LET's LOVE AGAIN by Ziki_nu_chapter-19

[Ziki_nu]

LET's LOVE AGAIN


By Ziki nu



Chapter-19



Aizawl kan let tûk chuan school ka la kal rih chiah lo a, Riny erawh a kal ta hramin ka hria. Ka thlen tlaiah U Mazari te ina chaw ka ei chhoh avangin zingah eirawng ka bawl chawp a, mahni infuih sauh sauh chunga hmalam ka pan a ngai tih hria in kawng engkimah chhel taka awm chu ka tum ruh ve tlat a, ka nu leh pa ka ngaihna chu la zual dawn chauh mah se tuna la dama te hi kan inhmangaih tlan a ngai a ni.



"I tho ve tawh maw Mate, chaw lo ei chho la, khi bai tui deuh ka siam asin" inchhunh a rawn luh rualin U Mazari chuan a ti nghal zung zung a, thlang lam bathlara ka pangpar khawina pot 2 lek te chu thlek vung vungin a chek hlak a, a nun that ve tehlul nen ka awm loh hlan khan a lo vuai chhe leh hman a, U Dintei lo chah nachang ka hre bawk si lo nen an thi chu a ni der a, pangpar lawm tih takah U Mazari pawh chuan a ui ve viau anih hmel.


"Chaw ka chhum tawh a, ka lo ei lo mai ang" ka tih chuan "Ka thlai rah bai tal khi lo suak ve rawh, bai pawh I siam leh tawp nang" a ti deuh tlat a, in chunga kan inzui chhoh chuan rinloh deuhin U Aldrina a lo awm a, an ni pawh hi thla thar ah chuan an innei ve mai tawh dawn a, an senior tawh vang nge zingkara in rim hi an sim thei miahlo leh nghal a.




"In lo haw tluang thei maw Sawmte" min lo ti var a, kan tluan thu ka sawi hnuah ka nu vanga min tawrhpui thu te chu a sawi ve luam a, "Nunpuia te lah kha a Tukah an rawn haw leh mai si a, training ngai lo se chuan han champui ve deuh che pawh a that teh lul nen" a tih chuan ka hrechhuak zawk mai, Nunpuia pawh ka la be leh lo.



"An fel tak tak a ni, helama a thiante zarah Matei pawh a lang mawi ve a" U Mazari'n a lo tih chuan ka bu ve nghat nghat a, "Eng training nge a, a ke vang khan kumin chhung chu a chawl dawn emaw ka tia" tia ka zawh chuan thawk la hawkin "Chawl tur chuan an tia, amah hi a insum thei lo leh lutuk alawm, a dam tawh tho chung hian a nat zual leh kan hlau a, mahse a khel lui zel tho a, a duh duhin awm rawh se" a ti a, a hau peih vak tawhlo a nih hmel.



U Mazari nen chuan an sawi zui mawlh mawlh a, kei erawh chawhmeh ka suah zawhah ka chhuak leh mai a, insuk tur ka nei nual bawk nen vawiin chuan intihfel nan hmang ila a tha ang.




Rintea'n min lo biak chuan chaw ka ei ve mek a, Tanhril lama a pu te an tlawh dawn a ni âwm e, "I chau âwm sia, kal ve kher a ngai em ni?" ka tih chuan an chhungkuaa kal vek an tum thu min hrilh a, nimin lawkah motor kan chuang fe tawh bawk nen ka khawngaih ve reuh.



"I chhungten an lo hau che em?" ka tih chuan a chek tlak tlak a, "Mipa ka nih hi" tih chauha min chhang chu ka duhkhawp lo, "Min champui ve reng sia" ka ti leh a, Nu Nutei te lamin min lawmvak tawhlo tih ka hre ve reng bawk nen awm chu a nuam duh vaklo.



"Hau lo e, karleh atangin dawr luah tur ka zawng dawn a, keipawh ka buai ve deuh tawh mai thei" a tih hnuah an kaltawh dawn avangin kan inbiakna chu kan ti tawp rih a, eizawnna tur kawng a dap ve mek zel tih ka hriatna ringawt pawh chuan min ti hlim ve sawng sawng mai.




