KA LALPA BY MAWITEI BAWITLUNG (Completed)

[mawitei bawihtlung]

KA LALPA




CHAPTER 8






“Bawihi a thusawite ngaithla ve phawt la, a bialnu hlui chu a lo na viau pawh a ni theia. A ni tân pawh a chhungte'n an ngen miau chuan thutlukna siam a har ve dâwn asin, i chanah dah chhin la. A thisen zawmpuite ngei thu kalh zawnga awm chu a nuam miahlo vang, i hriatthiam ve te pawh a ngai a lawm, a fa i pai tawh lehnghâl. Pa neilova awm tir i duh tak tak em?" a rawn tih dam dap chuan ka thaw chhuak haka.







Chutiang zâwnga a rawn sawi daih chuan mak min tih tîr lo theilo, a chhûngte chu ka hrethiam. Mahse engvângin nge a bialnu hlui kher, ka hrethiam thei lo a ni “Tunah chuan biak rih loh phawt ka duh, min duh ve tak tak hleinem. Kan in hmuh tirh aṭangin ka taksa bâk a duhlo, tûnah rih chuan engmah sawi pui ka tum lo, ka fa pawh a awm tawh lo tiin ka chhâng a nih kha, rilru natna dang tawrh pawh ka duh tawhlo" tiin hmun dang chu ka ena.









Luhlul min tih hmel takin min en thung “I têt te aṭangin i luhlul em ema, tûnah pawh i la dang lo anih hi, hei vâng hian alâwm ka ngaihtuah loh che. Nangmah i inrintawkna khân a tichak che tih ka hria, i duh ang chuan han nghak phawt la Pathianin i tâna ruat a nei a nih chuan ila tawng em em ang" a tihchuan ka nuih saka.







Rei pawh awm tawh lovin Dodoin in luah tur min hmuh sak thu a rawn sawi avâng chuan ka haw zuia, ka ṭhianpa pawhin an dâwrah ka thawh theih tûr thu a sawi bawk nen ka lungngai duh lêm lo. An inah awm mai tura min tihna erawh ka hnial thung, keimaha ka chên hi a ṭha ber rih tlat a ni.






Mi ina awm thei pawh ka nilo, midang tân phurrit ka siam mai mai a ni. Dodoi in luah tur zawn hmuh chu an vengah niin an in nen pawh a inhlat lutuk lova, keipawhin ṭha ka ti viau. Bâkah luahman an lo ti tlâwm hlauha, thlakhatah sangthum lek chuan ṭha ka ti viau mai. Sum thawh chhuah a har si a, ka inkhawl ve nên chuan ka naute neih hunah pawh ka talbuai lutuk bik lovang.








Pikup hawhin ka bungrua vel chu kan la chhuak nghal veka, a chhan pawh Lalthanpuia rawn lan leh mai ka hlauh vâng a ni. Ka lakah lâwm lo viau mahse min rawn hmuh a tum leh tho ka rin vâng a ni pakhat, a luhlul zia ka hre chianga, chuvang chuan min zawn hmuh loh nân ka insawn ngei a ngai.








Aizawl pawh mihring kan tam tawha, veng khat ringawt pawh inhriat a har tawh ania. Min rawn zawng hmu mai mai bik dâwn lo tih ka hre tlat, chutiang tur chuan fimkhur takin ka awm bawk ang. A duh duhin awm rawh se, a tan ka pawimawh ve tak tak lo tih ka hria a, a hmaa inlan sek pawh ka tumlo.






A ni ka duh hmaah khân lêt leh ka tum tur ani, ka fa hi a lo pian chuan ka khawhar pawh min hnem ve deuh mahna. Dodoi chuan min in rem fel pui vekin Thanpuia thinchhiat zia vêl ka awm loh hnu aṭanga a nelawm leh tak vak loh thu te chu a sawi mawlh mawlha, a thinchhe si a reilotea a thinte hi a lian vak ang tih a hlauhawm zawk, hetiang em ema han thinchhiat theih mai ni.









