NUN_TIHLIMTU_LALNUNHLIMI BY By_CVL_Awmpuii (Completed)

[ngaia]

Nun tihlimtu Lalnunhlimi
By CVL.Awmpuii



Chapter 26



"Nunhlim..." nuihza insûm ṭeuh chung chuan ka ti sup a, min lo kuah nghet sauh sauh a. "Min enteh" ka ti leh sup a, hetiang taka kan vawikhat awm dunna hi a ni a. A zak chu ka hrethiam lutuk, mahse a zah lutuk chuan hrehawm a ti lutuk ang tih ka hlau a. Inngaizawng inkârah chuan hetiang thil hi chu a mikhual lo. Mahse Nunhlimi tán chuan thil thar vek a ni.



"Zah theih loh hmêl deuh si hi i zakzum reuh lutuk a" ti leh sup in a hnungah chuan ka chûl hauh hauh a. A rawn hawi chhuak ngam rih tlat lo a ni. A kawr hâk lâi pawh a âwm báwr ah a la inhnawl tawm chho vek a. A taksa lawng leh ka kawr a insi thlap a, mipa hrisel ṭha pangngai tán chuan danglam loh a harsa. Kan thiltih zawh chiahin a lo zir bawk nen hrehawm tak a ni.



"Hetia i awm reng chuan ka insum zo dâwn lo ania" ka ti ta hawk a, a lo îp chawih mai. Ka ṭawngkam lang tlang lutuk avang chuan a zâm leh viau tawhin ka ring. Chutah zawi muang hian a rawn inlahrang ta a. Min melh lovin a kawr chu a siam ṭha nghal sawk sawk a, a hmui a pet a pet mai. Lungawi zetin ka lo thlîr vung vung thung a, a lài hmêl leh zak hmêl te chu hmuhnawm ka ti tlat pek anih chu!



"Nui reng suh" a ti bak hlar a, a aia nasa in ka lo nui chhuak nghal hawk hawk. Nichin anga boruak uap zet khan kan awm tawh lo va, kan haw mêk a ni. Ka car khalh lai chuan ka lo nui leh vur vur ṭhin a, a ngaihdan a ni ta vak lo aniang min rawn hau ta nge nge a. A hma ang khan a lài ṭha duh tawh lo va, Nunhlimi dik tak ang khan a awm leh tawh. "I nuih leh chuan ka chhuk ang" a lo ti vin leh hrak a. Ka va melh zawk a, min lo melh rum ngang mai.



Kei lah chuan chhaih kawlh ka lo châk zual sauh a, "Ka rin aiin a lian daih a" tiin a âwm báwr chu ka va melh zeuh a, a lo inhup rang lutuk. "I ninawm emai aw U Hluzual, khatianga min chhaih reng dâwn chuan engmah ka tih pui tawh lo vang che" a lo ti bar bar a. A nin hmêl tak tak. "A lehpek i lo beisei nghal ani maw" ka ti leh hrâm a, nghal min tih hmêl ngang mai. A ṭawngkam in a daih tawh lo ania nge ka motor khalh ṭha hle hle mai chu ka bân puamah min rawn chûm ṭawk a, vawikhat mai pawh duh tâwk lovin vawinga lai min chûm ṭawk ṭawk a. A kutthlak lah chu amah phû lovin a na zek lehnghal a. Ka nui hawk hawk tih lo chu ka chhaih lui tawh bîk lo.



"I mumangah min lo hmù la, harsatna i neih chuan min hrilh la, i tán ka awm reng tih i hre dâwn ania. Mahni insitna leh hrehawm tihna te kha nei tawh lo la. Keimahah innghat tawp la, min ring tâwk ang che" ka ti charh charh a. An in kawtah kan ding reng tawh a. Inchhunga a lût tùr chu thu ṭha ka fah mawlh mawlh a. Zanina kan bulṭan leh nemnghehna ni àwm ang hrimin ka fawp leh hrâm bawk a. Ka thu hrilh te chu uluk zet hian a lo ngaithla a, a bu nghat nghat mai. Thû a awih zui leh viau paw'n ka ring chuang lo.




"Mipa dang hnaih loh tùr..." ka tih rual chuan ka rilru ah Apuia hmêl a rawn lang nghal a. "Tih chhan neiin ka sawi aw" ka ti leh churh, ka sawi awmzia chu a hrethiam aniang a lo ner nang a. "Ka ṭhianpa alawm" a tih lai mêk chuan " Mipa ṭhian neih vêl kha ṭul ka ti lo, keipaw'n mipa chauh ka kawm hi. Hmeichhia kawm tlat ta ila i duh bîk lo vang" ka lo ti hmuk a. Apuia thlavang a la hauh deuh reuh tlat ni a ka hriatna chuan min ti lungáwi lo leh lek lek mai. "Kawm loh tawpte chu a har ve alawm. Anmahni'n min lo biak ṭhat tlat si phei chuan " a ti niah niah a.




