TMLK S2 BUNG-16 NA

[Kennelly Bawitlung]

THINGTLANG MISTIRI LEH KEI

BUNG-26 NA
ZIAKTU: KENNELLY BAWITLUNG


Ka pa chu ka call ta nghal a, vawithum ngawt ka call hnu pawh chuan a chhang thei hauhlo. Tunah pawh hian inah a awmlo chu a ni phawt a, a chhang thei miau si lova ka missed call a hmuhte chuan min rawn call back ve mai ang chu tiin ka call nawn duh ta lova. Ngaih tih ṭhat luih hram hram chu ka tum a ni ber.


Mahse awm nuam ru zan silo chuan ni ka hmang a tih theih awm e. Tlai chaw eikham thlenga min la rawn biak tak loh foah chuan ka call hmasa leh ta nge nge a. Tunṭum chu alo chhang ve ta hlauh mai.


"Aw Bawihi chaw kan ei kham ve chiah a, indam ṭha maw?" Alo tihchuan, "Chhunah lo biak che ka tuma phone i chhang thei lova. Ka missed call i hmulo em ni khawnge i kal daiha...inah i awm bawk silo," a zawhna pawh chhang hmasa talo chuan ka tinghal zung zung a. Nilengin rilruah a awm a tin ni.


"Thil pawimawhah ka chhuak lawk alawm mawle, eng nge ni ta min biak duh a?" Alo ti dam thluam a. Chiangtakin a chhuahchhan lah hi a sawi duh mang bawk silo engthil pawimawh tak chu ni ang maw?

"Engthil pawimawh nge ni a? Ka nu nen kan inbiak changte hian inah i awm ngai mang lova, ka nu nen kan lakah hian zep ruk i nei reng te hi a nilo maw?" Ka ti tawl mai a, ka pehhel kual peih si se lo.


Ka zawhna vang chuan a nui chhuak hawk hawk a, kei erawh ka thutak viau thung.
"Eng thuruk nge maw ka han zep ang aw...nangpawh hi i nu ang chiah i ngaih a ṭhalo hma thei lutuk a...ram chungchang vel leh thildang neuh neuh buaipui tur hi tunlai chu ka nei ve reng a, keini ang kumah phei hi chuan tei chhuah rengte hi a ninawm lam mah a ni. Vawiin pawh ka ṭhianpa Lawyer kha ka va hmu a, anin min lo buaipui saka ram lehkha kha chu i nu hmingin ka thlak fel tawh e," a ti ta dap dap a.


Zaiin Kimtei nen a hmuh dun thu kha min hrilh si a, Kimtei nen an inhmuh zawhah Lawyer chu a hmu leh tihna nge..? Ka sawi lan chuan Zaii dinhmun tur ngaihtuah ve tho a ngai bawk si nen, keimah ngeiin ka mita hmuha tumah vengthawng lova han zawh pawp pawp mai chu ka chak kher mai.


"Aw...a ṭhat chu. Kimteite nufa hi eng nge an an zel i hre mial em? Anu kha a serious ve ang reng si a, a rawn be pawp leh mial che em? In inhmu leh hrim hrim em?" Tih ang zawng chuan ka zawt ta zawk a. Kan inhmu tawh ngailo tia min chhang anih chuan dawt a sawia kan laka thup a tum tih a chiang thawkhat viau dawn a, Kimtei nen hian eng emaw thup chu an neiah ka ngai hmiah bawk ang ti rilru chungin min chhan hun chu thinphu dep depin ka ngaichang ran a.


"Thla hmasa aṭang khan anu chu a zual deuh a ni awm a, ṭah aw tak meuha min rawn biak ve si avangin ka fanu ang maia ka lo en ve tawh chu khawngaihna lai chin ka neilo thei lova, chuvang chuan vawiinah anu chu ka va tlawh ta nge nge a. Rei pawh a daih hmel tawh loh. In enkawlna man tur leh damdawi man te chu kan inpe ta nge nge a, zaninah i nu pawh ka lo hrilh ang ka tihlai mek a nia, ka han hrilh hmasa ta zawk che anih hi. In nufa chungah pawh ka inthiamlo viau naa, a thiltihte kha anu tana ti a ni tih ka hre ve reng si a, ka ngaihthah ngawt thei biklo a ni e," a tiha a thusawi tawp lam aw chu inthiamlo riau hian ka hria a.


Ka rin ang chuan vawiina an inhmuh thu kha a zep leh ta si lo a, ka beiseiloh chhanna ka dawn vang nge ka hamhaih deuh.


"Mate, Bawihi i thinrim em ni? Ka laka i lungawilo anih pawn ka hrethiam lutuk che a nia, a lehpek a awm tawh lovang tih ka tiam e. Ka inthiamlo ve takzet a nia aw.." a rawn ti leh chuan nuamlo ka ti deuh tawh, "Ka thinrim hleinem, thilṭha i ti a ni mai a, ka lungawilo lo. Mahse engkimah ka nu hi chu a der tal pawhin rawn hmasa ve ṭhin la, chuan engmah zep nei suh aw. Hman ang khan chhungkaw inngeih leh hlim tak nih reng ka duh," ka lo ti a, ka thutak viau bawk.


"Ni e tiraw, chhungkaw inpumkhat hi keipawh ka duh ber a nia lawm. Hlim taka kan awmho reng theihnan ipa hi insiamṭhat ka lo tum anga, engmahin kan chhungkua hi min ṭhendarh leh tawh lovang. Lo inenkawl ṭha la, hlim tak leh hrisel takin dam reng rawh aw ka fanu," a tihchuan rilru pawh a hahdam ta huai mai.


A enga mah hmaa ka pa ka lo ringchhe teh ngawt chu ka inthiamlo hnuhnawh leh viau mai a. Ṭha tak chuan kan inmangṭha a, phone ka dah rual chuan hahdam deuh huai tawh mah ila min mawlhtu eng emaw hi a awm tlat thung a. Tunlai mahni ngaihtuahna ka kawm zing lutuk hi insiamṭhat ka ngai a ni. Rilru a hahdam tak tak thei ṭhin lo.


"Zanin chu ṭhianpa Thangtean lo leng thla teh a rawn ti tlat mai a hei. Palaite len zan tur a nia a zam chhe ve deuh aniang," Ramdina'n a rawn tih takah chuan ka inthing harh vat a. "Zu leng tak rawh in ṭhiandun chuan zukin thlamuan mawlh teh u," ka lo ti var a. A jacket hmanthiam hain Bawihpuia, kei leh kan phir unaute min chuk dan dan hnuah a chhuak ta chauh a.


Tunlai a hmel hmuh a nuam a, kan naute ṭhanglian zel chu a hlimpui viau bakah an pian hun tur mawlh chu a nghahfak a ni ber. Keilahin huphurh takte hian ka huphurh thung a. Pakhat pawh hrin chhuah ka harsat laiin a ruala pahnih han hrin chu aw...ngam sarh a har khawp mai. Ni lah hi a liam zung zung mai si a, ngaihtuah tur a tamin rilru a chawl hman meuhlo.


Mahnia han awm chang phei hi chuan kan naute phir lo pian hunah hian an chungah thilṭhalo thleng ta se, nau vei laiin harsatna tawk ta ila tih ang reng techuan ngaihtuahna a luah roh roh reng a. Ka ngaihtuahna zawng zawngte hi ka chauh pui chang lah a tam. Ka chhungte leh ka pasal bakah kan fapate hi awmlo ta sela engtin nge ka awm ang pawh ka ngaihtuah ngamlo zawk. Tunah chuan ka damchhan leh hlimna, ka engkim tak meuh meuh an ni tawh si a.