Lo nui liam ringawtin ka inluah tur chu ka enkuala, a man a tlawm ang aiin ka inluah hmasa ai a ṭha daih zawk. Bungraw lo awmsa pawh chu an ṭha hlawm viau lehnghâl, Dodoi chu ka bulah zanriah a ei nghal a, zânah pawh inthar a ni bawk nen riah ve ngei a tum avâng chuan keipawhin haw luih tîr ka tum bik lo.








Kan la tih hmaih thil te chu rem felin kan titi dûn mawlh mawlha, ka tân hi chuan a hlu ṭhin. Buaina ka tawh apiangin min tlânsan ngai heklo, ṭhian nihchu a tlin hi ka ti takzet, ka tibuai thei ropui si a châng chuan a lakah pawh ka inthlahrung thei viau mai.







“Enteh boss chu a hlim miahlo, bâkah a bialnu i tihkha ka hmu tawha. A ngaihsak vak miah lo ania aw, khanu khân lemte hi a lo chang reng a ni lo maw? Be ve hrim hrim la ka ti e" a ni pawh chu “Kan in be tawh alâwm, a duh a thlang tawh. Bâkah kan naute a awm tawh loh thu ka hrilh aṭang phei kha chuan a danglam vek tawh, engmah lo hrilh suh aw. Hetia kan awm hi a ṭha zawk, min duh ve chuang lova innei pawh ni ila kan hlimin ka ringlo" tiin khum chu ka siam malh malha.







“Mahse mi pawh an inneih hnua in hmangaihte an awm ve tho hi, ka ngaihtuah che alâwm. Naute lo piang ta se i buai dâwn lutuk, engtin nge hna i thawk thei tawh dâwn silo, rilṭâm te hian in lo thi ang tih ka hlau alâwm" a tihchuan ka nuih haka “Ka inkhawl ve tih i hriat kha, bâkah i awm alawm. Ka naute min pawmsak i tum miah lo em ni? A nu ve tho i ni dawna, nang berin i pawm lohin duat tu tur dang a neih loh hi, mu phawt ang" tiin khumah chuan ka mu thla a.





A ni pawhin engmah a sawi tawh lem lo, movie en dunin kan titi pah siam siama, Lalthanpuia erawh ngaihtuah loh lai ka neilo, tûnah te hian enge a tih ang? Ka block vek sia min biak a tum angem le? A thinrim viau mai thei a ni, ka tân pawh chutianga block chu a nuam miahlo, mahsela tûnah rih chuan ka haw em em bawk si. Ka mamawh em em laia a awm lo leh kan inneihna a ṭhulh kha ka lâwm thei miah lo bawk, ka tân chuan a zahthlâk em ani.






Chumai bakah keiai a bialnu hlui damlo a buaipui zâwk khan min tina ngawih ngawih. Ka mumang ṭha lo zet avâng chuan ka ṭhang harh hlawla, thawk la ham hamin khum bula tui chu banin ka inzui khawlh khawlha.





Dodoi erawh tui zetin a mu thung, ka pum chu khawihin Lalthanpuia bawk ka ngaihtuaha, ka awm lo tih a hre tawh angem le? Pawi a ti ve angem? A tih vak pawh ka ring lo, a chhan chu vawikhat pawh min duh thu a la sawi ve hleinem, ka naute tih fahrah a duh loh avâng chauha min neih a duhthu a nih kha a sawi ni.






Mu thei tawh lo chuan zîng lam a ni tawh tho bawk nên tho chhuakin rawng ka bâwl zui mawlh mawlha, vawiin aṭangin hna ka thawk ṭan dâwn bawk nen chaw ei hma a ngai hrim hrim, ṭhiante mah nise hlawh neia chhawr tur ka nih avângin a hma thei ang bera kal ka duh.





Dodoi pawh dar ruk vêlah rawn tho ve in ka lo che mawlh mawlh chu min lo ena “Chaw ei ka peih ṭep ania, hetah ei ve nghal mai rawh. Tin, Thanpuian ka awmna a zâwt che a nih pawhin hrilh miah suh ang che. Hmuh ka duh rihlo" ka tihchuan a bu nghat nghata.