"I laka a rilru puthmang i hriat kha, beiseina thlawn siam sak hauh suh ang che" ka lo ti leh churh a. Hei chu ka thîkna vang lam pawh ni lovin ka rilru tak tak a ni. Kan duh miah loh tùrte hun khawhral sak hi thil ṭha a ni lo va. Hmalam an pan mai theih nan ṭha takin kan lo hnar mai tùrah ka ngai. Kan hnar chung chung pawh a min lo la tibuai lui ṭalh anih chuan kan thiam loh pawh a ni tawh lo. Mahse zuam awm hian awm duh miah lo ila, thil pawi lutuk chu a thleng bîk lo vang.




"Kan va hlim vur vur ta hlê mai" Msa chuan a rawn ti lût nghal hluai a. Ka room kawngkhar kik miah lovin a rawn lût tlang leh ringawt tawh. Kan in ngam tlâk a, kan tih loh dân pawh a ni lo va, keipawh an ina ka lèn chuan ka lût tlang ve tawp zel a. Kan in ngaimawh hran lo. "Eng nge i lo tih dâwn a?" ka phone chu dahin ka lo ti vat a. Nunhlimi nen whatsapp-ah kan inbia a, a message hi zet zet ka lo nuih pui lai tak ania. Phone bih paha ka lo nui vur vur chu a awmzia a rawn hrethiam ve nghal mai aniang.




"Eng vak nge maw ka rawn tih ang le? In chanchin ngaihven tùrin ka rawn kal a. Mahse i hmêl landan khan a sawifiah vekin ka hria" tiin ka khumah chuan a rawn ṭhu nghal zat a. "Kan sawifel tawh a, ka lâwm tak tak a ni" thup lêm lo chuan ka lo ti ve sup a. "Anih chuan zanin chu min lèn pui hman dâwn lo a ni maw?" a tih chuan " Lèn pui pawh i ngaih loh kha a, i zak hlawl lo" ka lo ti nghut. Anni inngaihzawnna kara lo awm ve kha ka peih tawh bîk lo. An inchhaih reng a, an inngam tlâk in min zah sit set bîk si lo. A tàwpah an pahnihin min sawisa leh ang a, a ṭawngkam thiamlo zawk chu ka tlâwm lehpek ang a. Kan awm dân tur ka hre lâwk vek.




"Anih chuan lèn pui i duh em?" a lo ti veleh,"Ngai lo" ka lo ti vat a. Ka chhâng rang lutuk chu awmze nei zet hian min han nuih leh kher a. Hepa pawh hi a duhna ah chuan a sual ve mawle. "A hma zawnga min mamawh hlê si kha tunah lêm hnawmhnawk kan chang ta a" a ti kual vêl a, "Hneawm lo teh" ka lo ti nghut a. A nuih lah chu a han za thei em em khawp a.




"Inneih vat in tum ang a" kan uan reng lai chuan a rawn ti hlawl a, a thutak leh viau tawh. "Ka hrelo le" ka lo ti sup, bul kan ṭan leh chauh a ni a chutiang ngaihtuahna hun pawh ka la nei lo. Mahse nupui neih hi chu ka suangtuah ve ta fo mai. Ka nupui atân chuan Nunhlimi hi ka iai lo hle bawk a. Engtik ni ah emaw chuan neih ve ngei chu ka la tum alawm.



Msa chuan "Palai kan tir ve tawh mai dâwn emawni ka tia" a rawn ti leh hlawl a. "Keimah maw?" ka lo ti hu, innei vat tura min nawr a tum emaw ka lo ti hman a. Mahse "Ni lo, keimah" a lo ti nghut. "Engtin nge maw i palai tùr ka lo ngaihven ve ngawt ang le?" a ti leh hluk a. Nunhlimi ringawt ka lo ngaihtuah ṭhin hi chu a buaithlak a ni. Ka rilruah kan pahnih inkar ringawt a awm a, a chungchang a sawi pawh ka lo man lo a ni.




"In va hmanhmawh ve" ka sawi tur hrelo chuan ka lo ti sup a. "Kan inzui rei ve tawh êm hi, a hun ve tawh hliah hliah zawk alawm" a lo ti hluai a. A dik ve tho mai. Mahse keini aia innei hmasa zawk tura ka ngaihtuah chuan ka ngai ngam lo ringawt pek a. "Tlangval i kham lo ange aw" te chu ka tikual leh vêl a. "I fate'n ka fate an ngam dâwn lo" a lo ti thung a. Kan insawi el chho ngar ngar mai. Mahse a hnù deuhah chuan palai tirh mai a duh ve tawh thû te chu thutak zet hian min hrilh zui luam a. Zartei paw'n pawi a tih tawh loh thû te pawh a sawi.