Thuamhnaw bal thenkhat ka suk zawhah ka pangpar pot te ka siam tha leh a, ka buai nileng a tih theih ang.


Beisei loh deuhin tlai lamah ka thawhpuiteho an rawn lang tak tak a, ka nu ralna thilpek te pawh an rawn keng nghal a, an bengvar ka ti khawp mai.



Tlai lam anih vangin rei awm lovin an haw leh thuai a, thiantha ten min han ngai pawimawh hram hram thin tih hriat hi chuan rilru a thlamuang ve riau zel.



Aruata'n "Zanah kan lo leng dawn" a tih avangin zanriah ei khama mut nghal mai tum kha ka thei leh ta lo va, rin ang ngeiin dar 7 bawrah Nunpuia nen an rawn inzui lut a, ka bula a rawn thu kher te chu lo huat viau theih ni lo mah se nuam ka ti vak lo.




"I tha maw?" ti supin min en zawk a, "Aw tha e, in lo kal ve kha ka lawm lutuk a, lawmthu pawh ka la hrilh mumal lo che u" ka tih chuan Aruata zawkin "Tikhan lawmthu chu lo inhrilh rawh u, kuhva ka lei lawk dawn" a lo ti leh phawr phawr tawh a, biak zawm hman lohin a chhuak nghal hmiah bawk.


Rintea nena kan chungchangte an hre ve vek tawh chungin an thiandun hian min bansan an tum miahlo em mawni, an hahthlak ka ti.



A ngawih reng vang chuan aw thian kharhin "Ka lawm lutuk tak tak ania aw, lawmthu han sawi vak ngaihna ka hrelo zawk a" ka ti a, za vak loin ka nui pah bawk.



"Thiante chu kan intawiâwm zel tur alawm" a lo ti ve mai a, chutianga a han sawi takah chuan ka awm a nuam ve ta deuh a, a training chungchangte zawtin kan titi zui luam a, kan thiana kuhva lei pawh chu a thang rei tawh khawp mai.


"Kum khat em em chawlh chu ka ui ve deuh a, hnathawh dang kan nei si lo a, training hrim hrim kha chuan lawmman a awm ve a, chhungte tihbuai ngailo kha ka duh ber a" a ti ve nuah nuah a, chulam zawngah chuan a rilru a puitling ka ti khawp mai.


"A tha tho a, mahse hriselna hi ngaih pawimawh tur ania" ka tih lai chuan lo pawt chatin "Rinsangzuala nen khan in inngaizawng leh tak tak em ni?" a lo ti khauh a, helam hi chu sawi chhuah tawh loh ka duh teh lul nen.


"Aw" tih zawnga ka chhang chu tawi te hian min lo nuih a, "I hrechiang em ni?" a tih leh chuan chiang deuhin a hmel chu ka en a, a inrintawk hmel ngang mai.




"Imm hrechiang, ka ring bawk" ka ti ve nghat a, a nui ringawt tih loh chu min chhang zui tawh lo.



Aruata rawn let leh chu thlan tla phung hian a rawn tlan lut a, hlauh nei hmel a pu na in min melh rum lutuk chuan ngaih a titha lo mah zawk a, "Ngatinge?" ka lo ti dek dek chu "In thenawm te ui kawlh zet saw ka la talh ang" a lo ti hluk hluk a, a âwm dawmin filter awmna lam a pan a, tui a in zui khawlh khawlh mai.



"A kawlh loh kha, nangman I chhaih hmasa aniang" ka ti chu a duhlo ngang mai a, "Sawtiang ui dum hmelchhe lutuk saw chu an kawlh vek, mi kawng kal hle hle lai pawh an lo hau vak vak zel" a ti leh a, a kawr tlangin a thlan rawn bawl chhuak tiam tiam chu a hru khat tawk reng a, a tawiin a dul a kiar bawk nen a landan chuan nuih a tiza zawk.




"Kan haw mai dawn em ni? Thawhhma kan ngai leh dawn a" Nunpuia'n a tih takah chuan an inzui chhuak a, kawngkhar thleng bak ka thlah lo.




Keipawh ka mu ve nghal a, phone ka en chuan Rintea missed call vawi 2 ngawt a lo awm a, dar 9 chauh a la ni bawka tiin ka call let a, mahse min lo chhangtu chu amah a ni lo..