Pindana kan nufatê chauhin kan awm a, a reh lutuk chuan ngaihtuahna bawk ka kawm leh mai hlauhvin Zothanpuii ka call ta ngawt a. Tunlai henu hi a reh reng reng lutuk a, keilah hi mi biak hmasakna chang hrelo ve tak ka ni ve bawk nen min rawn biakloh hi chuan biak hmasak lam hi ka lo mangnghilh tawh ṭhin a induh min ti pawh nise a awm viau mai.


A ring ral ral a, a rawn chhan rual chuan, "Tunlai hi i va han reh em em ve a? Engthil ṭha nge i tawn?" Ka ti teh thawr a. Min chhanna ka hriat erawh chuan nuamlo ti zetin lei ka chhuah nghal tut ringawt.


"Accident tenau ka tawk a, ka nakruh pakhat a tliak a vawiinah damdawiin aṭang kan chhuak chiah a, ka lo hrilh theihnghilh daih che anih kha. Tunah chuan ka ṭha tawh lutuk a nia, ka tlan par par thei ṭep tawh," alo ti zangkhai vah a. Henu tak hi chu aw...


"Ka nuten an hria em? An rawn kan ve lo che em ni? Awi a pawi e min lo hrilh vat tur che a nia keilah hi mi biak hmasak nachang hi ka hrelo leh lutuk a pawi tak tak a ni," inthiamlo zet chuan ka ti mawlh mawlh a, ani erawh alo nui ri hak hak thung.


"Raipuar chungin ilo kal thei dawn chuang lova, i nute chuan tlaiah min rawn kan tawh alawm. Ka rin aiin nakruh tliak hi alo na daih, a tirah chuan kal pawh ka kal ngil theilo mawle. Vivi-an min riahpui ṭumin zanlaiah ka ek a chhuak sia ka va inthiara cabin-a ka let lehlamin hmeichhe pakhat sam sei dum deuh mai hi hallway-a a kal phei fua lai ka hmu a, damdawiin kawr ala ha zui. Damdawiin reh leh a boruak zawng zawng nen khan ka hlau teh asin aw...a tuka chhuah ka dil nghal rum rum a, an lo la phal awkawng si lova hreh tawkin zankhat kan hriak leh a, cabin ka chhuahsan ngam tawhlo reng reng ka dawih zia hi. Mahse kan chhuah dawn ni ah ka hmeichhe hmuh kha kan veng Pastor fanu damlo lek alo ni tih ka hre ta chiah a, hlau chung chungin kan riak ve a Pastor fanu lek a nia ka hlauh kha," tiin a nui zui hawk hawk a, mi pawh a rawn tihlim leh viau e.


Ani biak hi zawng a thiltawn nuihzatthlak leh mak tak tak sawi tur a nei reng a, lehlam takah chuan a hlimawmin mahni ngaihtuahna ka kawm ngut ngut tur pawh min veng ṭhin viau a ni.


Hmanni a sam tih kir tir an haw lam pawh Vivi-a u in a ṭhianpate ina zu laksak turin alo chah mauh mai a, Zemabawka a u ṭhianpate in chu an va zawng chawp a. An haw lamah Traffic jam-in an hmaa bike an la su zui a, traffic Police-in alo la hmu fuh zui leh ta nghal a. An zu phurh pawh chu a hmu ṭhelh tih a rawn sawi a, hemi te pahnih hi chuan an tar hunah pawh an vanglaia an thiltawn sawi tur hi an ngah dawn bik mang e.


Ramdina a lo haw chuan chanchin ka lo zawt vat a, palaite pawhin mitmei leh ṭawngkam ṭha an lo dawng a ni awm a, an vawihnihnaah chuan an insawi rem thei tawh turah kan ngai. U Cki sawi ang tak takin Thangtea nupui nei tur hian lung a tileng ve daih thei nia mawle...a mak riau, "Thangtea nupui nei tur hian lunglen a zakzeh tel aniang u Cki pawn ka lung a leng a ti," Ramdina bula ka tihchuan a nuih aza khawp mai.


"A ni vel ang, mahse amah tak khu chu ngai chuanglo la," a ti ṭalh tho. "Amah tak khu chu ka ngai pawh a ni chuanglo, eng nge ni kha...khawtlang lunglen an tia mi khatiang ang khan ka awmin ka hria," ka tihrual chuan, "A ni lo ang, Ramdina lunglen anih kha," a tihchuan ner nang chungin, "Hmmmm," ka lo ti ringawt.


A tukzingah chuan beiseiloh deuh mai khualṭha kan thleng a, Dawngdawngate unau an hlim nasa mai.


"Eee Ruatfel ilo dam maw inhmuh ava khat ve..?" Ka nu chuan lo tiin an inchibai hmasa te te a. "Ka tum angin ka lo kal hma thei lo alawm mawle, inlo damtlang em?" lo ti ve ngeiin inchhungah chuan ka nu nen an rawnin zui lut a. Mimi-in thingpui a rawn chhawpsak nghal a, u Ruatfela chuan a enduh dauh dauh viau a Mimi-i erawh a lai niin ka hria choka-ah a phei lehnghal daih a, a rawn phei leh mai dawn emaw tih laiin ava awm ta reng sia ngaihven tur chuan ka va kal ve a.


Chawhmeh hminsa kan suan hlim hlawtte chu alo chhuang ṭha leh vel a, awmdan a thiamlo ni berin ka hria, "Va ṭhu phei ve la hei leh chen a rawn zin ve sia i hmel hmuh bakah ilo lawm ve tepawh a thlahlel dawn asin," tiin ka nawr chhuak lui a. Anu bulah chuan ava ṭhu thla ve a, engmah ava sawi chuang lem hlei lova. Tleirawl ngaihzawng nei thar ang mai alawm anih le...Dawngdawngate unau lahin an pu en hmiah mai si a, lehlam lehlamah amah si chetin an ṭhutchilh ran a, an lawm zawng tur tak a rawn leisak leh ngei bawka ṭawngkam hi chuan a duat thiamlo zawng a ni e.


"Chawte ei ve nghal rawh aw chaw kan chhum hnem teh mai a nia," tiin ka nuin chaw eiah chuan a sawm ṭan a, a hnial zet nain ka pu meuh pawhin ei ve tura a sawm takah chuan a hnial duh ta bik lova. Kan chhungkaw zingah chuan a kil ve ta a, a vawikhatna anih tawhloh bakah kan innel tlang tawha a inthlahrung tawh biklo.


Dawngdawngate unau lah pa hmangaihna leh duatna hrethiam rual tawh an ni bawk a an ngaina em em a, a chawhmeh suahsakte chu an han duh kher a. Mimi-in han khap ve sasawi ṭhin mahse awmzia a awm thei tak tak chuang lo. An hlim ve em a ni.


Chaw ei khama a ṭhut khawmuan leh zet hnuah a thlenin tur lampanin a inkhalh chho ta a. Ni hnih thum vel chu a cham dawn anih hmel a, zanah pawh a rawn lengthla ve leh ang chu.


"A Pite lehkhachaih i siam thiam em? Kan ṭhiante chuan an nei veka min lo siam sak ve," tiin ka nau mut zi chiah chu Dawngdawngate unauin Rambo polythene keng chunghian min rawn din chilh a.
"Engtin nge an siam ṭhin a? Ka thiam ve dawn mawni," ka lo ti sap a. Lehkhachaih pawh la chaih ngailo chuan engtin nge maw ka han siam thiam tehlul ang ni.