Ka ngaihtuahna a lo luahkhat deuh nge ni Nunhlimi nen kan hmalam hun tur ka lo suangtuah zui veleh chiam a. Tlangval senior ti a sawi tùr chu la ni chiah lo mah ila kan hnathawh te'n a lo zir deuh nge ni upa ve deuh tawh turah hian min ngai zel hlawm a. Ṭhenrual ṭha te phei chuan min han hmù hi "Engtikah nge mo kan läwm dâwn?" an lo ti leh ringawt zel a. Ninawm a chan chângte a awm ve ta lek lek mai. Ka Nu te pawh hian ko an awt tawh tih chu ka hria. Nunhlimi sawi pui ve chhin reng reng chu ka rilruk ta ringawt pek a. Keipawh hi ka phûr ru riau a ni. Ka hmangaih a, ka nupui atân pawh a duh ngei a ni tih hi ka chiang ve viau tawh.




"Over tak khan va khawsa lo la, lungáwi lohna tùr ka hmuh vaih chuan i hre viau ang" Nunhlimi message chu nui vur vur chungin ka chhiar a. "Fel deuhin ka awm ang, mahse hlawh ka phût aw" ka va ti lêt ve a. Nghal min ti leh ngawt ang.



Tunah hian Pu Liana te inah kan awm mek a, Remi kaltlanga a nupui in min sawmna kha ngai pawimawhin office staff remchâng ang ang te'n zanriah kan kilpui dâwn a. Chawei dâwn chauh a kal ai chuan tiin hna kan bâng hma a, an inah chuan kan tlang nghal a. Kan thlen tirha rilṭam vak si lo kha an ei siam rim hriat tâk ah chuan a ṭam ve ta raih raih khawp mai.



Nunhlimi lah chuan Remi nen hmehbel theih tùra kan awm hlau in min rawn vau sek a. Huat ah pawh ka la phal lo, ka laka thîk thû a pe chhe ve lutuk te chuan min ti làwm daih zawk. "Remi chu a chhelo em?" a rawn ti leh vêl a, "I chhelo zawk" ka lo ti khauh a. Ka fakna chu haider in "In inmelh no vêl viau lo maw? A no ngher ngher si" a rawn ti leh kher a, a sual thiam ve ngawt mai. "I no ngher ngher fe zawk" ka lo ti leh mai a. Min chhaih thinrim dân phêt a rawn zawng a. Ka duh lo lutuk tih hi a hrechiang tawh bawk nen chu chu remchângah la in min chhaih char char mai.


"Remi eisiam tui tak kan ei dâwn anih hmêl sia ka phûr tawh mange" ka va ti ve ta kher a. Engtin tak min rawn chhâng lêt ang maw? "Aw phûr rawh. Zanah pawh rawn lêng suh ang che" a rawn ti hmak mai. Min chhaih thinrimna tur a zawn nasat nen ka vawikhat chhaih lêt ve zeuh pawh a dàwl dér si lo ka nui hawk hawk a. "Ka fawp nek mai ang che" ka va ti tawl a, "I duh leh Rulremi kha fawp rawh" a rawn ti vêl a. A thîk ve nasa chiang alawm.




Ka thawhpui dangte'n min lo biak tâkah chuan ka phone chu ka ak ṭha ta vat a. Office pâwn lama chhuak e ti lo chuan hna chungchâng bâk sawi tùr kan hre lehpek chuang lo. "U Hluzual, khawngaihin helamah hian min rawn pui lawk thei ang em?" rawn titu chu Remi a ni. Ka hawi vat a, midangho an awm ve khup si a hnial chî a ni lo. "Eng nge ni a?" ka tih chuan " Laklawh deuhin gas a rawn zo thut a, thlâk lawk a ngai a. Tuman kan thiam si lo va" a lo ti zung zung a. Choka lamah chuan ka zui phei ve nghal mai bawk a.



"U Liana vek khan hetiang lam hi chu a ti ṭhin a, kan lo thiam ve pek lo alawm mawle" Pu Liana nupui chuan inthlahrung tak hian a lo ti sawk sawk a. " A harsa hlei nem, ka zirtir ang che u" tiin an gas chu ka fit ṭhat sak ta mawlh mawlh a. Tih dàn tùr ka hrilh pah zung zung bawk a, thil harsa a ni lo bawk nen an thiam ve mai tùr ah ka ngai.