"Hello"

"A.. Aw.. Nu.. Nu Nute" ka ti bah nawk nawk a, a nu in a lo chhang ang tih rin ngaihna ka hre lo reng reng.



"Rintea chu dawrah ka tir lawk a" tha deuh chuan a rawn ti ve mai a, dah leh mai ka tum laiin "Engtikah nge i rawn len leh ang" a lo ti leh khauh a, chhan lawk nachang pawh ka hre lo.


"Ka... Ngatinge?" ka ti let hu a, "I hman hunah chaw ei turin rawn kal leh la, a pa pawh a awm tawh ang chu, titi ho te pawh a ngai alawm" a ti leh zel a, eng chungchangah nge titi ho chu a ngaih tih lam daih ka lo ngaihtuah a, rilru in a chhe ber thlengin a ngaihtuah zung zung mai bawk nen ka awm a nuam leh vak tawhlo.



"Nia.. Remchangah kan la tum dawn nia" ka ti ve ta ngawt chu a nia, "Hei a lo thleng alawm" tih paha thawm a rik tak tak hnuah Rintea ngei mai chuan "Hello" a rawn ti sup a, "Imm, I lo call sia" ka tih chuan "Ka lo call mai mai, I buai em ni?" a lo ti let var a, "Buai lo e, hei ka mu dawn chiah" ka ti a, a intihfel zawha min lo biak leh tur thu a sawi hnuah kan inbiak a chu kan titawp a, keipawh ka mu tha ve nghal sawk sawk mai.



Mut hmunah rei deuh kan inbe leh a, a nu nena kan inbiakna vel kha chu min zawt lem lo bawk nen ka sawi lang duh hran lo a, min sawm nawn leh anih loh chuan len leh pawh chu ka chak vak rih lo, an felzia leh an rilru pawh a thatzia ka hre reng naa, an thinlung ka tina in an tan ka huatthlala viau tih ka hriat ve reng avangin tha taka min bian pawh hian a hma angin ka tlangnel thei tawh lo.





Kartluanin school kan kal a, ka khawhar hlauin ka thawpuiten min be seuh seuh reng bawk nen an zingah chuan ka nui ka nui ve leh thei tawh a, titi pui turin Riny a awm reng bawk nen nitinin thiante hlutna ka hmu fiah thar zel a ni ber.



U Mama te nen kan inbe reng a, kan khaw lamah pawh khawhar hre hman miah lovin thenrual tha ten an la lenpui a, keimah ber chu min ngaihtuah deuh a, mahse tunah chuan a hma zawng aia puitlin ka ngai tih ka hriat ve reng avangin a theihna piangah chhungte tihbuai loh ka tum a, U Mama lah chhungkaw hran nei a ni ve tawh a, kan unau pahnih chauh kan nih avangin anni bak chu han belh tur hnaivai pawh ka nei chuanglo. Pasal ka nei dawn anih pawhin an hnen atangin ka nei anga, mahse tunah chuan rilru puitling tak pu chunga inkhawl char char ka la ngai rih a ni mai.




Nunpuia'n phone a min rawn biak a ching thar leh riau a, ka reply ngai lo na in a sim duh chuanglo, ka let leh atangin ka la inkhawm leh lo va, Aruata nen an rawn len zan bak kha chu kan la inhmu leh lo.
Chuti chung chuan zantin min rawn be ziah a, ngaihzawng nei ka nih miau avangin biak loh chu tihmakmawh ah ka nei a, Rintea pawhin hria se min demna tur a nei lo ang.




Zirtawp ni tlaia kan school bang chu Rinfeli nen kan inhmu leh hlawl a, an nau kha a lo hruai leh dawn a nih hmel e, nidang ang lo tak in a fapa a paw bawk a, chhangchhenu tak tak te pawh a ang ve tawh khawp mai.



"In bang chiah em ni?" tia min lo biak hmasak avang chuan nui sangin ka chhang let a, "Ka nu in chaw eia sawm leh che a tum kha, Rintea'n a hrilh tawh che em?" a tih chuan lu ka thing ringawt a, a nau hruai tur ber a lo la chhuak lo bawk nen min din hnaih hrut pah hian,
"Hmanni ah Janis-i nen kan inhmu a, ka chhuahchhal hrep" a tih chuan phawk deuhin ka en a, "Ngatinge?" ka ti hluai mai.