Chaw eikham chuan inṭhen in kan kalna tur lam ve ve ah kan kal zuia, ka ṭhianpa te dawr hi thawmhnaw zawrhna a ni a. An lun ve thei viau bawk, a hmun ka ve thlen chuan ka ṭhianpa chuan min lo nghâk rana.




“Rinai i rawn thleng hma, i ti ṭha e" tiin a rawn nui var vara “In chân phah êm lovang chu maw? Inhlawhna tur dang ka hmu mai silova, ilo awm hlauh chu ka lâwm takzet" ka tihchuan nui suk sukin “Ka tih ve theih tâwk alâwm, tirawh thingpuite in ila" tiin an dawr chhûng lamah chuan kan inzui luta.





Dawr sir lama thingpui lumna lamah chuan kalin noah a rawn thli chhuaka. Keiin ṭhutthlenga ṭhu chungin ka lo en ve reng bawk, ṭhianṭha tak tak mangan huna min pui hreh miah lo tu ka nei hi ka vanneihna ai ka tilo theilo, tam tak chu an mamawh hunah tlanchhiatsan ṭhin ṭhian an neih avanga rilru na em em an awm ve ṭhina, tuna ka ṭhian neih chhunte pahnih erawhin ka mangan laiin min tlanchhiatsan ngai hauh lo.






Ṭhian dik tak chu kan lungngaih leh harsatna kan tawh chiah hian an lang chiang zualin ka hria, thingpui kan in zawh chuan an thil zawrh man vel te chu min kal kual pui pahin a sawi pah mawlh mawlha, lehkha ah ziakin ka lo chhinchhiah ve zel bawk. Ka haihawt ve si a, ka theihnghilh ka hlau a ni ber.





Mi pali vêl kan ni dawna, hmeichhia pahnih leh mipa pahnih a mah nen pathum ang an nih chu. Midang hnênah pawh chuan min in hmelhriat tirin kan inkâwm khawma, customer rawn lût hmasa ber chu min fiahnan min dâwr tira, tluang taka ka tih theih avâng leh a lei tum aia tam a lei avâng chuan min fak hlawm nak naka.





“Rinai i sumdâwng mi dâwn riau mai, kha i hralh thei phian lehnghâl. Chutih rual erawhin fimkhur la, tûn angah rûkrûk hmang an tam tawha, mi dawr tur anga awma a ruka thil tih chîng an tam tawh nen mit len kual ngun angai ania, i tihbo vaih chuan ka pen ngei ang che" nui chunga a rawn tihchuan ka lo nui ve haka.





A pian a nalh bawka, a luck pawh a luck viau. Amah erawh hi chuan bialnu a ngaihsak hauh lo thung, thawk khat lai khan min bem ve a, mahse ṭhian anga ka en avangin keichuan ka ngaihzawng turin ka en theia ka rinloh thu ka sawi tâkah kha chuan min nawr lui lem biklo.





Heti hian ka lakah lâwm lohna pawh nei lêm lovin ka tan englai pawhin ala awm reng ṭhin. Ṭhenkhat chuan an mahni hnâwl tute biak emaw an peih tawh loh laiin ani erawh ka lakah a fel dan a la ngai reng mai “Ka lo tihbo tâk leh ka tuar lâwp lâwp mai ang chu" tiin ka nui ve hak haka.




“Lalrosang" Tluangpuia nena kan lo nuih dun lai chuan ka beisei loh lutuk aw chu a rawn chhuak phuta, ka hawi phei rualin ka ṭhiannu leh Lalthanpuia rum lutuka lo meng chu ka hmu nghâl, zêp turin ka hrilh si a. Chutia mipa dang nena kan lo awm dûn chu a thinrim hle tih ka hre thei.





Kan lam chu rawn pan pawk pawkin ka kutah a rawn vuana, alamah min phih nghal dawrh mai. “Ka tihpalh, min bân a tuma," Dodoi lah chuan inthlahrung zetin a rawn ti a, dem theih pawh a nilo. Lalthanpuia lah chu a thawk dân aṭang ringawt pawhin hlauhawm tham a ni.