Ka thawhpuite ṭhutna lama ka va lêt leh chuan thil dang sawiin an lo titi leh daih tawh a. Pi Nemi bulah chuan va ṭhu in min lo bekbawr nghal sar sar a, "Remi nen hian eng emaw a awm ve deuh reuh em ni?" a lo ti sep a, min chhaih deuh niin ka hria. Ka chhàn hma chuan kan thawhpui zinga phawk ve tak pakhat hian "Remi nen hian in ni chiang mai" a rawn ti ve zat a. Pi Nemi zawhna kha a lo hre fuh ve emawni ka ti hial. Min dem rawn ta luih luih a, Remi chhungte hlei hlei chuan an lo hre fuh palh ang tih ka hlau.



"Bialnu ka nei alawm" ka lo ti ta sup a, "Inthup nan chhuanlam i siam mai mai aniang" min la ti ṭalh. Min chhaih laklawh ta vêl mai mai niin ka hria. Mahse chu ringawt pawh chu duh lovin "Bialnu ka nei tak tak alawm, kan Vengah" thutak zet hian ka ti leh charh a. An awih lo ngam tawh bîk lo. Mahse zawhna eng eng emaw min zâwt zui hrâm a, ka sawi hreh záwng tak a lo ni lo bawk nen an awih nan chuan tiin ka chhâng ṭha ve zel mai bawk a. "Ka awih lo e" pakhat chuan a rawn ti leh hrâm, "Kan inneih hunah i hre mai ang" fiamthu ti tak deuh hian ka lo ti ta hlut a. An nui dar dar mai. "Kan ring che aw...khati em em a inla bialnu nei chu i nei tak tak a ni chêk ang. Hluzuala pawh kha i ang tawh hlei nem le, i zak lo thei riau" pakhatin a rawn tih veleh chuan kan nui uar sauh a. Min fiam zuk zuk hlawm a. Remi min dem rawn ai chuan ka pawiti lo tawp mai.



Zanriah chu dár 4 velah kan ei ta a. Pu Liana nupuiin hunserh a hmang hmasa tê tê a, an chhiat tawh avanga kan puihna zawng zawngah hahipin làwmthu a sawi mawlh mawlh a. Eng kan tih loh nen a lâwm thiam lutuk chuan min ti inthlahrung lek lek a ni.



Zanriah kan ei lai te chuan min han duhsak thiam khawp a, ṭawngkam ṭha in min be reng bawk a. A lawmawm rual rualin themtlengtê ang maia Remi lo inrawlh ve sek chu ka ngai thei dêr lo. A chhûngte chuan min dem rawn se ti ni awm takin min ngaihsak bîk zia a lantir reng a. Min nêl hmêl tak hian min lo be ve sek bawk a. Mi pangngai tán chuan biak chhiat ngawtna chî a ni bawk si lo. A chhûngte chuan min hmehbel palh ang tih mawlh ka hlau.




"Remi hi chu a fel in a zuan te hi a zâng khawp a, kan nau mah nise kan chhuang ve teh ania. A eirawngbawl deuh vek ania vawiin tlai pawh hian in ei" Nu pakhat chuan a rawn ti sawk sawk a. "A thiam tak hle mai, kan ei tui tak tak a ni" Pi Nemi chuan a lo ti ve vat a. "Hluzual, i eitui maw?" Nu pakhat bawk chuan a mimal in min rawn ti leh kher a. "Tui khawp mai" te chu a ti ve hluai a. Mahse ka rilṭam ngaihtuahin ka ei hlei thei lo, a tui loh vang chu a ni hauh si lo. Ka chhehvel ami te vang anih hi ka ring ta ber.



"Nitin i ei duh chuan ṭan u lâk thiam a ngai ang" tiin an chhûngte zinga tu emaw ber chuan min lo fiam zeuh a. A ni em em tawh lo ti rilru chungin "Kan Nu a la tluk lo hret" tiin ka ṭhen suk a, min ngam mah mah tlata ka hriat vang a ni. Fiamthu mah nise Remi rilru puthmang ka hre ve vek a, min hmehbel tùr anga awm pawh ka duh eih lo. "Ehee pa i ni tawh maw?" mak tih hmêl zet hian an lo ti nak nak a. "Tlangval hnahkhat ngat a la nih hi, mahse ani chu midang tán a rem tawh lo va. Mo kan nei thuai ang" ka chhàn ngai lovin Pi Nemi chuan min lo tih khalh zung zung a. Ani hi chu nu fing leh felfai thlarh mai hi a ni a. Nichina ka vawikhat sawi aṭang khan ka awm dàn lo man thiam nghal vek anih ka ring.




Remi chhûngte ṭawngkam pawh tunah chuan ziaawm ta deuh e. "Mo lawm hunah chuan kan lo kal ve ngei a ngai dâwn anih chu" an lo ti nak nak hlawm a. "Ka sâwm nghal vek che u ni rawh se" phûr tak hian ka lo ti ve hluai a. Nupui nei hnaivai tak takte pawh ka ang zo vekin ka hria.