"Apu a awmlo em ni keichuan ka va thiam ve awmlo mang e," inthlahrung deuh chuan ka lo ti a, "Apu chu aleng daiha a nu leh api huanah an kal bawk sia a Putea a hman bawk si lo kan ṭhiante pawn an chaih sup sup tawh a, Pite min siam sak mai la..." tiin a ngen tak te hian min ngen dun rohva, midang tumah an hman bawk silo han hnial lah ka hreh ve tumhrang a.


Ka phone ka va la a, youtube rawn chungin chhuatah chuan kan inchap darh ta nuaih a. Ka mamawh tur ang chu an unauin an rawn la zel a, hmawlhte sei chu ka han suih chawp ve nawk nawk a. Sarang zai ngawr ngawr chu ka hnehsawh khawp a, mahse hmawlhte han charh beh lai tak kha ka tifuh thei der lo.


Thlan sa phunga ka beih hnuah pakhat chu ka siam zo ve thei ta hram a. Ka damchhung hian lehkhachaih ka siam ang tih ka ring pha ngailo.


Sangsanga'n khawlla va lain Sanghaṭin bur ruakah chuan a vet kual ta char char a.
"Pite ka ta tur siam ve tawh la," Dawngdawnga'n alo tih ve sek tawh avang chuan ka zai leh a. Pawnah an unauin an tlanchhuak a, "Pite a thlawk theilo!" tia min rawn auh tak lauh lauh avang chuan ka thiltih lai dahin pawnah chuan ka va chhuak ve ta nghal a.


"Khilai kawngpui aṭang khian rawn tlan thlakpui chhin la," ka tihchuan a han chho ve mai a. Uluk fe hian ka lo thlir a, Dawngdawnga'n lo vawn sakin a tlan ruala a thlah chiah chu thlawh chu sawiloh leiah a tla thla chawrha a hnuin a rawn hnuk thla hi a ni ringawt.


Ka siam uluk ve tehreng nen an ṭhian lehkha chaih keng far te pawh chuan an lo hmu ve vek sia an la nui uarh uarh zui a, ka zak lutuk chuan, "Thli a thaw lo a tin nih kha Sangsang lo haw la kan siam ṭha dawn nia," tiin ka ko haw ta vat vat a.


Ramdinate hnathawk chawl chu veranda-ah an lo ṭhu run tawh a, mi alo la nuih tut tut lehnghal a. "I kutchhuak chu nalh chu a nalh a..." tiin lehkhachaih chu a thlek vang vang phawt a, "Umm a nalh thlawn anih hi," a ti thum ta dut a. Mi lo maha siam hah ve nak a laia.


"A hmawlh hi a chhah lutuk anih hi," tih zawm lehin chem la turin Dawngdawnga a tira, a suih ṭhat sak hnuah ka thingpui lum hlanin alo siamsak a. A siam awlsam bik si thingpui ka va pek chuan an ṭhiante zingah an lo va chaih fel der tawh.


Ka nute huan kal chuan thlai hnah leh rah an rawn la nual a, tlaia zawrh turin kan tel nghal zung zung a. Thlengthlengite ṭhiandunin an han zuar leh a. An hah man hi an pocket money tur an dawng ziah bawka nuam an ti thei viau.


Zanah Thangtea a rawn leng nulh a, "Zaninte chu palai len nawn leh zan a ni lawm ni?" Ka nu chuan alo ti deuh hu a, "Ni e, ka rawn tei harh ve mai mai," Thangtea chuan alo ti mai a. "A zam ve anih hi ka nu Hlute," Rema chuan lo ti thungin zanin chu Thangtea kan fiam laih laih reng a. Thingpui kan inzawh hnulawka phone call a dawn chuan kan ngaichang ṭhap a.


A biak zawh rual chuan ding nghal vutin, "Tih tur leh inbuatsaihna tur neuh neuh a awm tawh sia ka haw tawh mai ang," a ti var a. Remate chuan pawt ṭhu lehin, "Khai aw kan u Thangtea pawn nupui min neihsan ve dawn ta tak tak e," tiin boruak chu a hma ai mahin a nuam tawh zawk.


Ani leh hun turte an sawi fel vek tawh a, thla hnih hnuah an ti deuh rum rum dawn a. Kan dawr lam pawh kan inrinlawk leh deuh a ngai dawn anih hi. Puanṭhui tur lah hi ka hmu thei der lo mai a, ka mamawhna hi a ni telin a sang tawh mai si a. Ngaihven leh vat chu a ngai a ni tunhnai hian ka lo manghilh leh veng veng ṭhin a...


Thangtea pawh rei ṭhu chi ni tawh heklo an ṭhianho chuan an inzui chhuak ta hlawm a.
An chhuah hnulawkah Victor-a leh Angaihi an lo inzui lut ve hlawl a, "Zanin chu in va reh teh ṭhap ve?" A rawn ti ve ngei a, Thangteate inlama an lenthlak tak chhante chu ka nuin alo hrilh a, Ramdina ber pawh a awm chuang si lova chhuah lehnghal mai a tum uk uk hman a. Mahse ka nuin, "Tunlai i lo leng khat sia thingpui tal te chu in ve phawt rawh. Hei i pu pawh a awm reng alawm, nangni ang rual kawm turte hi a duh ve ṭhin a," tiin a chelh ve rih a, thuawih tak chuan a ṭhu thla ve leh mai bawk a.


Angaihi Theihai rawn ken kan bawl lai chuan Mimi-i inleng tur pawh alo thleng a.
Victor-a nen chuan an lo inhmelhriat deuh reuh sa bawk nen Victor-a pawn ka pu Vanglai chanchin ngawt chu a lenchhung zawngin a ngaithla dawn biklo anih hmel e.


Kan theihai bawl chu kan inlengte pahnih pawh kan han chhawp ve tak naa mipa hi chuan thei bawl tih ang reng hi an ngaina vaklo nge thei hrim hrim hi an mamawh vaklo zawk pawh ka hrelo, vawikhat ve ve an tema a melh pawh an melh leh tawhlo. Thak an ngamlo zawk vang pawh a ni maithei.


"Vic-a kumin hi i awm tluan dawn nge Mas-ah i chhungte bula hmang tura haw i tum zawk?" ka nu'n a tihchuan, "Ka la chiang chiahlo, heta hman pawh a chakawm tho mai," tiin alo chhang mai a. "Ni e, hmang ve reng reng rawh. Christmas hi chu thingtlanga hman a nuam ber zel a nia," ka nu pawh chuan ti ve varin kan inlengte tlangnelloh hlau ber ṭhintu a ni bawka u Ruatfela nen chuan a biak chhawk zak zak mai.


Dar 9 dawnah haw turin Vic-a chu a ding ta ṭuah ṭuah a, "Angaih kan chhuk thla tawh mai dawn mi?" a tihchuan Angaihi pawh a ṭhiannu nen in mangṭhain an pahnih chuan an inzui thla ta a.


"Fela la leng reng rawh aw keichuan ka mut luh san mai teh ang che u. Zinglamah hian kan mu rei thei tawh ṭhin si lova, mut lam tal chu ka'n hma teh ang," tiin a pindanah a lut ta daih a. Ka pu pawhin, "Keipawh rei ṭhut hi ka tlin tawh meuhlo, mutthluk lup lup ai chuan hahdam deuhin ka va tlu zal zawk teh ang," ti leh ka pu pawh chu thawh a rual a. Keini nufa pawh hi inthiarfihlim vat ila a ṭha ang.