“Min khawih ringawt suh" ka lo tihmaka, ka kut chu a mi chelhna ata lâk sawn tumin ka bei ve ngat ngat bawk.“Mipa dang i lo nuih vêl a maw? Ka zawn nasat zia che i hria em?" a rawn ti deuh hrawka, ka lo nui hak thung.




“Min zawng tûrin ka ti rêng rêng lo che. I nupui pawh ka ni lova; i engmah ka nilo, min zawng tawh rêng rêng suh, mibo ka ni hleinem. Thluak ṭha tak ka neia, ka duh sawina turin kâ, lei, hmui, ha ka nei kim vek. Ka duhna hmuna kal turin ke ka nei bawk, chûng chu i nei ve veka i duhna hmunah kal ve mai rawh. Mi awm mai mai zuilo hian pu Thanpui oh! Ni leh lo, val senior phan chang lerh ve zet hihihi....hii..hi..hi......hi..." tiin ka nui hak haka.






Kan bula awm ve te nuihza nui ri ngam siloa hmui lo zum pâwt pâwt ho hmel lah chuan nuih a tiza zual. Lalthanpuia hmêl lah chu a rum zual sawta, huh. Min rawn tibuai reng lo se a thinrim lo ni mai tur.




“He i ka dak thei zet hi ngawih tîr hle hle rawh, ka rualin rawn lêt ang che" tiin min vîn khur khura “A duh loh chuan tihluih angailo, a enga mah i nilo" Tluangpuia lo ṭawng ve leh chuan a thin a ti rim zual sauh a ang “Lo inrawlh buai suh, ka bialnu a nih hi, i ka kha ka thlawn palh hlauh ange" tiin min rawn en leha.




“I zak theilo kha a nih chu, i bialnu chu i bulah a awm reng kha, min rawn tibuai tawh suh. Dâwt sawi hmang lutuk, i bialnu pawh ka ni lova; tu bialnu mah ka ni hek lo. Tin, i duh duha mi tih kawi tum miah suh" tihmakin kal mai ka tuma; min chelh bet nghet sauh mai.





Ka za han ning tak êm, nau chu pailo ila ka sual duh hial tawh ang. “In be lawk ang" tiin midang awm loh naah chuan min hruaia, ka hnial duh tawh biklo. Enge sawi ala duh chiah ni? Ngaihthlâksak chu kan tum ve poh ania'ng chu.




“A ni nên kan inkârah engmah a awm tawh lo, kan lo inzui tawhna ṭhinah ka pui mai anih kha, inneih ka ṭhulh chhan kha chu ka pa buaina vâng a ni e, Lunglei lam kan bank a enkawla, office ṭhenkhat a kâng a, ka buaipui a ngaih vang ani" ka ner sawk mai, chiang takin min hrilh thei reng.




“A nih chu, mahse ka duh chuang lo che min hrilh thei reng a lawm. Min nei duh lo tur chuan inneih kha sawi loh mai tur a tâwk, ka ngaithla peih tawhlo" tiin ka kal dâwna min lo man bet lehnghâl chawt mai.




“Sawifiahna hun min pêk miah loh kha, thinrim ringawtin ka thusawi i ngaihthlâk duh miah loh kha hre ve ta che" chhuanlam chhuanlam “Damdawiina i awm kha ka hmu vek aw hmela, in bank ah i awm lo, in Bank chu damdawiin a nih chu, bank nei maksak pa,college te hi in Bank a ni vek lo maw?" ka thusawi avâng chuan ngeiawm min tih hmêl lutuk leh lâwm lo bawk si chuan min ena.





“Damdawiinah khân ka awm rei hauh lo, a zân a zanin Lungleiah ka tlang, chuvang ania ka rawn biak loh che. A tûkah tlai lamah ka rawn lêt chauh a ni" a thusawi chu a dik ve thei tho, min rawn biak miah loh tak kha. Mahse ka la lawm chuang lo.