"In inkar a ṭha tawh tihna maw?" Remi chuan a rawn ti zawi sep a. Kan haw tùr pâwn thleng min lo thlah a, midangho an inbiak buai nak nak lai chu remchângah la in an hriat loh tùr chuan min lo bia a ni. "Kan ṭha reng alawm" ka lo ti churh a, ka âw chu a nêlawm viau loh ang. "I lakah hian thil thup tam tak pawh a lo la nei thei asin" a rawn tih chuan ka melh tur nghal khui a. Khati khawp khan dawt thû hmangin kan inkar buaina a thlen tawh a. Ka chhuahchhal tawh chung pawh a chutiang ṭawngkam a la chhak chhuak ngam chu mak ka ti kher mai. "A thup chinte chu ka hriat a ṭul lo a ni mai ni" fiah fek fawk hian ka lo ti fuk a. Mi pangngai tán chuan ka treat dàn hi zahna tham a ni tawh. A lo pangngai lo hlê anih dâwn hi.



Kan han haw fel chiah chu ka boruak tawn a lo rit viau nge ni ka thaw huai a. Remi chungchângah chuan amah mai ni lovin a chhûngte pawh kha hnaih lo tawp ila a ṭha ber dâwn anih kha. An sualin ka pawi an sawi vâng lam pawh ni lovin eng emaw hlekah beiseina an nei ang tih ka hlau. Remi thu vaivir thiam zia lah ka hai der si lo. A chhûngte lah khan an ringin an han chhuang em em mai khawp a. Tlang deuha sawi chuan an fanu tán khan min kherh ngat ngat peihin ania ka rin ni. Ka ngaihtuahna chu ṭul lo ti zetin ka lu ka thing nawk a. Hetiang lama ngaihtuahna lo sen vak vak leh zeldin thu bâwl hi chu a hmeichhe hna emai.



Zanah chuan Nunhlimi te in a lêng turin ka inruahman sar sar a. Ka kal dâwn chuan text-in ka va hrilh a, min rawn chhân hun nghak tawh lêm lo chuan ka inkhalh chhuak ta nghal a. Ka lêng dâwn tih a hre sa tho a, harsatna a awm lo tùrah ka ngai. An in ka thlen hma hret chuan dàwrah pêng kawi in a eitur leh Duatpuia lawm zawng eng eng emaw ka lei kawi hram a. Hetianga tih hi ngaiah ka nei tawh a, ṭul lo ti viau mah se ka nuam tih ber pâwl a ni tlat tawh a ni. Anni paw'n thil pangngai ve rêngah min ngaihsak tawp tawh.




An in ka va thlen chuan an lo awm kim leh ṭhap tawh a. Nunhlimi pawhin hmêl nung sarhin min lo chhâwn a. Vawiin tlai ka hun hman dànte ngaihtuah chuan thinrimna tùr a lo hmuh leh hman tawh ka ring kha ania. Mahse chutiang lam chu a lo ngaihtuah lo hlauh anih hmêl. Duatpuia paw'n min lo bawh nghal chûk chûk a, ka thil kensak te chu pe in a khek raih a. Kheh tura min tih chuan ka kheh sak ve nghal mai bawk a.




"Duatpui, khati khan tih tawh loh tur ka tih kha" ka phone a rawn ban rual chuan a pa in a lo khap vat a. Duatpuia chuan mitmeng khawngaih thlala zet hian min lo melh kiau a. "A pawilo a pawilo, khalh mai mai rawh se a tichhe bîk nang" tiin ka phone chu keimah zawk chuan ka lo pe vat a. An in ka thlen ruala ka phone min lo chuh thak hi a chîng riau a. A chhungte hian hau ve bawk ṭhin mah se naupang tih takah a sim thei dêr lo. Ka duat tih a lo hre ve bawk nen ka bulah phei chuan a pangchang thiam ve viau tawh. "Hauh lah hian awmzia a nei lo sia maw...a pangchang thiam ṭhin lutuk te hi fate mah nise ka vêl châk ṭhin ania" Akimi chuan a lo ti ve hlak hlak a. An inthlahrun vâng leh ka mitmei an vèn vâng tih ka hriat avang chuan "A tleina anih te chuan khalh mai mai rawh se, engah mah ka ngai hlei nem" ka lo ti ve sawk sawk a.




Duatpuia chuan ka phone chu a khalh mu ta ṭhak a. Dár 9 velah chuan min mut san ta hlawm a, Nunhlimi nen chiah kan awm dûn leh ta rân mai. "I bialnute nena chawei khawm chu a nuam em?" a chhungte an mu fel ta maw tihah chuan a lo ti kher a. "Ka hnek ang che" ka lo ti hluk, a nui hak hak a. "I haw ve sia, a âtchilh ropui mai che sia" a ti a. "I thîk anih kha" ka lo ti thung a, a rawn ṭeu nghal hlar mai.