"Hei pui hi kan paw mu tawh ang nge puak hma chu a mut hi a chhuaklo emaw tih mai tur a nia mi a men leh hrep palh ang," tiin Bawihpuia ka pawm nawlh a. "Ala hma hi u Ramtea pawh ala rawn haw chuang hleinem la ṭhu ve rih rawh," tiin Mimi-i chuan min han chelh der ve bawk a.


"Ka mut a chhuak hrim hrim a, ka chhuk san mai ang cheu," ka ti ta tho a, Thlengthlengin min lo zui ve nghalin ka intihfai chhung chuan nau min lo awmsak a.


Pindana ka va let leh chuan, "Tunlai u Zuala hi a reh i ti ve em? u Sangkimi te inneih hnuah vawihnih chiah ka la hmu.
Kan khuaah a awm tawhlo zawk nge mawni dawn le..?" tiin a phun ve sup sup a.
Ka hriatloh lam tak a ni. A sawi takah chuan ni e tunlai hi a vang khawp mai.


"A haw phei rih pawh a ni maithei, tinge a? I ngai a mi?" Ka ti mai chu uarfe hian, "Teuhlo mai! Chutianglam pawh a nilo. Tuition min pek chhunzawm theih dawn leh dawnloh ka zawh ṭum khan, 'Ka thei rihlo, in in ka hmuh ringawt pawhin rilru a thar zela hma ka sawn theilo' alo tia..a mualbo in ka bo. A reh zui hmak bawk nen mak ka ti mai mai mawle," a tihchuan ka nu piancham kan lawm zana min en dan mawlh kha mitthlaah chiang fahran hian alo lang leh ta nghal a, ka duhlo ngei mai.


"Ka hriatloh lam tak a ni. A phone number pawh ka nei ve lo a, a Nuteite insak pawh an la zo em hleinem alo let leh ang," ka tihchuan, "Rilru dang ka put vanga sawi ka ni miahlo a nia aw...lo ngaikawi miah suh," tiin a chhuah hmachuan min chah mawlh mawlh a. Eng nge maw a zah viau le sawi ṭha ve mai sela. Ka hrethiam reng sia.


Bawihpuia mut hnuchuan Ramdina nghak tawh lem lovin ka lo muhil daih a, ka mu ṭha bawka zing ka harh ka han zi mar mai chu, "Aiah aiah! Ana lutuk!" Tiin ka sira mi banah chuan ka beng deuh pawp pawp a ni ber..."Tinge? Eng nge? I eng nge na?" Tiin sam thur bup hian a rawn ṭhu chhuak nghal vut a. "Ka..ka chawn...ka chawn tha a chatin ka hria," ṭah aw ṭuau hian ka ti chhuak thei hram a ni.


Puan chu hlip hlawkin ka chawn puar chu a hmet ta a, a nat zia mai chu ka mittui a hnam sawk thei alawm mawle. Bawihpuia ka pai lai khan heti hian ka awm ṭhin tih ka lo theihnghilh hman pek a...a na rapthlak si zing thawha zik mar hi chu a chi hian a chiloh let tawp tawp.


Chaw ei kham hlim hlawtah nu Mawii feh kal turin a kalpui turte nghah pahin kan inah alo leng phei a. A tih ziah danin kuhva a ei sem suah a, zo zial a pak khu talh talh bawk.


"In lo hre ve tawh em? Dami chuan Vengchhak Pathlawi Maroa a luhkhung kha," a rawn tihchuan kan chhungkua chu kan inmelh deuh he haw a. "Nangni chhungkua hi chu hetiang lamah hi chuan in bengvar lo ve mawle...In awm awm hian in awma in inngeih em em ringawt a. A luhkhung Maroa lah khi Dami aiin ala naupang zui a, a nupui tlan tauh lai tak ni tur a ni. Fa pahnih la naupang ve tê te an nei tawh lehnghal a, a mipa chhungte chuan Dami leh an chhungkua an hrechiang tawh bawka an duhlo khawp mai. Mahse Dami pui khian lemchan a thiam bakah Maroa thluak pawh khi a suksak hnehsawh viau a ni ang a thlah duh bik derlo. A nupui fanaute an lainat awm tak tak a ni," a ti deuh siam siam a, a thusawi zawng zawng hi a dik vek anih chuan nu Dami chu aw...rapthlak tih hian a sawi fiah zo tawh lo a ni ber e.


"Ava mak leh zel e aw...mi pasal em han luh khung duh mai chu. A mipa pawh chu a ti mak reng reng an fate pawh ngaihtuah hmasak ve eih tur a nia," pawi tih hmel tak hian ka nu chuan alo ti vawng vawng a.


"Nia mawle, mi rapthlak deuh deuh hi kan lo tam tawh khawp a, thleng theilo tak tak pawh hi a awm tawh lo," nu Mawii chuan a ti zui halh a. A ṭhiante an rawn thlen takah chuan an kawtchhuah lampanin an inzui thla ta hlawm a.


Ka nuho chuan kan thu thar hriat chu han sawi zui ngaihna vak pawh kan hrelo. Pa Chhuana nen an inṭhen ta pawh hi pa Chhuana hi chhanhimin a awm ka tilo theilo.


Vawiin chu u Ruatfela a rawn chuangkaia, ka nu huanpal chhe laite a siamṭhat sak a ka nu pawh a lawm vur vur viau a, an induhsak tawh khawp mai.


Mimi-i nen in kan tifai a, "Kan TV pawh hi a hlui tawh lutuk a ka pu lengchhuak peihlo in awmtleina ve ber a ni bawk sia a hmai hlai chi ṭha deuh kha lei tum ve ila a ṭha ang. A hnung pawng chi hi chu alo te em anih hi," chhuar hruk pahin Mimi-i chuan a ti sap sap a.


"Ni e, tiraw Tv te chu inchhung tipui tu a ni ve a, lei ro ro chuan a ṭha law law lei hi a ṭha mai. A tlo bawk a," ka lo ti ve a. Inchhung mawiloh hlau hi chu hmeichhiate bawk hi kan ni chiang alawm. Parda mai mai pawh kan ngaipawimawh thei viau a, inchhung hi a tih pui bakah a chawi nung ve riau bawk a tin ni.


Inchhung hi chu bungrua kan nei ṭha emaw ṭhalo emaw a enkawltute hi han chefelin taima tak han ni phawt ila kan lang zahawm mai a ni.


Kan intifai zo Mimi-i inbual hlana ka ṭhut hahdam lai chuan Thanpuiin min rawn video call teh nawlh a. Ka lak rual chuan, "Ni thum chhung kan picnic dawna kan thlenna tur hotel leh a chhehvel hi lo en ve teh a nuam turu mai," tiin Hotel building leh a chhehvel chu a rawn la kual nghal zung zung a, "Khawilai nge a hmun ava nawm hmel em em," ka tihchuan, "Hetah Tanhril lamah daih a nia, a nuam lutuk. En rawh saw lai Sap pa saw a sang rapthlak nichinah a san zawng ka hrechiang chaka ka va kal pel a, a âwm ka chenpha ṭawk ṭawk chauh," tiin a nui hawk hawk a, henu tak hi chu aw...


