawmna kan dawng nasa a, kan unau hian zirlai kan ti thei phian hlawm a. Kan hunlai ṭheuh ah chuan a thiam thei pâwl kan ni ve zel ṭhin. Inkhawm e ti lo chuan thil ka lo ngaihtuah nasa deuh nge ni thusawi mumal pawh hre hman lovin kan bâng ta mai a. Kan thusawitu chuan a sawi rei lo hrim hrim bawk a, minute 15 vêl bâk zu han sawi lo va mawle.
Inkhawm bân veleh Kimtei nen chuan kan haw zui nghal a. Kan in leh Biakin hi a inhlat lutuk lo va, inkhawmna ah hi chuan motor kan keng ngai lĕm lo. Kawngah chuan Kimtei titi siam siam chu ka ngaithla a, "Û, U Helen-i nen khan in inṭhen tak tak tawh em ni?" a rawn ti hlawl a. Thudik taka chhang in "Ṭhen e" ka lo ti ve mai a, sawi thui vak ka duh lo. Amaherawhchu kan inṭhen tih tal hi chu hre hlawm mah se ka pawiti lo, ka duh dân tak a ni hial zawk ang chu. "Mipa dang a lo kawpsan tak tak che em ni? Ka ṭhiante hian an sawi duh riau a, 'I û hi a lakah inthiarfihlim daih rawh se, U Helen-i chu a zak theilo si. Mipa in lêng a ngah theih bâk ah amah hi a chhuak reng a, mipa hrang hrang in an phur kual ṭhin' an ti a. A ni tak tak em? I hre ve em?" tiin, ka ngaihtuahna tur pawh dâwn lo lêk chuan min zawt zui leh zat a. Chhân dân tur a vâng kher mai, nau te bula bialnu hluite rêl chiam leh midang chungchang sawi hrim hrim chu ka duh lem loh avangin "Kan inṭhen a ni tawp mai" tih zawngin ka chhang a. A hrethiam ve deuh nge ni min zawt zui ta bîk lo.
Muthmunah chuan Helen-i chu ka ngaihtuah zui a, rilru nat ai mah chuan mipa ka nihna ah tlâwm thlâk ka ti a, ka thinur thar leh a ni ber. Kha leh chen kan lo inzui ve tawh a, min lo bum nasa khawp mai. A laka ka rilru puthmang a danglam ta hlauh chu ka lawm, keimah ngeiin ka man chhuak pawh kha tlâwm thlâk viau mah se bum nih reng ai chuan ka lawm zawk. Vawi tam chetsual theihna hun kan nei a, ka Nu leh Pa te fuihna thû vawng nung renga ka lo khawih hman lo hlauh te pawh kha ka lawm. Lo khawih ta ngat ila chu mipa tam tak sulhnu ka chhui dâwn tihna a ni si a. Hmeichhe ten neih hi a mipa zia lo ka ti viau na in ka bialnu hlui Helen-i erawh kha chu ka ten takzet! Kum hnih chhung teh meuh ka lo kawp pawh kha ka ngaihtuah lêt hian tisual ka inti hnuhnawh ṭhin.
Tlangval kum upa lutuk ka la ni hran lo va, Pathian zarah lehkha ka thiam theih avang leh sikul ka kal hma avangin hna hi ka nei hma a. Kum naupangte in IRS officer hial ka ni ve a, vanneih thlâk takin ram pâwn a awm ngai lovin Aizawl khawchhungah ngei ka post hlauh bawk a. Nakin hun chu sawi thei lo mah ila tunah rih chuan ka hnathawh hi nuam ka ti a, nakinah chuan ram pâwn ah te pawh min la post ve mai thei a ni. Mite'n 'Naupangtê a officer ni thei' an tih ngat kha ka ni ve a, inchhuan pui chiam duh lo mah ila ka lawm ve ṭhin. Kum 27 chauh ni chunga officer ni ta kha ka ni ve tlat a, ka hnathawh ṭan kum phei chuan kum 25 chauh ka la ni nghe nghe kha ania. Chhungkua leh vêng tihmingṭhatu ti a sawi ka ni ve a, a chhe zawnga insawi ngawt ai chuan a lawmawm ve teh asin. Mahse khawvelah hian chapo tur khawpa mi sâng kan awm lo va, eng thil mah hi chapo pui ka duh ngai lo.