"Nang tehlul an lo duh ve ngawih ngawih che hi ka thîk peih tawh lo. Mi duh loh chu ka duh bîk ngawt hlei nem. Ngaizâwng tute hi nei miah lo ta la i chhiat hmêl ngawih ngawih dâwn lutuk asin. Kârah hmêlma te hi hrang bawrh bawrh mai se kan luck hmêl bîk riau alawm" a lo ti bawrh bawrh a. Zanin a thu lâk dàn zet chu zan dang a ang lo riau. A thîk thu a chhiat theih nen ka han chhaih thinrim dâwn takngial pawh chuan a thîk thâ duh tlat lo. Min la chhâng hnehsawh thei em em mai lehnghal a. "Ka seh hrep mai ang che" tiin a biang ah chuan ka piai ta vak ringawt a. A la haw em em zui a, ka seh châk tak tak a ni.



"Tak taka enteh hei vawiina ka thlalak dawn" tiin a phone chu ka hmaizawnah a rawn lek va va a. Ka lo bansak vat, ka han en nak chuan vawiin lama Pu Liana te ina kan chêt tlatna vêl thlalak hi a lo ni a. Pakhat mai ni lovin sàwm vêl zet a lo nei a. "Engtin nge i neih a?" ka lo ti hu a, min enthla turin mi a rawn tir emaw ka ti hial mai. Mahse "Engtin nge ka neih theih loh ang? Rulremi a awm alawm" a lo ti kha fak a. A ner deuh nang bawk a, Remi chu a ngei hmel takzet a ni. "A va mak, a rawn thawn che tihna maw?" tiin ka lo chet hluk a. Nunhlimi chuan "Min rawn thawn loh i ring reng reng emawni? Nangmah veng tur hian spy hranpa ka lo mamawh reng reng hlei nem. Ka tih ai zawng zawng Remi'n min chhawk vek anih hi" mei nei zet hian a lo ti zat zat a. Remi chu a thîk tawhlo tak tak anih hmêl.



"A awm dân em em hi mak i ti zozai ve ngawt lo maw?" ka ti ta thlawt a. Ka chunga a chêt dàn hi chu min duh luat vangah ka puh thei mai a. Mahse Nunhlimi lehzel a lo va la tibuai ngat ngat peih chu mak ka ti. Kan sawi dun ve te hi a ring zozai lo emawni? "Mak pawh ka ti tawh lo, hmeichhe zak theilo na laileng te hi chu an lo zak theilo êm a ni. Tunlai chhanah phei chuan mi pasal te pawh tihbuai an hreh tawh lo ania. Chuta kara mi bialpa mai mai chu an tibuai hreh lo tawp ang. Hmeichhiate hi kan duh záwng neih nan chuan kan lo in phah hniam thei khawp anih hi" a lo ti duah a. "I luhlul êm kha" fiamthu ti tak deuh chuan ka lo ti khauh a. Ka nui pah suk bawk a, a huat tùra sawi ka ni lêm lo.




"Kha kher kha chu i cho chhuah anih kha" a lo ti hmak. "Buaina lian tham nei leh ta ila min ṭhen hlen duh tak takin ania ka rin ni" ka tih chuan "Ṭhen nal nal nghal ang che mawle" a lo ti awlsam thên a. Ṭawng liam puat mah se a ti duh tak takin ka ring. "Pawi lo, Remi a awm tho alawm" ka lo ti fiamthu ve hlut a. "Chhechhawng inkawp in ni mai dâwn ani" a lo ti awlsam thên leh reuh sia. Chhaih thinrim tum zawk si kha chutia min chhaih tâk rengah chuan ka titau ta lek lek zawk a. "Khilai ve zeuh mai rawh" nui rah rah chunga a tihte phei chuan ka melh rûn rûn tawh. A va han nghal mai mai tak.




Ka haw dâwn chuan pâwn thleng min thlah a, inchhung lama che na viau tawh si kha pâwnah chuan ka fawp leh hrâm a, chhanna pawh ka dawng ṭha kher mai. "Lerh lo la, mipa dang hnaih loh tùr. Mipa ṭhian neih vak pawh a ṭul lo, ka awm a, a tâwk " ka ti leh dap dap a. He thû hi chah nawn fo a ngai. Ka chah lawm lawm chung paw'n a zawm hlei thei lo ania. Ka chah loh phei chuan a inthlahdah dâwn riauin ka hria.




Msa chuan a sawi ang tak takin palai chu a tir ta ngei a. Chhungkua pawh i hre pawh tawn sa an ni vek tawh bawk nen harsatna an tâwk hran lo. Pathian zara dam chuan thlaleh lama inneih an ti thlu ta a. Ka rin ai takin an hmanhmawh leh roh sia. Thla hnih tal an nghak ve ang chu tih laiin a hun leh ni an ruat chawpchilh phian mai.