“I chhûngten min duh chuang lo, bâkah nang neih che hi ka tum lo hrim hrim. Kan naute chu a thi tawh ka tih kha, tin khanu nêna ka awm loh hnua in inhmuh ngun dân zawng zawng pawh ka hria, min rawn beisei kual tawh suh. Ka mutpui mai che avângin i duh duh dânin ka awm ring suh ang che, min rawn tibuai tawh hek suh, ka engamah i nilo" tihmakin ka kal nghal daiha.




“Ka rualin rawn lêt rawh ka ti a ni lo'm ni" ka bânah rawn vuanin a lamah min kuai hera, ka hmuiah chuan midang hmuh lai pawh pawisa hauh lovin a rawn fâwp ta siah mai. Duhthawh zet hian min fâwp tawn tawn a, tâl chhuah ka tum chuan ka kawngah vuanin min pawt hnai sauhva.




A tâwpah chuan a hmuiah ka seh sak ta vaka min thlah rang ngei mai. A hmui hnuailam chu a rawn thi ta sar sar bawk, tuai zauhin min rawn en chuan ka lo in kuangkuah khum hmak mai.



“Ka phalna la hmasa lova min fawh vâng leh min tih mualpho vâng a nih kha, chhuak vang vang rawh. I chhuah rualin i rim pawh hi hui chhuak vek ang che" ka ngeiawm a ti ve mai mai ang chu, a phu tâwk chiah. Mithmul buk ropui si.




“Ka tawp san dâwn hauh lo che tih hre rawh, ka rawn kal leh ngei ngei dâwn tih hria la, ka hlatah i awm thei emaw chu" tiin a chhuak zui nul nula, Dodoi lah chuan min rawn panin “Awi ka hlauh mai zia, min vin ṭhuai ṭhuai bawk sia, ka hrilh lo ngam lo. Mahse i inluahna chu ka hriat loh thu in ka chhang ve tlat ania" a tihchuan ka thaw huai mai.




A luhlul si a, ka in luahna lehzêl a hriat chuan a chi miahloh “Pu Thanpuia chu a takah ka vawikhat hmuhna, ig vêlah Mizo mipa chhelo an rawn post ah hian a thlalâk ka hmu ṭhina; a takah chuan a hmelṭha in a chhelo zual, awi a bialnu i lo ni reng?" ka thawhpuite lah chuan an la rawn tizui.




“Ka ni miah lo ania, hna thawk tawh ang u. Tluangpui ka tihpalh lutuk aw, a rawn lang ang tih ka ring bik lo ani" ka tihchuan a ni chuan ka thiamloh a nih loh thu a lo sawi ve thung, Dodoi pawh hna lama kîr leh angaih miau avangin phur lo zetin a chhuak zuia.





Lalthanpuia hi chuan a thuneihna leh thinchhiatna hman ṭangkai hun a hre takzet a ni e. Ka thawhpuite lah thil dang an sawi hleithei tawh lo, an titi chu kan pahnih awmdân ah hlir a tâwp a, Tluangpuia nên erawh kan ngawi reng thung.




Dik tak chuan nuam ka tilo takzet, min lo duh tawhnaah a hmuhlaia mipa dangin min fâwp kha a ni tan pawh a thinrim thlâk viau ang tih ka hre thei.


“I va nguai ve, tirawh thil ei ang" ka tih tâkah chuan a ni pawh a rawn in thing harha. Customer an awm rih em em lo nen kan vaia kan ei tur chu kan chah hlawma, an rawn dah hun nghah pah chuan kan titi hlawma, an ni chu thingtlâng lam aṭanga rawn kal an nih hmel.




Rin ai an fel phian lehnghâl, an taima ka ti hle bawk. Chhûngte châwm nân lunglên pawh sawi theilo vin helaiah an hmelhriat ṭha pawh awm lohnaah an rawn kal vang vang chu a nia, an ngaihsanawm zâwk, kei erawh nu leh pa neilova seilian ka ni miaua, mahni a awm chu ngaiah ka neih thung.