"Dam pawh i dam ṭha tawh reng reng em ni picnic naah te i kal a?" Ka tihchuan, "Inah ka tawm rei lutuka ka dam theilo zawk mawle, school lamah chawlh ka la tho a ṭhianhoin kan hanin ti thawveng ve anih hi," lo tiin nuam a tih hmel khawp a. "Nuam deuhin lo hmang rawh u, lo dam ṭha var tawh rawh," ka tih hnulawkah kan inbiakna kan ti tawp a. Ka nulat laite ka ngaihtuah chhuak a, hetianga ṭhiante nena han chhuah hote hi kan nei ngailo tih tur tluk a nia, zanriah kan eichhuak ṭhin tih kha a ni mai a. Hna ringawt ka buaipui a, tun hnuah hian ka fate bula ka vanglai hun hmandan sawi tur ka neihloh zia ka hre ve ta chiah.


Ka nu call ka dawng leh a, a phone chu a ṭha tawh anih hmel. "Zingah ipa chu Thenzawla kan insak kha zawh hlim kha en turin a chhuak tawh a, tunlai ka nuamsam vaklo bawk nen motor chuan ka zuam ngang si lova ka kal ve talo mai anih hi," alo ti a. Nupuii chu ka Papuia nupui kha a ni.


"Ava zia lo ve aw...a hmuna va hmuh a chakawm nen. Nangmah ber chu engtin nge i awm a?" Ka tihchuan, "Khawsikin min ṭham er er reng a, mahse hei ka zia tawh lutuk a nia. I pi pawh tunlai chu a nula khawp mai. In chhungkua in damtlang em?" Tiin eng eng emaw chu min zawt a, "Nau inneih hun chu damtea kan awm chuan hetah rawn nei thei ula ka ti ngawt mai. Eng emaw thul thilah hmunpui lam zawk hi pan theih hram chuan a ṭha ngai
a nia," lo ti lehin hei hi chu phir ka pai vang niin ka hria a vei ngang mai.


"Ni e, keipawh a dawn hnaihah chuan khalama rawn awm rih pawh pawi ka tilo.
Ka chhungte pawh ka lo sawipui ṭan anga, dam hi chuan hunte hi a kal chak si a kar loah a hun chu alo thleng leh mai ang," ka lo ti ve bawk a. Ngaihtuahna ṭhalo pui pui neih ka chin roh avang hian hmunpui lama neih chu a hma zawng aiin ka duh ti ila a dik ber ang.


"Aw rokhawlhnate a awm anih loh chuan heta rawn neih ngei ngei in lo tum dawn nia. Thudang a lai chuan, ipa in ram lehkha vel kha a thlak tawh thu min hrilh a, hmanni zingah Kimtei nen an inhmuh thu min hrilh bawk a. Anu enkawlna tur man vel an lo indil a ni awm e," beiseiloh deuh mai hian a rawn ti a, ka pa chuan alo hrilh ngei anih hi.


"Anih chu mawle, ṭanpuina a mamawh ve viau te pawh a ni mahna. Ka pa nen in inkar a ṭha zel ang chu tiraw?" tia ka zawh chuan, "Aa...ṭha a ni mai ang chu. Kan ngai reng mai," a tihchuan a sawi duh sawilo ta loa insum hi ang ka ti tlat pek a, mahse ka zawt duh hranlo.


Ka nu nen kan inbe zo chiah tihah ka phone bawk chu a rawn ri leh a, vawiin chu eng nge maw an hriata min rawn biak sup sup hlawm le ti rilru neuh neuh chunga caller id ka en chuan Ramdina lek alo nia...kawmthlang lawkah a awm reng sia engah nge min rawn call le?


"Aw eng nge?"


"Eng nge i tih? I buailoh chuan lo chhuk lawk teh," a rawn ti nghal thawr a.


"Eng nge a?" Ka tih zawh rual deuh thaw chuan, "Lo chhuk vat mai la," alo ti leh nghut a. "Khawiah?" ka tih leh chuan, "Hetah hnathawhnaah," tiin call a ti tawp nghal daih a. Engtak chu ni ang maw?


Mimi-i a ha vel mek a ka pu bulah Bawihpuia chu dah lailawkin inhnuai chu ka pan thla ta a. An hnathawhnaah chuan ka va dak dek dek a, min lo hmuhrual chuan lut turin min lo hui zeuh a.

A hnathawkte pahnih chu an buai buaiin an lo buai rih khawp mai a, min ngaihven lem lo.


"Eng nge a?" A bul ka thlen rual chuan ka va ti a, "Hmuh hmasak tir ber che ka duh a, eng nge i ngaihdan?" tiin a hmaah chuan min din tira. Ka hmaah chuan naupang ṭhuthleng tur ni awm tak hi alo inhung a, ṭhutthleng pakhat nghenchhana thil inziak chu chiang deuh zawka ka hmuh theihnan ka zu bih hnai a, 'Vanlalhlimpuia' tih hi alo inker a, a dang pahnih chu kan phir unaute tan a siam ve tih ka hrethiam mai.


Ka nui sak a, inherin ṭha ka tih leh tihloh hriatchak hmel tak hian min lo melh chhuk ran tawh. "Khawnge ka ta ve tur?" vuihmui pu lek lek chuan ka ti ta daih a, "I duh ve mi?" alo ti he haw a. A fate bak hi ngaihtuah dang a nei tawhlo emaw tih mai tur hi a nia, keichu a behbawm ang chauh.


"Duh ve lohin, a upa ber pawhin chaw ala bar thiam em lova ṭhutthleng mawi deuh i siamsak bik a. A dang pahnih phei hi chu...," tiin sawi pawh ka sawi zawmlo. Ka nuih a za ru bawk nen, pian em pawh an la piang si lova ṭhutthleng a siamsak nghal der chu a nia..hetiang hian mi pasalte hian an ti ve ṭhin tho angem le?


"Ka la siam ve dawn che nia, eng nge i ngaihdan chu sawi la, nalh i tihzawng a ni em?" tiin phur deuh chuan min en kar a.
Chuti na na na, "Ummm a nalh, a ṭha lutuk engmah sawiselna lai tur ka hrelo. Hetiang ang chiah chiah hian ka duhve," ka tihchuan a nui nghal var var a.


"Umm uluk tawkin hahdam deuha i ṭhutna turin ka la siamsak ve ang che," tia ka biang tawn tawna rawn dawm a rawn kun hniam chuan ka lo eu vak a, "Midang an awm ve reng hi..!" ring lutuk silo hian ka ti vat a, a hawikual thuak a. "A ho e," tiliam puatin a tih tum chu a ṭhulh phah ta chuanglo.


"A dang pahnihah hi chuan an lo pian huna an hming kan phuah veleh kan ker sak leh dawn nia," tiin lungawi hmel deuh hian ṭhutthleng chu a thlir vang vang a.


"Anih ka chho mai dawn aw, Bawihpuia mut a hun tawha ka nute huan kal pawh an rawn chho dawn hnai tawh ang," tiin ka chhohsan a. Dawngdawngate unau chuan an lehkhachaih chu an tleipui khawp a, sang deuh deuhah hian an cheih thiam reuhva nawm hmel ka lo ti lutuk.


Chhun chawlh laiin ṭhenawmten Dawnfawh min rawn thar tem a, a pum a lian ṭhain a vawt raih bawk nen ei a manhla tak tak a ni.


"Dami mai mai chu mi pasal alo luhkhung leh nghal ringawt a, an pa nen an inṭhenna pawh ala reiloh tehreng nen a ti ho reuh tak tak a ni," dawnfawh min rawn petunu a han ti deuh vawng vawng a, "Khi nu pui khi a bul aṭanga baptist angai anih khi. A ni em em lo, rapthlak dante pawh hi a hre zozai lutuk alawm," ka nu chuan a ti ve mauh mai a, kan nui ru tut tut hlawm nain dik kan ti viau ve tho bawk sia kan ngawi dak ringawt.