"In lo fel lo ru rengte hi a ni lo maw in hmanhmawh dàn em em hi?" ka ngaih ṭha lo chuan Msa chu ka zâwt thâwr pek a. "Teuhlo mai" a lo ti vat, "In va hmanhmawh si ve" ka tih chuan "Kan sawi rikna kha a rei ve tawh tho a, a rûkin kan inbuatsaih ru char char tawh tho alawm. Chuloah tih deuh thut hi a ṭha mai. Inbuatsaihna pawh a hunlai chuan kal vung vak mai sela. Hei thla thar kan chuangkai chiah a, thlaleh chu a tâwk vêl chiah tho alawm" a lo ti zung zung a. "Mi hian ngaihdàn nikhua lo zet an lo siam palh ange aw" ka ti leh hram a. Hetiang kawngah hian keichu hmeichhe rilru hi ka pu deuh reuh a. Mi ngaihdàn te hi ka ngai pawimawh ṭhin ang reng khawp mai.




Msa chuan "Chunglam in a hriatchian chuan a tâwk viau. Chuloah kan ti ngam dâwn lo tih an hre vek tho ang" a lo ti leh mai a, a sawi dik leh fu tho mai. Chutia nupui a'n nei mai tùr chu min ti phûr ru ve riau a. "Keini pawh kan ti huk har tawh lo vang" ka'n ti thla ve rawk a. Nunhlimi'n hria se engtin tak ngai ang maw? "Inneih suau suau ila, fate hi han nei zung zung mai ila maw. Inthlah pung pawp pawp ila, a ṭha a ni mai" a ti suam suam a. A phawk a chhuak leh ṭan dâwn e. "I fate'n ka fate an ngam dâwn lo anih hi" intithei zet chuan a ti leh hluai a. "In neih hmâ hawt a, i va intithei nghal ve mawle. Kan thlen chin pawh i hriat loh tawp kha aw. Duh chuan in inneih hma pawhin kan hma khalh daih thei che u" ka lo ti kual vêl a. A awih hmel loh ngang mai.




"Tak taka fanau rochan kawngah hian kan thû lo viau na in Pathianin rem a ti te anih chuan keichu a tlem berah panga tal ka duh " a lo ti a. Chhûngkaw din chungchânga kan ngaihdàn te chu kan han sawi zui luam a. Ka beisei ai daihin chutiang lampang sawi chu a nuam zek mai. Kan hlim ta phian bawk a, ka phûr ru riau bawk.




A nupui neih tùr thû chu kan hre chak hlawm khawp mai a. Chu pawh eng dang vang ni lovin amah pui hi a phur lutuk a, a sawi deuh sek vang a ni. Nunhlimi te ina min lèn pui zàn pawh chuan a sawi leh ta nge nge a. An lo lawmpui thiam ngang mai.



"Kan tih zawhah Nunhlimi te'n min rawn zui veleh ang a" fiamthu ti tak deuha a tih chuan "Anni zawng a la hmanhmawh thlâk hlei nem" Pa Chama'n a lo ti vat a. Nunhlimi nen chuan kan mit a lo intawng siah a, mahse a hawisawn rang kher mai. Msa chuan "In makpa hual hi a phûr ru riau ania aw, Nunhlimi hi vêng ṭha rawh u" a ti leh hluai a. A uan chhunzawm zui zat a. Mahse Pa Chama chhanna te chu ka lo chhinchhiah ru kauh kauh a, a fanu pasal han neih tir êm tur chuan a la remti chiah lo tih a chiang reng mai. Philip-a erawh chuan "A ṭha hmuh lai hian hmeichhia chuan neih pawp mai tùr" a lo ti thung a. A ṭawngkam aṭang chuan makpa atân min iai lo tih ka hre ve kar a, chu chuan min ti ngaih ngam deuh.




"Eng nge kan thusawi vêl kha i ngaihdan?" Nunhlimi bulah chuan ka ti zawi sup a. A chhungte an mu leh vek tawh a, Msa paw'n min hawsan tawh a. Tunah chuan kan pahnih chauhin kan awm leh tawh. "Eng maw?" a lo ti hu a, "Inneih vêl kha?" thutak zet hian ka lo ti sup a. "Ehe...in lo uang miah nange?" a lo ti duh lêk chauh a. "Uang nang, nupui neih ka châk tawh" ka ti thâwr a, min nuih ṭiah ṭiah anih chu! "Lalnunhlim, ka uang lo ania aw" ka lo ti hluk a, min nuih chhan chu ka hrethiam dêr lo. "Nang hi...i ṭhianpa in nupui a neih dâwn vang maia, i ti mak emai" la nui reng chung chuan a lo ti a. "Chutiang lam a ni lo" ka lo ti leh hmuk. Ka thusawi fiamthu a min lâk sak daih chu ka lâwm miah lo. A hnu deuhah chuan a hrethiam ve aniang "Kan la ngaihtuah ve ang chu" a ti ve ta nge nge a. Ka lawm tâwk a tling viau mai.