“I bialpa a ni tak tak em? In inhmeh reuh ka ti, i vânnei e. A thlalak te hian like tu leh comment tu angah thei tehmai ania aw" Zovi chuan a rawn ti a, “Teuhlo mai, ka sawi tawh kha. Kan inzui ve mai mai alawm, mi bialpa a nih kha mi duatlai lo ngaihzâwn ka tum reng reng lo" ka tihchuan an eee dual leh nghal.




Ka thusawi chu an awih duh hauhlo, an va han sual thiam ve tak. “Bialnu a neih âwm kan hrelo, e saw kan ei tur chu a rawn thleng a nih saw" tiin dawr kawngka lam chu hawiin an pan thuaia. Aman tur kan dahkhawm sa chu pe in an rawn khai pheia, mipa pathum te erawhin engmah an ei lutuk lêm lo thung.




Ka awm a nuam miahlo, Lalthanpuia min fawhna avang khân ka zak ngawih ngawih, mi hma khera min fâwp kha ka haw zual ngawih ngawih. Siamṭhat theih lah chu ani der bawk silo, vuak tluk tawp ka châk ngei mai.




Thil kan ei zawh chuan mi rawn lût vel chhâwn pahin kan chanchin chu kan sawi leh mawlh mawlh hlawma. Tluangpuia erawh a chhungten an rawn koh avângin a haw daiha, an chhûngkua hi an hausa ve a, hmun hrang hrangah dawr neiin an hlâwk pui phian lehnghâl.




“A fel reuh e, mi hausa fapa ve si ah chuan a in ngai tlawm bawk si. Tûn angah ṭhenkhat chu an nu leh pa te nihna hmachhuanin dân pawh an pawisa lova, thil pawh tisual se an chhuak nghâl zung zung theia, a ni erawh kha chu a ngawi chawi bawk sia, a mizia kha ka duh chi tak" Zovi bawkin a rawn tihchuan ka lo nui haka.




A frank ve hle mai, a lehlamah chuan a ni pawh hi a rilru a chhe dâwn lo tih ka hria. “Ka lo biak ang che i duh em?" ka tihchuan a rawn nui hak haka “A chiloh min ban palh ang. Bâkah kan phulo, nula hmelṭha leh nalh tak tak an tam tawha, keini ang thingtlâng nula chu min duh dâwn lo, tûn angah khawpui mi ṭhenkhat te'n min endan hi kan hai bîk hleinem" a rawn ti sapa.



Ni e kan changkang viau tawh emaw tih laiin a tak leh social media ah thingtlâng lam hmuhsit ching hi kan la awm nual mai, mahse hetiang mite hi chu mi thatchhia, Mizo nunzia hrelo, pi pute nun hre miah lo a nu leh pa thawhchhuaha in la lian an ni duh chawk. Thingtlâng emaw khawpui emaw Mizo hnam vek kan ni a, in la high viau mah ila kan nihna chu tribal a ni vek tho tho.





Mi rethei leh thingtlâng mi hmusit tawka lehkhathiam ho ka timai, an nun a awhawm bîk teuhlo. Thingtlâng mi taimakna zât ve pawh keini chuan kan nei nâng, an ni chuan nitin ni sa, ruahsur hnuaiah hlo an thlo reng peiha, in lam enkawl leh ran chenin an enkawl vek theia, khawpui mi hian kan tluklo nasa lutuk.





“Chutiang in ngai suh, mi lehkhathiam tak tak. Mi zirsang mi hi chuan thingtlâng hi an hmusit ngai hauh lo ania, bâkah kan Sawrkar hotu lian tak takah pawh hian thingtlâng aṭanga rawn chawr chhuak an awm ve nawk tho va, mahni insit duh miah loh tur. Kan nihna hi zahpui miah lo ila, mifing leh lehkhatiam tak tak hi chuan midang an hmusit ngailo, a hminga lehkhathiam leh mi â, engmah nilo a chapo ve ar te hian alawm midang hmuhsit ching ṭhin, ala duh thut thei che ania" ti a ka siai zauh chu a rawn nui nasa mai.