Ka ngaihtuahna kal ding lai tak chuan ka phone chu a rawn ri a, zan rei tawh lam anih avangin thil pawimawh anih ring in ka ban nghal a. Mahse caller ID ka en rual chuan ka ner nghal nawk mai, "Helen-i", ngai pawimawh duh lovin ka lukham bulah chuan ka khup leh nghal thuk a. Zanina ka nau in a rawn sawi chhuak pawh kha tih tawh tehlul nen chutia min rawn call zui chuan ka thin a tirim nghal hlur mai. A rawn ri leh a, ka silent ta daih. Ka rilru lehlam chuan chhân lêt hrep a duh a, mahse a mipa zia lo em mai ti rilru chungin ka insum hram hram a ni. Khati khawp khan mipa dang nen an khawsa lai ka phawk chiang a, phat buaina tur a la zawng char char ngam te hi mak ka ti. Ka ṭhen fel hnu ah pawh min la rawn be buai zel peih chu ania. Tun hnu a ka ngaihtuah tâk chu, kan inkawp ṭhin lai khan a mizia a lo thup nasa hle anih ka ring.
Zêp thû a chêng lo, kan inṭhen tirh kha chuan keipawhin ka ngai a, ka pa thlahlel ve ngawih ngawih. Mahse midang nena inṭáwm theih hmeichhia hi ka duh lo va, ka chapona zawng tak a ni ve tlat a. Chuvangin ka ngaih ber lai pawh khan ka tuar chhuah hun nghakin ka be lo lui ve ngat ngat kha ania. A insawifiahna ngaihthlak sak pawh ka duh lo, khatiang khawpa chiang khan ka man a, insawifiah vak ngaiin ka hrelo. Nupa êm chu la ni lo mah ila min uire san angah ka ngai ve tlat. A nulat lai pawha invawng hlei thei lo chu ka nupui a nih hunah pawh a invawng theiin ka ring chuang lo. A hranpa a piantharna tak tak a chang te anih ngawt loh chuan. Helen-i chungchang ringawt chu ngaihtuah duh lovin ka lu ka thing nawk a. Thla ruk dâwn kan inṭhen ve tawh a, tunah chuan ka ngai tawh hran lo.
Zîng ka tho chu zan lam ka mu ṭha lo bawk nen ka rit luk mai a, mahse ka hmai te phih a ka han inthin harh tâk ah chuan ka zàng hawk mai. Room aṭanga ka chhuah hma chuan ka phone chu ka check thuak a, number hlang aṭangin message ka dawng teh nawlh mai a. "U Hluzual, keimah Nunhlimi ka number hi lo Save ve rawh aw" tih tê mai hi a lo nia. A enga mah hma in ka'n nui ringawt pek a. Lalnunhlimi chezia chu ka nuih chhan a ni, a number save tura min rawn ti satliah ve maiah ngaiin ka Save ve ta poh a. Ka nêlawm loh tehlul nen min nêl lui ve tlat hi mak ka ti a. Ka ngaina ru riau bawk, mipa leh hmeichhia kan nihna ah ni lovin mihring mihrinna in ka ngaina.
Inrinni anih avangin office kan châwl a, awm mai mai ang chu ka tih laiin tukṭhuan ei lai chuan ka Nu in tih tur min tuk sak a, naupangchhia ni nghal lo chuan! A hmaa min chhawr a tum thû a sawi kha a lo ti mai mai miah lo hi a lo nia. Awm mai mai ai chuan tiin ka pui ve ta poh a, a hmanna tur leh ṭangkaina tur sawi chat si lovin kawmthlang lei chu min laih phut tir ta chiam mai a. A hmanna tur ka zawh lah chuan "A awm mai ang" a lo ti mai a. Awmze nei lovin min chhawr hrep ka ti mai, tharum thawhna lama che ngai lo ta chu ka thlan a tla nghal bawrh bawrh a. Ka thâ a fei lo viau bawk. Mahse mipa ka nih avangin han chawlh vêl chu tlâwm ah ka la ve tlat a, ka zawh hma chu châwl duh lovin chhun thil ei tura min rawn koh pawh chuan ka la lai fat fat a. Chawhnu dár hnih velah chuan a sawi ang tak chuan ka mai zo ta hram a. A lungawi hmêl khawp mai. A chhunga lei ṭha chu a la nghal zung zung a, a plants khawina atana hman tur lêk chu lo niin! Hetiang lei ṭha te chu laih vak loh pawhin lei tur a tam tehlul nen ka phun bul bul a. Mahse ka Nu chuan "I ti zo vek tawh tho alawm, i thawk ṭha lutuk ringawt. Khati kha chuan i taksa pawh a hrisel sawt ang" a lo ti mawlh mawlh a. Ka chhâng zui tawh bîk lo.