Ei rawngbawl hun hmain ka hanin check-up tir zuaih a, zinglama kal tur chu ni mahse ka lo theihnghilh leh daih a, damdawiin lûn lutuk a nilo bawka a pawi em em hranlo.


Ultra-sound min lo tihsak a, kan phir unaute pawh an ṭhangṭha viau anih hmel a, an lungphu ri ka hriatchuan a hlimawm zia leh ropuizia ka hrechhuak nawn awn awn a ni ber.


Ka damdawi ei zawh tawhte chu min pe lehin Andrew-a chu damlo buaipuiin biak buai hman pawh a ni rih meuh si lova dawr lam ka pan tlang ta nghal a. Ka kal tlai ang reng bawk nen rei pawh ṭhu tawh lovin ka haw thla nghal a, haw kawngah kawt pa Chhuana motor sil turh turh chu ka va hmu fuh a. Ka thlir vang vang hnuah be talo chuan ka kaltlang nul nul a. Eng nge ni ka hriat pawh ka hre nek lo ve.


Tlaiah ka ultra-sound han tihna naute thlalak chu Ramdina ka pe a, a wallet-ah a dah ṭha nghal hmak mai. Bawihpuia pawh kha ala dah ṭha reng a, kei aiin a kawl rei thei zawk. Pakhat ve vein kan in sema keichuan khawnge ka dah pawh ka hre leh tawhlo.


Chaw ei hma lawkin Pialrala alo thleng a, a workshop hawn huna mi tur mamawh leh eng ilo lam khawm ṭan turin Aizawl chhuk a tum a, a phur khawp mai.


Chaw ei khamah ultrasound thlatlak kha Ramdina chuan ka nuteho a hmuh tir ve a, kan tlangval chuan uluk fe hian alo thlek de dak dak a. "A khawi ber kha nge naute chu?" a rawn ti chhuak hlawl a, a enchik tehreng nen alo en thiamloh vang zawk a nimaw kha ti fakoa alo enchik ni.


"Hei helaia a dum pahnih hi i hmulo mi? Hei an lu pawh a lan chian tawh em hi," Mimi-i chuan lo tiin an hanin kawhhmuh a.
"Ka enna aṭangte chuan a dum vek alawm. Kha kha a mawnglam emaw ka tia," ala tizui a. Hetiang enthiamlo pawh hi an awm chawk a nia. Ani chu nupui a neih hunah pawh a bangbo lutuk tawh lo turah ngai ang.


"Pakhat tal hi chu a hming ka phuah ve dawn," a tihchuan, "Hual lawk i nei deuh em ni?" Ka lo ti var a. "Nei chuang nang," a tihzawh rual deuh thawin, "Hmeichhia anih chuan Darchhingpuii," a ti leh ang lawi a. A nui duh derlo lehnghal a ti tak tak ang tih ka hlau hnuhnawh leh ta viau mai.


"Anih loh pawn Lûnchhûngliani" a ti leh zel a, ka nuih pawh aza lo a phuah duh tak tak ang tih ka hlau.


"Hranghlui hming deuh i phuahsak dawnloh phawt chuan Leen-in a phal chuan i phuah thei mahna," Mimi-i'n alo ti a. "Pakhat zawk zawk hi chu ka hauh lawk a nia," a ti ve leh bur mai a. Aw pawh ka la pawh ngam lo. Nakinah an lo phiam hunah chiang deuhin a hming hual sawi phawt sela aw ka pawh chauh ang.


"Engpawh chu nise Sava thlawk lai perh thlak i zu tum leh teh ang," Tiin thawveng deuha a chhuak tur chu Victor-a leh Angaihi an rawnin zui lut leh ta sia, "I lengchhuak dawn elo?" a hnunga lo kal Angaihi lah chuan ala rawn ti deuh ham ham zui a.


A Sava perh thlak tum ber hetah a rawn thlawk lut ta sia Pialrala chu a ṭhu fel leh hmân tawh. Mahse a chhuah dawna a thawven vei nen lungawilohna nei ang mai hian a ṭhu tum vuau thung a, engmah lah chu a sawi chuang lem hlei lova, a ṭhu tum vuau a, an len chhung zawngin Victor-a chu a melh rum ul a chuzawng chu a nimai.


"U Vic kan zo ṭep aw," choka aṭanga Angaihin a rawn tih lang lang chuan, "Pawnah mei zu pahin ka lo nghak ang che," Vic-a pawhin ti ve maiin Ramdina nen an inzui chhuak a. "Ti rawh u nangni pawh mut a hun tawh Dawngdawng pindanah lut tawh rawh u, naktuk school kal a ngaih kha," tiin Mimi-i te nufa thum chu pindanah an inzui lut hlawm a. Zanin chu u Ruatfela ala rawn lang miah lo a, dar 8 a pel awrh chauh bawka a rawn leng thla tho chuan ka ring.


"Anih naktukah ka lo sawm chho dawn che nia aw," tiin Angaihi pawh a lehkhabu pawm chungin alo phei ve ta hram a.
Pialrala ṭhu muk run pawh rawn ding ve chiahin, "Thil duh a thuhmun chuan mihring an inhua a, thil huat a thuhmun chuan mihring pawh an inthurual ṭhin tih a ni a. Ka duh ber an rawn duhve anih chuan hmelma ka ngah viau dawn tihna anih chu," a ti charh charh a, a thutak viau mai bawk.


"Engtin maw?!" Angaihi lah chuan ka naupawm lai min rawn melh zawk pah hian a ti deuh he haw a, tunge a biak zawk hriat hekloh a rawn bangbo lutuk chu ka khawngaih letling zawk.


"Engmah, a hmaa i thusawi kha theihnghilh lo la a nimai. Han pass lo na teh," an intih khum deuh chher chher tawh mai a, pass kha a pawimawh em a tin ni.


"I ho reuh e a. Dawr bungraw la turin maw i zin dawn? Workshop chu i hawng tak tak dawn a mi?" Kal ta mai lo chuan Angaihi pawhin a han zawt khawmawi ve aniang chu. "Nakin lawka ka nupui fanaute ka chawmna turin ka hawng thuai ang," pakhat chuan lo ti ve bawkin, "Thil min lo hawn rawh aw," tia a chah chuan, "Thilpek hlu ber hetah ka ding ve renga a dang eng nge ila duh cheu a?" nghal chhuahin Pialrala lah chuan alo la ti kawisawi ve leh zel a. Ka mitmei hi chu a vengthawng tawhlo teh a nia.


"I ninawm eee..ka haw dawn," Tiin an inchhuahsan leh ta nge nge anih kha.
"Ka inchei ve laklawh tawh ka han lengchhuak tho teh ang," ti leh chhuah a rual a. A u in, "Khawnge i kal dawn?" alo tihchuan, "Bial ka fang dawn," tih bakin a chhanglo.


Thanpuii chuan an hotel pindana a in selfie-na thlalakte chu min rawn thawn ve a, hringnun hi chu a chen bik mawle.
Thlalak pakhat a rawn thawn thar berah chuan Receptionist-te Counter bula ding kamis var ha mipa pakhat smart deuh taka inchei hi mikhualte nen ni awm tak an inbe lai hi alo tel a, a hnuaiah chuan, "Hotel neitupa fapa hi a chhelo rap mai mawle! A polite bawk si Vivi-an a star lutuk kan enthla mek," tih hi alo nia, ava hahthlak ṭhin e aw..