"Dawt hmanga midang sawichhiat hi ka duhlo, a ngawih reng danah i sawi dik zawk aniang, Rintea ka hmangaih vang ania min hrethiam dawn nia" a ti duah a, inthiamlo hmel tak phei chu a pu hran chuanglo. Mahse chutianga thil nihna tak a hriaa a han pawm thei ta chu thawk huaina tham a ni hrim hrim.




Zana Rintea nen kan inbiak chuan Pathianni tlaia chaw ei turin min sawm a, ka hnial ve deuh na in "Ka pa'n sawm leh rawh min ti" a ti tlat a, ka ei hmasak khan a awm lo bawk nen han hnial luih pawh chu thil nuam tak a ni chuanglo a, aw ka han pawh ve leh phawt chu a nia.



U Mazari te inneih a hnai ve zel a, kan chhiat tawh atalangin a ni a buai ber lo thei si lo a, a inthlahrunawm thin khawp mai.


Inrinni ah kan bazar dun a, pasal nei mai tur tih takah inneih hnua lei mai mai theih tawhloh tur thil a en kual a, a in buatsaih ve nasa khawp mai.



"Pasal neih i chak tawh em Mate?" tia min zawh chuan chhang lovin ka nui mai a, "Tuna ka han nei mai tur hi ka phurna leh phur lohna a in chen vel ang, kan tleirawl lai kha chuan pasal kan neih ni tur te leh fa kan neih hun tur te kha kan suangtuah ve nasa thin a, mahse hriat loh karin hun hi a kal duak duak a, tunah pawh duh ai chuan kan senior tawh anih hi" tiin a nui hak hak a, "A nih leh i suangtuah ang chu U Aldrina ah hian i hmu em?" ka lo tih chuan ngaihtuah vang vangin,
"A vai chuan ni bik lo e, kan duh zawng ang thlap hi chu mihring ah an awm kherlo ang, tumah kan famkim lo a, Aldrina pawh mipa tha tak, Pathian tih mi leh innghahna tlak a nia, min hmangaiha min enkawl a in peih thlap bawk a, chutiang bak a awm chuanglo, hmel leh landan ngawt en dawn chuan tlin lohna lai kan nei vek alawm" thutak deuh hian a lo ti a, amah bawk chuan "Pasal neih har lutuk hi a lo tha miahlo mate, tunah keini pawh kum 30 kan pel thui deuh tawh a, fa neih teuh duh phei chuan kan tlai lek lek zawk a ni, chuvangin mipa innghahna tlak i hmuh chuan nei hmak rawh" a ti leh a, a sawi tui khawp mai.




"Rintea hi engnge i hmuh dan?" ka tih chuan min en vang vang hnu ah "Eizawnna nghet nei phawt rawh se" a ti nghat a, a thutak tih ka hriat avangin keipawh ka bu nghat nghat mai.



"Mipa chu hmeichhe lu an ti fo a, hmeichhia te ai chuan an chungnung meuh mai, mahse zah tlak leh innghahna tlak an nih ve a ngai a" a ti leh a, keipawh ka ngaihdan chiah a ni.

Chhungte thawhchhuah hmang ringawta bialnu te treat tum mipa chu engtikawng mahin innghahna tlak an ni ngai lo, an bialnu nih a nawm viau lai hian an nupui nih a huphurhawm ru ve riau thei tlat a.




"Pasal neih hnu chuan thil lei mai mai a harsa tawh an tia, chuvangin lei khawl teuh rawh" ka ti chu a nui a za viau mai a, inrinni nileng chuan kan inzui kawi hnak hnak a ni ber.




Zanah pawh inkhawm lovin ka mu hma a, Rintea pawh ka nghak hman meuhlo, kan tei chau ve bawk nen ka muhil hma a, zingah pawh ka harh hma viau a ni.