Chuta ṭang chuan ka fit loh zia hre tharin zing exer lâk, kum khat dâwn ka lo chawlhsan tawh chu ka han bei ṭha leh a. A tirah chuan ka thei lutuk lo, ka hah hma lutuk a. Mahse thlà khat dâwn ka beih leh tâk hnù chuan ka zia chho leh ta khawp mai. Ka taksa leh ka vun pawhin a ngeih a ni chêk ang chu, Kimtei chuan a sawi ve zauh zauh a. Pâwn chhuah fo ai chuan tiin Exercise equipment pawimawh zual ka tih hote chu in lamah ka chah a, treadmill leh dumbell ka chah a. Kimtei a lo phûr khawp mai, tuktin exer min lâk pui ta ziah a. Kan bei ngawrh dûn ve ṭhin khawp mai.
KṬP week kan hmang dâwn a, kan inbuatsaih mup mup a. Keipawh Biakin lamah ka tam veleh ta khawp mai. Office ka kal tih loh chu Biakin ah ka tap deuh chawt a, mawhphurhna eng eng emaw ka kovah an nghat ve nual si a. Hlen chhuah ngei tumin ṭan ka la ve zel a, ṭhiante leh hruaitute puihna zarah ka bengvar ve zel bawk a. Week lo awm tur chu kan nghakhlel tlâng khawp mai. Kimtei pawh an group aṭangin zai ngai lo inzai siama tel turin an lo theh chhuak ve tehmial a, a phûr viau ang chu ka tih laiin a lo zak nasa mai a. A la naupanna a lang a ni chêk ang chu ka Nu leh Pa te bulah a duh loh thû sawiin a lo zualko pek a. A naupanchhiat thlak ang reng ka ti khawp mai. Ka zilh phah ta ve nge nge a, "KṬP intih hlimna a ni a, i kovah mawhphurhna an dah ngam anih chuan hlen chhuah chu i tih ve ngei tur a ni. Khatin naupangchhia ang maiin ṭap suh, hetiangte chu huata lâk tur pawh a ni hlei nem, i ã mai mai emai" ka ti a. Ka Nu leh Pa te pawh chuan "Ṭha deuhin i hlen chhuak zawk dâwn ania, mi puitling zia a ni zawk ngai" an lo ti ve bawk a. Mahse amah ber chuan "Min hmuhsit vang" a ti deuh tlat pek a. Kan inti lui thei ngút ange maw? "Nangmah leh nangmah i in hmuhsit vang mai mai anih kha. La thutak lutuk lo la, intih hlimna pakhatah ngai rawh. Khatiang zawng khan ngai tawh reng reng suh, i kova tla chu i hlen ngei tur a ni" ka lo ti leh charh charh a. Min la hnial pang pang tho mai. Mahse hmin ngei tumin ṭan ka la a, zir pui ka intiam tâk tlut tlut ah chuan a lungawi ve ta nge nge a. Zaithiam lo hulhual a ni bîk lo va, music pawh a man ve fu a, a tihzia phian e.
Inbuatsaihna tâwp zân ah chuan Hall-ah ka va enpui veleh a, an group member hruaitute an lo awm ve nuk bawk a. Kimtei zai chuan an lung a dum ve hle in ka hria. An Leader chuan "A zaithiam mai kha ka ring rêng a, lo inhmang ṭan tir ve ek ek te an ni si a. Anmahni tih phur nan leh tih tlângnel ve nan chanvo pêk kha ṭha kan tia. A lo ti hlawhtling thei tur hlauh chu a lawmawm" a ti mawlh mawlh a. Kimtei lo rin dân leh an hruaitute rilru chu a lo inpersan kher mai. Hetiang hi ka rin ruk sa tho a ni a, mak pawh ka ti hran lo. Hruaitute hi Pathian ruat dik tak an lo ni ngei e.