"I single rei tawh sia bem thluk tum ngat ngat rawh," ka va tihchuan typing a rawnin ti nghal va va a. "Nupui a nei ṭep an tiin ka hria...awi ka ui lutuk. Mahse hual ruk pakhat ka nei alawm nakinah kimchang deuhin ka la hrilh ang che spy pah chuan inhrilh a rem ṭeuhlo anih hi," a rawn ti duah a. Tu tak ni ang maw Zothanpuii meuhin a hual ruk ve ṭat chu.


Ramdina lo mut luh chuan naute neih hun tur chungchang vel chu ka lo sawipui a. Ani pawhin hmunpui lama neih chu alo duh ve tho a, "Fimkhur thu hlaah khulama neih chu a ṭha zawk ang. Mihring chu engthil pawh tawk thut thei kan ni a, i ngaih ti ṭhatloh phahnan hmang chuanglo la. I rilrute hi ti hah vak ṭhin suh itan leh naute tan pawh a ṭhalo. I hmelah hian a hriat theih teh mai a nia," a ti dap dap a. Nie, ṭullo deuha rilru han sen vak te hi ka ching thar thut a.


"Naktuk zingah zik mar ka tum chuan min lo man bet vat rawh aw," tiin mut hmain ka chah a, "A rai zawk si hi i harh hmasa ziaha
i kut leh ke hi kan phuar tawp mai dawn mawni," a ti thum dut dut a. Mut duh viau e tilo hian ani aiin ka harh hmasa ziah tak tak a, zinglamah hi chuan kei aiin mut an duh pafa zawk. Kei erawh zan men rei ka theilo thung a.


Mahse a tukzing chu kei aiin a harh hmasa ve teh mial a, ka harh hun nghakin mi alo la ṭhutchilh run zui a. Zik mar ka tum veleh a kut pahnihin ka kut chu a man bet a, a bawp pakhatin ka ke a khan nghal hmak bawk a. A chetdan chuan mi ti hamhaih ve deuh mahse min lo dang tur khan ka ti ve miau sia, ka lawm rualin ka nuih aza lutuk chu zing zingah dul fawn hlawrh hlawrh khawpa nasain ka han nuih uarh uarh anih kha. A hlimawm letling phian.


Zana tui taka ka mu ka han harh hi chuan ka lo theihnghilh leh ṭhin a, zik mar hi ka tum leh uai uai zel. Hreawm ṭhin ngawt mai. Ka kesir lah hi a han ro thei em em mai bawk a, mahse chawn leh ke thak hiah nan a rem phian thung. Keimah hi ka thau vang nge kan inneih zungbun pawh hmanni ka inbual turin phelh ka tuma ka lo tawt deuh tawh a, a tan hlen ka hlau si tunah pawh ka bun ngam tawhlo ka silver ṭhi awrh lai locket-ah ka hmang daih.


Naute lungphute hi ka hrethei tawh ka timai mut veng veng changte hian ka bengah hian a thum ve tlek tlek zel a, rawn la pet em lo mahse ka pumchhunga an che te hi ka hrethei vek zel.


"Bawihpuia nen kan lo han chho hmasa ang nge, tikhan la muzal rih mai mai rawh," Tiin Bawihpuia a thlak zawh hnuah Ramdina chuan min chhuahsan a, mut mai mai hi chu a hreawmloh mawle...


Darkar khat vel ka chhing leh sek a. Tho harhin khum ka siam fel a, pindan pawh a hnawk lai tifel zung zungin ka va inphih fai a. Ka inthlak laiin Thanpuii call ka dawng a, engtak rawn report leh ang maw ti rilru chunga ka chhan chuan, "Chaw ei turin kan chhuk a, mizinga sawi chi a ni angem ka chiang chiah si lova hei washroom-ah ka tlang nghal daih a. Englo a nia kan pindan aṭanga kan chhuakin ipa lift chuang tur ka hmu a," a rawn ti ta mai a. A thusawi chu ka hresual emaw ka ti hial zawk.


"Engtin maw? I hmusualte chu a ni lo maw, ka pate chu nimin zingah khan Thenzawlah a zin daih alawm," ka lo tih pawh chuan, "Ka chiang lutuk ipa ngei alawm. A tirah chuan a nilo emaw ka ti ve tho a, va auh ka tum uka mahse a sira hmeichhe ding ka hmuhrualin pot phenah ka biru daih," a rawn ti leh zel a. A ṭawngdan aṭang chuan a chian hmel nasa mai bawk si nen rilru a tibuai khawp mai.


"Anih leh tunge a bula hmeichhia chu ni a? I hriat zawng a ni em?" zam ru tak chung leh thinphu dep dep chuan ka zawt a.
"Aw...hmeichhia chu, kha i laizawnnu anga in ina rawn awm ve reng kha. Tunge a hming kha..aw Kimtei a ni tak! Kimtei nen khan alawm, an inthawm danah chuan chawlh hmangte pawh an ang mah zawk.
Enteh sawi nuam chu a ni miah lova mahse ipa leh Kimtei inkarah hian eng emaw awm a awmte chu a nilo maw?" A rawn tih leh lek phei chuan rilru a mang vek a ni ber e.


"I rilru tihah ka duh miah lo naa chu ka ngaihtuahnaah hian eng eng emaw hi alo lang ve zut zut a. Khatianga inchhungkua a bum hnuah cheu engtin nge ipa nen hlim deuha an la inhmuh zui theih le ka ti deuh mai mai," a tihchuan ka la ngawi reng a, rilru chu a tibuaiin ngaihdan erawh ka nei thiam ruak thung.


"I ngaihdan chu ka hrethiam alawm, ih maw Thanpui, kan chhungkaw chungchang vel chu engkim i hre tho a, tuna i thil hmuh pawh kha thil pangngai tak a nilo tih chu kan hre ve ve a. Hetiang ringawta rilru nuamlo leh chhungkua inringhlel tawn renga awm hi hreawm ka ti lutuk tawh. Chuvang chuan hotel-a incham chhungtal chu min lo thli thlai sak thei angem? I inhmuh tir loh theih chuan duhthusam a nia, ka nu pawh engkim hrilh ka duh. A finfiahnan thlalak pawh ka mamawh dawn a, engkim hi chiangtaka hriat vek ka duh tawh," ka ti ta duah a, beisei ai takin ka ṭawngkam pawh a felfai daih. A hmaa ka ngaihṭhatlohnate kha a dik nia hriatna ka nei a, a dik anih tehreng chuan kan chhungkaw tawpna tur tak tak a ni tawh ang.


"Tehreng mai, lo lunggai suh chutiangte chu ka thiam zawng tak alawm. Min ring tawp rawh," zangkhai vah hian lehlama mi chuan alo ti a. "Hun hlimawm hmang tura i kal ka rawn ti ho ta vek anih hi," inthiamlo angreng taka ka tihchuan, "Teuhlo mai a! Hetiang in enthlak tih vel hi chu film-ah ka en nasa a ka tih ve chhin chak mah nak alai a. Mahse nangchu i rilru tih hah lutuk loh lo tum hram hram rawh aw, a pawi thui thei tih chu i hriat ve tho kha," a rawn ti ve a. Mi hi chu a lo ngaihtuah ve ṭhin teh a nia.