Pathianni chawhma chu ka inkhawm ve a, Nunpuia leh a thianten min lo ko chu din loh mai tur em mawni ka tih rilruk laiin "I thianten an koh che saw Mate, Linda-i ka be lawk anga vawiin chu keipawh ka haw tlang ang" U Mazari'n a lo tih vang chuan ka ding ta nge nge a, ka nu boral thu chu Nunpuia hnen atangin an lo hre ve a ni mai thei, min tawrhpui thute an sawi ve liam liam a,

"Zanah lo len i phal em?" an zinga te berin a lo tih chuan ka chhan hma hauhin an lo nui nghal dar dar a, "Nunpuia chanpual asin, i chang ve lo aw" tih ang reng a ni.



Nui chungin ka awm loh tur thu ka hrilh hlawm a, phawk ang reng taka min en pahin Nunpuia chuan "Ngatinge?" a lo ti vat a, ka thiante ina chaw ka ei tur thu bak thildang ka sawi lem lo a, a thianten hrethiam lo mah se a ni chuan a hrethiam tho in ka ring.




U Mazari a rawn let leh tak avangin kei pawh ka kalsawn zui a, U Dintei a nuamsam vaklo bawk nen chawhnu lam chu a ni pawh a inkhawm dawnlo a nih hmel.




Tlaiah chuan dar 3 velah Rintea'n min rawn lam a,inkhawm bang tih hriat takin kamis var thianghlim zet mai leh cotton kekawr dum hlap mai a ha a, smart shoe a bun leh thlap bawk, a landan chu a fai vung a, a hmeltha hle bawk.



"Min en ngawih ngawih suh Malsawm" a tih chuan inthing harh zawkin ka hawi kual ruai a, ka lai titih ringawt chu ka duhlo, ka lo en rei deuh nge maw ni.



"Zan lam chu inkhawm lo mai ang aw" min râwn deuh tak chunga a tih chuan ka lo bu nghat nghat a, midang ina chaw ei dawn chuan inkhawm tum chu a buaithlak ka ti ve deuh a ni.



Kawrfual ka khup khuh ka ha a, vawthlep bunin bag te ka phone lenna tur ka ak bawk a, ka sam chu a hmingin ka thlah ve tak naa, a kilhna tur chu ka keng tel hram tho, sam thlah reng hi ka peih vak thin lo a.




"I hman em ni?" a tih chuan ka lo bu leh zauh a, min en vung vung vang chu nge mawni ka zamleh hnuhnawh a, ka kawr hak chu thlek thuak thuakin "A mawilo em ni?" ka ti leh rih a, min rawn dinhnaih lai te chuan ka lungphu a lo rang leh ringawt tawh, engahnge maw hepa lakah hian ka la zam fo chu le....




Ngawi rengin ka sam, ka benga ka zeh chu a la thla a, "I hmeltha" a ti sup chu ka lai ngang mai, ka biang a sa hat hat a, awm dan tur ka thiam lo lutuk chu ka inhaw zawk.



"I over e, kal ang" tia kalsan mai ka tum chu ka kawngah a lo man chawt a, a âwm si chetin min pawt bet zui bawk.



"Min fawp lo in kal I tum maw?" a ti sup a, a tawng zawi hle na in a thil sawi chu ka hrechiang lutuk tlat. Kei lah chu eng nge maw ka hriat teh chai ni, kan vawi khatna pawh ni hawt silo chu ka zam em em ringawt a, a mita ka en ngam loh bakah a hmuia fawh chu ka hreh ru riau a, min thlah duh miau loh avangin rang deuhin a biangah ka han fawp zauh a, mahse duhkhawp lo tih hriat lutukin min chelhna chu a ti nghet zual sauh thung.



A hnar in ka hnar a rawn nawr si a, zam deuh tak chunga a mita ka en let ve rual chuan lo kiai sukin duhthawh zetin min fawp zui a, chhan let nachang ka hre lawk lo.




A hnu leh awm tawh lo tur ang maia min fawh tak ngawng ngawng ah chuan a nghawngah kuah in ka chhang let ve ta nge nge a, a mi fawhna dam ruih leh duhthawh em em si chu chhan let loh reng atan chuan a uiawm em asin!










Cont...
Naktuk Pathianni anih vangin update a awm lo ang aw....