Naktuk zân lama kan sound hman turte mipa ṭhenkhat in kan check fel lai chuan piah room-a thâwm lo awm leh hak ṭhin chuan ngaihtuahna a la pêng lo thei lo va. Hmeichhe rual, zà zeta nui thâwm a rawn awm leh huk ṭhin a. Bâwl-a chu a va dâk ta nge nge a "Ka rin ang chiah, Lalnunhlimi bawk a lo ni leh ta" a va ti hlut a. "I lo tel ve châk anih kha" pakhatnu lah chuan a lo ti ve zat a. Bâwl-a pawh chu a lût zui ta nge ni a rawn phei leh ta miah lo va. Ka bula la awm hote chuan "Lalnunhlimi awmna hi chu thâwm a ṭha tlat zel" an lo ti a. Nunhlimi chu an sêp zui chiam a, "A hmêlṭha ving veng reuh sia, a ã buang buang bawk si, a bula awm a nuam riau alawm" pakhatin a lo tih lai chuan "Hmêlṭha viau mah se a ngaihzawn awm loh ve êm a ni, mipa zawng zawng hi a Unaupa enin min en vek a. He nau hi chu tihngaihna a awm hlawl lo. Ze nù zím zêm, ṭawng tam vak lo chu nise mipa thinlungah a tla na khawp ang" pakhat chuan a lo ti ve luam a. An sawi dik reng mai. Nunhlimi hi a hmêlṭha a, fel pawh a fel, uang thuang viau mah se a puitling lo chuang miah lo va. Thutak hunah chuan a thutak thei fu, mahse tuman ngaihzawng enah an en tlat lo. Mipa pawh hian an ṭhianpa treat deuh vek a, nuih an ti zà ṭhin.
"U Hluzual" ka mu tur chu Nunhlimi hnen aṭangin message ka dawng hlawl a. A number ka Save aṭanga min rawn biak lehna hmasa ber a ni. "Umm" te chu ka va ti ve bawk a, a chhiar hnu fê ah chuan "Bialnu i nei em?" a rawn ti deuh tawl mai. Ka nui huk nghe nghe a, he nau hian eng nge maw a hriat ni? Eng rilru nge ka put pawh ka hre lo, ka fiam châk tlat pek a "A ṭul dân azirin ka neiin ka nei lo thei" ka va ti a. A reh zui vang vang mai, ka chhan dân avang chuan min hlau ta mai ang tih ka hlau leh hnuhnawh a, ka lerh hmêl tlat. Va chhan ṭhat leh mai ka tum lai tak chuan "I neih loh a ṭul" a rawn ti khauh a. He nau hi, a rilru ka tihbuai ka rin vei nen ka rilru a rawn tibuai ta daih mai. "Eng vangin?" ka va ti a,"Chhan ṭha tak a awm" a rawn ti ringawt a. He nau hi! Lo chhaih viau kha ka tum ania, min tibuai lêt daihin ka hria. Chutiang min zawh chhan chu ka hre châk ta khawp mai.
"A chhan chu?" tiin ka va zawt leh a, a hmù reng, mahse min chhang zui ta miah lo. Rei fê chu min rawn chhân leh mai ka nghak a, mahse min chhang ta miah lo. Zingah chuan a message a awm leh awm loh ka en nghal vat a. A lo awm bawk si lo, engvanga khatiang thû min zâwt kha nge a nih ang? Hre châk lo nih duh sateh mah ila ka hre châk tlat anih chu!
___________*__________*_________*________
(He thawnthu hi a thui lutuk lo mai thei a, mahse a ṭul dân azirin kan pawt sei thut thei bawk. Chapter hmasa ber a ni a, a bulṭan hi ka harsat thei khawp mai a. A chhunzawm leh zelna chu hei ai hian a ziaawm deuh turah ngai ang u aw. Comment section lamah in ngaihdan ka lo ngaichâng e
)Show post links
Top