Kan inbiak zawh chuan ka nu ka call lehnghal a, ka va be hma lutuk chu mak alo ti ang reng khawp lehnghal. "Nu, ka pa nen in inbe leh tawh em? Eng nge a chanchin?" pangngai tak chuan ka ti a. "Aw nizanah kan inbia a, in chu rawng hnawih chiah a ngai tawh e a tia. Vawiin chu a cham rih phawt anga naktuk zingkara lo chhuah a tum a," a rawn tih laia ka ṭah han chhuah dan chu aw...ka ṭawngchhuah leh vaih chuan ṭap nghal thei mai tur ang hian ka hrawkah min hnawh tlat a. Heti taka ka pain a bum chiang mai hi na ka ti takzet. Hetianga phatsan ni tur hian engthilsual nge atih bika a phu ve reng em ni? Ka pa ka huatna ai mahin ka nu ka lainatna chu a tam zawk ngei ang.


"Mate, engtizia nge a? A tawp daih a mawni le?" Ka ngawirei ta lutuk chu a phun sep sep a. Inti paukhauh luiin, "Aa..chanchin ka rawn hre duh mai mai ka call tlang thei lo a," ka ṭap tur insum nasa lutuk chuan ka ti lawi rat a. Engkim ka hrilh ngei chu ala ngai dawn si a, tunah zawng ka la inpeih lo deuh a ni e.


"E aw anih chu, biak tlang hi a har khawp a, a awmna velah signal an nei ṭhalo tepawh a ni maithei. I aw chu ava dang ta ve i nuam sam lo em ni?" A rawn tiha min ngaihtuahna awka chuan rilru no a kaitho hi a ni ber...chhan pawh ka chhanglo theilo ka awmdan chu a hreawm vel vek a ni ber.


"Umm..ka hritlang ve deuh a..," tiin dawt ka sawi ta ngawt a. In enkawl ṭha tura min chahte chuan ṭah insum ṭeuh chunghian ka lo ngaithla reng a.


Pindan kawngkhar lo inhawngin Ramdina min rawn zawng chu a rawn hawi kual thuak thuak a. Dressing table hmaa ka chu
min rawn hmuh rualin ka lam alo pan phei nghal a. A hmui phun hian chaw ei an hman tawh thu min lo hrilh a, ka buk nghat chuan ka hmel chu uluk zawk hian a rawn thlek a. Min zawh hmachuan chuan, "Ka nu," ka lo ti sapa.


Kal ta mai lo chuan ka hmaah tak a rawn ṭhu hniam a. Eng nge ka lungngaih chhan pawh hrechuanglo hian min hnem nan ti ni awm takin ka kutah chuan a rawn chelh a.
Lehlamah ka nu pawh chuan, "Inpa teh tunlai hna an ngah em?" A tihchuan phone chu ka pe ringawt a. "Aw ka pi i dam ṭha maw?" phone a lak rual chuan a tive mai a.
Speaker-a a dah nghal avangin ka nu nen an inbiakna chu engkim ka hre ve vek a.


"Inbiakna hun hi kan nei khat ṭhin si a, tukin chu kan sawi ve duah teh ang.
Englo a nia maw Ramte, i nu nen hian kan inkawm nasa ṭhin a, nu fel leh ṭha tak a ni tih ka hriat avanga ka fanu nena inhrawn tur pawha ka iai loh leh anu atana ka duhpui em em zawk a nia. Nangmah tak hi chu khaw khata awmte kan lo nih tawhloh avangin chiangtaka han sawi turin mipa ṭha i ni em ka hrelo. Ka phak ang tawkin i chanchin kha hriat ve ka tum nasa ṭhin a, tumah rengin a chhe zawnga i chanchin sawi tur an hriat tak loah chuan ngaih chu angam ve thei ta deuh a. Ama'rawhchu mihringte hi chu engtik lai pawha rilru danglam thei leh inthlak thut thei vek kan ni a, i inneih hnu thleng khan ka thinlung chhungah hian kaptu ka nei reng ṭhin.
Leen-i ka nawr lui pawh kha ka damchhunga ka inchhir phahna a ni ang tih ka hlauva, ani lah hi a tih tawhloh lamah chuan apa ang chiah. Inṭhente kha a rawn ti leh rum rum ang tih pawh ka hlauhpui khawp a, mahse hei, beiseilo leh rinloh takin chhungkua hial indin dun der tawh chu a ni sia. Ka makpa atana nang ka lo thlang che kha ka tihsual loh zia hi a ni telin ka chiang a, in kianga ka fanu hlim zia ka hriatin thilṭha tak tihsak angin ka inhriat phah ṭhin. Ka duh ber chu tun ang hian nupa lungrual leh inhmangaih tak ni reng ula, thu inbahfuhloh chang leh inhmuhthiamloh changte pawh awmin infa enkawl dan kawngah pawh inthu a inhmuhloh chang a tam dawn a. Chung hunah te chuan ka ngen duh che chu zawldawh taka Leen-i ilo tih a, chhawmdawl a ngaih huna a kianga awm reng tur leh a sual leh luhlul viau lai pawha zilh hautu pasal leh ṭhianṭha tak, engkim a thlen ngamna leh inghahna in ni reng la. Keini chuan kan dampui reng dawn lova, ka awmloh hunah pawh i kiangah a awm tih ka hriatna hian thlamuangtakin min chawlh tir thei ang. Pawnlamah hian lang chakin sual ve viau ṭhin mahsela, hmeichhe awm nem tak a ni tih lo theihnghilh ngai lo la, hei chauh hi a ni mai ka duhthusam chu. Ka fanu hlimna aia duh engdang mah ka neilo,"


Chung a thusawi zawng zawngte chu hmaih nei hauh lovin chiangtakin ka hre vek a. Ka hlimna aia duh engdang mah a nei lova, a hlimna tur keiin ka duh thung a.
Engkim chuan ka lung an tichhe vek tawh a ni ber mai.


"Ka pi i fanu chu lo ngaihtuah duh reng reng suh. Mipa ṭha leh fel famkim tak chu nilo mah ila hei hi ka tiam ang che. Kan hma hunah chuan engpawhin min lo hmuak a ni thei, in fanu, hmangaihna nena in enkawl seilen hi rilruna leh thinlung hliamin ka siam ngai lovang," ka hma ami in a tihchuan ka en reng a. Ka mita min en reng chunghian ngaihawmtakin a nui zui a.


"Ni e, kan fanu chu i ta a ni tawh a, ka rinna i chungah ka nghat tawp a nia. Kan inbiakna te hi alo hre palh ang nge, a ṭah belh ve ropui si hnar ping ṭeuhin alo ṭap palh ang," a rawn tihchuan Ramdina pawh a nui hawk a, keichu mittui tlingpam chungin ka ṭhu nur nang ringawt.


Chaw ei tui tia an inthlah hnuah, "Tinge ṭah ilo tum a?" zaidam zet hian a ti a. Insut deuh faih chunghian, "Ka ngai alawm," ka ti ringawt a, nuiza insum zet chunghian min en reng a. A ṭhut dan ang ang chuan min rawn kuah a, a nghawnga lo kuah chungin a darah chuan hmai ka phum nghal daih a.
Ka hnunga chul heuh heuh pah hian, "In inhmu thei ṭep tawh alawm. Reilote chauh chu la nghak hram hram rawh aw," a ti dam leh tluam a. Tuna ka nat chhan erawh thildang vang a ni reng si a.


He natna hi tawp vat vat se ka duh. Inphatsanna leh inbumna kara leng tawh lovin ka nu pawh zalen leh hahdam takin a hringnun a hmang ve thei tawh ang.
Chutiang tur chuan ke ka pen zel tawh bawk anga, kan tana ṭha tur zawk anih chuan kehchhiat rup chang pawh a awm ang. Chutiang hneh thei tura Siamtu duan kan ni alawm.


*****************