Dip dâl tu awm lo leh mitmei vèn tùr awm lo ta na nâ nâ chu kan taksa a insi chawt reng a. Kan kal thui dâwn apiang chuan min lo dang vat ṭhin a. "Ka chhûngte an lo tho palh ange" an ṭhutthleng seia kan infawh mawlh mawlh lai chuan a inlahrang hlek a. A âwm báwr chu ka lo ṭham nghal tâwk a. "I mak emai aw" mitmeng phelh phanga min melh chung chuan a lo ti khur hlak a. A hlauhawm ve thei bawk sia. "I room-ah lût mai ila" ka ti tawl pek a, ka thlêm a ni ber. "Ka duh teuhlo mai" uar zet hian a lo ti vat. Hei chu ka rin dân sa a ni. "I phal chin bâk chu engmah ka ti miah lo vang" ka ti leh hram a. Min melh deuh ren rawn a, a phal mai dâwn emaw ka tih lâi chuan "Aih" tih zawngin min chhâng! Ka lo rum nghut a, "I insûm thei dâwn lo" a lo ti hmiah. Min hrechiang kher asin. Dik tak chuan tunah khan ka thlêm chiang alawm. Mipa hrisel pangngai ka ni a, heti em em a ka sosan hi ka la hre ngai lo bawk.




"Insûm a harsa..." ka ti ve mai bawk a, ka mamawhna hi zep buai ka tum hran lo. A nghawng ah chuan beiin ka hmui chu ka nawr vang vang a, a rim lah chu a tui hrep lehnghal a. Ka hnungah chuan a lo bêng ve thak thak a, min bengdaih a tumna a ni tih ka hria. Mahse ka taksa in ngai a la awh si lo, a kut chêt zawng apiang chuan min hrem ani ringawt. "I room-ah chuan kal ang" ka thlêm leh ta! Zanin zet chu ka dik lo tlat. Ka ráwp hmêl ngawih ngawih lutuk chu thanat thlâk ka ti ve tho a, mahse kan awmdan leh kan awmna hmun in a zir bawk nen thlêmtu lian ka ni ringawt.



Mahse Nunhlimi ngenna tlâwm tak leh zahawm ru zet si chuan min bengdai ta vek maiin ka hria. "U Hluzual, kei chu nupa nih hma chu mipat hmeichhiatna hman hi ka duh lo bur. Pathian hnena ka lo inhlan ve tawhna leh ka lo inserh ve ṭang ṭang tawhna a ni a, ka bawhchhe ngam lo. Dik taka sawi chuan tisa châkna nei lo bîk pawh ka ni lo va, mahse Pathian vang tal pawhin kan insûm thei tùr a ni. Tunah hian kan tisa châkna te puitlin a hum sual kan dai palh hlauh anih chuan kan inchhirna tùr khúa a sei mai mai. Reilotê nawmna ai chuan hlimna tluantling nei tura tun huna kan insum theih hi a ṭha zawk" a ti dam thlap a. Nunhlimi chu ka zah thar kher mai. Thlêm nawn leh pawh ka tum tawh lo, amah hlut zet leh vannei inti tak chuan ka fawp ta vawng vawng a.




Ani ang hmeichhia ka tawng hi ka vannei thlawt a ni. Vannei satliah mai pawh ni lovin Pathian malsawmna ka dawnte zinga ka chhiar hmaih miah lo tùr a ni.



Ka haw dâwn chuan pâwn thleng min thlah leh a, "Ka insûm rei peih tawh lo ania aw...chuvangin kan inneih vat a ngai" ka ti leh hram a. "A àwm ve tho mai, itawm loh zawk zawk ka lo ni bîk si lo va" a ti fiamthu duh lêk chauh a. "Ka uang lo" ka lo ti leh hmuk, ka thusawi min lâk fiamthu sak zel chu ka lâwm viau lo. "Tak taka, min nawr tut tut lo la. Engtik ni ah emaw kan la innei ve mahna. Fiah ngam in han awm phawt mai la" a lo ti ṭha ve ta nge nge a. Chhanna ṭha ber ni lo mah se ka beisei sâng khawp mai. A hma zawng ai khan zanin hian ka duhna leh hmangaihna a zual a, ka nupui a ni lovang tih mawlh ka hlau tawh.



_________*_________*_________*__________
Show post links
Top