“Ni e, mi fel tak tak pawh an awm ve tho hi. Entirnan; tûna kan thawhna te hi, zâm duh bik reng reng loh tur, tumah kan nun dan sawisela min nuih thei turin Pathian in tumah a ruat hleinem, khawvêl mite en lovin Pathian hi en ila engkimah lungawina kan hmu ang, Pathian nilova khawvêl mite min ngaihdan kan ngaih pawimawh luatah hian alawm keimahni nun ngei kan tihchhiat leh ṭhin" Chhana chuan a rawn ti ve a.






A ti dik chiah, Pathian bulah hian engkim thlen ila kan thurukte pawh hi a bul aṭang chuan a chhuak leh ngai lova, kan lungngaihna pawh thlen ila min tuarpuia min hnem ṭhintu chu Pathian chauh a ni, harsatna leh manganna kan tawh pawhin ani chuan min tlân chhiatsan ve ngai hek lo.





“Mite nun dân ang apiang hian nun tum lo ila, keimah ni nun dân hian nung mai ila. Mi thil ṭhalo tihte hi en lo i la, tûn angah sum duh avânga mahni taksa hmang ṭangkai te hi a hluar tawh sia, fimkhur hi a ngai reng asin. Mualpho a awl tawh si a, chutih rualin kan mak ka tih em em chu mi nundan chhia sawisêl reng si a a vawrh lartu ah kan ṭang leh ṭhin hi, vawrh lar sak lo ila chuan tuvak mahin an hrelo anga, an tih rei peih ka ring miah lo, Mizo hi chu kan hawk dâk lutuk a, thil kan vawrh lar zung zunga, lar ve châk vang ringawt pawh hian ṭhalai la naupang zâwk ngaihtuahna la hmang thiamlo ho kan tih hmuh ni berin ka hria" Hlimhlimi chuan a rawn ti ve bawka.




Kei erawhin engmah ka sawi ve lêm lo “Awi keizawng hausa ve deuh ila sap ramte hi kal ve mai mai ka châk, a nawm hmel si. Mi ram kal kan châk a, an niin kan ram kal an châk ve bawka, inthleng daih theih se " Hlimhlimi bawk, kan lo nui dar dara.




A ngaihtuahna mak lutuk chu kan hlimpui a ni ber mai “I lo piang lo êm a ni tiraw? Kan pianna hmun tur kan thlang thei silo a, ram chengkek ah tihian rethei em em in kan piang a, mahse kan nun dan tura Pathian in a ruat a ni miau sia, a ṭha zâwk phian mai thei a sin. English mite nun hi awhawm viau mahsela a lehlamah chuan an nundan khu a ho asin, inneihna an ngai ho lam bawk si, an milarte chu kawppui an in ṭawm kual vek nimaiin ka hria, an inṭhen a, midang an nih pui leh zung zunga. Midang dangah fa an nei thleh thluaha, keichu ka awt miahlo" ka lo tihchuan a bu nghal nghauh nghauh hlawm mai.





Thil dang dang chu sawiin a nikhatna chu kan tling tlâk ve maia, chutianga hahthlâk a nilo bawk nen ka tân tak pawh a nuam. Haw lamah chuan ke a haw maiin kawng sir vela an thei zawrh leh thlai zawrh vêl chu ka ei châk zâwng ka lei phaha, nuam ka ti ve viau. A châng chuan lir chuan hi ka nin ṭhin avangin ke hian ka kal tam zâwk maha, a nuam ka ti bawk.






Ka in ka thlen chuan intifaiin rawng chu ka bâwl zuia, Lalthanpuia ka ngaihtuah leh zawk mai. Thil a hre thei ker kur si a, ka in luahna te hi a rawn hriat leh vat ka ring, engpawh nise thil awmdan a zirin ka tawm bo rih pawh ala ngai lovang tih pawh ka sawi theilo.


LIKE, CLICK AND COMMENT KHA AW, MIN HAN TIH SAK HRAM HRAM ṬHIN ULA, KÊL UM PHAR LAWP LAWP CHUNG TE, LO FEH PAH TEN KA RAWN TYPE VE ṬANG ṬANG ZEL TIHKHA MIN HRIAT PUI ULA AW.